#اصحاب_الحسين_ع ٢
_____

كلمه وسيف دور هيچي صاحب من تصاحب
كلمه وسيف ميبيعك وكت ثگل المصاعب

شاهد كربله انصار البسمله
كلمه و سيف
_______

غربل ربعك و هذا الوگت منخل
يبين اليوگع ابسرعه امن اليطول
المواقف معدن اتحدد تره و تفصل
اليبيض الوجه عن الذي ايفشل

غربل زين و اختار الذي اترفعك فعاله
غربل زين الصاحب لله توصل من خلاله

ايرفعك منزله انصار البسمله
______

هذا الطف يفهمك قيمة الصاحب
بي تلگه الحرب زفه لليحارب
بي تلگه حبيب امن العشگ ذايب
لجل الصحبه دمهم ينسفك واجب

ملك الموت بالطف نازل وفاتح ذراعه
ملك الموت وصاحوا للسبط سمعاً وطاعه

أصل المرجله انصار البسمله
________

اهل المصلحه من عدهم اتبره
الظهرك هذا بالشده تره يغدره
زهير اويه الحسين و شنهو گال اقره
ماعوفك لون ذبحوني الف مره

لا والله لو جسمي يوذرونه الكتايب
لا والله ماتركك و اظل وياك احارب

كلمه امسجله انصار البسمله
______

أختار الثگيل ابچفة الميزان
رزن ينطيها حگها احچاية الصحبان
فقه دينه برير ايحمله للميدان
سيفه ابيمنته و ايرتل القرآن

اترتل ادماه آيات الوفه لحسين امامه
اترتل ادماه سورة كربله بعزه و كرامه

يقره الزلزله انصار البسمله
______

انطيتك چم مثل و انته اعله فكرك قيس
منهو لله دربه و منهو دربه ابليس
حده بحسين گلبه چنه حادي العيس
و لو يأمر امامه ايرد عرش بلقيس

بحب حسين عابس يرتقي ويبلغ كماله
بحب حسين سطر بالحرب اروع بساله

أروع سلسله انصار البسمله
_______

الصحابه الوي رسول الله تره چذبه
و هذوله البيضوا تاريخها الصحبه
واحدهم نهر بالطف نزف حبه
و عجيبه الكفر بالله اعله النبي انحسبه

يفرق حيل اليغدر صاحبه ابـبنته الزجيه
يفرق حيل عن الي ثبت حد المنيه

غيره هاطله انصار البسمله





حسين الأمين

#اصحاب_الحسين_ع ٣ ( نزله )
___

يبقى النداء حسيني
____

الموت لجلك لو ألف مو مره
ما بينه واحد يبخل ابدم نحره
بعنه اهلنه خاطر انموت اوياك
يشهد علينه المرتضى و الزهره

فضل لو تقبلنه انموت لجلك احنه
عالوفه علمنه الكرار

يبقى النداء حسيني
____

قبل الرگب لا ما تطيح الرايه
وولاد حيدر للحرب شرايه
شمحلاها لينه من تخلد عنوان
يصبح اسمنه للحشر وفايه

جون و النصراني ابرير و الهمداني
للنزال انتاني نفدي أرواح

يبقى النداء حسيني
_

ما بينه واحد تنتخيه يتعذر
و اعله الشجاعه علمانه حيدر
و اليوگع ابحربه نشيعه بهوسات
و العنده حظ بالمعركه يتوذر

و اليضحي ابنفسه انزفه چنه بعرسه
عالوعد ما تنسه هالسبعين

يبقى النداء حسيني
___

يابو علي غير المنيه السهله
اطلب و تامر غيرها ما تعله
انهد جبال ابأمر منك يحسين
شنهي الأرواح و حتى لجلك تغله

الكون عد يمناكم لو صحت حياكم
ارواحنه تفداكم يهل البيت

يبقى النداء حسيني
___

بلدم نخط تاريخ بيه انفاخر
انأسس مدارس للشجاعه باچر
نكتب عباره بالنحر من انطيح
من متنه ناده حسين إلا من ناصر

للشعاير دمنه ينحفظ منهجنه
للحشر موقفنه ايظل ينعاد

يبقى النداء حسيني





حسين الأمين

#العباس_بن_علي_ع ١
___

عباس طاحت خيمتي عباس حانت كسرتي
عباس وحدي بغربتي عباس سهلت وگعتي

____

خطوه تمشي يگرب اعليه الأجل
گلبي يا عباس وياك ارتحل
بس مشيت الراس بالشيب اشتعل
الفرگتك حتى العرش دمعه همل

عباس بعدك موتتي عباس شلي بدنيتي
عباس جيشي و عزتي عباس سهلت وگعتي
___

انظر بعينك ملامح للسفر
يمي بعدك بس أحس ظهري انكسر
افراگك أصعب خويه من كطع النحر
ما يريد الماي البكتره نهر

عباس روح ارويحتي عباس ذخري و عدتي
عباس نفسي و ريّتي عباس سهلت وگعتي
_

خويه يا عباس لو ناوي تروح
والله ما تبقالي من فركاك روح
هواي جرحك يختلف عن الجروح
دوهنتني و كلشي بيه ظل ينوح

عباس ساعة بلوتي عباس سيف بيمنتي
عباس اخوي و هيبتي عباس سهلت وگعتي
____

جانوا ايكولون نحرك ينكطع
حيف اكلهم ليه ابو فاضل درع
هسه من اموادعك ما ظل دمع
بهيده اموت بمشيتك مثل الشمع

