المشاركة 7️⃣2️⃣

حرفيا صدمه كلمه صغيره 💔
بعد ما اجربتهم يسجلوني طب بشري وانا مش عارفه بهذا التخصص شي ولا حتى ايش معني جامعه😨
كانت اول محاضره فسيو وانا ببالي بسير ادرس نفس المدرسه ثلاث ورق وبالعربي وكملنا 🫣

الدكتوره شرحت ماعد سكتت ملزمتين وكان همي كيف بترجمها افتجعت كيف بذاكر كيف اقول لي امي اننا ماعد اشتي ادرس وانا الي اجبرتهم يسجلوني روحت بكيت وقلت مابقدر ادرس هذا التخصص وبكاء مع خوف
قالت امي خلاص كملي حتى هذا السنه جربي
كنت اذكر انه انا سبب دخولي هذا التخصص ماعد نمت جلست اذاكر طووول الوقت وانا برعب ماعد انام ولا اقدر اكل اسير الجامعه وانا بخوف والدكتور عارف والدكتور وليد 💔ماكانوا يقصروا يكملوا الرعب
ذاكرت وذاكرت وذاكرت اكثر مما اكل وشرب ونجحت وبتقدير جيد جدا والحمدلله 😁



#فقرة_اليوم_الاول_في_الجامعة

المشاركة 8️⃣2️⃣

اول يوم في الجامعه سرت ومشني دارية بشي ايحين وقت محاضرتنا اين القاعه حقنا وبعدين سرت انا واخي وصلنا والحارس مارضيش يدخلنا يشتي بطايق 😒 قلنا له اول يوم نجي قال مابش دخلة الا ب البطايق وبعدين مشني دارية كيف خرج ذيك الصوت مني قمت صيحت انت بتفهم احنا عادو اول يوم لنا واحنا مشحنا داريين بشي هيا اخي ندخل قللك  وسحبت اخي ودخلت واخي قدو مبلد كيف لما اخته صيحت هكذا 😂 وبعدين جلسنا نددووور نددوور في كلية الطب بكبرها ونددور ونسال ويقلولنا هو معاهم نظري ولا عملي واحنا مشحنا داررين ايشو هذا نظري ولا عملي وبعدين بعد معاناه دامت ساعه لققيت دفعتي وكان معنا عملي كيمياء عضوية ودخلت اجلس وجاء الدكتور دخل حامي وهو يهددر انجليزي ويهددر وانا سع الاطرش في الزفة ومننصدمه بقوة مابيقل هذا 😭🙂 وخرجت وضعت ومعاد دريت منين اخرج واخي مدري وين سار قال عيورع لي ومدري اين اختفي جلست ادور عليه ادور ومابش معي رصيد اتصل له وبكيت وحسيت بطوني نزلت وانا لوحدي وبعدين رجع اتصل لي وقالي انا في البقعه الفلانيه وسرت قمت صيحت فوقه وبكيت عنده 😂 ولعانته ل سابع جد المهم ضوينا البيت رقت ا12ساعه من قوة التعب واليأس الذي جاء لي مش طبيعي خاصه بعد مااابسرت كيف الدكتور يرطن انجليزي وانا مشني دارية بشي
المهم كان يوم لاينتسي 🚶‍♀️🙃.


#فقرة_اليوم_الاول_في_الجامعة

المشاركة 9️⃣2️⃣

كما لي ٥ ساعات اكتب
جعله حشف الذي ما يقراء😁

🛑طبعا اول يوم اول اسبوع
مش بنساه نهائيا واصلو حتئ النهاية 😂👇
علمت ان الدراسه تبدا يوم السبت
بكرت السبت
اول ما دخلت باب العماده سالت شخص باب البوابه للعماده يا عمنا 😅وين قسم الميكرو
عصب جنن رفع صوته😡 ٥٠٠% انا وانت زملا انا العميد يا اهبل انت حيوان  ووو الخ
طبعن العميد( علي الحمادي) مشهور في جامعه  إب اعصابه فل عمره 100سنه 😭🤣
قال ادخل القاعه هاذي يا ربح 😏 دخلتو وقدنا ارتعش مو معنا عميد وليش كذا يصيح
وايش الغلط ههههه عادنا قروي جلستو ارتعش ل ما كملت المحاضره

