#أميرتي_قاصرة8
بقلم امل الشيخ

مرت اكتر من ٣ ساعات وانشغلت عديل كمية من المواد ناقصة والعمال غايبين
اسمع هنا ، الشغل دا م بيرضيني ، اي واحد غايب افصله لي م عايزو تاني !
بس ي باش مهندس ! كلامي واضح ، وبلغ شركة العمال اني محتاج ٤٥ عامل بكرة الساعه ٨ ف الممبنى دا وم اجي القاهم ناقصين !
مشيت خليته واقف .. عاينت ل ساعتي قلت حكون اتاخرت عليها شديد رجعت بسرعه المكتب اتلفت يمين وشمال م لقيتا ، بس لمحتها نايمه ف الجلوس جيت براحه ناحيتها لقيتها نايمه بعمق الغبيه نايمه بشنطتها ملامحها كانت بريئة لابعد درجة ! ملاك بالصورة دي بدري عليهو يشقى ، بس انا عمري م ح اعمل فيها سيئة واعرسها لاي زول مهما كان وهي قاصر كده ، مافي زول حيفهم انها طفلة وانها عايشة طفولة قاسية اتحرمت فيها من اكتر اتنين كانو ممكن يعيشوها احسن وضع  ، ولقت نفسها بين اهل اب كعبين واهل ام انانيين ، سمر احسن منها حالا ، سمر كبيرة وقادرة تفرق وقادرة توازن بين عقلها وقلبها بس سحر ! سحر لسة صغيرة وبتتعامل باندفاعية كبيرة ! مستعدة تقول اي كلام بناء على حالتها العايشاها زعل او فرح ! خالتي كانت مدلعة سحر شديد نسبة لانها الصغيرة بس انا ح اواصل ف الحاجه دي وسحر دي ح احافظ عليها بعيوني ونفسي ولو اضحي ح اضحي !
.......
حسيت بيها بدت تصحصح بس للاسف حاولت تتقلب بس الشنطه كانت اقوى منها ورمتها ف الارض ، جيت بسرعه عليها سحر ! كانت بتفتح عيونها بالجلالة قالت لي جيت ! قلت ليها ايوة قالت لي طيب يلا نمشي ! عشان انا نعسانة قلت ليها انتي كملتي النوم صحصحي ! مدت لي يدها جريتها برفق ووطلعت ليها الشنطه مشيت بيها جهه الحمام غسلت ليها وشها حتى بدت تصحصح معاي ، سريع مشيت مكتبي راجعت الورق العايز اراجعه و قلت ليها يلا ! سالتني قالت لي هو انت شغال شنو ؟ ضحكت ليها وشلت الشنطه قلت ليها ارح بحكي ليك عشان الزمن اتاخر فعلا م فضل للمغرب حاجه ! اول م ركبنا قالت لي يلا رد ! قلت ليها والله م حرامي ضحكت قالت لي بعد المكتب الشفتو دا عايزة اعرف ، قاعد معانا ١٤ سنة يوم واحد م سالتك شغال شنو؟ قلت ليها طيب انا قريت شنو قالت لي هندسة قلت ليها هندسة شنو؟ قالت لي مدنية ؟؟؟ قلت ليها انتي م عارفه؟ قالت لي م متاكده قلت ليها اي ي ستي مدنية  وقبل ٤ سنوات فتحت شركة مقاولات بمساعده خالتي ربنا يرحمها قالت لي امي ؟ قالي اي ساعدتني ماديا ماقصرت وبديت احكي ليها واحكي ليها وانا مندمج اتلفت عليها لقيتا ف سابع نومة اصلا !
كل يوم كان بمشي بنفس الروتين بوديها وبمشي شغلي وبجي راجع اجيبها المكتب وبمشي بخليها لحدي م اخلص بجي راجع ونطلع سوا ، ساعات كانت بتصر الا تمشي معاي الموقع وانا كنت برفض رفض تام ! ف بتقنع وبتقعد !
يوم صحيت لقيت ١٥ مكالمة من الصباح من خالي اسعد صحصحت ورجعت ليهو .. قالي اسمعني هنا الليلة دي حتجيب سحر عندي وانا ح اعرس ليها عزيز ! البت دي كفاها شلهتة كيف يعني زاتو تسوقا تقعد مع ابوك ؟ ابوك انت هي دخلها شنو؟ الحل الاسلم مادام عزيز عايزها يعرسها ،جيت اتكلم سكتني قالي لو م جبتها ح اجي اخدها رجالة لانو انا خالها واولى بيها منك قلت ليهو نشوف و..  قفل الخط ف وشي نزلت تحت لقيتا قاعده كده ومنكمشة على نفسها وجاهزه قالت لي م عايزة شاي الليلة انا م تتعب نفسك ، قلت ليها ليه ؟ قالت لي ساي ، براحه مياس جات بتتسحب قالت لي ما ساي امي هرشتا قبل شوية ! قلت ليها شنو؟؟؟ واصلت قالت لي قالت ليها كبيرة قدر عمرك دا وتستني راجل يعمل ليك الشاي وسمعتا كلام كتير انا بعتذر بدل امي قلت ليها حصل خير ،  قلت لمياس اطلعي انتي خليني بتفاهم معاها قالت لي سمح !
مشت وانا مشيت الصالون الحمدلله شنطتي م طلعت الفيها شلتها براحه وسحر مخلوعه جيت وديتها العربية ومشيت برضو الغرفة الادوها ليها ! شلت براحه شنطتها وبقيت ادخل ليها ف حاجاتا بس من غير اعرف دا شنو ولا شنو ونزلت الشنطه وءختيتا ف العربيه وسوقتها من يدها ركبنا قالت لي انت بتعمل ف شنو؟ قلت ليها اصبري اتحركنا بالعربية براحة م تمت ١٠ دقايق ابوي اتصل لي رديت ليهو قالي ي ولد انت مشيت وين ؟ نور قالت شافتك وانت بتشيل ف شنطه بت خالتك ! قلت ليو اعفي لي ي حاج مرتك م طايقة قعدتي لا انا ولا بت خالتي قعد يهرج البيت بيتي انا وهسي تجي راجع قلت ليهو م بقدر وح اغير شريحتي زاتو بس ح ادق ليك من الجديده وقفلت الخط ف وشو !
تاني اتذكرت المبنى اتصلت ل حامد صحبي ومعاي ف الشركه قلت ليو اسمع انت مسؤول حاليا من المبنى بتاع الروضة الفي المعمورة لحدي م ارجع سالني انت ماشي وين قلت ليو لمن اجي بوريك قفلت الخط وبقيت سايق لي وين انا م عارف واضح انو سحر مخلوعه وغالبها تسالني ! قلت ليها باقي اليوم دا حنختفي ! لانو ....

عاينت لي مسافة ، قلت ليها لانو خالي اسعد حيجي يسوقك غصب وح يعرسك ل عزيز بقا ف عيونا استفهامات بعد شوية ردت لي ، عزو الله يخليك انا م عايزة اعمل ليك مشاكل وديني ليهم وخلاص !!! لو الموضوع بتحل ب اني اعرس عزيز ح اعرسه ، اصلا دا الكنت خايفة منه بعد موت امي مستحيل نعيش بسلام ، قلت ليها الا لو انا ميت لكن مستحيل اوديك للنار برجلينك !
وصلت بيت سامي صحبي دقيت الباب جاني طالع سلم علي و قالي الغرفتين جاهزات ، نادى يا سلوى سلوى جاتنا بت طالعه سلمت علي قالي دي اختي قلت ليها ديك سحر فعلا مشت عليها ، وجو راجعين سوا ! سلمت على سامي وبقت واقفه ف ضهري !
فضلونا جوة وسلمنا على امهم استاذنت منهم وسوقت سحر على جنب اسمعيني ! حتقعدي هنا اسبوع لحدي اشوف نهايه خالي شنو ! قالت لي وانت؟ قلت ليها م تخافي انا حجي كل يوم بليل حبيت هنا قالت لي طيب بس ! قلت ليها بس شنو؟ قالت لي انا خايفة !!! ضغطت على يدها شديد قلت ليها م تخافي طول م انا معاك !على كده هي رجعت وانا طلعت ..
عزيز شكلو كان عايز يمسكني من يدي البتوجعني وقد كان ، طول عمري بكره زواج القاصرات ، هسي كمان ف القاصرات سحر بتي ؟ مرات كنت بفكر الحل شنو ؟ اهلنا انانيين جدا وبذات اسعد ، دايما خالتي نعمة كان بتقولي انا لو حصل لي شي يوم لاقدر الله اخواني ديل م بلموا لي بناتي عشان كده ي عزو البنات ديل ف رقبتك !
_________
قريب الضهر خالي رسل لي رسالة "انت خطفت البت  صح مشيت المدرسة م لقيتا وعند ابوك مافي ولو م رجعتها ح امشي افتح فيك بلاغ ! "
قريت الرسالة وكتبت ليهو اعلى مافي خيلك اركبه جيت اطلع الشريحه جاني اتصال من مس ندى قالت لي خير ! الليله سحر م جات وف راجل جا سال عليها وقال انو خالها قلت ليها حاصلة ظروف شوية صعبه وسحر حتغيب كم يوم ! قالت لي تمام خلي بالك منها وقفلت منها وطلعت الشريحه وركبت وحده جديدة عشان عزيز وسخ وممكن بالشريحه يقدر يعرف مكاني !
كنت لافي بس ومحتار ف امري ..
_________________
سلوى طلعت بت ظريفة شديد اول مرة احس اني بتعامل مع زول بعرفو لي سنين ، امها كانت مرة كبيرة ومريضة بس كانت حنينة شديد كل م تجي تناديني بتقولي يا الحبيبة يعني بالجد كنت متمنية م افارق المكان دا والناس الطيبين الفيهو  ، دا غير انو عندهم جيران عسل ، جهزنا الفشار والفنكوش والفول والتسالي جونا كم مرة كبيرة وبنات شابات كده وعملنا القهوة ، انا اول مرة ف حياتي اعيش جو زي دا  ،حتى ف بيتنا لمن نجي نعمل اجواء بتاعت قهوة بنلقا نفسنا انا وسمر برانا امي وعزو ف الشعل ..
لحدي المساء كنا اتغدينا ورفعنا العده حلفت الا اغسلها انا قالت لي طيب غسلتها ولمن طلعنا من المطبخ الباب دقا فتحنا الباب انا وسلوى ، سلوى لمن شافت المرة الفي الباب صرخت ننااا مشتاقين سلمت عليها بالاحضان قالت ليها كيفك امك كيف ؟ سلوى قالت ليها اتفضلي منتظراكي سلمت علي بتعجب سلوى قالت ليها دي سحر بت خالة صاحب سامي المرة قالت ليها دي شنو اللفه الطويلة دي وضحكت ومشت ، قلت ليها دي منو قالت لي ننا دي حبوبتي ام امي قلت ليها ايوا قالت لي بتجي كل مساء تتونس مع امي ومعانا وترجع بيتها م بعيد من هنا ! قلت ليها حبوبتك تتشاف اصغر من امك لكن قالت لي ماما ربنا يشفيها ويعافيها ، اهل ابوي كارهنها والظاهر سوو ليها عمل انا شهقت ليها قالت لي م تستغربي م كل الناس نفوسهم نضيفة ! قالت لي ماما بتتعب وتمشي للموت وم معروف ليها مرض معين اخر حاجة ظهرت ليها مشكلة القلب دي ! بس حبوبتي ام ابوي قبل م تتوفا كلمت سامي انو يفتح قران ف بيتنا ويرشو بالملح قالت ليهو بناتي بسون الكعب لامك اعملو حسابكم ! قلت ليها لاحول ولاقوة الا بالله ! قلت ليها وابوكم وين؟ قالت لي ابوي من بدري طلق امي وعرس وشاف حياتو وهو زاتو م عارف عننا حاجه قلت ليها معقولة الدنييا دي يكون فيها ناس بالبشاعه دي ! قالت لي انتي لسة صغيرة وياما حتشوفي العجايب ! مشينا المطبخ عملنا شاي ومشينا قعدنا مع حبوبتها وامها ..
________
- كيف يعني ي ابوي ساقها واخختفى ؟
= زي م بقوليك كده ! انا غلطت لمن اتصلت ليه وكلمته يجيبا بالحسنة من البداية كان نسوقها من المدرسة وخلاص !
-  والله انتو قصتكم عجيبة ! مش ف البداية لمن عمتي حنان قالت ليكم جيبوهم عندنا رفضتو هسي بقت ليكم سمحه يعني؟
= انا م كنت عارف انو عزيز عايز سحر ؟
-عزيز م عايز سحر ولاشي اكيد دا ركوب راس منه وغيرة من عزو !
=انتي انطمي م عايز اسمع صوتك ..
- انا بقول الحقيقة بس
=خلاص ي جمان قفلي خشمك !
-ان شاءالله عزيز يهرب وم تلمو فيهو زاتو تاني وانا كان لميت فيهو بقوليهو عرسها انت ..

