#زيارة_الاربعين
__________

لحن باسم الكربلائي قصيدة طفو الگمره
_ - _ - _ - _ - _

گبرك ... نحتمي بسوره _ ياهو اليزوره
ينوح المصابك
جرحك ... يسري وي دمنه _ وي مدامعنه
نطيح اعله بابك

ما مشينه اعله الجمر گاصدينك نعتذر
____

يا حسين انته الطبيب الكثرن اجروحه
زايرك من يعتنيلك تطمئن روحه
اربعينك على العالم خيّم ابنوحه
گبرك الكل البشر بيبانه مفتوحه

قدرك ... ما يلوحه انسان _ ضامي بس سلطان
ملكت الضماير
سرك ... معجزت الهام _ شما گضت اعوام
تزيد الشعاير

يا عظيم و مقتدر گاصدينك نعتذر
____

نعتنيلك كل سنه نمشي اعله لهفتنه
خاطر انفرح دليلك لو تشاهدنه
ندري بيك انته العبادة الواجبه النه
و لهذا انگول لجلك الله خالقنه

نمشي ... لشوفت عيونك _ انخلي مضمونك
عقيدة گلبنه
كلشي ... قدمت قربان _ اهلك و صحبان
ضحايه لأجلنه

صعبه نوفيلك عشر گاصدينك نعتذر
_

يالمشت اختك اسيره بثورة الغايه
لون طول العمر نمشي دون الكفايه
لكن انواسي العقيله بهاي الحچايه
واجباً مو مستحباً نرفع الرايه

نگصد ... انواسي العتره _ زينب و اسره
علي و الزچيه
نگعد ... يم ابو فاضل _ انگله يا كافل
اخيتك سبيه

جايه ليك من اليسر گاصدينك نعتذر
____

كل مشينه ما يوافي لوعه من گلبك
اچبير جرحك و الطريق ازغير ابدربك
انته صح ضامي و لكن نرتوي بعذبك
احنه ما عدنه وسيلة غير بس حبك

الزاير ... بالعمر مره _ تعتني الگبره
بيوم القيامة
الحاير ... لو وصل منكر _ بصايتك تحضر
تحيط الخدامه

انته راعي هالامر گاصدينك نعتذر
_

بدربك انشاهد معاجز و العقل مبهم
طه يمشي الحد ضريحك قبّله و سلم
واگف و ناصبله موكب حيدر امحزم
فاطمه اتوزع بديها و الحسن يخدم

بيهم ... من يمر زاير _ الحسن حاضر
يرحب مضيفه
ليهم ... اليعتني طالب _ ما يرد خايب
علي حامي ضيفه

