وصية العليله وحسرتها « سلام الله عليها »


ارد اوصـي يـالـتـكّـتــبون
عالعليله بت أخو ام عـون
بالجذب عالناگه اكتبوني اصعدت
چــلمـة الــعـافــوچ بـيـها تـعـذبـت
يــالـتـكّـتـبـون
____________________________

كــل قــصايـدكـم اشـوفن والـدي
يعـوفـني ومااسمع يگلي اصعدي
الــعزيـزه آنـه وحـبـــيـبة ســيدي
بـيــن حـيــطـان اربـعـه ولوحدي

أسمي مو ويه الضـعينه
أخــتــنگ واذكــر حنينه
عــمري خـلص بالـحزن وتمرمرت
چــلــمة الـعـافــوچ بيــها تعـذبت
يــالـتـكّـتـبـون
_____________1______________

حـسين ابـويه سافر لطـف كربله
اكـتـبونــي فـارشـه مـصـلايه أله
حـســين مـا يـنـقـره الا ابـسـمـله
يــخـتنـگ لو آنــه مـو بــالــعايله

ياهـو اليعــوض حـنـانـه
ماكـو غـيره يسد مكانـه
مــن رحـل عــني أبـويه تغـربت
چــلــمة الـعـافــوچ بيــها تعـذبت
يــالـتـكّـتـبـون
_____________2______________


كــون أسـمع رجـع يــاخذني الكمر
وبالطفوف اعطش ويذبحلي النهر
ومــن ابـويـه حسـين يرتاح الـنظر
واركــض لعــبد لله الـولـيـلـع بنحر

كل محرم اسـمع الـناس
مـا خذاني عـمي عبـاس
كل صــبح منتظـره يلفيني گلت
چــلــمة الـعـافــوچ بيــها تعـذبت
يــالـتـكّـتـبـون
_____________3______________

كــون شـاعـر يكـتـب آنــه رايـحه
وي ابـويـه و مـا بـقــيت بـنـايـحه
وخيمه عندي ودمعتي ماطـايـحه
والقـصــيده مستـهـلـهـا الــفـاتـحه

حـتـى أكولن يافرحتي
أهلي واهسها ضحكتي
صـح عليـله وهسه لا زينه صرت
چــلــمة الـعـافــوچ بيــها تعـذبت
يــالـتـكّـتـبـون
_____________4______________

كـون اركض حافيه بذيج الطفوف
عمتـي زينـب لازمـه أيـدي اشـوف
كـون اتـسـلب تـراچي وهم چفوف
كون صدري ينترس خيل وسيوف

روحي كل مغرب غريبه
اليـنـتـظر غالي شيچيبه
گمت بس ما شفت حيلي واعثرت
چــلــمة الـعــافــوچ بـيــها تعـذبـت
يــالـتـكّـتـبـون
_____________5______________

الطير من غيـر الجنح بيمن يطير
وآنـه حالي طير وجناحـه كـسـير
عنـدي دسـتور الفـگد اهـله فقـير
وحــيـل يـتـأذه اذا بــعـده زغــير

شنهو يسوه العمره فاگد
شــوفة وضـحكـة الـوالد
للــحـزن والـدمع آنــه تـيـسـرت
چــلــمة الـعـافــوچ بيــها تعـذبت
يــالـتـكّـتـبـون
_____________6______________

احمد رزاق الاعرجي

[ آذان الطف ] قصيده لام البنين عليها السلام /


آذان الطف صوته ينادي
يـا حــياكــم يـا ويـلادي
متقصرون وتريدون رفعة راسي

يالگدها اوصيكم اذا رحتو ودربكم اخضر
عالعايله وهذا الخـدر اعـيونكم خـل تسهر
شما هالسفر دربـه كبر ابقه انتظركم واكبر
يلفيني شـيبي من وگت لو ابو اليمه اتأخر

شـلـه بعـمـره الـودع غـالي
خنگه وحسره تعيش ابالي
وشيب جفون وتريدون رفعة راسي

________1________________

ولـدي أوصـيـكم بـعـد زينب أمـانـه عـدكـم
غطـوهـا بـرموش النظر ترتاح كون اختكـم
حتى الهـوه يمـشـي بـأدب وياكم ابعهدتكم
عين الشمس لوفتّحت تنفكس من خزرتكم

مااريداً تعطش بت حيدر
اعرفـكم غيرتـكم محـشر
هاي ام عون وتريدون رفعة راسي

________2________________

يالرايحين اويـه الضـوه لا ينـلچلم من الناس
لو راد يتنـفس هـوه للـريـه اركـضو بأحـساس
ولو شـده صارت يالـوِلِد ظهـر بظهر وي عباس
شدو الحزم وافدو النحر وادري ترفعون الراس

بالطف بيكم راح أتباها
خوتكم حب يامـحلاها
تنتصرون وتريدون رفعة راسي

________3________________

يايمـه هـالدنـيا حلـم ساعه ونفـز من عنده
وهنيـاله كلمـن للصدگ رايح و للـطف حده
واحدكم بوجهه نحر و طابع حسين بخـده
شـلال واحـدكم صـبح ويـا گاع هـاي تـرده

يـالطـلگـتو الـدنيا وبيها
والخـوه بـمنحر شاريها
وتركضون وتريدون رفعة راسي

_________4_______________

لو خيـم المغرب عـليّ اجـروحي تبـدي تدّي
البيت فارغ من ضوه والظلمه صارت ضدّي
وهـاي العليـله بروحتـه والـداها تبقى اتندّي
عالباب جم دمعه وجرح واحزان بيها تحدي

يـومـيه المغرب مشتاگـه
لــلــوالـد وتـريـد الــناگـه
ترجع كون وتريدون رفعة راسي

________5________________

محتاره شحجي وهالسفر هيّج مواجع بيه
للفـرگـه رايـد چـم گـلب عـلـويه هـاشـمــيه
بفـراگ الحسين انحـني وظهري تلزمه اديه
اللــيل شيـخـلصه بـلا وجـه الصـباح وضيه

الله ويـاكم مـا اوصـيكم
مــن اولـكم و لــتالــيـكم

وتضوون وتريدون رفعة راسي

_________6_______________

احمد رزاق الاعرجي

نزلـه:

[ وصيـتي ] وصية أم البنين «عليها السلام»


