#اصحاب_الحسين_ع 2
_ - _ - _

باچر تصير الحومه تذكار
____

بالحومه باچر يعتلي الصوت
ويه الحسين شمحله هالموت
الواگع نزفه الجنته يفوت
بالعشگ نمضي الچدم سار
_

باچر تشوف اطفوف من دم
بكل بيت ليهم تلگه مأتم
يعتلي الصوت من المخيم
عباس يصرخ عفيه الانصار
__

واحدنه باچر بالحرب صال
من الدم تشوف الغبره شلال
يبقى ذكرنه الكل الاجيال
وفايه نبقى البيت الابرار
____

باچر يلوح السيف برگاب
الطايح نزفه زفة احباب
فنه اليلوح الخيمه بعتاب
يرجع و رأسه بسيفنه طار
____

بثار الزچيه باجر انعود
نهجم عليهم هجمة افهود
نگطع رگبهم نملي بالجود
باچر بدينه ناخذه الثار
_____

باچر نخلي الحچي للسيف
حز الرگاب ايصير عالكيف
إلا نمرهم چن علي بطيف
بالحرب تنظر كلها كرار


جر اليساره انجرها الارواح
يابو علي و هذا الفجر لاح
للخيمه يوصل صوت الانياح
إلا نخلي الجيش محتار
__

ياهو اليصل حد العقيله
يجني على روحه و يويله
إلا نشوفه انجوم ليله
أشهد علينه احنه الأحرار





كلمات / حسين أحمد الأمين

#اصحاب_الحسين_ع 3
_ - _ - _

انصارك احنه يرخص دمنه بالغاضريه
لا ما نرتد باچر تشهد يبن الزچيه

كل واحد من عدنه صاح لجلك نفديها الارواح
بالغاضريه
_____

شاهد يظل الصوت باچر أسود انفوت
بالحومه نزئر
ما بينه لا و الله ايخذلك لمن تنخاه
علمنه حيدر
لجلك لاجل هالدين ننطيله ماي العين
انقدمله منحر
ما عدنه فارس خاف واحدنه هيبة قاف
جن ألف عسكر

انوقع بالدم لا ما نهتم لأمر المنيه
واحد واحد بعينك شاهد فوگ الوطيه

بشوگ انباوع للمصباح لجلك نفديها الارواح
بالغاضريه
______

باچر نثبت راي يم الخيم و الماي
ننطي اشاره
بس خل نهز السيف توگع رگاب بكيف
احنه الغياره
اتعلمنه من الحيد هاي الحرب چن عيد
و النه بشاره
بالحومه كلنه اجبال ما بينه واحد مال
نوگف مناره

منه أطلب باچر نرعب جيش اليجينه
من الخوفه أهل الكوفه تسمع ونينه

بالطف يجري هالدم راح لجلك نفديها الارواح
بالغاضريه


أنصارك و منهاب و الطف تشوفه ارگاب
لمن نحارب
من تهجم الفرسان الدم شبه بركان
فوگ الترايب
بالحومه نصرخ صوت يرعب ملاك الموت
انشوفه العجايب
اتحتم أمر الجنون ننزل نهز الكون
و احنه الغوالب

الرايد يدنه يوصل حدنه يكتب عذابه
بينه اكفاية انعلي الرايه احنه الصحابة

يكفيكم هذا الإيضاح لجلك نفديها الارواح
بالغاضريه
_________

صح احنه بس سبعين و همه عدد جيشين
بس ماكو فارس
نهجم بلايه ادروع نفدي الزچيه اضلوع
صاح انه عابس
جاوب زهير ايگول باجر سيوف اتصول
اتأسس مدارس
مو مره لا يحسين لو انچتل ألفين
ارجع انافس

لو اتوذر و التم و أنذر لا ما اعوفك
يشهد حيدر انته الكوثر بعيوني أشوفك

باجر يم حيدر ارتاح لجلك نفديها الارواح
بالغاضريه
____

اتوسط حبيب و صاح هذا فجركم لاح
وفوا عهدكم
يا جابر و يا جون رايدكم اتصولون
قدموا مهجكم
يا مسلم إنه انخاك الزهره تريد ادماك
و هاذي حربكم
هايه حرب عشاگ و الموته منهو اشتاگ
بالطف وعدكم

ها يا زاهر سيفك عامر بالطف قيامه
الرايد ثوره من دم نحره يترك علامه

وفايه منكم ما صاح لجلك نفديها الارواح
بالغاضريه





كلمات / حسين أحمد الأمين

#اصحاب_الحسين_ع 4
________

صاحت افحول الشجاعه للسبط سمعا وطاعه
لا مترهبنه المنايه وبنهايتنه بدايه
______

اتوسط و صاح ابن ظاهر ها يميزان الرجوله
عالعهد لسه اويه حيدر نتبع مهما يكوله
هذا ميدان الشجاعة سطروا شعدكم بطوله
منه واحد لو يموت بحربه باجر باركوله

(( للجنة بهوسات انزفه ))

باجر اتقوم القيامه نفدي منحر للامامه
انه اولها الضحايا و بنهايتنه بدايه
_____________

