#ليالي_جواد_الائمه_ع ١
____

يحيى النبي عالرمح ويحيى علي عالسطح
وآويلاه وآويلاه
من فاطمه بسم غدر تاسع ضلع منكسر
وآويلاه وآويلاه
______

يشبه يحيى علمه چان
من الله
بثمن اسنين علم الكون
آتيناه
رحمه للناس أنا قد
ارسلناه
و من القران كل تبيان
اعطيناه

و آتينا الحكم يحيى صبيا
و مثل يحيى الجواد اصبح وصيا

بعمر الصبه فضله الله و رفع منزله
وآويلاه واويلاه
آيه ثبت بالذكر تاسع ضلع منكسر
واويلاه واويلاه
_______

بجوده وعلمه ثبت دين
للإنسان
ثبت رايه و هدم راي
للتيجان
ولمن ناظر بن اكثم
حيدر چان
خورس خصمه ومن يحچي
صنته الديوان

مثل حيدر لچن سيفه لسانه
خضع كلمن نوه ايواجه بيانه

وارث صفات النبي وبالحكمه اصل طالبي
واويلاه واويلاه
اتسيد على اهل القصر تاسع ضلع منكسر
واويلاه واويلاه
____

من يدخل چان تسجدله
هامات الناس
ثالث معصوم محمد
اسمه ينباس
الصد لعيونه ظل محتار
بالاحساس
الرهبه امن حسين و الخزره
من العباس

و اخذ من الرضا هاي المهابه
تضيع أهل الخلافه يم خطابه

نهج البلاغه اله مستورثه من هله
واويلاه واويلاه
سجل ملاحم نصر تاسع ضلع منكسر
واويلاه واويلاه
______

يحيى مصلوب والجواد
فوگ الدار
واحد مذبوح والثاني
بالسم محتار
يحيى برمحه اتلث تيام
ظل يندار
و اتلث تيام ما مدفون
إبن الكرار

شباب الانبيا فوگ الرمح نام
و شباب اليمه فوگ الدار ايام

بين النبي و الولي خيط النوايب جلي
وآويلاه واويلاه
بنفس الألم و الصبر تاسع ضلع منكسر
واويلاه واويلاه
____

ياويلي اعليه امن اقرب ناس
سم البين
بنت المأمون و المأمون
ذبحوا دين
الرضا و أبنه سمووهم
هالملعونين
طوس و بغداد بالغربه
هم متلوعين

أظن مو بس بني العباس أصلها
يعود الجعده هالمرأة نسلها

هذا الفعل متصل من جعده لـ ام الفضل
واويلاه واويلاه
تربايت أهل المكر تاسع ضلع منكسر
واويلاه واويلاه




حسين الأمين

#ليالي_جواد_الائمه_ع ٢
_

على الجواد وآويلاه
على الجواد وآويلاه
_____

شيعوا نعش ابن الرضا بصوت الفجيعه
و صيحوا ويه فاطمه و هزوا الوسيعه
طاح عرش الله و بچت لجله الشريعه
تاسع اليمه گضه بالسم يشيعه

باب المراد وآويلاه
على الجواد وآويلاه
_______

مات مسموم و بقت جثته غريبه
اتلث ليالي ابلا دفن ظل يا مصيبه
مثل ابو اليمه لچن ماهي سليبه
چثّته و لا رگبته بدمه خضيبه

مثل الحسين وآويلاه
على الجواد وآويلاه
______

بعد من الطف أخذ اعظم رزيه
هم گضه عطشان ساعات المنيه
بس وسط داره بقه مو عالوطيه
و لا تهشم صدره بخيول اعوجيه

نار الفؤاد وآويلاه
على الجواد وآويلاه
________

عمره بالعشرين يا لوعة مصابه
و غدرته بسم المنيه هالعصابه
بالعمر يشبه علي الأكبر شبابه
بعز شبابه هم مشه الحفرة ترابه

على الشباب وآويلاه
على الجواد وآويلاه
_______

ويلي من السم صبح منفطر چبده
و نايم و حر الشمس ويلي يمرده
عافته أم الفضل بالدار وحده
مثل ما عمه الحسن سمته جعده

ميت غريب وآويلاه
على الجواد وآويلاه
________

ابو الهادي يا عظم رفعة مقامه
سيفه چان السانه من يوكف امامه
ابن اكثم من سمع شدة كلامه
اتخورس اگباله و خجل دنگ الهامه

سيفه الكلام وآويلاه
على الجواد وآويلاه
______

ثبت اركان الهدى بعلمه و يقينه
اتسيد المذهب وهو تسعة سنينه
بني هاشم كل علم ما دارسينه
واحد الواحد تره متوارثينه

ناح الجماد وآويلاه
على الجواد وآويلاه





حسين الأمين

#ليالي_جواد_الائمه_ع ٣
____

جيتك ينزف همي
ما متوذر جسمي
موتي صار بسمي يا جدي
______

اجيتك و الخجل منك يجدي واصل الهامي
بالسم منچتل مو سيف من نحري صبح دامي
اواسي اجروحك بجرحي چانت هايه احلامي
بس نعمه يبو السجاد مثلك من متت ضامي

خجلان امن اجروحي
ما وافيت بنوحي
بالسم صعدت روحي يا جدي
_____

وحدي بموتتي يا جد بقيت بغربة احزاني
تكطّع چبدي من السم و محد يمي وآساني
مثلك موتي بس يفرق ما مذبوحه خواني
بكتري وواحد امتاني اموت ويشب صيواني