وصيتي يالبنـين الاربعه
وصيتي زلزلوها الواقعه

شيبو راس الطف واصـبغو بالدمه
ولـو وگعـتو بشـده صـيحو فاطمه
صگـور أريـدنـكـم تغـطـون السـمه
ولـيل هنـدس يـصبح بطف الضمه

بـنـيـني ياشـرح للـقـارعـه
وصيتي زلـزلوهـا الـواقـعه

_____________1________________

عــون جـعـفـر مـا أوصـيـكـم بـعـد
لــو وصـلتو الطـف انـزلو كـالـرعـد
اليلگه ابو السجاد من عنده شفگد
هــو لـلـعـلــه دوه وهــو الــضــمــد

حـبيـبي شگثر طيب منبعه
وصيتي زلـزلــوهـا الـواقعه

_____________2________________

يــمـه عـبـد الله اريــدنــك كـلــف
كـون بـالطـف بأسم حيدر تنعرف
خلـه كـل الجـيش مـنك يـرتـجف
من تدوس الكاع تخـسفها خسف

وامـانـه خلي سيفك فاجعه
وصيتي زلــزلـوهـا الـواقـعه

_____________3________________

أجـه دورك ياابـو فاضل واستمع
لا تـخـلي گـلـب زيـنـب ينـفـجـع
الــهوه لــو غثـاهـا طك منه ظلع
والشمس لو تاذي اصگـعها صكع

والعيون خلها دوم مفرعه
وصيتي زلـزلـوهـا الواقعه

_____________4________________

لو عطش مر بالخيم يبني الحـنـين
سمـي بـسم الله وبـأسـم الحـسـيـن
وأقـره سـورة فـاتـحـه لأم البــنــين
وجيب شط العلگمي وانطي الادين

يـعـباس دوس راس المشرعه
وصيتي زلــزلــوهـا الــواقـعـه

_____________5________________

حســين سـيدكـم وواجـب طـاعـته
الخـدمـه ذلـه بـس عـزيـزه خـدمته
صيـرو أيـده اليـمنه واخذو چـلمته
سوالـف الله حـسين والله حچايته

حـنـيني للسـمـاء السـابـعه
وصيتي زلـزلـوهـا الـواقعه

_____________6________________


احمد رزاق الاعرجي

[ يامسلـم سـلام ]
قصيده لأولاد مسلم بن عقيل (عليهما السلام).....


مـاكـمـلت ضـيافـتـنه واجانا
بـچـفــوفـه حـبـال وجـتـفانا
صحـنه يـامسلم سلام وصارت الدنيا ظلام


بعـد مـاراحـو الاحـبـاب مـانـدري لـويـن نـروح
ولگونه وبالسجن عشنه سنه من الألم وجروح
انـهزمـنا مـن عبـيد الله ورافگنا السهر والنـوح
گـضيـنا الـعمر حـسـرات مـاظلـت بـعـد أي روح

الخايف يـعثر بچلـمة أجه الـليل
وين نروح ماظل عدنه كل حيل
الـعيـن مــاتـقـبـل تــنـام وصـارت الـدنـيا ظـلام

_____________1______________________

تـعـبنا هـوايه من النـاس الـما رحـمـو براءتـنه
زغـار ونركض ابلا راي وعالخد تجري دمعـتنه
كـعدنه وشـفنه ذاك الـباب واتـذكـرنـه لــمـتـنه
يـامحله الحچـي المملوح مـن اذكرنـه ديـرتـنه

وسولفنه وحچينه وماكو اي صوت
ازغــار وردنــه ويـه الـوالـد نــمـوت
ومـأتـم اعـليـنـه يـقـام وصـارت الــدنـيا ظلام

_____________2______________________

أستـأذنـه ودخلـنه لبيـت طلبنه انام حد بـاجــر
وام البـيـت سـألتـنـه أهله أهلنه والـگلب حـايـر
الامـان الـكم واخـبرونـي جـاوبـنـا الابـو مسافر
ذريـة رســول الله وصــار الـبــيـنـه مـا صــايـر

الاهـل راحـو سبايه والابو بــعيد
يـذبـحنه بچـفّـوفـه الـظالـم يريد
والــذبــح ألـنـه حــرام وصـارت الــدنـيـا ظلام

_____________3______________________

استـراحينه واجـينه انام لـن واحد اجه يـمـنـه
كعـد گـالـنا لـتخافـون ومـانعـرف شــنو عــنــه
الامان الگم منـو انتم وشرحنـاله شـكبر هـمـنه
ضـحك گـال آنـه ادوركـم بحبل الخـوف چتفنه

من صار الصبح مستعجل هـواي
يذبـحـنه وخـذانه وشـاهـد الماي
مـنه مـايـسـمـع كــلام وصــارت الــدنـيـا ظلام

_____________4______________________

گـال لـعبده اذبـحهم اريـد الـرووس مگطوعه
گـلـنـالـه ولـد مـسـلـم ذاك الـكـسـرو ظــلـوعه
انـهزم مـاقاوم الذباح الحسره بعينه مسموعه
صـحنه وين نلگه بيت فارغ بي مثل طــوعــه

قـصـتـنه مــثـل قـصــة ابـونـا
فـرق بـس المـكان الـضـيفونـا

والـزمـن جـرد سـهـام وصــارت الــدنـيـا ظـلام

______________5_____________________

تـوضـيـنه بـدمـع فـرگه والـكون انذبح صـبـحه
صـليـنـه وتـوادعـنه والـمـوادع صـعـب شـرحـه
وصـوت يـصـيح عـالـذباح أذبحني گبل ذبــحـه
وذبـحـنـه الـمـايـخـاف الله بـاجـر ربـك يفضحه


ذبـحـونـه لان نـگـرب لـلـحسـين
فـدوه نروح أله ونفديله نحـرين
هـو حـبـنه والـخـتـام وصـارت الــدنـيـا ظلام

______________6_____________________

احمد رزاق الاعرجي

[ سوالف فــرگة ]
قصيده عن حميده بنت مسلم ( عليهما السلام)

ســوالـف فـرگـة الـوالـد چبـيره
بـزغر سـني يتيمه وهـم أسيره
يــبويـه يــبويـه

تمــنـيـتك تـجـيــني وتـرّوي بنـضره عـيـني
العطش ذابح وتيني تـعـال اسـمـع ونـيـنـي