عباس حيره بصرختي عباس شاهد طيحتي
عباس بيدك رايتي عباس سهلت وگعتي
_

روح بس لا تنسه زينب تنتظر
واكفه اتعاين عليك امن الخدر
كلشي كول ولا تكول ارجو العذر
لو طحت أم عون يحنيها الكسر

عباس زينب محنتي عباس راعي عيلتي
عباس وينك چلمتي عباس سهلت وگعتي
___

صوت اجاني للخيم منك إلي
و اركضتلك يا بعد روحي و هلي
شفتك ابلا عين يا ريحة علي
ابلا جفوف و بس ونينك يعتلي

عباس هاذي عازتي عباس صعبه احچايتي
عباس بيمن نخوتي عباس سهلت وگعتي





حسين الأمين

#العباس_بن_علي_ع ٢ ( ميمر )
___

عبست وجوه العسكر ... و عباس جاهم يضحك
__

فات الگمر و الموت خزرة عينه
لاگاهم بزلزال سيف ايمينه
حتى الهوه البطف تره مضيعينه

سد الهوه صاروا جسر ... و الگمر بيهم يسحگ
___

عاليها للحومه انگلب سافلها
لمن دخل سوح الحرب كافلها
كل گطره برگاب الزلم وشلها

اطلابه و دخلها العباس ... ياهو اعله راسه يلحگ
____

صارت الشرده من الگمر يشروها
لافته يم المشرعه خلوها
ادخيلك يسبع الگنطره خطوها

هاگ النهر و اخذ الماي ... نرجوا فقط بس صفحك
__

من والده ماخذ شجاعه و غيره
الطف اظن چانت قيامه ازغيره
لو ما أمر ربنه و حسن تدبيره

چا خلصوا بسيف الحيد ... ورد منتصر جيش الحگ
_

حملة علي يوم الحرب صولاته
جيش العدو بس نستمع صرخاته
مدري شكثرها الماتت بنظراته

أية علي وسيف حسين... بالشده يصعب مدحك
_

دمهم وصل من سيفه حد الكوفه
جيش و صفه چالسبحه بين اچفوفه
مات و بعدهم منه ظلت خوفه

ميت و همه يهابوك ... يرجفون و انته برمحك





حسين الأمين

#ابا_الفضل_العباس_ع ٣
_____

ردلي من النهر شفته و ظهره مايل
صفگ چفه امن اسألت وين ابو فاضل

گلبي طاح بشوفته مال ميت ونته
و ظهره مايل
_____

يمشي گوه و ايتلوه
ماكو خوه الخطوه عثره

صرت انظره يطگ صدره
بظهره كسره و شيبه كثره

بخيمتي و گلبي اشتعل شفته وحيد
راجع و من يعثر ايطگ ايد بيد
التفت لن خالي ظهره ابلا عضيد

من وصل يم خيمتي روحي هدها
و الخيمة الكافل مشه طيّح عمدها

و طاح ويه خيمته مال ميت ونته
و ظهره مايل
______

صفگ چفه كثر نزفه
طاح وسفه و صد عليه

راح حيلي و بدر ليلي
طاح ويلي عالوطيه

بداعة امنه گتله خبرني عليه
ايگلي زينب عفته مگطوعات اديه
عالشريعه امن السهام امگطعيه

من سمعته بچف ادي الطمت عيني
صحت بعدك يالگمر ضاعت اسنيني

و دمعي خالط دمعته مال ميت ونته
و ظهره مايل
________

بسهم عينه امصوبينه
ابلا يمينه يختي عفته

وحدي راجع بالمواجع
كلشي ضايع من فرگته

يحچي و يناشغ ابو اليمه بدمعته
خفت من اسهام صدره ما حظنته
و سهم عينه گطع دلالي بنظرته

حسين مو هوه رجع متروس لچمه
احس تطلع روحه من ينطق الكلمه

و گطع گلبي بحسرته مال ميت ونته
و ظهره مايل
_____

من سمعته الخد ضربته
گلي عفته هناك وحده

عالشريعه چف گطيعه
يا فجيعه خالي زنده

شگد ردت وياي يرجع للخيام
بس يزينب گطعوا جسمه اللئام
آخر انفاسه بعث ليچ السلام

بحظني صعدت روحه وانه الطم جبهتي
طحت يمه و ارد اموتن من عبرتي

شيبت من طيحته مال ميت ونته
و ظهره مايل
______

هاي هيه ابلا تچيه
للمنيه وحدي رايح

ابلا عضيدي ولا وليدي
سيفي بيدي و دمعي طايح

امودعچ گلي الخيم حان الرحيل
ساعه و اتشوفني بالحومه قتيل
و استعدي للسبي دربچ طويل

ساعه و اتشوفين خيل اترضه جسمي
ساعه و اتجيب الحوافر ليچ عظمي

و شفت موتي بطحيته مال ميت ونته
و ظهره مايل




حسين الأمين

#ابا_الفضل_العباس_ع ٤ ( موشح )
_

سرفن ارداناته من طب ليها
الحومه ورقه و سيفه يگتب بيها
___

عيد عنده الحومه ابن حامي الحمه
و الكلف ينعرف وكت الموزمه
چن حجر سجيل يرمي صارمه

ابضربه يگتل ما يثني اعليها
___

طگ عرگ هاشم و لاح بگصته
و من حرارة دمه نار بخزرته
كون يوسف حاضر ايصد فزعته

چا عرف هالخوه من حاوييها
_

السيف بيده و من نزل چن مو بشر
چنه عزرائيل بالحومه حضر
سور ذو القرنين ظل يقره سور

سيل سيفه لا يهد عالييها
__

لگد و اعله الخيل ما خله زلم
الشارد ابراس المصوب ينردم
و الهوه ينشاف و اصفر ينرسم

و العجاج المعركه عامييها
___

فاس ابراهيم شال ابيمنته
و نار نمرود اتخمد يم جمرته
راعي حگ و ما تفض اطلابته

الحومه ظلمه و رايته اتضويها
___

من نظرته الفارس ايظل يرتعد
العلگمي صار الجثثهم چن لحد
و الرگب تتراشگ و بيها ايحصد

