عاد لو هي طالبة جامعية
تكون مدعوسة بالجامعة
ومدعوسة بالبيت ومدعوسة بالمستشفى وتخرج تنخط بالنظارة الشمسية
اوووووه يا بنت المبسوطه.



#طالب_ضابح 🐸💔

السبب الرئيسي الذي خلاني أجلس على طبيعتي وما أتطورش طول عُمري هو هذا الموقف البسيط ههههههههههههه


مرة في عطلة صف رابع أبي خزن بقات خدف من روحه وخدر لوما حرق الفيوز وجاء الليل وقدمت أمي العشاء وتعشينا الحمدلله وعبيت لي ذيك القلص الشاهي وقمت جلست وارتزحت لا عرض المدكى وكنا بنتابع مسلسل "حريم السلطان" ههههههههههههه ههههههههه
قال أبي لأمي ما رأيش غدوة نسير حديقة فنسيتي.....!
أنا سمعت أبي قال هكذا لوما شُرغت بالشاهي وكرعته لا فوق البنطلون وحرقين ارجلي ...
مش معقوووول عنسير حديقة يا أباااه قلدك الله ماهيش الكيمرة الخفية وتشتي تخمنا ههههههههههههه
طلع الحاج منه الصدق وقمت أنا وأخوتي طوالي سرنا نرقد على شان يمشي الوقت سريع ....!
رقدنا وبكرنا الصباااح من يا الله رضاك
قامت أمي فعلت الصبوح ولبستنا الأوعية "الملابس" حق العيد ...
الله يحفظها كانت تشتري لنا ملابس رجالي على شان يجلسين مقاسنا لا عشر سنين قدام .....!
لبستني هذك البنطلون لوما وصل لا عند صدري وعطفته ساع المعوز ههههههههههههه
ولبستني القدة "الحزام" وحزقت أبوه لوما حسيت الكلى أعتصرين ساع الليم "الليمون" ههههههههههههه
المهم لبست أخوتي كلهم وكملنا وأبي كمل يصتبح وقام يلبس الثوب والجنبية والكوت
طبعاً كان معانا شاص موديل ٢٠٠٦ في هذك الفترة من الزمن ههههههههههههه
طلعنا في البودي وأنطلق أبي إلى حديقة فانسيتي المجاورة لميدان السبعين .... وصلنا لا هناك ونزلت أنا وأخوتي وقطعنا التذاكر ودخلنا نلعب ....
المهم جلست ألعب لوما شبعت ووصلت لا عند لعبة السيارات وكملت العبها وخرجت قلت شاسير لا عند أبي يدي لي خمسين أشتري بطاط ههههههههههههه
المهم وأنا ماشي لقيت ولد في عمري وهو ممشط ولابس اللبس الضخم وشمه عطر ووجهه بيلمع من الدهان وفوقه بياض سبحان الله ههههههههههههه
كان ذيه الجاهل بيسعى لا عند أبوه وبيصيح "بابا بابا أنتظر لي" ويسير يحضن أبوه من الخلف وابوه بيمشي وكان يتعلق عرض أبوه ويدور حوله وأبوه بيضحك وبعدين حبه في راسه وادى له خمسمية ريال 😍‌❤️⁩ أنا الصدق شفت الموقف لوما أرتعشين بطون قلبي وطلع في عيوني قلوب ‌❤️⁩
قلت وأنا حرام معذر ما أقلده وأقع متطور وراقي لأنو القبيلة والتبلد تعب ههههههههههههه
المهم جزعت ولقيت الغالي مسنب فوق الرصيف الذي جنب لعبة القطار وبيشرب دخان ....!
دقني عرق التطور وسعيت لا عند أبي وبين أصيح " يا أباااه يا أباااه" ههههههههههههه مابش فايدة حرام أن الذي يسمعني عيقل مدري من مـ.ـات ....؟

المهم وصلت لا عند أبي وقلدت الجاهل هذك وجيت من ورى أبي ومسكت بالجيوب حق الكوت حقه وبدأت أتعنقل "أتعلق" عرضه ....!
وبين أقله "يا بابا أدي لي خمسين أشتري بطاط" قال ماشي مضرة عليك فلت لحقي الكوت يا يهـ.ـودي
وأنا أزيد أتعنقل "أتعلق" اقوى وأقول "هيا باباااا يا منعاه" ....!
فجأة بدون سابق أنذار ما دريت إلا وقد أنا عند أرجل أبي ....... قمت أبسر وإن قد الكوت حق أبي أقترش ساع الحنش ههههههههههههه ....
يعني أبي ماعادهو لابس إلا البطانة حق الكوت ....
شاف أبي لا عندي وجلس ساكت خمس ثواني .....!
رجع طفى الدخانة وشل القرشة حق الكوت ولبسها ورجع يديني زبط ههههههههههههه وروحنا هذك الساع وأقتلب أبي قلبة خـ.ـادم في عز الظهر ....!
وجلس يمرمط بنا كلنا طول الطريق ويقفز من فوق المطبات وأحنا في البودي ساع الصحاح الكوثر من طرف البودي لا طرفه ههههههههههههه