اليـسـافـر مـن بـعـد مـده يرد كون
ويشوف اهله وجهاله بي يشبگون

تـــرد لــيــه بـعـد ســاعـه يـگـولــون
أترسـت دربك ورد ودموعي وعيون
يــبويـه يــبويـه

____________1_________________

ذبحـت الدمعه سكته الصـبر مـات ودفنـته
الگلب مـات بحسرتـه اعله بالي انته وانـته

الورد مـات بـغـيابك وانت مااجـيت
يـمـاي الـروح اريـدك يـا هوى البيت

شكـثر تــانـيـتـك و تـرجـع تـمـنـيـت
وصلاة الملگه فوگ جروحي صليت
يــبويـه يــبويـه

____________2_________________

الورد يبجي اعله حالي الحزن يشبه خيالي
انـتـهيـت وحـيلي بـالي يـما تدري شجرالي

طحت طيحة نده وجـروحي زحمه
الـحـجي الـعنـدي مـنو غيرك يفهمه

اذا راح الابــو ابـقـى وحـيـده
يبـويه طـلـفـتك آنـه حـمـيده
يــبويـه يــبويـه
____________3_________________

أريـدك بـس ثوانـي سهم فگدك رمـاني
مـثل نـار وچـوانـي وحـرگ كل الاماني

أحـس عـمري تـبده بحرگ الخيام
يبــويه ارجـع بـقيـت بـولـيت آلام

يـكـشـخة واهـسي ياضـحكة العيد
الـتفارگ حضن ابـوهـا الهـا شيفيد
يــبويـه يــبويـه
____________4_________________

يبـويـه عـيوني تـعبن لطريقك لـسه يــربـن
عـليك بـدمـعه عتـبن اروحـن آنــه عــدمـن

الـبنـيه عـزيـزه بـحــضـن أبــوهـا
يـتيـمه اعلـيه تجرحني حـچوهـا

انـچـفه حـيلي ومـنو غيرك يلمه
الـهوه مـات الهـوه والـدنيا ظلمه
يــبويـه يــبويـه
_____________5________________

تــبـديـت برحـيلك يبويه ارجــع دخـيـلك
أريـدن أشـتـگـيلك لـون انــدل اجـــيـلـك

بعــدنـي عـالهـجـر طفـلـه زغــيره
جروحي هوايه من بعـدك عشيره

يبــويه موتــتي حـسبـالـي يــمك
يمحلاة الصـبح من چنـت اشـمك
يــبويـه يــبويـه

______________6________________

احمد رزاق الاعرجي

قصيدة [ سوالف حلوه ]
للأنصار « عليهم السلام » ...


الـحـسـين انـصـاره لـمـهـم
وسـوالـف حـلــوه گــلـهــم
عـن الـمـنـتـظـر

يـگـلـهم عطـري بـعطره وصـلـت الـهـم فـكـره
عـن الـمــنـتـظــر



يحجي وبوجه ابتسامه...يگـلهم بچفه القيامه...وقوة الله
شرد اسولف آنه عنه...احچيلگم بس نبذه منه...رحمة الله

الامـام القائـم و خـاتم رساله
بچفوفه يهدم اصنام الـظلاله
وعـلى ايـده يـحقـقها الـعداله
قـبـل لا يـنـولـد جـدي دعـالـه

النـصـر بـيـده تـأأيـد
يـگلـهم أسـمه احـمد
أحله امن الكمر

يسولف أبـن الـزهـره وصـلت الـهم فكـره
عـن الـمـنـتـظـر
_____________1________________

أستأذنه أابن مظاهر...گله شفناه بالمشاعر...فدوه لاسـمه
كله نتمنه نحضره...ولو ظهر يلگانه نصـره...وهـاي نـعمـه

تـمـنو موقف اصحاب الكهف كون
يـطـبون لـخـيـمـهم بـس يـنـامـون
بـظـهـور الـمـنـتـظر رادو يـگـعدون
لابـو صـالـح تـمـنـو لـو يــنـصـرون

وزهــيـر بـشـوگـه كـبّـر
بــرز نـحـره وتـحَــضّـر
وبـعـينه الـفخر

وكلـمـن قـدم نـحـره وصـلت الـهـم فـكـره
عــن الـمـنـتـظـر
______________2_______________

گلهم أنصاره غياره…بالـشدد كلـهم مـناره…وكلهم احساس
أنتو رفعة راسي بيكم…هو رفعة راسه بيهم…تشهد الناس

بـريــر أســـتــأذن وگــلالــه الله
أنـه فـدوه الـك والمنحر افـدااه
دخـل گلبـي اريدن ألتـقي اوياه
يهلبت من نخلص احضه والگاه


وهــب گـال أرد اشـوفـه
وأقّــبـلــهــن چـــفــوفــه
أتمـنه أيـّحـضر
وبعينه اشچـم عـبره وصلـت الـهم فـكره
عـن الـمـنـتـظر
______________3________________

جـون يـســـتأذن أمـامـه…گلـه مـولاي بگـلامـه…هم نـشـوفه
وعابس وبعيونه حسره...أستأذن ودگ فوگ صدره...ما نعوفه

يـگـلّــه ســيـدي يـاگــمـرة الــعــيـن
فـدائي و عابـسك يـا سيدي سـنين
أنـه مـجـنـونـك أمـر عابـس الحـين
يشگگ فكره موش هدومه لحسين

أمـــزّگ روحــي لأجــلـك
أنـه مــســـودن وأحــبـك
وأفديـلـك نحر

ويحـچي بأجمل نبره وصـلـت الـهـم فكـره
عــن الـمـنـتـظـر
______________4_______________

گـلّهم أصحابي النشامه...المهدي يظهر وبحسامه...يطلب الثار
ثار ظلع امـي الـزچيه...وثـاري يــوم الغاضريه...وثار الانصار

يـمـن وفـيـتـو لحـسين بدماكم
تره المهدي و حـقي ما نـسـاكم
يأصحابي يضل عايش صداكم
يـمن گلـبي مـثـل دمـي حـواكم

يأصـحابـي ونظـر عين
يحيل چفوف الحسين
يـا أعظم بشر

يــامـصـدر لـلـثـوره وصلـت الـهم فـكـره
عــن الـمـنـتظر
______________5_______________

