عيون ام الگُمر .. تَعَبهه السَهر .. واشواگ وصُور
الغَوالي .. الغَوالي
—–— —–— —–— —–— —–— —–—
الليل كلّه مساهره ،، ومو دمع هذا الجَره ،، وبَل وجِنهه
روحهه صارت شمِع ،، وذابَت بشكل الدمع ،، من جِفنهه
حيلهه باد بسهرهه    والظهَر منهه انحنَه
ليلهه فَرهَد عمُرهه   ومدري كُبرَت چم سَنه
عاشِرَت هَمهه وقهرهه   تنام تصحه مدوهنه

الدرب الطف تصِد .. وبي تنثر ورِد .. لجيّتهم تعِد.
ليالي .. ليالي
—–— —–— —–— —–— —–— —–—
بدارهم تنشد بقَت ،، ها يدار اهل البخت ،، هَم يرّدون
وانتّ تستانِس وانه ،، وترِد عيشتنه بهَنَه ،، نگر العيون
الضعن لو رد مثل الاول   تزهي بيهم دنيتي
وكون ميردون نذبل    بوحشتِك وي حسرتي
هالزلم لو كلهه ترحل   ربي عَجّل موتتي

لا شك لا وَجَل .. يرحمني الاجَل .. ولا دُور الأهل
خَوالي .. خَوالي
—–— —–— —–— —–— —–— —–—
الصبر فعلاً جميل ،، لكل قدَر مِن الجليل ،، وبالشِدد عَون
بس يعالَم الاشتياق ،، الصبر عندَه لا يُطاق ،، تصبر شلون
تصبر شلون وگلبهه    يعلم شحَل بالطفوف
تعاين الحومه وحربهه   تعاين سهام وسيوف
وعالرمح مشيول حُبهه    وعالجثث زينب تطوف

تناديـ يا نبض .. مطشر عالارض .. والحافر يرض .. بدَلالي .. بدَلالي
—–— —–— —–— —–— —–— —–—
الفرگه ما خلّت حچي ،، لسانهه صار البچي ،، تسولف دموع
غير بس چلمة حُسين ،، وياهه ترجع يمته وين ،، ماكو موضوع
اربعه اولاد الجفوهه    بموت ما چانت تهِم
چان همهه يخيبوهه    وما يوافوهه الزلم
وحِين وصّت، جاوبوهه   بِشري، صاحت والنعِم

ام متبرعه .. بدم ولد اربعه  .. إرضه تسمعه
بحلالي .. بحلالي
—–— —–— —–— —–— —–— —–—
من بعد طول انتظار ،، رَد ضعن كلٌه انكسار ،، ذابل اللون
بس يتامه بلا كفيل ،، ونِسوه مثكوله وعليل ،، وحيرة ام عون
اتگابلن والدمع سايل   نِبَع من كل عَين عَين
زينب تنوح ابو فاضل   آ يمگطوع الادينِ
وام گمر هاشم تسائل   وين يا زينب حسين

صح راسه انگطع .. وبرماح انرفع ..  و وي ضعنچ رجع
سؤالي .. سؤالي
—–— —–— —–— —–— —–— —–—
‏عله راسه ناشدت ،، زينب وزينب بچت ،، لطاري الراس
‏تگلهه يوم الاربعين ،، راسه رد يم البنين ،، وراس عباس
‏لحودهم بيدي احفرتهه   وضاگ هالكون الوسيع
اسبعطش نحر اجمعتهه     وچان منظرهه فجيع
من ابو السجاد احسبتهه     لحد عبد الله الرضيع

يا لبوة علي .. راحو كل هلي .. وشوفي بمنزلي
شبقالي .. شبقالي
—–— —–— —–— —–— —–— —–—


