بحق النبي الأعظم "صلى الله عليه و آله و سلم" صفر ١٤٤٥هـ ٢٠٢٣م
مهيمن يوسف الموسوي



تغيّب وانطفه نور النبي المُرسل
ياللي مُصحف الباري عليه أُنزل

*١*
نحجب نور النبي الهادي بمثل هاليوم
منيته تعتني امن الخالق القيوم
مات المصطفى خير الخلق و الگوم
عمره وانتهى او ليه الاجل منحل


*٢*
جبريل و ملائك كلها حزنانه
وكلّ المسلمين بونّه باشجانه
الخلق هاليوم كلّه حزنه باكوانه
وموالين النبي منهم دمع يهمل




*٣*
على طــٰـه النبي حزنانه احبابه
دمعهم عالوجن وبحسره سچابه
رسول الله غيابه و يصعب امصابه
محبّينه گلبهم يا عجب يحمل


*٤*
اشرف كل خلق مخلوق بالاكوان
مات وكل ملائكة السمه باحزان
ومن اول نبي لجله بقهر واشجان
مقهوره بألم عاللي جره ويحصل


*٥*
حزن كل الخلق لجل النبي المختار
و موالينه دمعهم عالوجن مدرار
وبموته ركن من الديانه انهار
نبي الأمه أجه ليه الاجل يرحل


*٦*
الوحي بموته حزين و منقهر جبريل
بعد المن يجيله و بالوحي التنزيل
على خير الخلق كلها دمعته تسيل
وكلها العالم بأسره الخبر يوصل

*٧*
ملائكة السمه لجل النبي المعصوم
على طه النبي بحسره وقهر وهموم
واشد كل الحزن حين الدرو مسموم
عدوّه يغدره بحقده وظلم يُقتل

*٨*
عزرائيل وبموت النبي طـاهـا
وملائك محزنه والناس وياها
المُحب للمصطفى كل موته أذّاها
وعلى خير الرسل مجلس إله تعمل






*٩*
مصاب المصطفى الهادي اشد لمصاب
عليه المُسلم ومنه الدمع سچّاب
لجل طــٰـه ابو الزهره العَزه ينصاب
للهادي النبي بحسره وقهر تفعل


*١٠*
بغياب الرسول و منطفي هالدين
واجب ولمصابه ساچبه كل عين
يظل ذكر الرزيّه يستمر لسنين
بگلب كل المحبين ومصابه حل






مهيمن يوسف الموسوي ٢٩ صفر ١٤٤٥هـ ٢٠٢٣/٩/١٥م يوم الجمعة ١:٣٧م

اجواء المدينة المنورة بعد شهادة النبي الأعظم
صفر١٤٤٥هـ ٢٠٢٣م مهيمن يوسف الموسوي


وحشه المدينه ميّت نبينه
غاب النبي المختار لا ظل علم وافكار
صعبه علينه ميّت نبينه


*١*
بموت الرسول المصطفى بفگده الوضع متغيّر
ارض المدينه الطاهره بيها البشر متكدر
ميّت نبيها و ارتحل شحاله المُحب من يصبر
خيّر الخلايق و الرسل بعده البشر متحير

بهاي المصيبه حاله كئيبه
راح الرسول اليوم بنص الگلب لهموم
شنهو البدينه ميت نبينه





*٢*
بيه المدينه تزدهر كلّه بفضل هادينه
وبيه الديانه تنتشر يعلى يظل كل دينه
لاچن اجه أمر الصمد هــٰـذا قدر بارينه
عـنـّه يروح المصطفى بفگده بكثر ياذينه

واصعب رزيّــه بيها الاذيـّـه
حال المُحب باحزان للي قرا القرآن
غايب ولينه ميت نبينه


*٣*
بموته ابو الزهره النبي بيّن قضايا كثره
منهو اليحبّه و اليود منهو الذي ويغدره
من بحتضاره للأجل من ينتهي كل عمره
مـحّــد بقه بهـٰـذا الوضع اله علي و الزهره

وقلّه اليودّه لحيدر يسنده
كلها تعوف الصار بهذا الغدر لاشرار
والله بجينه ميت نبينه