دخلت جلست في اخر سطر من العيال  لما جا الدكتور بدا يعرف بنفسه 
انا تطمنت انه القسم بدون شك 🥰😁
طيب كملت المحاضره وانا قدنا بحاله لا احد يواسيني (بعد فجيعة العميد )
خرجت والطلاب بيتجابرو وانا قلت يمكن من حاره طبيعي 🤣
🛑اليوم الثاني
مش داري وينهم المهم حافظ  وجوه واشكال من اليوم الاول
لقيتهم بقاعه ثانيه دخلت معهم ونفس الخبر البدايه يعرف بنفسه ويرجع يبدا المحاضره وكذا اطمنت بنسبة 100%
🛑مفاجئة اليوم الثالث😁
دخلت معهم وقدحنا بنص المحاضره والدكتور يقول هاذا الفقره( درستكم السنه الماضيه) تتذكرو 😳 من يراجع لي الموضوع بشكل مختصر رفعو ايادهم كلهم😳😳  😟😭
قلبي دق 180بالدقيقه ايش عرفهم
انا طبعن انصدمت لي محاضرتين اكتب بعد الدكاتره الاولين واتروح اراجع ايش كتبتو
فكرت بالخباله وفكرت ليش ما كلمتو اي طالب انتم مستوا كم
🛑😳تفاجئت بعد ما كملو يشرحو خرجو انا سالت واحد من الطلاب مستوا كم انتم قال (2) 😳😭جني لي ٣ ايام ادرس معكم
هنا حسيت اني اغبي شخص داخل جامعة إب
رجعت ادور مستوا اول بعد ما قد حضرت ٣ محاضرات
بمستوا ٢  🤣
🛑والكارثه ايش اول محاضرات كانت الورقه حق الحضور تمشي وقت المحاضره ونا اسجل اسمي من جيزهم ما قد بش كشوفات بالبدايه  😂

#جامعة إب قسم الدبور 😊 😊


#فقرة_اليوم_الاول_في_الجامعة

المشاركة 0️⃣3️⃣


اول يوم ب  الجامعه حضرنا لكن ما درسنا اي محاضره روحنا البيت

يوم ثاني رحت وقد اللاب كوت معي و الشنطه والدفتر والاقلام اجتهاد من اول يوم
رحت ادخل القاعه وطبعاً كانو يدرسو  فيها تمريض وانا دخلت امشي بكل ثقه وطبعاً ماعرف احد انا كنت احسب ان انا وصلت القاعه حق الصيدله ف الصدمه
الدكتور بدا يعرف ع نفسه ويتكلم ع التخصص وليش دخلتم تخصص التمريض ف انا اتت لي لحظة صمت  ووقفت والكل شاف لعندي ليش وقفت قلت لهم انا مانا هنه انا صيدله ف الكل صار يضحك مع الدكتور
ف لما جيت اخرج قال الدكتور اخر مره تغلطي واخر مره تدخلي ذي القاعه😂😂😂😂😂😂💔

والشي الذي تطورت به لاعاد في لاشنطه ولا دفااتر ااخذ الملزمه وقدنا عامل نفسي ذكي
وكمان اللاب كوت من كثر ماكنت ااخذه معي وكان يعجبني قوي البسه في كل وقت محاضره اومافيش محاضره
الان  اروح اتسلف لاب كوت من اي دفعه  ادرس العملي ماعاد ااخذ حقي....

