يمضيعه العرف وياي زينب بت علي آنه
ها يلمشرعه رديت هم رديت عطشانه

-----------------------------------

وينك يا نهر رديت چنت بديرة الغربه
يلما سيرت لحسين يمزيد جمر گلبه
منشوفك بعد منريد ماي العندك انشربه

تذكر صوت عبد الله
محد گاله اسم الله

من فز بسهم مذبوح
ناشف ريجه ولسانه
ها يلمشرعه رديت
هم رديت عطشانه


----------------------------------------

وين اهلي الهواشم وين محد منهم أگبالي
بلوه اخواني جوه الگاع دفنو شيبة الغالي
ها يا كربله يا ضيم موت الغربه أشوالي

ما يسوى العمر وأهلي
جوه اتراب ما ظلّي

من ذاك اليسر رديت
لاهلي اليوم تعبانه
ها يلمشرعه رديت
هم رديت عطشانه


-------------------------------------

يا ماي بظهر عاشور ياهو الگطع اچفوفك
مو تدري العطش چتال المن تجري ونشوفك
من چان السبط عطشان ما مديتله اجروفك

شنهي الصار مو أحنه
بدينه النار والجنه

ميفيد العذر يا ماي
هاي سكينه ذبلانه
ها يلمشرعه رديت
هم رديت عطشانه


---------------------------------------



رديت بظهر مكسور ردن روس اهالينه
من ضيم السبي من الشام لارض الموت ردينه
مو نفس الوجوه اليوم نحر حسين ماذينه

طف وشام والحسره
وشوغة فاطمه الزهره

كلهن ذني ملتمات
ردينه اعله موتانه
ها يلمشرعه رديت
هم رديت عطشانه


---------------------------------------

رديت وچهبت الماي وتروالي عبد الله
من رد للخيم منحور ياهو الگاله اسم الله
عطشان وسهم يا ناس زاره وبالنحر صلى

فل أگماطه بصوابه
چنه يصيح يا يابه

الله يساعدك يحسين
مات وليدك هنانه
ها يلمشرعه رديت
هم رديت عطشانه

---------------------------------------

شفت المشرعه أونيت بس ما گعدو أخواني ؟
محد منهم الخوان علناگه ايتلگاني
ها يابالفضل رديت ها يحسين هايه آني

خويه الفزعه مريوده
واني چفوفي مشدوده

خلانه الزمان ابعاد
كلمن ديره خلانه
ها يلمشرعه رديت
هم رديت عطشانه


كلمات الخادم / رعد الفريجي
ثوابها الى روح والدتي



@HxzEU1

#قناه_نشر_القصائد_المنبريه

ماتت زينب يهل الشام
تعبت حيل وحگهه تنام
يهل العيد الما تنساه
وباب الساعات المآساه
ماتت زينب

----------------------------------------

اذيتوهه ،، مرمرتوهه
بضحكة شامت تتلگوهه

ماكو أمروه ،، بشام البلوه
ظلت تتنفس بالگوه

ردت عافت الخوان كلهم موتى علغبره
رجعت والظهر مكسور تشبه مشية الزهره
يهل الشام تتذكرون يلمنكم الف حسره
حرمه وتنضرب بحجار مو سوده العباه حمره

من دم حسين وعباس
من زينب بسكم يا ناس
منكم يا ضيم التلكاه
وباب الساعات المآساه
ماتت زينب


-------------------------------------

يا دمعتهه ،، يا حيرتهه
من عدكم صارت لچمتهه

عيد وصفگه ،، هيچ الملگه ؟
وهيه بديرتكم مختنگه

زينب صعبه تدخل سوگ عين الوادم اعليهه
تمشي وعلرماح تشوف شالو روس اهاليهه
منكم لا حصل فزاع چا غيرتكم شبيهه ؟
ديره وصفت بس شمات كل الشام تاذيهه

تتشمت حتى النسوان
من ريت الوادم عميان
ولا شافو علويه هناه
وباب الساعات المآساه
ماتت زينب

--------------------------------------

يا ديرتكم ،، يا لوعتكم
روح ام عون الطلعت منكم

مو تعبانه ،،، مو ذبلانه
دمعه هنانه ولچمه هنانه

من ظلت ثلث تيام حتى الشمس حرگتهه
بذاك الباب چان الموت زينب يا مصيبتهه
تتفرج عليهه الناس هايه الحاله خنگتهه
چا ياهو اليجيهه بساع ياهو ايخبر اخوتهه

