نعي عبدالله الرضيع

عاالناگه من ابعيد الوليك
مجبوره راح امشي واخليك
ليه التفت امك وحاچيك
يابعد عيني اشبيك مابيك
اتمنيت كون انزل واغطيك
وگابلك مگبل وناغيك
**
ليش المهد خالي تركته
يزغير گلب امك كسرته
من بين اديه تروح سكته
چا والسهر ذاك السهرته
**

الگلب زيدت همه  ماهونته
ون ونه ثكيله ماهونته
اجي للمهد لكن ماهونته
اهزنه ويرد فارغ عليه

سعدالعبودي

ابوذيات الليله العاشره

الليله للوداع التم ....        شملهم
ابعباته احسين كل اهله .. شملهم
واحد واحد اعياله .....     شملهم
وشبگ ابنه الطفل . ويحب رقيه

زينب يا گلبها الصبر ...    گل بي
تگله احسين مو گطّعت .. گلبي
يگلها جسمي خويه الظهر .. گلبيه
واذا سالم كتر عتبي عليه ..

تگلها حچيك الروحي ... يلمها
باچر زينبك منهو .......  يلمها
روحي لو گضت محد .. يلمها
اذا باچر شمر حارس عليه ...

واتگول

العمر گضيته بس ابهم .. بعد  هم
اخوتي اشلون ياروحي .. بعدهم
الشمر والموت  لو عني ...بعدهم
اروح الوين . من ينغر عليه ...

ابو فاطمة الطائي

احنه خدام عشگنه احنه خدام
******
مثل عابس كلنه ننجن .....
..والعشك بينه تسودن......
.................حسين علمنه الغرام

احنه  نتنفس  مجالس..
...صرنه للعالم مدارس
............. ...مركز الحب والهيام

امنين   ما  تلكانه  ديره......
حسين خيمتنه الچبيره
...............واجب ايكون احترام

انشد الاحزام.....وفانه انشد الاحزام
احنه خدام........ عشگنه احنه خدام
*******
اشما تلوم الناس بينه
خدم والرايه ..ابدينه..
................اشما تكول المغرضه

بحر    حبك  صار مرسه
مثل فجر امتاني شمسه
..................شفنه شوك الرافضه

من هوانه.......الله شاهد
برسمه مجنونه القصايد
.....................رايه دكت بالفضه

نرفع اعلام......جرحنه نرفع اعلام
احنه خدام ...عشگنه احنه خدام
*******
الله  خله  بكل   عزيه
تحضر الزهره الزجيه
................تحسب شگد الخدم

تنطني   للمؤمن علامه
هاك اخذ صك السلامه
..................هيه دستور  القيم 

والصدك  شيعي  يتمنه
كون راضي حسين عنه
..............بيده جمره من الخيم

نهج الاسلام......دربنه نهج الاسلام
احنه خدام..... عشكنه احنه خدام
*******
كل محب لو كسره يبره
حسين  يوفيله ويجبره..
.....................شكد يحب الخادم

امدلل  اتشوفه ابحياته
حسين.... وقعله بنجاته
.....................رضت عنه  فاطم

واشكبر باب  الخدامه
بيده   مفتاح  الكرامه
...................كاشخ اعله الوادم

اجمل احلام ...توصفه  اجمل احلام
احنه خدام .......عشكنه احنه خدام
*******
ايسجل احسين اليريده
من الخدم ينطيله ايده..
..................يحضى بشرف منزله

يصير جاهك والله عالي
اهوايه عند الناس غالي.
....................فخر  هاي المسأله

ظل..... دمعنه بلا  اجازه
ايوزع  احسين ابجوازه
......................من جوارح  كربله

نلطم الهام..........حزنه نلطم الهام
احنه خدام ...عشكنه احنه خدام
*******
والدمع  حسره يتجاره
حسين منهاج الصداره
......................عالي ظلت رايته

