مأسات       شافت عيني
مأسات       طول سنيني
.............

احنه العتره احنه وموضع الرحمه
علينه الباري انزل حكمته وعلمه
دينه الباري عدنه وعدنه سر اسمه
كل معصوم املاك السمه تخدمه
ليش بلاذنب ظلمتنه هالأمه
حين بكربله حسين انسفك دمه

هيهات       نقبل بالذل
هيهات        ما نتبدّل
.................

علي السجاد اني ودمعتي بعيني
عن سيرة حياتي اقروا وسنيني
اقروا بكربله وبس هاي تكفيني
شصار بحالي لمن ذبحو حسيني
ايام السبي وجمرتها تچويني
وحال ام الخدر اكثر يأذّيني

آلام         ما انساها
آلام        عشت وياها
.............

كلما اذكر ايام السبي المُرّه
اون ونحب على زينب الف مرّه
زينب عمّتي بت فاطمه الزهره
تروح عله الهزل ياوسفه متيسره
وراس حسين اخوها بعينها تنظره
تنوح بلايه صوت وتسچب العبره

ويلاه      عالمسبيه
ويلاه      زينب هيه
..........

تنشدوني عله حالي لا تنشدوني
أنه السجاد حگي ولا تلوموني
اريد ابچي لحد ما توگع جفوني
شفت ام الخدر مسبيّه بعيوني
أنه وعمتي بحبل واحد يچتفوني
عليل وبيد اميّة المايرحموني

مجروح        گلبي تعذّب
مجروح        ابچي لزينب
............

تمنّيت المنيه وي ابواليمّه
ريت الخيل داست جسمي مو جسمه
ولا ابقه واشوف الناس ملتمّه
عله عياله يويلي وحرگوا خيمّه
انسه شلون ابويه ومصرعه ودمّه
حياتي بدونه صارت موحشه وظلمه

ياموت       بالطف رتك
ياموت       ارحم شفتك

سيد زيد الفحام
____

نزلة / للإمام السجاد عليه السلام


عايش باحزانه          والدمع عنوانه
.................

قصّة السجاد صعبه تفجع اليقراها
بس دمع وجروح بيها والحزن معناها
تبتدي بالغاضريه من شهد بلواها
عمره مانشفت دمعته ولاگدر ينساها
كربله بلسانه        والدمع عنوانه
................

ياعليل الشاف اهله عالترب مذبوحه
بس علي السجاد هذا والمصيبه بروحه
حگه لو يبچي عليهم ما نلومه بنوحه
راس ابوه عالرمح شافه دم تسيل جروحه
عالترب جثمانه.        والدمع عنوانه
..................

اعظم وافجع مصيبه عالامام الصابر
من خذوا زينب سبيه بلا محامي وناصر
ينظر السجاد زينب عالمصيبه تكابر
بالمرض مهدوم حيله وي خواته مسافر
چتفوه عدوانه.         والدمع عنوانه
...................

واجب نذكره يشيعه نلتزم منهاجه
منهج السجاد عدنه كل وكت نحتاجه
وارث الهادي مُحمّد هوه لابس تاجه
لو نخينه الباري بسِمه الله يگضي الحاجه
ميّت ويرعانه.          والدمع عنوانه
...............

خلّص ايّامه مناحه والشهود ادموعه
يبچي عالمرضوض جسمه کسّروها ضلوعه
حفرت خدوده المدامع عالوجه مطبوعه
حالة السجاد هايه لوعه تتبع لوعه
واسع باحسانه         والدمع عنوانه
...................