اجبال من ارگابهم بانيها
_

صار دمهم و النهر يجرن سوه
و من زفيره الماي بالجربه انچوه
سيفه طوفان الغضب طب نينوه

و طي كتاب اجيوشهم طاويها




حسين الأمين

#ابا_الفضل_العباس_ع ٥ ( شور )
_

نزل للطف و الدم بده نزفه
الارض ترجف من عنده چن سعفه

من زغره فارس اهضب
ابن الذي طگ مرحب
غير الحرب ما يرغب

عرگ هاشم طگ من على اجبينه

ملك ملك بالطف بنى قصر
يدگ يدگ نوماسه للنصر
علي علي دستوره بالحرب
عرگ عرگ من هاشم و بدر
___

المنيه اسمه و سيفه يعرفونه
يبس دمه الحط عينه بعيونه

من للحرب طب مهره
ينسمع صوت الابره
اليحچي گطعله نحره

خرز سبحه بسيفه يطشرهم

جبل جبل من الرگب بنه
نزل نزل و الكون إله انحنى
علي علي والد و ما ولد
فحل فحل خلاها مطحنه
___

نبع غيره و الحب صفه مايه
و منو غيره إلي يحمل الرايه

عصابة امه شدها
و هو الحرب موگدها
و باب الشريعه هدها

مثل حيدر خيبر صفت بيده

عرش عرش ناصب على النهر
نقش نقش اسمه على الصخر
علي علي راية بدر حمل
نعش نعش الجايه رجع نحر
__

ابو فاضل و الغيره مضمونه
نبي شايل مو جربه بمتونه

شايل رسالة دينه
و السيف صوت احسينه
و السهم حطه بعينه

لجل دينه گطعهن اچفوفه

نبي نبي للنخوه و الوفه
أبي أبي حاير شوصفه
علي علي تربيته بس زلم
صبي صبي و ابچفه مرهفه
_

رمز جوده روه العطش دمه
على ازنوده كاتب وصيت أمه

انطاها حگ ارباها
و الگبه اثر خلاها
شاهد نصر مسعاها

على ايمينه لاگت تره الرايه

كهف كهف للخوه طلسم
كلف كلف زوده ثبت عزم
علي علي شبل من الاسد
خسف خسف سيفه و بلع زلم




حسين الأمين

#القاسم_بن_الحسن_ع ١
_ - _ - _

اشعلوله الشموع الليله حنته
يزفه حسين و تهلهله عمته

گمر يعمي النواظر يضوّي الحومه باچر
___

أنه امه إلي چنت منتظره عرسه
ازفنه حلم و أنتظر شمسه
عمامة والده بعرسه البسه
و اشوفن كل بنينه و يعلى حسه
حلم چان اعله بالي و صار هسه
استحاله من بعد ما انطه نفسه

اروحن بالحلم لارض المدينه
اهني المجتبى و ادري يجينه

الحسن ندريه حاضر يضوّي الحومه باچر
_

قبل ليموت وصه الوالد اعليه
گال القاسم بعرسه احنيه
اجي لارض الطفوف بدمه الاگيه
احظننه و اشربنه و اداويه
افاخر بيه دوم و راسي اعليه
و يجي وياي جده و يفتخر بيه

يگله شلون طعم الموت يبني
يجاوب انچتل أخره يلني

لذيذ و طعمه ساحر يضوّي الحومه باچر
__

اجه مغتاض يمي و لبس درعه
حرت ما بين ازفه لو أودعه
يحارب من نزل صوته نسمعه
آنه إبن الحسن وراث البضعه
يناظر عمه حربه و ذرف دمعه
يگول بهل الحرب تطفالي شمعه

سمع أدركني صرخاته يعمي
احتار احسين أشوفه بدربه معمي

ركضله بدمعه حاير يضوّي الحومه باچر
___

طبع ماخذ من ادلال المضايف
يفورن من دخل للحومه واگف
كلمن شافه چن الحسن شايف
يرد لصحابه يتراكض و خايف
يشبه جده حيدر بالسوالف
و يشبها القاسم بوگت الگلايف

بگطع شسع النعل ذل العساكر
سبع تالاف فارس باقي حاير

نزل شدها يكابر يضوّي الحومه باچر
_

جاسم بالحرب بيّن عناده
ما يقتل شرط بس إلا قاده
خلاهم چثث كلمن تماده
نص الجيش بيمينه اباده
رجع يوم الجمل بالحومه عاده
مثل ضربات أبوه بسيفه اجاده

وصل للمشرعه و خيم عليهم
ظنوه الگمر لبسوا عبيهم

مثل عمه يفاخر يضوّي الحومه باچر




حسين الأمين

#القاسم_بن_الحسن_ع ٢
_ - _ - _

رمله تعاين عالولد يا فتشة العين
صارت ييمه زفتك بين الصواوين
___

آ يالولد...تارسني حب _ نبض الگلب...بسمك لهجته
لعمرك ردت...زفة عرس _ يل بالنفس...تضوي شمعته

يالنورك ايضاهي الگمر يا ايه بس ابلا سور
تربات گلبي و السهر يا ذخر السنين

صارت ييمه زفتك بين الصواوين
____

وي كل صبح .. چنت انتظر _ كل العمر .. انظر شبابك
ماچنت اظن..يفرغ حظن _ تصبح حزن..بالطف عذابك