ياسر حسن
محرم ¹⁴⁴⁵

على لحن قصيدة صدق الموت حين ماتت ضمائرُ تضمين للشاعر محمد علي الحائري
-_-_-_-_-_-_-_-_-_-_-_-_-_
كَذبَ الموتْ كَذبَ الموتْ ** فالحسينُ مُخلدُ
إنما يُنسى من فنا ** حاضرٌ  خالدٌ أناْ
         كَذبَ الموتْ كَذبَ الموتْ
         ***
(1)
هالبشر  باول وجودة من قوانين الخليقة
لابد بساعة بحياتة يكطع مواصل طريقة
ويتجه نحو النهاية وتنكشف عندة الحقيقة
شما تطول بيه حياتة ابحر المفارگ غريقة
وتنمحي كل منجزاتة الاصايل و اللسيقة
يتجة في لا نهاية وينحشر في ضل فريقة
وُلِدَ اليومْ وُلِدَ اليومْ ** وفي غداةٍ وَيَفندْ
إنما الموتُ موطنا ** حاضرٌ  خالدٌ أناْ
         كَذبَ الموتْ كَذبَ الموتْ
         ***
(2)
ما شفت انة بحياتي ولاسمعت من الخوالي
المنجتل منصورة ايدة ويبقى راسة بالعوالي
والتوهم بانتصارة منهزم من كلشي خالي
عاكس الصورة بشكلها وانتجت من عز نزالي
سيف التثلم حدودة ونحري الحد المثالي
انة اجيت لموتي قابض مو ابد موتي اجالي
ولقى الموتْ ولقى الموتْ ** مني ماكُنتُ أوعَدُ
لقيا جأشي تيقنا** حاضرٌ  خالدٌ أناْ
         كَذبَ الموتْ كَذبَ الموتْ
         ***
(3)
ذاك ابو اليمة منارة ملهم الثورة العظيمة
ما فنى ذكرة ووجودة من بشاعتها الجريمة
هو التحول علامة والسفك دمة بعديمة
منذبح والعالي راسة وضايك القاتل هضيمة
خدمتة هاي وعطاءة كلها من وافر نعيمة
كل سنة ذكرة يتجدد وتجدد القصة القديمة
وكما اليومْ وكما اليومْ** كربلاءُ تُجَدّدُ
اينَ صارَ وما جَنا**حاضرٌ  خالدٌ أناْ
         كَذبَ الموتْ كَذبَ الموتْ
         ***
(4)
من ضمن مكسب قيامة واتجاهاتة الصحيحة
انتجت فكر وعقيدة وثبتت دين النصيحة
ثورتة الواضح شكلها وكل مضامنها الصريحة
انتجت خير الخدامة من مواكبها الفليحة
واختفى بطش الطواغي وانتهى بقصة جريحة
الذابح الميت وجودة واحيا بالمذيح ذبيحة
ولجَ الويلْ ولجَ الويلْ **  في غلال  يقيد
فيها ما زال يلعنا **حاضرٌ  خالدٌ أناْ
         كَذبَ الموتْ كَذبَ الموتْ
         ***
(5)
ادري باليمت مماتة ينتهي وياه عطاءة
انة ما شايلفي واحد ميت وباذخ سخاءة
بالارض جسمة تمدد والعطا بالغ سماءة
اكرم باهلة واخوتة واخر اكرامة دماءة
هو اكرامة اشوفة يعطي يتضاعف جزاءة
واجب تعظم اتجاها وواجب تقدس ولاءة
وإلى الموت وإلى الموت** نهجهُ لستُ أُبعِدُ
إنما قلبي آمنا **حاضرٌ  خالدٌ أناْ
         كَذبَ الموتْ كَذبَ الموتْ
         **
((تمت))
26/6/2024
محسن علي العتابي

لسان حال مولاي سيد الشهداء عند مصرع مولاي ابالفضل العباس عليهم السلام


اخر كلمة.       ظلت يمه
گال حسين ومات
موت الغالي    شيب حالي
موتني باخر لحظات
خويه عباس.    خوية عباس
==========
من ركضت لمصرعة ولمن وصلته
خلص عمري من اوصلت يمه وشبگته
طاحن ادموعي اعل وجه من نظرته
والحجي يمه تبده وراح سكته