يوگف ابيوم الحشر گاصدينك نعتذر




كلمات / حسين أحمد الأمين

#زيارة_الاربعين ( 2 )
_ - _ - _ - _ - _

نمشي الضريحك مولاي توفقنه


كل سنه وكل عامي ما تهيد اجدامي
أمشي دربي ابهمه للحبيب الضامي

ما أمل لا اتعب والدرب ما يصعب
لازم اوفي بدمي للحسين و زينب

أمشي دربك و الدرب يسهل عليه
امن اذكر اعيالك مشت عنك سبيه

امصابك يبو اليمه هواي يألمنه
نمشي الضريحك مولاي توفقنه
________

يا بعد كل ناسي تمشي حتى انفاسي
من اموت ابدربك يعتنيك احساسي

ما ندور اجره حجه و شچم عمره
گاصدينك نوفي لوعه من الحره

انطيت دمك حتى توصل غايه لينه
و احنه يمك عالعهد مولاي اجينه

بزينب نحلفك اليوم تقبلنه
نمشي الضريحك مولاي توفقنه
_________

شنحسب من اجروحك ما غليت بروحك
للحشر هم لازم احنه نبقى انوحك

قدمت چم غالي وانته لا متبالي
من اعتنيك الگبرك بالحشر تبرالي

جايك امقدم الك روحي هديه
الخطوه لجلك تنحسب عد الله ميه

بكل خطوه واگف عباس يشجعنه
نمشي الضريحك مولاي توفقنه
___________

الزاير إلي اتعده شيوفي شكر السجده
لازم اعله جروحك روحه مي تتنده

بختي كون اشكبره ويرضى ابن الزهره
الخطوه من نمشيها اتشافي جرح ابصدره

نبقى وي حسين تربايت مجالس
كل ثقافتنه تره امن اجنون عابس

يرخص للحسين الكون شنو دمنه
نمشي الضريحك مولاي توفقنه
__________

نمشي ليك بلهفه والعشگ ما يغفه
يا هدوء الهايم والگلوب الترفه

بيه الله يعلم للمسير امحزم
انعدها لحظه بلحظه بربعينك نحلم

اليجيك ابگلب أبيض ما تعوفه
يرجع اكتاب الشكر حاضن چفوفه

تتشكر الزهره اتگول يعاشگنه
نمشي الضريحك مولاي توفقنه
___________

يمك اشمحلاها موتتي و اصفاها
بدرب حبك ماشي يا كبر مسعاها

اليگصدك يرجع خير منك يشبع
حاشه تهظم واحد يندب و ما تسمع

اليگصدك حاشه يرجع لهله خايب
و انته بحر من الكرم يبن الاطايب

حاشه ترجّع محتاج تهظمنّه
نمشي الضريحك مولاي توفقنه





كلمات / حسين أحمد الأمين

#رجوع_السبايا
_ - _ - _ - _ - _

عاد الظعن هاليوم لارض المدينه
خالي و بلا قرآن نسمع ونينه

مهامس نفوس وين الشموس
نسمع ونينه
_

رجع ظعن السبي هاليوم لارض المصطفى المختار
خالي من ابو اليمه لا حامل لوه الكرار
نشدت گومهم حسره وين الصحبه الاخيار
ظلت مسألة تفكير و گلب ام البنين احتار

وصلت لعد النوگ تسأل عليهم
وين الگمر عباس وينه وليهم

و الكل عبوس وين الشموس
نسمع ونينه
___

ابتدى أول سؤال ايكون وين حسين ابو اليمه
خافن يم گبر جده يزوره و يندعي يمه
حرز أرض المدينة حسين گمر بيها اعله كل نجمه
ما يدرون ابو السجاد خيل اترضرض ابجسمه

اعله الأرض مطروح شيخ العشيره
و رأسه برمح مشيول جسمه بحصيره

و حافر يدوس وين الشموس
نسمع ونينه
_

سأل سائلهم ابحرگه وين الظيغم العباس
معقوله يعوف حسين ولسه بصدره الانفاس
ما سمعوا على الشاطي وگع يمه شديد الباس
سهم العين چفينه وفضخوا بالعمود الراس

يم الجرف مكتوب عذراً يخيتي
عذريني لو بالشام مجلس وگفتي

بين الرؤوس وين الشموس
نسمع ونينه


بقت هالناس متحيره جاسم وين و الاكبر
ولد عم چانوا يشبهون خوة طه وي حيدر
اخبرونه اشجره و شصار جاوبهم دمع احمر
جاسم طايح ابدمه و الاكبر جسمه اموذر

ظل الحزن بالروح و الدمعه تنزل
منهم بعد يا موت لا ما نحصل

انطوا دروس وين الشموس
نسمع ونينه
___

سألوا چا بعد طفلين لا عبدالله لاارقيه
مهد خالي يرد اشلون وغلات حسين ماهيه
صاح الهم بقت يمه اعله راسه جتها المنيه
وعبدالله اعله صدر حسين نايم جثه مدميه