ابوها حمر ليها مشت وخلتهم ..
عزيز بدا يتذكر ف اخر موقف لمن قاليها اعملي لي قهوة وعزو قاليها م تعمل اي قهوه !
الحقيقة ياعزيز انت فعلا بتغير من معتز وزعلان عشان هو ليهو السلطه ف اي شي حتى ف سحر وسمر هو ليهو الاولوية ، سحر بالنسبة لي مجرد بت شافعه بس برضو انا لازم احرق قلبو بيها انا متاكد انو نقطه ضعفو سحر ، تصرفاتو من زمان مختلفة كان بعاملها تعامل مميز غير بنات الاسرة حتى تعامله مع سحر م زي تعامله مع سمر بس انا ح احرق قلبه واوريه اني برضو لز عايز حاجه ح اخدها ح اخدها ..
_________
-جهزي حالك عشان حنرجع !
=بس الشهر م تما ي امجد ؟
- امي قالت طولت وانتي عارفه البيت هناك م فيهو راجل غيري !
=طيب بس انت كدة كده حتسكن ف بيت بعيد منها !
- بصراحة ي سمر انا قررت اني حسكن عن ناس امي..
=نعم؟؟؟؟؟؟
- انا زي م عارفة م عندي بيت ملك وم ينفع كل فترة ارحل انا ما بحب الحاجه دي عشان كده بنيت ف بيتنا بس م تخافي فصلت كل شي  ،
=بس يا امجد دا م اتفاقنا ؟
- اي عارف م اتفاقنا بس الظروف جات عكس كدة؟
=الظروف دي جات متين ؟ ولا انت مخطط من البداية تعمل كدة اكيد م حتقنعني البيت اتبنى ف اسبوعين؟؟؟
جا علي ومسكني من خصري ..
- حبيبي الحياة تضحيات ، لسة قدامنا العمر طويل  وانا ح اسعدك اطمني ..
__________
هبة ي اختي دا شنو البتسوي فيه دا ؟ امجد ليه يسكن معاك حرام عليك ! خلي ولدك يعيش مع مرتو على كيفو وخلاص بطلي تدخلي ف حياتو !
انتي دي مسمياها مرة مع النسوان ، م شفتي اهلها عرسو ليها سريع كيف كانها عاملة غلطة ، لا عندها ام لا عندها ابو وخيلانا م صدقو اتحلو من مسؤوليتا .. بري ي دي انا بدور لي ولدي وحدة بت حسب ونسب اهلها يهزو ويرزوا مالي ومال المقطوعه من شجرة دي !



‏"كان موقفًا صغيرًا، لكنه كان كافيًا لحسم حيرةٍ ما."

#أميرتي_قاصرة10
بقلم امل الشيخ

جيت قعدت جمبها وقلت ليها احكي يا خالتي اتفضلي ! ضحكت لي قالت لي شهيد الله من يوم العقد لما شفتك حسيتك بت سكرة وبتتختي على الجرح يبرا قلت ليها من ذوقك والله قالت لي انا م عندي بنات وانتي امك .. سكتت قلت ليها ربنا ينور قبرها ويجعله روضة من رياض الجنة قالت لي آمين ، مافي زول ببقى زي الام بس اعتبريني أمك ف البيت دا قلت ليها اكيد والله امي ، قالت لي هبة اختي دي اصلا ولدها واحد يا سمر والنوع البتقوليهو صلي شرق بصلي وصلي غرب بصلي ، وهسي يمكن تتعامل معاك بنفس اسلوب النسابة داك بس م عايزاك تزعلي منها برضو ، امجد دا ي بتي ابوهو طلق امهم من بدري شديد وكانو صغار والمسؤولية كترت على هبه اختي وكانت م مخلصة جامعة ، رجعت وقتها خلصتها واشتغلت عشان تربيهم وتكبرهم ، امجد دا ود كويس ممكن تغيريهو يا سمر ♡ بس حبة صبر المسؤولية بعد الزواج ماهينه بيت وراجل ونسابة وكمان قرايتك ماهين عليك بس انا زي م قلت ليك اعتبريني في مقام والدتك واي شي ضايقك زعلك عايزة مشاورتي ، تعبانة اي شي حاصل بيك حتلقيني جنبك قلت ليها ودا العشم برضو يا خالتي قالت لي طيب قومي استحمي وامشي انا اشوف الاء ليه اتاخرت ! فعلا مشت وانا مشيت استحما ، كنت بس بفكر ف قلبي وبقول الراجيك ماراجي زول ياسمر بس انتي قدر اي مشكلة باذن الله ..
____________
الباب دق وسلوى كانت بتقطع ف سلطة قالت لي افتحي مشيت افتحو لقيت ٣ بنات سلمو علي ، سلوى لمن سمعت صوتهم جات جارية ، اخيرا اتذكرتو انو عندكم صحبة يا كلبات وجرت سلمت عليهم بالاحضان  ،  انا مشيت جبت ليهم موية بعداك قاموا يسلمو على خالتو سلمو وجو راجعين قعدو يتونسوا كانو ليهم سنين ما اتلاقوا ، كنت واقفة بعيد وبعاين ليهم ، اتذكرت فرحتي لمن كنت بكون مطولة من تبيان ونتلاقى .. شعور حلو فعلا ، الباب دق تاني ، مشيت عليهو فتحتو ،،
بقيت متجمدة ف مكاني وبعاين بس فجاة حسيت بي سواد ف وشي وصرخت .. بسرعة شالني وركبني في العربية والعربية اتحركت ..
..
كنت قاعد بضرب لي حسابات بتاعت شغل ، لحدي ما سمعت صوتها وهي بتصرخ ؟ ايوة والله دا د صوتها المابغباني جريت عليهم برة لقيت سلوى جاية علي وبتكورك خطفوها خطفوها قلت ليها ف شنو منو خطفوها ؟ قالت لي الباب دق وسحر مشت تفتحو وكان معاي صحباتي ، بس سمعنا صوتها وهي بتصرخ جرينا لقينا عربية جارية بسرعه وهي مافيشة ! انا قلبي وقع مني بعد كلاما دا وشلت مفتاح عربيتي وجريت ..
_____________
فلاش باك:
كنت زعلانة شديد من عزو كيف يقرا خصوصيااتي ، وف صفحات خفت يكون قراهم ، صفحات شنو انا كل المذكرة دي بنبذ فيهو .. زعلي طال وهو م جا رضاني طلعت ل سلوى .. ممكن تلفونك قالت لي طيب
كان ف نيتي اتصل على عزيز يجي يسوقني ويعرسني !
بعد صعوبة قدرت اجمع رقم عزيز لانو زمان م كنت مسيفاهو وكان متواصل معاي ف واتسب عشان كده الرقم شبه كان ف راسي ، اتصلت عليه رد لي قلت ليو عزيز كيفك؟ قالي منو ؟ قلت ليه سحر؟ قالي وين انتي ي بت خوفتينا عليك ! قلت ليهو انا كويسة وقفلت الخط ف وشو بقا يتصل بعدها كتير قمت حظرتو ! حسيت اني غبية وم كان اتصل عليهو اصلا ف ساعه الزعل كنت حاسة اني بالجد عايزة اعرسو بس بعداك وعيت لكمية الغباء .. شلت التلفون ختيتو ف الكرسي ومشيت اتونست معاها عادي ف المطبخ وهي بتقطع ف السلطة..
_________________
انت قايل نفسك منو بتخطفني ، صوتو بقول فك ليها الزفت دا من وشها ! قلت ليه انت واحد مريض ومجنون قالي مريض ومجنون بيك وانا لو ماعرستك ما ح ارتاح ، بس انا م عايزة اعرسك انت متخلف ؟ لو ماعايزة تعرسيني اتصلتي علي ليه ؟ انتي عارفة بس باتصالك دا انا قدرت اعرف مكانك  بقيت انبذ فيهو بس على اسلوبو وطريقتو بس م كان شغال بي ، حسيت اني غلط شديد مهما حصل ما كان مفروض  اتصرف كده ،
وصلنا بيتهم بقا جاريني زي الكلبة معاه لي جوة ، اول م دخلت صالة بيتهم كان فيها خالي اول ماشافني جا استلمني كفوف ، عايزة تنزلي راسنا ف الارض يا بت الكلب تهربي مع معتز ؟ كفتني وضربني شديد لمن حسيت بروحي حيغمى علي ، حسيت بزول بمسكني منهم لقيتهم وليد وجمان ، جمان قالت لابوها انت واعي بالبتعمل فيهو دا ي ابوي؟ كيف يعني بتضرب بت صغيرة زيها كده بالطريقة الوحشية دي قاليها دي م بت دي دا واحدة قليلة ادب ، عزيز كان بعاين لي وابوهو بضربني .. وحتى لما وليد وجمان مسكوني منه ماحاول هو يمسكني معاهم ، كيف انا اتصلت على واحد زيو ؟ وليد جايطلعني برة منهم وحيلي ما كان شايلني عزيز جا وقف قصادو عايز ترجعها للمعفن داك ؟ والله ما ترجع وهسي كمان ثواني الماذون حيجي وح اعقد عليها ! واشوفو حيعمل شنو! قلت ليهو لو بقيت اخر راجل مابعرسك ياوسخ ! لحقني كف م اكتفى بحقات ابوهو ! جمان جرتني وبقت سايقاني معاها قلت ليها واناببكي وصوتي ماراضي يطلع من الزعل اضربي ..