ويلي من سمّوا دليله گطّعوا احشائه
من بعد كل المصايب سمّموه اعدائه
شيّعوه مسموم ويلي للگبر ابنائه
واجب نقيم العزاء انشارك بأحيائه
نبتغي رضوانه.        والدمع عنوانه

سيد زيد الفحام
___

ابو حمزه الثمالي ... خذت حيلي الليالي
بعدها اكَبال عيني ... افاركَ غالي غالي
مصيبتنه جبيره ...اسيره اتجر اسيره
اليفكَد واحد اتهون ... وأنه الفاكَد عشيره
كل حيلي ...راح من شفت الخيم حركَوهه
كل حيلي ...راح حين ام الخدر شتموهه
كل حيلي .. نهدم وي سكنه لمن ضربوهه
ـــــــــــــ
أنه المالذ شرابي ... بعد أعرف عذابي
لون كون الله كلّه ... فلا يحمل مصابي
المهر من ردلي خالي ...احير بوصفه حالي
ردت الحكَ عالحسين ... شمكَوم اعثر شجالي
سنديني ...صحت ياعمه ارد اشوف احسيني
سنديني ...غبره حالت بين اخوج وبيني
سنديني ...راسي لو شيّب حزن عذريني
ـــــــــــــــــ
جرح طف حزني عشته ...هظم بكَليبي شلته
الماي شما اشربه ... بدموعي مزجته
الشام شخلّه بيّه .... راواني المنيّه
تبجي الهه السماوات ... بس محنة رقيه
دمعاتي ...تحجي الك عظم الجره اعله الخدّر
دمعاتي ... تخبرك أوجوه انتهت من الحر
دمعاتي ...على طفله ماتت اعله المنحر
ــــــــــــــــــــ
والشاهد عليّه ... هاك انظر اديّه
نجرحن من الاحبال ...مثل اختي رقيه
والاصعب علينا ...بسوك الذل مشينه
من شدّة نظرهم .... للخدر خُزينا
خلّوني ... ميت موته آنه اموت بهايه
خلوني ...مجلس ايزيد ادخله بلا رايه
خلوني ...يبيد حيلي شما سمعت احجايه
ـــــــــــــ


شسولفك مصايب ... دليلي منهه ذايب
البيهن وصّى الله ... نامن بالخرايب
التاكل من ادينه .... تتصدّق علينه
دنيه بلايه رحمه ... آل الله انسبينه
هضموني ...سوكَ بي شمات من دخلونه
هظموني ...سرعه نمشي ونعثر يخلّونه
هظموني ...ياثمالي بالحجر شمرونه
ـــــــــــــــــــــ
الشاعر  محمد حسن ضيغم

راسك ضل يمشي وياهن
يحسين وما عافاهن
بدروب الشام
شفت حته بسبيهن
يحن كلبك عليهن
بدروب الشام
**
لمن صعدن اعله النوگ.  والحداي صاحاهن
راسك ما قبل يحسين.  اله يمشي وياهن
اشلون بحبل مجتوفات.   وصوط الشمر اذاهن
موش امن الحبل يحسين. ثاري الفشل بجاهن

تعبهن ليل الكوفه
كل عيالك مجتوفه
عاين همهن

يريدنك تجيهن
يحن كلبك عليهن
****
يمدلل خواتك ليش.  حته محبسك مبيوك
راس مخدرات شاب.  مو مالت يصعدن نوگ
گلي بيا وكت زينب.  يتفرج عليها السوگ
الاگ الهم خذوه يحسين.  وبالطف شمرو المحروگ

تدري اخيامك حركوها
وطفالك ما رحموها
يوم العاشر

كثر عگبك بجيهن
يحن كلبك عليهن
**
فوگ النوك مسبيات.  وكل حرمه بحزن تنشد
وزينب تلفت وتصيح.  يبن امي انولينه اكعد
وحده بسد الاخره تلوذ.   وما ضلت زلم وتهد
وكل ساع الشمر يحسين.  ياخذ روسكم ويرد

ومرعوبه تشوف ايتامك
ويضرب زينب كدامك
يابو الغيره

الحبل كطع اديهن
يحن كلبك عليهن
*
زينب من بعد عباس.  تاليها بخرابه اتبات
شو ياهو التلزمه يصيح.   عباسج يزينب مات
ما تخلص مصايبها وتجري اعله الخد الدمعات
يحسين ابشط امن السيف.  بغيابك حجي الشمات

تكتل جلمت مسبيه
اتون يم رمحك يوميه
وتمسح دمك

العذاب اشخله بيهن
يحن كلبك عليهن
*
طبن للقصر يحسين.  وتهظم طبت الديوان
والشامت يصيح بصوت.  زينب ماكو عدها اخوان
بيده الخيزران ايزيد.   ويضرب راسك وفرحان
وكل ساع الشمر يحسين.   يتهدد عله النسوان