*٤*
واضح طبعهم ينعرف كلمن بِعد عن طاها
بوكت الوفاة و ما اجت موته فلا اذّاها
ركضت بعض من البشر يَم الطمع تلگاها
گصدت سقيفة ساعده وكلمن اجه وياها

لجل المناصب بيها تطالب
بحقد وخيانه و صاح شنهو النبي لو راح
بيها انتهينه ميت نبينه


*٥*
بغسل النبي و كل دفنته حيدر بقه ايسويها
وشجم يعينه بالامر ينصر نبيّه بيها
بس الموالي من صدگ روحه بقهر وشبيها
متجرّحه بحقد العده بموت النبي امأذيها

زادت جروحه حزنانه روحه
عنها الحبيب او مات بفگده يجر حسرات
روح الحزينه ميت نبينه


*٦*
چنها المدينه مظلمه ماكو نهار او كل ليل
وحال المُحبين النبي طول الوقت دمع ايسيل
نابت حزنهم بالگلب ثابت ابد لا ميميل
أذّاهم بموته بكثر قوته تروح و كل حيل

نصبت عزيّه صبح و مسيّه
منها تهل الدمعات تبچي وتونّ ابآهات
من فاگدينه ميت نبينه

*٧*
آه الرسول المصطفى لوعة مصابه و فگده
بالمسلمين و باقيه المسلم حسرته عنده
بيوم الذي مات ارتحل تقهر مصيبه وحده
تبقى المدينه مكدره حزن و قهر متّحده

نبقى نذكره وبعالي أمره
طول الزمن و سنين ذكره يظل كل حين
بس ذاكرينه ميت نبينه

مهيمن يوسف الموسوي ٣٠ صفر ١٤٤٥هـ ٢٠٢٣/٩/١٦م يوم السبت ١:٠١ص

موشح للنبي صلى الله عليه وآله و سلم

شلون حالك يا إمامي المنتظر
مصاب جدك من رحل خير البشر

للنبي المختار حالك يا وضع
لفكده و مصابه تهلّ شكد ادمع
وصوت لونين بدليلك مرتفع
بهالرزيه و الگلب بيه القهر

غايب و تذكر مصابه و الألم
ومن عدوه شكد اذيه شكد ظلم
عانه لجل الدين طه و بس نقم
تذكره من غايته دينه انتصر

يا إمامي و هالمصيبه بس حزن
يوم غاب المصطفى لجله نون
الكون لجله و بس حداد المنعلن
عالخلايق هالأمر حين انظهر


غاب عن هاي الخلق سيد الرسل
ومن اجاها الموت و بيوم الاجل
تذكر اشحال الزجيه بهالفعل
من تودع المصطفى باخر عمر

تذكر المختار جدك يا إمام
من تضده كل اميه اهل اللئام
وكل قريش الخاينه حتى بكلام
ما تنفذ كل كلامه و بس غدر

المهدي و شلون اصبرت وبدفنته
ظل وحيد المصطفه من امته
بس علي و أنصاره هي الحضرته
وناس تتطلب للخلافه بهالأمر

بدفنته المختار تذكر و الجره
يمه باقي يدفنه بس حيدره
و صحبته اوي الناس كلها غادره
بينت كل النفوس و كل فكر

يا ابو صالح حزين اعله البتول
من ابوها مرتحل اخر رسول
ومن عدوها اعله النبي ضد الأصول
منه شر وشكد خيانه و الخطر

هالمصيبه الي مثلها ما نجد
من توفه المصطفى حين انفكد
بس حزن عند المحب وبهالبُعد
ودمعته فوك الوجن بس تنهمر

سيدي يالمنتظر تصبر عجيب
عالرسول المصطفى الهادي الحبيب
هم حزن عندك امامي شكد نحيب
بغيبتك لجل النبي كل الذكر


١٠:٠٨م

مهيمن يوسف الموسوي
٢٩ صفر الأغر ١٤٤٦هـ
٢٠٢٤/٩/٣م يوم الثلاثاء ١٠:٠٨م

رئيسية للاستشهاد الإمام الحسن العسكري "عليه السلام"
مهيمن يوسف الموسوي ١٤٤٢هـ ٢٠٢٠م