وي اجروحه.    احجي لروحه
بلساني تموت الجلمات
موت الغالي    شيب حالي
موتني بأخر لحظات
خويه عباس.    خويه عباس
==========
هاي اول مره خويه گلي من طاح
واعرفت هاي النهايه والگمر راح
حاظن العباس وابجي والگلب صاح
عگب عينك راسي خوية ترفعه الارماح

اگعد وينك.    فدوه لعينك
گلبي محمل شوغات
موت الغالي.   شيب حالي
موتني بأخر لحظات
خويه عباس.   خويه عباس
==========
گتله كوم ارجع يخويه للمخيم
وسال دمعه وتختلط دمعاته بالدم
مستحي من سكينه اعرفه شكد تألم
وروحي ملچومه اعل خويه بروحي مأتم

هاي الحسرة.    بگلبي الجمرة
تشبه جمر الخيمات
موت الغالي.    شيب حالي
موتني بأخر لحظات
==========
شلون ارد ابلا ابوفاظل والله حيرة
طيحة الكافل تره طيحة عشيرة
وين انطي وجهي بله وين اديرة
هاي كسرة ظهري عالكافل چبيرة

گلبي مشيب.    طولي محدب
شيب عمري وجن فات
موت الغالي.   شيب حالي
موتني بأخر لحظات
==========
وارجعت من الگمر واصفگ بديه
بله شيسوي بحياته الراح اخيه
جية الكسرة من اجيت شلون جيه
وزينب تحاچيني خويه رد عليه

احجي بدمعي   كاسر ظلعي
وبروحي هواي الكسرات
موت الغالي.    شيب حالي
موتني بأخر لحظات
==========
سكته للخيمه رحت لازم عمدها
ردت أطيح خيمته وروحي مردها
حيرة وأتلفت شفت زينب وحدها
غير ابوفاظل بعد منهو اللي عدها

الخيمه التوگع.    لامايرجع
صاحب هالخيمة ومات
موت الغالي.  شيب حالي
موتني بأخر لحظات
==========
الشاعر علي النائلي

وين عباس الكمر 
عباس خويه بالخرابه  . صاير اوسادي الترابه
انه زينب حشميت  . ليش خويه ما اجيت
.
وين عباس الكفني بشيمته
اشلون تقبل ابو فاضل غيرته
جان ترهب بالعساكر صولته
ارد احلفه بشلت امه الجابته
الحك اعليه انوليت  ليش خويه ما اجيت
.
.
نوك هزله وانه ماعندي صابر
كلبي يا عباس يا خويه انفطر
دار عكبك ليش وياي الدهر
من عكب عباس اوح ويه الشمر
راحن عيوني وعميت ليش خويه ما اجيت
.
.
انه من بيت الرساله و العلم
طبتي الديوان صعبه البي زلم
كمت اصيحن وين عباس الشهم
من خذوني مجتفه عننك علم
شنهي ليش تعطلي ليش خويه ما اجيت
.
.
ناس ما ترحم يكافل حرمتي
انه من هينت كفيلي هيبتي
تفطر اجبال الرسيه حسرتي
اخ من بعدك يخويه ضيعتي
اضنن بيه ما دريت  ليش خويه ما اجيت
.
.
الشام عربه و انه ما عندي ذنب
كلهم يصيحون جن الهم طلب
اخ لو تدري  شكثر بينه  تعب
لازم ارضه بقسمتي والله شكتب
حكم ربي وبي رضيت ليش خويه ما اجيت
.
.
حسن صالح العيساوي

