#الحسين_عليه_السلام
______

مصابك نبي و عايش بغار خيامك
يل عالترب فرشت الخيل اعظامك

نايم وسط حر الشمس ساكن دليلي
___

الحالتك تبچي السمه صار غيم من الدمه
وانته متوسد الترب طعنه و عذاب
نايم بطول الأرض امفرط و ما تعترض
فرشوا بجسمك مثل فرش التراب
حتى من لمك علي وصله وصله يالولي
و بحصيره جمعك أعظم مصاب
شلون حامل هالوضع موذر شلون الدمع
نايم أنته و كون لأجلك باضطراب

ضاع الفكر من شفت جسم بلا رأس
يالمنچتل و محروگ من نار الشمس

بألف و تسعمية جرح ساكن دليلي
___

اتغيرت ارسوم الوجه و للخيم من تتجه
تسمع أختك تندبك و أنته چتيل
شيخ تلهب غيرتك و الحميه اخذتك
تجمع بحيلك تريد و ماكو حيل
رغم كل هذا الحصل گمت و موذر وصل
من شفتها عالخيم هجمت الخيل
گطعوا الراس و گمت بموقفك هذا همت
غيرتك فزعت من ادماك التسيل

خالد صرت كل زمن شمسك تسطع
لا ما متت مو شمر نحرك يگطع

يل عالرمح راسك بقى ساكن دليلي
__

طحت لكن عالسمه وانته ابن حامي الحمه
ما أظن الگاع تحمل وگعتك
حرت بيك و ما حرت لمن گالولي طحت
شلون توگع و أنته كون بصايتك
أجزم أنه بهل الأمر طحت بس واكف عمر
يلي طبع اجبال ماخذ هيبتك
ما متت لمن متت طول الزمان اتخلدت
و الشمس مصدر ضواها گبتك

يابو علي الباري اجتباك و إيدك
و ابموتتك لا ما متت مو موعدك

تبقى على طول الدهر ساكن دليلي
___

شفافك الصارن خشب وجهك بلون الذهب
ضامي لكن دمك امرويله كون
اتوذرت بس جمعت الدين بالدم احفظت
أنته مصفر و نطيت الدنيه لون
چم أخو شفته وگع چم إبن نحره انگطع
اتكابر بدمعك يملاچ العيون
نشفت ارياگ القلم من تخيلت الألم
فتشت بالطف جروحك ما تهون

شذكر إنه بكل جرح روحك تنچتل
يمهن متت بس ترد لخيامك عدل

وبجروحي بعدك ما متت ساكن دليلي
____

يا بشر ما مثلك بشر انطى للعالم عبر
بيك متجمعة المدامع و الألم
چنت وحدك بالحرب و اترست دلالي حب
يا حقيقة بلا خيال و لا وهم
عشت بيه بلايه حد بكثر طعنات الجسد
بكثر حيرة زينب بحرگ الخيم
عيشتني بلا سبب لأجلي متحمل تعب
سيوف و ارماح و جراحات السهم

گلبك ردت و سلمته اليه بلا ثمن
راس برمح و عيالك لأجلي انسبن

يالمنذبح و المنسلب ساكن دليلي





كلمات / حسين الأمين

#ايام_السبي
_______

تشبه الخيل مشيت الليل
الخطوه مثل الحافر كِسرت ضلوع و خاطر
مشيت الليل
___

الدخان خانگني صحيح امن الخيم
لاچن ابدرب السبي الخطوه بسهم
امرافگه چتالك و شوف الألم
و راسك اشما انضرب يجريلي دم

انطر عيونك من يضربوني احس دمعك يهدلي
انظر عيونك حامي عن ارقيه يا زينب تگلي

اجروح الايام اتعادل اعوام
جفن المواجع ساهر كِسرت ضلوع و خاطر
__

الچلمه تكتل اشد من مية جرح
گدامي شماتي و شماتتهم ذبح
ايگلي زينب هذا اخوچ اعله الرمح
امن الگفه ايراويني راسك منذبح

ينگطع گلبي من يصدون اعله دمعاتي ابضحكهم
ينگطع گلبي انخي اخوتچ ولو بس هالروس عدهم

ضاعت الروح گلبي مذبوح
و بيّه كلشي حاير كِسرت ضلوع و خاطر
___

امدلله و اخيالي ما شافه احد
و عالهزل هسه امشي من بلد البلد
اعليه كل خطوه من الحافر اشد
و اعله كل نظرة زلم گلبي انمرد