اضربي لي ل عزو يا جمان قالت لي حاضر بضرب ليهو بس انتي ارح معاي سريع الغرفه ، سمعت صوت وليد وعزيز وصل فوق وشكلهم كانو بتضاربو .. يا الله حتى وصلت غرفة جمان ، مشيت المغسلة وبقيت اغسل في وشي الكان مسخن ولونو احمر من الكفوف !
_______________
كنت قاعدة وبفكر ف مصيري في البيت دا وامجد الكنت مفتكراه بحبني بس طلع ود امو ، انا فعلا م اديت نفسي فرصة اعرفو كويس ودي اكتر حاجه ندمانة عليها ! سمعت صوت رجلينو وهو داخل غمضت عيوني بسرعه ، جاقعد جنبي وبقا يقولي سمر ، سمر ! قلت ليو امممم قالي انا جعان ! قلت ليو الاء مش ودت ليك قبيل اكل ؟ قالي م كنت جعان قبيل ، شلت تلفوني لقيت الساعة 1 ص قلت ليو طيب انا زااتي حاسة بشوية جوع ، قمت على حيلي شلت مفاتيح المطبخ فتحتو بس م لقيت فيو ولاشي ! جيت كلمتو قالي اتصرفي قلت ليو اتصرف كيف يعني؟ وبعدين ناس بيتكم بكونو نامو ! قالي اووفف ياخ منك ومشا بيت ناس امو جيت رجعت قعدت ف السرير استنيتو مساااافة لحدي م عاينت لقيتا ٢ ونص والنعاس خلاص بدا يتمكن مني ! رقدت نمت !
صحيت الصباح لقيتو مافي ! قمت اتسوكت وجيت صليت ، جا داخل هو قلت ليو كنت وين ؟ قالي اكل ابيتي تسوي لي ؟ مشيت لي امي في ليلها داك سوت لي اكل ! اكلت ونمت عندهم قلت ليو انا ابيت اسوي ليك؟ انا انتظرتك على اساس ماشي تجيب حاجه من بهناك اسويها ليك ! قالي والله لمن كلمت الحجة سوت لي اكل ! قلت ليو بس مش انا كمان قلت ليك جعانة؟ قالي مااتذكرتك والله ،، لمن قالي م اتذكرتك حسيت بوخزة  في قلبي قلت ليو بالهنا اسوي ليك الشاي؟قالي لالا شربت جاي اغير وماشي الشغل قلت ليو طيب انتظرني البس سريع ف القروب نزلو الليلة عندنا تلات محاضرات مهمه ! وكنت ماشة على الشنطة قالي استني استني مافي طريقة والله ااتلفت قلت ليو ليه؟ قالي السمستر حقك دا قرب ينتهي اصلا ف ح اجمدو ليك السنة الجاية كمليهو! قلت ليو لالا مافي طريقة اصلا اخر سمستر ح اكملو واجدعو وراي وبعدين صحباتي نزلو لي المحاضرات كلها الفاتتني والريكوردات قالي الراجل هنا منو؟ قلت حتجمدي يعني حتجمدي ! قلت ليو لا ماعلى كيفك ! كوني سكت لمن انت غيرت رايك وجيت سكنتنا هنا م اتكلمت لانها حاجه م اساسية ! وكنت خايفة بس من حتة المطبخ لانك قلت لي حيكون مشترك بس كتر خير خالتو هناء الخلتك تعمل لي مطبخ ! دي حياتنا ك متزوجين وانا مستعدة احترمك في اي قرار بتاخدو واتنازل ليك الا قرايتي خط احمر بالنسبة لي ، امي شافت ماشافت في حياتا عشان انا اقرا واتخرج ! قرب علي قالي حبيبي انا م قلت ليك م حتقريها انا قلت ليك السنة الجاية عشان م تشيلي ولاتربتي لاقدر الله يعني قلت ليو انا ادرى بمصلحتي ! وهسي حتوديني ولا اتصل لي معتز ؟ قالي دا كلامك؟ قلت ليو اي طلع مرق وقفل الباب قفلة حارة بعد شوية حسيتو بيطبل فيني جريت قلت ليو انت بتعمل ف شنو ؟ قالي قلة ادبك دي حاشوف حدها وين وتلفونك هدا معاي اشوف معتز دا حيعرف بالحمام الزاجل ولاحيجي كيف ! بقيت اصرخ واشاكل فيهو الا يفتح لي وهو مصر مايفتح لي امو واخواتو وخالتو هناء جو جارين لمن سمعو الكواريك !
خالتو هناء قالت ليهو في شنو؟ قاليها بتلامضني ف الكلام الكلبة ! ووجه لي الكلام انتي شكلك م شفتي يوم تربية لكن يا سمر حسام انا حربيكي وفاات من دربه ! امه طوالي قالت مشاكل متزوجين مالينا فيها ، وهرشت بناتها وجرتهم قدامها ، خالتو هناء جاات بقت بتتكلم معاي حصل شنو يابتي ؟ حكيت ليها الحصل قالت لي غلطان وقليل ادب والله ماعنده اي طريقة يحميكي من جامعتك ! اصبري لي انا بتصرف قلت ليها بالله عليك بس اتصلي لي على معتز اخوي قالت لي لالا ي بتي كده الموضوع بكبر قلت ليها انا بعد الموقف دا خلاص م عايزاهو انتي مش قلتي ف مقام امي ؟ وانا ماعايزا الولد دا يا امي ! قالت لي وعشان انا ف مقام امك مافي ام برضيها بيت بتها يتخرب اصبري لي ، كانت لابسة توبها وفتحت باب الشارع وطلعت ، قعدت ف الارض وبقيت ابكي !
بعد نص ساعة جات ومعاها راجل وحسيت بصوت  جيت قلت ليها خالتي هنا قالت لي اصبري الراجل بكسر ف الطبلة !  وفعلا اخر ضربة والطبلة جات واقعه اول ما الباب اتفتح جات علي وحضنتتي وقالت لي م تخافي ي بتي قلت ليها الله يرضى عليك اضربي لي معتز قالت لي ي بتي المشاكل بين المتزوجين راقدة قلت ليها هسي لو عندك بت وراجلها عمل ليها كده بترضي قالت لي وحياتك م رضيانة الحصل ! قلت ليها هو ساقني من رجال ومفروض يتعامل معاي باسلوب احسن من كده عشان الرجال لما يدو كلمة للرجال مابخلفوها !
صوت امه وهي بتكورك شن الرجال هم؟ العرسوك لينا عشان يتفكو منك ومن مسؤوليتك بذمتك كان ديل رجال برموك الرمية دي وسريع كده؟ ياخي نحن مافهمنا شي للعرس دا زاتو! يختي بلا وسخ قلت ليها عشان انتي زولة كبيرة ف انا م ح ارد عليك لكن حسبي الله ونعم الوكيل قالت لي بتتحسبني فيني انا يا وسخه ي بت الشوارع يا الماعندك لا ام لا ابو وقت لميناك احمدي ربك ! وقعدت تكفت ففيني هناء بقت ماسكاها مني وانا زاحة لي ورا

بعيد بس !  بعد صعوبة خالتو هناء قدرت تطللعها لي برة وقفلت الباب بقت تكورك لي هناء يختي انتي جابوك وزير دفاع ليها ولاشنو والله الليلة الا مايجي ولدي وقسما بالله ليلة وحدة م تقعديها هنا تاني نرجعك للوساخه الجيتي منها ! قلت ليها انا المكان الجيت منو انتي عمرك كلو م تحلمي بيو حلم واتفقعت بكا !!
_______________
قعدت في سرير جمان وانا البكا شارطني جمان حاولت تطبطب علي قلت ليها انا عايزة معتز هسي دي 😭😭
قالت لي اتصلت مرتين ما رد يا سحر معليش م تبكي عليك الله ! ضمتني ليها وانا قعدت ابكي زيادة !
بعد مسافة جمان قالت لي استني اجيب ليك موية طلعت مني وقعدت اسب لي نفسي وعلى العملتو ! بعداك جاتني بتجري وانا خفت رجعت لي ورا مسكتني من يدي وقالت لي تعالي سريع جرتتي من يدي لحدي المطبخ بي شباك المطبخ قالت لي تعالي شوفي لمن عاينت لقيتو معتز نازل من عرييتو ومعاهو ولدين ! وانا بعد شوفتو كمية الامان والطمأنينة الحسيت بيها شهيد الله زي احساس الرجوع للبيت بعد غربة سنين جيت عايزةة امشي جمان مسكتني قالت لي اصبري لمن يدخل بقت تتسحب وسحبتني معاها   وقفنا مستنين دخلتو لمن جا داخل قال السلام عليكم  ! خالي قاليهو بركة الجيت !عشان تحضر عقد البت الهربت معاها !
انا طوالي جيتو جارية مسكت فيهو وقعدت ابكي ضماني عليهو قدااامهم ! خالي قال عاين الوسخ حاضن البت قدامي كيف اخجل ياخي  !  معتز قاليو عايزني احضر عقد البت الهربت معاها؟ انت مسميه هروب ليه اصلا ؟ عزيز قالي الماذون جاي ف الشارع نشوف فلاحتك دي ! اصلي هسي م بوسخ يديني ولابضربك انا زول عريس !معتز قعظ يضحك لمن خلعني ! وليد قاليهو معتز ف شنو؟ وهو زاد ف الضحك قالينا مافي داعي الماذون يتعب ويجي عشان اصلا سحر عرست !
لمن قال كده انا اتخلعت وجمان شهقت كلهم بقو يعاينو ليهو ! عزيز قاليهو وين البثبت الكلام دا ؟‏



أن تلجأ إليَّ يعني ذلك أنك في مأمن ، أعني بذلك: "لو كلفني الأمر أن أصبح جداراً بينك وبين السُوء لأصبحت"♥️🌸

#أميرتي_قاصرة11
بقلم امل الشيخ

عزيز قاليهو وين البثبت الكلام دا ؟ معتز هبش جيوبه كده طلع ورقة قاليهو دي القسيمة وديل الشهود ! اتلفت لي سامي ومعاهم واحد جديد ! قاليهو دا غير علي وناصر ووليد وخالتي حنان عارفة وموافقين !عزيز عاين لي وليد ،، وليد عمل نفسه م شايف .. عزو واصل وخلاص سحر بقت مرتي ومن الليلة ياعزيز انت لا ود خالها ولاعندك بيها طريقة ! عزيز عاين لي وليد تاني بنظرات م عرفت افسرها ، عزو مسكني من يدي قالي م تخافي ياسحر !!
خالي قالينا انتو الاتنين اطلعو من البيت دا والاتنين انتو انا لاخالكم ولاعندي بيكم علاقة من الليلة عامل فيها الولاية ف يدك وبتعرس براك كمان ممتاز ممتاز انا زمان لمن هدى تقول معمة م عرفت تربي كنت بغلطها بس هسي بالجد اقتنعت انو هدى كانت صاح ف كل كلمه قالتها ! كلنا صنينا
جمان جات قريب مسكتني حضنتني قالت لي مبرووووك همست لي تستاهليو .. ابوها هرشا زحت مني شوية ، اصلكم زول ف البيت دا يقول الحقيقة بتهرشوه
عزيز هسي لو سالتو هدفك شنو حيقول بغير من معتز وعايز يشيل اي حاجه حقت معتز مع انو ماعارفة بغير من شنو الحاجات العاجباك ف معتز انت عارف ربنا شال منو حاجات قدر شنو مقابل الحاجة دي !معتز اتربى من غير حنان ام م لقى ابو في ضهرو يسندو في الدنيا دي ! كتر خير خالتي نعمة حية وميتة .. البتغير منو ياعزيز دا ربنا اداهو اختبار قاسي شديد وانت ؟؟؟ انت وسط امك صاحي بصوتها ودعواتها ونايم برضاها وابوك جنبك وساندك ومريحك وعندك بيت دافي يلمك واصحاب من هنا لنهاية الدنيا والله بالجد م عارفة اليغير من اخوهو منو وبرجع اقول احمد ربنا على الحاجات العندك وم تعاين لل في يد غيرك واشكر ربنا ، وبالنسبة انو الناس كلها بتحترم عزو وبتريدو ف الاحترام دا هو عملو لنفسو بنفسو انا هسي دي بحترمه وبنات خالي ربيع وخالاتي كلهم ، زول مالي مركزو ..ابوها قاطعها وهسي اخوك ماله .. ردت ليه اخوي عارف نفسه مالو ماقنوع انا قلت العندي قالت كده ومشت طوالي
..
عزيز قعد يكورك برةةة اطلعو برةة معتز مسكني من يدي وطلعنا ومعانا وليد واصحاب عزو  .
لمن نزلنا تحت !
قلت ليو يعني كلهم عارفين انت حتعرسني الا انا ؟ ضحك قالي بنتفاهم وليد والشباب باركو لينا ! وليد قال لي معتز انت سوق سحر وانا بوصل الشباب ، ومشوا مع بعض
احنا مشينا ركبنا العربية !
عدت ليهو السؤال ، كلهم عارفين الا انا ؟
  ضحك وجاب راسه قريب منيي
قالي مش في صفحة في مذكراتك كنتي كاتبة بدايتها
"لاول مرة اشعر باني مغرمة باحدهم اشعر بانني لا استطيع تخطي خطوة واحدة من دونه ...هو .."
الحتة دي لمن جيتي لقيتيني بقرا فيها زعلتي وم خليتيني اتمها ! وكنت مصر اعرف هو منو القدر يخطف قلبك والفضول قتلني افتكرته عزيز لمن طلعتي جيت غرفتك تاني وفتحته
لقيتك مواصلة " هو ليس ابن خالتي وليس اخي ، حقأ وفي هذه اللحظه ايقنت انني .. انني احبه "
دخلت راسي جوة رجولي قلت ليو معتز بالغت ليه قريتو ..
باسني في جبهتي قالي بتي البحبها ! وانا من الخجل اتمنيت الارض تتشق وتبلعني !
طول الطريق كنت ساكتة وهو بشيل يتكلم معاي ويتونس ويضحك وحكى لي انو بعد عرف انو ف زول ساقني بالاسلوب دا اتاكد انو دا عزيز وضرب لي وليد ووليد ااكد لي لمن وصلتي عندهم ! ووراني انو عزيز عايز يجيب ماذون ووو
ماكان قدامي اي حل غير اني اسبقو واعقد عليك !
قلت ليو انا السبب ، انا الاتصلت عليه اصلا عاين لي قالي عارف ، اصلا الا تتصلي عليه حتى يعرف مكانك ، قلت ليو م زعلان مني؟ قالي ما زعلان ..
قلت ليو حنرجع ناس سلوى قالي ايوة حنمشي نشيل حاجاتنا ونمشي بيتنا ! نططت عيوني قلت ليو بيتنا؟؟؟؟؟؟!!!!
قالي خلاص الماذون قال اعلنكما زوجاً وزوجة قلت ليهو يعني هسي انا متزوجة؟  عاين لي وضحك !
وصلنا عن ناس سلوى ، سلوى اول م شافتني حضنتني وقعدت تبكي الحمدلله الحمدلله انتي كويسة قلت ليها انا كويسة يا سلوى ! مسحت دموعها وبقت ماسكاني من يدي ودخلنا لحدي امها لقينا سامي قاعد جنبها ! قالت لي هي بتي حمدلله ع السلامة ومبروك ربنا يسعدكم ويهنيكم  هسي سامي كان بحكي لي ف الحصل جيت قريب منها حضنتني وباستني من خدي بصورة حنينة شديد ، كيف هي قادرة تكون بالحنية دي كلها مع زولة مابتعرفها ولابتها اصلا بالجد الطيبة في عيونها ربنا يسعدها ..
جيت اقعد سلوى قالت لي لا طبعا تعالي غيري اللابساه دا ، امها ردت ليها اي وسرحي ليها ضفيراتها الاتنين ديل ..
معتز ابتسم لينا وقال لي سامي تعال عايزك .. هو مشوا قدامنا واحنا وراهم دخلنا الغرفة الكنت قاعده فيها وبقت تختار معاي في فستان في النهايه اختارت لي فستان ابيض منقط بالاسود نقاط كبيرة ومعاهو طرحة منقاوية  وقعدتني قدام التسريحه وسرحت لي شعري ، قلت ليها انتي عارفة من يوم م ماما اتوفت ومافي زول سرح لي شعري ! قالت لي معقول كنتي تكلميني بحب التسريح انا ، قلت ليها خلاص تاني حجي مخصوص عشان تسرحيني ، عملت لي كعكة كبيرة وخفيفة ف نص شعري ونزلت لي خصل قدام وختت لي الطرحة ف