أستأذن العباس أخيه…مسأله عندي و قضيه...كله مولاي
ياهو للمهدي بزمانه...يصير أسمه مثلي آنـه...سـاقيّ ألماي

أذا يـعـطـش أبـو صالح منوّه؟
يجيب بجوده شط بأيده گوّه
ويـگـلّـه سيـدي اتفـضل تـروّه
ومنو يرف بالعلم وبعينه خوّه؟

يـجـاوب والـدمع طـاح
غــيـرك مـاكـو مـصـباح
يـحـزام الـظـهر
عباس أجـمل گـمره وصـلت الهـم فـكـره
عــن المـنـتـظر
_____________6_________________

احمد رزاق الاعرجي

قصيدة [ يابعد چبـدي ] بين حبيب شيخ الانصار والامام الحسين «عليهم السلام»...
_____________________________________________

يـابـعـد چـبـدي غـيرك شـعندي
ياحبيبي ياحسين

آنـه ابـن ظـاهر حـبيب وتدري بيه
وأشـكـثــر آنـه أحــبـك مـو بـديــه
بالـطفوله من طحت فـوگ الوطيه
أبيـتي ماضـگت الاكل تـسأل عليه

تـسـأل الـوالــد تـشـبه الــفـاگــد
ياحبيبي ياحسين
______________________1_______________

آنـه ميـت بيـك والله مـن الطفوله
آنـه ذاك الاهـله مـن زغـره دعـولـه
كـون اصيــراً خـادم اُولاد البـتـوله
أسـم خـادم يـمك نـيــاله الـيـنـوله

خـادم احـسـبـني سـيدي اقـبـلني
ياحبيبي ياحسين
______________________2_______________

آنه من زغري هويتك يابو الاحساس
يالحنـين المـاكو مـثلك ماكو مقياس
انـت لـلـريه هـواها بـمـجره الانـفاس
الاربـعـين اليـشـبـهـونـك هـو عـبـاس

عيـشـتـي وياكم گـلبـي حـباكم
ياحبيبي ياحسين
______________________3_______________

منـتـظر يـوم الطفوف يصير بيه
ولاتـفارگ عيـنـها عـيونـك رقـيه
والخيم لو عطشت بذيج المسيه
عينـي اعـصرهـا واشربكـم امـيه

مـاي اصير ألكم بـيـدي أخـدمكم
ياحبيبي ياحسين
______________________4_______________

ألّـحمـد لله عشـت يـا ابـو المـيامـيـن
الـيوم أعـيـد بكـربـلـه مـعركـة صفين
رايد وياي ابو فاضل چنه ابو حسين
حـتى نـگـلبها گـلب وبـرمـشة الـعـين

أنـت بـس أأذن وأحـنه نــتـصرفن
ياحبيبي ياحسين
______________________5_______________

رايد استـشـهد بـحـبك وآنـه مـمنـون
آنه عاقل بالعشگ بـس بـيك مجـنون
حتى لو سبعين ألف فوگي يسحگون
كـلـشـي يتـغـير وحـبـك مـايـغـيــرون

تجـري وي دمي ياضـوه حلمـي
ياحبيبي ياحسين
______________________6_______________

الشاعر احمد رزاق الاعرجي

[ دوريـتك ] قصيده لأبـا الـفـضـل العباس «عليه السلام»


دوريتــك بــالـظــلام خويه خويه
شفتك مشبع السهام خويه خويه
عالحسن طبعك يبو طبع الحنين
جسمك انطيته بثــواب ام البنين؟
خويه خويه

.......................................................


دوريـت شـگثـر عنـك وش لگيـتك
جـودك اوجـاغ الدلال وفار صيـتك
ألـدمه ضيــفك و سـير يـم لحيـتك
يل مضيف الگاع حته من مشـيتك


يابـو فـاضل لــيـه گـوم خويه خويه
ابلا كمر وحشه النجوم خويه خويه
ماگلت من بعدك انطي وجهي وين
جسمـك انطـيته بثــواب ام البـنين؟
خويه خويه

...............................1......................


عالــنهر يا ابا الفضل لمن وصـلتك
جسـمك مـوذر وحـقك مـاعـرفتك
رايتك متروسه شيب ودم جربتك
أكعد لخاطر حجينه وشوف أختك


بيه حسره وبيه خوف خويه خويه
ليش چا وين الچفوف خويه خويه
چن اسمـعك گتـلي فـدوه للحسين
جســمك انــطيته بثـواب ام البنين؟
خويه خويه

...............................2......................


رايــده تـگعد وأسـولـف ذكـرياتي
يـلا يـالـعـباس گـوم أگـعـد يغـاتي
ما أسولف عالسـياط وعـن خواتي
ومـا أسولف ليش مـحروگـه عباتي


بچلـمه مـنك استراح خويه خويه
ليلـي طول يالصـباح خويه خويه
يا أســد والگنـطره صـارت عـرين
جسمك انطيـته بثـواب أم الـبنين؟
خويه خويه

...............................3......................

لـيا جرح منك اداوي جـروحك هـواي
ياعطش فوگ الشريعه وماشرب ماي
گـوم أخذ عيني ويساري وهاك يمـناي
النـومه ماتحـله الـك گـوم امشي وياي


يمك ومشتاگه ليـك خويه خويه
يا سـلام الله علـيك خويه خويه
خاف أجرحك راح أكلك متني زين
جسمك انـطيـته بثــواب أم البـنين؟
خويه خويه

...............................4......................

ضيـعّتـك كلــفه يـبـو فـاضل علـيه
فرگـتك كسرتلي ظهري وكلشي بيه
الليـل شيـخ بطـيحتـك و أبلا حميه
چنت فاگس عينه من نمشي سويه


كـون يمـك آنــه امــوت خويه خويه
أحچي ذابحني السكوت خويه خويه
انگـطعت أنـفاسي وحـقك بالونين
جسمك انطـيته بثــواب أم البنـين؟
خويه خويه

..............................5.......................