ارقيه اجاها ابطيف عبدالله باسه
طفله اعله ايده مات بنته اعله راسه

براسه تبوس وين الشموس
نسمع ونينه




كلمات / حسين أحمد الأمين

#استشهاد_الرسول_ص ( موشح )
_____________

من رحت للجنه يا هاديها
عترتك هالامه غدرت بيها
______________

بس سبلت ايديك و اغمضلك چفن
شاهدوا كل المصايب و المحن
عترتك بعدك تره بغربة وطن

ماكو واحد يالنبي ايراعيها
__________

بعده عطرك چان ما رايح تره
و كسّروا ضلع الزچيه الطاهره
و دارها شبوها نار اموجره

الجاهليه رجعت اتحابيها
__________

عدت اسنين و اجت ليلة قدر
لن وسط بيت الله مستشري الغدر
و صوت ناعي ينعى حيدر منطبر

طاحت الخيمه و رحل واليها
__________

تنهظم يا طه من هذا الكلام
دسوا السم للحسن ثاني امام
گطّعوا چبده بحقدهم هاللئام

بعد ما خانت عهد باريها
___________

من بعد ذيچ المصايب و البله
مرت اعله حسين اعظم مقتله
كربله و آه من نوايب كربله

انگطع نحره و چبدته امصوبيها
________

الما تصير ابلا عروبه و لا شرع
اخذوا النسوان بدروب الفزع
وحده من السوط وحده امن الضلع

و كل بناتك للدعي سابيها
___________

اثمانيه من عترتك بالسم گضوا
علي و الباقر و جعفر ليك اجو
و الجواد و موسى بغداد اعتنوا

الهادي و ابنه و الرضا ماذيها





كلمات / حسين أحمد الأمين

نعزي صاحب الزمان ع و المراجع العظام و شيعة أمير المؤمنين ع بذكرى استشهاد سيد الخلق اجمعين من الاولين و الاخرين الأحمد من الاوصاف المحمد لسائر الاشراف الكريم عند الرب المكلم من وراء الحجب و الشاهد على الخلق خاتم النبيين و المرسلين محمد رسول الله صلى الله عليه و على آله الطيبين الطاهرين
اللهم انا نشكو اليك فقد نبينا و غيبة ولينا و تفاقم الفتن علينا
اللهم عجل لوليك الفرج

#صاحب_الزمان_ع
___________

يمتى تظهر حالي يقهر

أعمى تتعثر خطاي حاير و فاكد ضواي
يمتى تظهر يمتى تظهر
__________

سيدي حتى مدامعنه انتهت
طالت الغيبة و لا ورقه اوصلت
يا گمرنه الشوفتك شمس انحنت
هيچي أشوفك سيدي شكبره البخت

و بصلاتي أمنياتي

ما لي غيرك يا هواي حاير و فاكد ضواي
يمتى تظهر يمتى تظهر
____

انتظر حال اليتامه بلايه والي
بدمع عيني و حيرتي و عالم خيالي
انخاك ترجع ما يجرحك هذا حالي
و اعلگ العشره شمع لجلك يغالي

عليك الحسين تستقر وين

ضامي انه و أنته ماي حاير و فاكد ضواي
يمتى تظهر يمتى تظهر
_____

يابو صالح يمتى تخلص غيبتك
شكثر ناشدت الخلگ عن مدتك
بالكسر اقسم عليك و عمتك
ارجع و خليني اشاهد شامتك ( الشامه )

تلظم اجروح اترك النوح

هيچي اشوف المهدي جاي حاير و فاكد ضواي
يمتى تظهر يمتى تظهر
______

من كثر ما حيره بيه اتوهدنت
ما عفت مسجد بالنجف ما دورت
و ابترابه عليك ياما ناشدت
فدوه گلي مره جدمه شاهدت

بالمساجد و المراقد

الشوك ما خلالي راي. حاير و فاكد ضواي
يمتى تظهر يمتى تظهر
______

گالوا الغربه گبل غربة وطن
بس غربتي تختلف عن المضن
ماهي غربة ناس و احباب و زمن
غربتي ما شايفك يبن الحسن