اكتافي قالت لي اقيفي وقفت وبقيت الف قالت لي حلو الفستان حلو شديد فيك والعجب التسريحه قالت لي اقعدي اعمل ليك ميكب قلت ليها لالالاا عزو بقتلني قعدت تضحك قالت لي دا زمان هسي الوضع اختلف عملت لي ماسكرا وحبة روج وظبطت حواجبي وشوية باودر قلت ليها م عرفت نفسي .. قعدنا نتونس ونتونس حقيقي سلوى دي جوهرها اصلي وزولة طيبة شديد..
_______
مبروك يا عريس ابشر !!
الله يبارك فيك بس حاسي كيف كيف ، يعني زولة كانت اختي وهسي مرتي و١٤ سنة وو م عارف !!
سامي قالي روق روق عاديي اخد نفس عميق ، اخدته ، قالي زي م قلت ليك انت الوحيد الحتحميها من خيلانها واولادهم .. لحدي18 سنة بعداك اديها حرية الاختيار !
الوضع ما كان حيكون كدة لو خالتي نعمة ما اتوفت ، مسكني من كتفي وقعدنا ، اكيد لي خير ولي حكمة يعلمها ربنا لي قدام حتعرفها دا اختبار عظيم وانت قدره  ، انا والله الاختبارات دي كترت علي ، انت قدرها يا مان وانا جمبك .. بالجد ياسامي ماعارف لولاك كنت ح اعمل شنو صاحب حارة والله ربنا يديمك ياخ ، اصلا زاتو م حتلقى زول زيي وقعدنا نضحك ..
اها جاهزة يا سحر ؟ ردت لي سلوى ايوة جاهزة ثواني بس ، بعد مسافة جو طالعين  ، تركيزي كلو بقا مع سحر ماشاءالله تبارك الله سحر رغم صغر سنها بس جذبتني ولفتتني كانت سمحة شديد هي من غير ميكب سمحة ، جاية علي وبتتبسم في خجل ككدة ، يمكن انا م متعود عليها تكون خجلانة بس حتى الخجل لايق عليها ! سحر سمحة بكل حالاتها وانا شكلي وقعت ومافي زول سمى علي !!!!
ودعنا سامي وامه واخته واتحركنا وقتها كانت الساعه 8 مساء وهي كانت ساكتة بتعاين جهه الشباك ! قلت ليها سرحانة وين ؟ قالت لي بفكر ف الدنيا الي شغالة تودينا شمال ويمين .. تفتكر الحكمه شنو ف الموضوع ! قلت ليها ماعارف بس انا ح افضل معاك لحدي م تقولي اطلع من حياتي !
قالت لي سؤال واحد واقف لي ف حلقي من وقت عرفت اني بقيت ... احم احم مرتك !!
قلت ليها اسالي يا مرتي ، قالت لي حتشاكلني حتهرشني ؟ ح تتسلط في حياتي ح تمشي كلامك علي غصبا عني لو زول شكاني ليك حتديني كف قدامه ؟ قالي انتي بتقولي كدة ليه ؟
انتي عايزة معاملة مختلفة مني صح؟ هزت لي راسها بمعنى اي ، قلت ليها وقد كان ياستي من الليلة حنبدا صفحة جديدة !
بعد الحوار الدار بينا دا سحر اخيرا قدرت تتعامل معاي عادي وكسرت حنك الخجل والكلام دا ورجعت بتي ، بتي البحبها شديد ♡
وصلنا البيت وكنا مرهقين فعلا  وهي كانت بتخش من غرفة لغرفة ، بيتنا اخيرا رجعت ليهو واااي غرفتي زي م هي المطبخ الصالون غرفة سمر كل شي زي م خليته ياااااه ع الراحه النفسية الانا فيها ، مافي مكان في الدنيا بشبه الراحه الانا بحسها ف البيت دا  الحمدلله حمدا كثيرا طيبا فيه  فرحتها برجوعنا البيت كان مابضاهيها حاجة كنت بس واقف وبعاين ليها وهي داخلة ومارقة وابتسامتها سابقاها وصوتها وهي بتقول اخيرا بيتنا ♡
البيت ودفء البيت وراحة البيت ..♡
_______________
كنت قاعدة ف الغرفة وضامة  رجولي علي ، مافي حاجه كسرتني ف الدنيا زي موقف الصباح دا ، الموقف هزاني من جوة ، انا م بستاهل من امجد العملو فيني دة ، اكتر حاجة في الدنيا كنت بخاف منها اني اختار غلط ، اختار انسان انا بالنسبة ليهو مجرد آلة بتقضي ليهو طلباته وواجباتها على اكمل وجه ، لابتهمه مشاعرها ولا اي شي تابع ليها ، اكتر حاجة خفت منها في الدنيا حصلت لي ..
الراجل الحنين بيفضل حنين حتي ف الخناق لكن القاسي دا هيفضل طبعه كده حتي ف " صباح الخير " الي هيقولهالك او " تسلم ايدك " بعد الاكل، دا لو نطقها اساساً !! عشان كدا حاولي تختاري صح ..
اختاري الي مهما كانت الناس شيفاكي كبيرة وعاقلة وتقدري تعتمدي ع نفسك فانتي هتفضلي بالنسباله العيلة الصغيرة الي لازم يفضل يفرحها وياخد باله منها طول الوقت ويفضل جنبها عشان لما تقع ميسبلهاش فرصة انها تتسند ع حد غيره او تقوي بحد تاني مش بيه، إختاري الي يشوفك بنته قبل ما يشوفك أي حاجة ليها مسمي تاني ف حياته ♥️

حاولت انوم كم مرة بس م كنت  بسلم من الكوابيس ، لحدي م سمعت صوت رجوله غمضت عيوني وعملت فيها نايمة جا وقف قدامي وفضل يقولي اصحي ، صحيت وقلت ليهو نعم ! قالي عايز آكل ! قلت ليهو تممام ، مشا قعد ف السرير وطلع تلفونه ولا كانه الصباح قفل الباب ولاشاكلني ولا اساءني  ولا قالي ليه عيونك وارمة وليه وشك احمر ! ولاادى الموضوع اي اهمية ، كنت اظن وخاب ظني .
كنت مستنياه يجي يعتذر عن القسوة الاتعامل بيها الصباح كنت حسامحه بس هو ...
مشيت لقيت المطبخ برضو مافيهو حاجة ، رجعت ليه وصوتي مخنوق من الزعل قلت ليه المطبخ مافيهو شي قالي يعني يومي حتقولي لي الكلام دا ؟ ياخ امشي بهناك جيبي اي زفت بتسمموه لبست توبي ومشيت لي خالتو هناء اول ماشافتني جاية جات علي قالت لي انتي كويسة؟ سوا ليك شي ؟ دموعي خزلتني قلت ليها م اشتغل بي يا خالتو هنا نهائي 💔 قالت لي اقعدي جابت لي موية ومسحت دموعي قالت لي بكرة حيفهمك ! قلت ليها امشي اتكلمي معاهو بخصوص

الجامعه هو اخر سمستر لي ف الجامعه مافي داعي اجمدو سنة ! قالت لي حاضر بتكلم معاه هسي انتي جيتي عافيه؟ قلت ليها قال عاوز اكل وهو مطبخنا فاضي اصلا م راضي يجيب شي ! قالت لي طيب بكرة بتكلم معاه مشت مطبخها جابت لي صينيه مغطية قالت لي شيليها واكلي معاه بكرة لو حباك بعمل ليك اي شي قلت ليها امو شكلها محرشاه شديد م سمعتي كلامها كيف لصباح؟ قالت لي هبه دي م عندها موضوع انسيها سمعت صوتو بيكورك باسمي قالت لي يلا امشي ي بتي وابقي طيبة قدمتني لحدي الباب البيني و بينهم ورجعت ، دخلت ختيت ليهو الصينية  زحيت الغطا قالي دا جبتي من وين ؟ قلت ليهو من خالتو هناء ! قالي وبينك وبين امي حجاب م تمشي تجيبي منها هي !سكت م رديت عليه قعد ياكل قمت على حيلي املص التوب قالي اعملي لي عصير ! سكت ومشيت لي خالتو هناء تاني عملت لي عصير ليمون وادتني ليهو ورجعت ليهو تاني بالعصير لقيت الصينيه خلاص ! قالي غسليها م توديها ليها ساي كده قلت ليو لية م انتظرتني انا برضو م اتغديت ! قالي م قلتي لي شرب العصير سريع وخت لي الكباية وقالي بس لو سمحتي م عايز ازعاج عندي محاضرة ٧ بكرة وطلع رقد قالي وانتي طالعة اطفي النور !!
بالجد الزول م بتعرف طباعو لو ماعاشرتو ودا الحصل لي مع امجد
امي دايما كانت بتقول لي الكلام دا ، بس امجد غشاني امجد فضل يظهر لي صفاته السمحه وقلت خلاص هو زول كويس !
الحياة بعد موت امي كل م ليها بتصعب ، كل يوم بكتشف انو الام والاب هم الدرع بتاعنا من اي حاجه بتكسرنا او بتزعلنا ، انا متأكدة لو امي كانت حية ما كنت ح اعيش معاهو ثواني خلي شهر ..