يحچي المنحر ظل ايات
ميت شاف ام عون ومات
زينب انتي يا أختاه
وباب الساعات المآساه
ماتت زينب

---------------------------------------

شتحاچيكم ،، ما تبريكم
بهذا الموقف اي خليكم

باچر محشر ،، نار وتسعر
هنا طاحت وهنا تتعثر

عجيبه الشام اه يلشام عيد أگبال
مسبيه
طبت للقصر وهناك شاف أيزيد علويه
طفله بنص خرابه اتموت فوگ الشيبه محنيه
أذى العتره ضيم الشام هم أوموت طاريه

نسوان تحاچي المذبوح
طلعت روح وطلعت روح
ويلاه اتگابل ويلاه
وباب الساعات المآساه
ماتت زينب




--------------------------------------


هذا التالي ،، ما صح والي
وحدهه ومدفون الغالي

باخر ليله ،، دمعه وشيله
ماكو العباس وتشكيله

موت الغربه ما ينراد أذا مو صايح وشهگه
ثاري الوحشه هم بالموت تبقى الروح مختنگه
فرگه بكربله وبالشام چن ما تخلص الفرگه
تكتل آخر اللحضات وين الكافل أتشبگه

محد يم زينب بالموت
غايب شيال التابوت
تنشال بچتفه ويمناه
وباب الساعات المآساه
ماتت زينب


كلمات الخادم / رعد الفريجي
ثوابها الى روح والدتي



@HxzEU1

#قناه_نشر_القصائد_المنبريه

((ليل موحش))



ليل موحش والجمر غطه السوالف
وتمشي بالضلمه العقيله

وال عقيله بهاي الشجون
مــن دمعها حمره الجفون
من وضعها تحچي المتون
جمر يويلي ...

وال عقيله رادت تروح
يـــا صبرها گـــوه تنوح
يا گلبها شگد بي جروح
ألم يويلي ..

طاح العلم ..
من چف البي شيم
وحرگو روح الخيم .. مسبيه

سوط وألم
صاحت راحو هلي
ماظل عنـــدي ولي .. مسبيه

يازينب ياويلي ...

"""""""""""""""""""""""""""''''''''''''"""

غربه والمذبوحه كل اخوتها غربه
والدمع يجري مسيله

ما يمر نوم بهل الضــلام
ما كو امان وماكو سـلام
حرگو العش أعله الحمام
زينب هضيمه ..

لا عشيره وماضن يجون
لا محامي وتبچي العيون
مو بديها وگلب الحـــنون
تنحب هضيمه ..

شافته من ..
طـــــايح فوگ الغـبره
وضهره الطابگ صدره .. ياخويه

ضلت أتون ..
يــــــابس دم الجرح
يل عالي أعله الرمح .. ياخويه

يازينب ياويلي ...

"""""""""""""""""""""""""""''''''''''''""

من طحت يبن الصميده خويه صاحو
هاي زينب طلعوها

يا اخوي وآنه بحـسرتي
بل خيول تاهت عيــلتي
والـ جيوش شافو هيبتي
ونضرو عليه ..

ضــل ينوح بدموع النحر
ضل يصيح والصوت بقهر
يا زمان وكـــــافل عــالنهر
صيحو عليه ..

راســـــــه بــــرمح
وعينه أتهل النضر
بگــــلبه نـــار النهر .. لهابه

ضـــــامــي وذبــــــح
ونحره إيصيح الخدر
جدمچ خويه بجــــمر .. لهابه

يازينب ياويلي ...

"""""""""""""""""""""""""""''''''''''''"""

منين اعرفك وانت صاير وذره وذره
حيره يبن امي الزجيه

وين اشوف وبعيوني حيره
يــــــــا صريع اختك أسيره
يا شهيد جبـت الحصـــيره
وأجمع وصالك ..

والـ تراب يلچم حنـينك
والـ عذاب يشرح ونينك
بل جروح ياخويه عينك
راحن وصالك ..

جيــــــتك أنه
دربي ما أندله
وأعثر ياكربله .. مسلوبه

والحــــيره مـــــــن
گلبي الحـد الضـــلع
وصوتي ضل ينسمع .. مسلوبه

يازينب ياويلي ...