گلبي مشتاگ. أنهي الفراگ

ناشفة ارياگي و شفاي حاير و فاكد ضواي
يمتى تظهر يمتى تظهر
_______

صار چم جمعه احضرلك ورد
تنتهي وما جيت وارجعلك اعد
جامع السهله تعب من النشد
طال مرسال الهجر وانه انمرد

خلصي لحظات يا علامات

امنية بدلالي هاي حاير و فاكد ضواي
يمتى تظهر يمتى تظهر





كلمات / حسين أحمد الأمين

#الحسن_الزكي_العسكري_ع
____

اتوجهت هاي المسيه للحسن تبچي الزچيه
بفگد ابنها عالي ونّها
__

بسامره اجتّي فاطمه بالدمع
تبچي وأديها فوگ كسر الضلع
جدران المدينه ابصوتها المنفجع
اهتزت من الصرخه و فاطمه بيا وضع

دمعه مرسومه اعله خدها فاگده الليله ولدها
شگد هظمها عالي ونّها
___

عزّت علي الهادي والد العسكري
و باتت وي ألمها و الحزن سرمدي
لا مو هالخليفه الغادر السامري
البايع بالسقيفه و عاف بيعة علي

هالمصيبه من خلاله هوه أسس للضلاله
منّه المها عالي ونّها
___

اتوجّهت تبچي و المدامع حمُر
تمشي الگبر ابنها العسكري بيا صبُر
يم شباچه هيّج كل دمعها الكسُر
گالتله بهضمّها يم ابويه الاجُر

يم محمد بالقيامه تاخذ أجرك و الكرامه
من نعمها عالي ونّها
___

يا آخر العتره المن السم منقتل
كطعوه بحقدهم هذا حبل الوصل
كل ظنهم تموت و كل ذكر يضمحل
ما عرفوا بقتلك ترجعلهم عدل

ما يموت ابعتقاده الله منطيه الشهاده
ما فهمها عالي ونّها
___

الذكرك يبو المهدي شيعتك حاضره
تنصبلك عزيه حتى بالاخره
و بهذا طريقك ما تساوم تره
لو يعرف يضحّي كل محب منحره

عنده معروفه الحقيقة لله بس انتوا طريقه
بكل علمها عالي ونّها





حسين الأمين

#الحسن_الزكي_العسكري_ع (( تجليبه )) 2
_____________

واويلاه يالعسكري واويلاه يالعسكري
__________________

جرح فگدك چبير و ناره ملهوبه
و كل شيعي دمعته اعليك مصبوبه
بس ما منذبح و الجثه مسلوبه
مصاب حسين ما منه جرح اكبر

واويلاه يالعسكري
__________

يا مظلوم بالسم آخر انفاسك
و بچف الحقد سهم الغدر جاسك
و بنعشك بواچي شيّعت ناسك
ما ظليت عاري و جسمك اموذر

واويلاه يالعسكري
_________

شيعوك ابمهابه شيعتك حضرت
ويه المهدي عالجثمان هم صلت
مثل الطف مصيبه ما بعد حصلت
حسين ابوحده مگطوع اله منحر

واويلاه يالعسكري
___________

يا تاسع امام اتموت من السم
مو صدرك چبتك هوه التخذم
درت عينك على حسين و جرت من دم
المثلث بالگلب گاصدله امگدر

واويلاه يالعسكري
__________

كل عين الرزيتك بالدمع تجره
عليك السبعه ناحت و امك الزهره
كل يوم المصابك بالگلب حسره
عليك اشما بچت هالعين ما تخسر

واويلاه يالعسكري
___________

بسامره اجينه و ننصب المأتم
على المسموم مو دمعه نهل الدم
ما نترك دربكم و اليضد يعلم
يم گبرك نعزي و نقره عالمنبر

واويلاه يالعسكري
_________

يبو المهدي حاشه اتخيّب اليسئل
اجيناك ابعزائك و الجفن دم هل
اليطلب حاجه منك ما نظن ينذل
تگضي حاجته اليلطم عزه و يحضر