عالرمح راسك وانه بين الناس صاير خويه خدري
عالرمح راسك حير بمرك واتركه للسبي أمري

فوگ الرمح نام واتركلي الآلام
الشمر بينه الآمر كِسرت ضلوع و خاطر
___

خله سوط الشمر ياكل بالمتن
الهظيمه ننشتم لمن نون
مثل طحنة جسمك انه انطحن
امن الألم من الضرب من الحزن

حسين ياحيره أمشي محنيه صفيت امن الضرب
حسين ياحيره هم سبيه وهم مره بديرة غرب

اتبدل الحال بيدي الاحبال
امن السبي و العاشر كِسرت ضلوع و خاطر
__

هاي آخر چلمه من بعدك رحت
للخرابه و انته تمشي للطشت
خويه اثگل محنه من عدها متت
من على الديوان مسبيه فتت

كلها شافتني الچانوا ايحلمون لخيالي النظر
كلها شافتني الگبل محد شافني غير الگمر

الله وياك الملتقى اهناك
من رقيه اتهاجر كِسرت ضلوع و خاطر





حسين الأمين

#ايام_السبي
_ - _ - _ - _ - _

رساله الى الامام المهدي (ع) عن ما جرى من لوعات في طريق السبي
_ - _ - _ - _ - _

دم المتن ينزف وعالنوگ ظل طايح
و راس برمح يهتف. وينك يبو صالح

رافجن چتالهن ما دريت بحالهن
__

شلون ابتدي يا سيدي
بحرگ العبي رضة يتيمه
ايتامه تون سوط المتن
چتّفوهم و الحرگ ما خله خيمه

بالبوادي اطفال تركض عالجمر
و جيش ينظر على الحرمه من تمر

بين الزلم تركض وخيامكم تلهب
ايتيم مترضرض وينادي يا زينب

شماتكم تنعالهن ما دريت بحالهن
______

بدرب السبي لون العبي
احمر غده و الناگه حمره
طيحة مره كلفه تره
يابو صالح عالوجه آثار سطره

تنظر الحافر عليه صاير دمه
أثر سحگ حسين من مات بضمه

طيحة مره صعبه و الحافر اليگتل
زينبكم بغربه ما واحد اليكفل

بس روس عد وليانهن ما دريت بحالهن
______

بخوف و حذر يالمنتظر
بالمسير شلون لو حرمه تطيح
بين الغرب دمهن يصب
و راس جدك يمهن برمحه ذبيح

شلون يهدالك گلب يبن الحسن
و الفواطم سلبوهن و انسبن

يحدي الشمر بيهن يا دم تصب عينك
محد يواسيهن چا الله اليعينك

ما حظر كفالهن ما دريت بحالهن
______

شحالك صرت من اسمعت
يمشن و يتلفتن صوب النهر
بحسرة ألم شافن سهم
و الچفوف امگطعه وكسرة ظهر

ها يمهدي حگها عينك تجري دم
عين عباس انعمت من السهم

عمتك على الهزل من شافت المنظر
و اليا جرح تحمل اموذرينه و امطبر

غير الدموع اشمالهن ما دريت بحالهن
______

بعيد الدرب كلهم غرب
التموا يمهدي و سلبوهن
عندك علم بين الزلم
بالمجالس يبن هاشم دخلوهن

ادري تذبح و أعتذر راعي الأمر
طبة الديوان تهظم باليسر

اگبال الزلم وكفن عماتك اتشاهد
و دموعهن يجرن و لا هاشمي گاعد

شكد هظم راواهن ما دريت بحالهن





كلمات / حسين الأمين

#زين_العابدين_عليه_السلام
_ - _ - _ - _ - _

يا سيد الساجدين تشبه ولي المؤمنين
بالحبل مچتوف ادين يا علي تشبه علي


امگيديها ايدك بالحبل والجامعه اتحز نحرك
متوارد اويه المرتضى هم الوصيه اتأسرك

شعنده وياكم يمولاي الحبل
انته مچتوف و علي گيدوا قبل
والله صعبه يا علي و ما تنحمل
اگبال عينك يضرب الحره النذل

