أول قصة😍💙

عمري 28 اخدت التاسع ب 2011 بداية الاحداث وبمجموع جيدجدا ولكن للاسف الوضع بمنطقتنا والتهجير منعني كمل دراستي رغم حبي للدراسة وتفوقي بسنوات دراستي..
وضلت حسرة بقلبي وغصة وكل ماشوف حدا من رفقاتي درس ونجح لي صار دكتور ولي صارت انسه ولي عم تدرس وانا انقهر غص عضياع حلمي.
تزوجت وصار عندي بنت وولد اعمارن 9 /7 وضلت حسرة بقلبي الدراسة والنجاح والجامعة.
قررت هالسنة وقف حسرة ودافع عن احلامي وطموحاتي ..وخلص بيكفي لوم وحسرة المفروض اسعى لآوصل ..وبالفعل تشجعت وسجلت عالترشيحي ورجعت اسست حالي من البداية لان بعد 12 سنة نسيت كل المعلومات لي كانت عندي والمناهج تغيرت...ونجحت الحمدلله وجمعت855 كان هالشي حافز لواصل واسعى اكتر تابعت البكالوريا الادبي لوحدي بالبيت عالتلغرام واليوتيوب وماطلعت برا بيتي لان كان شرط زوجي ان ادرس بالبيت وبحكم ولادي صغار مافيني اتركهن ..لوحدي ماشفت استاذ خصوصي ولا معهد ولا اي شي وكل الفضل لاساتذة التلغرام المتميزين نجحت ومجموعي2313 كامل والحمدلله

#بتمنالك التوفيق والنجاح بكل خطوة و من كل قلبي 💙💙💙

القصة ٢


يعطيكن العافية انا حابة كمان احكي قصتي انا عمري 28 سنة نجحت بالتاسع ودرست عاشر وحادي عشر بس نجحت عالبكالوريا صارت الأزمة وأهلي خافو علي وماخلوني كمل وتزوجت بعدها والله ماطعمني ولاد وكل سنة كنت حاول مع زوجي وماكان يخليني قدم بكالوريا لحتى السنة الماضية اقتنع وخلاني قدمها  درستها  بالبيت وبالامانة السورية ماسجلت بمعهد بالمرة والحمدلله نجحت فيها وبمعدل 2095 كنت بكالوريا ادبي وكانت من اجمل ايام حياتي والحمدلله هلا هية السنة جامعة وعم أدرس علم اجتماع حلو النجاح وشعور مابينوصف بتمنى كل انسان بحب الدراسة وتارك لظروف وخايف من الفشل يقدم ويحاول يمكن تظبط معك وتتطلع احسن من المستمرين
#بتمنالك التوفيق والنجاح بكل خطوة بحياتك ومن كل قلبي💙
#نسرين

القصة ٣
انا كنت تاركة لدراسة من ٣ سنين من لتاسع يعني قدمت سبر اول سنة ما مشي لحال وتاني سنة كمان ما مشي لحال تالت سنة قدمتو ودرست منيح نجحت لحمدلله وقدمت لبكلوريا حرة من دون معاهد ولا دروس غير لعربي بس ولباقي ع لنت كنت ساعد حالي ولحمدلله نجحت ودخلت لفرع يلي بحلم فيه
#بتمنالك التوفيق والنجاح من كل قلبي وبكل خطوة 💙