واويلاه يالعسكري
___________

أهم حاجه نريد الليله بالزهره
غايب عدنه نطلب عجل ابأمره
كل الشيعه لبنك تدري منتظره
المهدي من مغيبه نرتجي يظهر

واويلاه يالعسكري





حسين أحمد الأمين

#الحسن_الزكي_العسكري_ع 3
_________

ودعتني وانه ما عندي يبويه غيرك انته
ودعتني عگبك اتراب الگبر بويه حضنته

دمعي بغيابك حفر فوگ خدي چم نهر
ودعتني ودعتني
_________

المهدي انه ها يبويه و الحزن وسط الگلب
ما انترست عيني منك ليش نايم بالترب
لسه خمس اسنين عمري فراگك اعليه صعب
مثل عيسى صار گلبي قرب گبرك منصلب

اتركتني للنوايب وانه خمس اسنين عمري
اتركتني و استقرت كل مصيبه وسط صدري

الموت جيته ابلا خبر فوگ خدي چم نهر
ودعتني ودعتني
________

مو الك لازم يبويه الوحشه تتصلى إلي
بروحتك متغرّب انه و مثلك امفارگ هلي
كل مسيه صوت حزني على اوداعك يعتلي
آه يا دنيه الرزايا خذتي مني العسكري

فارگتني والمصيبه عاشت اوياي ابغيابك
فارگتني اشگد اصيح و ما يرد ليه جوابك

يمكن الصوت أعتذر فوگ خدي چم نهر
ودعتني ودعتني
________

الله اليعين ابغيابك وين عگبك استقر
من أرض سامره امشي و ياكل بعمري الهجر
يوم يم جدي الصميده اعتنيله للگبر
و يوم يم فاطم انوحن على السطره و الكسر

يالعفتني شوف حالي و انظر الشدة عذابي
يالعفتني بين الگبور أنتقل انه و مصابي

مشيتي ابلا مستقر فوگ خدي چم نهر
ودعتني ودعتني
_________

چم سنه عگبك يبويه ذبّل اعيوني السهر
بالمدينة ما وصلك منها باحوالي خبر
گبر جدي الحسن ماكو صوت ناعي بي حضر
أنهي مجلس يمه وارحل صوب مگطوع النحر

شكبره حزني بكربله من الدمه يجرن دموعي
شكبره حزني كون وي جدي الخيول اترض ضلوعي

بفگد محزوز النحر فوگ خدي چم نهر
ودعتني ودعتني
___________

بويه رايد هالمسيه تدعوا رب العالمين
ايعجل امري وسيفي اشهره وتعتلي راية الدين
و آخذ بثار الزچيه و أطلب بثار الحسين
النداء ابدربي يصبح العون أمير المؤمنين

ناشدتني الرايه بالطف تنتظر تسأل عليه
ناشدتني يمتى تظهر صاح صوت الرافضيه

الشيعه منتظره الخبر فوگ خدي چم نهر
ودعتني ودعتني





حسين أحمد الأمين

قال الشاعر سمير_صبيح تشرفت في احد الايام بلقاء سماحة السيد السيستاني وقرأت له أول بيتين من القصيدة التي قلت فيها :

لوما فتوتك ضاع العراق وراح..
وچا خلص عمرنه بضيم ما ينزاح..

وفجأة مد يده الكريمة وقاطعني وهو يشير إلى ضريح الإمام علي عليه السلام قائلاً: إنها ليست مني بل فتوى علي أمير المؤمنين عليه السلام

فتعالت الأصوات بالصلاة على محمد وآل محمد..
ولم أتمالك نفسي فأجهشت بالبكاء
وقال لي : إجعلوا شعركم لوحدة العراق
#رحم_الله_الشاعر_سمير_صبيح
و حشرك الله مع محمد وآله الطاهرين