هد اليسر كل حيلك والحرمه من تشكيلك
وراس برمح يوميلك يا علي تشبه علي
_

جدك قبل هم منچتف والزهره چانت تُعصر
حالك مشابه للوصي اميسريها زينب بالبر

على الناگه و المتن منها جريح
طفل ضايع طفل يا عمه يصيح
و انته تنظر راس الحسين الذبيح
و الحرم گدامك اتگوم و تطيح

طفله تناشد بالناس ماشفتوا عمنه العباس
و گدامك ايلوح الراس يا علي تشبه علي


الباب حرگوها گبل يمك خيم مشتعله
ابيت الوصي اتنزل وحي والخيمه چانت قبله

الباب و الخيمه صفن نفس الأمر
الباب عالزهره احترگ و ام الخدر
الخيمه شبّت و الاطفال بكل كتر
ظلوا ابين الحوافر و الجمر

باب فاطم وجت و خيمه هم احترگت
نارين عمتك شهدت يا علي تشبه علي


الله يعينك بالسبي ويه الفواطم وحدك
بالكوفه و الشام شكثر بيهن تفطر چبدك

شگد محن شفت و هظم لآل النبي
حجة الله اعله الأرض يمشي سبي
بحرم هاشم يا وسف يحدي اجنبي
ما فزع واحد عليهن طالبي

يا عروة المتقين تسمع انين الحسين
يا سيد الساجدين يا علي تشبه علي
__

من اوصلت يم القصر بالخارجي ينادونك
وراس الحسين بنص طشت وتنظر عليه عيونك

اگبال عينك ينضرب راس الحسين
شفته زرگه من كثر ضرب اللعين
الله اليعينك يزين العابدين
بالطشت راس الابو اتشاهده العين

ثگل الجرح ما يهيد بالشفّه يضرب يزيد
حال الوصي هم تعيد يا علي تشبه علي




كلمات / حسين الأمين

#ايام_السبي
____

بعد عز ماضيها حرمله يسبيها
الچانت اميره امدلله مگيوده تالي بسلسه
__

ستر الله و خدر حيدر تنسبي و ابلا ولي
السبي للعرب فشله عار ابد ما ينجلي
يطلبون ابثار بتهم و الصوارم تعتلي
وسفه ما واحد فزعها بسوك طبت بت علي

ابلا كفيل و رايه تفوت نص اولايه
دم المدامع سايله مگيوده تالي بسلسه
____

ادموعها بكل خطوه كوثر و الدمع احمر يصب
الچان ابو فاضل حرسها يشتموها و تنضرب
السوط ما توجع ضربته مثل چلمات الغرب
هاي اخوها ابرمح راسه و جسمه باقي اعله الترب

السبي جارحها و الحچي ذابحها
من بيت أشرف عايله مگيوده تالي بسلسه
_

كربله اخذت گلبها و السبي ماخذ عمر
طاح يم الشاطي ظلها و صار يحديها الشمر
التحلف الكوفه ابخدرها و بالعفاف و بالستر
طلعت بثوب الاميره دخلت بگيد اليسر

الدنيه دارت بيها من بعد واليها
المهيوبه اجتي الكربله مگيوده تالي بسلسه
_

درب وحشه تمشي زينب و الجرح يتبع جرح
ابدمعة ايتام و ثكاله حايره ابليل و صبح
اتشوف منظر للسبايه هوايه أشد من الذبح
ارقيه لو ضربوا متنها تركض الصوب الرمح

هظمه كل ايامها احتارت ابأيتامها
نسوان هاشم بالفله مگيوده تالي بسلسه
_

تالي ما تالي بخرابه بنت باء البسمله
بعد عين الگمر حارس صار ليها حرمله
لا سگف لا باب بيها فرجه أشرف عايله
أحجار و اسياط اضربوها بعد محنة كربله