وياك نستعرض عشگنه
والله   ما نترك   دربنه
..................صك نجاة بخدمته

عالهعد  نبصم  اجينه
وياك مبدئنه وحچينه
..................نريد نحضه بنظرته

طعم الايام........خدمته طعم الايام
احنه خدام .....عشكنه احنه خدام
*******
عشك....... مرسانه تعله
من نخدمك والله تحله....
........................بينه  ايام  العشك

شرط بالخدمه نواضب
كل سنه نقيم المواكب
.................شرط نخدم من صدك

خلي  نترك   كل  زعلنه
حسين خيمتنه وشملنه
.....................بحبه لازم  نحترك

انعوف الاوهام...ترانه  انعوف الأوهام
احنه خدام............عشگنه احنه خدام
*******
تمت بعون الله تعالى
#خادمكم...... يوسف الفتلاوي

رفقا   بالغريب
توديع الحبيب
.........ياخويه الوداع
مخنوكه  اليتام
محروكه الخيام
..........ياخويه الوداع
*******1
صعبه اخرهه وداع   بهل المسيه
شلون قدمت  الفرس بثنين اديه
خويه  ما ينطيني كلبي بهالرزيه
شلون نتوادع يبن حامي الحميه

مقسومه الدموع
محنيه   الظلوع
.......ياخويه الوداع
بعيوني   الكلام
محروكه الخيام
*******2
هاي   اخر    ليله   جمعتنه   سويه
خلي اشبع   شوف   ياروح  الزجيه
اسم الله ياعطشان من طاري المنيه
خلي    اسولفلك  جرح بنتك رقيه

كاتلهه  الحنين
بنتك   بالونين
......ياخويه الوداع
ما   ترضه  تنام.
*******3
خويه عندي من الزجيه آخر وصيه
شمي صدر  حسين  يوم  الغاظريه
مات  بيه  الحيل    ساعات  المنيه
حسين  لا ترحل  دخيلك  رد عليه
جرحي والزمان
مفگود   الحنان
....ياخويه الوداع
ترميني   بسهام
*******4
خويه جاني المهر بس عالي صهيله
جاوب  الميمون  بس  دمعه يسيله
يكول  يازينب  تره  ساعة   رحيله
حضري روحج  لليسر  قصه طويله

مصيوب لامام
يا دنيا  حرام
......ياخويه الوداع
دمعات   الحمام
محروكه الخيام
*******5
شفته كام وطاح بس شومحني
ظهره
لازم  الخنصر  يويلي وذاب صبره
وجهه ماينشاف والطبره عله طبره
ونخسف مهشوم يمه ليش صدره

متروس الجبين
دمك يا حسين
.....ياخويه الوداع
مذبوح  السلام
محروكه الخيام
******6
كام يزحفلي زحف وينادي صوته
بساع يا زينب كرب لحظة  سكوته
واني فوك  التل وشاهد ليش موته
كون  طه  يصير ينسج  عنكبوته

ساعات الرحيل
ياجرح   الدليل
.....ياخويه الوداع
يا اصعب ختام
محروكه الخيام
********
تمت بعون الله
خادمكم ....يوسف الفتلاوي

وداع زينب والحسين ع


وداع اليله وباجر. منيه
بين الهاشمي والهاشميه
باجر حرك الخيام.
شلون بحال اليتام
بين الهاشمي والهاشميه

------------------
سولفو عدهم سوالف بس سوالفهم دمع
والعيون اعتاب عده. بس اسف ما ينسمع
الظوه منهم خذه نوره وطفو انوار الشمع
هاي اخر ليله. كالو. بعد. ماظن ننجمع

يصبح الشوم باجر لاتجيهم
ليله موادع وسمع بجيهم
كلام ادموع يحجون.
تفسره تشرحه العيون
بين الهاشمي والهاشميه

------------------
اه. ياليلت العاشر. بيه حسرات. شكثر
حسين وصه. زينب اخته يكله يامحله الصبر
باجر يحزون نحري وخيل تسحك عل صدر
ونتي جدمج يالعقيله ينجوي من. الجمر