يا برير و باجر انته الزلزله سيفك قراها
من تطب سوح المعارك خلي لجهنم سراها
من تبيع الدنيا تدري روحك حسين اشتراها
ماكو ميت بالشهاده يبقى للمحشر وجاها

(( اخبطاها و أرجع صفيها ))

سبح ابسيفك عباده شمحله لحسين الشهاده
بالحرب رتلها ايه و بنهايتنه بدايه
___________

يا زهير و هذا يومك بالطفوف ابلا نظيره
اليعوف حسينه تالي عايش بذله مصيره
انته يالكايل اموتن لو الف ما عندي غيره
باجر ابوجه العساكر من ضربتك خلي حيره

(( الموته بيد حسينك تحله ))

لو الف مره كلتها انقتل بيدك ردتها
خلد بحربك روايه و بنهايتنه بدايه
_______

طلبتك فاطم و اجتك بالحلم كلتلها حاضر
باجر اتحنيها بيدك شيبتك من المناحر
مسلم و نعرف ضربتك لكوفه بعلومك تفاخر
انهض و فرع مهرتك و ارهب و زلزل عساكر

(( تنتظرك بالجنه الزهره ))

عالعهد سيفك اريده وانته خريج الصميده
ثبت القصتك نهايه و بنهايتنه بدايه
_____________

بعده ما حاجي اويه عابس لنه كاسر بيده غمده
كله ما أصبر لباجر خلي سيفي هسه هده
صد ابن ظاهر لعابس كله باجر موته وحده
للجنان أنطب سويه و تحله يم حيدرنه كعده

(( يروينه امن الكوثر بيده ))

شكها درعك و الملابس أسس اجنون المجالس
للعشك ارفها رايه و بنهايتنه بدايه





كلمات / حسين أحمد الأمين

#ليلة_العباس_ع 1
_ - _ - _

روج النهر شاف الگمر
لاح
بجيت اللوه مايه انچوه
طاح
دمعته تنزل نعش من ابو فاضل عطش
__________

شاف جيش ومن نظر لچفوفه
الگوم كلها شردت من الخوفه
سبع تالاف العدو مچتوفه
ما بقى ماي النهر بجروفه

بحد النظر ضل بس اثر
جيش
شاف العدد يطلب مدد
بيش
بالطفوف الدم فرش من ابو فاضل عطش
________

من برز للمعركه بجبينه عصبه
بيها يتنومس تضيف لثگله رهبه
چنها لحسين العصابه بيها عجبه
من يهاجم تهتف بإسمه و تندبه

تندب إله للعايله
ماي
ظل يعتلي هيبة علي
جاي
خالها بگصته نقش من أبو فاضل عطش
_________

شاد بيده هالعباره من يحارب
زينب اتظل الاميره بيها كاتب
لمن طاف اعله النهر دلاله ذايب
نزل و موجر عطش للماي طالب

سد الهوه ذل و طوه
كون
عنده العذب وسط الگلب
عون
شاهد اعليه العرش من أبو فاضل عطش
_______

شال رايه و بالعدو يحصد حصد
من نظرته الفارس ايظل يرتعد
العلگمي صار الجثثهم چن لحد
و الرگب تتراشگ و ما ظل فرد

دم كربله بي مرجله
غيض
خله الدمه الحد السمه
فيض
الموت و الكون اندهش من أبو فاضل عطش
__________

صار دمهم و النهر يجرن سوه
و أبو فاضل مبتسم بيده اللوه
من زفيره الماي بالجربه انچوه
يروي دمهم كل اراضي نينوى

رد معتلي غيرة علي
عين
بس الأثر ماي النهر
وين
ضامه الليل اهدعش من أبو فاضل عطش





كلمات / حسين أحمد الأمين

#العباس_بن_علي_ع 2 ( ميمر )
___

عبست وجوه العسكر ... و عباس جاهم يضحك
__

فات الگمر و الموت خزرة عينه
لاگاهم بزلزال سيف ايمينه
حتى الهوه البطف تره مضيعينه

سد الهوه صاروا جسر ... و الگمر بيهم يسحگ
___

عاليها للحومه انگلب سافلها
لمن دخل سوح الحرب كافلها
كل گطره برگاب الزلم وشلها

اطلابه و دخلها العباس ... ياهو اعله راسه يلحگ
____

صارت الشرده من الگمر يشروها
لافته يم المشرعه خلوها
ادخيلك يسبع الگنطره خطوها

هاگ النهر و اخذ الماي ... نرجوا فقط بس صفحك
______

من والده ماخذ شجاعه و غيره
الطف اظن چانت قيامه ازغيره
لو ما أمر ربنه و حسن تدبيره

چا خلصوا بسيف الحيد ... ورد منتصر جيش الحگ
_____

حملة علي يوم الحرب صولاته
جيش العدو بس نستمع صرخاته
مدري شكثرها الماتت بنظراته

أية علي وسيف حسين... بالشده يصعب مدحك
_____

دمهم وصل من سيفه حد الكوفه
جيش و صفه چالسبحه بين اچفوفه
مات و بعدهم منه ظلت خوفه

ميت و همه يهابوك ... يرجفون و انته برمحك





كلمات / حسين أحمد الأمين

#العباس_بن_علي_ع 3
___________

آخر لحظات الاوداع طاحوا سويه عالكاع
يكله النفس مني ضاع يابا الفضل
________

خطوه تمشي يكرب اعليه الأجل
كلبي يا عباس وياك ارتحل
بس مشيت الراس بالشيب اشتعل
الفركتك حتى العرش دمعه همل