القصة ٤


انا عمري 18سنة يعني عمري للطبيعي للبڪلوريا نحنا ما ڪان موجود ببلدتنا صف ادبي ورغم هشي تمسڪت بهل فرع لانو ما بحب المواد العلمية وصرت رووح ادرس ادبي بالقرية المجاورة وڪنت اڪتر شي اتغلب فيو السير يعني شبه معدوم ومڪان المدرسة بعيد ڪتتتيير عن بيتي بس اصريت اني افوت ادبي وضليت اتغلب ڪتير لانو وصلت معي ل مرحلة اني روح عدة مراات وما لاقي الباص موجود اڪون انا اتاخرت 😂💔 وارجع ابڪي ع البيت بس ما خليت هشي يأثر فيني وضيلت اقراء بڪل جهدي لانو راح اول شهرين من الفصل الاول وڪنت عوضهن بلدروس عن النت لحتى اقدر ڪفي بين يلي عم اخدهن بالمدرسة ويلي راحن عليي ضليت هيڪ طوول النسة ل حتى اجا وقت الامتحان باخر فترة ما بقيت اڪل ڪثيير صار ڪل اڪلي الاندومي والشبس وهي الاشياء لحتى صرت بامتحان الفلسفة من خوفي منو رغم اني دارس منيح ل هي المادة ڪتيير توترت وباليلة يلي بدي اسعد فيها للامتحان صابني نزيف بالمعدة بس تعديتها ورحت ع الامتحان وجبت295  وما بعرف وين راحلي بهل مادة لانو حليت ڪلشي وبعدا صابني فقر دم قوي ونقص حديد ورغم هشي تعديت ڪلشي ل وصلت ل حلمي يلي قلت عنو شبه مستحيل وصلو و اخر شي نجحت جبت 1826 الحمدالله وبس بدي انصحڪم لانو انا هي السنة صارت ذكرة حلوة وسيئة بالنسبة الي انو لا تدللو ع اهلڪم وما تاڪلو يعني لازم تاڪلو  ومنيح واشياء صحية ولا تاڪلو الاندومي خاصة لانو بعمل غباء بالطالب وما بخلي الطالب يركز ابداآ لانو من تجربتي ابدا ما بنصح بلاندومي والشبس
#بتمنالك التوفيق بكل خطوة بحياتك ومن كل قلبي

قصة ٥
صف أول ثاني ثالث حرب تركت💔
رجعت درست سادس وانا ماني دارسة لا خامس ولا رابع خلصت السادس وتركت💔3 سنين بعد ما تركت السادس والله أكرمني قدمت تاسع كان صعب التاسع لدرجة لاتوصف لحد الآن ما اقدر انسى قديش كان صعب وبذكر مرة بتسجيل احد الدروس الاستاذ نجيب قال انو التاسع اصعب من البكالوريا مدري كان عم بيشجعنا 😅😅بس هو عن جد كتير صعب ولاني ماكنت أعرف ابدا شي ولا بأي مادة
مابعرف شو اسم المواد لحتى اعرف شو فيهن المهم انا ظليت ادرس اربع اشهر بس عربي لان باقي المواد مافي حدا يدرسهن ابدا اجيت ع الشام بالنص الشهر الاول وبلشت ادرس انكليزي بلشت بالشهر الثاني من الاحرف لان  مابعرف شي فيو ابدا هون تركت العربي وصرت ادرس باقي المواد تعبت تعبت تعبت قدمت ونجحت الحمدلله 2017مجموعي بالتاسع دورة 2022😚😚
يمكن المفروض احكي عن البكالوريا بس انا الي الشي يلي الطلاب بتعاني منو بالبكالوريا انا شفتو بالتاسع وانو البكالوريا الادبي اسهل من التاسع بألف مرة والتاسع مانو معجزة بس صعب لاني كنت تاركة
المهم قدمت ع السبر الحمدلله ونجحت 870وبعدها بلشت احضر للبكالوريا كان في كتير معاناة لان المواد مابعرف كيف ابلش بيها يعني المادة بتلبك الواحد بس لما يبلش يعرف المادة كيف بتندرس بيرتاح شوي صارت شغلات نفسية معي تعبت كتير لدرجة انني اني الي اعشق الدراسة صار يتخيلي اني اشيل الكتب وماعاد اقدر ع هل دراسة وكل حدا فينا معرض انو بيوصل لهل مرحلة ممكن بسبب ذنوب وممكن حسد ممكن بلاء اختبار من رب العالمين مابعرف ليش هيك كان يصير معي المهم الحمدلله كانت ايام صعبة لدرجة ماانام اليل من الهم واضل طول اليوم بدرس وطنية ومااقدر احفظو ع فكرة هالشي قديش صعب هالشي لحالو بيمرض المهم الحمدلله قدمت السنة 😍❤️وكانت دورةالادبي  2023سهلة كتير بالنسبة الي الحمدلله   رغم ماكنت دارسة بالطريقة الي بحبا بس كان الشي الوحيد الي مريحني اني ماقصرت ولادقيقة انا حدا دائما قدام الكتب شو ماكنت ادرس المهم اعمل الي علي لان رب العالمين مابيخيب حدا طول لايام وشهور عم يحاول وعم يسهر  ما استسلمت ولو دقيقة الحمدلله صح كنت فكر بالاستسلام بس ابد مااستسلمت ☺️💪 والحمدلله نجحت ومجموعي 2054ماعدا الديانة