ضلت محتاره العيله
والسجاد نهد حيله
الله ايعينه
يروحن يم وليهن
ويحن كلبك عليهن
**
تمت
تحسين الخفاجي

قصيدة في شهادة الإمام زين العابدين عليه السلام  ..
ـــــــــــــــــــــــــــــــــــــــــــــــــــــــــــــــ


آنه العِليل الما رَحَمني ٱزماني
ذِبحَـوا أبوي بكــربله وخواني

ـــــــــــــــــــــــــــــــــــــــــــــــــــــــــــــــ

شِفتِ المصـــايب يا خَلَـگ بعــيوني
حِرگــوا خِـيَـمنا وبالحَــبِل چتفـوني
شِتمــوهَا عَمْــتي وَانَه هَم شِـتموني
ماعندي حَـيل ٱمنِ المَرَض شافـوني

بهاي اليِتامى والحَرَم حِرت آني
ذِبحَـــــوا أبوي بكربله وخـواني
ـــــــــــــــــــــــــــــــــــــــــــــــــــــــــــــــ

آنه العِــليل وحــــايِر بهالــــعَيلة
مفزوعة الٱطفال ودَمعها ٱتسِيلَه
وَيّ الرباب ورَمـلة ناحَـت لِيـــلة
وزيـنب تِگِلّي جابَـوا الهِــــــزيلَة

مَيّت يَرَيت ولا شِفِت عَساني
ذِبحَـوا أبوي بكربله وخواني

ـــــــــــــــــــــــــــــــــــــــــــــــــــــــــــــــ

شِفتِ المرار بسَفرتي الأليمة
رِحلَة عذاب ونايبة وهِضيمة
ضِربَوا رُقَيّة وسكِينة اليَتيمة
أحقاد أُمَــيّة مدفونة وقديمة

والجَدّة هِنـدَة والنّهَج سُفياني
ذِبحَـوا أبوي بكربله وخواني

ـــــــــــــــــــــــــــــــــــــــــــــــــــــــــــــــ

لَرضِ الغُـرُب لَمّن وُصَـل ظعَنّه
شِفنـه النواصِـب كِلها تِنتِظُرنَه
وادِمهه بِحجـارَة حِقِــد رِمَتـنَه
ماكوعَشـيرة النّغـرَت وحِمَـتنَه

كِل هذا وَانَه ٱمحزّم بإيماني
ذِبحَوا أبوي بكربله وخواني

ـــــــــــــــــــــــــــــــــــــــــــــــــــــــــــــــ

لمَجلِــس يزيد الطاغية وَدّونَه
يِنفي الرسالة والوَحِي بظنونَه
بنَظرَة شِـماتَة اليَمّـه يِنظِرونَـه
سَبّ الزچية الطـاهرة وأُبـونَـه

وَانَه الحديد برُگبتي وأدماني
ذِبحَـوا أبوي بكـربله وخواني

ـــــــــــــــــــــــــــــــــــــــــــــــــــــــــــــــ

بِتنــاهَه ذيــچ الليــلة بالخــرابـة
دَلّالـــي يِــنزف مِن كِـثُـر عـذابَـه
طفلة ويَتيمة ٱتصيح أريدَن بابـه
شــافَت أبـوها ومِــن بَـعَـد غِيابَه

موقِفها فَجّر حَسرِتي وبَچّاني
ذِبحَـوا أبوي بكـربله وخواني

ـــــــــــــــــــــــــــــــــــــــــــــــــــــــــــــــ

گضّيتَه عُمري ما نِسيت الـعاشِر
دمــعي أبـد ما فــارَگ المَحـاجِر
مِن عَملَةِ الطّف گلبي لَسّه شاجِر
بَس هُوّه عاش وماتت الضّـمايِر

