خەوم بینی،
من ھەور بووم و تۆ تینوو بووی
تک تک ئەتکامە گەرووی تامەزرۆی تەمتەوە
خەوم بینی،
بووم بە خۆر و
ڕژامە ناو دارستانی پەرچەمتەوە...

•لەتیف هەڵمەت•

بە دەنگە خۆشەكەت گوتت: دەڕۆم.
لەو كچە جوانانە دەچوویت
لە دەرمانخانەدا
بە خەندەیەكی شیرینەوە
شرووبێكی تاڵت دەدەنێ.

•تەلعەت تاهیر •

ئەرێ خەندەی دەمت ئارامی دڵ، کانیی حەیاتی من!
لەسەر چی زیز دەبی؟ ڕۆحت دەوێ؟ هانێ حەیاتی من! :)

•وەفایی•

بە غەیرەز میهری تۆ، گەر بێ لە دڵما
زڕەی زنجیری زاڵم بێ لە ملما

•سالم•

ئەگەر بەیانی
دووهێندەی ئەمڕۆ خۆشم نەویستی،
بە هەموان بڵێ:
من پەڵەیەکی ڕەشم
بە نێوچاوانی عیشقەوە...

•شوان سەعید•

هەر خۆشییەک لەبەر ئەکەم
یان قۆڵەکانی درێژە
یاخود کورتە
یاخود فشە
یاخود تەنگە بە بەری من
هەر "خەم"ێکیش لەبەر ئەکەم
ڕێک ئەڵێی بۆ من کراوە
لە هەر کوێ بم!

•شێرکۆ بێکەس•

لەبەر تیری موژەی بێ مروەتی ئەو شۆخە نەخشینە
لە هەرجێ دەنگی یا تەڵقینە، یا یاسینە، یا شینە :)

•ناری•

ماچی لێوت ئەو دەمه خۆشه که دێیه پێکەنین
خوش بُوَد گل بشکفد، بلبل شود زو کامیاب

•وەفایی•

بە مەولا گەر لەمەولا
دڵ بە قوربانت نەبێ، نابێ

•ناری•

لە لای بێگانە گەر تاڵە، ئەگەر ترشە عیتابی تۆ
بە وەڵڵا ئاشنای قەهرت بە قەندی بەندەری نادا

•ئەدەب•

خۆزگە چڵە موویەکی سەری بام و وەریبام!
کەوتبامە بەری دەستی و مەستی نەزەری بام

•هەڵۆ•

لە من بەدتر دەبی زاهید! ئەگەر تۆش
شەرابی دەستی مەحبووبەی بنۆشی :)

•کوردی•

کەس نەزانێ من بە چی مەستم، ئەتۆ خۆ شارەزای
دەردی من با کەس نەزانێ، تۆ لەگەڵ خەڵکی جودای...

•هێدی•

کە ڕۆحم تێ گەیی تۆ حەز بە دەرچوونی دەکەی، دەرچوو!
دەبێ عاشق کە دی بێزارە یاری، بێ "بڕۆ" بڕوا

•مەحوی•

ئەگەر تۆ نوستبێیت و
سەر و قژت بێناز
كەوتبێتە ژێر سەرینەكەت
ئینجا سەرمات بێت و کەسیش نەبێت داتپۆشێ
تۆ خەون بە چییەوە دەبینی؟
ئەگەر تۆ نوستبێیت و
من حەز بکەم قوربانت بم
بێم بە دیارتەوە، وەک فرێشتەیەکی داڵدەدەر
تا بەیانی پاسەوانت بم
جارجاریش بێم نەرم نەرم ماچت بکەم
تۆ خەون بە چییەوە دەبینی؟

•فەرهاد پیرباڵ•

تۆ فیراقیشت لە لای من حوکمی نەزدیکیی هەیە
ڕاستە خۆم لێرەم، بە مرگت ڕۆح و دڵ هەر وا لەوێ!

•سالم•

بریا من ئاوێنە بوام خۆت دەگۆڕی لە بەرچاوما...

چاوەکەم! مەغروری هەروا، یان خەتای نازدارییە؟
نازە، وا ئاڵۆزە چاوت، یا لەسەر خوێنخوارییە؟

•قانع•

لە خەیاڵمی کافر!

#دیوارنووس