اَللّـهُمَّ صَلِّ عَلى مُحَمَّد وَآلِ مُحَمَّد شَجَرَةِ النُّبُوَّةِ وَمَوْضِعِ الرِّسالَةِ وَمُخْتَلَفِ الْمَلائِكَةِ وَمَعْدِنِ الْعِلْمِ وَاَهْلِ بَيْتِ الْوَحْىِ
اَللّـهُمَّ صَلِّ عَلى مُحَمَّد وَآلِ مُحَمَّد الْفُلْكِ الْجارِيَةِ فِي اللُّجَجِ الْغامِرَةِ يَأْمَنُ مَنْ رَكِبَها وَيَغْرَقُ مَنْ تَرَكَهَا الْمُتَقَدِّمُ لَهُمْ مارِقٌ وَالْمُتَاَخِّرُ عَنْهُمْ زاهِقٌ وَاللاّزِمُ لَهُمْ لاحِقٌ
في يوم ما تحولت هذه الليلة الى نهار مشرق بأبهى نور يوصف كأن الشمس فيها رقدت في مكة المكرمة بل هو كذلك لان النور الاول والاكمل والرحمة الكبرى قد تشرفت به العالمين بالولادة الميمونة معلنة ان لا مغيب بعد اليوم لان هذا النور باقٍ الى يوم يبعثون يوم يرث الارض ومن عليها
صلى الله عليك يامولاي يارسول الله

بِـكَ بَـشَّـرَ الـلَهُ السَماءَ فَزُيِّنَت
وَتَـضَـوَّعَـت مِـسكاً بِكَ الغَبراءُ
وَبَـدا مُـحَـيّـاكَ الَّـذي قَسَماتُهُ
حَـقٌّ وَغُـرَّتُـهُ هُـدىً وَحَـيـاءُ
وَعَـلَـيـهِ مِـن نورِ النُبُوَّةِ رَونَقٌ
وَمِـنَ الـخَـلـيلِ وَهَديِهِ سيماءُ
أَثـنـى المَسيحُ عَلَيهِ خَلفَ سَمائِهِ
وَتَـهَـلَّـلَـت وَاِهـتَـزَّتِ العَذراءُ

#الليالي_الفاطميه
السلام عليكم ورحمة الله وبركاته

سنبدأ ببركة الزهراء عليها السلام
قصائد الليالي الفاطميه 1443 هـ

نسأل الله القبول و التوفيق لجميع خدام أهل البيت عليهم السلام و أن يرفع الغمه عن هذه الأمه بحق الصديقه الطاهره و ابيها و بعلها و بنيها و التسعة المعصومين من ذريتها الطاهره

#حسين_أحمد_الأمين

#الليالي_الفاطميه
--------------

للمسجد رحت وسطه صحت بعد الكسر
لا ولي إلا علي طول العمر

_______

من گصت المسجد و جان الضلع
ينزف أمن اصوابه ويهل الدمع
بالرمح قنفذ ضربني واندفع
صحت وسط المسجد بون منفجع

عباد الصنم ضلعي انهشم. و أنسطر
لا ولي. إلا علي. طول العمر
__________

التفت خلوني وبلايه معين
واحد بجفه سطرني اعله الجبين
صحت خلو عن أمير المؤمنين
الثاني اجاني وزيد اعليه الونين

بچفه انضرب وسط الغرب هذا الأمر
لا ولي ألا علي طول العمر
___________

من صحت خلو علي يرجع الي
لو أگشّف راسي وانده للعلي
بيعتك خانوها ومجتف علي
و حرگوا اعليه يلاهي منزلي

طيّحلي طفل وبلا خجل رد يعتذر
لأ ولي ألا علي طول العمر
__________

أرجعت للدار محنيه بقهر
حيدر ايتچيلي والضلع انكسر
شفت اولادي دمعهم چن نهر
وزينب من اصوابي عذبها السهر

يجرون الدمع لكسر الضلع والسطر
لا ولي الا علي طول العمر
__________

من گرب ليه الأجل والموت حان
حيدر ايگلي بقيت ابلا حنان
كون مو عمرچ خلص عمر الزمان
ريت يم گبرچ احلصي مكان

