#شور
#اللحن موجود ♥️

اعوذُ بالله... من يومٍ يخلو مِنَ الحسين

ـــــــــــــــــــــــــــــــــــــــــــــــــــــــــــــــــــــ
من زغر سني وقريته اسمك ويرسم درب
لليحبك من فطرته للنثرت ابروحه حب
والگلب لو مايحبك شنهو فايدته الگلب


ياحبيبي.... انت مرسى لكل سفينه
ياحبيبي....للحموله ادموع عينه
ياحبيبي ... الك عبدك مد ادينه

اعوذُ بالله... من يومٍ يخلو مِنَ الحسينْ
ـــــــــــــــــــــــــــــــــــــــــــــــــــــــــــــــــــــ
بأبي انت وأمي كلمة من اعماقي تطلع
عميت عين لمصابك شافت وماترضه تدمع
والاذان الماتسمعك صم عسه وكلشي متسمع

ياحبيبي... ناذر ايامي لحضرتك
ياحبيبي ...شنو انه بلا خدمتك
ياحبيبي... الدمعه مفتاح لرحمتك

اعوذُ بالله... من يومٍ يخلو مِنَ الحسينْ

ـــــــــــــــــــــــــــــــــــــــــــــــــــــــــــــــــــــ

بكَ محيايْ ومماتي وبكَ ذريْ والنشور
كلشي مخلوق اعلمودك وللطم ذني الصدور
الزمني من كلبي بعزائك خافن ويه الدنيا ادور

ياحبيبي.... وسيدي ومفتاح رزقي
ياحبيبي.... وسر وجودي وسبب خلقي
ياحبيبي.... ومنك تعلمت صدقي

اعوذُ بالله... من يومٍ يخلو مِنَ الحسينْ

ـــــــــــــــــــــــــــــــــــــــــــــــــــــــــــــــــــــ
غيرك يباوعلي كوه وينظر بعين الزغيره
وانته ماخذني اعله كدك تباوع بعين الچبيره
ياولي النعمه الي عندي شيخي المغرگني خيره

ياحبيبي.... انه المقصر وتحبه
ياحبيبي... انه المفشل بذنبه
ياحبيبي... الدوم ماتقبل تأنبه

اعوذُ بالله... من يومٍ يخلو مِنَ الحسينْ

محمد صادق الخفاجي



@HxzEU1

#قناه_نشر_القصائد_المنبريه

هونك يدفان * ماعدهه خوان
مبينه غريبه هالمره // صفنت عليهه المكبره
//////////////////////////////////
الفاره الدنيه بسبيهه شباقي بيهه
شويه يادفانهه هون عليهه
بلكت آمن اخوانهه واحد يجيهه
خاف ماتدري الحبل رضرض اديهه
شوف النعش زين * هاي اخت الحسين
ياهو بسبيهه مادره // صفنت عليهه المكبره
//////////////////////////////////
جي غريبه بالنعش ينسمع ونهه
بالك اتراب اللحد يلجم متنهه
دموع غربتهه تره بخدهه جونهه
جنازه لا بيهه اخوهه ولا ابنهه
مبحوحت الصوت * ما جاهه زاتوت
جنازت غريبه محيره // صفنت عليهه المكبره
//////////////////////////////////
وسع اشويه الكبر خليهه ترتاح
ظلوع كسرو منهه تدري بكعب الرماح
طبع بالمحني ظهرهه تكض الصفاح
بالسبي يكومهه جانو شتم واصياح
التلجمهه الخيام * مسبيه للشام
ليش بحزنهه موزره // صفنت عليهه المكبره
//////////////////////////////////
شويه من الشوج فدوه نضف التراب
السحكته الشوج بجدمهه لهسه ماطاب
وللحجار اشويه اريدك تحسب احساب
بحجر اهل الشام صعبه انوب تنصاب
من كل سطح دار * راموهه بحجار
ويدرون بيهه مخدره // صفنت عليهه المكبره
//////////////////////////////////
جوه خدهه وصله خلي امنكعه احساس
وصله من راية اخوهه الكمر عباس
حزن زينب عالكفلهه عجب الناس
طول درب السبي غيره يدخن الراس
ما شافت افياي* كرهت شكو ماي
الشافت هذيج المجزره // صفنت عليهه المكبره
//////////////////////////////////
لا تعلي اتراب كبر الحره تزعل
اتراب الهوايه تره يذكرهه بالتل
انعادت الوحشه عليهه من الاول
شكد مصايب ياكلب زينب تحمل
طف كربله بعيد *** وشوفت اخو تريد
الشمات وكفو دائره // صفنت عليهه المكبره
//////////////////////////////////
تمت ____ علاء الزيدي



@HxzEU1

#قناه_نشر_القصائد_المنبريه

لهلنه امشينه ذوله مو أهلنه اهل الشام مابيهم محنه
ظلينه غريبات خاف انرد سبيات
**
دارت الايام بيه ورجعت محد الي
الياوكت ابقى غريبه وماكو واحد من هلي
امس كتبو يلا زينب فوگ جدراني ارحلي
صحت من رجعو اليه منين اجيبك ياعلي