دونك يصير الحسين مكسور ماعنده امعين
يلي تساوي جيشين يابا الفضل
_______

انظر بعينك ملامح للسفر
يمي بعدك بس أحس ظهري انكسر
افراكك أصعب خويه من كطع النحر
ما يريد الماي البكتره نهر

هجرك يكطعلي الانفاس غيرك ما عندي عباس
بعدك تتشمت الناس يابا الفضل
_________

خويه يا عباس لو ناوي تروح
والله ما تبقالي من فركاك روح
هواي جرحك يختلف عن الجروح
دوهنتني و كلشي بيه ظل ينوح

تبتعد يكرب الموت معقوله ما الك صوت
دونك الدنيا تابوت يابا الفضل
____________

جانوا يكولون نحرك ينكطع
حيف اكلهم ليه ابو فاضل درع
هسه من اموادعك ما ظل دمع
بهيده اموت بمشيتك مثل الشمع

اسمعته واهزها يمناي عباس ما يدري اوياي
هسه خلاله مكفاي يابا الفضل
_____________

روح بس لا تنسه زينب تنتظر
واكفه اتعاين عليك امن الخدر
كلشي كول ولا تكول ارجو العذر
لو طحت أم عون يحنيها الكسر

كفال اخيتك احكوك تصعد بجالك النوك
مو سبي تدخل السوك يابا الفضل
_______

طب ابو فاضل و عاد الكنطره
والعساكر بين اديه امطشره
والله لو ما أمر من الله جره
جان أخو زينب جعلها الاخره

ادركني صاح الحسين اتعناله يهمل العين
مات اعله اخيه مرتين يابا الفضل





كلمات / حسين أحمد الأمين

#العباس_بن_علي_ع 4
_

طبها تربات الصميده طبها تربات الصميده
_

أخذ من حسين أمره بالبدايه
و صاح عزرائيل كله أدخل ورايه

حضورها - فتحوها - علكوها - سعرها / جهنم
نازلهم - حومتهم - من دمهم - باعثهم / جهنم

نازل وهايه نشيده طبها تربات الصميده
____

سرفن ارداناته من طبها الحرايب
هو تربايت علي بن أبي طالب

ترباته - صولاته - ضرباته - خزراته / من الحيد
حيدرهم - عاده الهم - صوره الهم - رجفتهم / من الحيد

خلص الجيش اعله ايده طبها تربات الصميده
____

مثل سعفه اكباله تتراجف عساكر
الحومه خلاها اعله ايده بس مناحر

عاهدها - رايدها - واعدها - من شدها / مهرته
الكافل - عالباطل - من نازل - جن راجل / مهرته
الحرايب هاذي عيده طبها تربات الصميده

______

وصل للشط و الجبد من عنده يلهب
الماي ذبه و الوفه منه تعجب

من شاله - بهالحاله - جن جاله - بعياله / عطاشه فادينه - بسنينه - ايودينه - لحسينه / عطاشه

والكلام شكد نعيده طبها تربات الصميده
___

ضامي رد و النهر مشيول اعله ظهره
ابثكله صدر الكاع كل خطوه يكسره

من حيدر - هالقسور - والعسكر - يتعذر / دخيله جن كلبه - هالجربه - وبدربه - من حربه / دخيله
الجربه اغله من وريده طبها تربات الصميده
________

والله لو ما بالغدر محد دناله
جان باد الجيش بس موته حلاله

سجلها - خلدها - بأكملها - بأجملها / خلوده
مريوده - من زوده - وزنوده - بعهوده / خلوده

حقق بحربه اليريده طبها تربات الصميده





كلمات / حسين أحمد الأمين

#العباس_بن_علي_ع 5
_ - _ - _

صوت عباس .. جابته الريح .. يم اخيه
ظل الحسين .. يمشي و يطيح .. يم اخيه

بركضته صوب النهر مدري چم مره عثر
____

وگف يم الخيم محتار اخوه استبطه بالجيه
عجت بالطفوف الخيل و منعت يوصله ضيه
لزم گلبه و يعاين صار ما شاهد ابد خيه
نشد عباس انه حسين ارجع عوف الميه

فكره محتار .. و گلبه ملهوف .. شحال أخيه
لحظه لن شاف .. طيحة اجفوف .. شحال اخيه

من نظر طاح الگمر مدري چم مره عثر
_____

سمع أدركني خويه حسين ركض ومفرع الهامه
زينب واكفه و تشوف اخوها امطيح العمامه
خطوه يصيح بيها حسين خطوه تعثر جدامه
وصل يم النهر و يشوف روحه اتموت گدامه