نواسي فاطمة الزهرة عله المسموم
امامي العكسري بالسم چتل مظلوم
للطهُر كلنا نواسي
عالمصايب و المآسي
امامي العكسري بالسم چتل مظلوم
...........
نقدّم كل تعازينه ابدمع واهات
نعزّي فاطمة البضعة عله الحسرات
عله المتسمّم ابعمر الشباب ومات
لأمامي العسكري لجله بچي ابعبرات
والحزن عدنه يسير
لا شبه مثله و نظير
موالينة حزينة وتبچي مِنّ ادموم
امامي العكسري بالسم چتل مظلوم
........... ١
إمامي العسكري وإمّه تره الزهرة
سموم ابجسمه صارت حالته خطرة
بني العباس ويلي وخانوا العترة
حقدهم كل وكت صاير الف مرّة
من بدايات الحكم
للنبي وآله خصم
ولا عدهم زمن وابلا حقد كل يوم
امامي العكسري بالسم چتل مظلوم
........... ٢
اويلي عالحسن يشبه تره الكاظم
حياته بالسجن صارت بأمر ظالم
يسجنونه كثر وسفة يهالوادم
سراديب الأرض بيها ابو القائم
من سجن يدخل سجن
كل حياته بالحزن
سنينة من گضت بس المحن و هموم
امامي العكسري بالسم چتل مظلوم
........... ٣
تعذّب وابحياته بالسجن ويلاه
يعيش ابحفره ظلمة يا الف وسفاه
گيود ابجسمة يا وسفة تسيل ادماه
عله وضعه ننوح ابكل حزن و الآه
يا حسافة عالإمام
عايش ابنص الظلام
حياته بالسجن صارت وسف مهظوم
امامي العكسري بالسم چتل مظلوم
........... ٤
حياته العسكري كل العدة ضدّة
لچن للحگ يناصر  وابنهج جدّة
شجاعة او بالنصر للحگ تره عندة
لجل دين النبي محد ولا حدّه
للنصر قدّم امامي
واعله دين اسلامه حامي
تـــوكّـــل عالإلــه الخـالــق الــقـيــوم
امامي العكسري بالسم چتل مظلوم
........... ٥
امامي وابحياته بس مِحن وآلام
يعادون الحسن صارت وسف حكام
لأن يسلك طريق الحگ عله الظلام
لجل دينه الحسن يفيدي تره الايّام
ما يهمّة كل عُمر
هذا ابن فارس بدر
ابو المهدي صبح ناصر جميع الگوم
امامي العكسري بالسم چتل مظلوم
........... ٦
بأرض سامرة صاير هالغدر يا ناس
كره من العده اهل الحقد و ارجاس
يقتلونه امامي من بني العباس
عداهم للحسن صاير صعب ينقاس
كل موالي و حيدري
للإمام العسكري
حزين او دمعه يجري والگلب ملچوم
امامي العكسري بالسم چتل مظلوم
........... ٧

تمت و الحمد لله
مهيمن يوسف الموسوي
٩ ربيع الأول ١٤٤٢هـ
٢٠٢٠/١٠/٢٧م الثلاثاء
بابل - الكفل  ٢:٣٠م

ميمر بحق الإمام الحسن العسكري "عليه السلام"
مهيمن يوسف الموسوي ١٤٤٣هـ ٢٠٢١م


الله يعينيك عالصار   گلبك حِمل يا عَبره
............
ساعة وداع العسكري أحزن يوم
كل والدك من الاعادي مسموم
من الألم شفنه يلوع و مهموم
حيف بحقد هو انصاب    من البشر و بغدره
............
يالمنتظر هذا المصاب المر بيك
هاي الفجيعة بالدِليل إتاذّيك
تنظر ابوك العسكري صعب اعليك
شفته على افراش الموت   خِلصت سنينه و عمره
............
خمسة سنين و شاهدت بس مأسات
شفت الأبو من العده بالسم مات
لجله صِرَت إنته تنوح بدمعات
بموتت ابوك المعصوم   گلبك لهب بي جمره
............
شفته يبو صالح ابوك المهيوب
آه الحسن سوّه دليلك مصيوب
ميّت تنظره و الصبر نفس أيوب
صابر عله حِكم اللّٰه  راضي بقضائه و قدره
............
ساعة دفن ابن النبي قهر و نوح
يا سيدي و يبقه دليلك مجروح
فگد الأبو خله الحزن لا ميروح
بعدك زغير و مهموم    بأرض الأهل سامره
............
لمّن يدفنون الحسن دمعك سال
حالك فلا يوصفه وصف من ينگال
بس الصمد ربنه دره بالأحوال
موقف صعب مر اعليك    شفت الحسن و بكبره
............
شفت الحسن يا سيدي من مدفون
كلها احزنت وياك حتى هالكون
بهاي المصيبه يا إمامي يبچون
جن و انس مقهورين  و كل العوالم بأسره
............
يا سيدي يالمنتظر و بكل عام
ثامن ربيع الأول و بس آلام
تنصب مجالس للحسن هالخَدَّام
تذكر مصابه و تنوح     تبچي عليه ابكثره