نخوة للامام علي عليه السلام

🚩🚩🚩🚩🚩


ياعلي حامي الدخيل
حار من عندي الدليل
ماكو  يمك مستحيل

٢_ اه ياحيدر
___

انته باب الله العباده
وللجرح انته طبيب
انته للكلفات  راعي
ابد ضيفك  مايخيب
امسح ادموع الحياره
بدعوه منك يالحبيب
بهالزمن تدري مآسي
وشكثر نوح ونحيب

بلوعتك يوم المهول
حين مامات الرسول
بعده امصابك يطول

٢_ اه ياحيدر
____

كلمن ينادي دخيلك
سهل امره ياعلي
بالحزن واقف ابابك
گلبه منه ينصلي
مُنيته طفل ويشيله
يمته همه  ينجلي
السجين رايد بشاره
لا  تعوفه مبتلي

حلفك بذاك الجنين
فاطمه ولطمة العين
والبواچي والونين

٢_ اه ياحيدر

___

اعتنينه بالمدامع
ماتردنه ياشهم
العلل انته دواها
بيدك  اتزيل الالم
فرج اهموم الثجيله
لا يظل عدنه هظم
برحمتك يبو الغياره
ياعلي بهاي القسم

بالحسن يبن الكرام
وجثته لصارت سهام
بالغدر   من اللئام

٢_ اه ياحيدر

__

بسمك الطاهر نخيتك
يارجائي و الضمد
ضاگت الدنيا عليه
انته لي ركن وسند
اكشف البلوه يغالي
منك انطيني  المدد
مالي غيرك بالنوايب
عندي مابقي  جلد

براس الحسين الشهيد
  يوم حزوله الوريد
ظل ثلاثه اعله الصعيد

٢_ اه ياحيدر

___

تشكي الروح ابألمها
صعبه صعبه حيرتي
انطيني بزودك كرامه
والله ذابت مهجتي
للجليل انته الوسيله
يمك فرج  كربتي
همي مااگدر اشيله
لا تردني ابحسرتي


بالعقيله ام الخدر
يوم صاحت بالخطر
گوم ياحزام الظهر

٢_ اه ياحيدر



الخلولد الحسيني
نسالكم الدعاء


https://www.tg-me.com/khdmat

[[لسان حال السيدة الرباب(ع):]]

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

تنادي  عبد  الله  ينور   عيوني

ليش منك  من  وكت  حرموني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

تنادي    عبد  الله  يمن  بيك   ألأمل
كون  بيه   أتصوّب    سهام    الأجل
ولا  اشوفن   غصنك   الأخضر  ذبل
وكون     گبلك     يبني    يذبحوني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

كل حياتي  اوهام بس انته  الصدگ
چان  گلبي  بسمك    و لجلك  يدگ
انت روحي  والنبض  ونته   العشگ
شلون   انام     و صورتك   بعيوني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

أنته نسمات  الهوه  بصدري   اليمر
وانته  آمالي     و شمعتي   و العمر
چانت  امنيتي  تضل    حد    الکبر
وبسمك  أم   عبد   الله   الينادوني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

شعدهه  وياي  الطفوف  و خطفتك
لا رعت   حرمة     أبوك     و جدتك
ياشبيه    الهادي      بكل    صورتك
كون      أموت   ويمك      يدفنوني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

رايده    اسأل   يابشر    كل    الملا
نگول   الكبار   السبب      بالمشكله
الرضيع       أبيش      ينفع   مقتله
وبالولد     و  الوالد        تفجعوني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

رايده أسأل   حرمله   تملك   گلب؟
تفتخر  محسوب   برجال   الحرب؟
من شفت    كالطير  دم ابني  يصب
هم گلت  صاب    السهم    هنوني؟

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

صعبه   استوعبها  يبني  مصيبتك
گاعده و اسمعها    يبني     نشغتك
بنومي  اناغيلك  وآهيس ضحكتك
تالي   دمعي    وعبرتي   يگعدوني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

هيج  يبني و يطلع  مصابك   حلم
وجرح  البگلبي اعله  فگدك  يلتئم
وعيني  اتشوفك  ملاك    ومبتسم
الا    ما    اغمضهه   بعد    جفوني

☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆۰☆

خادم عبد الله الرضيع(ع)
جهاد البصیراوي

/مجروح ألطم مجروح  .. انعه وقصيده احجيهه  .
قصة مصاب ودمعات .. كل عام اظل ابجيهه   .
دم تنزف العين  ... لعيال الحسين
مجروح ألطم مجروح
---------------------------------------
بالطف شفت صورة حزن    من هوم الليل
بصهيل وسيوف ورعب    يتجادح الويل
اطفال لاذت بلحرم    من تجمح الخيل
وجسامهم هدهه التعب    ومهدم الحيل
وشلون حال الاطفال  .. تبجي وحرم تعبانه
بعيون تارسهه الخوف  .. حد الصبح سهرانه
ومحزم البين  ...  لعيال الحسين
مجروح ألطم مجروح
............................................
اشكالهم مثل الورد    فاحت بلعطور
بوجوههم رغم السهر    يتفايض النور
بس ليش من طر الفجر    طاح النده ايفور
و جاليش بديار السمه    نسمع بجي اطيور
وكلوبهم مثل النار  .. درب العطش خلاههم
والعطش خلو مذلول  ..  هيهات ماذلاهم
ونظل موالين  ... لعيال الحسين
مجروح ألطم مجروح
............................................
سهرن عطاشه وللصبح   ياطاهره اتنام
وكسرة الخاطر تنسمع    جن كسرة اعظام
صوت الدمع صاح وهدر    من بطن الخيام
ياحيف باجر تنسطر     وجنات الأيتام
باجر اذا صار اطراد .. وتصير ضيكه الهيمه
وشلون من تدوي النار  .. وتلوذ خيمه ابخيمه
تبجي الميادين  ... لعيال الحسين
مجروح ألطم مجروح
............................................
غيرو قانون الحرب    وتلافت الخوف
اهناك شاهدنه الركب    من تذبح اسيوف
شفنه العلم لجل العلم    ذب عين وجفوف
والحرم دارت عل كمر     نجمات وتطوف
وياي كومو وياي  .. نبجي ونون ياكومي
لحد يعاتب ويلوم  .. لمن اشك اهدومي
مانوفي الدين  ... لعيال الحسين
مجروح ألطم مجروح
...........................................
اشما ندك مأتم دمع     ونقيم الأحزان
مانوفي خيمه امن الخيم     لاحتهه نيران
مابين جانون العطش    وسيوف عدوان
اطفال ذبلت جن ورد      بجفوف دخان
ننصب مجالس ودموع .. بسم الوفه نهديهه
تغديلهم فدوه الروح  .. لمصابهم نفديهه
ونصبح قرابين  ... لعيال الحسين
مجروح ألطم مجروح  .....
---------------------------------------
الشاعر
عباس العبياوي
٢٠٢١/٨/١٨م

قصيدة بحق مولاتي سكينه


انا سكنه والحزن غاطيني
وأبد مايهده ذبحني اونيني
بكربله من شيبت
من المصايب حدبت
يبواليمه.    يبواليمه
############
الأمر والإعجب شفت بالغاضريه
يوم حركوها الخيم أهل الدعيه
ابهذيج الساعه اتمنه المنيه
من شفت عمتي اوگعت فوگ الوطيه

من الخيم للتل شوصف حالهه
بلا محامي ونفطر دلالهه
اه چم موته متت
من المصايب حدبت
يبواليمه.   يبواليمه
############
حكه گلبي من الهظم ماتطفي ناره
عاينتلك عالترب دمك تجاره
مغطه جسمك بالسهام وبالحجاره
ردت احظنك بس صعب يابوالغياره