#بتمنالك التوفيق والنجاح من كل قلبي وبكل خطوة بحياتك 💙

قصة ٦
يعطيكن العافية جميع
انا قصتي تاركة الدراسة من خمس سنين لانو قدمت التاسع ورسبت لحتى من سنتين صار عندي دافع ارجع قدم تاسع وقدمت بين بكا ودموع والكل يقول رح ترسبي والحمدلله نجحت وجمعت ٢٨٠٠ وما وقفت فورا قدمت ع سبر الادبي ونجحت وجمعت ٧٥٠ وهون بلش الدافع والقوة والحمدلله الله ماخجلني نجحت وجمعت ١٧٥٠ ودخلت قسم الجغرافية صح مرقت بكتير اوقات صعبة وللعلم الكل راهن علي اني ارسب بس ماقدر حدا يوقف بطريقي والحمدلله الله كرمني وفرحتي بنجاحي مابتنوصف الله يطعما للكل وحطو ببالكن (إما الوصول وإما الوصول لا ثالث لهما)
وعن تجربة لحتى الله يباركلكن بوقتكن اقرأو سورة البقرة موفقين جميع

#بتمنالك التوفيق والنجاح من كل قلبي وبكل خطوة بحياتك 💙

لا تستسلم ربما اقتربت من تحقيق الهدف
#استمرارية السعي تعني حتمية الوصول
#صباح الخير رغماً عن الألم واليأس
#نسرين

لا يكلف الله نفسا إلا وسعها

قاوم ولو وصلت ممزقاً لذّة الوصول سترممك😍😍😍

رح نكمل نشر قصص النجاح

1

دخلت بكلوريا علمي عطلب أهلي وكان دوام مدرستي صعب لانها بعيده عني كتير واوصل عالبيت الساعه ٤ بالعاشر ما اتأقلمت مع المدرسه وتركت بنص الامتحانات
السنه هي سجلت عالترشيحي ونجحت وكنت اخد الموضوع مو بجديه لاخر اسبوع بالفصل الاول بلشت ادرس حوالي ساعه ونص باليوم وكلو عالنت لا خصوصي ولا معهد وبآخر شهرين كثفت دراسة ونجحت وجبت ١٦٢
علامتي بالفلسفه ٣٤٠ مع انو انا بستبعد نهائيا انزل تحت ال ٣٧٠ ورح قدم تكميليه بالعربي والوطنيه انشالله رح ارفع مجموعي وشكرا لتعبك معنا استاذنا العظيم يلي حببني بالفلسفه وسهلها بعد ما كانت الناس تخوفني منها♥️
#موفقة بكل خطوة بحياتك 😍💙

2

قصتي تاركة الدراسة فترة منيحة بسبب الاوضاع انقطعت 4 سنين عن الدراسة قدمت تاسع حرة واخدتا بمجموع عام الحمدلله بس ماقدرت كمل بكالوريا بسبب الظروف بعد 5 سنين درست بكالوريا وحطيت هدف  وقلت انا مابرسب ولازم انجح واتعب عحالي والحمدلله اخدت البكالوريا بمجموع 1992 وعندي قناعة انو الحلم مهما طول رح يتحقق ومافي شي بيصعب عربنا بس دائما مانيأس 💜
#موفقة بكل خطوة بحياتك 💙🥰

3 💙كتير فيها أمل وإصرار😍😍😍


قصة نجاحي بالبكلوريا كانت حلوة كتير ويلي بقلكن البكلوريا صعبة مو صح كلامو البكلوريا هي رحلة فيا ضغط وارهاق وتفكير وفيا مسوؤلية وتحقيق احلام وهي السنة لوحيدة لبتتعذب فيا لتوصل لحلمك انا قدمت تاسع ونجحت بمجموع عالي واخدت اول سنة لعاشر والفصل الاول من حادي عشر وسجلت سبر ونجحت ودرست بكلوريا حر وقررت ادرسا لحالي بدون مدرسة واساتذة خصوصي وبلشت رحلتي بنفسي واعتمدت عحالي بتحقيق حلمي ونظمت وقتي واطلعت ع منهاج وفهمتو وبعدين بلشت دراسة واستعنت باساتذة النت كتير وساعدوني كلن ومن خالالن الاستاذ القدير والشاطر والكبير والمميز نجيب حسن المتألق ومامنسى الحلوة الانسة نسرين تحفيزا كان كافي الي ودعما النا شكرا من القلب🤍🤍  اول فترة عانيت من العربي والفلسفة بس بعد مامشيت مع الاستاذ بكل درس وكل مقطع صوت منو فهمت ودرست وركزت وتابعت معو وحليت نماذج ومتل ماتأقلمت مع الفلسفة تأقلمت مع باقي المواد والحمدلله هي انا هون نجحت ومجموعي كان منيح ولحمدلله بفضل وتوفيق رب العالمين وبمساعدة الاساتذة الطيبة وان شاءلله رح سجل حقوق واعيش انا وحلمي
يمكن طولة بالحكي بس نصيحة اوعكن تتخلو عن حلمكن بسهولة عانو وكافحو ودرسو وتعبو وبس تشوفو كلمة ناجح كلو رح تنسو ان شاءلله بتوفيق لجميع الطلاب🤍والله يحقق حلمكو