يزينب خلي عينج عل يتامه
ويدري باجر ابحركت خيامه
بهونج من تركظين
يزينب لا. تطيحين
بين الهاشمي والهاشميه

-------------------
اليل ضل مستحي منهم من سمع عدهم عتاب
ألتمو وكعدو سويه والكمر عن نوره. غاب
ياحسافه الدنيه وكحه تلملم عليهم مصاب
من بعد عز. الفواطم هسه كعده عله التراب

لرض الشام لو رحتي سبيه
يختي بذمتج هايه روقيه
زغيره وحافي الجدام.
ماتحمل تره. الام
بين الهاشمي والهاشم

-------------------
باجر اتشوفيني دامي وجبدي نابت بيه سهم
حتئ هدمج يالعقيله تحركه نيران. الخيم
تحزمي لهاي المصايب وعوفي الهم والندم
كلهم. كبالج. شماته. وماكو رايه. ولا علم

تظل اصياطهم توجع بلمتون
شماته الكوم وبحيدر يشتمون
وانه عله الوطيه.
شكثر طعنات بيه
بين الهاشمي الهاشميه

-------------------
الشمر بيده يحز راسي يسيل دمي منل النحر
ديري عينج يالعقيله وعايني. الصوب. النهر
ادري ماعندج محامي لو. دنه ليج. الخطر
لليسر تمشين وحدج تستحين منل. الكمر

الشامت لو حجه يجرح كلامه
بس نسوان وبرفجت يتامه
بيدج شدو احبال
انتي وياج العيال
بين الهاشمي والهاشميه

-----------------
الخادم
رحيم. الصالحي

لاستشهاد الامام الحسين عليه السلام

أَعَلَيُّّ ؟ أُمّ رَسُولِ اللَّهِ هَذَا ؟ أَم حُسَيْن ؟
قَتَلُوا فِي قَتْلِهِ الْكَرّار و الْهَادِي الْأَمِين
أعَلَيُّ   ؟   أُمّ رَسُولِ اللَّهِ هَذَا ؟ أَم حُسَيْن ؟
★★★★★
قَتَلُوا الْمُخْتَار عمداً    حِينَمَا غَالَتْهُ يَد
جُزيّ الْمُخْتَار عنهم   بالطفوفِ أَيْ رَدَْ
غَيْر طَعْنٍ وسيوفٍ   غَيْرِ هَذَا ماوَجَد
هَجَمُوا سَبْعُون الفاً  لَمْ يَغِبْ منهم  أَحَدْ
قَطَّعُوا جِسْمَاً شريفاً  خَضَّبُوا مِنْه الْجَبِين
أعلي    ؟ أُمّ رَسُولِ الله     ؟    هَذَا أَمْ حُسَيْن ؟
★★★★★
قَتَلُوا الْكُرّار حقاً  فاتَهُم يَوْمَُ الْجَمَلِْ
حِينَمَا أَفْرَى جُلُودًا مُرسلاتٍ  لِلْأَجَلْ
اضمَروا شَرّ النوايا بَعْدَ شَكٍّ وجَدَل
وَكَبِير الشَّرّ نَادَى     يايزيدُ لاتُشَل
فَهَوَى السّبْط شهيداً وَهُو دامِي الْوَدَجَيْن
اعلي   ؟   أُمّ رَسُولِ الله     ؟    هَذَا أَمْ حُسَيْن ؟
★★★★★
قطعّوا الْمُخْتَار ارباً  وَاذاقُوه الْحُتُوف
حِينَمَا ظَلَ وحيداً    واقفاً بَيْنَ الصُّفُوفِ
مُهْجَة الْمُخْتَار ظلماً  صار نهبا للسُّيُوف
ماقضى طَه بنجد   طَاح فِي أَرْضِ الطفوف
سقط  الْمُخْتَار أرضاً   أَم أَمِيرَ الْمُؤْمِنِينَ ؟
أعلي    ؟ أُمّ رَسُولِ الله      ؟   هَذَا أَمْ حُسَيْن ؟
★★★★★
أَيْ حِقْدٌ كَان فيهم     كَانَ فِيهِمْ أَيْ شَرّ
نَقَضُوا عَهْدَا عظيماً     وَرَمَوْه بِالْحَجَر
فَلَه لوكان ذَنْبُ       كَان لِلذَّنْب أَثَر
مَا أَتَى شَرْعًا جديداً   أَو بِأَحْكَام كَفَر
أَنَّه حِقَدُّ دفين         يَوْمَ بَدْرٍ وَحُنَيْن
أعلي    ؟ أُمّ رَسُولِ الله     ؟    هَذَا أَمْ حُسَيْن ؟
★★★★★
يالهم مِنْ قَوْمٍ سوء  أَنَّهُم شَرّ الْمِلَل
تَبِعُوا الْبَاطِل حتى  ضَرَبُوا فِيهِ مِثْلُ
وَتَعَدَّوْا حِين قالوا  أَي وَحْيٌ مانَزَل
أَيْ ذَنَبٌ كَانَ منه  سِبْط طَه مافعل
إنَّمَا الْأَشْرَار دوما  يَقْتُلُون الصَّالِحِين
أعلي    ؟ أُمّ رَسُولِ الله     ؟    هَذَا أَمْ حُسَيْن ؟