بعد المحبه كره😂😂😂😂😂😂💔

#صدمات_من_اول_يوم



#فقرة_اليوم_الاول_في_الجامعة

المشاركة 1️⃣3️⃣


أول يوم دراسي لي كان محاضرات حاسوب وإلتقيت بصاحبة كانت من مديريتنا بس مانتعارف كثير لكن لما انقبلت عرفت اسمي واتصلت لي قبل الدراسة
المهم
يوم الخميس قبل الدراسة بيومين سرنا أنا وصاحبتي السوق أشتري لي بوتي للجامعة ومن الفضول حقنا دخلنا معهد بيدرس تنمية بشرية الشهادة بخمسمائة ،قالت مارأيش نسير نتثقف لنا بخمسمائة الله كريم ونكسب شهادة😂
الفضول دقع بنا لاهناك وقد اشتريت الجزمات أعزكم الله وصلت مع المدرب هذاك وبساطة شرحه ، أنا طرحت البوتي حقي في الطاقة ،لما الساعة خمس ونص مغرب قد ايأذن مغرب كانت أيام شتاء، أنا وهي كودنا بندي النكت ونتذكر ماكان يقل لنا
وهنا الصدمة😂😭 نسيت البوتي في الطاقة ومع اللباطة مشينا للبيت مرجل عشان لاندي 100 ريال للباص وقد احنا وسط الطريق حسيت في شيء وهو نسيت البوتي حقي، رجعنا نتصل وقد غلقوا المعهد وهات لك يااتصالات لما بيأذن مغرب 😭 ورجعنا ندور لنا على باص وبدل ماندي مائة ادينا له سبعمائة عشان يمشينا بسرعه😂

ويوم السبت 13 شهر 11
سرنا ندرس وانا مافيني ذرة حماس للدراسة ولا حتى 1%
لقيت صاحبتي وقد سارت أمي يوم الجمعة تشتري لي دفتر أبو 40 وقلم أسود وأزرق عشان بنتها تدرس وتقع تكتورة على قولتها😂
صاحبتي لقيتها وقد ابوها اشترى لها دفتر ب 1500😂 وشدة أقلام والكتب الاسلامية والوطنية
ومعها حقيبة أكبر منها😂عكسي اللي سرت بدفتر أمي أبو أربعين😂
دخلنا القاعة وانا اشوف أشكال عجيبة وأصناف غريبة من مختلف التخصصات البشري والصيدلة والمختبرات والتمريض اللي هو تخصصي😢
الدكتور كان يتحاكى كلمة وصاحبتي تنحزني أكتب الكلمة حتى بدأ بمؤهلاته وتخصصه وهي تقل اكتبي اكتبي مابيقل😂😂
خرجنا رست وسرنا البوفية وهي زححححمه ماقدرنا نشتري لنا ولا حاجة رجعنا وقد بقعتنا جينه بنات وقمنا نندع مصياحه وغاره مابلا يقمنه من بقعتنا ماشي انقل للأستاذ أقصد الدكتور😂وانتهت المصياحة بالتغلب علينا ورجعنا سرنا الأخير😂
ضويت أقل لأمي إن البوفية زحمه ومااصطبحت قامت من زقزقة يوم ثاني تسوي لي قرم😂
أهم شيء سارت سنة وأنا مشتيش التخصص وعلى أساس أكمل سنة وارجع إدارة أعمال على ماكذبوا عليا أهل البيت😭لكن خلصت السنة وقوبلت الفكرة بالرفض من أمي لإنها تشتي كل بناتها تكتورات على قولتها😂😂
وهاأنا على صدد الخروج والمقلع من الجامعة وماقد اقتنعت بتخصصي إلا مازدت نفور منه وكره😭
وبسس


#فقرة_اليوم_الاول_في_الجامعة

المشاركة 2️⃣3️⃣

والله
اول دوام جامعي جوا امي معي يبزوني😂😂
حتى دخلوا امي القاعة معي وكأنني عادنا صف أول  بيفتجعوا عليا ياسعم مدري من عيخطفني