زَين العِباد آنه الحِزِن عِنواني
ذِبحَـوا أبوي بكربله وخـواني

ـــــــــــــــــــــــــــــــــــــــــــــــــــــــــــــــ

خِلصَت حَياتي الهَم يِدولِب بِيّة
كِـــل لِيلة أنصُـب بالـحِزِن عَزِيّة
تالـي الســموم بكِل عِرِگ سِـرِيّة
للبــاري أمشـي والنّفِس مَرضِـيّة

يا شيعة ٱذكروا ٱمصيبتي وأحزاني
ذِبحَـــوا أبوي بكـــربله وخـــــواني

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

نعي للإمام السجاد عليه السلام   ، لسان حاله يقول:

ـــــــــــــــــــــــــــــــــــــــــــــ

على النوگ الهزيلة صَعّدوني ٱعداي

عليل ومن رگبتي وإيدي سال ٱدماي

يَشيعة وعمّتي زينب مِشت  ويّاي

تَركنا حسين عاري وما شَرَب أي  ماي
ــــــــــــــــــــــــــــــــــــــــــــــ

أوِنّن وَنّة الفِگدت ضَناهَه
ولا بَطّل على الراحو نِعاهَه
نهار وليل ما هَوّد  شَجاهَه
تِهِدّ اجبال عملة كربلاهه

ـــــــــــــــــــــــــــــــــــــــ

أصِد عمّاتي صِعدَن عالهِزايِل
وشوف أطفال مچتوفة بحَبايل
وَصِد الروس شالتهه العَواسِل
وچثيرَة أحداث جِهلَتهه المَقاتِل

ـــــــــــــــــــــــــــــــــــــــــــــ

ابّلاد أجناب والوادم غِريبة
وتِصِد نظرات للحُرّة النجيبة
بحِزن والعَين بالمَدمَع سِچيبة
تِصيح منين إبن أمي أجيبة

ـــــــــــــــــــــــــــــــــــــــــــ

بلاد  الشام  ما  خلّت  عَلينه
حَچي الموخوش منهم سامعينه
وأبو الحسنين كِلسا شاتِمينه
ولونه وكل شَهِم راح امنِدينه

ــــــــــــــــــــــــــــــــــــــــــــــــ


وسافة انبات كلحنه بخرابة
وتِوسّدنه  بألم  ذيچ  الترابة
رقية اتصيح چا وينك يبابـا
گالو هاچ راس إبن النجابة

ــــــــــــــــــــــــــــــــــــــــــــ

جابوا راس ابوهه وحضنت الراس

صاحت وين جسمك يابو الاحساس

عگبهه ارقية سكتت بيهه الانفاس

زينب صاحت الحگني  يعباس

ـــــــــــــــــــــــــــــــــــــــــــــــ

عِشِت أيام مالومة وعصيبة
مريض  وحار  بالعِلّة  طبيبه
عِليل وصار  بالمَهجَر  حَبيبه
مِتِت ياناس بسموم المصيبة

ـــــــــــــــــــــــــــــــــــــــــــــ


بقلم الأستاذ /ستار عذاب الحچامي  .

أبو ذيات للإمام السجاد عليه السلام  ...
ــــــــــــــــــــــــــــــــــــــــــــــــــــــــــــــ

حَزين وما يضوگ النوم  سَجّاد
وفُرَش عَينَه لصلاة الليل سِجّاد
عِمَت عَيني على المعلول سَجّاد
يِوِن صُبح ومِسه علَحسين إبَيّه

ــــــــــــــــــــــــــــــــــــــــــــــــــــــ

عِليل ودَمعه لا هَوّد   ولاچَن
الحِزِن نِيبانَه عَضّنّه   ولاچَن
يِگلّه  يا  دَهَر بَسّك    ولاچَن
خَذِت كل أهلي والغالي عليّه

ـــــــــــــــــــــــــــــــــــــــــــــــــــــــــــــ

عِليل وما شِفِت رَاحَة        وَرَاكُم
اموتَن يَمتى يَحبابي          وَرَاكُم
على ظهري الحِزِن جاثي    وَرَاكُم
وعلى فرگاكم اعيوني  جِرِيّة

ــــــــــــــــــــــــــــــــــــــــــــــــــــ

بحار الماحُوَت دمعي   ولا أنهار
ولا ليل السّكَت وَنّي    ولا نهار
اذكرنّه الحِصَل بالطّف  ولا انهار
عجيبة وتبقى روح ادّور بيّة

ــــــــــــــــــــــــــــــــــــــــــــ

يِرِدّه  لكربله  الدلّال      وِن تاه
يبَچّي الصخر لو تِنسِمع  وَنتاه
صِدِگ اشرَب لذيذ الماي  وِنتاه
تموت من العطش يبن الزچية
ـــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي.