الشَّاعِر حَسَنٌ لعيبي الحريشاوي

ليلة الوداع

صدك اخر وداع اليوم * صدك ماشوفن ارسومك
صدك يحسين راح تروح ****بعد ما باوع عيونك

بعد كل التعب يحسين
هاي اخر مسيه النه
واخر ليله بس وياك
واخر گعده لتلمنه
بعدك وين احنه اروح
ياهو الي يجي يسبنه
نتغرب بعد عيناك
تتيه بصحره وادمنه

غربه وخوف مالي العين
بعدك نِنسبي يحسين
زحمه اويل غرب ماشين
ياهو يشوفك اشلونك* بعد ما باوع عيونك

جرح عباس لا ما طاب
انته بجرحك چماله
صدك بجروحك يغمگون
وأنه عيوني هماله
حالي بفركتك يحسين
شحجيلك بيا حاله
من بعد الكرم والصيت
صرنه اوجوه رحاله

صرنه منل تعب نعثر
صار الوجه لون اصفر
ماي بگصته ماكو الجر
العمر مو صاحب يخونك* بعد ما باوع عيونك

بعد ساعات لوداعه
اشوف حسين بس يفتر
عله خيامي وعله ضعوني
يباوع عل ارض أكثر
وشوفه ينضف بكل گاع
سئلته وجاوباني بضر
يگلي باجر تروحين
يخاف عليه خاف أعثر

ميت     والفكر    يمي
أخته ويجري وي دمي
غير   اهوه   ابن  امي
صدك راح انسبي بدونك**** بعد ما باوع عيونك

بعدك راح اصير أنه
كلهن ذني برگبتي
الخدر يحسين والنسوان
بعدك هنه سالفتي
ياهو يشيل حملي وياي
ياهو يدري فاتحتي
بنتك شرد اكللها
اذا سئلت شنو بگصتي

اكلها منل لطم زرگه
اكله منل حجي بحرگه
اكلها الحافر يسحگه
لمن تدري تگع دونك ****بعد ما باوع عيونك

وصلت الشام وضعوني
وصلن گوه يتمشن
طريق الكوفه لرض الشام
غصب خلوهن تحفن
نكسر ظهره علي السجاد
لمن رد لل جثث يدفن
لمن رد الرئؤس اوياه
ميز الحاله وتمعن

