ما قيل في الموت ورهبته :

قال الحسن - رحمه الله :

ما من يوم إلا و ملك الموت - عليه السلام - يتصفح في كل بيت ثلاث مرات ، فمن وجده منهم قد استوفى رزقه ، وانقضى أجله قبض روحه ، فإذا قبض روحه أقبل أهله ببكاء ، فيأخذ ملك الموت بعضادَتي الباب فيقول : ما لي إليكم من ذنب ، وإني لمأمور ، والله ما أكلت له رزقًا ولا أفنيت له عمرًا ، ولا انتقصت له أجلاً ، وإن لي فيكم لعودة ثم عودة حتى لا أبقى منكم أحدا .

موسوعة ابن أبي الدنيا 5/461

نشر العلم🕯

قَالَ الشَّيخ ابن عُثيمين -رَحِمهُ الله-:

"ينبغي لطالب العلم وغير طالب العلم، كل من علم سنة ينبغي أن يبينها في كل مناسبة، لا تقل أنا لست بعالم، نعم لست بعالم لكن عندك علم.

▪️قال النبي -عليه الصلاة والسلام-: { بلغوا عني ولو آية }، فينبغي للإنسان في مثل هذه الأمور أن ينتهز الفرص كلما سنحت الفرصة لنشر السنة فانشرها يكن لك أجرها، وأجر من عمل بها إلى يوم القيامة".

📚[شرح رياض الصالحين (٤ /٢١٥)].

- المخدرات الجديدة و الموت ❗️.
- قال ﷺ: «الدِّينُ النَّصِيحَةُ» صحيح.

-

- ﴿إِنَّ ٱلَّذِینَ كَفَرُوا۟﴾ .
- سورة: النساء .

-

يأجوج ومأجوج بشر زينا!

باهي بيخشوا الجنة ولا النار؟

وياكلو في البشر؟
..
عيب جداً نذكر علامات قيام الساعة الكبرى ومانذكرش قصة خروج يأجوج ومأجوج

شوفو اول شي ضروري نعرفو ان يأجوج ومأجوج بشر زينا زيهم من نسل يافث بن نوح عليه السلام وهما مش شخصين لا هما قبيلتين ..
قبيلة يأجوج معنى اسمها اجيج النار يعني النار لما تكون ملتهبة

وقبيلة مأجوج مأخوذة من الماء الأجاج يعني شديد الملوحة لدرجة ان ملوحته تحرق

تمام حلو بس كيف زي البشر قصدك زينا شكلهم؟

لا هما بشر اي بس يختلفوا علينا كلياً وجههم مدور ومليان وعيونهم صغيرة شعرهم اسود ومايل للأحمرار اقوياء جداً ومافيش حد حرفياً يقدر عليهم الا الله عز وجل واعدادهم كبيرة هلبا هلبا بدرجة ماتنوصفش في سطور لدرجة يوم القيامة النار حتتعبى بيهم هما..

تمام شن قصتهم باهي هما من البداية؟
قصتهم انهم كانو مفسدين في الأرض ومؤذيين بطريقة بشعة ومش سالم منهم حد يخنبوا ويقتلوا ويفسدو

فـ كان في وقتهم ملك معروف صالح اسمه " ذي القرنين" الله عز وجل عطاه التمكن في الأرض يعني زي مانقولو متحكم فيها كلها

تمام باهي ذي القرنين نبي؟

لا مش نبي بس كان ملك من الملوك العادلين زي ما قال ابن باز رحمه الله باهي معقولة ربي مكنه في الأرض وهوا مش نبي؟!
اي معقولة عادي جدا لإن ذي القرنين يلي يملكه مش معجزات بل علم يعني الله عز وجل عطاه مفاتيح العلم يعني يفهم في الجغرافيا والتاريخ والرياضيات ويعرف يتصرف فيها والله عز وجل قال في كتابه ( واتيناه من كل شي سببا) يعني عطاه من كل شيء سبب وهوا يتبع فيه باش يوصل لمراده

المهم كان يمشي هوا وجيشه لجميع البلدان وفي يوم من الأيام قعد يمشي لين وصل لمغرب الشمس يعني لمكان فيه غروب الشمس فـ وقف في أرض زراعية مليانة آبار عيون مياه شكل الأرض غريب ومايل السواد بسبب انعكاس الشمس ع الطين يلي فيها المهم لقي فيها قوم ظالمين جداً فٓـ هني الله عز وجل خيره قال يا أم تشدهم وتعذبهم او اديرلهم حد وتوقفهم عند حدهم

فـ اختار ذي القرنين ان يتخد فيهم سبب بالك يوقفوا ظلم ويرجعوا لله عز وجل فـ قعد يكون في قرية منصفة ويبدل في الدولة الظالمة إلى دولة منصفة ..