چـويـعده يمـك و بـاجر الله يعلم
ويـن اروح ألـيـا كـتر بيمن أتحزم
الجـانت مـدللها أخوها ابلا مخيم
يالـكفو ما گـصرت شـكرا وتـسلـم


راح اروح ابلا كفيل خويه خويه
والسبي دربه طويل خويه خويه
كل خواتـك خـويه عنـك رايحين
جسـمك انطـيته بـثواب أم البنين؟
خويه خويه

..............................6.......................
الشاعر احمد رزاق الاعرجي

[عباس أجـه لحسينـه]


عباس اجـه لحسينه           ويگلـه ياابو سكينه

                             أاذن اطب الحومـه    
              ~~~    ~~~   ~~~   ~~~  ~~~ 

                    يم خيمة حسين الكمر يلهـب نــار
                    گـلالـه مـولاي ارد اطـب بالـفـقـار
                    الحومـه طلبتني يبن حامي الجار
                    الامـر بــيدك سيــدي وانت اخــتار

               ~~~   ~~~   ~~~    ~~~  ~~~
          النــار تأكـــل بيـــه               أأذن لي ياابــو رقيه

                          أأذذن اطب الحومــه
               ~~~   ~~~   ~~~   ~~~  ~~~

                    كلالـه ابــو السجاد انت حزامــي
                    خايف اشوفگ عالتراب ودامــي
                    المــاي جيبه خويه يـم خيامـــي
                    كــفال زينـب يااخــوي وحامــي

               ~~~   ~~~   ~~~   ~~~   ~~~
          ماأريـد افارگ ضلـك         مـن روحي انت أصــلك

                           أأذن اطـب الحومـه
               ~~~   ~~~   ~~~   ~~~   ~~~

                   كــام وتـحزم كمـــر هاشـم يهـتف
                   الماي خاف من الكمر ضل يرجـف
                   وكل العـساكر خـوف كامت تـنزف
                   واحدهم يريــد الحـجي مـايـعرف

               ~~~   ~~~   ~~~   ~~~   ~~~
          من وصــل يم العسگر          الخـوف بيهــم يفــتر

                             أأذن اطـب الحومــه
               ~~~   ~~~   ~~~   ~~~   ~~~

                   شال العــذب بيـده وشفـاه ذبـلانه
                   اتــذگــر حســـين وشمــر ذرعـانــه
                  واتذكر سكينــه شــكثر عطــشانــه
                  الغيـــره نـار بــراسه طــگ بركــانـه

               ~~~   ~~~   ~~~   ~~~   ~~~
         شـال النــهر بجفوفـه           وحســين اخيه يشوفـه

                            أأذن اطـب الحومــه
              ~~~   ~~~   ~~~   ~~~   ~~~

                  لمــن رجــع للخيــم شـــاف الحــره
                  مخنوگه مدري منين وتجر حسـره
                  گـــالـها عـد عيـناج بنــت الــزهــره
                  الـهـــوا   لــو غـثاج اكطــع نـحـــره

              ~~~   ~~~   ~~~   ~~~   ~~~
         يأخت الكمر حاجيني            بحســراتــج تـأذينــي

                           أأذن اطـب الحومـــه
              ~~~   ~~~   ~~~   ~~~   ~~~

                 گـالتــلـه ياعــباس فـدوه اغـديـلـك
                 اكعـد يـخويـه وخـل أنـه احـجيلـك
                 لـو غبت عـني شلـون اشمـن هيلـك
                 للــماي لمـن رحـت  صحت دخيلـك

              ~~~   ~~~   ~~~   ~~~   ~~~
        مااكـدر احمل فرگـاك            خايــفه اضـل بـليــاك

                          أأذن اطـب الحومــه
              ~~~   ~~~   ~~~   ~~~   ~~~

                لا يــضــل بـالـــج  يـابـعـد عيــنايــه
                العــلگمــي يــمج احــسبـي و مـايــه
                مـــو وحــدي الله و عـــلي و يـــايـه
               والســيـف بـيدي وبــيساري الــرايــه

             ~~~   ~~~   ~~~   ~~~   ~~~
        بالحومــه منهـو وينـه           الا اطشــر سنيـــنـه

                          أأذن اطـب الحومــه

___________________________________
احمد رزاق الاعرجي

[القاسم آنـه لا توصيـني]
قصيده للقاسم بن الحسن «عليهما السلام»


الــقــاســم آنــه لا تـوصــيـنـي
يـايمه مـن دم نـحري حـنيّـني
مـا ارجــع الا وبــالنـحـر حـنـه
هـالساعـه تسـوه الدنيا والجنه


يـايـمه رايـح للحـرب وادعيـلـي بـالشــهاده
مـن والـــدي بـيـه الـعــزم والـقــوه والاراده
اخـتـنـگ بـالريـه الـهـوه مـن ابو اليـمه ناده
هـل مـن مـناصر ياخـلگ وين اليريد مراده

سـاعـتها عـندي اوصـية الـوالـد
حان الوگت والطف بقه يشاهد
وصانـي ابـوي وعـد حـسن ظنه
هالسـاعه تـسوه الـدنـيا والـجـنه
_____________________1________________

محلاها ساعه وهل أجت عرسي اشوفه بيـهـا
صـيـنـيـت الـزفـه نــحـر يـايـمه اكـتـبـي عليها
وشـموعـي وجيـهـن دمـع والـحمد هـم اقريها
محـلـه حـياتـي بـكـربلـه يخـلـص ذبـح تاليها

كلـشي نسـيت ابالي بس عمي
والد سكـينه يـجـري وي دمـي
عـمري فـدوته حسين اعشگنه
هالساعـه تسـوه الـدنيا والجنـه
_____________________2________________

شنـهو الحياة ابلا طعم رايد ملوحه وراحه
خل انذبح فدوه لچـن يبقه الهوه بمـرواحه
هـالـناس منـجل شايـله عـالعنبر ومصباحه
والـصدگ مـا يـسلم ابد بس الصبر مفتاحه

وحسـين صـدگ الله و سـوالـيفه
والجـذب يركض عالصدگ سيفه
والمـات عـالحگ بـيش اوصـفـنه
هـالسـاعه تـسوه الـدنيا والـجنه
_____________________3________________

عنـدج وداعـي مو سهل والصعبه من اودعچ
هلـهلي لو شـفتي على صدري حوافر تـدبـچ
هالمـوقف أدري بي ذبـح عـالگاع راح يوگعچ
گـبالج يـرمـله مـا يضل سـالم كتر بي أبــنـچ