هظم وعتاب كل گلبه
وسبي وحرمان بل غربه
اويلي شكد عليه صعبه
لمن لم بلحم عونك *بعد ما باوع عيونك

تمت كتابتها في /١٨/٥/٢٠٢٤م
قلم خادمكم/ حسين علي الدليمي

للقَلْبِ وَالنَّحْرِ . مُلَمَّع . (وَزْن الْمُثَلَّث ثلاث ارباع الشيعتي )

(للقلبِ وَالنَّحْرِ . أَبْكِي مَدَى الْعُمْرِ )
(ويلاه ياحسين )
★★★★★
وَيَلِي علصدر التهَشم بالحوافر
وجسم ماسالم كتر مِن الْبواتر
وراس مَرْفُوعٌ برُمْح سَاعَة الْعَاشِر
للحَرَم مِن فوگ مشبوحه النَّوَاظِر
(لسورة الْفَجْرِ أَبْكَي  مَدَى العمرٍ)
(ويلاه ياحسين )
★★★★★
سَلَّوا اسيوف الْكُفْر وَالْجَاهِلِيَّه
چنهم يطلبُون حمَاي الْحَمِيَّه
خذَوا ثَار أَهْلِ الشرْك بالغاضريه
فجعوا الْمُخْتَار وَالْبَضْعَه الزچيه
(للوعة الطُّهْرِ . أَبْكِي مَدَى العمرِ)
(ويلاه ياحسين )
★★★★★
ابچي مَادَام النَّفْسَ وَالرُّوحَ بيه
والمحاجر غَيْم وخدودي وَطْيه
وَالْحزْن ثَوْبِي يضَل حَدّ الْمنيه
أَلَك كل هَذَا الْحزنُ يَبْن الزچيه
(دمعُ الْأسَى يَجْرِي . أَبْكِي مَدَى العمرِ)
(ويلاه ياحسين )
★★★★★
يابوگلب الْخَيْر علناس وَسَمَاحَه
نَاح أَلَك لَيْل الزَّمَن واضلم صَبَاحَه
الْإِنْسِ وَالْجِنِّ نَصَبُوا أَعَلَيْك المناحه
الْكَوْن أَحْمَر صَار علدنيا وشاحه
(والنار فِي صَدْرِي . أَبْكِي مَدَى العمر)
(ويلاه ياحسين )
★★★★★
منهو مِثْلَك انطه قُرْبَان وضحايا
ومنهو مِثْلَك اللَّه خَصَّه بهلمزايا
ماتهمك قَسْوَة الشَّرّ . وَالْمَنَايَا
يابداية الْأَبَد مَا إلَها . نِهَايَه
(لوقلت ماامري . أَبْكِي مَدَى العمر)
(ويلاه ياحسين)

الشَّاعِر حسن لعيبي الحريشاوي

عن لسان ام عبدالله الرضيع  (٣ دگات) وزن الدارمي

نومتك طالت ليش  عبدالله يبني
اگعد يماي العين    كونك تحبني
★★★★★★
يم المهد لاجيت         لامنه شلتك
شفت العطش چتال  فطْرَّها شفتك
تبچي وتريد الماي  عبدالله شفتك
انطيتك صدگ للموت  بچفوفي ذني
★★★★★★
بيك ارجه يادنياي   هلبت بعد روح
مابيه اصدگ العين  گدامي مذبوح
الكاسرني ابوك حسين لفراگك ينوح
وانا الردت بالشيب   زودك يلمني
★★★★★★
مومن عطش مكسور لامن لهب صيف
بعدك ييمه حسين  يتوچه علسيف
منكسر گلبه عليك  يلجيتك طيف
ومرادف  الشوغات    هلشيبني
★★★★★★
ماحسبت  تلفيك  چف المنيه
عبد الله ليد الموت تنطيك اديه
وتالي بنحر مذبوح  ترجع عليه
ريت السهم يخطيك  كون وذبحني
★★★★★★
غافي وتفز للموت  ياسلوة احشاي
ردتك ترد عطشان   مالازم الماي
ينفجع گلب حسين قصد العده بهاي
وحيله يرد مهدوم   والظهر  محني
★★★★★★
حسين اعتنه للگوم   عبد الله وداه
ماصارت ولتصير     هلطفل بلواه
طفل اليريد الماي   يسگونه  بدماه
حسين الطفل مذبوح  رَدَّه على حظني