بكسرة حسين .. فرحت الگوم .. راح اخيه
صاح عباس .. و طاح مهدوم .. راح اخيه

شاهد الچف انبتر مدري چم مره عثر
____

گعد يمه و بدوا يحچون و العسكر يشوفونه
التفت عباس صوب حسين وينظر بس عله عيونه
يشوف ويبتسم عباس وجه حسين وبهونه
لأن طول العمر وياه ما رافعهن اجفونه

عمر عباس .. ويه الحسين .. صوب اخيه
عمره ما يوم .. رافع العين .. صوب اخيه

يمسح الدم و نظر مدري چم مره عثر
______

رفع راسه أخوه حسين والدم يمسحه بيده
يحضنه و ينظر العينه آخر لحظه لعضيده
هذاك الچان روح حسين اخوه اليجري بوريده
وگع ويشوفه ظل ممدود روحه اتموت بالهيده

هيبة اجبال .. واگع شلون .. احتار اخيه
ضيع حسين .. نور العيون .. احتار اخيه

مو گلب ظهره انكسر مدري چم مره عثر
______

احتار حسين من شاهد بده وكت الوداع وياه
عباس اليظل الكون نايم عالترب خلاه
توجع چلمة المهظوم و اليذبح دمع عيناه
بيا چلمه يودع حسين اخوه الما بعد يلگاه

ميت حسين .. و رد للخيام .. من اخيه
وشل ادموع .. و ماخذ آلام .. من اخيه

منترس راجع قهر مدري چم مره عثر
_______

رجع وتشاهده زينب هذا حسين موش حسين
شايب منهدم حيله يوديه الهوه صوبين
صاحت راجع بوحدك چا عباس عفته وين
طاح و كلها يا خيتي راح الچان اليه معين

كافلچ راح حضروا النوگ طاح اخيه
ولحظه بالنار جدم محروگ طاح اخيه

النار ما تترك مفر مدري چم مره عثر





كلمات / حسين أحمد الأمين

#ليلة_القاسم_بن_الحسن_ع 1
_ - _ - _

لا تروح ما اريد أنظر وريدك
لا تروح رايده حنه اعلى ايدك

خايفه ترجعلي بالدم و ابدال العرس مأتم
_________

يبني ساعة شوفتك جنت أنتظر
الأم ترى بدون الأبن ما تنذكر
بعد ابوك الحسن صرت انته الذخر
مالي غيرك يا تعب كل العمر

يا فرحتي و دمعتي بيوم الاجيت
يا فرحتي تمشي عني جن نويت

يمه من تروح تسلم؟ و ابدال العرس مأتم
__________

ارد اسولفلك يجاسم اعله البداية
جنت اشوفك بالمهد روحي و هوايه
من كمت تمشي صرت كمرة سماية
هسه يبني تريد اتركك للمناية

وبمشيتك ونتي اتهد السمه
وبمشيتك لا تحيرن بالضمه

تعبي ماريده ايتهدم و ابدال العرس مأتم
_________

لمن وصلت شمعتك حد الشباب
فرحتي اتعدت كواكب و السحاب
حلمي اشوفن زفتك بيض الثياب
مو اشاهد طولك اتوسد تراب

مو جروح رايده حنه و شمع
مو جروح مو سبايا ولا دمع

يمه لاتگتلني بالهم و ابدال العرس مأتم
_______

مودع الله بروحتك يبني يحيد
رغم چنت اتمنى اشوفلي حفيد
لچن هذا الدين يطلب چن وريد
روح وارفع راسي بسمك يا شهيد

بالسلامه زفتك يبني تنطرك
بالسلامه كل عمامك هم تحضرك

بالحسن يبني تجسم و ابدال العرس مأتم
______

هذا يوم البي توفي كل عهودك
من تموتن تشتعل شمعة خلودك
اقتل بگد ما تهل دمع بسجودك
صورلهم حيدرة بكامل وجودك

الصميده رايده يبني تعيده
الصميده كون يصرخ تسلم ايده

و ابعلي يبني تحزم وابدال العرس مأتم





كلمات / حسين أحمد الأمين

#ليلة_القاسم_بن_الحسن_ع 2
_ - _ - _

رمله تعاين عالولد يا فتشة العين
صارت ييمه زفتك بين الصواوين
_______

آ يالولد...تارسني حب _ نبض الگلب...بسمك لهجته
لعمرك ردت...زفة عرس _ مو بالنفس...تضوي شمعته

يالنورك ايضاهي الگمر يا ايه بس ابلا سور
تربات گلبي و السهر يا ذخر السنين

صارت ييمه زفتك بين الصواوين
________

وي كل صبح .. چنت انتظر _ كل العمر .. انظر شبابك
ماچنت اظن..يفرغ حظن _ تصبح حزن..بالطف عذابك

كل تعبي يصبح عالترب نايم ينبضات الگلب
منين و اجتني هالحرب يا جاسم منين

صارت ييمه زفتك بين الصواوين
________

أول حلم .. طولك اصد _ مثل الورد .. انفاسك تفوح
تعب الصبى .. نور الحسن _ هذا الزمن .. رايدها الجروح

تاليها بالدم حنتك و عمك دموعه بزفتك
مو بالهلاهل عمتك بحسرات الونين

صارت ييمه زفتك بين الصواوين
_________

حنه وعرس...چانن حلم _ صارن سهم...صوبلي گلبي
لون البياض..احمر صفى _ بچفك غفى..وعيوني تربي