بوحدي و انته بوحدك
دمعه اطوف بخدك
يلي اسهام ابچبدك يا جدي
____

حيره و باقي أگطرلك دمعه ومستحه وحسره
ما مدفون هم ظليت ثلث ايام عالغبره
بس فوگاي اجتي اطيور تظللي بجنح فتره
وانته الخيل ظل فوگاك يالنايم بلا نحره

انته بحر الذاري
و آنه الباقي ابداري
و ما متوذره اكتاري يا جدي
____

اشما ونيت ما يكفي مصابك للحزن مرقد
اطوف بكربله بدمعي ونار الخيمه ما تخمد
أعذرني يبو اليمه ما مني تعفر خد
و لا متصوب ابگلبي ولا راسي برمح يصعد

طفك لوعه اهمومه
يالما سلمت گومه
جرحك يصعب يومه يا جدي
____

بعد الموت شيعوني ما ظل للسحگ عظمي
صح ظليت عالغبره بس ماكو اخت يمي
اجت بالليل شافتني نايم سابح ابدمي
ولاوسط الحصيره انشال گد ما منطحن جسمي

حالي شوفه و حالك
سالم جسمي جالك
يالمتگطعه اوصالك يا جدي




حسين الأمين

#استشهاد_الباقر_ع
____

بعيون الباقر لچمه .. وكلمه
مرسومه بشجن
جده بالعاشر صدره .. اينظره
بالخيل انطحن

كلمات عيونه حسين
ضامي ايذبحونه حسين مرسومه بشجن
____

دمع المنيه يروي الرزيه
من عين ابو جعفر لمن گرّب مماته
شاهد مصايب و اعظم نوايب
و اخذت كربله أكبر حزن من ذكرياته
سجل ظهوره بالطف حضوره
بسنين اربعه و الفاجعه بأول حياته
بالحومه جده من شافه وحده
و ينظر كل هله صرعه صفوا يا نايباته

محد يبراله جده .. بشده
مكسور الظهر
ينظر احواله غربه .. بحربه
و دمعاته نهر

متغير لونه حسين
ضامي ايذبحونه حسين
_____

نار و عساكر ارماح و مناحر
رسمت دمعته بخده جرح للغاضريه
خيمه و جمرها عمته و خدرها
ركضت على التل اوچبت بنت الزجيه
صاحت يخونه بعدك ولونه
يبن امي إذا بعدك عدل لحگ عليه
الباقر نظرها تنادي و ذخرها
نايم و الصدر منه ترضه الاعوجيه

شاهدها العمته ركضت .. ندبت
وجده عالارض
ينظر صوب اخته بدمه .. اتحشمه
بلكت ينتفض

شاف ايسحگونه حسين
ضامي ايذبحونه حسين
______

اتحتم مصيره ايكمل مسيره
ويه والده زين العباد امگيدينه
مسبي و تعذب وي عمته زينب
و للكوفه سبايه دخّلوا اشرف ضعينه
بچفه سويه وي چف رقيه
نفس الحبل مچتوفه بي چتفوا ادينه
اسياط اعله متنه ونه اعله ونه
الساعة منيته ظل أثر ضربه اعله عينه

ومطبوع بظهره ناره .. آثاره
لسياط السبي
وحسين اينظره جرحه .. برمحه
راس ابن النبي

حامي اعله ظعونه حسين
ضامي ايذبحونه حسين
________

بذيچ الخرايب شاف المصايب
نظرات الغرب تذبح اشد من كل مصيبه
الشام و قهرها يذبح يسرها
فوگ السبي و ضيمه الفرح ماخذ نصيبه
اطبول و هلاهل وعيد و محافل
و الباقر يشوف و حزن يشرح نحيبه
كل نايباته من الشماته
و اليبست گصصهم تنظر العتره النجيبه

كلمات الشامت تجرح .. تذبح
ما ترحم ابد
ونظرات الساكت تهظم .. تلچم
من عدها انمرد

بگلبه ايصوبونه حسين
ضامي ايذبحونه حسين
_____

آخر دموعه بدلاله لوعه
بالسم منچتل ما منگطع من عنده نحره
چان امنياته ساعة مماته
عالغبره مثل جده وحيد و ضامي ثغره
محد يعينه مو يم بنينه
ايواسي الحسين ابمقتله محد يحضره
خلصت حسرته ذابت مهجته
و چنها فاطمه حضرت لبو جعفر تصبره

غمضت بيديها بعبره .. الزهره
سدتله جفن
ياويلي اعليها صاحت .. ناحت
و الـ سمّه تون

طبگتله اجفونه حسين
ضامي ايذبحونه حسين




حسين الأمين

#محرم_الحرام

اَللَّـهُمَّ اجْعَلْ مَحْيَايَ مَحْيَا مُحَمَّدٍ وَّ آلِ مُحَمَّدٍ وَّ مَمَاتِي مَمَاتَ مُحَمَّدٍ وََ آلِ مُحَمَّدٍ

سيتجدد العهد هذا العام كما في سالف الاعوام مع رثاء سيد الشهداء عليه السلام و سيقرع القلب ناقوس الحزن قصائد محرم الحرام ١٤٤٦ هــ
ابتغاءً لمرضاة الله تعالى و أولياء النعمة الأطهار لا ألتمس غير دعائكم لي و لوالديّ بالأجر و الثواب
و نقول كما قال اسلافنا الأعلام
عهد الله عاهدناك يحسين انظل وياك
دربك ما نبعد عنه حبك مفتاح الجنه
عالفطره حبيناك يحسين انظل وياك