يازهرتي يادنيتي موتي انتضر
لا ولي ألا علي طول العمر





حسين أحمد الأمين

#الليالي_الفاطميه
______

ألم زينب حسرتچ
ألم بيه دمعتچ

يا يمه دمعچ لا يصب زينب زينب
_

يمه زينب ضمي دمعچ لا يجرحچ هالجرالي
السطره عالخد ألمتني بس مصابچ شده بالي

هاي السطره الجرحت عيني بالطف تجرح متنچ
و الدمعات إلي تجريها منها يبدي حزنچ

حزن من ضلعي يبدي
حزن بعدي استعدي

ما يلتئم جرح الگلب زينب زينب
_

بدفعة الباب اعله ضلعي نبّت البسمار بيه
لا يلچمچ هذا وضعي كربله اتعيد الرزيه

و البسمار الصوّب ضلعي يكبر بالطف باچر
و ايصيب حسين ابنص گلبه شلون يطلعه حاير

سهم يكبر مصابي
سهم بسمار بابي

و أنتي تنظرينه صعب زينب زينب
_

انكسر مني ضلع واحد و عينچ اتصب دمعه حمره
شلون لو شفتي اخيّچ تسحگ الخيل اعله صدره

يا منظر باچر گدامچ يا دمعه و يا لوعه
اتشوفين حسينچ بعيونچ تطحن خيل اضلوعه

ضلع مني تهشم
ضلع منه ميسلم

بهل الحاله نايم عالترب زينب زينب
_

الباب و الخيمه يزينب اتشابهن حتى بحرگهن
حالچ اصعب باليتامه انتي بس التبقى الهن

يا زينب باچر مو وحدچ من اتشّب الخيمه
ويه ارقيه اويه اسكينه و اتنامين ابهيمه

علي ليه ميحضر
علي عندچ ميگدر

امگيد علي طول الدرب زينب زينب
_

لا تعتبين اعله حيدر گيدته احبال الوصيه
ايصير بيچ بأبو فاضل من يروح ابلايه جيه

من ينده گلبچ عباسچ لكن ما تلگينه
يا ويلي اعله الشاطي باقي سهم امصوب عينه

غرب حالتنه هايه
غرب نفس الروايه

متنچ ييمّه منضرب زينب زينب
_

ارد اوصيچ ابوصيه يمّه اسمعي يالحنينه
حسين من يگرب رحيله وسط نحره قبلينه

قبلي من نحره و گليله من الزهره هايه
ومن يمشي حضريله مهره او ودعي يمّه هوايه

دمع ودعتي الحسين
دمع اعميها للعين

من بعده يسبوچ الغرب زينب زينب





كلمات / حسين أحمد الأمين

#الليالي_الفاطميه
___________

انفل حزام الصبر بچتفه شيّع عمر

النسمه اليشمها حيدر غريبه
هذا حاله اليفارگ حبيبه
_________

يا علي بيتك يسولف ما جره بالمختصر
يگول عگب الزچيه ما عدل حيدر ظهر
حتى انه استغربت منهو على اعتابي انعصر
فاطمه الكسروا ضلعها شو علي هم انكسر

البابي لمن يجي يوكع امن البچي

الما يميل ايطيح هسه عجيبه
هذا حاله اليفارگ حبيبه
________

ما ضحك حيدر وراها چنه ميت هم صفه
يمي ما نايمله ليله للگبر يمها غفه
يا جرح لوعة دليله شگد تغيّر بالجفه
من طفت شمعة حياته هوه هم ذاب و طفه

ليله لمّن يجن الفاطمه شگد يحن

يمشي باشواكه صوب النجيبه
هذا حاله اليفارگ حبيبه
_______

خيّم اعليه الحزن لمّن مشت ام الحسن
عندي الها بكل زويه ذكره متموت بزمن
الكل جرح يرهم دوه إلا الذي ابگلبه انطعن
شلون حاله إلي امامه حب حياته اندفن

