المشاركة 7⃣

ذيه موقف لأختي اللي هية مستوى رابع بشري
بعدين من كثر المطبقين قد المرضى بيبغروا مننا
أهم شيء جاء شيبه قد عمره سبعين مدري كم وكل ماجاء لاعنده طالب يخطى يشرح له حالته وبعدين كان تشخيصه MI الذي هيه انحشار في عضلة القلب أو مدري مابيسموها
وجت صاحبة أختي وقال لها أنا في ألم في الصدر جهة اليمين وألم فوق المعدة وألم مدري أين وهذاك مسكينة مقشننه قد لقت لها مريض متفهم وجت أختي بعد صاحبتها وقال لها عندي ألم في الصدر جهة اليسار والم في الظهر وألم في الجنب و...و ..
أهم شيء عصد الدنيا عصيد وواحده يقل مزوج ومعه جهال والثانيه يقل مش مزوج 😂😂
بعدين لما جاء الدكتور وقع لهن تصبينه ابو الف وقال الدكتور يكن يتأكدوا ويشلوا شيت مع المرضى الذي بيخافوا الله
هم الذي مشوا وقد بيداعي زملائهن ويقل لهم تشتوا هستوري ويضحك
#يعني شييبه نزغه شلوه😂



#فقرة_دشملة_الخواطر

المشاركة 8⃣

كنا في المستشفى نزول ميداني واعطونا كشف نكتب فيه اسمائنا ونوقع

كتبت اسمي وقبله كلمة ( الدكتورة ) ما اعرف كيف تهابلت ذاك اليوم

المهم جاء الدكتور المشرف علينا ويشوف كشف الطلاب
قال اين هي الدكتورة 🤨
والكل ساكت واني نزلين بطوني
ورجع نادى مرة أخرى قال اين هي الدكتوره فلانة ....

رفعت يدي واني مستحي وخايفة 😶

قال لي اذا انتي دكتورة اخرجي من هنا لانه مانستقبل الا طلاب مش دكاترة

واني خرجت على طووول

ومن بعدها لقب دكتورة مستحيل اكتبه قبل اسمي 🤣💔


#فقرة_دشملة_الخواطر

المشاركة 9⃣

مش أنا معي صاحبتي متزوج ومعه بنت صف اول ودرسته بمدرسه جنب الجامعه عشان تكون تجي هي وهي وتروحه وفده قريب تنتبه عليه
المهم صاحبتي كل مره توصي بنته لقده معنا دوام ل ثنتين أو أربع أنه لمن تخرج واحده تكون تريع له محل الساحه وعلمته موقع جاء الحارس وقله ما تفعلي هنا للبنت الصغيره وهي قده كل مره تجلس تنتظر أمه بالساحه بمحاضرات دكاتره محددين البقيه تدخلها لانه ما يتحاكوا قالت له اراعي امي تدرس الحارس بيتجمل وأنه حارس وكذا بيفعل مع البنت الصغيره معروف وقد احنا بمحاضرات دكتور يكره الاطفال والنساء 😂تزوج مرتين من شهر ويطلق وقد احنا عارفين أنه ممنوع اطفال وهي مش طفله قده اول تدرس قله ايش تدرس امك قالت له طب اسنان وهو قده عارف ذاك اليوم مداومين احنا مستوى رابع خذ البنت وجاء بكل شخاصه يستأذن والبنت أمامه وهي شافت امها وهو دري وشاف للدكتور قله تدخل عند امه وقفاء مشي صاحبتي قده تجهز امتعته 😂😂😂لانه عارف اساسا أنه بتاخذ بهذله وهي اساسا بتخرج الدكتور بكل تكبر برع من القاعه جينا نلاعب جهال 😢وهي قده محرج من الطلاب والدكتور خرجت تجر بقايا جبهته والدكتور قده عارف انه الام ما دخلها وفوق ذا ما سك عاد بعد خرجت ادي تهزيه ودرس أنه ما جاء يلاعب جهال على أساس يلاعبهم😂😂
خرجت وجابت لبنته درس وقالت له ما عليك منه الحارس اني قدني الدكتور اللي ما يصايح ادخلك وذا يصايح هيا الحين عجبك خرحني والبنت تقله ماودريني واصلا هي طفله

