لفاجعة البصرة الاليمة 😭😭

لسان حال الامهات الفاقدات

نعي مجاريد


الولد يبني الولد يبني


يبني العيد باچر عگب باچر
مراجيح مامش بالمگابر
اويه اربيعتك ردناك حاضر
لو ادري درب الموت عابر
افرشلك ضلوعي گناطر
عِلمك مثل طعن الخناجر
چا غير يفطر ال يسافر
شعندك مشيت ومنته فاطر
هاي الكتب هاي الدفاتر
🏴

ياطير ومفرفح بدمّه
طشّار صار شلون المّه
هناك ايد هناك خذمه
السايق اظن بغير رحمه
ماگال تطلع شايطه امه
وتركض بغير اشعور زحمه
وتلگاه ذبيح وكتبه يمّه

🏴🏴

هاي الشهاده مستلمهه
بعده خضر مايبس دمهه
ريحتك بيهه من اشمهه
يمه اردهه يو اضمهه
للمدرسه استاذ ايختمهه

🏴🏴

لاتسجلونه اليوم غايب
شاطر وليدي وخوش طالب
كل شهر من يمتحن غالب
وياخذ نتيجه اعله المراتب
شطّار ربعه من يصاحب

لاحول ولاقوة الا بالله العلي العظيم

إنّا لله وانّا اليه راجعون

اللهم الهم الامهات الصبر والسلوان

😭😭


ام محمد الحجاج

https://www.tg-me.com/ommohamadalaebaadey

اسم المدرسة ( زينب )

هوسه


لان طلّاب زينب .. ليش ياموت ؟؟؟
اسم مولاتي لل لچمات منعوت
متخاوي اسمها اويالحزن دووووم
واليرتبط بسم ام عون مبخوت

شعِده البين امحارب زينب
من عاشور لهذا اليوم

🏴😭


ام محمد الحجاج


https://www.tg-me.com/ommohamadalaebaadey

عظم الله اجوركم اهل البصرة

من تصير نكبة او فاجعة بالبصرة
تنهال بوسائل الاعلام التعازي والاستنكارات والخطب الرنانة من الشجب وشحن الشارع من جهات سياسية معينة علی جهات سياسية معينة
وهي كزبد البحر حين تسكن الرياح تركد

عمي خلوا البصرة بضيمها لاتحركون الشارع وتحرگون الشباب المسكين العاطل المحروم كفاكم نفاقاً . لاننتمي لاي جهة او حزب يشهد الله تعالی

لكن مايجري من لغط سياسي وحزبي علی مشاريع القرنة وحادث الهارثة
له طابع سياسي لااكثر

بسكم من العيداني

جايتكم انتخابات والگدهه يكتسح الساحة

بس اتركوا البصرة ابعدوها عن تصفية الحسابات

تری دخان النفط ولابصراوي صاحي مابي سرطان

وكفيلكم الله اليشتغلون بالشركات كلهم من ذيچ الصفحة

وابن البصرة حسرة عليه ال ١٠ تالاف

بسكم من البصرة الله يلعن كذبكم ونفاقكم

كلها راح تصير ملايكة بروسنه


لاحول ولاقوة الا بالله العلي العظيم


وسيعلم الذين ظلموا ايَّ منقلبٍ ينقلبون


ام محمد المگرودة

ايام وليالي الشهر الفضيل تمضي مسرعة كادت تنصرم .. مرّت بعجل خفيفة الظِل
واقتربت لحظات الوداع 😭😭😭

طور الجفيري


مرّت لياليك بعجل
امسن اجه اليوم ارتحل
خلينه نتزوّد عَمَل
يااشرف واكرم شهر


.😢😢

شهر الاجر والمغفره
شهر الوجوه المُسفره
ال رحمة الله ناضره
ترجو النجاة بهل الشهر

😢😢

من ربنا نرجو الجائزه
وتطلع صحفنه فائزه
للجنّه مقعد حاجزه
امن الفائزين ابهل شهر

😢😢

مغفوره كل ذنوبنه
مستوره كل عيوبنه
واحزاننه وكروبنه
تتبدل بهذا الشهر

😢😢

اختم لنا الشهر الفضيل
ياربِّ بالخير الجزيل
اشكر سعينه ياجليل
وضاعف لنا اجر الشهر

😢😢

واتسلَّمه منّه بسلام
وحجٍّ الی البيت الحرام
ومغفوره لذنوب العِظام
اقبل عذرنه بهلشهر

😢😢

الوداع الوداع ياشهر المغفرة والرحمة

الوداع الوداع شهر القرآن والايمان والاحسان


ام محمد الحجاج

https://www.tg-me.com/ommohamadalaebaadey

دعاء اليوم الرّابع والعشرين


اَللّـهُمَّ اِنّي اَسْأَلُكَ فيهِ ما يُرْضيكَ، وَاَعُوذُبِكَ مِمّا يُؤْذيكَ، وَاَسْأَلُكَ التَّوْفيقَ فيهِ لاِنْ اُطيعَكَ وَلا اَعْصيْكَ، يا جَوادَ السّائِلينَ.