عبد زينب
محمد الابراهيمي



@HxzEU1

#قناه_نشر_القصائد_المنبريه

لحن(ليل موحش)
بصوت
سيد محمد المصطفى الموسوي
حله

لماظل عدهة خوان … غربة يشيعوهة
زينب بت علي هاي … غربة يشيعوهة
…...
والله حيرتهة جبيرة الفاكدة اخوان
ليلهة اتكظي حزن بالون والاشجان
لا هي عدلة ولا هي ميته من الاحزان
راسهة ايشيب ابعمر عشرين لو جان

ما تبقى الهة افراح … الخوتهة اتركوهة
… ..
لو دنت منهة المنية ترفع الصوت
وين اخوتي الدللوني كرب الموت
كل فكرهة ايظل على شيلت التابوت
يا هو راح اليحملة وللمكبرة ايفوت

درب المكبرة أبعيد… خافأ يتركوهة
… ..
المالهة ظلو اهل تنطي الوجه وين
بالمنازع تستجير ابناس طيبين
اوهذا حال ام الخدر زينب ضوه العين
ابساعة الموت اندبت عباس وحسين

وين اخواني الاعزاز… صاحت واسمعوهة
… ..
وسفة شيعهة الغرب بت خير الانساب
يمهة ما واحد حضر من ذيج الاحباب 
وحشة دفنتهة العقيلة بيد الاغراب
ياعظم لوعته تحجي اعيون المصاب

مهضمومة ام الاحجاب… اغراب ادفنوهة
… ..
جانت اتحسب يجيهة الكمر عباس  
كبر يحفر الهة بيدة لا طم الراس
هذي جانت امنيات الحرة يا ناس
ابرايته اجفنهة لو كطعتهة الانفاس

ماتت دامعة العين … عالعباس  اخوهة
… ..

الحمد الله رب العالمين 
اللهم صل على محمد وال محمد 
موسى الخادم



@HxzEU1

#قناه_نشر_القصائد_المنبريه

زينب ع تخاطب العباس ع


يالتارس عيوني ضوة ... مر بية لو نسمة هوة
نبض الكلب ... بسمك يدك .... عباس عباس
......
يا نضبت اكليبي التدك ..... يا كلشي عندي
ما احتمل طاري الهجر ..... مرسال اودي
مو شيمتك يا با الفضل .... تتركني وحـدي
انه العقيلة ام الخــدر ... دمعي اعلى خدي

يل ماكو مثل امروتك ..... دنياتي وحشة ابروحتك
بيهة الحزن ...  شيد  وطن .... يا صاحب الباس
.....

بحلامي اشوفك ياشهم .... خوية نخيتك
بس نوم عيني ما خذت .... من فاركيتك
شهر انكظة يا سلوتي .... من ودعيتك
كـــل صبر ما بية بعد .... روحي فديتك

ادعيلي أبطل هالسهر ..... والليل انامة يا كمر
كثر السهر ... خلة الجفن .... فاكد للاحساس
....

عباس مات ومـــا يرد .... ما صـــدك بهــــاي
واعدني بالماي العذب .... يروي ضمة احشاي
وي روحي اسولف ياكمر .... ما ظلي كل راي
محتامة حـيل الشوفتك .... يــا نظر عيناي

موتك خذك مني غصب ..... يا اخر افراح الكلب
بعدك صبح .... يا كافلي .... لونة ابيض الراس

.....
كل اليوم الي مرني بسنة ... بعدك يكافــل
تشهـــد عـــلية غيــرتك .... يبن البواسل
ذابحني مــوتك يالاخــو .... مو مال اجامل
جم حسره جم لوعة الك .... دلالي شايـــل

حالي أبغيابك شوصفة …  بعدك على الدنية العفة
يرخص الك…  فدوة العمر… يا زين هالناس

........

الحمدلله رب العالمين 
اللهم صل على محمد وال محمد
موسى الخادم



@HxzEU1

#قناه_نشر_القصائد_المنبريه

مولاتي زينب عليها السلام
على دجة المغتسل تعاتب الماء

ياماي المن تجي  ... مات الورد ذبلان
گلبي انه لاموالك ... لخواني ضل عطشان
.........
بأم عون الغريبه اشذكرك ياماي
جاي ابياعذر وبيا وجه من جاي
توگفلي تريد ابموتي لا ماريد
وانته ابشدت الطف ماوگفت وياي