تمت و الحمد لله تعالى
مهيمن يوسف الموسوي
٣ شهر ربيع الأول ١٤٤٣هـ
٢٠٢١/١٠/١٠م الأحد ١٠:٢٠م بغداد

بحق الامام الحسن العسكري "سلام الله عليه" ربيع الاول ١٤٤٥هـ ٢٠٢٣م
مهيمن يوسف الموسوي



كل ما يكون بخاطري لجل الامام العسكري
ونواسي مهدينا بكلها تعازينا
لجل الامام العسكري



*١*
للمنتظر نبعث إله بموت الحسن متسمّم
شحاله نگلّه سيدي گلبك كثر متألّم
باول حياتك شاهدت هاي المصيبه و الهَم
اصعب رزيّه بالگلب يا سيدي شگد تهضم

بيه المناحه و القهر يا سيدي يالمنتظر
من اجله والينا بكلها تعازينا
لجل الامام العسكري




*٢*
للعسكري صوت المُحب لمصيبته ويردّد
وبكل سنه بهذا الحدث لجله العزاء انجدّد
للغايب المهدي إله بيه القهر ما ينحد
الله يعينه بوالده حين اليشوفه اتوسد

شافه يلوع امن الالم وسِم العِده يملي الجسم
وبحسره يدرينا بكلها تعازينا
لجل الامام العسكري

*٣*
صوت الفجيعه و القهر موجود بين الشيعه
مصاب الحسن واعلى المَله وبكل ألم ونذيعه
نبقى بعهدنه نستمر هـٰـذا العهد منبيعه
ربّ الجلاله بهالأمر كلنه تره ونطيعه

هاي الرزيّه و بالگلب بحسره دمعنه من يصب
بالدمعه واسينا بكلها تعازينا
لجل الامام العسكري


*٤*
للمهدي وبحسرة گلب والوالده مقهورين
مات الحسن بالسَم ظلم كلها إله حزنانين
كلها بني العباس ضد ابن النبي حامي الدين
مات بغدر من العِده بهذا الحقد معروفين

والعسكري شاف المِحن وابنه بمماته بس حِزن
من اجله سوّينا بكلها تعازينا
لجل الامام العسكري


*٥*
للغايب المهدي بقهر شنهو الوضع وشحاله
شاف الابو وبموتته وعينه بكثر همّاله
من الألم مات بغدر بالسِم وسف ينداله
ويرسل تعازيه المُحب مجلس عزه سوّاله

الله يعينه أعلى القهر شاف الابو موته حضر
تهمل كثر عينا بكلها تعازينا
لجل الامام العسكري


*٦*
ليش الحسن من البشر صارت مماته بغدره
هاي الجريمه و الحقد اصعب قتل وشكبره
فوك الحصار بمنزله وشگد اعادي كثره
تالي يموت بسم وسف ولجله الابن وبحسره

مهدينا شاف القتل وگلبه صبر وبهالفعل
ينصر فكر دينا بكلها تعازينا
لجل الامام العسكري

*٧*
مصاب الامام العكسري بگلب المحب لا ميروح
لمصيبته طول الوقت حزن و دمعنه مسفوح
للمهدي مولانه شكثر والحالته الها انوح
اعليه الموالي منقهر عنده دليله مجروح

باقي عزانه مستمر لا ما يردنه كل امر
والقوّه خلّينا بكلها تعازينا
لجل الامام العسكري