‏"يحدث أن ينكمش الكون الواسع برحيل أحدهم حتى لا تجد فيه موضع شِبر يحتويك."💜

#أميرتي_قاصرة12
بقلم امل الشيخ

تاني يوم الصباح ، صحيت ب معتز وهو بصحي فيني ، يا معتز ياخي سيبني انا لي فترة م نمت كدة في سريري وفي غرفتي سيبني ياخيي.. ي زولة انتي وراك مدرسة صحصحي شديت البطانية علي جراها مني وحسيت بي نفسي فوق بقيت اصرخ معتز انت بتعمل شنو نزلنيييي قالي الساعه 6 نزلني قدام باب الحمام قالي ربع ساعه القاك طلعتي وانا جد كنت نعسانة ، قعد على ركبته ولبسني الشبشب بالعافية وفتح باب الحمام وقالي يلا الربع ساعه مشت منها دقيقتين ، دخلت الحمام وانا بتثاءب وهو نزل تحت !
بتكاسل فظيع استحميت واتسوكت واتوضيت وطلعت صليت ورفعت مصلايتي سريع لبست لبس المدرسة وصلحت التسريحه العملتها لي سلوى وختيت الشال في اكتافي ، نزلت ليهو تحت قالي دا شنو؟ قلت ليهو شنو؟ قالي امشي نزلي الكعكه دي تحت وارفعي طرحتك دي وتعالي قلت ليو الله ي معتز مش قلت حتغير اسلوبك معاي؟ عشان قلت اغيرو معناها تعملي كده انتي؟ خلاص عايني بالذوق سحورة حبيبتي مابحب زول يشوفك كدة ! انتي احلى وطرحتك في راسك بغير عليك اي فهم حلو انا قاصدو ممكن ي ظريفة ؟  قعدت اتبسم ليو حاضر يا راجلي قعد يضحك قالي يلا سريع مستنيك جججججري مشيت نزلت الكعكه لي تحت ولميت الخصل  ورفعت طرحتي ودبستها كمان نزلت قعدت جنبو قلت ليو كده كيف قالي عسل !! قعدت اعاين للمطبخ قلت ليو طبعا بما اني بقيت زوجة ف من الليلة انا ال ح اعمل ليك الشاي يا زوجي ياقرة عيني !! قصف جبهتي قالي مش لما تعرفي بعملو الشاي كيف اول؟
قلت ليو حرام عليك ادعمني ياخي ! قالي خلاص تاني اصحي معاي بدري وندخل المطبخ سوا قلت ليو اتفقنا ، شربنا الشاي ونزلنا ..
اتحركنا على المدرسة لمن وصلنا جيت انزل قالي ي استاذة اتلفت عليه قالي حتفطري بشنو؟ قلت ليو اي صحي خلاص اضرب لي سمر تورينا محل القروش وين وبتاع قالي م صح نتصل عليها الساعه 7 بالاضافه لي انو خلاص انتهى زمن م عايزة منك قروش انتي مرتي خلاص يعني مافي زول مسؤؤل منك غيري قلت ليو صحي ؟  قالي ايوة قلت ليو طيب شوف كل يوم وانت مرجعني !!! كل يوم حتجيب لي معاك كيت كات ، وبليل لمن تطلع لازم تجيب لي معاك شيتوس بالجبنة ! واهم حاجة اهم حااااااجة يا زوجي بيبو قالي عايني ي استاذة شكلي حطلقك لانك حتفلسي بي طلع من جيبه قروش واداني ليهم قالي بالتوفيق يا عسل نزلت منو وانا بتبسم ساي ..
دخلت المدرسة واول يوم احس اني مبسوطة فيو بالجد ما حاسة اني مهمومة ولا حاجة شاغلة بالي حاسة اني مع الشخص المناسب ♡
- ولكننا مع الشخص المناسب سنضيئ♡
تبيان شكلها كانت وراي وقفتنني يااابت اتلفت عليها لقيتا تبيان حضنتها شدييييييييد قالت لي فقدتك والله كويسة انتي ؟ قلت ليها كويسة اكتر من اي وقت كان قالت لي ليه حصل شنو ؟ خوفتيني عليك قلت ليها تعالي احكي ليك مشينا على ركن كده وبقيت احكي ليها (......)
انتي جااااادة ي بت دي شنو الافلام دي م بصدق ؟ دقيقة دقيقة يعني هسي صحبتي معرسة ازغرت ازغرت؟ كدي امسكيني واااااييي جات حضنتني قالت لي تستاهلي كل خير والله بس دا شنو عرس المهزلة دي لاحفلة لا صالة قلت ليها دا كله م مهم المهم اني مع الزول الحيبقى لي سند جد بعد وفاة اهلي ..
مس ندى وسعاد نادوني لماعرفو اني جيت سلمو علي وسالوني كدة بس م قلت ليهم اني اتزوجت !
رجعت كملت باقي الدوام عادي نهاية اليوم معتز جا ورجعني البيت ورجع شغله ..
___________
كنت بنضف في البيت وكنت بفتش جمب حاجات امجد عسى ولعل القى موبايلي ! بس م لقيته خلصت نضافة وولعت المبخر وجيت قعدت ف السرير زهجانة بفكر اهرب ولا اعمل شنو مع الناس الفقر ديل بي ولدهم ! ..
بعد شوية امه جات داخلة قالت لي امجد وين ؟ قلت ليها م عارفاه قالت لي عايزة قروش قلت ليها اتصلي ليهو انا م عارفة محل قروش قالت لي لو سمحتي اتكلمي معاي ب اسلوب !
اخدت نفس وسكت خليتها قعدت تفرفر ف دولابو كدة لمن الله غفرليها ولا قلت ليها بتهببي ف شنو ! انتهت وطلعت ..
بالمساء كدة امجد جا داخل هبش دولابو مسافة قالي القروش الهنا مشت وين ؟ قلت ليو امك جات شالت ! قالي م تكذبي علي قلت ليهو واكذب ليه ؟ قالي قاعدة من غير تلفون اكيد فكرتي تسرقي قروش عشان تشتري واحد قلت ليو دي م تربيتي ، بعدين انا اصلا م عارفة بتخت قروشك وين !  قالي احنا حنستهبل ؟ يومي الصباح بتشوفيني بشيل منهم وبخت قلت ليو يا الله الخلقت الناس لو شلت كنت حقوليك شلت يا امجد دي امك قلت ليك !  فجاة بسرعه جا وقف قصادي وكان منفوخ قالي قصدك انو امي حرامية ؟ قلت ليهو م قلت كده لكن جات شالت وطلعت ! قالي انا اصلا جيت هنا هسي عشان اشيل ليها قروش يا داب طلبت مني ! لو شالت كان حتقولي شلت قلت ليو دي مشكلتك مع امك حلوها قالي ايوا مشكلتي مع امي ولقيتو بطلع ف الحزام بتاعو قلت ليو عايز تعمل شنو؟ قالي انا عرست لي حرامية وم جايب خبرها اااااه القروش دي لو م طلعت الليله الحزام دا بكمل فيك وبدا يضرب فيني بقوتو كلها وصرخت قدر م صرخت مافي زول لحقني  ..

م اكتفى بي كدة ، طبلني للمرة التانية وفات ، مشا خلاني وم جا تاني .. قضيت ليلي كلو بكا لحدي زمن متاخر م عارفة متين غلبني النوم ..
صحيت الصباح جسمي وارم وكلو علامات ، وهو برضو م جا .. وحتى م قدرت اغسل وشي بموية للنو المواسير كلها ف الحوش ! زي الساعه 9 ونص جات خالتو هنا لمن لقت الطبلة دقت لي الباب جيتها قلت ليها طبلني تاني ياخالتو هنا والله ما سويت ليهو شي المرة دي عليك الله اضربي لي لي معتز اخوي الله يرضى عليك ، سمعت صوت هبة امه ، كدي عليك الله ابقي مرة يا هناء وافتحي ليها مدام م اتربت عند اهلها خلي يربيها ولدي بعد الخسار الدفعنا فيها خلي نطلعه من عيونها !
هناء قالت ليها م تربي ولدك بالحقد دا م اهانهن الا لئيم وما اكرمهن الا كريم !
قالت ليها بس ياهو حذرتك يا هناء .. بقيت انادي ليها م تخليني ي خالتو هناء افتحي لي نادي عمو بتاع المرة الفاتت بس حسيت نفسي بتكلم براي حتى هناء فاتت هناء القالت لي اعتبريني في مقام امك ..
ماقدرت تبقي في مقام امي !
قريب المساء حسيت بالطبلة بتفتح ! مشيت وقفت جمب الباب جا داخل امجد وبتبسم براو قالي كيفك؟ قلت ليو زي م انت شايف ! جا قرب مني وحاول يحضني زحيت منو لي ورا قالي حبيبي انا اسف والله بس انتي زعلتيني شديد هدا راسك ابوسو ليك سامحيني تعالي حاول يمسك يدي بس زحيتا طلعت وراه لي برة فتح لي الماسورة غسلت وشي كويس بعداك كورك لي ان اختو جات بسرعه شايلة معاها شنطة ميكب قاليها ظبطيها لي عايزها عروس بس هسي قالت ليو حاضر انا كنت مستغربة جدا من الهو بعمله ، طلع وجا راجع جاب معاهو فواكه وباسطة واكل جاهز .. طلع نادى الاء قاليها ظبطي الحاجات دي ف صحون عليك الله قالت ليو سمح ! شالتهم معاه وطلعو ..
ان خلصت من وشي وغطت اي علامة ضرب حصلت قالت لي اختار معاك فستان قلت ليها تسلمي بختار براي ، قلت اكيد جايينهم اهلهم وعايزين يوضحو ليهم انهم ناس كويسين ! لبست فستان يمكن هو احلى فستان عندي بس لما عاينت في المراية حسيت بيهو ما حلو حسيت بي نفسي شينة وباهته شديد ملامحي كانت مطفية تماما وعيوني شكلها غريب وضحكتي ! ماقادرة اضحك حاسة بي رعب وخوف بس حاسة نفسي في جهنم وعايزة اطلع من هنا بس !
_________________
جاهزة ياسحر ! اي يا عزو جاهزة خلاص هو قاليك شنو ؟ قالي زي الساعه 7 بكون ف البيت وجاهزين ! خلاص شوف وليد وجمان وناس نجوى قالي كلهم جاهزين  ووليد وخالتي اتقدمو لينا كمان  كدي اسمعيني اها الجلابية دي كيف ؟ قلت ليو سمحة الشماعه والله قالي سمحة انتي قلت ليو خلاص
خلاص  يلا ..
طلعنا وانا متشوقة اشوف اختي اكتر من اي حاجة اختي الطولت منها شهر واسبوع ، معقول ؟ معقول سمر خلاص حتكون بعيدة مني دايما كدة !
في آخر لقاء تمنيت لو أنني عانقت أختي بشدة ، عناق يكفيني لكُل هذه الايام التي تخلو منها ☹️♥️✨ !
كنا ماشين وكنت حاسة قلبي سابقني ، اختي اللي م حضرت عرسها اختي حبيبتي الليي كانت لي ام قبل تكون اخت ، اختي اللي بتمنى ليها السعادة دايما ، سمر ما بتستاهل الا الخير ..
لمن وصلنا ، بنات خالي اسعد باركو لي ووليد جا قالي عروسنا اما خالتو هدى اتعاملت كاني م موجوده ووعد برضو ، ناصر قالينا يحليلها سمورة والله دقينا الباب استقبلونا اهل راجلها بالزغاريت كنت بسلم وبعاين في وشوشهم بحاول المحها ، فضلونا على بيتها اول م شفتها كانت متغيرة كانها م سمر البعرفها سمر المفرهدة وعلى طول بتضحك اول م شافتنا قعدت تبكي بكت بكا خلعنا كلنا ، مسكت في جلابية عزو قدر م حاولو يفكوها ابت ! جيت قربت منها لمن شافتني حسيتها انهارت عديل فكت من عزو ومسكتني وقعدت تبكي ! بس ابدا دي م دموع شوق عادية انا متاكدة سمر ما كويسة !
جمان ونجوى قعدو يبكوا ، خالتي هدى قالت ليها دي سنة الحياة ي بتي ، البت بعرسوها وبتبقى مع اهل راجلها تاني !  بس البسكت سمر شنو؟
قامت نسيبتها قالت ليها خلاص يا سمورة قطعتي قلوبهم .. وقعدت تنادي يا آن يا آن ، جات بت حلاتها كدة عمر ١٧ او ١٨ سنة وقدمت لينا موية وبعدها عصير  سمر كانت قاعده في النص بيني وبين عزو بس ما سمر البنعرفها وليد قاليها شنو يا سمر ما طبعك السكوت كدة ماكلفت نفسها ترد ابتسمت ليهو بس ! شوية كدة وراجلها جانا طالع من جوة السلام عليكم وسلم علينا كلنا بحرارة كدة واعتذر انو جا متاخر وكان ف الحمام ، قعد قصادنا قالينا الدلوعة لسة بتبكي ؟ خلاص ي  سسووسو ما تمسخي ليهم القعده ونسيهم ! ناصر قاليهو سمر دي اصلها حنينة كدة معروفة ف الاهل ! امجد قاليهو ماشاءالله عليها مافيها كلام ! جمان قالت ليها كيف مع الجامعة يا سمر !!!! سمر سكتت وعاينت لي راجلها ، راجلها واضح انو اتخلع قاليها والله تمام بسوقها الصباح معاي وبنرجع سوا ، جمان ردت ليها اي ي بت احسن ليك  م تخلي المسؤوليات تلهيك !  عمتي امنيتها الوحيدة كانت شهادة تخريجك ، سمر نزلت راسها !براحة شايفة وليد مشا بعيد كده شكلو مشا الحمام يغسل يدو لانو شايفاهو قال يدو اتوسخت ب صينية الباسطة الجبناها ..