حيلي طاح وظلمة الدنيا بجفاك
سهام ورماح وحجاره الي غطاك
ايتيمه من بعدك صرت
من المصايب حدبت
يبواليمه. يبواليمه
#############
طشرو بالغاضريه بويه عمرك
گبال عيني بلا رحم من گطع نحرك
الشمر هد حيلي لمن داس صدرك
ريت ذبحاني ولا عيني تنظرك

مايفارگ بالي بويه منظرك
نعمة الله امطشره منتصورك
وخنصرك لمن شفت
من المصايب حدبت
يبواليمه. يبواليمه
##############
بلا محامي ولا محامل صعبه هايه
عله الهزله بالضرب رحنه سبايا
وعمي فوك المشرعه صاحب الرايه
النهر تلطم جروفه وناح مايه

شلون تهده من المصاب آلامنه
من نعاين روسكم جدامنه
من الشتايم دنگت
من المصايب حدبت
يبواليمه. يبواليمه
###########
الناس تتفرج علينه يبوالشيمه
بالخرايب نيمونه بلايه خيمه
التهظم بنص سوگ رامونه بشتيمه
وصرنه عرضه للزلم هاي الهظيمه

مرامه العيون الأشد وأعظم جرح
وعمي العباس وينه مايصح
تعذبت وتمرمرت
من المصايب حدبت
يبواليمه. يبواليمه
############
الخادم عبدالمعين الشمري

تراثية   على لحن  الراحل حمزة الزغير رحمه الله .نار بدليلي تسعر ..✍️





صوت المنــابر دائم       حتى ظهور القـــائم
تظـل عالضريح الراية     وما نتـــرك المشايـة
**  
هذا العهد بينــه يعيش       ودم المنــاحرشــاهد
يـوم الحِكمنة الظـــالم  
ما عفنه حُبك يحسين     وما شفنه غيرك واحد
وما نقبل بــأي حــاكم
سجنونه حكمونة اعدام     عاندو واحنــه نعــاند
وأنتصر صوت الخـــادم
ينسجن كلمـن زارك      شكَـد قتلــو بزوارك
وأكثر بعد من هايـــة     وما نتـــرك المشاية
**
حسبالهم حُبــك طيف     وي الفجـــر يتلاشـــة
ونتخلــــة عن الحضـــرة
عالزاير تمــر أيـــــام       مـا يمــلك الدشــداشة
وينطــيك روحــهَ وعُمــرة
يوم الحشريـا مظلـــوم      تنسانة أمك حاشـــة
ومن الخَــــدم نتبــــــرة   
أنصــارك وتدرينـــة     للمـــوت يــا وآليــنة
والمَذهَبـــك حمـــاية      وما نتـــرك المشاية
**
ﭼِنـــه يبـو اليمة نموت     لومــا نســوي قرايــة
وما نطبــخ بعاشـــورك
تركض ورانــه الطلقات    يوم النجـــي مشـــاية
وغصبـاً عليــهه نزورك
إنسحكَ راس الطاغوت    واجرامـــة صار حچــاية  
وكل يـوم يسطع نــورك
جـِن وأنــــس تتــمنه     بصحنك تشــــم الجنة
عايش بكلشي ويايــة       وما نتـــرك المشاية
**
يالحتـــه عبدالله وياك     لحــلكَ الســهم وديــته
عنــك فـــــــلا نتخـــــلة
أحنه بَلاية أهــل البيت     مثــل الخـــذو عافـــيتة
 يكَضــي عمــرنــة بذلــة  
وآحدنه من غير حسين     ما تسوة أبد شخصتة
خل يطــم روحــة أحسله
بأرواحنــه تظل عايش      كل ظنه يوصل داعش
عنــدك زلـــم وفــــاية      ومـــا نتـــرك المشــاية
**
فدوة يبو اليمـة نروح       للسلبــــــو نســــوانـة
وداس على صدرة الحافر  
يتمَنَه كل شيعي اليوم      ينطــيك دم شريـــــانة
وطف كربلــة يـــرد باﭼر
عاشر محرم يحســين      ليوم الحشـــر أحزانة
ويمنــــعنه فَنـــه الكــــافر
كل شيعي يوهب دمــه     نموت وتظــل الخدمــــة
ونحور عدنــــه هوايــة    ومــــا نتـــرك المشــاية
**
كــل الكـــرة الأرضيـــة      تحـقد اليــوم عليــــنه
ﭼــي كَلنـــه حيــدر أول
يعني اليحب أهل البيت    من حســـين يأخذ ديــنه
المفروض عدهم يُقــــتل؟
هنيالـــه البحُبك مـــات     الينطي العمــر لَحسينة
يـــوم الحشــــر يِدَلـــــــل
بدمـك صنت قرآنــــي      منــك خذت إيمــــــــاني
زينب سبــــوهه سباية      وما نتـــرك المشـــاية
**
ما ننسه عاشر عاشور    يوم الخيـــم حركَــوهه   
وزينب أحتـــارت بيـــهه
ذبحو جميـــع الخُـوان      بنات النـــبي سلبوهه
وانســـبت يــا وآليـــــهه
لو فاطمة الزهرة وياك      همـــين ما هابـــــوهه
وتهجـــم الخـــــيل عليــهه
هــذا العـــهد بدمــــانة      يحيـهَ وتمـــوت ويــانة
بس أنت؟ نمشــي برايـة     ومـــا نتـــرك المشـاية
**
حيدر حسين الكَرعاوي  

