کیژی لادێیی نەشمیلی جوان چاک
بێ فڕوفێڵ و هێدی و داوێن پاک

ئەتۆ هەر زگماک وەها جوانی
تەوالێت چییە؟ ناوی نازانی

نیتە کراسی حەریر و پۆپلین
گەوهەری پێچرای لە ناو خامی شین

پۆدر و کرێم و ماتیکت نییە
هەر نەتبیستووە ئۆدی کڵۆن چییە؟

نەتکرد سووراو و سپیاو چون دووری
لە شاری، کەچی هەر سپی و سووری

فێڕت لێ نەدا بسکەکەت لوولە
ڕێژیمت نەگرت بەژنت وەک توولە

لاجانگت وەکو گزنگی تاوێ
هەر بۆ خۆی جوانە تیف تیفەی ناوێ

کوڵمەکەت وەکوو گوڵاڵەی گەشه
بێ سوورمەش چاوه مەستەکەت رەشه

وەکوو فرمێسکی ئاشق رووناکی
وەکوو ئاونگی بەیانی پاکی

فێر نەبووی سێحر و گشتەک و نوشتوو
نه جگه گورگت هەیه نه مووروو

مایەی هومێدی کیژی چاو هەڵۆ
نازانی مەکر و جامبازی و درۆ

چارشێوت نیه روو ناگری له کەس
نامووسی خۆته پاسەوان و بەس

به تاسکه تاسک و به لەنجه و لارت
به بەژن و باڵای بەرز و لەبارت

به دڵی ساده و به هەستی پاکت
به شەرم و حەیا و ئاکاری چاکت

منت کردوه شێت و وێتی خۆت
وەخته له سوێیان گیانم دەرچێ بۆت!

❣مامۆستا هێمن"

Tel⇔ @mlwankay_shin