مهيمن يوسف الموسوي ٣ ربيع الاول ١٤٤٥هـ ٢٠٢٣/٩/١٩م يوم الثلاثاء ٧:٥٨م

موشح بحق الامام الحسن العسكري "سلام الله عليه" ربيع الاول ١٤٤٥هـ ٢٠٢٣م
مهيمن يوسف الموسوي



اليوم وبهاي المصيبه الفاجعه
كل موالي للحسن هَل مدمعه

*١*
كل مُحب للعسكري بونّه و حِزن
يذكر امصابه و مماته والمِحن
وشجره من العِده وشاف الفتن
خالفت امر الصمد مو سامعه

*٢*
آه لمصاب الحسن بيه الألم
ليش عادوه الاعادي بالحكم
من بني العباس شاف شكد ظلم
بكل قضيّه ظالمه و هم شانعه

*٣*
مضطهد منهم يعادونه شكثر
الحالته كل شيعي هاليوم ابقهر
يصعب اعلينه مصابه و هالأمر
تنسه كل هذا الظلم ما قانعه




*٤*
كل زمانه العكسري بيه العداء
ليش وابن المصطفى بهيچي جزاء
گضّه عمره منظلم شاف العناء
والاعادي بكل ظلمهم خانعه

*٥*
هذا ابو المهدي و يعاني بالسنين
آه من كل الاعادي الظالمين
بمجلس ونذكر مصابه ناصبين
ما يردنه كل اعادي و مانعه

*٦*
نذكر شحاله وكت جاه الاجل
شلون سمّه بالجسم بيه اشعمل
ولمنيته بيا وضع حين الوصل
هالعده بخوف الصمد ما رادعه

*٧*
مقتل المعصوم بالسم ينغدر
كل موالي لموتته لا ما گدر
يصبر شلون الرزيته بلا ذكر
ويدري روح الشيعي بس متروعه



*٨*
للامام ابن النبي و سيد المَله
ناصر الدين بحياته مو معضله
كل يضدّه وبفكرته قاتله
العكسري كلها علومه واسعه

*٩*
نذْكره بسامره مولاي انسجن
بداره متحاصر وسف طول الزمن
لاكن و باقي بثباته و هم علن
كل ظلم و الجور ضدهن دافعه

*١٠*
بالگلب باقي مصاب العكسري
لجله كل دمعي يهل من ناظري
والحزن حسرات صار ابخاطري
هالمصيبه باقيه ما راجعه








مهيمن يوسف الموسوي ٦ ربيع الاول ١٤٤٥هـ ٢٠٢٣/٩/٢٢م يوم الجمعة ٢:١٧ص

بحق الامام الحسن العسكري "سلام الله عليه" ربيع الاول مهيمن يوسف الموسوي ١٤٤٥هـ ٢٠٢٣م


جينه العسكري زوار متردنه ابد لأخطار
مهما كل اذه لو صار


*١*
اجينه نعتني هاليوم سامرّه
الموالي بحسرته ومنه تهل عبره
لجل حادي عشر معصوم كل قهره
على مصابه و رزيته و موتته بغدره

تعنّينه الولي كلنه ما همنه العِده ايردنه
نفديله بفخر لاعمار مهما كل اذه لو صار

*٢*
إمامي العسكري وارث علم جدّه
النبي المختار وي حيدر معَ ولده
منار المعرفه كلّ العلم عنده
لاكن يا حسافه والعده ضدّه


ابو المهدي يظل ذكره يالعالي القدر وأمره
نبقه للأبد أنصار مهما كل اذه لو صار

*٣*
گصد كل شيعي ويوالي ابو اليمه
يزور العكسري وگلبه إله همّه
على مصابه حزن موجود وبدمه
فلا يعوفه الموالي وباقي كل عزمه

سامره نظل بيها ولو كثره اعاديها
ننصر كل علم وافكار مهما كل اذه لو صار

*٤*
يعاني امن الاعادي يشبه اجداده
يضهدونه و يــأذّونــه تره القاده
لاكن هالإمام اعلى النصر عاده
ثابت وبنهج جده علي فاده