رئيسية للعليلة عليها السلام 2024
يحادي النوگ تانيني
اروح وياك خلّيني
تسافر وين
يبويه حسين
اروح وياك خلّيني
٠٠٠٠٠٠٠٠٠٠٠٠٠٠٠٠٠٠٠
عليله وگلبي ما يحمل ألم فرگاك
خذت كل اهلي وخواني وخواتي وياك
عجب تتركني بجروحي وعذاب اجفاك
أخذني وحتّى لو اقبل  اموت هناك
اموت ولا اضل وحدي
يبويه وغيرك اشعندي
ينور العين
يبويه حسين
اروح وياك خلّيني
٠٠٠٠٠٠٠٠٠٠٠٠٠٠٠٠٠٠٠٠٠
عجب تكدر تفارگني ينبض الروح
مشيت وماگلت طفله تون وتنوح
ولو بس گلي حاچيني لوين تروح
اذا للطف يبويه ارجع قتل وجروح
اخاف عليك من دهري
يغدرك يا شمس عمري
مسيرك وين
يبويه حسين
اروح وياك خلّيني
٠٠٠٠٠٠٠٠٠٠٠٠٠٠٠٠٠٠٠٠
عفتني بدارك الظلمه وحزن بلواي
عليله ولافكر عندي ولا ظل راي
شبگت هدومك الحلوه وبچيت هواي
وحيده بلا أهل طفله. شتگول بهاي
چنت انت التواسيني
بغيابك من يباريني
خذاك البين
يبويه حسين
اروح وياك خلّيني
٠٠٠٠٠٠٠٠٠٠٠٠٠٠٠٠٠٠٠
بقيت اتنطّر بدربك ترد للبيت 
عزيزة گلبك وروحك ألك حنّيت
كمت صبح ومسه ادعي وكتب ودّيت
ولا مرسال رد منك ولا ردّيت
دعيت وگلبي يلچمني
تعــــــــال ولا تيتّمني
يتاج الدين
يبويه حسين
اروح وياك خلّيني
٠٠٠٠٠٠٠٠٠٠٠٠٠٠٠٠٠٠٠٠
طبع عدوانك اعرفهم تره يغدرون
تبايع آل اميه بلا شرط يردون
وعرفك بويه ما تخضع لِبِن ملعون
تموت عله الكرامة ولا تذل يدرون
اعرفك وارث المرسل
ابــد بالـذلّه ما تقبــل
اعرفك زين
يبويه حسين
اروح وياك خلّيني
٠٠٠٠٠٠٠٠٠٠٠٠٠٠٠٠٠٠٠٠٠
بحلم شفتك يبواليمه نحر مگطوع
وشفت راسك يوالينه برمح مرفوع
اكعدت لن اسمع الناعي يون مفجوع
ابن حذلم ينادينه ويصب دموع
يصيح ويسچب العبره
ابواليمه انگطع نحره
بلايه امعين
يبويه حسين
اروح وياك خلّيني