اخذني وياك شلي بديرة الشام من زينب علي شتريد الايام
اريد بحضرتي اتبات خاف انرد سبيات
****
من زمان الشام غربه وناس تكره من زمان
خير لا تترجي منهم ذوله ما ألهم أمان
بعد وي گوم آل اميه عمه ما النه مكان
گومي خل نمشي لهلنه الكربله آن الأوان

اظل المن وشنهي ظلتي اهنا ويوميه اتهدد شيلي منا
اهواي بگلبي لجمات خاف انرد سبيات
****
بغربتي والصحن خالي اوين زواري اصيح
مرقدي اظلم او وحشه وخايفه الگبه تطيح
الأمس بالطف سلباني سلب اليوم الضريح
الشام واهل الشام عمه گلبي من عدهم جريح

ظلينه غرايب احنه الاثنين ورجعنه محد النه وتهمل العين
عدهم صرنه اسيرات خاف انرد سبيات
****
آه ياغربة رقيه الها گلبي ينعصر
سنين صار الها وحيده وبيها ما واحد يمر
مثل هالايام جانت ايمرها زاير تنتظر
يكسر الخاطر گبرها ويمها يفتر جم شمر

گبرها هالسنه بيد آل أميه وتهد الحيل غربتها رقيه
محد الها هيهات خاف انرد سبيات
****
ليش هاي السنه گبري يختلف عن السنين
جانت الزوار يمي وبيها ريحه من الحسين
كل سنه تگصدني جانت مثل يوم الاربعين
هالسنه محد اجاني والمواكب ذيجه وين

يحيون الزياره بگبري كل عام جا ليش السنه مايمي خدام
عافوني حرامات خاف انرد سبيات
****
الكربله خلينه نمشي ونترك اديار الغرب
اهناك نسكن بين اهلنه عمه وعزاز الگلب
بالعراق الناس طيبه علينه دمعتهم تصب
مشي كلهم يعتنونه وحنه نوگف عالدرب

من كل الدول تگصدنه زوار وتخدمنه المواكب ليل ونهار
اهناك انرد عزيزات خاف انرد سبيات
****
تمت
ميثم العمري



@HxzEU1

#قناه_نشر_القصائد_المنبريه

ردوا آل أميه يردوني سبيه
شعدها وياي الايام تجرح غربة الشام
****
أمس تعنوني وصاحوا بالإجماع
من أرضنه يالغريبه ارحلي بساع
كبتج نهدمها ونساويها للگاع
اليوم رجعو وستغلو هاي الأوضاع

شعندج صاحو اهنا بساعج امشي منا
هواي بگلبي آلام تجرح غربة الشام
****
انه زينب بت علي وانه الحبيبة
حاوطوا كبري ودوت نار المصيبة
وكلت هسه منين ابو فاضل اجيبة
ينظر بعيناه حال أخته الغريبة

يحضرني بغربتي وينشف دمعتي
ويبعد عني الاسهام تجرح غربة الشام
***
بغربتي ظليت ودموعي جريه
وردت واحد ياخلك يكَصد اليه
ابحضرتي أيطوف وبحضرت رقية
ويرد عنه وحشه الحضره الخليه

من بعد الهواشم يحرس گبري ظالم
تفتر يمي ظلام تجرح غربة الشام
***
اعتنت ليه رقية بدمع العيون
تكلي ذوله الناس من عدنه شيريدون
خل نهاجر للعراق الشيعه يوفون
ونسكن بين النجف وكربله كون

عمه جان أملنه نسكن يم اهلنه
لحسين الگلب هام تجرح غربة الشام
**
نسكن بين الأحباب وبين أهلنه
والعراق ايصير ياعمه وطنه
تهوه من كل فج عميق الشيعه النه
وكلها مشيايه تجي وتسر كلبنه

تخدمنه المواكب وما نرجع غرايب
وعدنه اهوايه خدام تجرح غربة الشام
**
صح اهلنه اهل العراق وناس طيبين
وحلمي جان اندفن يم عباس حسين
لاجن بهذا الامر ياعمه تدرين
ما اعوف الشام وحنه اهنانه باقين

الشام اتسمه بسمي وهذا المهدي يمي
جيته تحقق احلام تجرح غربة الشام
***
تمت
ميثم العمري



@HxzEU1

#قناه_نشر_القصائد_المنبريه

قصيدة لولادة الامام علي ع

يا حيدر.. يلمولدك فرحه وسرور
يا حيدر.. من العرش للدنيا نور
علي يا علي .. علي يا علي

…………......