ومن هذك المرة بطلت أزيد أتطور وجلست على ما أنا وكل ما أشوف الناس المتطورين يصيحوا " يا بابا يا ماما" أغض بصري وأجزع وأنا بين أتنهد هههههههههههههه

#خاطركم


#طارق_رسام

انتباااااه انتباااااه انتبااااه

تتوالى الاخبار وتراقص الأفراح

وكل سنه يتخرج أدمن من هذه القناه الفخمه جداً

معنا الخريج الفخم الحبوب الخدف

ألف الف مليون تريليون مبروووك وعقبى للدراسات العليا يا افخم امام في العالم

اشتي تفقشوا المنشور هذا قلوب ❤️‍🔥

لعيون #الامام_الخدف


سريع وبدون اي تأخير

#اقرب_من_الطب_وغنيله


#its_dollar

لا لا أيش الاخبار الحالية مبروووك لأحلى أمام الوسيم، العسل الخدف🔥🔥🔥 حبيب قلبنا وأحلى خريج بالدنيا ..والأدمن الفخمممم
.دكتورنا
جابر وهبان الوهباني....

وزي ماقال لكم دولار فقشوا قلوب خيرات🔥🔥🔥🔥

#غراب ♣️

#من_الذاكرة

في يوم من المرات سرت المعهد اشتي اسجل فيه بعدما بكرت الصبح تمشطت ودهنت راسي بزيت شيف 💙 لأنو مدري فين بتخبي بنت عمي الصغيرة حقها زيت الشعر ههههههههههههه

طبعا خرجت من البيت وكان كل شوية أخرج التلفون من جيبي وأبسر روحي وأغمز ههههههههههههه حرام مابه أوسم مني في صنعاء وضواحيها 🤣
المهم طلعت فوق الباص وكان به واحد دب من روحه وباين عليه آفة ويأكل الأخضر واليابس ....
قلي " يا أخي بين أشمك بروست" ههههههههههههه ......!
وجلس شوية وقال يا أخي بين أشمك سوسي .....
ما نزلت من فوق ذيك الباص إلا وقد حفظت كل الأكلات المقلية على الزيت ههههههههههههه
نزلت من فوق الباص وجزعت صلا المعهد وكان كل شي فيني ما يرحمش وبمواصفات عالمية الوسامة والطول والشميز الأصفر ....؟!
كانت الحاجة الوحيدة الذي مخربة لشكلي هي البنطلون الذي كنت لابس له ههههههههههههه....
كنت لابس بنطلون حق بدلة رسمية .... طبعا هذا البنطلون حق عمي الذي كان أستاذ لغة عربية عام 97 هههههههه
أشهد لله إن أرجلي كانين يضيعين وسط البنطلون وبعدى أنا عمري ما قد ابسرت بنطلون يزحف ساع الرمال إلا هذا البنطلون ....
يعني لبسته في البيت وهو لا عند أحقاوي وما وصلت المعهد إلا وقد أنا ملثم به ههههههه كان يزحف مطلع ......
دخلت المعهد وأنا كلي ثقة بوسامتي إني شاجلس السكرتيرة ..... جزعت صلا الرسبشن هذك ولا به طالب غيري

وصلت لا قدام السكرتيرة وأبسرتها وهي معطوفة فوق الكرسي مدري ما بتدور وتقلفد في الأدراج ....
المسكينة أبسرت صليا وجات لها رعشة كهربائية لوما نكعت من الكرسي

أنا اول شي قد كنت بين ارحمها وأشتي أواسيها بكلمتين غر لو تدروا ما قالت لي بنت اللذين آمنوا ......!
قالت " الله يلعnك ما أكبر نخرتك .... فجعتني" ههههههههههههه

جرحت أحاسيسي جرحت مشاعري جرحت الأسلاك وطل زيت الشيف من عرض راسي من قوة الغثى وبنشرت نخرتي ساع الشبيبة ورجعت عطفت البنطلون لا عند أحقاوي وروحت البيت رقدت من قوة القهر💔
رجعت قمت من النوم وقد تغدوا عليا وقلت لأمي ليش ما قومتيني قالت لي ما شفتك ولا أبسرتك ....؟
كله عمل البنطلون