قصيدة بلسان حال الإمام السجاد عليه السلام  ،،،،،

ــــــــــــــــــــــــــــــــــــــــــــــــــــــــــــ

ساعة الهِجمَوا  يشيعة  عالمخيم
أنظر وما بيدي حيلة  بيمن اهتم

بالابو الماظل إله بهالمحنة ناصر
لو  أحيــرن   باليتامة   والحراير

والله حيرة              والله حيرة 

"" "" "" "" "" "" "" "" "" "" "" "" "" "" "" ""

عيني شافت كلشي يوم الغاضرية
شفت الأجـــساد التطيح عللوطية
شفت الأكــبر عالارض جثته رمية
وشفت جـــاسم سابح بدم المنية

والمصـــاب  الألّمـــاني  ها  يشيعه
شفت ابوي بچفه يرمي دم رضيعه

للعقيلة ياخذه لو لَـمّه  حاير
لو أحيرن باليتامة والحراير

والله حيرة          والله حيرة

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

آنه  لمن شفت ابوي إيده علظهـره
وعينه تنظر عالشريعة وبيهه عبره
وعَمّـتي موقــفهه ما أكدر أصَـوره
أيقنت چف الگمر گطـعوهه غـدره

صاحت أنت واعدتني يابو فاضل
شردجــاوب  هالــيتامة  والأرامل

كل چبد من العطش كالجمرة صاير
لو  أحيــرن   باليتـــامة  والحــراير

والله حيرة        والله حيرة 

,ــــــــــــــــــــــــــــــــــــــــــــــــــــــــــــــ

شــفت ابــوي لوحده بنص الجحافل
وصه زيــنب بالعيال ودمــعه ســايل
ديــري  بالــچ  عالعــليل  وآنه  راحل
وصفگت الچفين صاحت يا بو فاضل

وداعة الله يابو الأكبر   الله إلنه
ما يضيع بسده واحد   هو أملنه

وانه أسمع هالحديث وگلبي شاجر
لو  أحــيرن  باليــتامة   والحــراير

والله حيرة            والله حيرة 



///////////////////////////////////////////

صار  ابوي  بلا  سند  محّد  ينــصره
موقف يفت  الصـخر  والله ويفسره
شفت ابن طه الشمر جاثي علصدره
وثنعـش طبرة يطبره  وحزله  نحره

والعقيلة صاحت الحگ   يا علينه
ذبحوا  اخوتنه  وزلمنه    ونولينه

بس نساوين وتِحف بينه المخاطر
لو  أحــيرن   باليـتامة   والـحراير 

والله  حيرة              والله حيرة 

«««««««««»»»»»««««»»»»««««»»»»

عيوني شافت عَمْتي زينب شَتّموهه
ونـظـر  النــوگ  الهــزيلة  حضّروهه
والأشــد  يا  شــيعة  لمّن  چتـفوهه
من  يِحــسّب  زيـنب الحرة  سِبوهه


وانه يا شيعة بسلاسل گيدوني
من الألم لمّن ألوجَن  يشتموني

صِرت أصبّر بالفواطم وانه صابر
لو  أحـيرن   باليـتامة   والحراير 

والله حيرة             والله حيرة 

ــــــــــــــــــــــــــــــــــــــــــــــــــــ

خَلّـصِـت  يا  شيعة  بالأحـزان  عُمري
عالگضوا يوم الطفوف دموعي تِجري
مِن  معاناتي  الطــويلة  شاب  صَبري
وبقَدَر  حَجم  المَــشَقّة  صــار  أجري

والغَريبة لَسّة عايِش گلبـي يِنبُض
ما يِفارگ بالي عَمتِي وهِيّة تِركُض

مو دَمِع دَم يِحفِر بنِصّ المَحاجِر
لو أحيــرن  باليــتامه  والحرايِر


والله حِيرَة             والله حِيرَة

ـــــــــــــــــــــــــــــــــــــــــــــــــــــــ


الأستاذ /ستار عذاب الحچامي  .