اليوم يا دنيا افرحي وهلهلي
خبر عاجل صادر او واضح جلي
انشقت الكعبه لعلي وجابت علي
فدوه كلنه انروحله اني وهلي

دلالي.. وكل غالي.. يرخصلك فده
يا اجمل.. يا اترف.. من قطر النده
ما دام اسمك سيفي ما أهاب العده

يا حيدر..حبك يظل صك العبور
يا حيدر.. من العرش للدنيا نور
علي يا علي .. علي يا علي

…….............

اليوم عند المصطفى ابيته الفرح
ومو ابايه ابحيدره صدره انشرح
كلمن الناده علي بصوت وصدح
ما رسب والصاح يا حيدر نجح

لكل شيعي.. ياحيدر.. اسمك معجزه
وباسمك.. دين الله.. هادينه انجزه
يلحبك.. للعالم.. قطبه و مركزه

ياحيدر.. خالد رغم انف العصور
يا حيدر.. من العرش للدنيا نور
علي يا علي .. علي يا علي

………........

نور من المرتضى اعله الدنيا لاح
وانفلق من نوره وانشق الصباح
اكتمل الأذان حي اعلى الفلاح
علي للشيعي يضل ورده وسلاح

بعيوني.. وبضنوني.. ما اعوفن علي
يا أغلى.. ويا اثمن.. من روحي وهلي
ما تحلى.. ولا لاكت.. بس لجلك ولي

يا حيدر.. يلجيتك طيب و بخور
يا حيدر.. من العرش للدنيا نور
علي يا علي .. علي يا علي

………......

علي بساحات الحرب موت وفناء
لجن بلمسجد تواضع وانحناء
علي ما عاش التكبر و الرياء
علي هوه الي وضع معنى الوفاء

انته اول.. انته آخر.. بعيوني تضل
ما اعوفن.. ما اترك.. درب لا امل
تبقى انته.. ابدلالي.. اليوم وقبل

ياحيدر.. و ابمولدك اجمل شعور
يا حيدر.. من العرش للدنيا نور
علي يا علي .. علي يا علي

………........

اوياك دنيا وآخره يا ابا الحسن
لان بس بسمك احارب هلزمن
وما اخاف امن النوايب لو يجن
بس اصيحن يا علي اتروح المحن

كل عام.. وكل ليله.. انجددلك عهد
وما نخلف.. وانبايع.. نبقى اعلى الوعد
للشيعي.. يا حيدر.. اسمك ظل سند

يا حيدر.. فرحانه كل هاي الحضور
يا حيدر.. من العرش للدنيا نور
علي يا علي .. علي يا علي


…………......
الشاعر احمد العقابي الحياوي



@HxzEU1

#قناه_نشر_القصائد_المنبريه

هوسات للإمام علي ع



ابن ود من برز هل من مبارز صاح
عفه كال الرسول وصفگ راح ابراح
اشر على الاول گله ما مرتاح
اشر على الثاني گله ماكو سلاح
اشر على الثالث هبط ضغطه وطاح
انتفض وحده علي وسل  قابض الارواح

وچي هيبه حط بيده الرايه
……………

تدري بواقعة صفين يا چف حامل الرايه
وتدري ابواقعة الأحزاب ياهو الثبت الثايه
وياهو ابواقعة خيبر كفه وبيه الاكفايه
وكل ذني الكلتهن عود گطره من بحر مايه
وبس حيدر علي الكرار هوه الامل والغايه

اهلاً بلگنطر زنده وعبرت كلهه اعليه


الشاعر احمد العقابي الحياوي



@HxzEU1

#قناه_نشر_القصائد_المنبريه

اهازيج بمناسبة ولادة الامام علي عليه السلام




الكعبه بمثل هذا اليوم من عدها الجدار انشگ
ودخلت بت اسد للبيت عليها البيت رد اطبگ
ظلــت بي ثلــث تيــام وي أم الفحــل تطلـگ

(( طلگن بي الكعبه وأمــه ))

*

لحد هل اليوم ظل مفطور جدار الكعبه يا كرار
وركن البيت ظلت بي يحيدر من صرت اثــأر
الحاقد راد يمحي شلون ظل عاجز يحامي الجار

((  موجده بالكعبه أثارك ))

*

بالكعـبه بقه النيشان كـل حاقد تــره يشـوفــه
ومو بس هايه ياابوحسين غصبن سيدي يطوفه
شعاع الشمس ياغربيل يحجبه وهايـه معروفه

(( بيت الله انفطرت أركانه  ))

*
الشاعر
موسى البديري



@HxzEU1

#قناه_نشر_القصائد_المنبريه

لو يرد بيه زمان
وبوفاتج حاضر اني
برايتي ودمعة حناني
يزينب يزينب
++++++++++++
الناعي اتصوره لو جاني ينعه
ماتت زينبك عباس اسمعه
اگوم وعالوجه اخذلي وگعه
مفرع حافي اركض كلي دمعه

بركضي اعثرحيلي مختل
يشبه اصعودچ عله التل
حاير وفگدچ دهاني

يزينب يزينب
+++++++++++
بصوت الماله غيرچ رحتي عنّه
اعله نعشج راح اون شلون ونه
دمــع عباس زينب ماكو منّه
بي طعم الوفه وريحة محنّه