المهم يا خبرة يا منعاه أدوا لي خلطات تصغر النخرة لأنو أنا الصدق تعبت من نخرتي ثقلت عليا
كل يوم ما أرقد إلا وقد في رقبتي خمس عصب من قوة الحمولة الذي عليها والإجهاد

أدوا لي حل يا منعاه

#المنخر

#طارق_رسام

يا جماعه يااا جماعه ياااااا جماعه


ليش الوعي هكذا في الناس

تخيلوا يمرض واحد من البيت اسهال حاد وطرش وقت الفجر حسب كلام اهل المريض

وما جابوه الا 6 الصباح

يوصل للطوارئ وقد فقد الحياة وبعدين ما تسمع الا الصياح والبكاء على هذا المريض


هذا الأيام ابسط اسهال او طرش لا تتساهل معه بالذات مع كبار السن

امس نفس الوضع حصل لصاحبي من قرية جنبنا وعاده شباب وتوفي


الوضع يخوف فلا تتساهلوا

حتى لو طلبوا منك ايش يفعلوا قول لهم على طول وبدون تأخير مستشفى وبس

الوعي يبدأ من عندك
فبادر ولا تخليهم يصدقوا خلطات الأعشاب والصيدليات

شكراً


#مؤقت

#its_dollar

ألا ليلة خميس ،ليلة خميس ،ليلة خميس كلن معه حبيبه🥁 وانا وزغمة آخرون مواليد تسعينات مثل كل مرة نتسمع ونستمتع بأغنية (في منزل انثى السنجاب) ...لكن الحق يقال والله انه نشيد عظيم،وابداع ويسر الخاطر❤️


#غراب ♣️

من أتم قراءة الصفحة،فليتفاعل بأحببته ❤️

#الورد_اليومي 🤍

بصل لمع وسط المدينة :




#طالب_ضابح 🐸💔

.



https://www.tg-me.com/justlapcoat/3734






#طالب_ضابح 🐸💔

لا حول ولاقوة الا بالله
يغادرنا اليوم إلى جوار ربه أحد ابناء كلية الطب الزميل وسيم الشرعبي رحمة الله تغشاه. 💔





#طالب_ضابح 🐸💔

يا الله ارحم ضعفنا وقلة حيلتنا . 💔

الدرجات والحياة اللي يعيشها الطالب المغلوب على امره تفعل هكذا والله
حزن واكتئاب وضغط نفسي وجسدي وكل شي يقرح القلب فعلا ومش مجرد كلام شعبي
فعلا يقرح القلب والزميل وسيم الشرعبي مش اول مثال للأسف الشديد
لنا زملاء كثير كانوا ضحايا الحزن والضغوطات


حسبنا الله ونعم الوكيل.




#طالب_ضابح 🐸💔

عظم الله اجر أهله وذويه وكل طلاب جامعة عمران وعلى رأسهم طلاب الدفعة الرابعة


إنا لله وإنا إليه راجعون البقاء لله.




#طالب_ضابح 🐸💔

والله اننا احزن جدا لما يحصل هكذا لطالب بأي كلية وأي جامعة
لذلك دائما اقولكم طز بأم الدراسة والدرجات لقده بتجي على حساب صحتك ونفسيتك
يلعن أم الاختبارات والدراسة لقدك بتكون أنت المتضرر

وعليكم بأهلكم كلموهم وقولوا لهم
اقولكم موقف بسيط في اختبار من الاختبارات العملية خرجت من الاختبار وأنا منهار حرفيا
احس اننا مامشيش على الأرض والدنيا مظلمة عليا
ماقدرتش اروح حتى للسكن
قلت مابش غير امي وابي
اتصلت لهم بهذك الشعور
قالوا لي " يابني اهم شيء أنت وطز بالدراسة، إذا تعبت روح، اهم شي عندنا انت
أبي قال " يابني ارسسسب عادي، ايش فيها، ماخلق ربي سنة بعد سنة إلا لقضاء الحاجة ولا تتعبش نفسك"
والله ارتحت نفسيا وحسيت ولا كأنه به شي
لذلك إذا به شيء كلم اهلك
قلهم، اشتكي لهم، خليهم يكونوا معك ولا تسكتش، لاتجمعهنش لداخلك وتتعب قلبك
انتبه ثم انتبه
لأن البعض ضعيف وقلبه مايتحمل والله.




#طالب_ضابح 🐸💔

رحمة الله تغشاه واسكنه فسيح جناته
إنا لله و انا اليه راجعون
حسبنا الله ونعم الوكيل 💔

الله يعصم قلوب أهله ويصبرهم

#طبيب_ذماري