#حسين_الأمين

#استلالية_محرم_الحرام ١
____

باب امنياتي اسمك حياتي
عن عاطفه و ايمان اسمك حياتي
_

بيك شفت الدين قيم ابلا وجودك شلي بيه
انته مشكاة الهدايه الله حط كلشي بديه
گلبي لو ما يهوه اسمك ابفلس ما اشتريه
آنه كل ايامي انته و الهوه العايش عليه

ابلا طاريّك ظلمه الدنيه
و عميه العين ابلا مصباح
يا خير الغطاني ابعمري
انته الجاي و انته الراح

كلشي بچفوفك وداعت حروفك
و بمصحف الوجدان اسمك حياتي
__

ضيعت كلشي و لگيتك و صار إلي ذكرك حياة
بيك منك الك عمري و اسمك ابشفتي يبات
اشرب الماي و أسلم عالشفاه الذابلات
گلبي دگاته اعله اسمك گلبي لو ينساك مات

انته الميت و انته العايش
و انته الحاكم للازمان
ينبوع الكوثر بچفوفك
طافح بس ميت عطشان

كوثر دليلي ضامي بسبيلي
يالباقي عالتربان اسمك حياتي
___

حرّزت فكري بطفوفك من مفاهيم الزمان
الدهر ما بعّدني عنك انته لحساسي حنان
من مصابك و المصابك عايش ابنار و دخان
خيّمت يم طاري حزنك و دمعي وچدله مكان

رافگ ناگة زينب دمعي
من الخيمه الحد الشام
عاشورك لو هل اهلاله
يتوسم صدر اللطام

رسمت دمعتي حزني و حسرتي
يالمنذبح عطشان اسمك حياتي
___

عاشرت احزاني لجلك و فارگت كلشي بلاك
الليل من ايمر ظلامه دمعي بعيوني بچاك
امصاحب الحسره ولچمتي و روحي تاركها وراك
ابلا هواك اتموت ريتي و عيني تعمه ابلا ضواك

تيّهت اصحابي امن الدنيا
من اندليت اجروحك وين
ما يكفي امحرم ابچيلك
قررت انحبلك للبين

يبقى نحيبي لجلك حبيبي
يا معجم الاحزان اسمك حياتي
__

اباب مأتم حزنك آنه واگف بلوعه و عذاب
رايد امن ادخل عزائك ينترس گلبي مصاب
لون أسمع باقي نايم اتلث ليالي عالتراب
منسحگ مسلوب ضامي وچم سهم بحشاك طاب

مذبوح و جسمك عالغبره
و راسك يفتر فوگ ارماح
مسبيه اعيالك عالهزل
و الي يحديها الذباح

الحره الابيه تدخل سبيه
اعليها الدمع خلصان اسمك حياتي




حسين الأمين

#استهلالية_محرم_الحرام ٢ ( نزله )
_

هاي الشعائر للحشر موجوده
حافظها ربنه وبالكتاب اعهوده

آيه بكتابه امنزله آيه بكتابه امنزله
__

هاي المجالس بالدمه نشريها
ليوم الحشر الله الذي يحميها
يلي تريد من الأصل تلغيها
نص بكتاب الله أمر نحييها
(( نحييها بدمنه للمحشر ))

يلي تحارب افتهم مقصدنه
لهاي المجالس منرخض كل دمنه

آيه بكتابه امنزله آيه بكتابه امنزله
_

الصادق امرنه واحنه تدري انطيعه
لا تدخلنه بكل سنه تشريعه
هذا اللطم بالجنه هم منبيعه
قول النبي خصانه احنه الشيعه
(( خالقنه الباري الخدمتهم ))

احذر كلمتك لا تمس مبدأنه
لوما المجالس الله ما خالقنه

آيه بكتابه امنزله آيه بكتابه امنزله
___

نحيي الشعائر من لطم و قرايه
يا من تعارض كلمن و حر رايه
شوف السنه چم موكب ومشايه
خليها بذنك هاي منه احچايه
(( ما نترك للموت الخدمه ))

بالجنه باچر موكب النه تشوفه
و اليلطم العباس دون جفوفه

آيه بكتابه امنزله آيه بكتابه امنزله
__

قادم محرم و المدامع حمره
و النبي حاضر بالعزه و الزهره
يلي تمانع افتهم هالعبره
كل نبي مرسل واگف يدگ صدره
(( و حيدر يلطم طابر راسه ))

و حسين يحظر مجلسه ايحيينه
للجنه ياخذ ياهو تهمل عينه

آيه بكتابه امنزله آيه بكتابه امنزله
____

لو ما المأاتم چا تضيع الوادم
يل الحاير بذنبك تلوم و نادم
احضر مجالس و اندب و ظل لازم
ينغفر ذنبك بس تنظرك فاطم
(( و يتسجل أسمك خادمها ))

من الله هاي التعزيه هم رحمه
من تدخللها أدخل بكل همه

آيه بكتابه امنزله آيه بكتابه امنزله




حسين الأمين

#استلالية_محرم_الحرام ٣
__

مصابك نبي و عايش بغار خيامك
يل عالترب فرشت الخيل اعظامك

نايم وسط حر الشمس ساكن دليلي
___

الحالتك تبچي السمه صار غيم من الدمه
وانته متوسد الترب طعنه و عذاب
نايم بطول الأرض امفرط و ما تعترض
فرشوا بجسمك مثل فرش التراب
حتى من لمك علي وصله وصله يالولي
و بحصيره جمعك أعظم مصاب
شلون حامل هالوضع موذر شلون الدمع
نايم أنته و كون لأجلك باضطراب