دمعت الكافل چبــيره
ابگد جرح ذيچ المسيره
امخيمچ جمره چواني

يزينب يزينب
+++++++++
الميته وناس غربه ايشيعوها
عليها اثار من چلمه الحچوها
عن اجنازة اخته وين اخوها
بعيده اطفوفهم يمكن نسوها

كون ارد ابعمري ليله
نعشچ اعله متوني اشيله
فكري يم گبرچ خذاني

يزينب يزينب
++++++++++++
اعليچ امن النهر چانت نظرتي
انتظارچ كسّر ابگلبي حسرتي
ابگد دعواچ وشگد انتظرتي
اعله نعشچ رايد انحبها عبرتي

غالي دمعي وما ابالي
بس الج مايبقى غالي
كلشي بغيابچ يعاني

يزينب يزينب
++++++++++
حزينه واضــح بوجهچ عذابچ
اعــرف وين يتجسد مصابچ
لا باقــي ولد يورث ثيابــچ
عدمن ضل حرز زينب حجابچ

البي عطر اختي الاميره
وفوگه اثر لوعة اسيره
وبي امل حرمه تتاني
يزينب يزينب
+++++++++++

ثائر الربيعي



@HxzEU1

#قناه_نشر_القصائد_المنبريه

استشهاد مولاتي فاطمة الزهراء (عليها السلام)


سائـل واجيـت البـاب رحمه
والگـيت يَمَـه البـشـر زحـمه
حسبالي خير ايطلبون
اتعنـو اثـاري ايذبحون
الما لِحگ حتى ايشوف أمه

سائل وگدما چنت اجي.... لدار الزجيه وحيدر
آخذ عـلم ويـه الخـبـز.... وعالم صبحت وأكـثر
ومن جيت هالمره شفت....لٓمـة شـياطين وشر
والباب غطوه بالحطب.... والنـار ظـلـت تسـعر

ومن صحت مو بيه الزجيه
طـعـن وضـرب رجعو عليه
وهنا عرفت اشيردون
اتعنـو اثـاري ايذبحون
الما لِحگ حتى ايشوف أمه
ــــــــــــــــــــ١ـــــــــــــــــــــ

امدمه على الگاع اوگعت....ايرفسون باب وأسـمع
إِرجـع اتـنـادي الطـاهـره.... وإي گـلت يمكن يرجع
شو واحد ايگل صـاحبه.... إدفـع بعـد حـيـل إدفع
فرصتنه بالبـاب احتمت.... خـتـمـوت بـالـك تطلع

بالـباب يـدفـع حيـل انظـره
ومـن الألـم تـصـرخ الزهـره
وكل صرخه بيها يفرحون
اتـعـنـو اثـــاري ايـذبحـون
الما لِحگ حتى ايشوف أمه
ــــــــــــــــــــ٢ـــــــــــــــــــــ

يا فضه لحگيلي اسمعت....عالارض ابني امدمه
چا غير عـدهم مستحه.... وينهون هـاي الهجمه
عالزهره بسياط ارجـعو.... وضـربـوهـا البلا ذمه
ويـسطـرها ذاك المـا إله.... بـيـن الزلـم اي كـلمه

اواحد يبـشـر الثاني هانت
بضـعة محمـد بيدي ماتت
ابموت الزجيه ايبشرون
اتعـنـو اثــاري ايذبحون
الما لِحگ حتى ايشوف أمه
ــــــــــــــــــــ٣ـــــــــــــــــــــ

حيدر طلع من إصرِخٓت.... اواحـد عــثـر بالثـاني
وبالكعبه اشجعهم قِسم.... يا ابا الحسـن مـو اني
وإِتباوعِت حيدر علي.... داس اعله راس الجاني
وفارسهم اسمع صرخته....ويــن ألـبـد اتـعـنـاني

ولو مـا علي امـوصـيه نبيه
چا سحگ روس الثلث ميه
وبـهـاي همـه يعـرفـون
اتعنـو اثـاري ايذبحون
الما لِحگ حتى ايشوف أمه
ــــــــــــــــــــ٤ـــــــــــــــــــــ

زينب والحسين وحسن.... شافوا شصار إبأمهُم
وگدما جرحهم هالوضع.... صـار الهـوه يلچمهم
يمهـم گِربت ومن شفت....شـگـد الجره امألمهم
حد صبري لهنانه وصل....واوگـعت ميت يمهم

وهـمه الصبـر مخـلـوق منهم
بس صبري ما يحمل حزنهم
ودنيا وأظل بيها شلون
اتعـنـو اثـاري ايذبحون
الما لِحگ حتى ايشوف أمه
ــــــــــــــــــــ٥ـــــــــــــــــــــ