.
دعاء اليوم الخامس والعشرين

اَللّـهُمَّ اجْعَلْني فيهِ مُحِبَّاً لاِوْلِيائِكَ، وَمُعادِياً لاِعْدائِكَ، مُسْتَنّاً بِسُنَّةِ خاتَمِ اَنْبِيائِكَ، يا عاصِمَ قُلُوبِ النَّبِيّينَ.

اللهم صلِّ علی محمد وآلِ محمد وعجل فرجهم

جن الليل على دار أمير المؤمنين عليه السلام  ليلة موحشة كئيبة على مولاتنا زينب عليها السلام  خاطبت الدار بلسان الحال   وكأني بها تقول  ............


طور ملا باسم الكربلائي

  (  يازمن وين الأحباب )



وحشه يادار الاحباب

ياهلي مر الغياب 

گلبي مثل الشمع ذاب
گلبي مثل الشمع   ذاب

::::::::::::::::::

وينهم هاي المسيه احبابي يادار

چنتي بيهم حته ليلچ گمره ونهار

بكل كتر بالبيت منهم باقي تذكار 

روحي حنّت واشتهت  من عدهم اخبار


والله مجروح الاحساس

حته مخنوگه الأنفاس

طيفهم عني ماغاب
طيفهم عني ماغاب

::::::::::::::

كل مكان ابّيتنه يذكرني بيهم

تارسه عيوني الصور واسمع حچيهم

طيف ليليه يجي وياخذني ليهم

شلون ننساهم اتعودنه عليهم 

انچوي بجمر الفراگ

گلبي لحبابي مشتاگ

جمري بضلوعي لهاب
جمري بضلوعي لهاب

:::::::::::::::

الموت مايرحم خذه اعزازي امن اديّه

خله دمعة عيني تجري وناري بيّه

باگ مني الفرحة وايامي الهنية

كون يدرون البُعد شمسوي بيّه

ليلي اگضيه بالظنون

يااسف مايردون


و احسب شوده وشجاب
  واحسب شوده وشجاب

:::::::::::::::

ساهريت بذكرياتي ولهفة الروح

والصور خرسه ولا بشواگها تبوح

آنه جفني من السهر والدمعة مجروح

مااتحاچيني ولا وي ونّتي تنوح

عمري يخلص معاناه

سلوتي جمرت الآه

ناري ماتطفه بعتاب
ناري ماتطفه بعتاب

:::::::::::::::

ليش يادهري خذيت احبابي مني

ماكسر گلبك عليهم هاذه ونّي

وي الاموات انحسب من مشو عني

لاهي ميته ولا هي عدله روحي چني

عاشرو ذيچ الگبور

والمحب گلبه مكسور

جرحه ينزف ولاطاب
جرحه ينزف ولاطاب

:::::::::::::::
روحي تشتاگ شكثر لو صار الغروب

چن حمامة مضيعة عشها وضلت تلوب

الدار تخنگني واضلن لازمه البوب

مدري شنهي متانية عيوني اعله لدروب

دهري مني خذاهم

ماخذاني وراهم

اگعد ابعتبة الباب
اگعد ابعتبة الباب

:::::::::::::::

ام محمد الحجاج// العبادي

اسألكم الدعاء

٢٣ / شعبان  /  ١٤٤١
الموافق
١٧ / ٤ / ٢٠٢٠


www.tg-me.com/ommohamadalaebaadey

جاءت مولاتنا ام البنين عليها السلآم  لوداع امير المؤمنين عليه السلام  الوداع الأخير  ... كأني بها قالت  بلسان الحال  ...


رايح  ياسور حماي

يا ضي عيني وسلواي

هانت ياحيف العشرة

دنيه ابلا وجهك مره

يا ضي عيني وسلواي

............
............

هانت عشرتنه اعليكم/ يالغالي وجاي تروح

يالطيبك غاطي سنيني/ ومرتاحة وياك الروح

يالمالك كل وجداني/ گلبي البُعدك مجروح

ايام افراحي انگلبت/ احزان وحسرة ونوح


خلصت عشرتنه وياكم

يالمانحمل فرگاكم 

احتاجك مثل الماي

ياضي عيني وسلواي

............
............

شنسه امن ايامك شنسه/   يالمااحمل فرگاك

ياشرياني ويانبضه/ وروحي الهاگد تهواك

يالرايح ومخليني/ علمني شلون انساك

ياعطر تشّمه الريه / شلون تعيش بفرگاك

رايح يانبض البيّه

ونفس التشتمّه الريّه

يا سعدي ويارجواي

ياضي عيني وسلواي

............
............