يوليدي نايم من وگت دونك ألف عام اكبرت
روحي و ضنايه قدمت وسط الميادين

صار ييمه زفتك بين الصواوين
_________

اترف ولد .. گدما ترف _ صوت النزف .. يجري سمعته
يالمنچتل .. حظني فرغ _ چفني نشغ .. ما باقي دمعه

يالغافي بحظان الرمح أنشاف بغيابك جرح
جاسم ينسمات الصبح مگطوع الوتين

صارت ييمه زفتك بين الصواوين
________

ميت وصد .. بلكت ترد _ كثر النشد .. يا ييمه اريدك
يمك متت .. گلبي عرج _ ماتت مهج .. ابحزة وريدك

كل جسمي عگبك يرتعش يالترب صارتلك نعش
تفداك رمله من العطش و اسوالف البين

صارت ييمه زفتك بين الصواوين
________

رمله غدت .. مثل الشمع _ ذابت دمع .. لمن عفتها
بلايه احد .. راح الضنه _ ضاع الهنه .. الفرگه عشتها

بعدك مثل خيمه احترگ يالعاهدت ما نفترگ
گلبي بعد ما ظن يدگ فارگله غالين

صارت ييمه زفتك بين الصواوين





كلمات / حسين أحمد الأمين

#ليلة_القاسم_بن_الحسن_ع 3
_____

بالطف زلزال ... ابحملاته ... بالطف زلزال
_

من الحسن ماخذ جماله و طيفه
عزب بسوح الحرب مر ضيفه
جاسم بطف كربله رد حيفه
يومها من الدم تلولح سيفه

فاتح بالطف ... باب امضيفه ... فاتح بالطف
____

من شجاعة جده ماخذ هيبه
الشرد من خزرة عيونه ايجيبه
اعلومه سوت للعساكر ريبه
ينگطع راسه إلي سيفه ايصيبه

تربايت حيدر ... مهيوبه ... تربايت حيدر
____

شاف عمه من دخل للحومه
يحلف بعباس اعيد اعلومه
بهل الظهاري إلا اراوي انجومه
الجيش يشرد و الرگب مگطومه

عاد العباس ... بصولاته ... عاد العباس
_

نزل و الهامات طاحت بيده
صاح حيدر بالمعاره انعيده
الجيش من القاسم ابلا هيده
اليشرد بنظرات عينه ايصيده

السيف السيف ... احمر لونه ... السيف السيف


وكف صوب المشرعة يتبختر
هالشجاعه علماهم حيدر
واحد يخافون منه العسكر
يرتعد مثل الأسد من يزئر

فرحان حسين ... ايباوعله ... فرحان حسين
_

ترس دم الحومه لمن حارب
من نشد عن اسمه صاح و جاوب
انه ابن ليث الحروب الضارب
البل المعارك ما يرفله الشارب

جدي القالع ... خيبر بيده ... جدي القالع





كلمات / حسين الأمين

#ليلة_القاسم_بن_الحسن_ع 4
_ - _ - _

اشعلوله الشموع الليله حنته
يزفه حسين و تهلهله عمته

گمر يعمي النواظر يضوي الحومه باچر
___

انه امه إلي چنت منتظره عرسه
ازفنه حلم و أنتظر شمسه
عمامة والده بعرسه البسه
و اشوفن كل بنينه و يعلى حسه
حلم چان اعله بالي و صار هسه
استحاله من بعد ما انطه نفسه

اروحن بالحلم لارض المدينه
اهني المجتبى و ادري يجينه

الحسن ندريه حاضر يضوي الحومه باچر
_________

قبل ليموت وصه الوالد اعليه
گال القاسم بعرسه احنيه
اجي لارض الطفوف بدمه الاگيه
احظننه و اشربنه و اداويه
افاخر بيه دوم و راسي اعليه
و يجي وياي جده و يفتخر بيه

يگله شلون طعم الموت يبني
يجاوب انچتل أخره يلني

لذيذ و طعمه ساحر يضوي الحومه باچر
__________

اجه مغتاض يمي و لبس درعه
حرت ما بين ازفه لو أودعه
يحارب من نزل صوته نسمعه
آنه إبن الحسن وراث البضعه
يناظر عمه حربه و ذرف دمعه
يگول بهل الحرب تطفالي شمعه

سمع أدركني صرخاته يعمي
احتار احسين أشوفه بدربه معمي

ركضله بدمعه حاير يضوي الحومه باچر
_______

طبع ماخذ من ادلال المضايف
يفورن من دخل للحومه واگف
كلمن شافه چن الحسن شايف
يرد لصحابه يتراكض و خايف
يشبه جده حيدر بالسوالف
و يشبه القاسم بوگت الگلايف

بگطع شسع النعل ذل العساكر
سبع تالاف فارس باقي حاير

نزل شدها يكابر يضوي الحومه باچر
_________

جاسم بالحرب بين عناده
ما يقتل شرط بس إلا قاده
خلاهم چثث كلمن تماده
نص الجيش بيمينه اباده
رجع يوم الجمل بالحومه عاده
مثل ضربات أبوه بسيفه اجاده

