لە لای بێگانە گەر تاڵە، ئەگەر ترشە عیتابی تۆ
بە وەڵڵا ئاشنای قەهرت بە قەندی بەندەری نادا

•ئەدەب•

خۆزگە چڵە موویەکی سەری بام و وەریبام!
کەوتبامە بەری دەستی و مەستی نەزەری بام

•هەڵۆ•

لە من بەدتر دەبی زاهید! ئەگەر تۆش
شەرابی دەستی مەحبووبەی بنۆشی :)

•کوردی•

کەس نەزانێ من بە چی مەستم، ئەتۆ خۆ شارەزای
دەردی من با کەس نەزانێ، تۆ لەگەڵ خەڵکی جودای...

•هێدی•

کە ڕۆحم تێ گەیی تۆ حەز بە دەرچوونی دەکەی، دەرچوو!
دەبێ عاشق کە دی بێزارە یاری، بێ "بڕۆ" بڕوا

•مەحوی•

ئەگەر تۆ نوستبێیت و
سەر و قژت بێناز
كەوتبێتە ژێر سەرینەكەت
ئینجا سەرمات بێت و کەسیش نەبێت داتپۆشێ
تۆ خەون بە چییەوە دەبینی؟
ئەگەر تۆ نوستبێیت و
من حەز بکەم قوربانت بم
بێم بە دیارتەوە، وەک فرێشتەیەکی داڵدەدەر
تا بەیانی پاسەوانت بم
جارجاریش بێم نەرم نەرم ماچت بکەم
تۆ خەون بە چییەوە دەبینی؟

•فەرهاد پیرباڵ•

تۆ فیراقیشت لە لای من حوکمی نەزدیکیی هەیە
ڕاستە خۆم لێرەم، بە مرگت ڕۆح و دڵ هەر وا لەوێ!

•سالم•

بریا من ئاوێنە بوام خۆت دەگۆڕی لە بەرچاوما...

چاوەکەم! مەغروری هەروا، یان خەتای نازدارییە؟
نازە، وا ئاڵۆزە چاوت، یا لەسەر خوێنخوارییە؟

•قانع•

لە خەیاڵمی کافر!

#دیوارنووس

با وجوودی لێوی شەککەرباری تۆ
بێ‌وجوودە نەشئەبەخشینی شەراب!

•مەحوی•

ئەقڵ و هۆشم داوە پێت، لێشی دەتۆرێی ماڵوێران؟
دەوڵەتێکی مفت و بێساحێبە! بۆچی ناتەوێ؟ :)

•کوردی•

خۆشەویستیم پەیوەندیی بە باشیتەوە نیە!
سبەینێ دووشەمە،
لەبەردەم سجنى "مەحەتە" ببینە،
بە دوو لەتە کەبابى سارد و نانى تیریی بەفرمێسک تەڕکراو و پاکەتێک جگەرەى غەمدانەوە،
پیرەژنێک چاوەڕێى بینینى ئازیزە "بکوژ"ەکەى دەکات.

•تەلعەت تاهیر•

گەر تۆ بمریت
هیچ شتێک دادم نادات
هیچ شتێک ئاوەدانم ناکاتەوە
گەر تۆ بمریت
ناگاتە ئێوارە
دەستم دەچێتە شێعر و
خۆم دەکوژم...

تۆ بووی بە ئیش!
لە هیچ شوێنێک دەستم ناکەویت.

#دیوارنووس

ئەرێ ئەی ئاسکی ناسک! هەتا کەی دەستەمۆ نابی؟
ئەرێ پیرۆزەکەی خۆشفەڕ! هەتا کەی نایە ماڵی من؟

•هێمن•

ئێمە ئێستا گوللەین لە سەری یەکتردا
چەقۆین لە رۆحی یەکتردا
ھەرچۆنێک بڕۆین برینێک دەکولێنینەوە
بۆ ھەر کوێ بچین ئازارێک بە خەبەر دێنین...

•ماردین ئیبراھیم•

ئەو ناوەکی موژگانە بە کل بۆیە دەڕێژێ
ساڕێژی بکا هەر کەڕەتێ چوو بە برینا

•حەمدی•