ماريد وجهك بعد ماريد
متعطل اشگد عالمواعيد
شتفيد جيتك بعد شتفيد

ياماي مالك وجه ... وبينه عفت نيشان
گلبي انه لاموالك ... لخواني ضل عطشان
،،،،،،،،،،،،،،،،،،،،،،،،،،،،،،،،،،
ياماي  ارد  اذكرك  بيه  شمسوي
شحيت بوكت بيه الشمس تجوي
تدوي الخيمه نار وانته ماهمك
وگلب ام الرضيع من العطش يدوي

بالخيمه تسمع عطش وصياح
وياماي اشوفك تجري مرتاح
وحسين گدامك جبل طاح

ياماي كف العذر ... من عندي ماخجلان
گلبي انه لاموالك ... لخواني ضل عطشان
،،،،،،،،،،،،،،،،،،،،،،،،،،،،،،،،،،
شعذرك تنگطع وانه الگلب ضامي
المثلك لو زحف هم يوصل اخيامي
احنه الصعديناك وخنت بينه
شلون اعطش وشوفك تجري گدامي

شسويت بخيامي شسويت
بالروح بس هموم خليت
مليت منك والله مليت

ياماي وكت العطش ... انته اطلعت خووان
گلبي انه لا موالك ... لخواني ضل عطشان
،،،،،،،،،،،،،،،،،،،،،،،،،،،،،،،،،،
لا توصلني يا ماي الگمر يزعل
كفالي الفحل تلمسني مايقبل
يالشحيت من جان العطش زلمه
شمالك ماوصلت الخيمه ماتندل

وين الله بيك العطش يندار
تحس بحرارت گلب الزغار
بالخيمه ماطفيتها النار

ياماي بالطف تره ... جرحك ابد ماهان
گلبي انه لاموالك ... لخواني ضل عطشان
،،،،،،،،،،،،،،،،،،،،،،،،،،،،،،،،،،
شذكر منك ومنك دليلي ايفور
تدري الخيمه توگع لوغفه الناطور
گبالك طايح الماعايف اخيامه
وانته ولا فعل لا من گلب مكسور

انه العقيله الشابعه هموم
مجروح گلبي وحيل ملجوم
ليهسه مني تسيل الدموم

ياماي كافي بعد ... والله الگلب خلصان
گلبي انه لاموالك ... لخواني ضل عطشان
العبد ابوفايز الرافضي
الفاتحه على روح والدي



@HxzEU1

#قناه_نشر_القصائد_المنبريه

ملا عباس الحسيني

يا هلا بزوارك.... عالعهد أنصارك
يمسموم يمسوم
......................
يابو طلبه الخدمتك كل أحنه خدام
شيب شبان ونسه شدينه الحزام
الطلعة ألمهدي عهد عالخدمه صيام
زايرك نفرشله جفن العين وينام
رايه تتبع رايه..... عالعهد وفايه
يمسوم يمسوم
...........................
عالجسر ياموسى بن جعفر وكفنه
هلا بالزاير هلا بسمك هتفنه
شلنه نعشك عالمتن لمن زحفنه
الزهره محنيه مشت ويانه شفنه
والرضا ويانه..... شيعك باحزانه
يمسموم يمسوم
......................
زحف للحضره أجت زوارك أزحوف
كصدت الكبرك تحج واتصلي واطوف
يا طبيب الكل مرض بالشدة معروف
الليلة كل زاير على الشباج ملهوف
علك شد ابابك..... ما ترد طلابك
يمسموم يمسوم
...................................
ياملك واسمك غريب وعاش سلطان
وصرت ثورة أعله الضلم والقيد عنوان
وينه هارون وجيوشه كان ما كان
هذآ أنته وتبقه أنته حرز قرءان
كل زمن تتجدد... وهوه أسود باسود
يمسموم يمسوم
.....................................
يا أمام التنكضي كل حاجة عنده
وانته باب الحاجه بابك ما تسده
أبابك الحاير يجي والعنده شده
تنكضي ومكسور خاطر ما ترده
يالكريمه أجفوفك.. كوم لاكي اضيوفك
يمسموم يمسوم
..........................
خادم خدمة الحسين
الشاعر
محمد الموالي