حيره والله حيره دخلت اشچم ديره
اميسرها گدام المله مگيوده تالي بسلسه





حسين الأمين

#صاحب_الزمان_ع " موشح "
____

ها يبن عقد الوله و شجعانها
يمتى سيفك يرد دم وليانها
______

يمتى يبن المرتضى ثارك يرد
عندك اشچم ثار للحظه اينشد
واحد ابگلبك يوج ناره و تهد

اخ يا ثارات ابن عدنانها
____

حسين باقي عالتراب بكربله
عين منك مو دمع دم سايله
شنهو عملت بيه نبلة حرمله

انشدك و انته اتعرف نيرانها
______

گوم شوف حسين باقي ابلا صدر
كثر ما سحكت حوافرها العشر
مو ضلع بحسين واحد منكسر

اضلوعه كلها اطشرت امن امچانها
______

يبن هاشم وانتو للغيره نبع
أخذت الاعراب من عدكم ربع
جدك ابلا راس منه منگطع

و چم ابن من هاشم و صحبانها
___

واحد اليكسر ديليك بالالم
يوم ما عبدالله ينصاب ابسهم
ظن عذب يتروه ما حسباله دم

يا مصيبة كربله برضعانها
_______

حگه لون الدم يسيطر عالسمه
و الرماح اتشيل مهجة فاطمه
راسه مگطوع و ضلوعه امهشمه

و اخته تنظرله بغميج احزانها
_____

اخته ظلت وسط نيران و زجر
بعد ما شافت رجع خالي المهر
هجت ابهيمه و تريدلها ستر

بت علي و مخدرة صيوانها
______

هامت اعله التل بنت خير النسه
عسن تسمع چلمة الخويه عسه
صاحت بصوت الفجيعه يائسه

لو عدل يبن امي رد اعنانها
_______

ناطرت هلبت يرد ليها جواب
ويلي ما يگدر ايگوم امن الخضاب
نايم و متوسد احسين التراب

اتناشد ابحيره بقت وليانها
______

دورت عن ابن امها بالحرب
و الدمع غرگ البيده من يصب
احتارت شلون اتعرف وضعه صعب

چان عطره من السحگ نيشانها
____

گعدت اگباله تعاين منحره
تگول هذا حسين هوه يا تره
بس نحر و الثوب ماكو و خنصره

و الاسهام ابكل كتر اغصانها
______

وذره رفعت عله الاخره ولن تصيح
ربي منه اتقبل قربان الذبيح
هذا ابن خير الوره بالطف طريح

عجباني يا عظم ايمانها




حسين الأمين

#السيده_رقيه_ع
_______

آخر قصص نومتچ عن طفله يا عمه
امدللها ابوها شكثر تشبه ضوه النجمه
_____

هالطفله چانت عدها اهل اشرف بشر بين الناس
تمتلك حب ما ينوصف چنها ملاك من احساس
والدها ابن شيخ العرب وعم عدها اسمه العباس
احبيبة ابوها امدلله تشبه ترافتها الياس

والدها كلما تمر ايشم بيها و تشمه
امدللها ابوها شكثر تشبه ضوه النجمه
____

ما تگعد اعله الگاع ابد بحظن الابو لو عمها
صح ماكو ام عدها لچن عمتها صارت امها
كل الخوات الها يجن ابحاجتهن ايكلمنها
ما يرفض الها اي طلب والدها ما يحزنها

اربع اسنين العمر مو طفله چن نسمه
امدللها ابوها شكثر تشبه ضوه النجمه
_____

ويه الظعن هم هاجرت هالطفله كل السفره
نور الوجه ما ينطفي موصوفه بيها الدره
لن الزمن بيها انگلب لا أبو لا عم يبره
بعد المهابه يا وسف تمشي بحبل متيسره

تلتفت وين الاهل ما باقي بس زلمه
امدللها ابوها شكثر تشبه ضوه النجمه
_____

صارت سبيه و الضرب طول السبي اذاها
ضيعت ابوها و تنتظر هلبت يرد يلگاها
كثر السياط البل المتن ورم و تجري ادماها
طفله اسيره و بالحجر ايشامرون اعداها

مچويه من الجمر رجليها متورمه
امدللها ابوها شكثر تشبه ضوه النجمه
____

ما كملت القصة تره والختمه من اتنامين
يرقيه هذا آخر حلم و القصه بيه اتكملين
يوصل الچ و يناشدچ يا بنتي ابوچ انه حسين
تتشابگون و تنتهي يا عمه شبگات البين

اتشبگينه من النحر يوصل بلا جسمه
امدللها ابوها شكثر تشبه ضوه النجمه





كلمات / حسين الأمين

#زيد_الشهيد_ع

يالثار الحسين ثورتك هاتفه
_

اعله خط جدك سرت رغم المصايب
انته بن زين العباد ابن الاطايب
اعلنت ثوره و نشيدك بيها كاتب
يالثارت البقه فوگ الترايب