وانا كنت اخزى من البنات والدكتور كان معنا عبد السلام دلاق الله يذكره بالخير
فرجعت قلت لامي الله يحفظهم
يخرجوا خارج يريعوا لي

وخرجوا ، والدكتور انتبه انها امي وخرج جلس يشكرها لما دمعت عيونه قال هذه الأمومة العظيمة
وجلس ينصحني أني احط امي بعيوني وأنا فيني صدمة أن دكتور بكله بيكلمني بأمور مش دراسية، قصدي أن الدكاترة زناطين😂😂
لكن هذا الدكتور قمة في الأخلاق وكانت اول محاضرة لي استفتحتها به وحسيت أن الجامعة حلوة وممتعة بسببه
المهم ، جلست امي تسير معي الجامعة اسبوع😂😂😂😭
لما اقتنعت ان الوضع آمن

الله لا يحرمكم من امهاتكم، والله يحفظ جميع أمهاتنا، ويرحم كل ام فارقت الحياة🩷.



#فقرة_اليوم_الاول_في_الجامعة

المشاركة 3️⃣3️⃣

طبعاً اني مابتكلم عن اول يوم بالجامعه بالضبط لانه كان استقبال وكذا مافي شي
باتكلم عن اول يوم دوام صدق 😂يوم ماانساه صدق


المهم
اني وصاحبتي اللي  ابي وابوها اصحاب من زمااااان  واتعرفنا ع بعض بعد امتحان القبول
كان هذيك اليوم معانا ع اساس فيزياء عملي وانا وهي مبكرااات من صبح الرحمن فرحات مانشتيش نتأخر وكانت المحاضره في مبنى الهندسه (واحنا طبعا مختبرات بكلية العلوم الطبيه ماعرفنا الا المبنى حقنا يوم التنسيق والاستقبال 🌚😂)فجلسنا ندور ندور وكل وحده مننا تتصل للي تعرفها ندور هذا مبنى الهندسه  وبعدا عناااا وصلنا المبنى وللاسف مالقينا حد قصدنا انحنا بكرنا ومفتخرات انحنا مشحوطات 🤦‍♀️💔جلسنا نستني ولا جا حد 🙂وبدأنا نفتجع  لا لمن طبت وحده بنت جنبنا وطلعت كمان من قسمنا تطمنا ورجعنا نستني احنا وياها 😂💔وبعدين جا ولد وماعرفنا انه من قسمنا  الا لمن  شفنا التعليقه الحمراء  (اللي هي رمز طلاب الطب المخبري بجامعة ذمار 🌚)عرفنا انه مننا  ورجعنا نستني كلنا 😂💔مادرينا كيف نفعل بدأ زميلنا هذا يلف ويدقدق الابواب حق الكليه ويدقدق ويصيح سع اللي يدور امه 😂💔واحنا قمنا لعند الابواب نتسمع ونشوف من الخزاوق حق الابواب يمكن في حد وهم مغلقين علينا لااااااااا لمن وقعت الساعه 9:30 فقدنا الامل وقمنا بنروح وفجاااااااااأه نلاقي طلاب خارجين من كلية العلوم الطبيه وكان في بنت نعرفها من عندنا شفناها وعرفنا انهم حقنا 🙂💔الناس اخذو المحاضره وكملو واحنا ندقدق ابواب الهندسه 😂💔وبعدين هات ياندم وتفكير ايش نفعل قمنا سرنا ندور الدكتوره حق الماده من مكان لامكان ومن مبنى لمبنى ( يعني من بدااااايته كانت باينه انحنا بنتبهذل بس احنا قاومنا 🙂💔) وبعد جعجعه لقينا الدكتوره وطبعا كانت فاطسه ضحك علينا لانحنا مستوى اول 😂المهمممم تحضرنا


