المشاركة 5️⃣3️⃣

اول يوم لي في الجامعة مشيت ولا فهمت حرف واحد روحت طرحت ابوها رقده إلى بعد العشاء


#فقرة_اليوم_الاول_في_الجامعة

المشاركة 6️⃣3️⃣

أول يوم دخلت المحاضرة وعيوني يزغللين  من الفرحة وشايف نفسي دكتور أبو أسد  والأمور سابرة عندي زي الفل  فجأة سمعت صوت خشن 😂  يخرب بيتك أنت والصورة هاذي اطلع برا ، جيت اراجعه زي الأستاذ حق المدرسة زاد ندعني كلمة اجت ملان الجبهة حقي🤣 المهم عرفت بالاخير أنه الدكتور عارف 😂


#فقرة_اليوم_الاول_في_الجامعة

المشاركة 7️⃣3️⃣


أول يوم بالجامعه ماكان في حماس ولاشي لانه دخلت تخصص ما اشتيه سرحت مجبرة ابصر كيف التخصص هذا بس سرحت من صباح الصبح وصلت عند الكراسي مش عارفة وين اروح وبعده ابصرت بنات وطلعوا نفس تخصصي قلت حلوو ماعاد بضيع بعده دخلت اول محاضرة وكانت ثقافة إسلامية جلست مركزة بكل قوتي😂 اما الان قده المحاضرات الصح ماعاد اركز الا شوية  حماس البدايات😂
كملنا المحاضرة وانا ما اعرف احد الا قليل من الحاضرات وبعدين خرجت وقلنا نشتي الجدول من اجل بكرة وكذه قالوا موجود بالكشك وسرحت اشتريه ب 50 ريال كلما اتذكر اضحك على نفسي هو موجود مستند بقناة الكلية ومش كذه وبس كلما تغير اسرح اشتريه ب 50 ريال لو اشتريت لي شي لبطني انه احسن😂

#قهر

#فقرة_اليوم_الاول_في_الجامعة

المشاركة 8️⃣3️⃣


اول يوم جيت الجامعه وانا عادنا وصااال من البلاد حااامي 😂ومهنجم قبلوني طب عام بجامعه صنعاء المهم😂
قلت سهل عادوا اول يوم  ماقد بش دراسه...شدخل بالثوب والكوت😂لما ارجع ابز لي بنطلون وشميز.....المهم على دخلتي..

لقاني امين الكليه وهو قد كان عيدخل المكتب حقه لانه قريب المدخل.. كان يقلي ييي انت طالب هنا قلت له ايوه قال وين الميري🤣🤣🤣🤣🤣🤣🤣🤣،والله اني انحررجت وماعد دريت ماقله.. قلت له عاد البدله تتفصل😂احررجني 😂😂💔


#فقرة_اليوم_الاول_في_الجامعة

المشاركة 9️⃣3️⃣


طبعآ انا لسا مستوى اول يعني موقفي طاازج🙂😹

اول يوم في الجامعه قبل اسبوعين كنت متحمسه طبعآ ماأنمت من الحماااس  وصلت الجامعه جلست ادور القاعه واخيرآ لقيتها   وتعرفت ع بنت هناك خرجنا من المحاضره الاولى  انا ادربت  😹😹💔💔 وكل ماشتي اقووم ارجع ادرب مرره ثانيه جت البنت تقومني وقدها عتنفجر من الضحك وانا شوي وابكي المهم اول يوم اكتشفت قووه الجاذبيه الارضيه 😹😹💔🙂



#فقرة_اليوم_الاول_في_الجامعة

المشاركة 0️⃣4️⃣

أول يوم دراسي طبعاً نو شغف آند نو حماس والله قصدي أسير أجرب ماعيقولوا لي وأجزع أيام فقط

المهم أول مادخلت القاعة وأنا ساع المبلودة جسم يتحرك فقط أما الحس والعقل يعلم الله فينه بدأت المحاضرة وكانت تشريح وهذك الدكتورة بتتفرعن وتتفنن بالشرح وكانت تبسر لاعندي وأنا أهز رأسي على أساس فاهمة أيش بتتحاكا وفي نفسي أقل ماودف بي أدخل طب وأنا كنت في الثانوية أنجح بالعرطات والغش وشكرن على صراحتي 🌚 😂

وشوية وأرجع أواسي نفسي وأقل عتتعودي على الوضع والحمدلله لاتعودت ولا شيء 🌝ولا حتى  نفسي قانعة بالتخصص من أساسه😢.