باقي طول الزمان نور الك ما طفه
يالثار الحسين ثورتك هاتفه
__

اعله بيبان الخلود اسمك شعاره
و أسست منهج شرف كل الغياره
الكربله گلبك بقت مشتعله ناره
دوم تلهج بالحسين اتريد ثاره

ساهرات العيون و جفنك ولا غفه
يالثار الحسين ثورتك هاتفه
__

صح متت لكن بقت بينه ثورتك
صح متت لكن بقت تضوي شمعتك
اتلث سنين ابلا دفن مصلوبه جثتك
جدك اتواسيه يا زيد ابقتلتك

ما الك من معين لا مناصر لفه
يالثار الحسين ثورتك هاتفه
__

اعله دربك سرنه نتخطه المنيه
وتلهب ابگلب المحب نارك سريه
يوم اجتنه اخيول حقد الناصبيه
كلنه صرنه جيش حشد المرجعيه

عالنهج سائرين والحشد وصّفه
يالثار الحسين ثورتك هاتفه
_____

حاولوا يا زيد بحروب الاباده
و التشيع ينتهي و ماكو عباده
صحنه كلنه ابصوت محلاها الشهاده
بدرب أهل البيت موتتنه ولاده

بهتاف السنين صاحت الطائفه
يالثار الحسين ثورتك هاتفه




حسين الأمين

#السيده_رقيه_ع

هظمني غيابك يبويه هظمني
تضمني اعله صدرك چفوفك تضمني

اجيت و ما شبگتك بس راسك نظرتك
___

ردتك تعتني و اغفه وسط حظنك
مثل ما بالحلم شفتك اشوفنك
ردتك تمسح براسي و احبنك
شو بس راس اجيت ابلايه چف منك

اشمك وانام اعله حظنك اشمك
اكلمك يغالي بدمعتي اكلمك

ردت اسمع كلمتك بس راسك نظرتك
__

منين اشتمك و مذبوح من نحرك
وين اغفه و مكان ابنيتك صدرك
اظن عطشان يابس شاهدت ثغرك
كون الموت ياخذ عمري وي عمرك

فرگتك تعادل مصابي فرگتك
رقيتك يبويه دحاچي رقيتك

ما فاگدها بنتك بس راسك نظرتك
___

بدروبي فقط اسمك بقه اويايه
ما متعوده افارگ وجهك اهوايه
بس عنك سؤالي امن ادخل اولايه
هظموني شكثر من هاي الاحچايه

يتيمه يصحولي انتي يتيمه
هظيمه و تظل بدليلي هظيمه

شكثر بالفربه ردتك بس راسك نظرتك
_

عن حالك اناشد و اترك احوالي
ليش الدم ترس وجهك يدلالي
عينك ما تصدلي أول و تالي
ما مشتاگلي معقوله يالغالي

يروحي انتظرتك تجيني يروحي
ينوحي الدرب كله عنك ينوحي

انادي و ما سمعتك بس راسك نظرتك
__

موش بحظنك انه و انته بحظاني
دمع عيني اتركه و اترك احزاني
مشتاگتلك آني يا بعد آني
من الفرگه بنتك چانت اتعاني

دمعتي تصب كل مسيه دمعتي
يبنتي ردت منك اسمع يبنتي

يمن تصعب فرگتك بس راسك نظرتك




حسين الأمين

#الحسن_المجتبى_ع ١
____
كأني بـلسان حال مولاي الحسين عليه السلام يخاطب اخيه الاكبر الحسن سلام الله عليه
_

أخذ مني صفر أول ظهر مكسور اليه
على الدنيه العفه والمجتبى راح من اديه

تولتني المحن حبيبي يالحسن
_

أول چلمت خويه غابت ما بين التربان
يالازم ظهري شو عفته يتچه ابحيطان
ابنادم خل يفگد كلشي ولا يفگد خوان
و انه شحالي دافن واحد اب مو بس اخ چان

على امتوني ركد نعش السند كل حيلي هده
من اعيوني الحچي خويه تجي لو ماكو رده

ميحلالك چفن حبيبي يالحسن
____

جسمك مو بتراب انوسده كون بحظني اتنام
ينهد حيله و يثگل مشيه الفارگ خويه احزام
يالتاكل من خيرك كلها وشبعت خاص و عام
صعبه اعله ابن امك من يصبح شوفك بالاحلام