أحمد البصراوي العبادي
اسألكم الدعاء والفاتحة لوالدّي



@HxzEU1

#قناه_نشر_القصائد_المنبريه

طايح كفـيلي  ــــ   صوب دليلي
هاي المصيبه  ــــ  زينب غربيــه
             طايح كفيلي
ـــــــــــــــــــــــــــــــــــــــــــ
ردللخيم يابوالــفضل  ضلمه   علينه
ماضل كفيل عل ضعن وحنه نسيبنه
احــــبال  العده  ياهيبتي  شدو بدينه
عكبك  يخو زيـنب  تره  وليه  انولينه
واحدضربنه  ــــ  واحــديسبنه
ماظلي والي  ــــ   وينك يغالي
مبعدخليلي ــــ   طايح كفيلي
ـــــــــــــــــــــــــــــــــــــــــــ
عوف العذب خويه صحت زينب تريدك
أمنيتي يردذاك الزمن  وجفوفي بيدك
انته الشجاع ال بالحرب  محديصيدك
وابن   الأمير البشدد   والكل  عبيدك
رايديذلهم    ـــ   بجفه أجلهم
بجفوفه رايه ــــ    ليث المـنايه
للغالي حيلي ــــ  طــايح كفيلي
ـــــــــــــــــــــــــــــــــــــــــــ
صعبه يخو زينب بقـــت زيـــنب وحـــيده
الجانت كبل يمك تضل هســه  وحــيده
منهو الي يكدر عــــالزمن  لينه وعيـــده
عيدي من اشوفك والكلب ماينسه عيده
ريتك تمرني  ــــ  بـٌعدك هظمني
راح من ايديه ــــ   ليث الحــميه
يدموعي سيلي ــــ طــايح كفيلي
ـــــــــــــــــــــــــــــــــــــــــــ
ماضلن لـزيــنب خيــم بـــــت الوديــــعه
ياوسفه ليث الموزمه ضـــــل عالشريعه
هاي المصيبه وعله الحرم هاي الفجيعه
جفوف الحمه راعي الفخر صارت كطيعه
ياهــــواليردنه   ــــ  ماتت ولـــدنه
كلفه الشماته ــــ   علطــــيبه ذاتـه
مايكضي ليلي ــــ  طـــــايح كفيلي
ـــــــــــــــــــــــــــــــــــــــــــ
تــالــي العمر بت فاطــــمه ضربو متـنهه
أذتهـــه والله مصــيبــتـك ردهـه لوطنهه
رايـــة يمـــينك ياكـــمر رادت جـفــنـــهه
وجانت تريد بـــكربلــه يــصـبـح دفــنــهه
تالي عمرهه   ــــ  يـــمك كبرهه
ياخويه وينك  ــــ  واسمع ونينــك
أبموتي اندعيلي ــــ  طايح كفيلي
ـــــــــــــــــــــــــــــــــــــــــــ
خادمكم قيس عوده الكعبي

ياحســـــــــــــــــــــــــــــــــــــــين =
ــــــــــــــــــــــ ١ ــــــــــــــــــــ

عـــنك ماشـيه يحسـين
وحـگـــك يالاخـو گـــوه
يــبـوطـول الحلو مذبـوح
عجيبه عله الارض تهـــوه
اجيت من الخيم يحسين
احـــشمك يـابــــو المروه
حركوها الخيم والنار
بـنــاتـك بـيـــها تـــتـــجوه

حسين حسين حسين
ــــــــــــــــــــــ ٢ ـــــــــــــــــــــ
من كثر الطعن نـاديــت
اخــوي ارسومـه متغيره
اجيت اوشفتك بهل حال
عـالطبره شفت طبره
وصلت اوشفته فوك الكاع
اويلي اوصاله مـتـــوذره
صحت معقوله هذا حسين
وكــفـت بـصـفه متحيره

حسين حسين حسين
ـــــــــــــــــــــ ٣ ــــــــــــــــــــــــ
جاوبنـي النحر ويكول
اني حسين يا زيـــنـــب
كلبي من العطش مفطور
جيبـي الماي اريد اشرب
يخويه اشلون اشربك ماي
بلا راس الجـسد يصعب
ينزف دمك عله الكاع
يـخـويـة ونــحـرك مـــتـرب

حسين حسين حسين
ـــــــــــــــــــــ ٤ ــــــــــــــــــــــ
شسولفك يشيخ الگـوم
اخافن الچم اجروحك
ريــت اخـيولـهم يحسين
سحگني او بقت روحــك
شجرة من البعد تنشاف
اســهــام الوادم اتلــوحـك
يگـلبـي لا تـبطـل النـوح
خـل يـعله بدمــــع نــوحـك

حسين حسين حسين
ــــــــــــــــــــــ ٥ ــــــــــــــــــــ
اجيت لمـصرعك يحسين
بضنـي للخـيم ترجــع
جــثـه لــكــيــتك بلاراس
جـثـت غــالي تتگـطــع
جدّامي واچذب العين
وشوفك واني ما اقـــنـع
مصيبه والكلام ايطول
وخـــاف ارقيـه لا تـسمع