وروحنا البيت ووقعت نومه مثل نومة الجاهل يوم العيد 😂💔


بس الان قدحنا مستوى رابع وسنة التخرج ويظل هذاك اليوم ذكرى مابتنتسي 🌚💙


#فقرة_اليوم_الاول_في_الجامعة

المشاركة 4️⃣3️⃣


انا مستغرب من اللي يكتبوا بأول يوم دراسي لهم
جامعتنا نستنا كل حاجة والله ولا اتذكر حاجة 😂💔🤚

محدثكم أحد طلاب الطب البشري جامعة 21 سبتمبر الدفعه الثالثه 🙂💔



#فقرة_اليوم_الاول_في_الجامعة

المشاركة 5️⃣3️⃣

اول يوم لي في الجامعة مشيت ولا فهمت حرف واحد روحت طرحت ابوها رقده إلى بعد العشاء


#فقرة_اليوم_الاول_في_الجامعة

المشاركة 6️⃣3️⃣

أول يوم دخلت المحاضرة وعيوني يزغللين  من الفرحة وشايف نفسي دكتور أبو أسد  والأمور سابرة عندي زي الفل  فجأة سمعت صوت خشن 😂  يخرب بيتك أنت والصورة هاذي اطلع برا ، جيت اراجعه زي الأستاذ حق المدرسة زاد ندعني كلمة اجت ملان الجبهة حقي🤣 المهم عرفت بالاخير أنه الدكتور عارف 😂


#فقرة_اليوم_الاول_في_الجامعة

المشاركة 7️⃣3️⃣


أول يوم بالجامعه ماكان في حماس ولاشي لانه دخلت تخصص ما اشتيه سرحت مجبرة ابصر كيف التخصص هذا بس سرحت من صباح الصبح وصلت عند الكراسي مش عارفة وين اروح وبعده ابصرت بنات وطلعوا نفس تخصصي قلت حلوو ماعاد بضيع بعده دخلت اول محاضرة وكانت ثقافة إسلامية جلست مركزة بكل قوتي😂 اما الان قده المحاضرات الصح ماعاد اركز الا شوية  حماس البدايات😂
كملنا المحاضرة وانا ما اعرف احد الا قليل من الحاضرات وبعدين خرجت وقلنا نشتي الجدول من اجل بكرة وكذه قالوا موجود بالكشك وسرحت اشتريه ب 50 ريال كلما اتذكر اضحك على نفسي هو موجود مستند بقناة الكلية ومش كذه وبس كلما تغير اسرح اشتريه ب 50 ريال لو اشتريت لي شي لبطني انه احسن😂

#قهر

#فقرة_اليوم_الاول_في_الجامعة

المشاركة 8️⃣3️⃣


اول يوم جيت الجامعه وانا عادنا وصااال من البلاد حااامي 😂ومهنجم قبلوني طب عام بجامعه صنعاء المهم😂
قلت سهل عادوا اول يوم  ماقد بش دراسه...شدخل بالثوب والكوت😂لما ارجع ابز لي بنطلون وشميز.....المهم على دخلتي..

لقاني امين الكليه وهو قد كان عيدخل المكتب حقه لانه قريب المدخل.. كان يقلي ييي انت طالب هنا قلت له ايوه قال وين الميري🤣🤣🤣🤣🤣🤣🤣🤣،والله اني انحررجت وماعد دريت ماقله.. قلت له عاد البدله تتفصل😂احررجني 😂😂💔


#فقرة_اليوم_الاول_في_الجامعة

المشاركة 9️⃣3️⃣


طبعآ انا لسا مستوى اول يعني موقفي طاازج🙂😹

اول يوم في الجامعه قبل اسبوعين كنت متحمسه طبعآ ماأنمت من الحماااس  وصلت الجامعه جلست ادور القاعه واخيرآ لقيتها   وتعرفت ع بنت هناك خرجنا من المحاضره الاولى  انا ادربت  😹😹💔💔 وكل ماشتي اقووم ارجع ادرب مرره ثانيه جت البنت تقومني وقدها عتنفجر من الضحك وانا شوي وابكي المهم اول يوم اكتشفت قووه الجاذبيه الارضيه 😹😹💔🙂