وصل للمشرعه و خيم عليهم
ظنوه الگمر لبسوا عيبهم

مثل عمه يفاخر يضوي الحومه باچر




كلمات / حسين أحمد الأمين

#ليلة_القاسم_بن_الحسن_ع 5
________

رسمتك من على الناكه بدمع وبلهفه مشتاكه
يجسام
ارسمت وجناتك الحلوه يمن بالطف كمر ضوه
يجسام
_______

من على ناكتي اذكر بدمعتي
يوم كالولي عرس جاسم يرمله
بالسبي و ارسمت بسمتك و افرحت
من الكمر وجنات ابني هوايه احله

بالدمع اوصافك أرسم وشل اعيوني الدمع
بالخرايب من اذكرك اعلك بروحي شمع

جنت محتاجتك فرحه اصد راسك على رمحه
يجسام
عتب دهري فلا يسوه يمن بالطف كمر ضوه
يجسام
________

ليلي يكضي سهر وارد لحله الصور
الشبابك من كبرت و عيني تربه
بحضن عمك عشت والدك ما شفت
يل خذت منه جماله و طيب كلبه

جنت كلما شوف وجهك جني شاهدت الحسن
كلمن ايشاهد جمالك ساعه بعيونك صفن

الورد من وجنتك يختل الكمر لو شاهدك ميهل
يجسام
لون يوسف نظر يهوه لمن بالطف كمر ضوه
يجسام
______

واعبرت بالزمن من اخذنه الظعن
جانت النيه العرس يا جاسم ايكون
عمك الكال الي رمله ادللي
انزفه بالكوفه يرمله و قري العيون

وسفه لن الدنيا دارت كبل لا يكضي الدرب
انكلبت الكوفه علينه وجونه طلابة حرب

الزمن يا يمه دولبني نشف من الدمع جفني
يجسام
الحرب مني خذت سلوه يمن بالطف كمر ضوه
يجسام
______

حسين بالقافله من وصل كربله
و استقر بيها طلب عندي عرسك
استبشرت عمتك و حضرت حنتك
و كل عمامك حضرت و حنتها جفك

هناك لن عاشر محرم عمك بوحده صفه
والحسن عنده وصيه وسيف حربك كلفه

عرك هاشم على جبينك نبض وانته بصواوينك
يجسام
صحت ياعم الك فدوه يمن بالطف كمر ضوه
يجسام
_______

ادخلت خيمتك والبست لامتك
و رحت ميدان الحرب و بسيفك اتصول
سيل من الركب اتعزب ابلا حطب
عاد صولات الحسن تربات الفحول

والله لو ما شسع نعلك ينكطع محد دنه
الراسك و لا جان ضلت ميسره لا ميمنه

اندهت ياعمي بالحومه ركضلك روحه مهدومه
يجسام
يكوم بركضته و يهوه يمن بالطف كمر ضوه
يجسام





كلمات / حسين أحمد الأمين

#ليلة_علي_الاكبر_ع 1
_ - _ - _

موت يفتر بخيامي
موت ياخذ احلامي
موت يفجع أيامي علي
_____

بخيامي حط طير الحزن يحوم اعله تربات الحظن
رايدله اقدمله الابن يروح
استأذن واجه صوب الولد گله الحرب لهل الشدد
اهنانه صفيت ابلا سند انوح

لحظه لن ينده حسين و يطلب وليده
و انه منتظره و احسن موتي بالهيده

راح و أنظر لعيونه
راح خاف ايحسدونه
راح البنفاسه غرامي علي
______

لحظات لن رد للخيم بوجهه ملامح للألم
اعرفت بي من احتزم يموت
ظليت و ابحيرة طفل ام و أبنها ينچتل
گدامي مر طيف النبل يفوت

لبس لامة حربه و انه أنظر و أدعي
نگلة اچدامه بعدها او وشلت دمعي

صاح يا يمه ادعيلي
صاح و انه انهد حيلي
صاح و اتخيل دامي علي
_____

من شفته طب سوح الحرب وانه الزمت بيدي الگلب
كل دمعه بعيوني تصب تصيح
ارجع يبعد امك الي رايده عيوني تمتلي
بنظرات وجهك يا علي تطيح

كثر شوگي انغمى اعليه و ضاگت انفاس
صحيت لن اوليدي بيده يحضن براسي

صوت منه يناديني
صوت گلبه يواسيني
صوت ذوب آلامي علي
______

گتله ييمه امروتك ما اريد اشوفن رگبتك
تجري دمه و مخضبتك تريب
معتازتك وكت الكبر بيدك توسدني الگبر
يوليدي ذاخرتك عمر حبيب

كلشي لا أشوفك صريع و منحرك دامي
أقسم بداعة شبابك حقق أحلامي

طيف يمه يراودني
طيف اوداعك شيبني
طيف عشت ابأوهامي علي
_______

لحظه و ينادي والده هد يا علي صوب العده
مو ابن گلبي فاگده وراه
من صلب قالع خيبره اعله الموت لزمهم سره
احتاروا محمد حيدره عداه