حسين حسين حسين
ــــــــــــــــــــــــــــــــــــــــــ
الشاعر خالد جودي العارضي

ابيات ابوذيه
جروحي لاتضن بعدك    شلتها
ومشي دروب السبي ابنيتك  شلتها
رقيه  اتعبت  عود انه    شلتها
طاحت اسف ماشالنها اديه

انه بنت النزل هايم    وحلها
 رگد حيلي عله الراحو   وحلها
احبالي اشلون افلنها   وحلها
وصار اشهور مشدوده بديه

وينك يا رفيج الدرب     يرباي
لضعنه الشامت امن ابعيد يرباي
الشمربل حبل بين الناس  يرباي
الخجل موتني موگصات اديه

سلام البهادلي

ليليه اتوجه الچ ونعه  
كون اعله بابچ احترگ شمعه
من الغربه ماترتاحين      كافي بعد تنجرحين
يزينب   يزينب                 
****
مريني عله ضيم الشام خليني اجرع اللچمه
الي يدور جرح دخان بعد شيسوي بل نسمه
انحب خلصت عمري وعايش بعدچ بندمه
رافگت الجروح عليچ مثل اليل والنجمه

راحت اعيوني ومارحت يمچ  
من فدوه اروحن زينب الاسمچ
جرح البعد صار اسنين  من الغربه ماترتاحين
***
جروحي ماتطيب ادري لحدماكضن اعتابچ
وبچيلچ لحد ماموت حلوه الموته يم بابچ
امنيتي الرافگتني اسنين ازورن وشتم اترابچ
غريبه اليمته چاتبقين هضيمه وخلصوا احبابج

خلصتي عمرچ حسره وبهظمه 
   ولليوم ماتاركتچ الظلمه      
اشلون ابخرابه اتباتين  من الغربه ماترتاحين
**
البگلبه جرح زينب دمعه يتاني طاريهه
بس يسمع بسمهه ينوح لازم يبچي مابيهه
ايجافي دنيته كلها لجن ما ساعه يجفيهه
مبينه دمعته امن ابعيد وده اعيونه يعميهه

يم عون والله حيرتچ حيره
كل المصايب يمچ ازغيره
ابدفنچ اخو تحتاجين      من الغربه ماترتاحين
***
هنياله اليواسيهه ابزمنهه  قله  واسوهه
ابنعشهه الغربه تتعاون ماكو اخوان شالوهه
ماخلصت من الشمات حيل الشام تعبوهه
گالو هل مره من وين بعيد اهناك ادفنوهه

شخلت ابگلبچ كسرت الخاطر
اشصار بيچ ابليلة العاشر
بين الجثث تتعثرين   من الغربه ماترتاحين
***
اندفنت والاثر باقي ابمتنهه وچفهه اثر جمره
يضيم الخيم والعثرات طحتي وگمتي چم مره
الاثرهه يمسحه چف عباس اگبال الغربه متعثره
الكسره مو تطيح اخيام طلعت زينب الكسره

كون ابمصابچ اكسر اضلوعي
يم عون الچ مايكفن ادموعي
والله انتي ماتتجازين   من الغربه ماترتاحين
*
سلام البهادلي

قصيدت السيده رقيه
عليها السلام

وين  وينك يغالي  يجرحني حالي  تعال
وين بعدك عليه  يعني المنيه  محال
__
مشتاگه الحضنه والدلاله  وين الگه ابرقته وجماله
اشهگ نسماتي من شماله     انه ابنيته

تعبانه وشوگي تعباني    دمعاتي ابخدي سهراني
بچاني ابطيفه من اجاني      ياحنيته

الچنت اغفه عله اچفوفه راح ومابعد يرجع
انحرم من چلمت البويه  ومن اعيونه مااشبع

راح  هاي الهضيمه  ابنيتك يتيمه  تموت
وين بعدك عليه  يعني المنيه  محال
____
الله ياكسرت الخواطر    تلچمني چلمت الحوافر
گلولي انتضري بلكي باچر   وتشوفينه

محضرتله اسوالف الشفتهه   وچم فرحه ابعيني ماعشتهه
من بعده الدنيه ماردتهه   حلوه اسنينه

عافاني ادري مو بيده بس لاعل رمح راسه
الله العالم ابگلبه و شنو يندار بحساسه

ماي عطشانه اصيحن  كل ساعه اطيحن  وگوم
وين بعدك عليه  يعني المنيه  محال
____
دنيايه تركض ابجرحها  ماتنطي لحضه من فرحها
غلطان اليفتهم ربحها     واتحب الدم

رسمت احزاني في سماهه  اخذتني الهمهه والعناهه
بصف جرحي ضيعت دواهه  وانه اتألم

مومالت جرح وفراگ متعوده انه اشبگنه
من كثر الحنان البي امنيتي ما اتركنه

نار   گلبي وخيامي   النحرك سلامي  جروح
وين بعدك عليه  يعني المنيه  محال
___
منشفت الخيمه ماخذتني   ومنعدهه ابحرگه طلعتني
وترچيه الغربه سلبتني   وانه ازغيره