لو قلّه الينصرونه وهم كثره اليأذّونه
كل شيعي بفكرته سار مهما كل اذه لو صار

*٥*
عهد نبفه بدربنه بكل محب موجود
لو كلها تضدنه والظلامه اتسود
حبنه للنبي وآله فلا محدود
لابو المهدي مصابه بالکلب موجود

عزانه لمقتله دائم لابو الحجة الولي القائم
كل دمعه المحب مدرار مهما كل اذه لو صار

*٦*
سامره اجيناها بقهر واحزان
دخلنا المرقد بحسره وألم واشجان
نشاهد گــبّــتـه وعمره نذكره الچان
من شاف الامام امن البشر خذلان

والدمعه على الخدين من يمنه تهلّ العين
نبقى بالدهر احرار مهما كل اذه لو صار

*٧*
إمام العسكري امصابه صعب بينه
مثل كل الائمّه للدوم ياذينه
لمصابه كل موالي هامله عينه
ويزوره لمرقده كل عمره وسنينه

نظل وبهالعهد كلنه فلا احد يبعّدنه
لو شفنه حقد لاشرار مهما كل اذه لو صار






مهيمن يوسف الموسوي ٩ ربيع الاول ١٤٤٥هـ ٢٠٢٣/٩/٢٥م يوم الاثنين ١٠:٤٢ص

هوسات لولادة النبي محمد "صلى الله علیه و آله و سلم"
مهيمن يوسف الموسوي ١٤٤٣هـ ٢٠٢١م


ولادة أشرف و أحسن خلق هاليوم
نبينه المصطفى هادي جميع الگوم
لإنس و الجن سعيده و انطوت لإهموم
فرحانه بمولد هاديها
..............
خِلق نور النبي ربنه قبل لأكوان
و تميّز عالخلق كلها الإنس و الجان
إصل هالنور مِنّ الخالق الرحمـٰن
مِن نور الله نور الهادي
..............
قبل خَلق العَرش ربنه خِلق هالنور
فلا چانت خلايق لا سِمه معمور
ولا موجود كل كوكب لا أرضنه اتدور
بس نور المختار الصادق
..............
مقام المصطفى و فضله فلا محدود
تميزّ عالرسل هذا الأمر مشهود
حبيب الباري بأمر الخالق المعبود
خاتم أصبح و الكل رسله
..............
جِعل ربنه مُحمّد ناشر التوحيد
على كل المَله دينه يصير ايريد
يكون و بالإرض يبقه بلا تحديد
يِهديها الناس الإسلامه
..............
نجدد للنبي البيعه على الإسلام
نگله ثابتين احنه مدى الأيّام
نطيعك سيدي نبقه على احكّام
ونّفذ احكام إسلامك
..............



تمت و الحمد لله تعالى
مهيمن يوسف الموسوي
١٣ شهر ربيع الأول ١٤٤٣هـ
٢٠٢١/١٠/٢٠م الأربعاء ٤:٣٤م بغداد

دارمي | ولادة النبي محمد "صلى الله علیه و آله و سلم"
مهيمن يوسف الموسوي ١٤٤٣هـ ٢٠٢١م


نبينا   شفيعنا   حبيبنا   محمد
.........
صادف مثل هاليوم مولد نبينه
لجله السعاده هاي محفل حيينه
وبكل فرح واللّه إحنه إجينه
مبتهجه عنِده الروح حين إعتنينه

نبينا   شفيعنا   حبيبنا   محمد
.........
لجل النبي المختار دائم فرحنه
ابذكر الولاده دوم هيِّ تسرنه
رحمه انولد للكون عِزنه و فخرنه
هادي جميع الناس توحيد ربنه

نبينا   شفيعنا   حبيبنا   محمد
.........
هاي الولاده اهواي عالي فضلها
ارض و سمه والكون مزدهره كلها
بيها تشع انوار معروف اصلها
بنور النبي المرسول غيّر شكلها

نبينا   شفيعنا   حبيبنا   محمد
.........
وبمولد المختار سيد البريّه
نوره يشع عالكون وبعالي ضيّه
كل الأرض من صار صارت زهيّه
كل الخلق فرحان بأحمد نبيّه