بيش اتصبر  يالغالي/ لوحن گلبي ويشتاگ

يالتسري بدم شرياني/  تعرف مابيّه فراگ

يافرحة كل سنيني/ يالتارس ليلي اشواگ

روحي تموّتهه الفرگه/ مگابلني وگلبي اشتاگ

بحسرات وآه ودمعه 

كلمن محبوبه يودعه

ياوحشت ليل الجاي

ياضي عيني وسلواي

............
............

صار موادع بالدمعه/والعين تحاچي  العين

مارحمت حالي الدنيه/ باگت منّه احله سنين

ال غالي يفارگ غالي/ والفرگه مچويه ثنين

ادري اليفگد محبوبه/ محسوب امن الميتين

حگه اليفگد ضي عينه

يكره ايام اسنينه 

وانه اكره كل دنياي

ياضي عيني وسلواي

............
............

يالماخذ صبر العندي/ وآمال الچانت بيّه

للمجهول مخليني/ ودهري المابي حنيّه


تبدي امن الليلة جروحي/ واحزان تهل اعليّه

ودعت احلام ايامي/  الچانت بيكم وردّيه

شلي بدنيه المابيهه

غالي وچان مضوّيهه

وعن وكتي يصير افياي

ياضي عيني وسلواي

............
............

أم محمد الحجاج/ العبادي

٥ / رمضان  ١٤٤١
الموافق
٢٩ / ٤ / ٢٠٢٠

www.tg-me.com/ommohamadalaebaadey

دعاء اليوم السادس والعشرون

اللهم اجعل سعيي فيهِ مشكوراً وذنبي فيهِ مغفوراً وعملي فيهِ مقبولاً وعيبي فيهِ مستوراً يا أَسمعَ السَّامعين .

اللهم صل علی مخمد وال محمد وعجل فرجهم برحمتك ياارحم الراحمين

ابو ذيات لفقد الاحبة يوم العيد
لسان حال مولاتنا العقيلة زينب عليها السلام .


ابوي بوجهه چان يهل وَجه العيد
خلص رمضان المبارك وِجه العيد
جمر حزني عله احبابي وجه العيد
وهييج نار فرگاهم عليّه

🏴

شحلاته لو زمان الفات ينعاد
ابونه ( اخونه ) من يهل العيد ينعاد
جاي العيد والحسبات ينعاد ( اجن عاد )
واجن امشتتات البال اليّه

🏴


ام محمد الحجاج


http://www.tg-me.com/ommohamadalaebaadey

اليوم السابع والعشرون


اللهم ارزقني فيهِ فضل ليلةِ القدر
وصيِِّر اموري فيهِ من العُسرِ الی اليُسر
واقبل معاذيري وحُطَّ عنِّي الذَّنب والوِزرَ
يا رَؤُوفاً بعبادهِ الصَّالِحين .

اللهم وصلِّ علی محمد واله الطاهرين

٠
رمضَانُ طِبتَ مُباركًا مقبولا
ما لي أراكَ علىٰ الفراقِ عَجُولا


الوداع الوداع الوداع


اليوم الثامن والعشرون

اللهم وفِّر حظِّي فيهِ من النَّوافل
وأكرمني فيهِ بإِحضار المسائِل وقَرُّب فِيهِ وسيلتي إِليكَ منْ بينِ الوسائِل يا مَن لا يَشغَلُهُ إِلحاحُ المُلحِّين

اللهم صل علی محمد والهِ الطاهرين
وسلم تسليماً كثيراً

دعاء اليوم التّاسع والعشرين


اَللّهُمَّ غَشِّني فيهِ بِالرَّحْمَةِ، وَارْزُقْني فيهِ التَّوْفيقَ وَالْعِصْمَةَ، وَطَهِّرْ قَلْبي مِنْ غَياهِبِ التُّهْمَةِ، يا رَحيماً بِعِبادِهِ الْمُؤْمِنينَ

وصول مسلم بن عقيل عليه السلام سفير الامام الحسين عليه السلام وثقته الی اهل الكوفة .

ابو ذيه

ابو ابراهيم للكوفه يَطوعه ( اجه بطاعة الامام )
وكلمن كاتب وبايع يِطوعه ( يتطوع جندي بجيش مسلم عليه السلام )
حضري حزام للفزعه يطوعه ( طوعه عليها السلام)

وهوسي وهلهلي بنص الثنيّه

😭

مسلم حچي الباطل مايِطُوعه ( مايطيع الباطل )
وهوی الكوفه حسافه مايه طوعه ( مو مثل مااراد )
الطاهر طلع منهم ماي طوعه
وبس طوعه اطلعت حرّه وابيّه

😭😭

ياليتني كنتُ مع طوعة


ام محمد الحجاج

http://www.tg-me.com/ommohamadalaebaadey