#فقرة_اليوم_الاول_في_الجامعة

المشاركة 1️⃣4️⃣



أول نثرة مش اول يوم

طبعاً اول يوم في جامعتنا ما صار اول يوم الا بعد شهر من التأجيلات(أكيد عرفتوا من وين احنا) 😁😁
وأخيرا قالوا دوام، فالدكتور اللي هو انا بدأت أخطط ايش اعمل بأول يوم
فتحمست ولبست البدلة (الرسمية طبعاً والأكمام حق الكوت طوال مش ذوقي بس ذوق الوالد😅😂) امانه وقعت سع مدرس التاريخ اللي كان يدرسنا
المهم رقدت بالبدلة واللابكوت فاااارح سع ليلة العيد 🤣🤣🤣🤣
بكرت الصباح والدفتر ابو جر والأقلام والحركات والدهان سكبته كله لا شعري فاللي يشوفني من بعيد كنت أضاوي سع النور حق السيارات😅😂😂😂😂

وصلت شفت لكم أشكال وألوان جلست مطنن ساعة ومتعجب انا كيف با اعيش مع هوذا الكائنات كيف؟!! 😭

شفت لكم واحد قصير فقلت يمكن انها واحدة من الطالبات جابت أخوها بعدها وهو كان يوزع إبتسامات للسارح والجاي المهم سرت اتشيحف للقصير هذا ومسكت بيده ودخلنا القاعة جلست انا وهوه وكانت المحاضرة إنجليزي فانا المجتهد خرجت القلم وبدأت الخص،ما دريت الا وهوه والكل قام يكتب تعجبت وقلت له ليش تكتب استمع استماع،قال لي انا زميلكم😳😳 الصراحة انا انصدمت قلت بيني وبين نفسي ودافته بين العمالقة هوذا(وحالياً القصير هذا مندوبنا وصار متوحش😅)
وهذه المحادثة كلها بيني انا والقصير والدكتورة تصيح اللي بالأخير يي يا وليد يييي يااااي وانا انتبهت فعملت نفسي ميت وكأنه مش انا لما جاءت لا جنبنا صبنت أخوكم شويه والطلاب كلهم يشوفوا لا عندي وانا قد كنت اشتي ابكي بس ستر الله قاومت  🥹🥹🥹
يا جماعة ما احترمت حتى البدلة الله يقلعها طبيعة😁😄😄
المهم كملت المحاضرة خرجت طبعا انا والقصير وسرحنا اصتبحنا واكتشفت ان معاه موتر(الموتر حاليا يخدم الدفعة كثير) ولا حد الان وما زلنا مستمرين مع القصير والموتر في حكاية الف ليلة وليلة لما يفرجها الله 🤣🤣🤣


#فقرة_اليوم_الاول_في_الجامعة

المشاركة 2️⃣4️⃣

ههههههه طبعاً اول يوم دراسي لي في الكلية شعبة المختبرات جامعة صنعاء
وكان هذاك اليوم يوم تعريفي وكذا وانا فارح بقوه
وبعد ما كملت المحاضرة التعريفية في قاعة جابر خرجت للسنتر حق الكلية واحصل لك دكتور ومحوشين عليه الطلاب طبعاً تعرفوه اعتقد الدكتور صالح المعرشي طبعاً معروف بجراءته وندشه للطلاب ودفت ما كنت اعرفه هههههههههه وانا قلت ضروري اتعرف عليه لاني شبهت به قوي بأنه من البيضاء وهكذا بفضول وشقحه  قلت له يا دكتور انت من رداع وهو شاف لعندي وقال لي قدام الطلاب منو هذا الحارق 🤣🤣🤣 كنت انا أسمر أصلا خلاص احترجت طننت ورحت لي يا الله من أول يوم ندش


#فقرة_اليوم_الاول_في_الجامعة

المشاركة 3️⃣4️⃣

كان دوامنا ٣١ .٨ وأحنا فارحين أنا وأصحابي باقي لنا أسبوع ونبدأ دوام بنرتاح ونذاكر أناتومي فيه عشان ما نداوم زينا زي الجدار
ويوم الجمعة قبله بأسبوع ٢٣ .٨ خرجت من العصر لليل مقضيها سهره وفشعة وما كان معي نت أشوف النت وخبر الدوام
أروح البيت وهم يقولوا لي بكرة دوام أنكبدت كبدة بنت كلب 😭💔💔💔
وما صدقت رجعت أفتح شبكة البيت الإ وهو جددد دوام 😭😭😭😭💔
قمت ألفلف حاجاتي وبكرت بلا نوم من الأرق كأنه معي نتائج😂😂💔 ، وسافرت لمنطقة الجامعة وقد كان صاحب الباص بينسينا😭💔
داومت أول يوم وياريتنا ما رحت ما أخذنا إلا محاضرة واحدة ومافي منها فايدة