كل تعبي يصبح عالترب نايم ينبضات الگلب
منين و اجتني هالحرب يا جاسم منين

صارت ييمه زفتك بين الصواوين
____

أول حلم .. طولك اصد _ مثل الورد .. انفاسك تفوح
تعب الصبى .. نور الحسن _ هذا الزمن .. رايدها الجروح

تاليها بالدم حنتك و عمك دموعه بزفتك
مو بالهلاهل عمتك بحسرات الونين

صارت ييمه زفتك بين الصواوين
_

حنه وعرس...چانن حلم _ صارن سهم...صوبلي گلبي
لون البياض..احمر صفى _ بچفك غفى..وعيوني تربي

يوليدي نايم من وگت دونك ألف عام اكبرت
روحي و ضنايه قدمت وسط الميادين

صار ييمه زفتك بين الصواوين
_

اترف ولد .. گدما ترف _ صوت النزف .. يذبحني سمعه
يالمنچتل .. حظني فرغ _ چفني نشغ .. ما باقي دمعه

يالغافي بحظان الرمح أنشاف بغيابك جرح
جاسم ينسمات الصبح مگطوع الوتين

صارت ييمه زفتك بين الصواوين
____

ميت وصد .. بلكت ترد _ كثر النشد .. يا ييمه اريدك
يمك متت .. گلبي عرج _ ماتت مهج .. ابحزة وريدك

كل جسمي عگبك يرتعش والترب صارتلك نعش
تفداك رمله من العطش و اسوالف البين

صارت ييمه زفتك بين الصواوين
____

رمله غدت .. مثل الشمع _ ذابت دمع .. لمن عفتها
بلايه احد .. راح الضنه _ ضاع الهنه .. الفرگه عشتها

بعدك مثل خيمه احترگ يالعاهدت ما نفترگ
گلبي بعد ما ظن يدگ فارگله غالين

صارت ييمه زفتك بين الصواوين





حسين الأمين

#القاسم_بن_الحسن_ع ٣ ( نزله )
___

ضحيته دمك وفديته عمك
باقي شمعه الكل محب هذا شبابك
_

كاتب وجودك من دم خلودك
يا باذل الروح بالغاضريه
عمك نظرته وحده بغربته
ناديته لبيك يبن الزجيه
بعمر النده اتروح ما تبخل الروح
ابزهرة شبابك اتلاگي المنيه

نسمع هتافك ساعة زفافك
حنّتك صارت يجاسم من خضابك
___

خليته بيدك سيفك نشيدك
بالطف عله و بان رفعة مقامك
عد الهواشم الحومه يجاسم
هاي الحرب عيد عدهم عمامك
وانته ابن الاحيود وبالكلفه صايود
لمّن ترهّيت فرفح حسامك

من والدك كون ماخذ هالعيون
من جمالك ترهب و شدة حسابك
___

منك اخذنه هذا درسنه
نفدي المناحر لجل العقيده
لجل الامامه انضحي السلامه
كل شيعي مفروض هذا نشيده
الهاي الشعاير ننطي المناحر
نهجك بالگلوب ينخط قصيده

ثابت ولائك و بكربلائك
نور ساطع باقي النه ايشع ترابك
____

كل شيعي لازم مثلك يقاوم
ومثل التزامك ايخط التزامه
ويغضها عينه لابد يقينه
ايفكر شلون يرضي أمامه
ما عنده غايه غير الهدايه
يحفظ صلاته و يحفظ صيامه

ايخط ابدمائه موقف ولائه
ايسجل ابماي الذهب لازم خطابك
__

راسم شبابك قمة صوابك
بهاي المبادئ سجلته نصرك
بقلة سنينك و حنة يمينك
كل هاي الازمان ما تمحي ذكرك
صوت الضماير من المنابر
يهتف الك دوم ما ينسى امرك

موقف صمودك رمز الخلودك
يسجد التاريخ لو مر اعله بابك




حسين الأمين

#القاسم_بن_الحسن_ع ٤
____

رسمتك من على الناكه بدمع وبلهفه مشتاكه
يجسام
ارسمت وجناتك الحلوه يمن بالطف كمر ضوه
يجسام
___

من على ناكتي اذكر بدمعتي
يوم كالولي عرس جاسم يرمله
بالسبي و ارسمت بسمتك و افرحت
من الكمر وجنات ابني هوايه احله

بالدمع اوصافك أرسم وشل اعيوني الدمع
بالخرايب من اذكرك اعلك بروحي شمع

جنت محتاجتك فرحه اصد راسك على رمحه
يجسام
عتب دهري فلا يسوه يمن بالطف كمر ضوه
يجسام
____

ليلي يكضي سهر وارد لحله الصور
الشبابك من كبرت و عيني تربه
بحضن عمك عشت والدك ما شفت
يل خذت منه جماله و طيب كلبه

جنت كلما شوف وجهك جني شاهدت الحسن
كلمن ايشاهد جمالك ساعه بعيونك صفن

الورد من وجنتك يختل الكمر لو شاهدك ميهل
يجسام
لون يوسف نظر يهوه لمن بالطف كمر ضوه
يجسام
__

واعبرت بالزمن من اخذنه الظعن
جانت النيه العرس يا جاسم ايكون
عمك الكال الي رمله ادللي
انزفه بالكوفه يرمله و قري العيون

وسفه لن الدنيا دارت كبل لا يكضي الدرب
انكلبت الكوفه علينه وجونه طلابة حرب

الزمن يا يمه دولبني نشف من الدمع جفني
يجسام
الحرب مني خذت سلوه يمن بالطف كمر ضوه
يجسام
__