بعدين عاد احنا خرجنا وهي تقول لنا ما زاد قال
وحكت لنا القصه حق الحارس وبنته وأنه أدت لبنته درس عشان سببت بخروجه وإحراجه 🤣🤣🤣



#فقرة_دشملة_الخواطر

المشاركة 0⃣1⃣

عادني مستوى أول وأول شهر أدرس. فيه ماعندي موقف قوي بس مره قلت للبنات أصه بقفز للدرجة اللي تحت وفعلت حركة زمبقة وقفزت وأذا بالدكتور عبدالعزيز
دكااااتييييير دكاتير المستقبللللللل ويتقافزييين


وهات يامحاظرات وأنا ميييت ضحك 🤣🤣🤣🤣💔


#فقرة_دشملة_الخواطر

ممممممممممممممممحااااضصضضضضضضضضضضضضضضضضضضرررررررراااااات بالضااااااااد بالضااااااااااااااااد يا دكاترة
والجمع دكاااااااااااترة
تمام
دكاتير هذه مش باللغة ولا بالقاموس جبركم هاه.




#طالب_ضابح 🐸💔

بتفرقوا بين الظاء والضاد وإلا شوقع لكم فلكه وضرب بالأصابع يا طلاب يا جامعيين، وقد أنذر من أعذر مدري أعذر من أنذر اهاه.



#طالب_ضابح 🐸💔

يعني قبلما تكتب الكلمة كن انطقها وشوف كيف
هل تكتبها بعصا أو بدون عصا وأنت بتفرق
أحنا يسموا لغتنا لغة الضاد ومش قادرين نفرق بينهن والله إنه عيب.




#طالب_ضابح 🐸💔

.




#طالب_ضابح 🐸💔

هذا منشور تكتبوا به الكلمات الذي بالضاد والظاء يله هاه ..




#طالب_ضابح 🐸💔

سجلوا بالكورس الشبه مجاني لشرح الفرق بين الضاد والظاء وذلك في بوت روكا.


@Roka2022_bot

#طالب_ضابح 🐸💔

المشاركة 1⃣1⃣

انا كطالبة طحطوحة شهبوذة  الدفعة




اللعنة على هذه الالفاظ التي تصف عمالقة العلم امثالي 🦦💔



الحمدلله قا انمسحت كرامتي بالدرجات وعاد اني  بالحبيبة الكلية بسنة اولى


معدفيش كرامة لايام التطبيق وهذا يريحني

#قااا_تعودنا_مله😵‍💫🤣



#فقرة_دشملة_الخواطر

مقولة البقاء للأقوى مُبهمة المعنى و ليست كافية دائمًا، فالبقاء للمحاربين المناضلين، البقاء للناس التي تستنزف طاقتها في معركة العلم، البقاء للصامدين رغم الصِعاب، البقاء لجنود تلك المعارك والسهر و تلك الليالي الطويلة، #دفعة_ثانية جامعة 21 سبتمبر البقاء لكم يا عظماء فأنتم أهل لتلك المعارك، الطريق طال ولكن لنقطة الوصول لذةً اخرى وانتم اصبحتم على اعتابها💙.

كل التوفيق والسداد لكم جميعًا.
دعواتنا ترافقكم دائمًا وابدًا💙.
#أنتم_لها.
#بكالوريوس.


#طالبة_طب.

عنسرد لكم ملطام امس قصدي اختبار امس الذي يعتبر الخازوق الأكبر في مسيرتي الفنية هههههههههه

سرت قبل أمس صلا الخبرة نذاكر لأختبار العملي والذي هو عبارة عن ٧ مواد كل واحدة العن من الثانية..!

المهم جلسنا نتجابر انا وأحد الصالحين من الخبرة الذي انا وهو نفس ال level في المذاكرة والزبج..!
الباقيين كلهم مذاكرين..!