مشي بعدين لمطلع الشمس وطبعا ممكن يكون هذا سبب تسميته يعني سمي ذي القرنين (لانه بلغ قرني الأرض يعني مغرب الشمس زي ماقلنا فوق ومطلعها) ويقال أيضاً لإن لابس خوذة فيها قرنين تفسير اسمه اختلفوا فيه وهذا مش مهم عندنا

المهم بعدين مشي زي ماقلنا للمشرق لقي ناس مافيش بينهم وبين الشمس ولا ساتر ولا حجاب يعني لا مباني ولا شجر وقال بعض العلماء ان الشمس عندهم كانت تقعد 6 شهور بدون ليل..!

المهم كانو يهربو من الشمس لإن حرفيا كانت مميتة في يلي يهرب ويلبد في الماء وفي يلي يخشو زي الكهوف الصغيرة ولما تمشي الشمس يطلعو يعيشوا حياتهم الطبيعية..
المهم القرآن الكريم ماذكرش شن دار معاهم ذي القرنين ولا كيف ساعدهم ويقال ان حكم فيها بالعدل أيضاً

ماعلينا قعد يمشي ذي القرنين لين وصل في قوم عايشين بين سدين ومعبية جبال وطبعا في الجبال كانو ساكنين صحاب موضوعنا يأجوج ومأجوج يعني القوم يلي شافهم ذي القرنين جيران يأجوج ومأجوج المهم لما شافهم ذي القرنين لقاهم مايعرفوش يتكلموا من الهم يلي فيهم مساكين وهول الصدمة وفي يلي قالو لانهم جاهلين مايعرفوش يتكلمو المهم قالوله ياذي القرنين ارجوك نديرولك يلي تبيه ونعطوك علي قد ماتبي فلوس دير بيينا وبين قوم يأجوج ومأجوج سد..

وافق ذي القرنين طلبهم وقاللهم تمام مانبي منكم شيء ربي عاطيني علم يغنيني عن مال الدنيا كلها لكن نبيكم تساعدوني يعني بمعنى تجيبولي عمال هما قالوله نبو سد لكن القرآن صححلهم المعلومة وقال ردم والردم أقوى من السد لإن السد يقعد فترة ويتنحى ام الردم يقعد إلى مالا نهاية ..

طلب منهم حديد وجابوله وداروه على هيئة الواح متساوية حطو الألواح الحديدية جنب بعض وبدو ينفخوا في النار عليها لين ولت حمرا لما ولت حمرة جابوا نحاس مذاب وصبوه عليه وهوا سخون ولما تفاعل النحاس مع الحديد دار حاجتين الحاجة الاولى دار ردم قوي جدا وصعب انه يتكسر

والحاجة الثانية خلاه املس يعني يتزلحق صعب جدا حد يتسلقه..

ومن هداكا الوقت يأجوج ومأجوج محبوسين في هداكا المكان وخروجهم حيكون من علامات قيام الساعة

كيف حيطلعو باهي؟

طبعا هما حاليا يقال انهم قاعدين يحفرو ويحاولو انهم يطلعو بس في كل مرة يفشلو لعند ماتقترب الساعة يحفر القائد متعهم وهما معاه لين يبانلهم شعاع الشمس فـ يتعبوا و قائدهم يقوللهم خلاص خلوه غدوا نجو نكملوه ان شاءالله فـ ينوضو تاني يوم ويلقوه زي ماهوا ويكملو باقيه ويطلعوا

يقول تعالى : ( فإذا جاء وعد ربي جعلها دكا)

ويطلعوا وقتها من جبال عالية لما تشوفهم نازلين ترعش مع بعضك لا يخلو لا اخضر لا يابس كله ياكلوه في جرت بعض لكن لم يثبت في السنة انهم ياكلو حتى البشر بس يلي موجود في الأرض مش حيخلوه لدرجة ان شوية منهم يوصلو لبحرية طبرية يشربوها كلها يقعدوا مخربين في الدنيا لعند ما الله عز وجل يبعتلهم حشرة اسمها " نغف" تخش ودانهم وتقضي عليهم كلهم

سبحان الله على قوتهم وعلى جبروتهم شوفو نهايتهم كيف..!