من محمد شبه خلقه و يشبه إحساسه
و من علي ضربات سيفه حرگة انفاسه

غيظ خزرات عيونه
غيظ خاف ايغدرونه
غيظ من هد ضرغامي علي





كلمات / حسين أحمد الأمين

#ليلة_علي_الاكبر_ع 2
_ - _ - _

من طلع لابس لامته تشبه محمد هيبته
و ليله بدمعها نادته رايح وين
_______

يا علي گلبي انمرد ظلمه ليلي ابلا ولد
وحيده و بغربة بلد هاذه حالي

دون عينك ماكو نجمه اتلالي
بعد وجهك يا گمر يحلالي

روح لكن انطرك ترجعلي مو دم منحرك
يبني المنيتي اذخرك رايح وين
________

مودع الله من تروح افديك كون من الجروح
بعدك و لا تبقالي روح يا هواها

يل بالترافه ما يشبهك ثاني
بعد طولك هالعيون اتعاني

هدي بخطاك اتوسلك أشبع نظر و اتأملك
بتعبي ييمه أسألك رايح وين
________

يالمشيتك چنها ماي بعدك الدمعه ضواي
بخطوتك يخلص هواي تگرب منيتي

بروحتك كون الله ياخذ روحي
لو مشيت شلون يبرد نوحي

اليمه بعد ما تلفظ بچفاك ما يبقى النبض
اثگيله مشيتك عالارض رايح وين
_________

فدوه اروحلك علي يا دنيتي و روحي و هلي
لتخلي نوحي يعتلي ابرحيلك

خوفي من الموت ياخذ گلبي
للترب يصبح رباي و تعبي

يا تعب كل العمر يا بسمة اشفاف الزغر
للمنيه انته الذخر رايح وين
________

يا ضوه عيون الفجر من صعدت اعله المهر
خذت وياك العمر يا حلاته

بعدك شلون انهض بكل حيلي
كون بفراگك اموت ادعيلي

من تمشي لعيوني تصد چنك تگولن ما ترد
يالمبتعد مات الورد رايح وين





كلمات / حسين أحمد الأمين

#ليلة_علي_الاكبر_ع 3 ( تجليبه )
___

واويلاه آه يالاكبر

من تمشي اعله كيف اخطاك و بهونك
انظر طولك و أشبع من عيونك
و بالخيمه عمامك خل يودعونك

ياهو يا علي بعدك يبارني
____________

يالوجهك بدر و بليلته ايلالي
بعد موتك فقط بس موتي يحلالي
بالون و الدمع يصفه علي حالي

وداعك يلجم اجروحي و يأذيني
_________

يبني يا ذخر شيبي و تعب عمري
بمشيتك للمنيه ينكسر ظهري
يالمدلل منهو يحفره كبري

بعد عيناك لحدي من يواريني
__________

فدوه عمري الك يا هيبتي فدوه
يا فتشت عيوني و روحي يا سلوه
كون الموت اليه و عنك البلوه

يمن يفداه كل عمري و شرايني
_________

نزل و يعاين اعله الجيش بعيونه
تبختر وكت المزامط يشوفونه
بضربته جن علي جده يوصفونه

أسد وكت الشدد ابني ورمش عيني





كلمات / حسين أحمد الأمين

#ليالي_الجواد_ع
__________

على مصابك درت عين
جروحك تشبه حسين
غريب و مالك امعين مصيبه
_______

جيتك أمشي بدرب امصابك ...وأجري بالدمعات
من أوصلت العتبة دارك ... شاهدت اللوعات
عمرك يشبه عمر الأكبر ... بس يفرق لچمات
تفرق عن الطف بجروحك ... ماكو مسبيات

مرمي شفتك عالسطح .. صاير جرح.. يا شبابك
يا جواد العتره سم .. لا مو سهم .. كل مصابك

و لا شفتك بلا راس
و لا خيل بصدر داس
گضت من عندك أنفاس مصيبه
__________

شفتك وحدك يابو الهادي ... طايح فوگ الدار
اشفاك التشبه يوم العاشر ... عطشان و محتار
اتلثت أيام بشمس التچوي ... وجهك أصفر صار
بس هين ما حرگوا دارك ... و شبوا بيها النار

هين ما عندك طفل .. منشد حبل .. بيده شفته
ولا بعد سحگوا صدر .. ايهون الامر .. دم رگبته

صعب جرحك يمولاي ولكن اهون اهواي
من الما ضايگ الماي مصيبه
____________

عن الحر مدلك جنحانه ... طير ايفي اعليك
و من ايصير الليل الگمره ... بالنور اتغطيك
بس جدك طايح عالغبره ... جرحه اليلچم بيك
ما عنده إلي يواري جسمه ... هالموقف ياذيك

موقفه اگبالي شفت .. من يلتفت .. ماله والي
دمعة عيونه همل .. راحوله أهل .. عالغوالي

إله چم من أخو طاح وصفه راسه على رماح
سبايه ظعنه هم راح مصيبه
___________

امصابك يفرق عن اجروحه ... شما يكبر و تزيد
گدامك ما طايح غالي ... و لا وسدت اعضيد
يابو الهادي شكد نبچيله ... ما ينفع ميفيد
لازم يسحگ بينه الحافر ... بلكي اجروحه اتهيد