جلست اتجابر انا وهو الى الساعة ١٠ الليل هههههههههه
ولا كأن معانا أختبار ولا كأن احنا طلاب اصلاً

بدأنا المذاكرة من الساعة ١٠ وفتحنا مادة الباثو 💔
اولاً هذه المادة ما تستر تذاكرها وأنت مخزن لعدة أسباب ومنها:
صور الأمراض والتقرحات واناس الممخططين الذي بيطرحوهن أمانة انهن يسايخين بطونك..!

المهم بنذاكر اول معمل وكل شي ضخم لأنو معمل بسيط ويتعلق بأمراض اللقف فقط
دخلنا المعمل الثاني وبدأت التشبيهات..!
اقل صفحة فيها اثنين سلايدات هستوباثلوجي
وكلهن باللون الوردي ههههههههه
نفس الكلمات والألحان نفس اللون نفس الدواير نفس المطبات.!
بأيش عنفرق يعني؟!
بقوة التركيز؟
حتى بقوة الإيمان والله ما نستر نفرق بينهن

تحس نفسك صاحب تكسي شغال في الصين ؛ كل الزباين متشابهين ههههههههه

وكنا كل شوية نسأل الذي حولنا ونقول ايشو هذا السلايد ، وهم يجابوا هذا السلايد الذي يجي في الأمعاء الغليظة
أمعاء غليظة..!
أخرررس يا تنكة
احنا في ملزمة المعدة الآن هههههههه

وخليناهم يذاكروا من جديد

يأسنا من التسميات ، رجعنا للتحشيش وربط الأشياء الذي ما ترتبطش
اطلقنا لمخيلاتنا عنان التفكر..!

هذا السلايد يا مسمك يشبه الأرنب الأعور
وهذا السلايد كأنو أم حامل بتضحي الملابس
وهذا السلايد يشبه السيكل المبنشر
وهذا ساع التروس حق الساعة

المهم مكناها تحشيشات وربط الربط
جات الساعة ١٢ واحنا مغرزين في الباثو

وأخيراً كملنا الباثو ورجعنا هستو وانهو نفس الدويم مابش حاجة مميزة

كملنا على الساعة ٢ ونص ؛ وقد انا ممدد ومبحشم في الشقين ههههههههههههههههه
كمية إحباط مش طبيعية

دخلنا ندور ملخصات للميكرو والباراسايت
طلع حتى الديدان اخوة ومتشابهين
تينا سوليوم، تينا سيقناتا

وهات لك يا خبيص
يعني الذي بيكتشف الدود هولا والله انو بيسميهن وفيه دود
ما بيسميهنش وهو طبيعي
ايش عيضرك لو سميتها مثلا حمود؟!
مثلا حتى لو سميتها جون سينا ؟!
حتى في اسوء الحالات سميها جوناثن..!

لكن لا ضروري ان انا اعقد جميع المتعلمين بعدي

قد الساعة ٤ وباقي معانا نص المواد ههههههههه
قلنا نجي نذاكر البايو نبسر ايش فيها..!
مدري ايش دخل البايو بالحالات السريرية وبالحصوات وآلام المفاصل وضعف النظر والكسور..!

تحس دكاترتنا بيتسابقوا على جائزة من الذي عيرسب أكبر عدد ممكن من الطلاب هههههههه

رجعنا قلنا خلاص وقت النوم ضروري نرقد ونقوم قبل الأختبار بساعة عشان نكمل نذاكر الباقي..!
ما رقدناش هههههههه
كمية دبور مش طبيعية

وصلنا الجامعة نتلوى ونسلم على الموظفين والطلاب لا الساعة ١ ونص
دخلنا نختبر
انما أختبار..!
والله انو اصعب من اختبار الآخرة
الباثو والهستو نفس السلايد يعني بس مصور من عدة زوايا هههههههه

وعاد الطابعة الذي بيطبعوا لنا بها الأختبارات قد لها من عهد الأتحاد السوفييتي من أيام الدولة الأشتراكية
قد فيها عمى الوان هههههههه
يعني السلايد مطبوع ابيض واسود وتفلتين وردي وتفلة أزرق
وملان خطوط ودرج وسيارات ومفاتيح وقرامم وشعر
حتى
سفينة..!
حرام ان انا شفت سفينة بتبحر في ال adenocarcinoma ههههههه