#فقرة_اليوم_الاول_في_الجامعة

المشاركة 5️⃣4️⃣


اول يوم كان عملي، و كنا ثلاث مجموعات، وكل معمل في مبنى لحاله، المهم احنا خلصنا اول محاضرة وانتقلت مجموعتي للمبنى الثاني و انا مشيت الاولة 🚶‍♀، وصلت و في واحد منتظر في الممر، وبما ان انا وصلت اول واحدة، قال لي انتي مستوى اول، وانا شفت له كذا😒 وقلت له عيب تكلم بنات يا قليل الحياء "هذا كله من تنبيهات نبع الحنان طبعاً، لا تكلمي ولد عيب"

المهم يا جماعة الخير دخلت المعمل، شوية ودخلوا الطالبات، شوية و دخل الشخص ذي قلبت عيوني فوقه، تخيلوا: طلع الدكتور حقنا😶

انا تخبيت تحت البنش لاما كملت المحاضرة،  ولحد اليوم وقد انا مستوى رابع ايحين ما اشوفه اغير طريقي🚶‍♀..


#فقرة_اليوم_الاول_في_الجامعة

المشاركة 6️⃣4️⃣

اول يوم في الجامعه كان اليوم ٦٠ للناس الثانيه بحكم اني دخلت متأخره شهرين وكان اول يوم لي في المعمل كان شعور غريب وكئيب جدا وكرهت الجامعة وما تأقلمت ولا صاحبت أحد إلا من ترم ثاني 😭💔

# اقصر قصه حزينه


#فقرة_اليوم_الاول_في_الجامعة

المشاركة 7️⃣4️⃣

بدايتي اول يوم كانت حاليه
لانه جيت ولهم اسبوعين مداومين
ف كنت اخر طالبة..
ومن بدايتي وانا متأخّرة جيت والدكتور قدو داخل
ف اول م دخلت سألني انتي طالبة عندنا قلت ايوة وع طول قال اهلا بجوهرة🙂😂 ومن يومها للان ولقبي ف الدفعة جوهرة 🙂💔

بعدين حصلت ترحيب حاار منه ومن كل اللي بالقاعة ودخلت وانا نافخةة ريشي🌝😂
واول م تعرفت ع ثنتين بنات  والحمدلله للان انا وهن بنفس الشلةة وكانت اول محاضره مصطلحات طبية
وبالنسبةة للمرمطة جلست اسبوع اذا محد وصلني اغيب🙂💔


#فقرة_اليوم_الاول_في_الجامعة

المشاركة 8️⃣4️⃣

اول يوم لي بالجامعه....
كنت متحمسه قوي خاصه انه كان دخولي الطب مثل المعجزه وبكرت بدري اتجهز دوام عامله نفسي الطالبه المثاليه المهم مشيت بدري وصلت لنص الطريق حصلنا حادث وتأخرنا بالطريق قلت نحس ودبور من اولها لكن لا مانيأس عاد هو اول يوم منتظره متى اوصل الجامعه اشتي اشوف حياه الجامعه كيف... كنت احسبها سهله ماتوقعت تطلع بذي البشاعه وخاصه لطلاب الطب...🥲
المهم وصلت وماعد في احد في الساحه الا الحارس وانا خفت قلت بسم بالله علينا اكيد اكيد مابيدخلني الدكتور وكانت اول محاضره معانا مع الدكتور عبدالكريم القعطبي حفظه الله ورعاه
دخلت من البوابه وانا مستعجله يله اوصل القاعه قد انا بنص الدرج وادرب ع وجهي 😅 الحمدلله ماكان في احد المنظر وحده بس يموت ضحك وكان في طالبه بعدي عادها جت مشيت ومشت جنبي قالت انها بنفس القاعه ودخلنا مع بعض...


#فقرة_اليوم_الاول_في_الجامعة

المشاركة 9️⃣4️⃣

اول يوم لي بالجامعه....
كنت متحمسه قوي خاصه انه كان دخولي الطب مثل المعجزه وبكرت بدري اتجهز دوام عامله نفسي الطالبه المثاليه المهم مشيت بدري وصلت لنص الطريق حصلنا حادث وتأخرنا بالطريق قلت نحس ودبور من اولها لكن لا مانيأس عاد هو اول يوم منتظره متى اوصل الجامعه اشتي اشوف حياه الجامعه كيف... كنت احسبها سهله ماتوقعت تطلع بذي البشاعه وخاصه لطلاب الطب...🥲
المهم وصلت وماعد في احد في الساحه الا الحارس وانا خفت قلت بسم بالله علينا اكيد اكيد مابيدخلني الدكتور وكانت اول محاضره معانا مع الدكتور عبدالكريم القعطبي حفظه الله ورعاه
دخلت من البوابه وانا مستعجله يله اوصل القاعه قد انا بنص الدرج وادرب ع وجهي 😅 الحمدلله ماكان في احد المنظر وحده بس يموت ضحك وكان في طالبه بعدي عادها جت مشيت ومشت جنبي قالت انها بنفس القاعه ودخلنا مع بعض...