كل قصة فيها تفاؤل واصرار اكتر من التانية💙 4



مرحبا
انا اسمي لين وقصتي يعني شوي غريبة انا عمري ١٨ سنة وعندي اربع اخوات صغار اكبر واحد فيهن صف تالت طبعآ انا يلي بهتم فيهن وكلشي لأنو امي شوي تعبانة يخليلي ياها ف هي السنة كنت مسجلة بمعهد للبكالوريا وكان في اخواتي كمان عندن دراسة كنت ادرس ودرس اخواتي واطبخ لأخواتي واهتم بشغل البيت كلو بحكم انا البنت الوحيدة لكبيرة ف كنت ع طول روح ع المعهد متأخرة وتروح عليي نص الدورس ومع هيك كنت معروفة بمعهدي لأنو كنت شاطرة كتير رغم كلشي ضغوطات واهتمام ب أمي واخواتي وشغل كتير كنت ادرس بليل وكنت ماضيع درس واحد يعني لاحدا يقول ان كنت شب او بنت انو مابتقدر تجمع بين شغلك ودراستك انت قادر بس اذا حاطت ببالك هدف وراسم مستقبلك ف الحمدلله اجت الامتحانات وكنت صدقا ما ادرس غير تلت ساعات انو كل يلي بشوفني بقلي مستحيل تنجحي طبعا ماكنت رد لأنو حكين رح يأثر عليي ورح يخليني اخسر ثقتي بحالي والحمدلله درست ونجحت بمجموع 2122 ❤ وطبعا صدمت الكل بوقتا اوعكن تفكرو انكن مارح تنجحو حتى لو في عندكن ظروف لازم تتحدوها ويكون عندكن ارادة لتوصلو لحلمكن

💙5💙🥺🥺

انا مطلقة جديد وعندي ولدين وصرلي 15سنة تاركة دراسة فتت بجو دراسة وانا ماعندي فكرة حتى باي شي  وقدمت السنة ترشيحي ونجحت ومريت بكتير ظروف صعبة ورغم كلشي انا نجحت سنة بالبكلوريا ومكملة على تكميلي وبدي فوت جامعة وبدي كمل حلمي اللي بلشت في ان شاء الله

أدعولها🥺 💙
يعطيكن العافية جميع
انا قصتي    غريبه  بس الحمد الله  ع كلشيو تاركة الدراسة  من تلات سنين
نجحت التاسع من اول سنه وجمعت 170      قررت ادخل  عامه لاني   بحب  التمريض
  واني صير ممرضه اوو مضيفة طيران
   فتت ع عاشر    عانيت  بدارسه    بسبب  الصعبوبه مع هيك كنت   قد استطاعتيي ادرس
  صرت عاني من التنمر  من رفقاتي
  ووعم الثقه بحالي
    ضليت  بلعاشر   عاني منهم
قمت دخلت ادبي  لاارتاح   بس للاسف عانيت كمان بلحادي عشر ..
هون  صرت اكره المدرسه والدرسه  بسببن   التنمر نجحت ع البكلوريا
هون  ما قدرت اتحملت   التنمر  صرت اتراجع بدراستي  للاسوء مع الاسف  وكنت غيب كتير    مشان ارتاح من  التنمر    لهيك  رسبت اول سنه   مع هيك  ما يآست    وقدمت مره تانيه كمان   رسبت  قدمت تالته حر بلبيت 
  كمان رسبت هون  قررت اني  وقف ما عم   قدم  بلكلوريا 
    تركت الدراسه سنين  لهل السنه قررت اني قدما
مشان حقق  حلمي وطموحي
قدمت بلبيت  ظروفي ما كنت تسمحلي انس سجل بلمعهد  درستا  ه السنه ه المنهج  الجديد   
عانيت  وتعبت       بس  للاسف  كمان  طلعت  رسباني  بتالته   ( فلسفه  وطنيه   وعربي )  بس الحمد االه هلق عم اتعب    وعم ادرس مشان حقق  حلمي وحلم بابا
  وهلق  قدمت ع التكمليه
  لانو لسا عندي امل 
  دعولي
💔