ضاع الفكر من شفت جسم بلا رأس
يالمنچتل و محروگ من نار الشمس

بألف و تسعمية جرح ساكن دليلي
___

اتغيرت ارسوم الوجه و للخيم من تتجه
تسمع أختك تندبك و أنته چتيل
شيخ تلهب غيرتك و الحميه اخذتك
تجمع بحيلك تريد و ماكو حيل
رغم كل هذا الحصل گمت و موذر وصل
من شفتها عالخيم هجمت الخيل
گطعوا الراس و گمت بموقفك هذا همت
غيرتك فزعت من ادماك التسيل

خالد صرت كل زمن شمسك تسطع
لا ما متت مو شمر نحرك يگطع

يل عالرمح راسك بقى ساكن دليلي
__

طحت لكن عالسمه وانته ابن حامي الحمه
ما أظن الگاع تحمل وگعتك
حرت بيك و ما حرت لمن گالولي طحت
شلون توگع و أنته كون بصايتك
أجزم أنه بهل الأمر طحت بس واكف عمر
يلي طبع اجبال ماخذ هيبتك
ما متت لمن متت طول الزمان اتخلدت
و الشمس مصدر ضواها گبتك

يابو علي الباري اجتباك و إيدك
و ابموتتك لا ما متت مو موعدك

تبقى على طول الدهر ساكن دليلي
___

شفافك الصارن خشب وجهك بلون الذهب
ضامي لكن دمك امرويله كون
اتوذرت بس جمعت الدين بالدم احفظت
أنته مصفر و نطيت الدنيه لون
چم أخو شفته وگع چم إبن نحره انگطع
اتكابر بدمعك يملاچ العيون
نشفت ارياگ القلم من تخيلت الألم
فتشت بالطف جروحك ما تهون

شذكر إنه بكل جرح روحك تنچتل
يمهن متت بس ترد لخيامك عدل

وبجروحي بعدك ما متت ساكن دليلي
____

يا بشر ما مثلك بشر انطى للعالم عبر
بيك متجمعة المدامع و الألم
چنت وحدك بالحرب و اترست دلالي حب
يا حقيقة بلا خيال و لا وهم
عشت بيه بلايه حد بكثر طعنات الجسد
بكثر حيرة زينب بحرگ الخيم
عيشتني بلا سبب لأجلي متحمل تعب
سيوف و ارماح و جراحات السهم

گلبك ردت و سلمته اليه بلا ثمن
راس برمح و عيالك لأجلي انسبن

يالمنذبح و المنسلب ساكن دليلي





حسين الأمين

#استهلالية_محرم_الحرام ٤ ( نزله )
_

الله لا يحرمنه من هاي المجالس
__

الصادق اليروي فضلها و عنها اسمع قصته
اليحضر ابمجلس حسيني و يصرخ ابيا ليتى
ينحسب زاير احسين و گعد جوه گبته

من مجلسه زاير مسه الي حضر بالمأتم
منه انقبل افضل عمل الي لطم و محزم

الصادق اليرويها مو فكره و وساوس
الله لا يحرمنه من هاي المجالس
___

بالخصائص اقره عنها و دقق بكلماته
استشهد اويه احسين چنه الجالس ابعزياته
و رحمة الله تنزل اعله الي يهل دمعاته

لا لا تظن هذا الحزن ابلايه فكره و غايه
كلشي انوجد لابد عقد للحسين اقرايه

لليخدمه اتخصصت آية ننافس
الله لا يحرمنه من هاي المجالس
___

الما حظت بالحج سنينه و يحج راد بگلبه
خلي يجلس جوه منبر و العزاء اينصبه
ينحسب طاف المقام و لبى وسط الكعبه

زاير صفه مروه صفه ألي يلطم صدره
طاف انحسب حجي انكتب العينه هلت عبره

ما يفارگ مجلسه لو يرد عابس
الله لا يحرمنه من هاي المجالس
____

إلي يحضر مجلسه يلطم و تجري عينه
تحت ظل العرش باچر يگعد اويه حسينه
و اليريد الجنه ينشد على المأتم وينه

هاي الصفه مو عاطفه بالسند موجوده
و الغانمه ابمأتمه الخير كله ابجوده

هالمجالس للبشر اعظم مدارس
الله لا يحرمنه من هاي المجالس
____

اليبچي لحسين و دموعه اعله الوجن تتجاره
ايطيح الله اذنوبه كلها و ما يعذبه ابناره
و بالحشر ما تضمه شفته و لا تزيغ ابصاره

يوم الحشر كل البشر العين منها تعمى
إلا اليون يدمي الجفن للحسين و دمه

ينحشر فرحان مو خايف و بائس
الله لا يحرمنه من هاي المجالس
_

لون ما تبچي تباچى لو سمعت امصابه
لو فقط تنويها اسمك ينكتب بكتابه
حتى انفاسك تسبح و الأجر بحسابه

ابمجلسه تتنفسه الهوه تاخذ اجره
كلشي ابثمن لم الحسن لو بحجم الذره

الثواب اتحصله لو فقط جالس
الله لا يحرمنه من هاي المجالس




حسين الأمين

#استهلالية_محرم_الحرام ٥
___

فده العمر الك نذر
عيشني بحسينيه كون ابچيلك يوميه
___

رايد بجرحك حياتي ابلايه جرحك كلشي ما تسوه الحياة
أخذ بيدك عمري كله كون كل لحظه الجفون امبللات

عيشني الألم و افجعلي دلالي
رايد كل حياتي اجروحك اگبالي
شما دار الوكت بس انته البالي