#فقرة_اليوم_الاول_في_الجامعة

المشاركة 0️⃣4️⃣

أول يوم دراسي طبعاً نو شغف آند نو حماس والله قصدي أسير أجرب ماعيقولوا لي وأجزع أيام فقط

المهم أول مادخلت القاعة وأنا ساع المبلودة جسم يتحرك فقط أما الحس والعقل يعلم الله فينه بدأت المحاضرة وكانت تشريح وهذك الدكتورة بتتفرعن وتتفنن بالشرح وكانت تبسر لاعندي وأنا أهز رأسي على أساس فاهمة أيش بتتحاكا وفي نفسي أقل ماودف بي أدخل طب وأنا كنت في الثانوية أنجح بالعرطات والغش وشكرن على صراحتي 🌚 😂

وشوية وأرجع أواسي نفسي وأقل عتتعودي على الوضع والحمدلله لاتعودت ولا شيء 🌝ولا حتى  نفسي قانعة بالتخصص من أساسه😢.


#فقرة_اليوم_الاول_في_الجامعة

المشاركة 1️⃣4️⃣



أول نثرة مش اول يوم

طبعاً اول يوم في جامعتنا ما صار اول يوم الا بعد شهر من التأجيلات(أكيد عرفتوا من وين احنا) 😁😁
وأخيرا قالوا دوام، فالدكتور اللي هو انا بدأت أخطط ايش اعمل بأول يوم
فتحمست ولبست البدلة (الرسمية طبعاً والأكمام حق الكوت طوال مش ذوقي بس ذوق الوالد😅😂) امانه وقعت سع مدرس التاريخ اللي كان يدرسنا
المهم رقدت بالبدلة واللابكوت فاااارح سع ليلة العيد 🤣🤣🤣🤣
بكرت الصباح والدفتر ابو جر والأقلام والحركات والدهان سكبته كله لا شعري فاللي يشوفني من بعيد كنت أضاوي سع النور حق السيارات😅😂😂😂😂

وصلت شفت لكم أشكال وألوان جلست مطنن ساعة ومتعجب انا كيف با اعيش مع هوذا الكائنات كيف؟!! 😭

شفت لكم واحد قصير فقلت يمكن انها واحدة من الطالبات جابت أخوها بعدها وهو كان يوزع إبتسامات للسارح والجاي المهم سرت اتشيحف للقصير هذا ومسكت بيده ودخلنا القاعة جلست انا وهوه وكانت المحاضرة إنجليزي فانا المجتهد خرجت القلم وبدأت الخص،ما دريت الا وهوه والكل قام يكتب تعجبت وقلت له ليش تكتب استمع استماع،قال لي انا زميلكم😳😳 الصراحة انا انصدمت قلت بيني وبين نفسي ودافته بين العمالقة هوذا(وحالياً القصير هذا مندوبنا وصار متوحش😅)
وهذه المحادثة كلها بيني انا والقصير والدكتورة تصيح اللي بالأخير يي يا وليد يييي يااااي وانا انتبهت فعملت نفسي ميت وكأنه مش انا لما جاءت لا جنبنا صبنت أخوكم شويه والطلاب كلهم يشوفوا لا عندي وانا قد كنت اشتي ابكي بس ستر الله قاومت  🥹🥹🥹
يا جماعة ما احترمت حتى البدلة الله يقلعها طبيعة😁😄😄
المهم كملت المحاضرة خرجت طبعا انا والقصير وسرحنا اصتبحنا واكتشفت ان معاه موتر(الموتر حاليا يخدم الدفعة كثير) ولا حد الان وما زلنا مستمرين مع القصير والموتر في حكاية الف ليلة وليلة لما يفرجها الله 🤣🤣🤣