@HxzEU1

#قناه_نشر_القصائد_المنبريه

هاي السنه زواري ما اجوني
جيتهم تنشف دمع عيوني
واتنطر الاخبار    ما جوني الزوار
هاي السنه
****
تترقب بعدها وتنظر العين
احب زواري بيهم ريحة حسين
اكيد الزارني زاير العباس
عطر وياه جايب من الاثنين
سكته الصحن ماكو ضوه المناره
هاي السنه زينب بلا زياره
وبگلبي تسعر نار      ما جوني الزوار
هاي السنه
****
ظل خالي الصحن ماكو اليلطمون
نعشي اعله الأرض وين اليشيعون
وين الي يحبني ويگصد الشام
ما ترضون تبقه بحالها ام عون
مرتين گالو تنسبي وحچوها
راية نصر گدامي علگوها
وينه اليصيح الثأر   ما جوني الزوار
هاي السنه
****
خالي الصحن ما جاي انظر الناس
اذا ما شوفكم تخنگني الانفاس
ما ريدن غريب يصيح مرتين
مسبيه بعدها اخت عباس
گالولي بعدچ انتي خارجيه
اكرها كلش كلمة السبيه
بنت حيدر الكرار    ما جوني الزوار
هاي السنه
****
المرقد يحله بيكم هذا معلوم
كشختها السمه من تطلع انجوم
حيل ارتاح لمن يمي تلفون
اريدنها الزياره وياكم أدوم
ما ريدها ترد من جديد اليه
مرقدي بنصهم والحكم اميه
نفس الحكم اشرار     ما جوني الزوار
هاي السنه
****
هذا الفعل ذكرني بخبر كان
بس أيتام يمي وماكو اخوان
حكم ازيد رايد يرجع انوب
ينسد مرقدي وتنغلق بيبان
ما ناسيه السوط وحچي الشماته
اول شخص متعذب بمماته
جدي النبي المختار    ما جوني الزوار
هاي السنه
****
علي جبار الكعبي
الفاتحه لوالدي



@HxzEU1

#قناه_نشر_القصائد_المنبريه

اليوم حسين ما سير علينه
منتظرينه وتأخر ولينه
هسه شلون لو ينظر بدينه
حبلهم  حبلهم
***
اليوم ما سير علي راعي المحنه
يدري زينب شوف ما شبعانه منه
وانه من حسين اتاني دگت الباب
الهوه ظل يصيح زينب گطعي ظنه
يدري اليوم زينب وين ما وين
گلت شعجب ما سيرلي الحسين
يدري شكثر بنار انچوينه
هسه شلون لو ينظر بدينه
حبلهم  حبلهم
***
اليوم ما سير علي ما شافته العين
گلبي ظل ايگلي ما مر بيچ الحسين
گتله عاذرته يجي واعرفها الاسباب
المهم بيناتنه ما يدخل البين
المهم حسين سالم كلشي ايهون
اباب الخيمه يدري متانيه ام عون
تأخر مدري احنه تأخرينه
***
خلصت العصريه والمغرب لفاني
لا حسين ولا ابو فاضل اجاني
فارشه الخيمه واتاني وانتظرهم
من كثر ما تاني ملتني الثواني
اباوع للخيم والطم عله الراس
حسين هنا گعد وهنانه عباس
زينب حيل مشتاگه لحنينه
***
شگد لذيذه الگعده چانت يم اخوتي
الگمر يلزم بالهوه ويگلي فوتي
هاي راحت يا ابو فاضل من مشيتو
كلها يا عباس سمعت هسه صوتي
چنت محميه حتى من الهوه الهاب
جبرائيل يستأذن عله الباب
اليوم بسوگ كله احنه نسبينه
***
هاي اخر شوفه من گعدتنه هايه
هاي هيه حسين معناها النهايه
بعد ما نرجع سوه ويلتم شملنه
ابد ما نرجع بعد مثل البدايه
صباح الخير ما اسمعها هيهات
خويه حسين كلشي بروحتك مات
ايس يعني شخصك ما يجينه
***
علي جبار الكعبي
الفاتحه لوالدي



@HxzEU1

#قناه_نشر_القصائد_المنبريه

بالغرب زينب مدفونه

~
الزمن من ريحة الاحباب خـــلاچ
ورحل عنج بطف عاشور خلاچ
وحـــــيده ابولية الشمات خـــلاچ
وصارت حــــــــظرتج مثلج سبيه

والعده انزورچ منعونه
بالغرب زينب مدفونه
~

الدهر مارحم حالچ ليش يمعون
وگلبچ من مرار الحزن يــــمعون 
مادفنـــوچ يم عباس يـــم عون؟
اظن احـــــسين رادچ يــم رقيـه