حسين بالقافله من وصل كربله
و استقر بيها طلب من عندي عرسك
استبشرت عمتك و حضرت حنتك
و كل عمامك حضرت و حنتها جفك

هناك لن عاشر محرم عمك بوحده صفه
والحسن عنده وصيه وسيف حربك كلفه

عرك هاشم على جبينك نبض وانته بصواوينك
يجسام
صحت ياعم الك فدوه يمن بالطف كمر ضوه
يجسام
___

ادخلت خيمتك والبست لامتك
و رحت ميدان الحرب و بسيفك اتصول
سيل من الركب اتعزب ابلا حطب
عاد صولات الحسن تربات الفحول

والله لو ما شسع نعلك ينكطع محد دنه
الراسك و لا جان ضلت ميسره لا ميمنه

اندهت ياعمي بالحومه ركضلك روحه مهدومه
يجسام
يكوم بركضته و يهوه يمن بالطف كمر ضوه
يجسام





حسين الأمين

‏يُسمّىٰ ‎عيد الغدير بعيد الله الأكبر لأنّ الأعياد الأخرىٰ لا قيمة لها دون هذا العيد، وأنّ قيمتها الحقيقيّة تظهر في ظلّ الولاية فقط، التي هي بمثابة العمود الفقريّ لجسم الإسلام، امتدادًا للنبوّة فحُـب الأمـيـر عَـلـي{ع} مُـخـتـلـف فَـهَـوَ
الأب الـحَـنـون
الـسَـنَـد الـثـابَـت
الـسـور الـعـالـي
الـحَـصَـن الـحَـصـيـن
"الـذي مَـن دخَـلـهُ كـانَ آمَـنَـاً"
رَضَـيـت بَـكَ يـا مَـولاي
أمـامَـاً هـاديَـاً وَ وَلـيَـاً مُـرشَـدَاً
لا أبـتَـغـي عَـنـكَ بَـدَلاً
وَ لا أتَـخَـذ مَـن دونَـك وَلـيَـاً

﴿الْيَوْمَ أَكْمَلْتُ لَكُمْ دِينَكُمْ﴾
فـ بالأميرِ كَمال دِين مُحَمدٍ ..
إن غاب عَنه كان دِينُك ناقِصا

#و_هل_الدين_إلاّ_علي
#عيد_الله_الاكبر
#عيد_ابناء_الحلال

#علي_الاكبر_ع ١
______

جمالك وحي للمشاعر تشوفك محمد نواظر
النوارس فوگك اطوف تحيرت بيك الطفوف
تشوفك محمد نواظر
_____

حرز قل اعوذُ قريت ابطلعتك
شفت عينك و لاحظتها غربتك
علي يبني اعرفك لتخفي نظرتك
اظن ناوي تمشي يغالي الذبحتك

يعوني ييمه و عيوني كياني تهدم يكوني
يالاسمك احله الاحروف تحيرت بيك الطفوف
______

علي يا وجودي و يكلشي بحياتي
وضوئي عيونك ضحكتك صلاتي
هرش گلبي انته يكل امنياتي
حياتك حياتي مماتك مماتي

يسبحة صلاتي و دعائي يحفظك الهي رجائي
و يبعدك عن الاحتوف تحيرت بيك الطفوف
_____

گمر ضاوي نورك يشع الليالي
يغالي برحيلك رخص كلشي غالي
الحرب يمه چنها تفرهد دلالي
اموت بحسرتي و حزن يصفه حالي

الحرب يمه منها لچمتي يروحي بغيابك غربتي
أمر يمه معروف تحيرت بيك الطفوف
_______

على الحومه طالع تزتك حسرتي
و لا ماي ارشلك ارشلك دمعتي
لمن سيفك انسل شفت بي كسرتي
انغمى اعليه يمه و تفطرت مهجتي

ييمه و افز من منامي دمه نحرك ايهل امامي
وذر من السيوف تحيرت بيك الطفوف
تشوفك محمد نواظر
______

وذر والدك ردك امن الحرايب
تعب عمري تالي صفه للترايب
گضيت المناحه و گضتني المصايب
الربه هم إله حگ ييمه و يحاسب

شحلاة المنيه تجيني بعد ما يرجعك حنيني
انعميت و بعد ماشوف تحيرت بيك الطفوف




حسين الأمين

#علي_الاكبر_ع ٢
__

كربله لو يثرب الشاهده متعجب
طه طلع من الخيم
مو گمر بل اكثر النبي لو الاكبر
هوى على اعتابه النجم
____

يا حيره خيمه لو جبل حوه
الطالع هذا يا هوه من خيامه
يا حيره الجيش اتعجب و شايف
بالحومه النبي واكف هل امامه

طَلَعَ الْبَدْرُ عَلَيّنَا كُلُّهُمْ هَتَفُوا
أ طَهَ أُمْ عَلِيًّاً كَانَ فِي الْغَارِ
أ هَلْ فِي الطَّفِ عَادَ الْمُصْطَفَى حَيًّاً
وَ مَا شُبّهَ لَنَا فِي الْخَلْقِ اسْرَارِ

طلع من خيمته ضوّه السماوات
و قراله حسين عن العين آيات

حرّزه بچم سوره و يمنته مشهوره
مثل علي سيفه حسم
بحومته من كبّر النبي لو الاكبر
هوى على اعتابه النجم
_

بخطواته طگ ظهر الارض جدمه
ماخذ من علي اسمه هم ضربته
بخطواته الفكّر يوصل احدوده
رد يابس مثل عوده من خزرته