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

قصيده نزله للانصار




كربلا بافعالها.......عفيه من ارجالها
نزلت الأنصار تهتف واحسيناه 
**

كربلا ثوره وعقيده واضحات اهدافها
ويه أبو السجاد وكفت غيره غيره اوصافها
الشافها بحسين تهتف خاف لمن شافها
والجمع آلاف جيشه هذا حتما خافها

ياحبيب أرهبها.....كربلا من تطبها
نزلت الأنصار تهتف واحسيناه
**
باللواء وكوم رفرف ها يشيخ أنصارها
كلها عونج يبت حيدر خل تشب أوزارها
اليوم تدخلها المعاره ارجال من اخيارها
ركابنا لحسين فدوه خل تشيع أخبارها

بالأرواح اتطبها.....بالدما تكتبها
نزلت الأنصار تهتف واحسيناه
**
يلله ياجون اكتبلنا قصتك يالعاشق
من قميصك مزكيته ياعشك بيه لايق
بايدك وجسمك تحارب وبجنونك واثق
وي أمامك تنطي روحك على الموت تسابق

عاشك ولحسينه   روحه بجفينه
نزلت الأنصار تهتف واحسيناه
**
يازهير ويابرير وياليوث الحومه
كومو للدين ونداءه خل نراوي اعلومه
عيشة الظالم مذله والحرب معلومه
والحياة بلا كرامه باطله ومشؤومه

خلي نعلي الهامه.....بالنبي واسلامه
نزلت الأنصار تهتف واحسيناه
**
اثلاثه والسبعين جيشك ياحسين ينادي
لأجلك الأرواح فدوه فدوه يبن الهادي
كربلا صرخة عقيده شاهده بكل وادي
بكل زمان إلها صداها يركع إلها العادي

بالدما من ينزف  والعلم من يرف
نزلت الأنصار تهتف واحسيناه
**

محمد دعبل النوري

بشان زفة القاسم ابن
الحسن  عليه السلام

🚩🚩🚩🚩


زفو  القاسم  الليله
وملبس د طشو له
____

نصبو للولد حوفه
وملبس د طشو له
وجيبو حنه لچفوفه
وملبس د طشو له
احنه انجلي ونطوفه
وملبس د طشو له
ولبني نسوي هلهوله
زفو  القاسم  الليله
__

علگو  شمعته ياناس
وملبس د طشو له
ونثرو الورد والياس
وملبس د طشو له
زفته بالدرع والطاس
وملبس د طشو له
بعرس القاسم هنوله
زفو  القاسم  الليله
_

شاب ومحلا ارسومه
وملبس د طشو له
وعطر الجنه بهدومه
وملبس د طشو له
بالطف عرسه ويومه
وملبس د طشو له
ريت اهله يحضروله
زفو  القاسم  الليله
__

قومن يالله عماته
وملبس د طشو له
نزف الحلوه بسماته
وملبس د طشو له
شبيه الحسن ابذاته
وملبس د طشو له
مدلل ابني  فرحوله
زفو  القاسم  الليله
_

وين اهل الشيم تحضر
وملبس د طشو له
عباس وعون وجعفر
وملبس د طشو له
وعمه حسين بوالاكبر
وملبس د طشو له
وشدة ورد يهدوله
زفو  القاسم  الليله


الخلود الحسيني
نسالكم الدعاء


بهذا الطور👇🏻

https://youtu.be/DL8YELO5Pbk?si=ualrt4WSqh1GnAw5