#فقرة_اليوم_الاول_في_الجامعة

المشاركة 0️⃣5️⃣



كل الناس معاهم مواقف وذكريات ومنبهرين ب اول يوم وحركات إلا أني ؟؟؟
ليش ي نعم؟؟

غبت اول اسبوعين هكذا مابيني طاقة، وسرت اداوم لا انصدمت من شكل كلية ولا قاعة ولا حاجه كأنني كل يوم ادخل ونا اول مره ادخله...
الحاجه الوحيده بس اللي م كنت أعرفه هي إنه الدكاتره عملهم يجلسوا فوق الكرسي ويقلبوا سلايدات، كان عبالي أنهم يوقفوا ويشرحوا بس طلع ذاك بالمدرسه فقط..

إن شاء الله عيالي ينبهروا ب أول يوم جامعي مش سع امهم...


#فقرة_اليوم_الاول_في_الجامعة

المشاركة 1️⃣5️⃣

اول محاضره لي كانت يوم احد عند الدكتور عارف
دخلت القاعه وانا مش داري ايش يقول
وصل لا عندي وقام سالني سؤال
( تعجمت )
سفل فيني وطردني 😂


#فقرة_اليوم_الاول_في_الجامعة

المشاركة 2️⃣5️⃣


اول يوم لي بكلية الطب كان عذاب دخلت الكلية انا واخي ك طلاب مستوى اول مستجدين ، متحمسين ورايحين الكلية قبل خلق الله كلهم كأن احنا نسبق الصف الأول في طابور الصباح😭 دخلنا المبنى وضيعنا الطريق فين المدخل فين المخرج الله أعلم 😭💔 مع انه خالي وابي قالوا بيجوا معانا بحكم أنهم خريجين طب من جامعة صنعاء قلنا لاا لازم نعتمد على أنفسنا ، وفي الاخير اتصلنا ل ابي يجي يشوف لنا حل مع الوضع المزري اللي احنا فيه🙂💔 ودخلنا القاعة وروحنا ولا احنا فاهمين شي وهنا اكتشفنا انه من جد دخلنا حياة الكبار بالغلط والمفروض نتعايش معاها طبيعي😭💔بس يضل أجمل يوم في الحياة🤌🏻🙂والان نحاول النجاة والنجاح في اول اختبارات لنا في مسيرتنا الطبيه🥲


#فقرة_اليوم_الاول_في_الجامعة

المشاركة 3️⃣5️⃣


اول يوم بكرت بدري مفرح بالجامعه سع الجاهل لما يدخلوه المدرسه هههه😂

وصلت الجامعه و م خلونا ندخل لانه الوقت بدري 😂رحت للبوفيه بالشارع وشربت واحد بن بالحليب ورجعت اجلس جمب البوابه منتظر يفتحوا
وكان اول يوم إستقبال لنا ذاك اليووم

ووقت م جابوا الماء والعصير الراني 😂😂 قمت اقتلبت شاروخان قلت بقوم اوزع العصير وقمت امسك الكرتون بهنجمه يزعم انه كرتون ماء  😂😂 الا ارفع بيد وهو يشتعط من الجهه الثانيه ويتكسر العصير للارض😭😂😂

اول موقف محرج حصل لي ذاك اليوم 😂💔

وبطلت عاد اتفاضل خلاصصص💔


#فقرة_اليوم_الاول_في_الجامعة

المشاركة 4️⃣5️⃣

أول يوم بالجامعة كان يوم غريب حرفيا
سافرنا من محافظة لمحافظة وجت معي امي  دخلت اول محاضرة بعد مالويت ادور وين انا ونبع الحنان راحت تسجلني كان معنا تشريح
دكتور عارف وهو أمانه دكتور ضخم لكن هيبة كنت اشتي اودع امي عتسافر واشتي افعل نفسي الطالبة المثالية 😂مااشتيش افوت المحاضرة وكنت خايفة يبهذلني الدكتور المهم جلست ابسر له بعين وعين لباب القاعة😂😂وكودها خرجت الكلمة استئذنت اخرج اودعها حاولت اخرج دموع فراق ياسعم مارضيوش من فرحتي بالطب😂😂ودخلت القاعة بكل حماس تعرفت ع طالبات الدفعة بيومي الاول😂من قوة الحماس اللي فيني وللان الحمدلله مستمرين بالمشوار هذا ونتعذب يوميا لكن عيفرجها الله.


#فقرة_اليوم_الاول_في_الجامعة