نبينا   شفيعنا   حبيبنا   محمد
.........
مستبشره الاملاك عدها السعاده
حگها سعيده اليوم وإعله الولاده
هذا ابو الزهراء راعي القياده
دين الله بيه ايصير كثره امتداده

نبينا   شفيعنا   حبيبنا   محمد
.........
حتى الملك جبريل فرحان هوّه
يدري بمحمد صار راعي النبوّه
دين الجلاله يصير بيه ايتقوه
كلها تتبعه يكون للناس قدوه

نبينا   شفيعنا   حبيبنا   محمد
.........
مكّه زِهت بانوار نور الرساله
لمّن محمد صار بإمر الجلاله
وبجيته ويّاه كل العداله
احسن صفات البيه كلها خصاله

نبينا   شفيعنا   حبيبنا   محمد
.........


تمت و الحمد لله تعالى
مهيمن يوسف الموسوي
١٦ ربيع الأول ١٤٤٣هـ
٢٠٢١/١٠/٢٣م السبت ٦:٤٣م بغداد

بحق ولادة النبي محمد "صلى الله عليه و آله و سلم" مهيمن يوسف الموسوي ١٤٤٥هـ ٢٠٢٣م



صلاة بكل فرح نرسل
ولآخر نبي مُرسل
بسعاده ينّصب محفل
بمولد نبينه بمولد نبينه


*١*
بمولد نبينه المصطفى خير البشر
فرحانه كلها بمولده باحلى خبر
بين الخلايق و المَلا حين انتشر
بهاي المحافل والنبي بيه انذكر

نِذٍكره بمولده كلنه
بفخر وبكل محافلنه
يظل للدوم واجبنه
بمولد نبينه بمولد نبينه






*٢*
طه النبي وبمولده لجله انعمل
هاي المحبين بفرح نصبت حفل
نوّر ارضنه والخلق سيد الرسل
ذكر النبي بين المَلا كلها وصل

لنبينه المصطفى الهادي
المحب وبفرحته اينادي
مِلَه أرض و سمه و وادي
بمولد نبينه بمولد نبينه


*٣*
كل الملائك تبتشر بأرض و سمه
خيرات كلها واعتنت من قادمه
بمولد بنبينه تستعد متحزمه
تستقبله بهذا الحدث متعلّمه

تبث فرحه ولادة اليوم
على كل الأنس والگوم
فلا يبقى گلب مهموم
بمولد نبينه بمولد نبينه




*٤*
بهاي السماوات السبع كلشي اختلف
بمولد ابو الزهره تره كلها اتعرف
ذكره و تهاني راسله احسن شرف
يا محله لو صلّه المحب لجله ألف

نصلّي اعلى النبي و آله
الموالي هواي يحلاله
سعاده بهالحدث حاله
بمولد نبينه بمولد نبينه


*٥*
بيه الرسول و نفتخر من انولد
جِنّ وانس كل الخلق حيل انسعد
بيوم القيامه المصطفى النه سند
منه الشفاعه بالگبر والمعتمد

يريت و هالفرح بينه
نِذِكره دوم هادينه
ابو الزهره هواي حامينه
بمولد نبينه بمولد نبينه




*٦*
خلها البشر من كل صنف بس تستمع
تشوف السعاده و الفرح واحسن وضع
بالمولد الفرحه تعم وشما منع
للمصطفى الهادي النبي بيه الورع

صفاته بمولده نذكر
بنبينه عالمَلا نفخر
ذكرنه للنبي يكثر
بمولد نبينه بمولد نبينه


*٧*
آخر رسول امن الرسل بيه الفرح
دين الجلاله عالملا بفضله وضح
توحيد ربنه ونتشر بيه و صبح
وشما نعدد كل صفه وشكد مدح

فلا يوفي النبي ذكراه
صفاته و العلم محلاه
نظل طول العمر وياه
بمولد نبينه بمولد نبينه

مهيمن يوسف الموسوي ١٦ ربيع الاول ١٤٤٥هـ ٢٠٢٣/١٠/١م يوم الاحد ٤:١٨م

سارع في تسجيل قصيدة اونعي او لطمية لاستشهاد (الامام الكاظم )(ع )من خلال بصمة التلجرام او الواتساب للاستفسار
@ahmed_alziwar0