ميت وبس تبچي عيونه
بالغرب زيــنب مدفونــه
~

أنه زينب وچـــم حسره ترابي
ومتت وعيوني لخواني ترابي
غريبه وبالغرب هـــــــالو ترابي
اولا واحد من اهلي مر عليه

عاشت وماتت محزونه
بـــالغرب زينب مدفونه
~
غياب حسين لحوالي يشلها
واجـروحي بعد محد يشلها
چنت لجنازتي اتــمنه يشلها
اخوتي والولد كلهم سويه

والدفن ولدي ايحظرونه
بالغرب زينب مدفونه
~
إنه الماله وكت حزني ولا يروح
وابد ماتشفه طعناتي واليـــروح
زين امشي يـهل وادم ولي روح
وخذت ولدي وخوتي الغاضريه

وهمي مايخلص تدرونه
بالغرب زينب مدفونه

~
الوكت ماينحمل ياناس ياراه
بالطف ماكو جار ايغيث ياراه
ابو فاضل گبل لا اموت ياراه
تطيب جروحي من يگبل عليه

ابطيحة الكافل سبونه
بالغرب زينب مدفونه
~
حيدر بشار الدراجي



@HxzEU1

#قناه_نشر_القصائد_المنبريه

(شلون الحال)


شـلـون الـحـال زيـنـب يـخـت الحسين

                                     *---------------*---------------*

ادري الــشــام مـا لــچ بـيـهــه عـوانــه
مــدري شـلـون گـلبـچ حـامـل احـزانـه
يـخــت حـسـيـن والـلـه الدنيا خَــوانـه

مــن راح الـخـدر صـــرتـــي بـدواويـن

                                     *---------------*---------------*

كـلهـه الناس غـربـه وغيـره مـعـدومـه
زيـن وضـل صـبـر عـنـدچ يمـظـلـومـه
مـالـومـه الـدمـع مـن يـجـري مـالـومـه

مـوتــچ يـــم أخـوتـــچ ادري تـــرديــن

                                     *---------------*---------------*

الشامـت مـن نشد عـن حالـچ شـلـونـه
وشـافـچ بالسبي وهـدمـچ گـلب لـونـه
يـزيـنب هـاي كـلـفـه وانتي مـصـيـونـه

يـبـت حـامــي الـحــمــه ومشيّد الـدين

                                     *---------------*---------------*

وسفـه النـاس كـلـهـه اعـليـچ مـلـتـمـه
وتـنـشـاف الـمـره عـنـد العـرب زحـمـه
سـبــيـه أم الـخـدر يـا مصعب الـكلـمـه

حملتي اشــگـد حچي عـگـب الميامين

                                     *---------------*---------------*

طبيـتي الـقـصــر والـبـي زلــم كـلـهـه
بـصـعـب حــال حــره وراح كـافـلـهـه
الـمـثـلـچ كــون واحـد مـايـصـد ألـهـه

حـيـف اعــلـــه الــزلــم مجلس تطبين

                                     *---------------*---------------*

يـربـات الـخـدر تــالـي الــخــدر هـايــه
كــفـيلـچ حـيـف  راح وراحـت الــرايـه
عليچ اشگد ثكيله وصـعبـه الـحـچـايـه

صـعـبـه شلون شامت مـن تــسـمـعـيـن

                                     *---------------*---------------*

✍خـادم زينب ع
الشاعر رعد الجريخي


@HxzEU1

#قناه_نشر_القصائد_المنبريه

أرزقيني
يـزيـنـب لـو حـلم وتـزورچ اجـروحـي
الجسد عندي ومشت يم عتبتج روحي
حــچي ربـعـي الاجـولـچ زيـّدوا نـوحـي

يجـونچ وانـي اضـل حايـر
وجـروحي لـصحنچ تسافر
أرزقيني الــوصـال ويـاچ
هضيمة ابقه اكسر الخاطر
ارزقيني..ارزقيني

اهواي أجيچ بأمنياتي ومرة ماجايچ صدگ
كون ابدل نبضي بسمچ اسمچ ابگلبي يدگ
والله لو ذكرولي أسمچ ريتي بسمچ تـختـنگ

عـشـگ ذيچ المنارة
عمة  گلوب الحيارة

ارزقينا الزيارة..ارزقينا الزيارة
____

أقبليني
عـبـد عـنـدچ وأجـيـت أبـابچ بهمي
حلم چا يمته أشوفچ صدگ ياحلمي
طفل گلبي ويگلچ زينب أنتي أمي

حـلـم مـافـارگ أضنوني
عـطش لـزيارتـچ لــوني
لو صارت صدگ يم عون
أجـيـچ بـدمعة أعـيوني
أقبليني… أقبليني

شكثر ربعي سولفولي ألزارو أعتابچ أمس
لازم يـزورچ يـيـمه الـراد بـالغربـه يـحـس
تكسر الواهس غربتچ لمن تغيب الشمس

ولو مره بحياتي
أجي أنه وأمنياتي

ارزقينا الزياره...... ارزقينا الزياره
____
عمه بعيني..