بعد شوية قطعو اللحظة دي وهم بختو لينا ف الشاي واللبن والباسطة ، امجد نادى سمر قاليها دقيقة ! .. سمر قامت بخطوات تقيلة كانها م عايزة تمشي ! ناداها هنا على باب الحمام..
عايزة تفضحينا يعني ؟ احسن تتعاملي عادي والله والله والله زول يشك او يلاحظ على حاجة اول ما يمشو اضربك ضرب لمن تقولي كفى يلا اضحكي وامشي ..
...
سمر جات منو مبتسمة وانا م عارفة بس حسيت انو ابتسامتها دي م حقيقية ..
بعد ساعتين من القعدة قلنا نمشي !وقفو معانا ووصلونا لحدي باب الشارع وودعونا وسمر تاني ودعتنا بالدموع ! ناصر قال لامجد البت دي شكلها مشتاقة لاختها رسلها ليها يومين كده تلاتة امجد قاليهو اكيد اكيد بنجيككم نسلم عليكم زاتو قلنا ليه ان شاءالله
لما وصلنا البيت ، مشيت غيرت ونزلت ل عزو ف الصالون كان برسم ليهو ف حاجة ف اللابتوب قلت ليهو انت حسيت انو سمر دي طبيعية؟ قالي لا قلت ليو تفتكر تكون م مبسوطة؟ قالي 90% المشكلة حتى لمن اتصل عليها برد لي راجلها بقولي نايمة ولا نست تلفونها ولا ف الحمام بقيت مفاهم شكلها دا نهائي ما طمني !
____________
صارة خلقتك قدام اهلك يعني عشان شنو؟ عشان يسالوك مالك؟ احسن ليك ي بت تمشي معانا عديل ! امجد قال لامه خليها لي انا بادبها ادب لمن تعرف الله حق واسمعي يا امي في باقي الليل دا كلمي خالتي اني عايز رؤى بالكتير اسبوع وبعقد عليها انا م لاقي سعادتي مع الزولة دي امه قعدت تزغرت عاد يا زين م اخترت من عيوني الاتنين زغرتت ومشت !
انا كنت زولة مغلوب على امرها ، كنت ببكي ببكي وخلاص  ليه م حكيت لاهلي ليه م اتشبكت فيهم الا يسوقوني ليه م حكيت ليهم اني بتعذب وم مرتاحة هنا !
كنت واقفة ف مكاني ودموعي خاذلاني ، صعبانة علي نفسي وانا م قادرة انتشلها من الهي فيهو اتصرف كيف احكي لمنو؟
بكرة الصباح صحيت بدري اتوضيت وصليت وقعدت ادعي ربنا ياخدني من الانا فيهو ، ربنا يسهل امري واطلع بسرعة من العذاب دا ، قلت لي ربنا اني م عندي غيرو واني متوكلة عليه .
امجد غير هدومو وجا وقف قدامي رمى لي  قروش ف وشي جات واقعة قالي دي الفين  م اجي القى المطبخ دا فاضي .. وطلع خلاني واقفة ..
قريب الساعة ٩ لبست لي توب وقلت امشي ب الالفين دي اجازف اي حاجة  ، طلعت وانا مكسورة ، انا عمري ما مشيت مكان اشتري حاجة للبيت عزو كان مسؤول من اكلنا وشرابنا  كل شي كل شي حرفيا ! حتى الطريقة الاداني بيها قروش كانت طريقة ذلة ،طلعت وانا بفكر لقيت نفسي ببكي ! انا من الوصلت ليهو دموعي كانت بتنزل بس م كان هاميني شكلي ولا منظري قدام الناس الدموع كانت بتريحني ! كنت عايزة ارتاح !
دخلت السوبر ماركت وانا ماشة ومافاهمة ماشة وين ولابعمل في شنو عايزة اشتري شنو !
حسيت بي زول مسكني من كتفي اتخلعت ، لمن اتلفت لقيتو وليد !

تستاهلي تنكسري كمان مرة ومرة ومرة لو فضلتي في نفس المكان اللي انكسرتي فيه المرة الأولى ..♡

#أميرتي_قاصرة13
بقلم امل الشيخ

قلت ليو وليد انت بتعمل هنا في شنو؟ قالي عايزة تموتي ونجي نشيل جثتك حتى نعرف المعاملة البعاملوك بيها امجد واهله ؟ لقيت نفسي بترمي في حضنه ، ايوة غلط ، غلط لاني متزوجة بس كنت خلاص جبت اخري م كنت قادرة استحمل ولاشي !
وليد بقا ساندني معاه لحدي عربيتو قالي عندك حاجة ف البيت دا ؟ قلت ليو بصوت مبحوح ، لا طلعني من هنا وخلاص م عايزة ارجع للجحيم دا !
دور عربيتو ، طول الشارع كنت ببكي وهو بهدي فيني المصبرك قدر دا شنو يا بت انتي عبيطة؟
قلت ليو صبرت لاني عبيطة ايوة لاني ضعيفة لاني مهزوزة لاني م عارفة اخد قرار نفسي ، لاني جبانة وخوافة ! قالي انتي ما كدة قلت ليو لا انا كدة انا ضعيفة اضعف مما تتخيل انا صعبت على نفسي شديد !  مديت ليهو يدي قلت ليو شايف العلامات دي ؟ انا ولا مرة دافعت فيها عن نفسي انا جسمي كله اتشوه قالي انا مستحيل اخليه مستحيل قلت ليه دا واحد الضرب خسارة فيه ! قالي م تشيلي هم ..
____________
من اول ما شفت سمر وانا كنت حاسي انو دي ما سمر بت خالتي ! سمر دي وردة ماشة مستحيل تبهت كدة ساي ! سمر كانت مطفية عديل كانها ما البت العمرها 22 سنة شكيت انو تكون م مبسوطة بس م عندي دليل على كدة ..
اثناء اللمة كنت حاسي يديني سكر سكر قلت اغسلهم دخلت الحمام غسلتهم وانا طالع سمعت امجد بتكلم مع سمر باسلوب حار
"عايزة تفضحينا يعني ؟ احسن تتعاملي عادي والله والله والله زول يشك او يلاحظ على حاجة اول ما يمشو اضربك ضرب لمن تقولي كفى يلا اضحكي وامشي "
انا هنا اتاكدت انو سمر م مبسوطة وانها بتتضرب وبتتهان في البيت دا ، حتى لما جمان سالت من الجامعه رد هو .. قلت عشان اتاكد تاني يوم من الصباح مشيت جامعة سمر واستنيت صحبتها اسمها رونق ف البوابة اول م شفتها سالتها من سمر ردها لي كان سمر كويسة؟ لية م بتجي الجامعه ومابترد على تلفونها عليك الله قوليها فاضل شهر بس ع الفاينل دا غير البحث قلت ليها تمام وطلعت ..
مشيت جمب بيتهم طوالي شفت امجد وهو طالع الصباح ، بس سمر م معاهو يعني امس هو كذب علينا ؟ طلع زي 8 ونص كدة ، ما كنت عارف انزل ولا اخش ولا انتظرها سبحان الله ربنا الهمني انتظر نزلت كده جمب بيتهم ف حدداد قالي بقدر اساعدك ي ولدي قلت ليهو لالا ، بس داير اسالك عن ناس البيت دا امجد ولدهم وكده؟ والله ناس البيت ديل ربنا يهديهم ويصلح حالهم ! بناتهم اي كلام واخوهم خايب والله م مزعلني الا مرتو العرسها شكلها بت ناس والله يومي داقنها ومسمعنها ، هنا ف الشارع بنسمع ربنا يخارجها منهم بتسال عنهم عافية ؟ قلت ليو مرت ولدهم دي بت خالتي ! جا قريب علي الله يخليك امرقها ديل م بستاهلوها والله البت دي لو بتي م تقعد دقيقة وحده هنا  !  قلت ليو تسلم ي عمي ورجعت العربية وانا حالف م حتقعد عندهم لحظة !  فجاة لمحتها طالعة وروحها زاتها طالعة لمن بكت انا اتخلعت ، اول م طلعت بكت م انتبهت للشارع ولا الناس ، اي زول انتبه عليها كانت بتبكي لدرجة م شافتني وانا قصادها يمكن م اتخيلت انها تلقاني ، اتحر كت وراها لحدي م ثبتها ف السوبر ماركت ، سكاتي قبل اليوم ضيعها مني بعد الليلة مستحيل اسكت !
اخدت وادي معاها ف الكلام لمن شفت اثار الضرب حسيت نفسي قدر السمسمة دا كله وانا وين ؟ حلفت م اخليه ،لمن وصلت جامعتهم تاني ، نزلت جيت عايز ادخل الجامعة الحرس وقفني طلعت ليهم بطاقتي " رئيس مباحث " دقو لي تحية بعدها خشيت الجامعة وانا ماشي كدة لاقيت طالبة سالتها بتعرفي دكتور امجد؟ قالت لي مافي زول م بعرفو شغال حاليا محاضرة في رابعة ادارة سالتها من موقع القاعه وصفت لي ومشيت اول م فتحت باب القاعه وشفتو حسيت عيوني ديل مولعين نار ، جيت عليه من غير اي تفاهم ولا احترام للمكان الهو الفيهو نزلت فيهو دق  الطلبة حاولو يفكو مني وسامع بنات كتار بقولي حيموت ف يدك ، وقفت منه وجريتو من لياقتو وهرشت الطلبة زحو من هنا والا ح اسجنكم كلكم الطلبة شوية خافو ورجعو لي ورا بقيت جاريه قدامي وشكلو ادارة الجامعه عرفت وجو جارين علي ي استاذ الكلام دا غلط منك ! قلت ليهم مافي زول يدخل ف مشاكل الشرطة اي زول يفتح خشمو حيمشي القسم طلعت بيهو لحدي باب الجامعه ، سمر لمن شافتني اتخلعت وبقت تبكي زيادة فتحت الباب الورا وركبتو قلت ليه اركب ركب وهو ساكت وشو كان مليان دم !
___________
وصلنا قسم شرطة ()  كنت قاعدة ف الكرسي وقصادي وليد وواقف وراهو امجد ومكلبش ليهو يدينو وليد ضرب تلفون ..
اسمعني عايز ماذون سريع ف ظرف ساعة ! ايوة ف القسم الانا شغال فيهو !تمام اقرب واحد تمام ! بعد شوية نادى ي عسكري ،جاهو واحد سريع قاليو ختو لي ف الحراصة امجد قاليهو م من حقك تدخلني والله بتلفون واحد افصلك قالت للعكسري مرق لي تلفونو العسكري فتش ف جيوبو لحدي م طلعو اداهو ليهو وليد قفل التلفون قاليهو ارميهو هناك سريع وفعلا العسكري ساقو !