خلص دمع النظر يمك نهر دمعي ذرفته
المصابك انهظم حتى الكرم يلي ملكته

اعاتب بالزمن حبيبي يالحسن
__

سم چبدك يامه لوعني وخله بيه اجروح
ياريت ابدالك يا خويه تصعد مني الروح
الحالك احزاني يالغالي و كلشي بيه اينوح
حسينك عگبك من يبراله عن خيك لتروح

يالاتريد السفر تدري انفطر چبدي بغيابك
كسر ظهري تره ما يجبره إلا جوابك

ارد كول اطمئن حبيبي يالحسن
____

نتشابه باچر بالمحنه غربه و ضدنه الناس
السمك بالطف هم يرجعلي يگطع مني الراس
چبدك متوذر و حسينك ايوذرونه و ينداس
عشرة خياله التسحگني من يرحل عباس

تمنيت العمر خي يستمر للطف اريدك
و تحت امرك انه وعالميمنه يوكف عضيدك

و همومي ينجلن حبيبي يالحسن
__

هاذي كسرت ظهري الاوله يبن امي بفرگاك
و ثاني كسره اتظل تتشمت بيه كل اعداك
من يوگع عباس و ينده يا خويه الله وياك
ارگضله بعثرات اجدامي ايشيبني الهم ذاك

اشوفه عالنهر مدمي الگمر ابلايه چفوفه
عيوني ينعمن وابلا دفن لمن اعوفه

و خواتك ينسبن حبيبي يالحسن





حسين الأمين

#الحسن_المجتبى_ع
___

السلامُ عالحسن السلامُ عالحسن
_

بسم ابو محمد عزانه يبتدي
و المصابه الگلب اسود مرتدي
جينه ملهوفين يمك سيدي

المدامع دم جرن السلامُ عالحسن
_

يا امام الثاني من بيت النبي
بظُلمه للآن استمر الناصبي
لا مناره و گبه عد الطالبي

غدرته أصحاب الفتن السلامُ عالحسن


شاف من اصحابه چان اشگد ظلم
بـ بن حيدر غدروا و راوا هظم
حتى نعشه من العده صابوا سهم

وحّده بوسط المحن السلامُ عالحسن
_

الحسن هو اصل هاي المسأله
من فكر تدبيره صارت كربله
أسس الثورة احسين الباسله

هو هم حاضر اذن السلامُ عالحسن


الشاهد بهل الواقعة القاسم يظل
من رفض عمه أذن حربه دخل
خميته و للمجتبى اوصيه حصل

النصرته موقف علن السلامُ عالحسن
_

عدنه غايه بمجلسك يمك بعد
عجلنه الغايب الداره يرد
انريد يرجع واحنه تحت امره حشد

ندعوا لاجله بكل زمن السلامُ عالحسن





حسين الأمين

#زيارة_الاربعين
_ - _ - _ - _ - _

للحبيب .. للطبيب خطوة اجدامي


كل سنه وكل عامي ما تهيد اجدامي
أمشي دربي ابهمه للحبيب الضامي

ما أمل لا اتعب والدرب ما يصعب
لازم اوفي بدمي للحسين و زينب

دربك شفت أسراره / والوادم زواره
و كل مرسل نبي
يشهد الله اعليه / لو گطعوا رجليه
اوصلك حَبي

اعتنيك إلا اجيك تصرخ ايامي
للحبيب للطبيب خطوة اجدامي
____

يا بعد كل ناسي تمشي حتى انفاسي
من اموت ابدربك يعتنيك احساسي

ما ندور اجره حجه و شچم عمره
گاصدينك نوفي لوعه من الحره

نصبت امك موكب / وترحب و تعزب
اهلا بالخدم
كل خطوه بممشاكم / عين الله ترعاكم
منكم و النعم

للحسين .. بالحنين أمشي للضامي
للحبيب .. للطبيب خطوة اجدامي
_

شنحسب من اجروحك ما غليت بروحك
للحشر هم لازم احنه نبقى انوحك

قدمت چم غالي وانته لا متبالي
من اعتنيك الگبرك بالحشر تبرالي

تشفع وحدك باچر / كلمن جالك زاير
وللجنه يطب
چاي الموكب نعمه / بي قدسيه ورحمه
وي ماي الدرب