مثل وهب الك وهب
عمره بصافي النيه كون ابچيلك يوميه
___

لچمه گلبي من طفوفك العذاب اوياك نعمه مو عذاب
احسبني گطرة ماي بلكت تروي عبدالله و ترده للرباب

رايد صوره من طفك تجي بعيني
يم حرگ الخيم و اللوعه وديني
و بذاك الجمر ابنص گلبي چويني

دموعي دم على الخيم
جمر الخيمه اطفي بيه كون ابچيلك يوميه
____

افرشني يم باب المخيم هيچ و تمر بيه سحگات الخيول
خاف يبقى ضلع سلم اخذه وي راسي على الهزل يجول

رايد راسي ينشال برمح مثلك
و لو ضربوها علويه يدنگلك
كون الضيم يترسني مثل اهلك

على الرمح أنه انذبح
رايد شوغة علويه كون ابچيلك يوميه
___

هاي كل احلامي بيدك طرزتهن چلمه چلمه بالدموع
خاف ما استاهل آنه هاك گلبي و شوفه بس لجلك يلوع

وقف كل المدامع بس على بابك
اترسهن و اوشلهن على امصابك
اقبلني عبد مملوك لاصحابك

عبد ردت ألك صرت
اقبلني و هاك ايديه كون ابچيلك يوميه
__

الله لا يحرمني منك من عزائك من خدمتك يا حسين
الكون لو بچفوفي ينحط ما ابدله بدمعة الخد و الونين

خليني بعزائك محترگ گلبي
رايد ييدي خدمه و ينتهي دربي
چني اويه اليتامه هم رحت مسبي

انتهى الحچي فقط بچي
امحلفك بالمسبيه كون ابچيلك يوميه




حسين الأمين

#استهلالية_محرم_الحرام ٦ ( شور )
______

سنيني ما يسون أي شي من دونه
حنيني يحسبني خادم ممنونه
ونيني ضامي مولاي ايذبحونه ونيني

مصابه خالط افكاري و دلالي
اعله بابه واكف و ادموعي تبرالي
عذابه شاغل گلبي و شاغل بالي عذابه

ساكن الروح حسين وحده حبيبي
گلبي مجروح و جرحه اصبح طبيبي
خالط الذات و روحي بيده ملكها
بس إله النوح يحلى لجله نحيبي

ساكن بين اجروحه و الحافر
و اسرح يمه مجنون و شاعر
و يتحقق حلمي بلهفه امساهر
كل يوم ابچي امصابه چن عاشر

بدموعي الجريه ارسم محنته
و اشعر بالعزيه الطف و غربته
و بعالم خيالي حاله أنظره
نايم عالوطيه و سيف برگبته
______

خدامه الله بهالخدمه امشرفني
كرامه تاج العز دوم املبسني
وسامه دمعاتي و لطماتي و حزني وسامه

امامي لجلي متوسد عالغبره
هيامي من اجري لمصابه العبره
غرامي گلبي من حب غيره اتبره غرامي

رافع الهام بخدمته كل عمري
اكبر اوسام دمعتي من تجري
آنه يا ناس حسين روحي و دمي
اتركه اوهام عاشگه من زغري

رايد بس الجرحه دمعاتي
رايد من دم تنزل عبراتي
بلكي موتي ايحين بآهاتي
و ايرض گلبي حافر لوعاتي

من صوت امي اسمعه بذني كلمته
بيه حبه شمعه تضوي امحبته
همست امي كلمه لحسين العشگ
بحسين خلي طبعه گلبك نبضته
_____

حنانه ما توصله ذره أمي
امانه من حبه اسمه صار اسمي
مكانه ما يتعوض يجري ابدمي مكانه

رسمته وسط عيوني اصبح قبله
عشگته و ما عاشگ لا بعده و قبله
خدمته و ضحيت بهالدنيا لجله خدمته

عاطفه و دين حسين صاير حياتي
بخدمة حسين تنقبل كل صلاتي
أصل هالنور كله شع من وجوده
بدمعة العين تكتمل امنياتي

محلاها يمه يخلص عمري
حد ما اجزع و أخلص من صبري
رايد يوميه اخسفله صدري
يالدمه عالغبره ظل يجري

شعت من خيامه للعالم ضوه
و بنفاس اليتامه شمينه الهوه
كل الدنيا لجله و الكون انوجد
من منهل كلامه ثبتت نينوه
_____

رساله نهجه للعالم يتوصف
دلاله نحره يترتل چن مصحف
بساله و العزمه شاهد ظل الطف بساله

دمائه تنزف ايات و تترتل
سنائه قانون و دستور و مشعل
نسائه لجل الدين ايصعدن هزل نسائه

كل الاديان عبره تاخذ ثورته
صوت قرآن بعالم الذر سمعته
وهج للكون كربله و كل ألمها
لينه عنوان شامخه تبقى گبته

رايد بس دمعه اتظل سچابه
و ما اترك فد لحظه امصابه
و اوگف مثل امجدي يم بابه
و يتيمم حزني بس بترابه

و بصوت المنابر انولدت هالخدم
من وحي المناير رفينه العلم
و زنجيل المواكب اسسنه نهج
بتطبير و شعائر ثبتنه القيم




حسين الأمين

#استهلالية_محرم_الحرام ٧
_____

يالناشدت عني و تريد اخباري
ايدليك بيه دمع عيني الجاري

يالتيهت عنواني بكل تعزيه تلگاني
___

يالتبحث عن العنوان اسمع مني هالكلمه
تلگاني بظلام الليل تضوي دمعتي النجمه
لا تسألني وين اتعيش بيتي مجلس و خدمه
صحباني الدمع و الآه و اللجمات و اللطمه