يايـمه كـلـشـي يـهـون لـلــغالي
رايـد اسـافـر واحـضه بـالـتالي
بـهـالروحه يـمه روحـي تـتـهنه
هالـساعه تسـوه الدنـيا والجنه
_____________________4________________

وصــاني أذكـر بـالـزغـر ألـحـسـن عـن اخيه
گــلالـي يـالـقـاسـم ذخــر أنــتـه لـبـو رقـيـه
لـو شـفـت عـمـك مـخـتنگ بعيونه غاضريه
أدخـل بـروحـه مـي ورد من يقره هالوصيه

گـلالي هـاي اوصـيه يالقـاسم
قـدم شـبابـك والنـحر جـاسم
وگله فـدوتـك روحي مو منه
هـالساعه تسوه الدنيا والجنه
_____________________5________________

يايمه اودعچ ياوطن روحي الچبير الدافي
رايـح ومـااريد الـدمع يرسم حزن بچتافي
يايـمه لو شفـتي دمه وبصدري حافر غافي
شمـي الـنحر يـايمه لـو مـتغيـرات اوصافي

ادري الـعزيـز اِيِـموت فـراگـه
بـالـجـنـه آنـه ويـاچ نـتـلاگـه
نـرتـاح ونـرد مـثـل مـا چـنـه
هالساعه تسوه الدنيا والجنه
_____________________6________________

احمد رزاق الاعرجي

نزله للقاسم «عليه السلام»


يالقاسم هنيئاً يالقاسم هنيئاً

يالقدمـت نحرك فده
يالمـفتخر بـي والـده
ياوردة الروح

سبـاح گلبـي يـالـولـد
ياذخـر لايامي وسند
يابلسم جروح

أمـك وحگـي أفتـخر
فـدوه لبو اليمه العمر
يالعطرك يفوح

يالقاسم هنيئاً يالقاسم هنيئاً
_________1_______________

قدمـت روحك ماتهـم
تشبه علي يبني ونعم
بالحومه عفراس

شايل سوالـيف الحسن
بنظراتك يعيش الوطن
وتگطر احـساس

معـدل وهيبـه بالـحرب
يوليدي چنك من تطب
عمك العباس

يالقاسم هنيئاً يالقاسم هنيئاً
__________2______________

عمـرك محـطه للـوفـه
بعينك جمال الله غفه
يوسف حياتي

يعگوب تـارس دمعتي
يالطينتك من طيـنتي
ياذكرياتي

دمـك تـرسـهـا كـربـلـه
عطره محـنه ويـاهـلـه
جاسم يغاتي

يالقاسم هنيئاً يالقاسم هنيئاً
_________3_______________

كل والــده تدعي عُمُـر
لـوليـدهــا يبقـى ذُخـر
وتزفه بالعين

بـس آنـه كلـش اختـلف
هـاليوم بـدمـوعـي أزف
جسام الحنين

الحاضر نحر فايض دمه
والغايـب تمـوت بـضـمـه
لعيون الحسين

يالقاسم هنيئاً يالقاسم هنيئاً
_________4_______________

يالعاشگ حسين الصدگ
والمثـلك انـت يـنـعـشـگ
يالون العيون

شـايــل بـراءه وعـاطـفـه
بـالحـومــه چنـك عاصفه
كاسرها المتون

يــابسمـله ويـا قـل هــوه
يـمـغـمـض عيـون الضـوه
ياسورة النون

يالقاسم هنيئاً يالقاسم هنيئاً
________5________________

للــخـيـمـه راجــع يــالابـي
وجسمك صفه بلون العبي
متغير هواي
مـطبـور هـامـه ومـنذبــح
وانـسـدت ابـواب الصـبح
يمزاعل الماي

ســيرت حــياتـك جنـتـك
مـحـلـه الخـتـام بــحنـتك
جاسم الوفاي

يالقاسم هنيئاً يالقاسم هنيئاً
_________6_______________

احمد رزاق الاعرجي

[ لاتسافر ]
قصيده للأكبر «عليه السلام»
•••••••••••••••••••••••••••••••••••••••••••


لا تسـافر يبـو سوالف مـالـحه
الفاتحه ماتـنقره اعله الفاتـحه
ياكشـخة العنبر يوليدي يالاكبر

يايمه اشـوفك للحـرب
عـازم يـسبـاح الگـلـب
واتهـدم الحيل _ ياگمرة الليل

متـروسـه نظـراتك ألـم
لو رحت اعيشن بالوهم
يمـعطـر الهـيل _ ياگمرة الليل

بالگـوه أنگـل بـالـچِـدم
عـريس اشوفك ياحـلم
ياهيبة سهــيل _ ياگمره الليل

الفرگه توجع عني يبني لو رحت
يبـني لفـراكـك ولا مـره احسبت
ومااگدر اتصّور يوليدي يالاكبر
__________________1_________________

يوليدي ياهـو يضل ألي
لــو رحـت عـني ياعـلي
اتـصّبر شـلون _ ياماي العيون

الـدمع سـچيـنـة وجــه
مـحـتـاره لـويـن اتـجـه
يانسمة الكون _ ياماي العيون

ياخيـط مسبـحة العـمر
ياشـهـگـة آذان الـفـجـر
ماضلت جفون _ ياماي العيون

الـفـاگـد اعـزاز النبـض غـصه ألـه
بروحه يلگه كل جرح طف كربله
ودموعه چن كوثر يوليـدي يالاكبـر
__________________2_______________

عمـرك صـفه نحـر ورمـح
يالوجهك امخجل الصبح
نشفت دمعتي _ وآنه بحسرتي

طـبع اليـسافـر يـخـتـنـگ
ويـچودر بـروحـه الـحرگ
ها يـا صفـنتي _ وآنه بحسرتي

يــالـوجـهك يعـادل سـمـه
يـالـبـيـك ريـحـة فـاطمـه
ياابـو دمـعـتي _ وآنه بحسرتي

شـرد اسولف وانت رايح بالهوه
عميه امـك ماتشـوف ابلا ضـوه
بحچايه تتعثر يوليدي يالاكبر
_________________3________________