الشاعر حسن لعيبي الحريشاوي

عن حال العقلية زينب سلآم الله عليها
على وزن يامحلى الوداع بهلمسية لحمزه الصغير

ماذلها الزمان بهلرزيه
يابنت الزچيه
واهم من يظن زينب  سبيه
★★★★★
بس هيمه على زينب غدت تاليها
وحشه الدنيا ظلت
يرد الگوم ياهو ومن  يحاميها
العده للخيم وصلت
حيره تجيبها وحيره التوديها
من هلصبر ملت
اخوها امگطعينه   وعلغبره جبينه
من تنظر على تراب الوطيه
ماذلها الزمان  بهلرزيه
واهم من يظن زينب سبيه
★★★★★
شگد أحزان زينب والگلب مصيوب
غربه العذبتها
تمشي للشماته  وبجدم  متعوب
دروب المامشتها
زينب وين تنظر ياكتر ياصوب
من اظلم وكتها
بهزل تگطع الهيمه   بشمس ماعدها خيمه
غريبه شلون بت حامي الحميه
ماذلها الزمان بهلرزيه
واهم من يظن زينب سبيه
★★★★★
راحت للشماته ونايبات البين
الديوان الشماته
يزيد النكر جدها والخرج علدين
المذموم بصفاته
كفيلچ وين ناده  وين اخوچ حسين
هاذي مخدراته
گالتله العقيله      تره ايامك قليله
وهامتنا تظل فوك الثريه
ماذلها الزمان بهلرزيه
واهم من يظن زينب سبيه
★★★★★
الف ضجه اشعلتها زينب ابقصره
شاف الدنيا سوده
لازوده اليفيده  ولانفع   فخره
ولاكثرت جنوده
بخلودحسين گالت ماتظم ذكره
ولاتمحي وجوده
لوتدري بخبرنه   ماتمحي ذكرنه
بينه من السمه نزلت وصيه
ماذلها الزمان بهلرزيه
واهم من يظن زينب. سبيه
★★★★★
صح زينب غدر بيها الوكت وندار
وخلاها غريبه
وصح خيامها صارت حطب للنار
ومحاملها سليبه
ترد الحك نوت زينب وتاخذ  ثار
من بعد المصيبه
نوت عرش الخيانه    يهتز من مكانه
ولايبقى الحكم لهل الرديه
ماذلها الزمان بهلرزيه
واهم من يظن زينب سبيه

الشاعر حسن لعيبي الحريشاوي

عن لسان العقيله زينب تخاطب
اخيها الحسين عليه السلام   ( عگيلي)

ارحم گلبي ودمعة عيني   
عدمن ياخويه  مخليني
ارحم گلبي  ودمعة عيني
★★★★★
جاني العاشر يبن الزهره   
وين اتوجه بعد اعيونك
شسوي الروح المفجوعه  
ماضلت تندل  من دونك
مكفوله ورايدني اتكفل         
بعيال واهتم بضعونك
ياسلوة روحي ويالوني       
لون الگاع امغير لونك

يلساكت كونك تحچيلي
شلون اگضي حسباتي وليلي
بفراگك يتهدم  حيلي    
لوماتنهض وتحاچيني
★★★★★
سهم الصابك چنه بصدري    
يوم مثلث سهم الصابك
غابت عني الزهره وجدي     
وحيدر وياهم بغيابك
خلتفرح شماتي اگبالي          
مافاتت رمية طلاّبك
لاولدك لاخوتك ظلّوا      
ولاواحد ظل من اصحابك