#فقرة_اليوم_الاول_في_الجامعة

المشاركة 2️⃣4️⃣

ههههههه طبعاً اول يوم دراسي لي في الكلية شعبة المختبرات جامعة صنعاء
وكان هذاك اليوم يوم تعريفي وكذا وانا فارح بقوه
وبعد ما كملت المحاضرة التعريفية في قاعة جابر خرجت للسنتر حق الكلية واحصل لك دكتور ومحوشين عليه الطلاب طبعاً تعرفوه اعتقد الدكتور صالح المعرشي طبعاً معروف بجراءته وندشه للطلاب ودفت ما كنت اعرفه هههههههههه وانا قلت ضروري اتعرف عليه لاني شبهت به قوي بأنه من البيضاء وهكذا بفضول وشقحه  قلت له يا دكتور انت من رداع وهو شاف لعندي وقال لي قدام الطلاب منو هذا الحارق 🤣🤣🤣 كنت انا أسمر أصلا خلاص احترجت طننت ورحت لي يا الله من أول يوم ندش


#فقرة_اليوم_الاول_في_الجامعة

المشاركة 3️⃣4️⃣

كان دوامنا ٣١ .٨ وأحنا فارحين أنا وأصحابي باقي لنا أسبوع ونبدأ دوام بنرتاح ونذاكر أناتومي فيه عشان ما نداوم زينا زي الجدار
ويوم الجمعة قبله بأسبوع ٢٣ .٨ خرجت من العصر لليل مقضيها سهره وفشعة وما كان معي نت أشوف النت وخبر الدوام
أروح البيت وهم يقولوا لي بكرة دوام أنكبدت كبدة بنت كلب 😭💔💔💔
وما صدقت رجعت أفتح شبكة البيت الإ وهو جددد دوام 😭😭😭😭💔
قمت ألفلف حاجاتي وبكرت بلا نوم من الأرق كأنه معي نتائج😂😂💔 ، وسافرت لمنطقة الجامعة وقد كان صاحب الباص بينسينا😭💔
داومت أول يوم وياريتنا ما رحت ما أخذنا إلا محاضرة واحدة ومافي منها فايدة


#فقرة_اليوم_الاول_في_الجامعة

المشاركة 5️⃣4️⃣


اول يوم كان عملي، و كنا ثلاث مجموعات، وكل معمل في مبنى لحاله، المهم احنا خلصنا اول محاضرة وانتقلت مجموعتي للمبنى الثاني و انا مشيت الاولة 🚶‍♀، وصلت و في واحد منتظر في الممر، وبما ان انا وصلت اول واحدة، قال لي انتي مستوى اول، وانا شفت له كذا😒 وقلت له عيب تكلم بنات يا قليل الحياء "هذا كله من تنبيهات نبع الحنان طبعاً، لا تكلمي ولد عيب"

المهم يا جماعة الخير دخلت المعمل، شوية ودخلوا الطالبات، شوية و دخل الشخص ذي قلبت عيوني فوقه، تخيلوا: طلع الدكتور حقنا😶

انا تخبيت تحت البنش لاما كملت المحاضرة،  ولحد اليوم وقد انا مستوى رابع ايحين ما اشوفه اغير طريقي🚶‍♀..


#فقرة_اليوم_الاول_في_الجامعة

المشاركة 6️⃣4️⃣

اول يوم في الجامعه كان اليوم ٦٠ للناس الثانيه بحكم اني دخلت متأخره شهرين وكان اول يوم لي في المعمل كان شعور غريب وكئيب جدا وكرهت الجامعة وما تأقلمت ولا صاحبت أحد إلا من ترم ثاني 😭💔

# اقصر قصه حزينه


#فقرة_اليوم_الاول_في_الجامعة