يا گلب يحتمل عجبه حيدر عدل

يا عظم صبره شايل مصيبه
هذا حاله اليفارگ حبيبه
______

شفته مره گاعد و يحچي الم يتبع الم
تره يا هالناس حيدر حزنه عالكون انرسم
اي نعم عايش حياته لكن العيشه عدم
ايساعده الله من يصد الباب عاين كله دم

الخله شاهد أثر من ضلعها انكسر

شلون گادر يسكّت نحيبه
هذا حاله اليفارگ حبيبه
______

والله ما اگدر اصور حالته لمّن يطب
ويه كل خطوه اشوفه دمعت اعيونه تصب
يا خلگ حيدر مصابه ايگطّع انياط الگلب
الصاگر الكون بعظمته منحني ظهره صعب

من بعد فاطمه هالحياا مظلمه

الدمعه تاخذ طريقه وتجيبه
هذا حاله اليفارگ حبيبه





حسين أحمد الأمين

#الليالي_الفاطميه
___

أول مضامين العقيده حب ابو الحسن
بولايته اعلن جهادي يشهد الزمن

بدرب الولي مچتوله انه الشهيده الاولى
يشهد الزمن
____

اصحاب اسمهم للاسف و الصحبه تكشف بالسر
و النبي ما ميت بعد گالوها كلمة يهجر
اعرفت ما بيهم بشر طبع البشر ما يغدر
و الذيب لو شاف الاسد متوصي هوه ايسيطر

بالمسجد اكشفت الحقيقة الولي علي
و الجاهليه رد صنمها حرگ منزلي

و الي يضد گلوله انه الشهيده الاوله
______

جيش الحقد راد الصبح يخنگ ضواه بظلمه
اشباه ما بيهم زلم حرگوها دار الرحمه
كلشي و لا يبقى علي نتفاخر بطاري اسمه
واحدهم الحيدر ما يصل ذرة تراب بجدمه

خافوا علي يصبح خليفه تبعوا الصنم
ابليس نصبها السقيفه و جاوبوا نعم

شيطانهم صفگوله انه الشهيده الاوله
___

صعبه الاسد من ينچتف لو شاف خله بوضعه
بس الصعب من ينغدر من إلي چانوا ربعه
ما دار عام البيعته شهرين بس عالبيعه
نصبوا سقيفه بلا شرع و لله تركوا شرعه

ذكرتهم انه فاطم من اجه النذل
و إن گال و رد دفعني و طاح إلي طفل

و بحچايته شهدوله انه الشهيده الاوله
_____

منهاج طه تركته رجعت تعيش بغابه
ياهو على حيدر حقد يم بابي فك انيابه
يدرون متوصي علي وسيفه يظل بگرابه
لومه الوصيه استحكمت محد دنه اعله اعتابه

بالوغه معروف حيدر بالحرب رعد
و شيساوي الثعلب الفر بكرة الأسد

اليشرد گبل هم ذوله انه الشهيده الاوله
____

الأول اجه يطلب علي و الثاني خلفه ايتابع
من وصل داري لن هتف يا حيدر اطلع بايع
مستأذن اعلينه و دخل بجيشه هجم متفازع
اتلثميت واحد هاجموا ما بين حارگ دافع

هالسقيفة الناصبيه رجعت الجهل
نزّلت الله اكبر و اعتله هبل

و السامري فرحوله انه الشهيده الاوله
____

هاي القضية للحشر تبقى محك و برهان
و اتمعن الها بمسمعك ليخدعك بكلمه افلان
يا سامعي كلمن نكر حقي خصيمه الرحمان
يرضى الله لو ارضه انه من ازعل الله زعلان

كلمن يدافع عن قضيتي طاهر النسل
و الي جحد حقي و تركني من صلب نذل

بالحادثه المنقوله انه الشهيده الاوله





حسين الأمين