بمشيتي رايتي ترف گدامي
للحبيب للطبيب خطوة اجدامي
___

الزاير إلي اتعده شيوفي شكر السجده
لازم اعله جروحك روحه مي تتنده

بختي كون اشكبره ويرضى ابن الزهره
الخطوه من نمشيها اتشافي جرح ابصدره

نسمع صوت المهدي / يصرخ آ يا جدي
و دموعه حمر
شايل بيده الرايه / و متعني مشايه
ايواسي ام الخدر

اويه الامام بالغرام الكربله آلامي
للحبيب للطبيب خطوة اجدامي
__

نمشي ليك بلهفه والعشگ ما يغفه
يا هدوء الهايم والگلوب الترفه

بيه الله يعلم للمسير امحزم
انعدها لحظه بلحظه بربعينك نحلم

كل يوم وكل ليله / لله انظل ندعيله
نمشي هالسنه
من حبك و الحبك / نرفع راية دربك
هذا اقصه المنه

و الكتاب بالحساب تغفر آثامي
للحبيب للطبيب خطوة اجدامي
___

يمك اشمحلاها موتتي و اصفاها
بدرب حبك ماشي يا كبر مسعاها

اليگصدك يرجع خير منك يشبع
حاشه تهظم واحد يندب و ما تسمع

المتعنيلك گاصد / وي گبرك متواعد
عاشگ عالوعد
عايف اهله و ناسه / وگاصدلك بحساسه
نار و ما برد

بالمشي يا علي اترفرف اعلامي
للحبيب للطبيب خطوة اجدامي





كلمات / حسين الأمين

#زيارة_الاربعين ٢
__

لحن باسم الكربلائي قصيدة طفو الگمره
_ - _ - _ - _ - _

گبرك ... نحتمي بسوره _ ياهو اليزوره
ينوح المصابك
جرحك ... يسري وي دمنه _ وي مدامعنه
نطيح اعله بابك

ما مشينه اعله الجمر گاصدينك نعتذر
____

يا حسين انته الطبيب الكثرن اجروحه
زايرك من يعتنيلك تطمئن روحه
اربعينك على العالم خيّم ابنوحه
گبرك الكل البشر بيبانه مفتوحه

قدرك ... ما يلوحه انسان _ ضامي بس سلطان
ملكت الضماير
سرك ... معجزت الهام _ شما گضت اعوام
تزيد الشعاير

يا عظيم و مقتدر گاصدينك نعتذر
____

نعتنيلك كل سنه نمشي اعله لهفتنه
خاطر انفرح دليلك لو تشاهدنه
ندري بيك انته العبادة الواجبه النه
و لهذا انگول لجلك الله خالقنه

نمشي ... لشوفت عيونك _ انخلي مضمونك
عقيدة گلبنه
كلشي ... قدمت قربان _ اهلك و صحبان
ضحايه لأجلنه

صعبه نوفيلك عشر گاصدينك نعتذر
_

يالمشت اختك اسيره بثورة الغايه
لون طول العمر نمشي دون الكفايه
لكن انواسي العقيله بهاي الحچايه
واجباً مو مستحباً نرفع الرايه

نگصد ... انواسي العتره _ زينب و اسره
علي و الزچيه
نگعد ... يم ابو فاضل _ انگله يا كافل
اخيتك سبيه

جايه ليك من اليسر گاصدينك نعتذر
____

كل مشينه ما يوافي لوعه من گلبك
اچبير جرحك و الطريق ازغير ابدربك
انته صح ضامي و لكن نرتوي بعذبك
احنه ما عدنه وسيلة غير بس حبك

الزاير ... بالعمر مره _ تعتني الگبره
بيوم القيامة
الحاير ... لو وصل منكر _ بصايتك تحضر
تحيط الخدامه

انته راعي هالامر گاصدينك نعتذر
_

بدربك انشاهد معاجز و العقل مبهم
طه يمشي الحد ضريحك قبّله و سلم
واگف و ناصبله موكب حيدر امحزم
فاطمه اتوزع بديها و الحسن يخدم

بيهم ... من يمر زاير _ الحسن حاضر
يرحب مضيفه
ليهم ... اليعتني طالب _ ما يرد خايب
علي حامي ضيفه

يوگف ابيوم الحشر گاصدينك نعتذر




كلمات / حسين الأمين

يمكنكم الآن الاستماع لإصدار
الحاج #باسم_الكربلائي 1444
عبر التطبيق الرسمي
-
IOS Link : https://bkmedia.page.link/qgkft7e2dqPBdYYD9