وليد كان بعاين لي بس وانا مستغربة ف نظراتو لي بعد مسافة قالي م مصدق انو الوسخ دا ضربك كدة والله العظيم ح اخليه يحس بنفس الالم العيشك ليهو كلها ساعة زمن والماذون يجي وتاني م حتشوفي وشو ، اكتفيت ب اني اهز ليهو راسي قام علي حيلو وطلع برة مكتبو وجا بعد مسافة شايل في يدو كرواسون بالجبنة الانا بحبو  ، ومعاهم عصير فراولة ، دي الحاجات البحبها ، امجد عمرو م هماهو انا اكلت ولا شبعانة ولا حالتي شنو ، اما وليد المابيني وبينو شي عارف اني بحب الكرواسون وعصير الفراولة ! قالي اكلي ي ستي شكلك تعبانة م ماكلة قلت ليو لو عارف انا كنت عايشة ع الموية بس حتشتري لي الكرواسون الفي العالم كلو قالي الفي شنو والمافي شنو ح اشتري ليك الكرواسون الفي العالم كله ! ابتسمت ليه .. قام قعد ف كرسيهو وطلع ملفات واوراق .. وشكلو بيراجع فيهم ! تاني طلع رقم وطني وحاجات كده قالي طبعا دي حاجاتك انتي استغربت بس م كترت معاه ، في المسافة دي انا اكلت الكرواسون اكتر حاجة كنت مشتهياها كانو حس بي ! ما كان بمر علي يوم من غير م اكله !
بعد ساعة زمن الماذون جا ، وليد طلقني من امجد ووقعت وامجد وقع ، وليد م اكتفى  ب كدة وكتبو تعهد بانو م يتعرض لي تاني ! امجد وقع على الورقة وطلع برة ! وليد جا وقف قدامي قالي قومي يلا خلاص انتهى الكابوس مد لي يدو عشان اصافحو قالي سمر المفرهدة حرة طليقة ! مديت ليهو يدي وقعدت اشكر فيه  ، لولا وليد انا م كنت طلعت من الانا فيه ، سجدت سجدة شكر ، شكرت ربنا انو استجاب دعاي وطلعني من غير ادنى مجهود مني سخر لي وليد الحمدلله حمدا كثيرا طيبا ..
وليد قالي يلا عشان تمشي البيت ، فعلا قمت مشيت معاه ، وصلنا كدة عربية عزو وقفت نزل ونزلت معاهو سحر نزلت بسرعه ووراي وليد كانو مستغربين شديد مني !
سمر ؟ مالو وشك كده؟ قلت ليهو دي قصة طويييييلة ! اكتفيت ب اني حضنت سحر اختي واتقدمنا على عزو ووليد ، سحر م سالتني اي سؤال بس احتوتني رغم صغر سنها بس عرفت كيف تحتويني وكانها اكبر مني ! طول عمري كنت زعلانة اني م عندي اخت كبيرة ! بس ما كنت منتبهه لي فكرة انو الاخت الصغيرة ممكن تكون كبيرة في اوقات الضعف حقتنا ، الاهم دايما انو في اخت في راحة في حضن كبير وقت المصاعب والشدة ..
_____________
وليد وهو بحكي لي كنت منطط عيوني ! يعني احساسي كان صح سمر فعلا م كانت طبيعيه وكل دا حاصل معاها وانا م عارف ، انا م عرفت احميها منو وقفت على حيلي ، قوم ي وليد ! استهدا بالله مشيت وخليته وركبت عربيتي لقيت وليد فتح الباب التاني وركب ، كنت طاير بسرعه بس متين اصل بيتهم ! وصلت و ضربت الباب قربت اكسره ليهم فتحت لي امه ديل انتو حسبي الله ونعم الوكيل !  دايرين تقتلو ولدي وبدت تضربني بيديني زحيتا مني بقوة لمن قربت تقع بقيت اكورك ليو ي وسخ اطلع لي هنا دخلت صالتهم لقيتو قاعد ف الكرسي شكله بنضفو ليهو ف ضرب وليد ! بس وين نزلت فيهو ضرب تاني اخواتو وامه حاولو يمسكوني منه ! قلت ليهم وين كنتو لمن كان بضرب ف بتنا ؟ ليه م خفتو عليها تموت ف يدو ولا حلال عليه وحرام علينا ، بتضربو فيها قايلين م عندها زول وراها ؟ امه قالت لي لو وراها اهل م بترمو بتكم كده اتلفت عليها وانا معصب يرميك ويحرقك لو م بلعتي لسانك دا حبلعو ليك بالعافية والحصل دا برجع ليك ف بناتك الله يحرقكم كلكم وليد قالي خلاص يا معتز قلت ليو م خلاص نهائي م خلاص واتلفت على امجد واديتو بوكس ف نص وشو وطلعت منهم ووراي وليد وصلت العربية بالعافية ، ركبت واستنيت لحدي م وليد جا ركب جمبي قالي خلاص شلت حقك بزيادة منهم ! ضربت الدركسون ليه م حكت لينا ليه م ورتنا انو دا كله حاصل معاها واللله لو ف نفس اليوم الزورناها قالت م مرتاحه والله ثانية م كان تقعدها تاني ليه اختارت الذل والاهانة ! عارفة انو وراها رجال البخليها تخاف شنو ! م عارف دموعي ليه خذلتني  ! شكل سمر وعلامات الضرب ف كل حتة ف وشها وجسمها كسر قلبي انا وديتها للهلاك ب نفسي ! بس هو لمن سالت عليه قالو لي كويس ! بس كيف م يكون كويس ، يوم زورناهم مثلو علينا انهم احسن ناس كيف قادرين يكونو منافقين بالصورة دي حسبي الله ونعم الوكيل حسبي الله !
________
سمر ملامحها كانت مرهقة جدا ، نامت وهي في حضني فضلت ف نفس القعدة عشان م اصحيها ، لحدي م معتز ووليد جو داخلين معتز جا صحاها لمن اتخلعت قلت ليو م تصحيها كده م اشتغل بي قاليها ليه ي سمر ؟ ليه سكتي؟ ليه اخترتي تبقي ضعيفة ؟ مش قلت ليك انتي قوية ! طول م انتي ماغلطانة م تسكتي ؟ سكتت سمر سكتت وم عرفت ترد وليد بعد صعوبة جر معتز وطلعو من الغرفة ، رقدت ف المخدة وكانت بترجف جبت البطانية غطيتا وانا م فاهمة الحاصل شنو مسكت يدها وقلت ليها سمر ايا كان الحاصل معاك ف انا ومعتز معاك وعمرنا م حنسيبك انتي اغلى حاجة في الدنيا عندنا حسيتها شوية اطمنت بعد كلامي وغمضت عيونها ! م قعدت كتير ونامت !

واضح ان الامان والطمأنينة الفي البيت خلوها تنوم بالسرعه دي ! زي اول يوم رجعت بعد غياب حسيت روحي اتردت لي °♡ فضلت اعاين لي ملامحها الباهتة وهي نايمة وشها كان صغير بس كان شايل جمال العالم كله ..♡
بيتنا ومعتز وسمر دي الحاجة الدافية البحبها كل م اكون زعلانة واتذكر اني معاهم بضحك كل م اتعب واتذكرهم بقوم ،، هم عائلتي البسيطة بس رغم البساطة دي وجودهم شايل امان كبير قادر يحتوي كل ضعف ممكن امر بيهو °♡.


"المنازل لا يسندها الحوائط ولا العمدان بل يسندها ضحكات إخوتنا، دعاء والدينا، وصوت أغنياتنا المفضلة وشجاراتنا المتقطعة، ورائحة طعامنا المفضل وطقوس المناسبات أو حتى الأحزان.. المنازل تُسند بروح العائلة دائمًا وأبدًا..
العائلة هي الزاد.. الأعمدة الثابتة داخل القلب والدّفء الأعمق الذي لا تملك إلا أن تنتمي إليه وأن تحبه.. يجرفك في كل مرة وأنت تعترف لنفسك: هذا أثمن ما أملك، هذا كل ما أملك."❤️