للعازه الچنت مخليهم
داست خويه الخيل عليهم
وغبار الهيمه امغطيهم     
چم بلوة الدنيا اتراويني
★★★★★
وي انفاسي دومك عايش   
ياعطر الزهره من اشتمك
يبن امي   امگطّع تاليتك     
ياهو وياي ايگوم  ايلمك
بگد الكون  واكبر  گلبك     
شلون اتراب  التم   وضمك
الگطّع نحرك  گطّعني        
وريت بصدري طايح سهمك

سهمك طايح ريت بصدري
ياهيبة روحي  وياخدري
يلي امتانيتك  ياذخري    
لدياري كون اتوديني
★★★★★
لاانته ولاكافل ظلي        
اتلفت ذبلانه اعيوني
مثل اخيامي اتوجر گلبي 
ولوني اتفرهد مثل ضعوني
كون اتوسد وي اترابك   
ياريت الناس ايخلوني
ميته بدونك يابو الطيبه  
ويه العدلين  ايحسبوني

فارگت انفاسي وي انفاسك
برمح الشر من شالوا راسك
ياراس اشگد هم الجاسك  
ياهم الجاسك ماذيني
★★★★★
شلون اندارت هاي الدنيا   
شلون اصبحنه وبيش امسينه
لاساعه اتلمنه وتجمعنه  
ولاشمل الراح  ايرد  لينه
دهرك خلاك اتفارگنه    
موبيدك  خويه  اتخلينه
ويم الماي مگطع عفته  
كافل  واعدنه ايرد بينه

محزم دهري وعاند روحي
للموت يظل حزني ونوحي
وانوبه الچملي اجروحي    
المايندل دربه ايدليني

الشاعر حسن لعيبي الحريشاوي

وقوف العقيله زينب أمام جسد اخيها الامام الحسين عليه السلام.
(نعي)

ماترد خويه عليه هاي أبد موعادتك
طحت بالعاشر يغالي مووكتها طيحتك
ترضه تكتلني الشماته وهاي ابد موشيمتك
ارد اشوفنك يخويه حلم صارت شوفتك
هم الك رجعه علينه لوحلتلك نومتك
هم الك رجعه يخويه نار تسعر فرگتك
هم الك رجعه يخويه وترد يوم الديرتك
سكنه تنخاك ورقيه تنوح تنطر جيتك
شبعت من الوحشه تبچي اليوم مني رادتك
شرد اگلها بالحوافر خيل تصهل داستك
لواسولف علسيوف شلون حزت رگبتك
والرماح السمهريه. بوسط گلبك صابتك
لوعلى إسهام الجثيره وينها المالاحتك
طعنه فوك الطعنه حيف سيوفهم ماعافتك
حاره الگاع على جسمك نار تلسع چوتك
والشمس سومرت وجهك والترايب غطتك
گوم اخذ دنياي مني انطيني خويه موتتك
يانجم روحي وسماها شلون گاع الظمتك
ترضه هيج ايصير حالي دولبتني روحتك
ماحسبت الدنيا مني. مثل ماي وبدتك

الشاعرحسن لعيبي الحريشاوي

على طور شلون ليله لحمزه الصغير (گعديه) عن دفن السجاد لجسد الحسين عليه السلام وباقي الاجساد الطاهره

اهواي صعبه المحب من يدفن حبيبه
هلمصيبه. المامثلها كل مصيبه
تهمل السجاد عينه
جسم أبوه اموذرينه.
اهواي صعبه
★★★★★
انطوتله الأرض لمن. رجع لأرض الغاضريه
بنظرة الملهوف گاصد. نار البگلبه سريه
وين ريحانة الهادي ومهجة الزهره الزچيه
شاف الجسم حين التفت
السجاد ناره. اتوجرت
شيحسب بطعناته الصفت. الف طعنه وتسع ميه