اويايه دمعتي تنتقل بالعزيات
امسافر على اجناح الجرح و الحسرات

شوف الدمع حلاني بكل تعزيه تلگاني
__

ليليله اعله باب الشوگ كاتب مستهل و انعه
مجلس ناصب ابگلبي كل لحظه يون ضلعه
ياما حارگ ابروحي بس ما أشبه الشمعه
ما اطفه اويه هب الريح لا اذبل من الدمعه

لو چنت منغث السبب مو بيه
كل يوم افك ريگي الصبح لطميه

بحسين افك الساني بكل تعزيه تلگاني
_

ميهمني تذم عذال بكفاي الحچي متروس
مهو البيده گمر ضاوي شلون ايبدله ابفانوس
خليني اعله باب حسين الداخل مجلسه محروس
ترى الشجره التحب حسين فشله اتخاف من الفوس

خليني يمه و بالمجالس شادود
لطام صاير شاعر و هم رادود

امگدي اعله بابه اني بكل تعزيه تلگاني
__

لتحاول تغير أفكار ما تگدر عليه ابهاي
ترى ظهري اسنده عباس من طاح اعله شاطي الماي
كل يوم الحرب تنعاد و يرجع منتصر مولاي
كافي بسك اتعادي حسين امسيطر اعله الراي

شگد حاربوني قبلك و روح أسأل
كلمن على المجلس تگرب ينذل

من هيبته انطاني بكل تعزيه تلگاني
____

عن هاي القضيه أبعد منك ما ردت مأجور
تدريني من ادگ صدري حيدر يعتني مطبور
قبل لا يبتدي المجلس توصل مرأة من النور
بآخر زاويه تگعد تبچي و ابضلع مكسور

يوصلني فارس بس بلايه چفين
من گتله ياهو گلي شادود حسين

الطم بلا ذرعاني بكل تعزيه تلگاني
__

كلما انحني ابابه يرد يرفع إلي الهامه
كلش زايده اعليه لو يحسبني خدامه
شمقدمله حتى اقنع ريت احترگ بخيامه
لو كون اكسر بصدري فدوه الكسرت اعظامه

اشما دمعي يجري و باللطم متوزر
لا ما اوافي شوغه من الخنصر

لمصيبته أحزاني بكل تعزيه تلگاني





حسين الأمين

#ليالي_العليلة_ع ١
___

نجوم الليل ياما ناشدت عنك نجوم الليل
هجرني الحيل ماكو أي خبر منك هجرني الحيل

احسبلك دمعاتي بالنجمه احچاياتي
_

امرافگه الهظمه و تاركه البسمه
يوم ما هدتني ايدك
إيست روحي أحسب جروحي
كلهن ايصيحن نريدك

خلصت دمعات ليلي و ظلت آلام
النجم گد ما عرفني بعتبتي اينام
يامه ناشدته يردلي و ترجع اوهام

گلب محتار .. خطوتك تيهت دربي گلب محتار
ارسمت بالدار ملامح حيرتي وتعبي ارسمت بالدار

و أتصور حسراتي بالنجمه احچاياتي
_

اكتب و ارسل حزني ما يحمل
و الصخر فت من ونيني
النجمه مرسالي عاين أحوالي
اعليها ابعثلك حنيني

للسمه صد من يمر ابدربك الليل
عالنجم مكتوبه بنتك شافت الويل
روحي مطحونه بغيابك طحنة الهيل

على النجمات أكتبلي وأنه اكتبلك على النجمات
بلا لچمات بلگت اگدر اوصلك بلا لچمات

انساهن لچماتي بالنجمه احچاياتي
___

من رحت عني كلشي فارگني
و رافگت علتي و نحيبي
كل ابو البنته اتلمها عاطفته
ضايعه بعدك نصيبي

بويه من حمّل ظعنكم ثگلت الروح
ضيّعت كل السوالف چلمت اتروح
من كثر ما باچيتلك علمت نوح

ردت وياك ابهودج عمتي اتحطني ردت وياك
يمن بچفاك اظل ابحسبتي و ظني يمن بچفاك

ما تخلص حسباتي بالنجمة احچاياتي
____

اتخيلت ليلي وانته تحچيلي
و بوسط حظنك گعدتي
تسأل و أسأل وإني ادلل
و اسمعك تهتف يبنتي

إحساسي هالمره صدمني شايل اخبار
ما ترد كلمة يبنتي اسمعها بالدار
خايفه بويه و دليلي و عقلي محتار

اشوفك جاي يمته اتحقق أحلامي اشوفك جاي
فگدت الراي تخيلتك متت ضامي فگدت الراي

ارجعلي صرخاتي بالنجمه احچاياتي
__

بموطن الجرحه صايره سبحه
امطشره و بس بيدك التم
من بعد نوحي و معركة روحي
ينعه أسمع ابن حذلم

حسين عفته اعله الوطيه و جسمه مسحوگ
و عالرمح يفتر نظرته راسه بالسوگ
و زينب ابلايه الكفلها صعدت النوگ

متت يحسين اعيش شلون من دونك متت يحسين
عشت يومين فقط من غيبة اعيونك عشت يومين

ما طالت ساعاتي بالنجمه احچاياتي





حسين الأمين

#ليالي_العليلة_ع ٢ ( نزله )
_____

من شلت بضعونك بويه ميته ابدونك
_____

هودج الفرگه ابمشيته زاد علتي بيه جسمي ناحل و ابغيابك هالصرت محنيه
ما اگلك رد يبويه بلكي عطرك ليه
ادزه وي نسمات ليلي خل تشمه الريه