ويأجوج ومأجوج كفار وفي النار لا محال كما قال أهل العلم

والعلم عند الله

هذا موضوعنا لليوم قعدت ساعة ونص نكتب فيه نسأل الله أن يكون فادكم ولو بنسبة واحد في المية واعذروني عن أي خطأ املائي يصادفكم

والمراجع يلي خديت منهم تفاسير القرطبي وابن كثير واحاديث صحيح مسلم والبخاري

نلتقي غدوا في موضوع جديد

‏ردد معي الآن :

"ربي أنت المُيسَر ، وأنت المسهل ، سهل أمري ، وحقق مطلبي ، وسخر لي ماهو خير لي."♥️

تخـايل نفسك وانتَ ماشي في الشارع تشوف مخلوق غريب يضرب في الناس على وجوههم وتشوف راجل قدامك مكتوب على جبهته كافر تمشي شوية ثانية تلقى مرا مكتوب على جبهتها مؤمنة بعدين تسمع الناس يلي في الشارع ينادو علي بعض ياكافر تعالى يامؤمن تعالى اساميهم تختفي..!

هذا شني وامتى هذا؟!

هذه دابة حتطلع اخر الزمان
..

شوفو باش ماتتلخبطوش الدابة مش حتطلع الا بعد ماينتهوا العلامات الكبرى كلهم يعني يكون المهدي نازل وحكم الأرض والمسيح الدجال نازل وسيدنا عيسى نازل وقتل المسيح الدجال ويأجوج ومأجوج ولما ينتهوا يأجوج ومأجوج ويموتو كلهم ويولو جثث الأرض حتبدا اطلع في ريحة عفنة حشاكم فـ الله عز وجل ينزل مطر تقضي ع الريحة بعد مايموتوا وينتهوا وقتها سيدنا عيسى حيحكم الأرض وحيقعد فيها 40 سنين وحتكون الأرض كلها خيرات وعدل بعدها حيموت سيدنا عيسى ولما يموت حينتشر الضلال تاني حيعبدوا الناس الأصنام ويبتعدوا عن الله وقتها الله عز وجل حيرفع المصاحف يعني وقتها الناس خلاص معش يعرفو شيء اسمه قرآن لدرجة ان حتى حافظين كتاب الله عز وجل حيتوفاهم العصر حيولي عصر جاهلية اغلب الناس حينسو الله وعبادته وحيقولو بين بعض مستحيل يكون في يوم قيامة في الوقت هذا شن بيصير؟؟؟

" حتطلعلهم دابة "
أول شيء معنى كلمة دابة اي شيء يمشي على الأرض وطبعا العلماء اختلفوا في تحديدها في يلي قالو انها من فصيلة ناقة صالح وفي يلي قالو انها ثعبان وفي يلي قالو انسان المهم الموثوق ان شكلها يخوف هلبا وفيها شعر ولما بتطلع شكلها حيكون غير مألوف يعني بمعنى مخلوق جديد اول مرة نشوفو زيه..

في يلي يقول راسها راس ثور وعيونها عيون خنازير وأذنها اذن فيل ..

الحصيلو ان شن هيا مش معروف ليومنا هذا المهم الدابة هادي حتطلع من الحرم المكي حتتكلم وتقول " ان الناس كانوا بأياتنا لا يوقنون "

طبعا لما تطلع يقال ان في ايدها زي العصاة والخاتم قالو بعض العلماء ان العصاة هادي عصاة سيدنا موسى والخاتم خاتم سيدنا سليمان المهم تجي للكافر تضربه على انفه او راسه تلقائياً ينكتب على جبهته كافر وتجي للمؤمن كذالك ويكتب في جبهته مؤمن تعرفو لدرجة وقتها الناس معش ينادو علي بعض بأساميهم لالا يبدو ينادو ياكافر يامؤمن لدرجة يعني الناس وقتها تعرف مصيرها هل حتخش النار ام الجنة

ويقال أيضاً لما تطلع تجي للمؤمنين وتحط ايدها على راسهم فـ رأسهم تلقائياً حيشع نور وهذه ادل على علامة إيمانهم وتجي للكفار تضربهم ع انفهم فيظلم وجوههم يعني وجوههم تولي سودة ..

بعد هذا كله الدابة تختفي في لمح البصر وفي اللحظة هادي تقيم الساعة على طول..

انتهينا من موضوع الدابة وحنخشو غدوا في موضوع جديد بإذن الله ❤️

المراجع يلي واخدة منها كلامي فوق هيا 👇

القرآن الكريم, سورة النمل, الآية 82.
تفسير ابن كثير
تفسير القرطبي
صحيح البخاري

- ﴿إِنَّ اللَّهَ وَمَلائِكَتَهُ يُصَلّونَ عَلَى النَّبِيِّ﴾ .
- سورة: الأحزاب .

-