ساعتهه الخوفه بيهه چانت   منذيچ الحضه روحي ماتت
مرسومه ابعيني خيمه طاحت  هاي الحيره

تتماشه الصياط وياي كلما افترگ ومشي
السهام عليه تتصاگط وخذت من النبل رمشي

بچيت  تعبني متني    محد رحمني انسبيت
وين بعدك عليه  يعني المنيه  محال
___
منحضنك امشي للخرابه   هاك اسمع گلبي يامصابه
وي وادم شدت الحرابه     بنيتك ضاعت

جابولي راسك وشبگته  مجرح عذبني من عرفته
من عطشك مايي ماشربته  روحك هامت

بويه لاحيات ابلا   عيونك ونته تدريني
اموتن ويه راسك راح اخذني ولاتخليني

هاي  لحضه انتضرهه  روحي بقهرهه   تضيع
وين بعدك عليه  يعني المنيه  محال
__
سلام البهادلي

كافي بل غربه تعاي. ابكربله اشگدعدنه ماي
يمي اريدج خويه اصيح
ابچفي ابنيلچ ضريح
يزينب     يزينب
___
من غربتچ خويه زينب گلبي يعصرني عصر
من يسدونه ضريحچ ابگلبي مايبقه صبر
عيون التحبچ ابابچ تبچي بل حسره جبر
الضريح اشلون فارغ ناس ماكو من العصر

الغربه وين اتريد بيچ.  خويه متألم عليچ
الفكره اشوفنهه صحيح
ابچفي ابنيلچ ضريح
__
وياچ تمشي الغربه گامت مثل ضعنچ والسبي
اليازمن جرحچ ابگلبچ ويجرح بكل طالبي
ياهي مثلچ ضيم شافت وبختهه اشچم نبي
انتي بابچ باب الله بخته من بخت العبي

اوحيده وبعيده لوين. ادري بيچ مضيعه عين
گلب المفارگ جريح
ابجفي ابنيلچ ضريح
___
كربله مابيهه ضلمه كربلهه كلهه ضوه
حته چفي عليچ ينشد حضرالجرچ دوه
الشام يجرح بيهه كلشي حته نسمات الهوه
اليمته نتفارگ تعبنه خويه خل نلتم سوه

اليمته گليلي انتظر .. مرعلينه اچم عصر
نركض انزور الذبيح
ابچفي ابنيلچ ضريح
_
جيبي وياج العلاوي الخاطر اعيون الرضيع
وخبري السام وغربته احنه مانشري اليبيع
وخبري كلمن يحبنه حسين يم الله شفيع
احسين مشتاگ الرقيه بعد مايحمل تضيع

ماكوخوف من السهام.  اطفاله يم حضنه تنام
خيام مااسمح تطيح
ابجفي ابنيلچ ضريح
____
هاي امنيتي يخويه عندي اغله الامنيات
گبتچ يمي قريبه وبضريحچ كون ابات
الدنيه بس اجروح بيهه وفرگتنه من الحيات
الجمعه حلووه حيل احبهه مااحب طاري الشتات

امنيتي تتحقق يريت. وكربله اتصير النه بيت
شوگي مايكتم صريح
ابچفي ابنيلچ ضريح

سلام   البهادلي

نزله

أويلاه أويلاه ... يا زينب المظلومه
....
ما أنصف اوياج الدهر
جبتيهه لوعات وقهر
حزنج كُبر ماي النهر

على الأه على الأه ... عمرج خلص مالومه
......
ماشفتي راحه بدنيتج
مظلومه حتى بدفنتج
بيد الغرب موش اخوتج

يحوراء يحوراء .... متي بحزن مهضومه
....

ما واحد الصبرج وصل
حملج مثل حمل الجبل
من الولادة  للأجل

تنوحين تنوحين ... من الفرح محرومه
.....

هالليله ما واحد الج
عنج بعيده كل هلج
قاتل احسينج قاتلج

نضرتيه نضرتيه ... من نحره حز بالحومه
.....
مو هسه ميته من زمن
امن اجفوف اخوج اتكطعن
وانتي انسبيتي اويه الضعن

قسه اعليج قسه اعليج ... هذا الزمن من يومه
.....
باجر يجي ابن الطالبي
ياخذ الج ثار السبي
يشهد التل الزينبي

فلا يعوف فلا يعوف ... ثارج وحق اعلومه
......
كلمات
موسى الخادم

((تسافر دمعتي))


تسـافر دمعـتي ســاعـات وأيام
وأنه زينب بعدهي علتيّ الشام
بـهـيـده وصـار وني
ترى الشام الذبحني
علِتي الشام .. علِتي الشام

"""""""""""""""""""""""""""""""""""''''''''''