Android Link : https://bkmedia.page.link/RWDa
-
#محرم_الحرام

صوت الزهراء عليها السلام و سلطان المنبر الحسيني يستمر في نشر مظلومية أهل البيت عليهم السلام بكل الوسائل الإعلامية

#لو_ويه_الزچيه_انصير_لو_وي_آل_اميه

#رجوع_السبايا
_ - _ - _ - _ - _

عاد الظعن هاليوم لارض المدينه
خالي و بلا قرآن نسمع ونينه

مهامس نفوس وين الشموس
نسمع ونينه
_

رجع ظعن السبي هاليوم لارض المصطفه المختار
خالي من ابو اليمه لا حامل لوه الكرار
نشدت گومهم حسره وين الصحبه و الاخيار
ظلت مسألة تفكير و گلب ام البنين احتار

وصلت لعد النوگ تسأل عليهم
وين الگمر عباس وينه وليهم

و الكل عبوس وين الشموس
نسمع ونينه
___

ابتده أول سؤال ايكون وين حسين ابو اليمه
خافن يم گبر جده يزوره و يندعي يمه
حرز أرض المدينة حسين گمر بيها اعله كل نجمه
ما يدرون ابو السجاد خيل اترضرض ابجسمه

واعله الأرض مطروح شيخ العشيره
و رأسه برمح مشيول جسمه بحصيره

و حافر يدوس وين الشموس
نسمع ونينه
_

سأل سائلهم ابحرگه وين الظيغم العباس
معقوله يعوف حسين ولسه بريّته الانفاس
ما سمعوا على الشاطي وگع يمه شديد الباس
سهم العين چفينه وفضخوا بالعمود الراس

يم الجرف مكتوب عذراً يخيتي
عذريني لو بالشام مجلس وگفتي

بين الرؤوس وين الشموس
نسمع ونينه
____

بقت هالناس متحيره جاسم وين و الاكبر
ولد عم چانوا يشبهون خوة طه وي حيدر
اخبرونه اشجره و شصار جاوبهم دمع احمر
جاسم طايح ابدمه و الاكبر جسمه اموذر

ظل الحزن بالروح و الدمعه تنزل
منهم بعد يا موت لا ما نحصل

انطوا دروس وين الشموس
نسمع ونينه
___

سألوا چا بعد طفلين لا عبدالله لا ارقيه
مهد خالي يرد اشلون وغلات حسين ماهيه
صاح الهم بقت يمه اعله راسه وجتها المنيه
وعبدالله اعله صدر حسين نايم جثه مدميه

ارقيه اجاها ابطيف عبدالله باسه
طفله اعله ايده مات بنته اعله راسه

براسه تبوس وين الشموس
نسمع ونينه




كلمات / حسين الأمين

#استشهاد_الرسول_ص ( موشح )
_____

من رحت للجنه يا هاديها
عترتك هالامه غدرت بيها
______

بس سبلت ايديك و اغمضلك چفن
شاهدوا كل المصايب و الحزن
عترتك بعدك تره بغربة وطن

ماكو واحد يالنبي ايراعيها
__

بعده عطرك چان ما رايح تره
و كسّروا ضلع الزچيه الطاهره
و دارها شبوها نار اموجره

الجاهليه رجعت اتحابيها
__

عدت اسنين و اجت ليلة قدر
لن وسط بيت الله مستشري الغدر
و صوت ناعي ينعى حيدر منطبر

طاحت الخيمه و رحل واليها
__

تنهظم يا طه من هذا الكلام
دسوا السم للحسن ثاني امام
گطّعوا چبده بحقدهم هاللئام

بعد ما خانت عهد باريها
___

من بعد ذيچ المصايب و البله
مرت اعله حسين اعظم مقتله
كربله و آه من نوايب كربله

انگطع نحره و چبدته امصوبيها
____

الما تصير ابلا عروبه و لا شرع
اخذوا النسوان بدروب الفزع
وحده من السوط وحده امن الضلع

و كل بناتك للدعي سابيها
___

اثمانيه من عترتك بالسم گضوا
علي و الباقر و جعفر ليك اجو
و الجواد و موسى بغداد اعتنوا

الهادي و ابنه و الرضا ماذيها





كلمات / حسين الأمين