اهواي صعبه من نظر فخر الهواشم
كل كتر مهشوم. ماضل كتر سالم
شخلت بجسمه الحوافر وذيچ طبرات البواتر
اهواي صعبه
★★★★★
شلون منظر لو اوصفه. تسبگ الدمعه المشاعر
من يلم جسمه ويچفنه. الداسته خيول العساكر
سمه انحط ابلحد وسفه. حسين نوره اليشع زاهر
مكسور گلبه وممتحن
السجاد ساعات الدفن
من المدامع والحزن. اصبحن بيض النواظر

اهواي صعبه يدفن الروح الحنينه
نزلت املاك السمه تبچي وتعينه
مابعد يحصل الملگه. فرگه المحبوب فرگه
أهواي صعبه
★★★★★
يذكر السجاد زينب. بالظعن مكسوره خاطر
شلون لوتدري العقيلة. شحال جسم حسين صاير
علارض مفروش جسمه. من كثر دوس الحوافر
لا له ملامح لارسم
لاصوره ضلت لاجسم
اتموت ويفارگها العزم. لون زينب تدري باچر

اهواي صعبه. بياخبر زينب يگلها
ارماد صارت ياحسافه. اجسوم اهلها
وياه من ينصب عزيه الحال ابن خير البريه
اهواي صعبه
★★★★★
الدين والايمان كله. العدل وأحكام الشريعه
ومنظر الحق وجماله. النوره من نور الوديعه
بالسيوف امگطعينه. وماسلم حتى رضيعه
السجاد روحه معلعله
صوته حزن يملي الفله
هذي فجيعة كربله اعظم واكبر فجيعه

اهواي صعبه من يرد للضعن باچر
ولوعته ابوسط الگلب مثل الخناجر
من التعب مهدوم حيله ومن يصد حال العقيله
اهواي صعبه

الشاعر حسن لعيبي الحريشاوي

لسان حال الامام السجاد عليه السلام  عند دفن جسد ابيه الامام الحسين عليه السلام  (وزن النصاري)

ياوسفه بديه    دفنت ابن الزچيه
تعوفه بگبره وتروح   ماظلت بعد روح
         دفنت ابن الزچيه
★★★★★
دفنت الروح والدنيا والاحلام
ودفنت السلوه والراحه والايام
دفنت الطيبه والجنه والانسام
شيصبر الروح هاگد تحمل آلآم
محبوبي دفنته    وخليته  بغربته
تحمل ها كثر نوح     ماظلت بعد روح
          دفنت ابن الزچيه
★★★★★
انا السجاد اجيت الغاضريه
دفنت حسين وايامه الزهيه
دفنته وطاوعتني شلون اديه
تمنيت وردت گبله المنيه
ياكسري شيجبره    بديه حفرت گبره
تشوف حسين مذبوح   ماظلت بعد روح
          دفنت ابن الزچيه
★★★★★
شنهي المايون لحسين وينوح
دفنت ايام عمري وسلوة الروح
ابوي  الماحظه بالماي  مذبوح
ثلث تيام فوگ الگاع مطروح
مگطعته البواتر    وطاحنته الحوافر
تشوفه شلون مطروح    ماظلت بعد روح
          دفنت ابن الزچيه
★★★★★
يا نجم السمه  الطايح بالتراب
نجم الماخفه  وعن بالي ماغاب
هذا الماجره   ولامر  بالحساب
عليك ادري صعب يابويه العتاب
دنيا  الفارگتها     تلوعني عفتها
تحمل هظم وجروح   ماظلت بعد روح
          دفنت ابن الزچيه
★★★★★
يبو اليمه الجره مامر على البال
يطيبة خاطري وياسلوة  الحال
عليل الوحدي  مچتوف بحبال
بس الحرم ظلت عندي  واطفال
ماظلت مدينه    مابيها مشينه
تمشي جبال وسفوح    ماظلت بعد روح
          دفنت ابن الزچيه

الشاعر حسن لعيبي الحريشاوي