عـمـه بـعيـني اذا ما اشـوفن الگبّة
اليسولف بسمچ يفرّغ الـچ گــلبـه
اليعيش الغربه كون يموت بالغربة

ســؤال ابــالـي ومــچـلّــب
وجروحي اعله الگلب تعتب
دوم أسـمـعهم يـگـولـون
يـنـســد صـحـنـچ المغرب؟
عمة بعيني..عمه بعيني

والله لو بيدي اجيبن صحنج بنص كربـلـة
وگبتچ تحرسها اخوتچ ينترس صحنچ هلا
وبعد يا غربة التلوحچ زيـنـب انـتي مدللة

ونجي انادي الحبيبة
ولا نــلـفـظ غـريــبـة

ارزقينا الزيارة..ارزقينا الزيارة
____
يباريني
البچي وتدرينهه شگد تذبح السكته
أحسن بــالسبي گـبـرچ أذا زرتـه
اليزور حسين لازم هم يزور أخته

أهـيـم بـصـفـنـة أفـكـاري
يحـلمي بـلـيلي ونـهـاري
أشم قمصان اليزورون
أليزورچ جرحه تذكاري
يباريني… يباريني

حلمي أجيچ وأشم بابچ نهر دمعي مانشف
وأبسط أذراعي بعتبته مثل ذاك البل كهف
ما برد جرحي الغربتچ وما أشده شما نزف

العمل منـچ قـبوله
ردت عطـفچ أنوله

أرزقينا الزياره ………أرزقينا الزياره
____
يضي عيني
أشتياقچ لاخوتچ والغربه بضنونچ
بالشام وأحس يـم كربله عـيـونـچ
واجيچ آنة وخدم تحلـم يـزورونـچ

وأجيبن صـوغه ألـچ منهم
قـبـل لا أجـيـچ أزورنــهـم
أجيبن علگ من عباس
واجـيب اتـراب مـن عدهم
يضي عيني.. يضي عيني

أمنيتي مشاي أنه ازورچ وألگه كل خطوه هلا
وانذر اعتاب المسافة حافي اجــي مــن كربله
وأمشي مــابـيـن المواكب بـالـدمـوع الـهـامله

اليجيچ بشوگه زاير
تـرزقـينا المـشـاعـر
أرزقينا الزياره ………أرزقينا الزياره

✍️كرار رحمن
✍️حسين حمدان الدلفي


@HxzEU1

#قناه_نشر_القصائد_المنبريه

تشيع مولاتي زينب ع
٠٠٠٠ ٠٠ ٠٠٠٠
عله ام الخدر واويلاه

الحسره بگلبهه مؤجره وعالباب تربي عيونها
عله ام الخدر واويلاه

تذكرت درب السبي والشمس تجوي متونها
عله ام الخدر واويلاه

بغربه عمرها من گضه وخوتها مايلفونها
عله ام الخدر واويلاه

عباس مايحضار بعد خابت يناس ضنونها
عله ام الخدر واويلاه

وحشه الجنازه ياخلگ لو غربه اليشيلونها
عله ام الخدر واويلاه

ماتحتمل شد الحبل عوفوها التشدونها
عله ام الخدر واويلاه

وي غربه ميته من مشت بدرب السبي يذكرونها
عله ام الخدر واويلاه

ماتت بغربه ولا أهل يم زينب يشيعونها
عله ام الخدر واويلاه

راح الخدر وام السبي  من ماتت يسمونها
عله ام الخدر واويلاه

يا وسفه هاي ام الخدر وغربه ليدفنونها
عله ام الخدر واويلاه
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي



