#በኦርቶዶክሳውያን_ላይ_የተከፈተው_ጥቃት_ወደ_ስልጤ_ዞን_አምርቷል
በስልጤ ዞን ቅበት ከተማ አስተዳደር ትናንት ማታ የኦርቶዳክስ ተዋሕዶ እምነት ተከታይ የሆኑ ቤቶች ተለይተው መቃጠላቸውና አሁንም በምእመናን ላይ ማስፈራራት እየደረሰባቸው እንደሚገኝ ተገለጸ።

ለማኅበረ ቅዱሳን ቴሌቪዥን በስልክ መረጃ ያደረሱን ምእመናን እንደተናገሩት አስቀድሞ ለወራት ዛቻና ማስፈራሪያ ሲደርስባቸው እንደነበረና በነሐሴ 29 ማታ ግን ቤታቸው ተለይቶ እንደተቃጠለ፣የንግድ ሱቆቻቸው ላይም ቃጠሎና ዝርፊያ መፈጸሙን ተናግረዋል።

የጸጥታ ኃይሎች በመድረስ ለጊዜው መቀነስ ቢችልም አሁንም ቤተ ክርስቲያን እናቃጥላለን፤ ምእመናንንም እንጎዳለን በማለት የውስጥ ለውስጥ ቅስቀሳ እያደረጉ ነው የሚል መረጃ እየደረሰን በመሆኑ ስጋት ላይ ነን፤ በርካታ ምእመናንም ከቤታቸው እየሸሹ ነው ብለዋል።

በተለያዩ ጊዜያት ለከተማ አስተዳደሩና ለሚመለከታቸው አካላት በደብዳቤ መፍትሔ እንዲሰጣቸው ሲጠይቁ ቢቆዩም ይሄ ነው የሚባል ምላሽ አለማግኘታቸውንም አብራርተዋል።

በስልጤ ዞን አስቀድሞም በተለያዩ ዓመታት አብያተ ክርስቲያናት መቃጠላቸው፣ ምእመናን መገደላቸውና መሰደዳቸው ይታወቃል።

ተጨማሪ መረጃዎች እንደደሩስን እናቀርባለን።

በስልጤ ዞን የነበሩ ከ500 በላይ የሚሆኑ ኦርቶዶክሳውያን ከአካባቢያቸው ተሰደው በቡታጅራ ከተማ ይገኛሉ።

ጳጉሜን 1 ቀን 2015 ዓ.ም (ተ.ሚ.ማ/ አዲስ አበባ)

በስልጤ ዞን ቅበት ከተማ በኦርቶዶክሳውያን ላይ እየደረሰ ባለው ጥቃት ምክንያት በዞኑ ይኖሩ የነበሩ ከ500 በላይ የሚሆኑ ኦርቶዶክሳውያን ከአካባቢያቸው ተሰደው በቡታጅራ ከተማ ይገኛሉ።

በዞኑ የነበሩት ኦርቶዶክሳውያን አሁናዊ ሁኔታን በተመለከተ ተ.ሚ.ማ የሐዲያና ስልጤ ሀገረ ስብከት ሥራ አስኪያጅ ከሆኑት ከመልአከ ሕይወት ንጉሤ ባወቀ ጋር ባደረገው የስልክ ቆይታ ፤ ሥራ አስኪያጁ በከተማው 20 የምእመናን ቤቶች ተቃጥለው ፈርሰዋል ሲሉ ገልጸዋል።

ከተሰደዱት ምዕመናን ጋር የቅድስት ድንግል ማርያም ጽላትም አብሮ መሰደዱን ፤ በቡታጅራ ቅድስት ማርያም ቤተክርስቲያን ተጠልለው እንደሚገኙ እና ብዛት ስላላቸውም የዕለት ጉርስ ማግኘት እንደሚቸገሩ ፤ ችግሩን ለመፍታት በሆሳዕና በስብሰባ ላይ እንደሚገኙ የገለጹ ሲሆን ለተፈናቃዮቹ ምን ይደረግ? የእለት ጉርስ እንዴት አስተባብረን እንድረስላቸው? ወደ ቤታቸው ይመለሱ ቢባል ቤት እና ንብረት ስለሌላቸው እንዴት ይመለሳሉ? በሚለው ጉዳይ ዙሪያ በውይይት ላይ እንደሚገኙ ተናግረዋል።

ጥቃቱ ድንገት የተፈጠረ እንዳልሆነ እና ከሁለት ወር በፊትም ጥቃት ሲፈጸም ወደ ከፋ ጉዳት እንዳያድግ በማሰብ ለዞኑ ፣ ለወረዳው ፣ ለሃይማኖት ተቋማት እና ለፖሊስ ሴክተሮች ጥንቃቄ እንዲደረግ ስንል በደብዳቤ አሳውቀን የነበረ ቢሆንም ምንም አይነት ምላሽ አላገኘንም ፤ ጉዳት አድራሾቹ ላይም ምንም አይነት እርምጃ አልተወሰደባቸውም ነበር ነው ያሉት ሥራ አስኪያጁ።