خل يگلي شلونك بويه ميته ابدونك
______

ليلي يخلص بنتظارك و انشد بمصباحي
هلبت ايرد خبر منك يشفي ليه اجراحي
ذبلت اجفوني ابغيابك و الدمع ظل صاحي
ذكرياتك رمح بيه و الهجر ذباحي

من درتها اعيونك بويه ميته ابدونك
_____

بير يجري فوگ خدي و اخذ مني ارسومي
من كثر ما باچيتلك امبللات اهدومي
يبتدي امناشد عليك و ينتهي كل يومي
بلكت اسمع خبر جيتك عايشه بهمومي

ما اجي بظنونك بويه ميته ابدونك
_____

اهناك لن مخبر اسمعه جاب اسمك ثغره
گلبي من صدري رگضله بشتياق و حسره
گتله وين حسين گلي و رد عليه ابعبره
راسه فوگ الرمح عفته و جسمه فوگ الغبره

امن العذب حرمونك بويه ميته ابدونك
________

من سمعته الطمت وجهي و اعرفت متردلي
و بعد عمرك يا حبيبي ابهالعمر چا شلي
يالبقيت و عاري جسمك عالرمال التغلي
و سهم المثلث ذبحني و دمعي لجلك يهلي

امن الگفه ايذبحونك بويه ميته ابدونك



حسين الأمين

#ليالي_العليلة_ع ٣
__

يا ريح للغالي وديلي مرسالي
طالت عليه غيبته وديلي مرسالي
___

يا هوه أخذ الرساله و اگصد الظعن الاهل
خاف ناسيني ابويه عني ما مره سئل
روح وصل هالرساله هلبت ايردلي امل
ايّست روحي تراها يوم من يمي ارتحل

ماكو خبر عنهم يا ريح ناشدهم
تارك عليله ابنيّته وديلي مرسالي
_

امساهره يا ريح وحدي والحزن بيه بنه
ديرة اهموم و نوايب بالگلب مستوطنه
بليل ما غمضت عيني ولا نمت بعده بهنه
جامع الون صار بيتي كل جرح بي مأذنه

هلبت يرد ظعني يا ريح جاوبني
تذبح دليلي فرگته وديلي مرسالي
__

اتعودت كل فجر روحي تنوي ليليه الدمع
وشبحت اعله الباب عيني بلكي مره يندفع
فعلاً اشبهها الزجيه امشي محنية ضلع
ايذوب وي السهر عمري مثل ميذوب الشمع

لمن رحل عني بيه استقر حزني
يا ريح گلي بحالته وديلي مرسالي
__

جرحه نايم وسط گلبي واشيطيّب خاطره
چن غصن بالغربه وحدي ذابل ابلايه اشجره
يا هوه ماريد منه بعد يوصل وانظره
هسه كل امنيتي عطره دزه إلي من منحره

خليني اشتمّه تبرد إلي لچمه
خل افرح بشم رگبته وديلي مرسالي
_

كثر ما تعبني هجره اگعد ارسمله صور
رافچت بابي و عتبته هلبت الجيته أثر
بكلشي دزيت الرساله الطير وانجوم و گمر
لو تشوفون الظعينه الوالدي وصلوا خبر

گلوله منتظره رجعتك بالسفره
ادريها تنزل دمعته وديلي مرسالي
___

ها يريح العطر هذا منه كل حيلي انهدم
اشم بي موت و ضحايه و نحر ابويه يجري دم
آخر الشهگات چانت نزلت بريتي سهم
لا تگلي حسين ميت وصدره بالخيل انهشم

شمّيت احساسه برمح انرفع راسه
من الگفه چن ذبحته وديلي مرسالي





حسين الأمين

#ام_الوفاء_والبنين_ع ١
___

ام اربعه انطت ولد وفايه
أولهم إلي سلمتله الرايه

من هذا الإحساس تتعلم الناس
انطت ولد وفايه
____

أربع كواكب سلمت و تكول خاف امقصره
لحسين لو عندي الف كلهم فداء النحره
بلكي يصيرولي حرز و ترضى عليه الزهره
مو مهم مات شچم ولد المهم اوفي العشره

تسولف ولكن مستحاها هوايه
بس لا يقصرون الولد من هايه

تتراجف أنفاس تتعلم الناس
انطت ولد وفايه
_

ماكو مثلها اعله الأرض بالوفه ما إلها أحد
مرت أبو تصبح خادمه الولده گلبها يمتد
تفديه شبان أربعه و منها الجفن ما يرتد
عدها بصيره و عالمه بالطف تعرفه استشهد

دوم تلهج بالطفوف و بالبين
تكللهم انتو قدمتكم لحسين

واحدها نبراس تتعلم الناس
انطت ولد وفايه
____

كالت يولدي من مشوا اتذبحوا دون حسين
ماريدن اتردون الي ياخذكم اوياه البين
كون اربعتكم عالنهر طيحتكم اتعلي الدين
عباس منك رايده عزب سهم وسط العين

انطي جفوف و بعد انطي عينك
كل ذني سهله ولا يطيح حسينك

صوب بعد راس تتعلم الناس
انطت ولد وفايه
__

تشهد عليها أم الحسن قدمتهم و محتاره
ظلت تناشد عن ولد واحد تريد اخباره
ما همها كل الاربعه والگلب شبت ناره
تلهج يربي حسين إلي سالم يعود الداره