@HxzEU1

#قناه_نشر_القصائد_المنبريه

رحم الله من نادا وازينباه
… ..
هذه اول ليلة اله الهاشمية بالكبر
خل نصلي الوحشة اله وندعي ربنا بالصبر
غالية عدنه العقيلة اغله من هذا العمر
ما يكفي اعليهه نبجي ونلطم بحركه الصدر
رحم الله من نادا وازينباه
……
ماتت وعالخد دمعها راحه ما شافت ابد
كل عمرها احزان خلص اي وحك ربنا الصمد
الليله بالغربه دفنها صار من الله وعد
يمهة لا خوان حضرت لا حضر يمها ولد

رحم الله من نادا وازينباه
… ..
يم كبرهة خلي نمشي ياخلك نعلك شمع
وننصب ابحضرته مأتم ما يخلص امن الدمع
نقرأ زينب ياغريبه بصوت واحد مرتفع
ليله الحره العقيلة بيهة كلشي منفجع

رحم الله من نادا وازينباه
…… ..
الكربلة انرد بدمعنه انواسي الحسين الوالي
الله يعلم شنهو حالة الساعه بالهم مبتلي
امصاب اخيته اعليه عاد امصيبته الوالي علي
غالية الحرة اعله كلبه حكهة ناره تعتلي

رحم الله من نادا وازينباه
…… ..
الحضرت العباس ندخل بالعيون الباكية
بالنحيب وبالبواجي نقدم اعظم تعزية
عظم الله اجرك يكافل رايه نرفع عالية
والبقاء لله نصرخ يا عظيم التضحية

رحم الله من نادا وازينباه
… ..
الحمدالله رب العالمين
اللهم صل على محمد وال محمد
موسى الخادم



@HxzEU1

#قناه_نشر_القصائد_المنبريه

مولد الامام علي ع

گلبـي شمسويله ـ ياعلي
اوياك يسهر ليله ـ ياعلي
گلبي مجنون بغرامك وأنت جننته
🌷🌷🌷🌷🌷

يالملكت اگليبي كله وصـــــــرت نبضه
اســــــــــمك اتوضـه وجـوباً يله الفضه
انتــه قــرأن الحكــــــــيم وانتــه فرضه
كل حديث ايخص حياتك گمت احفظه
يالشغلت اذهاني ـ ياعلي
مذهـبي وقرئآني ـ ياعلي
گلبي مجنون بغرامك ونته جننته
🌷🌷🌷🌷🌷

انته ممـــلكة العواطف والمشـــاعر
كثر مابيك انه مغرم صرت شاعـــر
صـــورتك مرسوه بعماق النواضــر
عالمنـصه اتباهه بيـــك وعالمنـــابر
فرحتك نحييها ـ ياعلي
الفاطمه نهديها ـ ياعلي
گلبي مجنون بغرامك ونته جننته
🌷🌷🌷🌷🌷

استبشرت بيــك الانس والجـان كلها
مـولدك فـرحه وابـد ما صــــح مثلها
لايگــه الكعـــــــبه عليــك ولايگ الها
هالكـــــــرامه بس الك ربـك جعـــلها
وحدك انته اختارك ـ ياعلي
وبـارك  بـأنـــــوارك ـ ياعلي
گلبي مجنون بغرامك ونته جننته
🌷🌷🌷🌷🌷

والله احلى امن الشهد اسمك قريته
مــركز اگلوب البشــــر حبــك لكيته
مولدك شع بالســــمه وبالگاع صيته
العلي حبـــك يا علي ونطــــاك بيته
الك فاتــح بابه ـ ياعلي
انته اعز احبابه ـ ياعلي
گلبي مجنون بغرامك ونته جننته
🌷🌷🌷🌷🌷

الك بيت الله انفتح ونشق جداره
وبقــدومك رحب وســرفن ستاره
هلهلن بالفرحه اجن مريم وسـاره
يا وليد الكعبه انته اجمل بشــاره
اتشـرفت بقدومك ـ ياعلي
يالعظيمه اعلومك ـ ياعلي
گلبي مجنون بغرامك ونته جننته
🌷🌷🌷🌷🌷

ياهو قبــلك لقبوه ابحـــامي جـاره
ومــــــن يقــرر ربك يأيــد قـــراره
ياهو غيـــــرك ثبـت الديـن ابفقاره
ابكلهن اول يا علي ونلت الصـداره
انته آيه ورايه ـ ياعلي
والامل والغايه ـ ياعلي
گلبي مجنون بغرامك ونته جننته
🌷🌷🌷🌷🌷

    الخادم
كامل السعيدي



@HxzEU1

#قناه_نشر_القصائد_المنبريه