الإرادة تصنع المعجزات ورب العالمين ما بضيع تعب حدا💙
الحمدلله بفضل الله والاساتذي الي تابعتن عالنت نجحت صح مو متل مابتمنى كان مجموعي 1947 بس كان بالنسبة لألي انجاز كانت ظروفي النفسية صعبة وبشتغل من 8 صبح لل 9 بليل رغم هيك ورغم التعب مااستسلمت كنت ادرس كل لليل لاوصل لليوم الي حقق فيه حلمة وكان فضل كثير كبير لاستاذي الغالي نجيب حسن الي كان مو بس يدرسنا الفلسفة بطريقة محبة للطالب كان يدعمنا وكلمتو الي مابتروح من بالو ( استمرارية السعي تعني حتمية الوصول ) كل الحب والتقدير..🤍

يلي بيتعب صدقوني بيوصل 💙💙

أنا أم لتلت ولاد منقطعة من عشر سنين قدمت البكالوريا بأول الأزمة وماتوفقت بسبب ظروف الحرب والبلد ضل شغف الدراسة معي عم درس ولادي وليوم سافر جوزي فرجعت الفكرة إنو ارجع قدم أول شي طلع لازم سبر لأن ماقدمت ولا فحص بالبكالوريا القديمة ومو دارسة عاشر وحادي عشر درست ع تطبيق السبر الترشيحي وجبت علامة 850من ألف وهي العلامة شجعتني بلش بالبكالوريا وعطتني ثقة بحالي إنو بقدر سجلت بمعهد درست ع النت كنت أم وأب وآنسة بالنهار لولادي وبالليل طالبة ادرس ع النت ومن النوطات تعبت كتير وتحولت لمومياء من كتر التعب بس بالآخر حصدت نتيجة تعبي جبت 2129 طلعت الأولى ع المعهد  ومبارح كرموني كان القاعدة عندي رح انجح بعلامة حلوة مهما كانت الظروف والحمد لله ربي كرمني واحتفلت مع ولادي بنجاحي وكنت قدوة إلن ومثال حي ع المثابرة 👍

💙💙💙

اسمي سجى تاركه لمدرسه من ١٥ سنه متزوجه وعندي تلت ولاد قدمت بكلوريا وكل دراستي كانت عالنت تابعت الاستاذ نجيب فلسفه وجبت علامه عاليه  ٣٥٥ وتابعت لاستاذ همام عربي ولاستاذ محمد ليونس انكليزي وعمر شويتي  جغرافيا ومحمود ابو خشبه قوميه والحمدلله تعبت كتير كتير وجبت معدك ١٨٨٢ من ٢٢٠٠

صح طويلة بس فيها نصائح بتفيدكن اقرأوها للاخر💙

أول شي بحب اتشكرك والشكر من القلب على كل لحظة كنتي  معنا انت والأستاذ نجيب فيها على الأيام يلي تجاوزناها بفضلكم وبفضل الله ،طريقة إعطاء الاستاذ نجيب للمادة وشرحها بشكل جميل وبسيط ، وبحب اقول هو أعظم استاذ فلسفة وانتي أعظم مساعدة بالعالم كلو ، صحيح  ما جبت العلامة الكاملة واني كلي ثقة بنفسي وبأعطائكم انو اني التامة ولحد هسه بقول اني ما بنقصني ولا نص علامة وحطولي 28 وما بعرف وين راحن وأني طالبة بعرف حالي شو حالة وشو دارسة خلال العام الدراسي وأني بتحداهم اذا بنقصني علامة بس الظلم عم جميع الطلاب وأني دائما بقول الحمدلله 🤍
وبفتخر بنفسي يوم اقعد مع حالي
وبيني وبين نفسي بعرف حالي شو حالة بفضل اعطائكم اللامنقطع
كل كلمات الشكر والفخر لا تفي بحقكم 🤍.