يامولاي أصعب صور...يجري الگمر... دم امامه
مايلچمك كل شرح...خلصوا ذبح....رض عظامه

انرسم حزنه بالنجوم
الحوافر غيرت ارسوم
لخيته ما بقى اعلوم مصيبة
____________

يالنعشك مرفوع بهيبه ... شيعت بيه الناس
شحال إلي ذبحوا من نحره..برمح انشال الراس
ما نگدر نوصفلك لحظة ..يحتاجلها إحساس
و لا رايحلك واحد غالي ... بثگل العباس

شيعوك بكل هيبتك .. لمصيبتك .. چم عزيه
ما بقيت الوحدك .. و اتشاهدك .. كل رزيه

شفت شوغات الاعيال لمن شدوها الحبال
خوارج عنها ينگال مصيبه





كلمات / حسين الأمين

#ليلة_علي_الاكبر_ع 4
______

الحرب عيد يهالحيد هيبتك نوماسي
بالطفوف والسيوف يمه ارفع راسي
___

يالاكبر علي اليوم بحربك عيد الاعلوم
من حامي الحميه
بسيفك يدخل انذار جيش بفنك احتار
بأرض الغاضريه
تعبي حكه مريود بالطف وفي العهود
و اختمها الوصيه

فده الروح والجروح رايتك احساسي
بالطفوف والسيوف يمه ارفع راسي
______

يبني فتشة العين ماكو غير الحسين
بعيونك اشوفه
كرر جدك الحيد عنده الحومه جن عيد
يفنيها بجفوفه
وانته هاشمي الصيت وبالكلفه تنخيت
يالترهب طيوفه

يكرون يفرون لا تهم ينفاسي
بالطفوف والسيوف يمه ارفع راسي
______

يمه رايده انخاك راسه جيبه وياك
لو طب ابن غانم
يلي اتعادل اثنين مو جيش تكفي جيشين
وهم ترجعلي سالم
وفي طلبتي هاي منك ما ردت ماي
يعكال الهواشم

طلب هاي يوفاي بالحرب عباسي
بالطفوف والسيوف يمه ارفع راسي
_____

يل بالكلفة طلاب ما مثلك رحم جاب
يا سبع الحرايب
تشبه للنبي أوصاف ماخذ من علي أعراف
من يلفي الطلايب
كلمن شاهدك كال حيدر لو علي صال
حيرت الكتايب

بالعلوم والدموم يالقتالك قاسي
بالطفوف والسيوف يمه ارفع راسي
___

عفيه يبني وفيت بحربك هاذي كفيت
ورافع ليه هامه
منك يرجف الجيش شارد يعني اليعيش
صولاتك قيامه
يقره الزلزله السيف يكطع بالركب كيف
تربايت عمامه

والحسين يقر عين فدوتك كل ناسي
بالطفوف والسيوف يمه ارفع راسي





كلمات / حسين أحمد الأمين

#ليلة_علي_الاكبر_ع 5
____

علي علي يا حلاة اسنيني
علي علي وحدي لتخليني

ما أعيش ابلا هواك كلشي بالدنيه فداك
_____

يا سر هوه ريتي و ملامح وجهك انفاس
انته النفس و انته النبض ماليني احساس

يالناوي بهجرك تلجمني كلبي ما يتحمل
بعيونك نظرات اموادع جنك رايد ترحل

علي علي طمنه دلالي
علي علي والله شاغل بالي

يمه ما عندي سواك كلشي بالدنيه فداك
_____

يبني قبل لا تمشي خلي نحرك اشتم
و اشبع من اعيونك قبل لا تنترس دم

خل أحفظ وجهك بعيوني يا بلسم لجروحي
و انته المثلك ما يتوادع كون اتضمك روحي

علي علي يلي عمرك آيه
علي علي حسبت تجايه

للكبر ظني رجاك كلشي بالدنيه فداك
____

لحظات عمري ناطرت حد ما صرت شاب
للشوف الله خالقك مو لجل الاتراب

يالساكن كلبي بخطواتك ايذوب اوياهن صبري
يا فتشة عيني ابلا ضيك يخلص ظلمه عمري

علي علي الكلب ينسه اعزازه
علي علي عازتك يا عازه

ظلمه عمري ابلا ضواك كلشي بالدنيه فداك
____

عين اعله فكدك يا علي و عين اعله الحسين
صديت اله و شفت الهظم بعيونه الاثنين

ماشفت حسين ابهالحاله مخنوك ويتحسر
يالفكدك ماخد كل حيله هوايه اعليك اتغير
علي علي ما شفت نظراته
علي علي حاير بدمعاته

خايفه ايموتن وراك كلشي بالدنيه فداك
_____

صوت الحسين استنصرك يا يمه يالحيد
بكصتك نبض عرق الغضب و الحومه الك عيد

صوب الحومه اتعنه بسيفك يل من جدك زودك
بضرباتك يحتار العسكر واملي وبدي بجودك

علي علي هيبتك نوماسي
علي علي بحربك ارفع راسي

للخلود أثبت خطاك كلشي بالدنيا فداك





كلمات / حسين أحمد الأمين