عَدَا التَّحْدِيقَ فِي عَيْنَيْهِ كَاذِبَتًاً
كَأَنَّ الْخَوْفِ مِنْ عَيْنَيْهِ قَدْ وُزِّعْ
وَ سَيْفٍ فِي يَدَيْهِ كَأَنَّهُ نَارٌ
سَلِيلٌ مِنْ فَقَّارِ عَلِيٍ الأنْزَعْ

من يغتاض سيفه يگطع الراس
و يبخر الماي من زفرات الانفاس

من وصل للحومه ضربته معلومه
الگصد رجع راسه انجسم
يرتجز بالعسكر النبي لو الاكبر
هوى على اعتابه النجم
____

بالحومه صال و شايل الحاسم
موج بحربه متلاطم بالبساله
بالحومه متبختر ابن غانم
نازل للحرب عازم القتاله

يُعَدْ بَكْرٌ بِأَلْفٌ مِنْ فَوَارِسِهِمْ
فَلَمَّا قَدْ رَأَى عُمَرَ عَلِيَّ اسْتَصْغَرْ
فَكَانَ الْحَرْبُ بَعْدَ الْأَمْرِ نَاتِجَهَا
بِكَفِّهِ حَامِلَ الرَّأْسَ عَلِيَّ الْأَكْبَرْ

بعد عج الحرب من هدأت الناس
علي الأكبر رجع لحسين بالراس

قاتله بكل همه وانتصر من عزمه
شايل رجع راس و علم
بالحرب هم قسور النبي لو الاكبر
هوى على اعتابه النجم
____

للخيمه رد الوالده بنصره
طاحوا همه عالغبره من شبگته
للخيمه طب لن ينظر الامه
مغمي اعليها يا هظمه وهل دمعته

دُمُوعًاً مِنْ عَلِيٍ نَهْرِهَا جَارِي
لِرُؤِيتْ أُمُّهِ كُلَّ دَمْعِهِ صَلَّى
أَحَسَّتْ فِي لِظَاً شَوْقٌ يَرْمِضُهَا
فَذًّا وَجَّهُ عَلِيًّاً قَدْ رَأَتْ لَيْلَى

ظناهه شبگته و همستله كلمات
ييمه حيلي كله بفرگتك مات

يا ضوه احلامي يا تعب أيامي
الحزن على عيوني انرسم
ابفرگتك اتحير النبي لو الاكبر
هوى على اعتابه النجم
___

عاف أمه ودعها بدمع عينه
و رد يفديهن اسنينه للشهاده
عاف أمه ينصر والده واجب
و طب الحومته ايحارب وبعناده

قُلُوبُ النَّاظِرِينَ أَتَتْ بِلَا قَدَمٍ
جَمَالُ الْخَلْقِ فِيهِ كُلِّهُ جُمْعًا
فَمَا إِنَّ هَلَّ حَتَّى كُلُّهُمْ هَرَبُوا
أَذَاقَ الْجَيْشُ مِنْ ضَرَبَاتِهِ هَلَعًا

واگف مثل جده ابيوم الأحزاب
و يتخيّر ابسيفه گطع الارگاب

المعركه ضيگها و رايته ركزها
گطع رگب كسر صنم
بصولته يتبختر النبي لو الاكبر
هوى على اعتابه النجم




حسين الأمين

#علي_الاكبر_ع ٣
__

رحيلك فجعني عماني و كسرني
___

يا وجه طه النبي يا لون حيدر
يا ذخر لحسين يا شريانه الابهر
يا كياني و عزتي يا گلبي و أكثر
انهدم حيلي ابمشيتك يبني الاكبر

وجودك عمادي بخطوتك تهدني
رحليك فجعني عماني و كسرني
____

تحد سيفك وانه احد للنوح عيني
تلبس ابدرعك وانه ألبس ونيني
بخيمتي بعدك لچن ذابل حنيني
من رحت مو ماي اطش بعدك سنيني

سكونك وقارك جمالك أخذني
رحيلك فجعني عماني و كسرني
__

بخطوة اجدامك من الخيمه منيتي
يا هواي ابلا هواك اتموت ريتي
لمن ودعتك عليه طاح بيتي
أنغمى اعليه و بدت ساعة رزيتي

وداعك دهاني يمن ما تركني
رحيلك فجعني عماني و كسرني
___

بحربك انه منغمي اعليه نصيبي
و گلبي يدعي ربي رجعلي غريبي
لنّي افزن من منامي و بنحيبي
الگه راسي بوسط حظنك يا حبيبي

ضحكتك يغالي تهودلي وني
رحيلك فجعني عماني و كسرني
_

يمه من فزيت شفتك فرحتني
مو بحظنك انته لازم وسط حظني
احظنت راسك و المواجع فارگتني
علي يبني امروتك لا لا تهدني

اخذها سنيني إذا تمشي عني
رحيلك فجعني عماني و كسرني
____

لحظه لان صوت الابو فطر دليله
يا علي جدك طلب منك تجيله
أنظر احسين اعله ابنه انهدم حيله
استعدي للنواعي گلي ليله

كلامه سطرني و أخذ گلبي مني
رحيلك فجعني عماني و كسرني
____

شويه لن رديت مشيول الخيامك
اچفوف ابيك شالتك مطبوره هامك
اموذريك شلون لموهن عظامك
يا علي مو للذبح للشم أيامك

ييمه بمشيتك المصايب ولني
رحليك فجعني عماني و كسرني





حسين الأمين

#علي_الاكبر_ع ٤
___

علي ضوه شع و انتشر
علي روه بالطف نهر
علي هوه علي گمر
_______

مو بشر ينشاف آيه امن الجلاله
ماخذ الاوصاف من طه و كماله
و سورة الاعراف تشهدله بجماله
بالحرب سياف تربات البساله