حتى اختبار التشريح الذي على أساس قد احنا حافظين له من قبل
الدكتور رجعنا مخيطين والله
الإجابات عبارة عن :
A- 5cm
B- 5ml
C- 8_12cm
d- 8_12 ml

انت مش عارف تلقفها من ال cm ولا تلقفها من ال ml
يعني ايش اختار ذلحين ؟! سنتيمتر
ولا ملي لتر
ما تدري هو بيتكلم على صحة ماء او على ارضية ؟!
شوية بالمتر وشوية باللتر

وعاد اختبار المهارات هذا حب عظيم له 💙
مسوي لنا نص الأختبار على ال thoracic cavity
واحنا في الهضمي ...!
الهضمي يا دكتور الهضمي الله يرحم والديك

رسبنا في حقنا الأسئلة انت قادر
بس ترسبنا على أسئلة من خارج والله انو قهر ههههههههه

وقلت ماقد عد اضلل شي ورقة الإجابة سهل ازيد ابسر الميكرو الذي سارت تدي لنا أختبار من مختبرات المأمون..!
والله العظيم تحسسك انك مخبري مش دكتور
يعني تخليك تقطع ارزاق الناس لما تتخرج
تخرج وانت فاهم العينات حق البراز كلها ههههههههه

المهم كانوا الطلاب يجزعوا من جنبي وهم خارجين
ورب الكعبة مابه طالب متشابه هو وطالب بالحل هههههههه

فحسيت انها نكبة جماعية بكل فخر وإمتياز وكلنا راسبين

وفعلاً خرجت بعدما ضللت الورقة
وطلعنا كلنا راسبين ههههههههه
حتى اللجنة العلمية حقنا الى الان عادهم مصروعين ماقد استروا يجمعوا لنا الأختبار لأنهم اصلا مش داريين حتى هم ايش اختبرنا والله

اختبار يحسسك انك مقاول ومبلط وعسكري ومهندس ومحامي ويحسسك بكل شي في الحياة إلا حاجة واحدة وهي انو يحسسك انك دكتور



#طارق_رسام

دعواتكم كثروها لهم❤️ بإذن الله ربي يسهل لكم بأفضل اختبارات وأفضل درجات يارب...ويخرج الكل مجبورين الخاطر...
كثروا الدعوات..خصوصاً للأدمنين
#طالب_ضابح و #its_dollar

بالتوفيق بأول اختبار بكالوريوس وبباقي الإختبارات ❤️


#غراب ♣️

من أتم قراءة الصفحة،فليتفاعل بأحببته ❤️

#الورد_اليومي 🤍

قافلة، قااااافلة جدا
على الله بس💔💔💔💔💔💔💔💔💔.





#طالب_ضابح 🐸💔

من وين الواحد يبدأ من وين يبكي من وين يشكي ولمن يفضفض💔💔💔💔💔💔💔💔💔💔💔💔💔





#طالب_ضابح 🐸💔

يا جماعة أنتم فاقدين للشغف مثلي وجالسين تحضروا جامعة هكذا بس تحصيل حاصل مثلي أو لا!
وعايشين حالة اكتئاب عام
وفقدان شغف من كل شي بالحياة.



#طالب_ضابح 🐸💔

أنا كنت اقول إن الواحد يدخل طب يوقع هيبة ودكتور وحاجة فخمة هكذا
مانش داري إن الواحد يدخل يمرض ويتعب ويفقد شغفة ورغبته للحياة ويفقد نفسيته ونفسه ويضيع ويحرف ويقلق وينضغط ويندعس ويصلع ويفقد ملامحة وماله وهيبته وكرامته وصحته ونومه وكل شي كان محافظ عليه، الله بس، الله بسسسسسسس ليت ومن كان ينصحنا قبلما نتورط.



#طالب_ضابح 🐸💔