يَبسـت ورگةّ ايــامي
ولــن عزريل گدامي
گـــــتله منين تاخـذ روحي وتروح

أذا من جدمي مو سهله
أنه دست الجـــمر كــله
وأذا من عيني شفت حسين مذبوح

تـانيني يمـــلك المـــوت لَــــمه
يجيني الـكافل وبچفوفي ألزمه
وهَلبت مــــــا أشوف بزنده دمه
وأشبگنه أعله روحي وأرد أشمه

عـــاين يا ملك شــوف المصيبه
اخذني وروح فــكني من غريبه
القصر كلش جرحني
ترى الـــشام الذبحني
علِتي الشام .. علِتي الشام

"""""""""""""""""""""""""""""""""""''''''''''

عــــــالقبله يخلوني
بس مشتاگه يدروني
گبل لا موت هلبت نضره لحسين

گبل لاتخلص انفاسي
يگعد كون يَـــم راسي
وكـــون بچفه يمسح دمعةّ العين

يملك الموت لاتـحتار حيره
آنه البل حـــبل آنه الأسيره
أخذني ومحد ينادي الاميره
سبيه وهاي الحچايه چبيره

چبيره الشامت ينادي سبيه
وآنه اخت الهواشم هاشميه
المصايب من خذني
ترى الشـام الذبحني
علِتي الشام .. علِتي الشام

"""""""""""""""""""""""""""""""""""''''''''''

بــده عزريل يّدَنه
وآنه بروحي الونه
بخيالي أرسم ضعنه الصار طشار

أحسه من يمد إيده
وآنه صفـنتي بعيده
فـــــــز لَمن گلتله أشســوت النار

النار بجرحي تمشي وسوط أجانه
يقـــــابض روحــــي كلش عذبانه
شما نركض تــــرى يركض ورانــه
بنص نـــــار المخــــيم طبــــــبانه

احترگنه والعليل وشفته مچوي
يگلي عمه زينـب چــــــا شسوي
الخيل بهــاي أجني
ترى الشام الذبحني
علِتي الشام .. علِتي الشام

"""""""""""""""""""""""""""""""""""''''''''''

دمعتي حايره بســكته
الموت الما أجه بوكته
يريتك جاي من شفت الحوافر

من جانه المهر خالي
ونركض آنه وعــيالي
كون أهـــــناك جاي بيوم عاشر

كون بيوم عـــاشر ويّ اخوتي
لَمن وشل أعله حسين صوتي
من شفت النحر وآنـــه أبلوتي
يريتك جاي يامن انـــته موتي

تمنيتك بصف حسين ياموت
وعالغبره وأظـل بدون تابوت
ولا شامت يصــدني
ترى الشام الذبحني
علِتي الشام .. علِتي الشام

"""""""""""""""""""""""""""""""""""''''''''''

ترفرف روحـي بعيوني
وحسيت أنخطف لوني
ومن چــفوفي طلعت بيها چويات

بچت روحي على سنيني
على حسين وتـــــواسيني
وعلى درب السبي وجرح السبيات

اگل للــــروح روحي هاي هيه
شبعتي من الشماته من السبيه
بس ياروح خــل نمشي الرقيه
هلبــــــت تسكت ونگعد سويه

يروحي وما بعد لخواني جيه
فلــــت وأنتهت بــــالغاضريه
لچمني الطف لچمني
ترى الشــــام الذبحني
علِتي الشام .. علِتي الشام

عبد زينب
محمد الابراهيمي



@HxzEU1

#قناه_نشر_القصائد_المنبريه

لحن(تسافر دمعتي)
بصوت
ملا سيف اللامي
بغداد

مولد الامام الجواد عليه السلام.
ــــــــــــــــــــــــــــــــــــــ


مولدك نور اليقين
ياجواد...الطيبين
...........................

بتاسع انوار الحجج.
العرش هليله ابتهج.
والله فرحانه المهج.

بيك احنه امعيدين
ياجواد.. الطيبين..

...............................

بصحن موسى والجواد.
اليوم فرحانه العباد.
گاصده الباب المراد.

تبوسه وتعفرالجبين
ياجواد.. الطيبين..
..............................

للرضا نبعث سلام..
احنه من هذا المقام
نرسله بجنح الحمام

ورد بيه امحملين
ياجواد الطيبين.
..............................

اليوم بينه اجمل شعور.
لجل ابو الهادي السرور.
نترس. المحفل.. زهور.

بالولاده .امهللين.
ياجواد . الطيبين.
................................

نور بالمعموره ..لاح.
عطر جنه الليله فاح.
كل حزن منعدنه راح.

تضوي من نوره السنين.
ياجــــــــواد.. الطيبين.
.... ......................

المحب غازل فرحته.
اجه.. وشايل وردته.
يشكر الله .ابحجته

بالولاده امباركين.
ياجواد الطيبين.
...............................

✍️ أبو منتظر الحجامي



@HxzEU1

#قناه_نشر_القصائد_المنبريه