علي كتب سورة مجد
علي عذب ماي و ورد
علي وهب بالطف نحر
___

ريشة الرسام مو سيف ابچفوفه
و للحرب احلام بانيها ابطيوفه
هدم الاصنام و العسكر يشوفه
خندق الضرغام رجعها ابطفوفه

من كربله علي رمز
للبسمله علي حرز
صوره إله وسط النظر
___

بكل ظلام النور شعشع من جبينه
و بالجنان الحور أسمه امطرزينه
للحِسن دستور و الجوهر سنينه
ليلى اعلگي ابخور ليحسدوها عينه

علي شذر جوهر لمع
علي بدر نوره سطع
علي وتر ذهب درر
__

ليلى من ابعيد تنظرها الوجنته
يرتجز هالحيد ما ثنى ضربته
بالحرب صنديد يذبح من خزرته
چن هلال العيد للحومه طلعته

علي طلع من الخيم
علي لمع مثل النجم
علي صنع مجد الدهر
__

من يصد العين لحسين و يناظر
يفدي لجل الدين و وليده يفاخر
بعينه چان حسين ايوضيها المشاعر
الاكبر و بالبين فارس ما يحاذر

علي برز عين و رمش
علي ارتجز صاروا نعش
علي نجز وعده و ظفر




حسين الأمين

#علي_الاكبر_ع ٥
_ - _ - _

من طلع لابس لامته تشبه محمد هيبته
و ليلى بدمعها نادته رايح وين
___

يا علي گلبي انمرد ظلمه ليلي ابلا ولد
اوحيده و بغربة بلد هاذه حالي

دون عينك ماكو نجمه اتلالي
بعد وجهك يا گمر يحلالي

روح لكن انطرك ترجعلي مو دم منحرك
يبني المنيتي اذخرك رايح وين
____

مودع الله من تروح افديك كون من الجروح
بعدك و لا تبقالي روح يا هواها

يل بالترافه ما يشبهك ثاني
بعد طولك هالعيون اتعاني

هدي ابخطاك اتوسلك أشبع نظر و اتأملك
بتعبي ييمه أسألك رايح وين
____

يالمشيتك چنها ماي بعدك الدمعه ضواي
بخطوتك يخلص هواي تگرب منيتي

بروحتك كون الله ياخذ روحي
لو مشيت شلون يسكن نوحي

اليمه بعد ما تلفظ بچفاك ما يبقى النبض
اثگيله مشيتك عالارض رايح وين
_____

فدوه اروحلك علي يا دنيتي و روحي و هلي
لتخلي نوحي يعتلي ابرحيلك

خوفي من الموت ياخذ گلبي
للترب يصبح رباي و تعبي

يا تعب كل العمر يا بسمة اشفاف الزغر
للمنيه انته الذخر رايح وين
____

يا ضوه عيون الفجر من صعدت اعله المهر
خذت وياك العمر يا حلاته

بعدك شلون انهض بكل حيلي
كون بفراگك اموت ادعيلي

من تمشي لعيوني تصد چنك تگولن ما ترد
يالمبتعد مات الورد رايح وين





حسين الأمين

#عبدالله_الرضيع_ع ١
_ - _ - _

ماتت دلول المهد والجفن غافي
ما اكعدك ياعلي نوم العوافي

وليدي نايم عالرمح يضوي لو غاب الصبح
___

جنت انتظر طول العمر
منتظرة اشوف سنينك
آ يالولد هذا المهد
فارغ يظل چا وينك

ماعندي غيرك ياضوه عمري وتعب سنيني
يافتشة عيوني علي تتركني من تجيني

چنت منتظره الولد يوگفلي خيمه
ماچنت اظنك ياعلي تمر بيه غيمه

كون لا طاب الجرح يضوي لو غاب الصبح
__

بطول المسير انه احير
ست اشهر يگتلونك
بعدك رضيع اترف صريع
بالترب طايح لونك

شفت الكبر من انحفر وگطعوا نحر ضنايه
فوك الرمح راسه غفه مو طفل جنه ايه

بهيده مشيكم لا يفز من هذا نومه
الله لا ينطي الشمس غيرت رسومه

ريت وياك انذبح يضوي لو غاب الصبح
___

عمرك شمع عمري دمع
و النبله چانت فرگه
ما جنت اظن يبرد حظن
و اشتاگ يمه الملگه

چفي يهزن بالمهد و اتذكرك يغالي
بنومي و گعدتي يالولد ما ترحل اعله بالي

يالعمرك بعمر الشمع لا تمشي عني
ذاخرتك لشيب الگبر موتك فجعني

ما يلچمك يبني الشرح يضوي لو غاب الصبح
____

چبير الجرح خشن الرمح
يلچمني من ايجرحك
شدوا حبل بجرح النبل
خافن تكع من رمحك

نبتوا راسك بالرمح وانه انظر شبديه
شفتك تون من الألم وانه انغمى عليه

چنت تبجي بالحظن وانده يغالي
هسه تبچي عالرمح والحظن خالي

يا وكت گلبك يشح يضوي لو غاب الصبح
___

كلبي انمرد سمعت الولد
تجري دمعته بكيفه
بحالي شجره من منحره
ما ينكطع نزيفه

للراس واصل هالرمح وانه بدمع اناظر
من شفت عبدلله بچه بكلبي ترض حوافر

ذابلات من العطش ذيچ المعاني
عبدالله ما تگعد بعد موتك سباني

موتي بعدك يتضح يضوي لو غاب الصبح





حسين الأمين

#عبدالله_الرضيع_ع ٢
___

هوه مو هوه كل خطوه انظر للرمح
منخطف لونه وعيونه مو مالت ذبح
___

كلما التفت صوب الرمح يلچمني جرح
نبلة منحره
عبدلله تره نحره ترف مو مالت نزف
ست اشهر تره

