የፍኖተ ትጉሃን ሰንበት ትምህርት ቤት ለ8ኛ ዙር ያስተማራቸውን 32 ተተኪ ሰባኪያነ ወንጌል ማስመረቁን አስታወቀ

ነሐሴ ፲፭/፳፻፲፯ ዓ.ም

የላፍቶ ደብረ ትጉሃን ቅዱስ ሚካኤል ቤተ ክርስቲያን የፍኖተ ትጉሃን ሰንበት ትምህርት ቤት ከደብሩ ሰበካ ጉባኤና ከማኅበረ ቅዱሳን ጋር በመተባበር ከደቡብ ኦሞና አሪ ዞኖች ሀገረ ስብከት የተውጣጡ 32 ተተኪ ሰባኪያነ ወንጌል በማስተማር ነሐሴ13 ቀን 2017 ዓ.ም ማስመረቁን አስታውቋል።

በምርቃት መርሐ ግብሩ መልአከ ፀሐይ ተስፋ ማርያም ነጋሽ የላፍቶ ደብረ ትጉሃን ቅዱስ ሚካኤል ቤተ ክርስቲያን አስተዳዳሪ ፣ ሊቀ ትጉሃን ቀሲስ ዶክተር ሙሉጌታ ስዩም የማኅበረ ቅዱሳን ሥራ አመራር ጉባኤ አባል፣ ርእሰ ደብር ተስፋ ደጀኔ የደብሩ የስብከተ ወንጌል ኃላፊ፣ አቶ የኋላሸት ሽፈራው የደብሩ የሰበካ ጉባኤ ምክትል ሊቀ መንበር፣ የማኅበረ ቅዱሳን ተወካዮች፣ የሰንበት ትምህርት ቤቱ ተወካዮች፣ ካህናትና ምእመናን ተገኝተዋል።

የፍኖተ ትጉሃን ሰንበት ትምህርት ቤት ዋና ጸሐፊ ዲያቆን ዳንኤል ደሳለኝ ከ2009 ዓ.ም ጀምሮ የማኅበረ ቅዱሳንን ጥናት መነሻ በማድረግ አገልግሎቱን ጀምረው እያከናወኑ መሆኑን በመግለጽ አጠቃላይ የተሠሩ ሥራዎችን ሪፖርት አድርገዋል።

ዲያቆን ዳንኤል ደሳለኝ አክለውም በዘንድሮው ዓመትም ለ8ኛ ዙር ያሠለጠኗቸውን ተመራቂ ደቀ መዛሙርት እንኳን ደስ አላችሁ በማለት መልእክት ያስተላለፉ ሲሆን አያይዘውም ሠልጣኞች ወደ አካባቢያቸው ሲመለሱ በተማሩት ትምህርት ወንጌል ባልተዳረሰባቸው አካባቢዎች በቋንቋቸው እንዲያስተምሩና የእግዚአብሔርን ልጅነት እንዲያገኙ ለማድረግ በኃላፊነት እንዲያገለግሉ አደራ ብለዋል።

አያይዘውም ዋና ጸሐፊው በሥልጠናው ለተሳተፉ ባለድርሻ ፣ አጋር አካላትና ምእመናንን አመስግነዋል።

በአሜሪካ ምእከል የቦስተን ንዑስ ማእከል የደብረ ታቦርን በዓል ከምእመናን ጋር አከበረ።

የቦስተን ንዑስ ማእከል በየዓመቱ እንደሚያደረ‍ገው ደብረታቦር በዋለበት ዕለት ማክሰኞ ነሐሴ ፩፫ ቀን ፳፩፯ ከምእመናን ጋር በዳኒ መናፈሻ (ፓርክ) አከበረ። ሕጻናት የሆያ ሆየ መዝሙር ያቀረቡ ሲሆን፣ እናቶች ያዘጋጁትን ሙልሙል ለሕጻናት እንዲሁም ለአዋቂዎች አድለዋል። እለቱን የተመለከተ ሥነ፡ፅሁፍ ፣ወረብ እና ዝማሬም ቀርቧል ።