امــودع الله بـروحـتـك
عينـك عـليها رويـحتـك
يــايـمه اوصــيك _ وبحرگه أحاچيك

الـطـف زغـيـر بكـربـلـه
الاكـبـر ومـــيـلـوگ الـه
شكد لايگ عليك _ وبحرگه أحاچيك

مابيه اشـوفـك منـذبح
ولابـيه اشوفك تنجرح
ومـسبل ايـديـك _ وبحرگه احاچيك

الهوه يمـوت برحيلك لو رحت
وحيل بحچاية فـگدتـه تعورت
فدوه لتـتـأخر يوليدي يالاكبر
________________4________________

انـتــظـرك ابـاب الخـيـم
وبروحي شـوغات وألـم
منتظـره ترجـع _ حيلي تگطع

من رحـت ميــدان الفده
بالحومه اسمع چن صده
يـايـمـه أسـمـع _ حيلي تگطع

طحت وصحت راح الولد
شعنـده بحـياتـه الي فـگد
من عينه منبـع _ حيلي تگطع

ياشبيه المـصطفى شلون الحيات
من بعد عينگ هلا بحضن الممات
مااريد اعيش اكثر يوليدي يالاكبر
_______________5________________

شفت الجره بـعالـم گلب
وامــك لاي عـالـم تطـب
متغيره الاوصاف _ ياأبن الاعراف

متــغـيــر بـعـــيـن الـثـره
جـروحـك تنـّـدي مـگبره
يا بســملـة قــاف _ ياأبن الاعراف

شفافك خشب من الضمه
وحـافـر خـيـول الظـالـمـه
لصدرك ولا عـاف _ ياأبن الاعراف

نحرك يرتل شهـاده ومفـخره
كون امـوت ونلتـقي بالاخـره
چا شلي بالمنحر يوليدي يالاكبر
________________6_______________
احمد رزاق الاعرجي

[ ياوالدي حسين ]
نزله للأكبر « عليه السلام »
ه••••••••••••••••••••••••••••••••••ه

سبعين الف منـتظره ارخصني يبن الزهره
ياوالدي حسين

* * ***

هالحومه يابويه شكثر
بيـها العـساكـر تنــتـظـر
يابويه أجه وگت الذخر إأذن لــي

بويه وحـقك مـن اطـب
هـالـحومـه اكـلبـها گلـب
يابس مكان اعله التـرب ما اخلـي

تتفايض امـن دماهم گـاع الله تتـلگـاهم
ياوالدي حسين
____________1_____________________

سيفي عطش سبعين الف
ياعشـگـي يحسـين الترف
وابـنـك أنــه الاكـبـر كـلـف يالغالي

اوجـاغ الكلـب صـاير تـره
وادلالـــي بـيــهـن حـيـدره
راســم خـريـطــة مـگـبـره وأبـالي

اليوم اصب سجيلي يابويه بـس ادعيلي
ياوالدي حسين
____________2_____________________

سيفي حـمل نـار و حـطب
من سيفي مخلوق الغضب
من خـزرت عيـوني الگـرب مـايـسلـم

مـــرسـومـه بــيـه الـزلـزلـه
لـو ابــدي بــس بـالـبـسـمله
مايـبقـى اسـم طـف كـربـله طف الدم

وعيـونك الا أمـحيها سافلهـا وي عالـيها
ياوالدي حسين
_____________3____________________

نيـال العـيـون الـشـافـتـك
شمس الله تطفي بشيبتك
خلـيـنـي اقـوم بـخـدمتـك بالمـنحر

سيـفي ويـميـني اتشابـگن
رادن أذن ويـــســولــفــن
الـــسـاتـــر الله ويـلـتــگــن بالعسكر

يحچن رگب ودمايه والـتـوگـع مـسـمـايـه
ياوالدي حسين
____________4_____________________

گلبي لبسـته اعله الدرع
وبگـصتي حيـدر منطبع
اليـوم اعـيد بهـاالجـمـع حـملاتـه

يـالـماتــرد مـطـلـب ألـي
عـافـيتي ياخـيمة هـلـي
تـوأم أنـه وجـدي عـلــي وخزراتـه

الواگف يذوب بخوفه مثل الملح مااشـوفه
ياوالدي حسين
____________5_____________________

چلمـة نعم آنه انـتـظر
جـاوب يقـرآن الـفجـر
هاك الوعد راح انتـصر عـالـقـله

بعيوني مـو ذاك العـدد
سبعيـن الـف رايـد بعد
ذاك الـشـرد ذاك الـلـبـد بـالـذلـه

والتـيـن والـزيــتـوني مثل الهوه يشوفوني
ياوالدي حسين
____________6_____________________


احمد رزاق الاعرجي

قصيده لعبد الله الرضيع «عليه السلام»
لسان حال الرباب «ع»
•••••••••••••••••••••••••••••••••••••••••ه

ضليت أهز بالمهد ثاري المهد خــالـــي
عـود ارد أنـيّم الـولـد موجود حسبالي

**** **** **** ****

لمن أجاني حـسـين وشـفافـه متـفطره
شاف الـولـد تـعبـان طـاح وحـنه ظـهره
صـار العـطش ينشاف بعيـونه ياحـسره
ودمـوعـي تـنــزف ألــم وانـهـدمـت آمـالــي
عــود أر انــيـم الــولــد مـــوجــود حسـبالي
__________________1____________________

شـاله بـچفوفه حسين والدمعه بعيونـه
گــال آخــذه ويــــاي بـمـيــه يـسـگـونـه
فــت العـطـش گـلــبـه هـلبـت يــروونـه
شــفـت النـحـر بـي دمــه گــام أيــتـراوالــي
عــود أر انــيـم الــولــد مـــوجــود حسـبالي
__________________2____________________

شوغات احس بالگلُب ودموعي تچويني
وعـيونـي عـالــكـاروك نظـراتــه تـآذيــني
صـار الـمـهـد خـالي وشـيّب رمـش عيني
لـعــيـونـي صــار الـدمـع بـفـراگــه يـحـلالي
عــود أر انــيـم الــولــد مـــوجــود حسـبالي
__________________3____________________

طبع الـطفل لو نـام يـغـفه على الچلـمه
لــمــن تـلـولـيـلـه وتـحـضــنـه وتـشـمـه
مـايـغـفه بـالـكـاروك يغفه بحضن أمــه
وحــضـني بـلايـه حـضن مـشــتاگـه لـلـغالي
عــود أر انــيـم الــولــد مـــوجــود حسـبالي
___________________4___________________