سمر ووليد ❄🔥❄

#أميرتي_قاصرة14
بقلم امل الشيخ

كنت قاعد وبفكر في الخطوة الجاية المفروض اتخذها شنو ، ك ابو لي بتين ماعايز شي ف الحياة دي غير سعادتهم اعمل شنو ! حسيت بصوت رجلين اتلفت وراي لقيتها سحر !
سحر ! انتي صاحية لحدي هسي ؟
ايوة حسيتك مهموم فما عرفت انوم !
ايا كان الحاجة الانت شايل همها حتهون وحتعدي ، حتى سمر بكرة حتعدي الحصل معاها دا وحترجع تقيف على رجولها انا عارفة انك ممكن تكون شايل همنا بس روق شوية وم تهلك نفسك بالتفكير، وعلى فكرة انت السوبر هيرو حقنا يا معتز انت بطلي الخارق ♡
لقيتها بتضمني لي حضنها ، كان احساس مختلف وحضن مختلف حسيت بامان واطمئنان حسيت نفسي كنت محتاج للحضن دا للضمة دي يدينها الصغيرة كانت بالنسبة لي العالم .. حضنها كان اكتر حاجة مريحة عشتها بعد 29 سنة قهر ♡
حين عانقها لأول مرة قال :
هذا ما كان ينقصني ، وطن حنون ❤️
صحيت الصباح بصوت عزو وهو بيهمس لي اصحى ، صحيت براحة عشان م اصحي سمر ، نزلت رجولي دخلت الحمام استحميت واتوضيت وصليت ونزلت تحت لقيت عزو فاتح اللابتوب حقو وشغال قلت ليهو وين الشاي؟ قالي مش قلتي عايزة تعمليهو لي ؟ نزلت شنطة المدرسة ودخلت  المطبخ طلعت اللبن والسكر والكبايات والملعقة وعاينت ليهو وبعداك؟  بدا يوصف لي وهو شغال في شغلو لحدي م انتهيت وختيت كبايتو جمبو ! انت ي معتز سمر حتقعد براها؟ لا جمان حتجيها ! بس خالي .. قاطعني قالي م حيعرف سكت وشربت الشاي .. مشيت اطمنت عليها سريع لقيتها نايمه بعمق اتاكدت من تنفسها ولقيتا بتتنفس بعداك رجعت نزلت ومشينا المدرسة !
مرت الايام يوم ورا يوم وسمر بتتخلع وبتجيها كوابيس واي شي يهبشها بتخاف منو ، صحباتها م قصرو معاها وجو البيت وكانو معسكرين معاها وبشرحو ليها !
امتحانات نهاية السنة فضل ليها اسبوعين بس ! المدرسة عملت لينا يوم صحي ف المدرسة بتكلمو عن سرطان الثدي والتوعية اللازمه وكدة !  وانو ضروري الزول يعمل تشيك شهريا ويتاكد ، بصراحة اليوم كان لطيف شديد ! وانا طالعة لقيت ليلى ف وشي حاولت اتجاوزها وقفتني سحر !
قلت ليها نعم قالت لي عايزة اعتذر منك ! قلت ليها معقولة ؟ ليلى شخصيا عايزة تعتذر ؟ قالت لي انا غلطت في حقك شديد سامحيني !عم بينا صمت ، كسرته وقالت لي انا امي وابوي واختي اتوفو في حادث قبل ٣ اسابيع ! لمن قالت كدة حسيت ب وجع ف قلبي قلت ليها نعم؟ دموعا نزلت قالت لي ربنا انتقم مني بسرعة عشان حقدي وحسدي منك  بعترف انا كنت بغير منك شديد كيف انتي كنتي شاطرة ومحبوبة من الناس كلها كنت عايزة اضايقك عايزة حياتك تكون سيئة دايما ، حتى لما امك اتوفت انا فرحت فرحت لانه حتكوني براك بس بالعكس كل الناس وقفت معاك ! انا كل شي عماني عن اني اشوف ابسط النعم ف حياتي وخلاني اركز معاك ! حتى امي وابوي كانو قدام عيني بس يوم واحد م فكرت ابرهم واكون معاهم اطول فترة ، انتي ع الاقل ربنا خلى ليك اختك واخوكي بس انا بقيت براي بقيت براي يا سحر ، انا كنت غلطانة وغلطانة شديد بس العقاب كان حار حار ي سحر علي ! لقيت نفسي بحضنها ودموعي اكتر منها !
صح انا شميتها وكرهتها لانها عايرتني بوفاة اهلي كتير بس عمري م اتمنيت الحصل معاي يحصل ليها ول لزول غيرها ، الفقد دا اصعب حاجة ممكن تحصل لاي زول بتمسخ ليهو طعم الدنيا بتخليهو عايش بدون روح ، وجود معتز وسمر ف حياتي خلاني اتجاوز المحنة بس ليلى ؟ حيكون معاها منو ؟
بكيت معاها زين وقلت ليها اني م زعلانة منها وبقيت اصبر فيها وانا عارفة مافي اي كلام ف الدنيا ممكن يصبرها على فقد اسرتها !
مشيت منها ودموعي عشرة عشرة لقيت معتز ف وشي اتخلع لما شافني نزل بسرعة وجا علي وقالي مالك ! حضنته وقلت ليه ليلى ليلى اهلها اتوفو ف حادث ! قالي ليلى منو ؟ قلت ليه البت الضايقتني فترة بعد وفاة امي ! قالي لاحول ولاققوة الا بالله ..
وصلت البيت وباقي يومي مسيخ نظرتها وكسرتها خلتني بسب للدنيا القاسية  ..
بعد 3 يوم ..
مصرة يعني تعمليهو ؟ اي مصرة خلاص ارح ، هم عملو ليكم يوم زي دا عشان تحسه بخطورة اي اعراض ممكن تجيك وتفحصي اول ب اول !بس انت قلتها افحص اول ب اول !! يعني انتي حاسة بشي ؟ قلت ليو لا بس نتاكد نعمل تشيك وخلاص ،، حاضر راسك قوي خلاص ..
  مشينا مستشفى () وقلتا ليهم اني عايزة افحص وفعلا انتظرت لحدي م جا دوري وفحصت وبقينا قاعدين انا ومعتز ! ومنتظرين النتيجة لما النتيجة طلعت دخلنا للدكتور سلم علينا وسالني اسمك وعمرك والاسالة دي ! قالي حصل حسيتي باي اعراض تعب ؟ مثلا دم يطلع من مناخيرك او اي حتة ! قلت ليهو لا م حصل ! قالي طيب وزنك كيف ؟ قلت ليهو يعني خاسة شوية بس لكن عشان م باكل ! قالي ليه م بتاكلي قلت ليهو م بكون جعانة او حاسة اني عايزة اكل ! معتز قاليهو ف شنو ي دكتور كلامك دا م طمني؟ اتجاهلو قالي طيب م لاحظتي حاجات ف جسمك كتل صغيرة مثلا قلت ليو لا ي دكتور م حصل واصلا جونا ناس سرطان الثدي وكان يوم توعوي وقالو كل زول مفروض يعمل تشيك وانتي جيتي ع هذا الاساس بس قلت ليو ايوة قالي ممكن

تستني برة شوية يا حلوة ؟
___________
رد فعل الدكتور واسألتو الكتيرة وترتني تماما او شبه بقيت خايف انو سحر عيانة لمن قاليها تستنى برة كنت متاكد انو الكلام الحيقولو لي ما حيكون كويس !
ف شنو ي دكتور خير ؟  انت زوجها ؟ ايوة طيب شوف نتيجة التحليل القدامي دي فيها انو المريضة بتعاني من لوكيميا ، بعد كلمتو دي انا بقيت لا بسمع لابشوف ..
انا عارف انو  الخبر دا صدمة خصوصا انو الزولة دي م جات وهي حاسة باعراض بس الحاجة الكويسة انها لسة ف البدايات يعني في أمل !
قلت ليو ايوة ي دكتور بس هسي العمل شنو ومفروض يحصل شنو ؟ قالي ف تحاليل كتيرة مفروض تتعمل ليها انا بكرة حكون موجود الساعه ٩ ص تعال وانا ح اعمل التحاليل دي قلت ليو تمام ..
طلعت منه والدنيا مسودة ف وشي كانسر ؟ ولانقول الا مايرضي الله
_______
معتز جاني طالع وشكله كان غريب ! معتز مالك؟ قاليك شنو مسكني من يدي شديد وساقني وصلنا العربية قلت ليو معتز مالك؟ رد لي وصوتو غريب زاتو ! قالي بكرة ف تحاليل مفروض تجي تعمليها تاني عشان يشوفو الحاصل قلت ليو والنتيجه دي ! قالي تحاليل بكرة حتأكدها ..
سكت على كده ، وصلنا البيت وهو دخل الصالون من غير اي مقدمات ، مشيت لقيت جمان وسمر بتونسو وعاملين قهوة قلت ليهم الله كبو ليا جمان قالت لي الشفع بعيد قلت ليها لو سمحتي الشفع عرسوا اقعدي انتي ! سمر عاينت لي قالت لي شفع منو العرسو؟ قلت ليها انا! قالت لي عرستي؟ متين ووين؟ وليه ماف زول كلمني؟ قلت ليها معتز قال حيكلمك هو ! قالت لي عرستي معتز ؟ جمان قالت ليها اقيفي احكي ليك وبدت تحكي ليها الحصل من قبل يوم عقدها ! لمن جمان انتهت سمر وقفت على حيلها وقامت طلعت مننا قلت لي جمان تفتكري زعلت مني؟ قالت لي حاساها زعلت مننا كلنا !
________________
سحر دي اغلى زول في حياتي ، سحر المشاغبة المستهبلة المزعجة الكلامها كتير ! كل حاجة في سحر كانت محلياها حتى لو بضايقني انا بحبها زي م هي ! م ح اقدر اتخيل انو هي عندها كانسر ! وممكن تعيش وممكن ......
  كنت بتذكر من لما كانت شافعة وكنت بشيلها وكل فترة كانت بتكبر قدام عيوني وكنت بحس بمسؤولية اكبر تجاهاا !
جاتني سمر بصورة اندفاعية شديد  قالت لي معتز كيف تعرس سمر وانا اخر من يعلم ! قمت من السرير وقفت قلت ليها اقعدي قالت لي ليه م وريتني وقعدت تبكي ! قلت ليها سحر عندها كانسر ! وقفت مخلوعه ولابترمش مسافة ! قالت لي نعم ؟ زي م قلت ليك !  قعدت ف السرير ودموعها بقت شلال قلت ليها انا اسف اني قلت ليك كدة بس الدكتور صدمني زيك كدة ! بكرة في تحاليل مفترض تبداها وغالبا بعدهم حتبدا علاج ! قالت لي كيماوي ؟ سحر اختي ؟ هزيت ليها راسي
.....
بكرة من الصباح قلت ليها ماف مدرسة حنمشي المستشفى عشان ف تحاليل مفروض تعمليها !
مشينا فعلا لقينا الدكتور سلم علينا ولا ادانا فرصة زاتو ، هي كانت مخلوعة وانا كنت خايف قالي مافي طريقة تخش معاها وقفني وشفتو هو سايقها وبتعاين لي بعيونها ما اخليها بس الدكتتور اصر بقيت منتظرهم ساعتين عديل حتى جو طالعين ، اول م شافتني جات ضمتني وقعدت تبكي !  الدكتور قالي انا اسف بس الفحوصات دي حارة شوية النتيجة تعال استلمها المساء على كدة سوقتها وطلعنا ..
_______
والله ح امشي افتح فيها بلاغ هي واولاد اهلها كيف يعني يضربو ولدي بالطريقة دي !
امي كانت مصرة انها تفتح بلاغ فيهم ، بس هي م عارفة انهم برضو ممكن  يفتحو فينا بلاغ !
الضرب الانا اضربتو دا كله استاهله ! استاهله لاني جبان ، انا لي هسي بتذكر اول مرة شفتها ، كانت طالعة من المحاضرة ،جمب باب القاعة اتطاقشت مع بت وقعت شيتاتها وشنطتها  ووقع منها روج ومنديل وقروش ! البت حاولت تساعدها هي ابتسمت ليها سريع ونزلت رفعت حاجاتا ، كانت جذابة بطريقة ملفتة لونها الاسمر الرويان ، عيونها الواسعة ضحكتها وابتسامتها كانو سمحات بصورة مبالغة ! بتذكر شعوري وقتها اني كنت عايز البت دي ..
عايزها تكون معاي ! تكون مرتي ! اول بت اشوفها وم افكر اقضي معاها زمن حسيتها م بتستاهل تتجرح!
ياريتني لو لعبت بيها اهون من العملتو فيها ، اهون من الضرب اهون من نظرتها المكسورة الكانت بتعاين لي بيها ، كانت وردة مفتحة ، بس انا عملت شنو انا طفيتها وخليت ملامحها بتبكي !
انا مش بستاهل الضرب ! انا بستاهل حبل المشنقة عديل ،
امي اكتر زول عارف اني انا حبيتها ، بس هي ! هي وقفت ضدي واشتغلت فيني تحريش ، هزت صورة سمر في عيوني ! سمر عملت ، سمر فعلت سمر سوت ، وانا عارف انو سمر ما سوت بس انا ما كنت بقدر اقول ليها لا ! مابعرف اقوليها لا اصلا لحدي م ضيعت حاجات كتيرة في حياتي !

....
يا ولد انت م سامعني؟ انا ماشة القسم هسي دي بتمشي معاي ولا لا ؟
لاول مرة قررت اني اقول لا اني اقيف ضدها وضد اي شي غلط بتعملو !
ما ماشي يا امي وانتي زاتك شبر من البيت دا م حتطلعي منو ! مش مرتي ؟ ومش انا ضربتها ؟ وغلطان ؟ وضربوني؟ انا م زعلان ! انا م زعلان ولو كانو كتلوني عديل م كنت ح امشي اشتكيهم !
عشان جبان !
اي جبان ، جبان لاني كنت بخاف منك ! بسبب خوفي منك خسرت اكتر زولة حبيتها ف الدنيا ! من الليلة اوعك تحاولي تتحكمي فيني ! من الليلة انتي امي وبحترمك ، بحترمك في الحاجة الصح ، بس مافي حياتي ومافي قراراتي ومافي اي غلط انتي بتقوليه اما غدير بت خالتي ف انا م عايزها وم حسيت يوم واحد بيها بعد خفتها واي شي بتعمله عشاني ! بس رجاء خليني ف حالي !
اتقدمت منها خطوتين ! وشوفي هنا بناتك البمرقن وبجن ١١ و ١٢  دا تاني مافي م تقولي لي ششغل ولا زفت ! انا كلام الناس سامعو ومتجاوزو عشان انتي قلتي شغل بس شغل شنو اابخليهم يجو متاخر اي وحده عايزة تشتغل تشتغل من ٨ ل ٤ والا م حيحصل كويس واعرفي كويس لو لقيت البنات ديل بعملو ف حاجات م بترضي ربنا انا ح اقتلهم بي يدي دي !!
صح كنت هايج وبجوط ، بس لاول مرة اكون مرتاح لاني عملت الصح !


‏يقول أحدهم قبل زواجي قالت لي أمي:
"إذا أسعدت زوجتك عادت السعادة إليك، وإذا أحزنتها عاد الحزن عليك، فاختر لنفسك“🌸 .