كعديه زينب ومسيرها للشام
على وزن ايام ايام





ياحال ياحال زينب هسه ياحال
تبجي بهضم دمعتها
من عافوها اخوتها
زينب هسه ياحال
١

ياهضم زينب الليله
وياجرح دمع المصيبه
بعد ليل الغاضريه هسه ياحال الحبيبه
ايساعد الله كلب زينب والكلب شاجر لهيبه

اخوتها صرعه اعله الثره
عالكاع كلها اموذره
وعباس سبع الگنطره
عافها وصارت غريبه

بدموع بدموع تنحب هسه بدموع

تبجي وكلها سمعتها
من عافوها اخوتها
زينب هسه ياحال

٢

طلعو ضعن السبايه ومشو عن الغاضريه
زينب بيا حال صارت اخت عباس الآبيه
امجتفه بحبال زينب سكنه وياها ورقيه

امجتف بأصعب سلسله
من طلعوه من كربله
السجاد وي العايله
بحبل جتفوهم سويه

أيتام ايتام
زينب وي الايتام

تبجي بهضم غربتها
من عافوها اخوتها
زينب هسه ياحال
٣

وصلو الكوفه بغرابه وطبو السوك المدامع
هذا يضرب هذا يشتم هذا عالعيله يباوع
القاصي والداني يوسفه كام بعيونه يطالع

بالسوك حيل اتأثرت
بالممشه زينب دنگت
بطبة السوك اتألمت
زينب ومشي الشوارع

ماجان ماجان
زينب تمشي ماجان

هسه بسوك مشيتها
من عافوها اخوتها
زينب هسه ياحال
٤

طلعت من الكوفه راحت بالضعن تمشي اسيره
زينب امدلله جانت اخت عباس وأميره
هسه والشام النواصب هل ضعن اصبح مصيره

طبت الشام بيا وضع
متحيره وتجري الدمع
مهشوم عدها جم ضلع
والنظر المن تديره

بالشام بالشام
زينب طبت الشام


وأهل الشام شافتها
من عافوها اخوتها
زينب هسه ياحال


المصيبه


زينب بدمع النواظر طبت ومجتوفه اديها
بالدمع والحيره حيره
صارت ومامش وليها
بعد اخوها حسين كامت تنظر بلحظة سبيها


زينب تون متألمه
تبجي وتعاين للسمه
بت حيدر وبت فاطمه

ياهضمها وياعذابه هيجي تالي يصير بيها




لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

كعديه للسيده رقيه



عمتي اتناديني
يارقيه
والدموع بعيني
يارقيه
راس ابويه العالي
عالرمح يبرالي
يارقيه
١

طلعت بليل المواجع طفله من الغاضريه
تمشي مره اتطيح مره بالضعن راحت سبيه
وي الرمح من تمشي تحجي
بابا بابا صد عليه

تمشي بضعن بي جم طفل
واتنادي بدموع التهل
محد يفك بويه الحبل
والحبل جرح أديه

محد ايحاجيني يادمعتي
والجمر يجويني يادمعتي

والعزيز الغالي
عالرمح يبرالي
يارقيه
٢

عالرمح تنظر رقيه راس ابوها اتشوفه دمعه
اتريد تتقرب لبوها اتحصل من الشمر دفعه
عالبعد وتنادي بابا اتمنت ايرد وتسمعه

مشوها بدروب اليسر
ماتحمل ازغيرة عمر
بالدرب تعبها الشمر
من الضرب تنحب وتنعه

والشمر ياذيني ياهضمتي
أمشي ميخليني ياهضمتي

من اصد للوالي
عالرمح يبرالي
يارقيه
٣

وصلت الشام النوايب من الضرب ازرك متنها
التعب ماخذها رقيه بالخرابه وجان ضنها
من تنام بحضن دافي حسين بس يترس حضنها