شكد حاولت اصد عنه
بس مشتاكه اشبكنه
هلبت لو نزل مره ردت من ابني شبكه
من رمحه نزف دمه
و المتبدي شيلمه
بوجهي يبتسم و انه انهظم بكليبي حركه

يافرح روحي وجروحي ياوجه الصبح
يا تعب حظني كل ظني مو مالت ذبح
__

برمحه ما ثبت نحره يكع ومن دمعي نكع
كل الدرب اليسر
من كثر الجرح وجهه دمه وشفته من الضمه
صارت تنفطر

راسه ما ثبت خطوه
كلسا عالارض يهوه
راسه ازغير وخشن الرمح كدما يلجمه
شدوا بالحبل راسه
و بنحره الرمح جاسه
واصل حد لهاته و النزف ما خله دمه

اسمع اهاته شهكاته ما يكفي الشرح
ميت وشفته يا ونته مو مالت ذبح
_

حظني يالولد فارغ صفه وجفنك من غفه
عيشني السهر
انظر وجنتك كلها دمه وعالخد لاطمه
يولدي بقهر

ما تنزل يبعد أمك
خلي لهفتي اتضمك
ما فاركته حظني من اديه الايد الحسين
هسه برمحك انظرلك
ماكو چف اليحملك
نايم عالرمح يلي جنت مهدك رمش عين

ما برد صدري يا عمري بعدك يتضح
يخلص ابنوحي يا روحي مو مالت ذبح
____

امشي والدمع مني رسم لوعات السهم
ذابح ركبتك
من خالي رجع چف والدك عني بعّدك
انطاك العمتك

ساكت رجعك يبني
اميه شربك ظني
ماكو امناشغك ثاري السهم كاطع لهاتك
عالهزل وانه اتصور
تلجم كطعة المنحر
كون انه المتت يبني كبل ساعة مماتك

وانه عالهزل اتخيل نحرك ينجرح
ريته ذابحني موش ابني مو مالت ذبح
___

بعدك ماكو ظل عن الشمس ولا تهوه النفس
وانته منجتل
ست أشهر كضه منك عمر وانه بهالگدر
عندك ارتحل

يا عيشه بعد تحله
و رايح مني عبدالله
ماتت كل دللول المهد بعدك يغالي
ادعي كون اجي يمك
يلي ما سلم جسمك
رضّوا بالرمح وانه الذبح بعدك هنالي

انهظم بيها امن احجيها مي عنك يشح
هظمة الهظمه يايمه مو مالت ذبح





حسين الأمين

#ليلة_الوادع ١
لسان حال الإمام علي السجاد عليه السلام
____

الخيمه رسمتلي صور منيه
اشد من گطع النحر عليه

والدي ايودع عياله
كلشي بالدنيا بچاله
____

التمن و صار الدمع كل الحچي
وحده ماتت وحده بيده ترتجي
عمتي زينب سمعته و شبعت بچي
يا عيالي رايح انه و ما اجي

الخيمه صارتله جرح هذا أشد من الذبح
الفرگه صارت تتضح قتيل
شفت دمعات اليتم شبت بروحه الم
بحيله گوه ظل يلم ثچيل

شبگته عمتي و تون سمعها
نشّف ابچفه الجفن دمعها

بخطوه كل دمعي جراله كلشي بالدنيا بچاله
____

ما بقت كل دمعه بينه بخطوته
من ظهر مهره اشاهد طيحته
عمتي من الخيمه تسمع رضته
الله لا ينطي الخيول السحگته

نشّف عيون الدمع استمع كسر الضلع
شفنه راسه منگطع سليب
الخيل تسحگ عالصدر طحنت بعظم الطهر
امن الگفه حزه الشمر تريب

عمتي تركض بالحرب يحيره
من يصدوها الغرب چبيره

منفرش عالغبره حاله كلشي بالدنيا بچاله
__

من وگع شفنه العساكر و الخيول
فوگ صدره تسحگ و ظلت تجول
جتني زينب ناشدت عمه شتكول
فرن اعله الحومه هالموقف يطول

أنظر الحال الحرم اتشگاف و ماكو رحم
السوط و النار ابخيم تطوف
طفل بالحافر عثر طفل متگطع وذر
و ابن مگطوع النحر نشوف

اقسى كل منظر جره عليه
طفله تمشي اميسره وسبيه

جسم أبويه الخيل جاله كلشي بالدنيا بچاله
___

طفله طاحت عالجمر مچويه ادين
ارقيه سلوبها التراچي الظالمين
وحده تصرخ عمّتي وحده حسين
بالترب ركضتهن الما أدري وين

راس مرفوع برمح و راس بالعين الجرح
وانه كل لحظه انذبح عذاب
طفله تركض للنهر طفل بالحومه عثر
وحده تنده يالكمر مصاب

حشمت عمي الكفل يجيها
الثوب بالنار اشتعل عليها

عالنهر موته حلاله كلشي بالدنيا بچاله
__

بهيمه تالي گعدوهن عالتراب
لا خيام و لا حراسه بس حجاب
الزينب السوط اعتنى بكل العذاب
من بعد ما شاهدت اعظم مصاب

نامن بوسط الرماد غربه حراس و بلاد
الهوه صاير بس سواد دخان
وحده تنشد يا حسين عمتي يا عباس وين
تريد اخيتك يالحنين مكان

والله حيره حيرتي بعذابي
ألم زيدت عمتي مصابي

والشمر جهز حباله كلشي بالدنيا بچاله





حسين الأمين