النجاح يا صديقي أن تضع الهدف أمامك ومن ثم تسعى إليه .
أولاً: الابتعاد عن الأصدقاء اللذين يحطمون حلمك ويومك ، الاقتراب من أشخاص يحبون العلم والتميز أشخاص يتمنون لك الخير
ثانيا: عدم تراكم ولو كلمة واحدة يعني بتدرس كلشي وما بتراكم عليك ولا درس لأنك لمن تأجل درس وتقول بكرا رح ترجع تقول ثاني يوم بكرا ورح تضلك تأجل بالدرس لحتى يتراكم درسين فلسفة ٣ دروس قومية ٤ دروس جغرافية والى آخره من المواد  المتبقية أدرس كل درس بدرسه ولا تراكم  شيئاً وستصبح من المتفوقين
ثالثا : الاستيقاظ باكراً ليش ؟ لأنو انت بالفترة الصباحية بكون ذهنك صافي بتقبل اي شي ورح تركز ويضل الدرس بذهنك للأبد ، فيق الصبح أعمل قهوة شاي اي شراب بتحبو  حط غناية بتحبها وبلش بالدراسة بكل نشاط وحيوية ، النوم باكراَ، ربما السهر مؤذي لصحتك ..
رابعاً:حاول أنك تدرس 6 ساعات يومياً مشان لقدام تكون مستعد لساعات أطول واتذكر انو في أيام رح تحتاج لل 9 و 10 و 11 ساعة 
خامسا : رفيقك / رفيقتك  بقلك / بتقلك ما درست والله اليوم قضيتها نوم طلعت ضايقة خلاقي تقاتلت انا وماما بابا اوعى اوعى تصدقوا بالبكلوريا كل طالب بصير أناني وهي لا ارادي يعني انا ضليت منيحة لآخر لحظة وبحب رفقاتي وعندي رفيقتي المقربة بتقلي درستي شي ؟ بقلها لا تعبانة  ما حسنت ادرس وأنا بكون عم ادرس وما تركت الكتب وهنا  كمان متلي بحكوا ف لذلك لا تقول رفيقي ما درس خلص مارح ادرس اقلع ومدري شو  اوعى والله كذاب 🤣😂
سادساً : بفترة الدراسة اي انسان رح يكتئب ويحبط ورح تحس مارح تجيب علامات، بينما انتا رح تجيب ورح ترفع راس اهلك وهاد كلو مجرد افكار سلبية لأنك انتا مكتئب ف إجباري المكتئب كل افكاروا سلبية ف نحنا هون بدنا نحط حد لهاد الشي بدنا نتغلب على الشي منقوم اذا حسينا حالنا مكتئبين مخنوقين منتوضى  منقرأ قرآن لانو القرآن بخلي القلب مطمئن ورح ترتاح كثير منصلي ركعتين ومندعي ، واهم شي الصلاة مشان رب العالمين ييسر أمرك وتضلك بحمايتو دائما بس تخلص بتعمل قهوة او عصير اي شي بتحبو بتقعد بتسمع غناية فرفشة مو تروحو تسمعو للسيلاوي  والشامي مشان تكتئبوا بزيادة والشاطر بصير يسترجع ذكريات مؤلمة وبقعد بصير يبكي وبسكر الكتب وبسفط😂🙂
والأفضل أنك تسمع قرآن 🤍
انا كنت احط قرآن للدراسة افوت اكتب ع القوقل قرآن للدراسة اولا بسمع قرآن ثانيا بحدد وقت دراستي ع القرآن يعني بس يخلص القرآن بعمل استراحة برجع بحط مقطع ثاني المقطع بكون 6 ساعات أو 4 ساعات وهكذا.
سابعاً : تابع أساتذة مبدعة ورح تصير تحب المادة كثير وتجيب علامات توب
بدكن نصيحتي ؟
فلسفة: الاستاذ العظيم نجيب حسن
تاريخ جغرافية وطنية: الأستاذ المبدع ضياء الدين العرييبي
والباقي أساتذتي من ضيعتي مو من ع الانترنت
واخيرا وليس اخرا الله يوفقكم جميع
البكلوريا هي تحديد لمصيرك وحلمك يلي انت بتحلم فيه من زمان اتعب هي السنة مشان ترتاح بعدين لانو الإعادة مو سهلة ترجع تعيد البكلوريا مرة ثانية لا سمح الله ،اترك كلشي السنة وصدقني بعد عن الأشخاص يلي بتأذيك وخلي معك ثنين او واحد بتثق فيهن
شدو حيلكم  انتو قدها شبابُنا 🤍💪🏻