متعوبه من طول السفر
نامت وتشعر بالخطر
وياها ابوها ماحضر
وهالخبر زيد حزنها

ما أضن ناسيني يالهفتي
خطوه بينه وبيني يالهفتي

يدري ابويه بحالي
عالرمح يبرالي
يارقيه
٤

نامت بنص الخرابه وزينب اتعاين عليها
السفر تعبها وهضمها طفله محروكات اديها
فزت من النوم تبجي يحضر ورادت وليها

مهضومه بدموع الحزن
والشوفت الوالد تحن
بالمدمع وضلت تون
زينب وتسأل اشبيها

يارقيه اشكيلي يالحبيبه
شرايده احجيلي يالحبيبه

العايش بنص بالي
عالرمح يبرالي
يارقيه
٥

بين لحظات الموادع جانت واصعب مسيه
بين راس وبين دمعه تنظر احتارت رقيه
افتح عيونك اشوفك وانته هم عاين عليه

ماجاوب الراس وبجت
شهكت رقيه وماحجت
ماتت بعد متحملت
بعد لوعات وأذيه

نادت وسمعوها ياعذابي
بالغرب دفنوها ياعذابي

ينزل وحسبالي
عالرمح يبرالي
يارقيه


المصيبه

بين نار وبين حيره زينب وهلت دمعها
تنظر اتعاين رقيه من الضرب ازرك ضلعها
بصوت عالي اتصيح ماتت حست الراس وسمعها

دفنتها زينب بالغرب
منظر دفن منظر صعب
بالغربه ويفت الكلب
يلي تسأل عن رقيه هاي قصتها ودفنها





لاتنسون والدي ووالدتي وأبني عباس من الرحمه والمغفره خادمكم رياض الرسل الجابري

قصيده بحق رقيه (ع)




عمه زينب بالدمع صاحت رقيه
بنار دخان الخيم محتركه اديه
شحجي والموقف صعب
ورم امتوني الضرب
صاحت رقيه

========

عمه زينب ماشفت كلشي بحياتي
ازغيره بس من العطش يبست لهاتي
الخيمه حرگوها وطلعت انه وخواتي
اركض ونار الخيم حرگت عباتي

ازغيره ما أحمل ضرب واثنين اديه
امچويات من الخيم بالغاضريه
ليش شمسويه ذنب
ورم امتوني الضرب
صاحت رقيه

---------

عمه ليش الخيم حرگوها علينه
وليش بالهيمه يعمه امطلعينه
ناس ماعدهم رحم وامچتفينه
اچبير عمه الحبل وازغيرات ادينه

ترفه أدينه وابد ماتتحمل احبال
ليش شمسوين ويروعوها الاطفال
حارمينه من العذب
ورم امتوني الضرب
صاحت رقيه

----------


ازغيره مو مالت درب لا صعدت النوگ
گوه صعدوني يعمه وثوبي محروگ
انه بنت حسين هاي اعليه متلوگ
عالزلم مكشوفه عمه وطبت السوگ

الناس من طبينه تتفرج علينه
وين عمي الجابنه من المدينه
بسوگ من بعده اطب
ورم امتوني الضرب
صاحت رقيه



طفله ما أحمل ركض بين الضحايه
اعثرت چم مره يعمه بالعبايه
ليش ياعمه الشمر يركض ورايه
أيده مدها اعله التراچي وگال هايه

عالوجه عمه طحت مشدوه بالي
تمشي وين المثلي والماعدها والي
طحت فوگ اعله الترب
ورم امتوني الضرب
صاحت رقيه

---------


سافرت وي الحرم والممشه دمعه
بين دفعه ودفعه من الشمر دفعه
كل طريق الشام أبچي وجبته أنعه
والشمر ضربـو رقيه چنت اسمعه

راس ابويه بالطشت جابو أليه
متت لمن شاهدت طشت المنيه
ما تحملها الگلب
ورم امتوني الضرب
صاحت رقيه








لاتنسون والدي ووالدتي وابني عباس من الرحمه والمغفره
خادمكم رياض الرسل الجابري