مـثل الـورد يـا نـاس مـتبـدي كـل عـطـره
عبدالله بالطف عاش غافي بحضن طبره
والسـهـم كـلــش حـار و يـگــطّع بـنـحـره
ضـاگــت عــلــيّ والـحـزن خـيّـم عـلى بـالي
عــود أر انــيـم الــولــد مـــوجــود حسـبالي
__________________5____________________

شحچي بعد ياناس والدمعه مذبوحه
وعيني على وليـدي ماتغفـه مشـبوحه
كلـمـن جـمـع ولـده ونـيّــمــهم بـروحه
بــس آنــه ابنـي ابتـعد غـافـي بـرمـح عـالي
عــود أر انــيـم الــولــد مـــوجــود حسـبالي
___________________6___________________


احمد رزاق الاعرجي

لمولاتي فاطمه العليله [ عليها الجروح ]
[ وين رحتـو ]


وحدي عفتوني غريبه ... وين رحتو

عيــني مـنـتـظره تــردون بــضــعنـكم
ورده وبــلا مــاي ذبــلـت والله بــتـكم
ياهـو انخــاه اوْيـوصّل روحـي يـمـكم
حـيل مخـتنگـه واريــد أشتم عـطركم

عالدرب عيني ........... شمعة سنيني
وين رحتو
______________1__________________

يـل مشـيتو وعـفتو بيه جـروح الاسنـين
مـادريـتـو مـا اعـيــش بـدون الــحـســين
چـان يـمي لـو نـمـت يـفـرشلـي إلايـديـن
هسه مفروش الحزن واغفه اعله الاونين

شوگي ذابحني ............. والهـجر سلْني
وين رحتو
______________2__________________

عايـشـه بـنـار الافـراگ ونـار الاحـزآن
الشيب شيخ براسي من عفتوني للآن
انـچـفي اعله الـگـاع لـو اسـمـع الاذآن
افـرش الـصـلايــه الـمـن والدهر خـآن

اندعي بحركه .......... تـرجع الشبـگه
وين رحتو
______________3__________________

ابابـي يـوميه انـتظر هـلْبت ترجعـون
بالسـلامه وفـرحـتي مـاتوسـع الكـون
خاْيِـفه مــن الـبـچي لاتـعـمه العـيـون
شـلون اشـوفـنـكم بـعد لـو ليه تلْفـون

روحي مشتاكه ........... يمته نتلاكه
وين رحتو
______________4__________________

الْيــعـيـش ابـلا أهـل انـفـاسـه صـعــبـه
شـهگـته اتعادل وطـن وبـحـظـن غـربـه
دمـــعـي مـابـطّـل نـــذرتـه لــلـه قُــربــه
الـمـاي مـابـي طــعـم روحـي ماتـشـربـه

حزني ماشاني ........ وصار عنواني
وين رحتو
______________5__________________

الـبـنـيـّه شـــگــد عــزيــزه تــصــيـر يـا نــاس
يــا حـلات الـصــبـح فـوگ الــراس تـنــبـاس
ابجال أبوها الحضنه خيمه وفرحه واحساس
لو يـسـافـر لـحـضه عــنـها اتـضـيگ الأنـفـاس

مــا اخـذتـونـي .................... ولانـسيـتوني
ويــن رحـــتـــو
______________6__________________

#رزقهم_سلام_الله_عليهم
#احمد_رزاق_الاعرجي

السلام على جبل الصبر زينب _ع_::::
قصيدة [ اجيت ] :

أجيت ... من السـبي وأعـثر بـالعـبايه
أجيت ... تعبانـه أگـعد سـولف ويـايه
أجيت أجيت

بحضنك الدافي اريد احجي الهـضـمنـي
رايــده اشـگـيلك يـخويـه اعـالشــتمـني
من طحت سوط الشمر طاح اعله متني
گـتله آنـه اخـت الحـسـين وگـام طـگني

حُسين ... بيـه سوالـف توجـع هـوايه
أجيت ... تعبـانه اگـعد سـولف ويـايه
___________1____________

خـويـه مـن حـرگـو خـيـمـنه يـسـرونـه
وبـالحـبل يـحـسـين أجـونه وچتـفونـه
وجـابـو الــــهـزّل عــلــيـهـن رچــبــونـه
وأعـلـه جـسـمك يـبـو الـيمأه مــررونـه

نشوف ... ذيج الحوافر سـحگت الآيه
أجـيت ... تعبــانه أگـعد سـولف ويايه
____________2___________

يــا أبـو الاكبـر وحـقـك شـاب رمــشـي
مـن شــفـت جسمك مسلب منه كلشي
بالـطـف أتـمنـيـت كـون يـصيـر نعـشي
وعـالـهزل مـا اصـعـد بـلــيـاك وامـشي

بچيت ... لمن مشيت أبلا أخو و رايه
أجيت ... تعـبانـه أگعـد سولـف ويايه
___________3____________

آنه زينب زحمه خويه أصعد عله النوگ
وحيـل توجـعني العـقيله دخلت السوگ
غيـر چـفك يالـكلف شـيسـدها الحلـوگ
والشـماته بنصهم آنه وچـدمي محروگ

نخيت ... بيك شكثر ياصاحب الغـايه
أجيت ... تعـبانـه أگـعد سولـف ويـايه
___________4____________

اعـثر بـطـارف عــباتـي جـيــتـك بـلـيل
أسـتراحـن رايــده واشـتـم عـطر هــيل
مــا اريــدك تـنـجـرح يـالمنـجـرح حـيل
بعده صدرك يوجعك من سحگة الخيل

أطيح … حيل اعله وجهي وماكو تچايه
اجيت … تعــبانـه أگـعـد سـولــف ويـايه
__________5_____________

اخــتـصـر كـل الـحـچـي بقـصـة بـنـيه
سـلّـبو مـنـهـا الـتـراچـي ويـا خـطــيـه
الــعـزيــزه أم چــلـمــة الـطـيـبه رقــيه
أعـله راســك ماتـت وشـابــگـته هـيـه

جروح ... گلبي حمـلهـن للأخـوو جـايه
أجيت ... تـعبانه أگـعـد ســولف ويـايه
__________6_____________



احمد رزاق الاعرجي