هذا الوفه ماله شبه لا والله
حته ما صاحت عليهم ويلاه

شده و عظم باس تتعلم الناس
انطت ولد وفايه
_

اتلگاها هاليوم السبط واكف يرحب بيها
يا هله بأمي الغاليه بـ ام الوفه يسميها
مشتاگة جانتله اشكثر والخاطر ايأذيها
يمسح دمعها بيمنته و الزهره گصدت ليها

مشكوره يم الأربعة و تسلمين
و حيدر اجه يبارك تعبها لحسين

گاصدها عباس تتعلم الناس
انطت ولد وفايه





حسين الأمين

#ام_الوفاء_والبنين_ع ٢ ( نزله )
___

الوصيه نفذتها عالشريعه ثبتتها
___

انه اجيتچ و اخبرچ يمه سمعيني
لجل اخويه هديت السهم عيني
لا تنشديني امرچ لا تنشديني
روحي للطف تشوفيها چفيني

مهجتي هم قدمتها عالشريعه ثبتتها
____

يمه بشريني وياچ انه اموافي
وزعت روحي لحسين هوه صافي
طلب دمي ييمه و ما گلت كافي
الماي ذليته وانه امفطره اشفافي

بسهم عيني اكدتها عالشريعه ثبتتها
_

انه أول أخو ايعزب اخوانه
للمنيه مشت كلها ولهانه
كلمن يريد ييمه يعتلي شانه
ايضحي لحسين وجوده ويه وجدانه

لبو اليمه سلمتها عالشريعه ثبتتها
_

وگت الاحروب تعرفين منو ابنچ
حاشه فد يوم ييمه خيبت ظنچ
والله لو رخصه منطيني اوعدنچ
چان روس العساكر وصلت الحظنچ

والرگب چا گطعتها عالشريعه ثبتتها





حسين الأمين

#ام_الوفاء_والبنين_ع ٣
____

آنه يقافلة العزيز ام البنين
هاذي وصيتي الكربله من تعتنين

لو عميه صارت عيني دزي قميص حسيني
___

يا قافله لو للسفر هاي المسيه انويتي
حفظيها من ام ثاكله كل جلمه من اوصيتي
يالشايله كلشي إلي روحي و دمعتي و بيتي
كل خطوه امشيها بحذر لو للطفوف امشيتي

ديري بالج عالحراير و الحسين
دربج طويل و خايفه تتعثرين

اترجاج لا تنسيني دزي قميص حسيني
_

أم اربعه كلهم مشوا و بوحّدي تركوني
أمهم انه يا قافله بس ولدي ميهموني
خافن يأذيني الهجر و بدمعتي ايخلوني
دزي قميص ابن النبي فدواته ماي اعيوني

لو طال بيج المكصد اويه ابن البتول
دزي عطره بدونه عمري ما يطول

اويه الريح اشم خليني دزي قميص حسيني
_

خلي اعله بالج راكبه خدر الهواشم كلها
بخرت هودجها بعلي و سورة الزهره اقره الها
يا قافله كلشي و لا واحد يصد الظلها
بهونج اكطعي هالدرب خوفي يرك محملها

دزيت وياها حرس ابني الكمر
كتله انذبح عن لا يشوفوها البشر

رد يمه لتوصيني دزي قميص حسيني
__

يعقوب ثاني بالدمع صايره و خدي امحفر
مو بنيمين انه انذرت أربعة الكطع المنحر
ديرت حزن بيه انبنت عكبه الجفن ظل يسهر
يوصل قميصه انتظر جا ليش عني اتاخر

يوسف حياتي لشوكت ابقه انتظر
طال الهجر ليه قميصه ما يمر

هواي البعد ماذيني دزي قميص حسيني
____

يا قافله ماكو خبر عنكم تره الروح ابهم
دزي ولو من الرضيع اكماطه خل عطره اشتم
سبحه ابغيابه اطشرت هيجي العمر ما يلتم
اربعه ولدي فدوه اله كون المهم بس يسلم

يا قافله كل الولد فدوه تروح
المهم تسلم لبو السجاد روح

وانه فدوته سنيني دزي قميص حسيني




حسين الأمين

#ام_الوفاء_والبنين_ع ٤
____

للدر صدف سورة كهف
أم البنين
____

نزلت آيه الگلبها بالوفه أوحى ربها
مثل أم موسى اصطفاها والله ما ضيع تعبها

موسى مو واحد نطاها اربعه الله هداها
و كتبت بنص گلبهم بس الحسين وجاها

كل الوفه إلها صفه
أم البنين
________

بالوفه درّ لبنها وصدف للدر حظنها
قدمت كل ولدها المهم فاطم ترضى عنها

مره اتعادل عشيره والكرم بيها سيره
سفره قدمت ضناها نبع غيره اعله غيره

منبع كرم للعز هرم
ام البنين
_______

رمز غيره وبساله نهج ثورة و دلاله
عزبت نحر ابنها اسمه راعي الكفاله

الزينب انطت ذخرها وصار حارس خدرها
وصته بدم چفوفه يوفي بالطف نذرها

عدها نذر اتقدم بدر
أم البنين
_____

من وحيها تنزل مصحف الغيره ارسل
للفرج صار اسمها والصعب بيها يسهل

كربله تشهد إلها عن شجاعة فعلها
كل نحر من ولدها كتب بالدم لجلها

أصل و فصل گول و فعل
أم البنين
_____

حيد ربت شجاعه گمر والسيف طباعه
لو حسينه يأمره ايگله سمعاً وطاعه

خويه ابد ما يگله سيدي لو ندهله
وينحني من يجيله ويفني هالدنيا لجله

ربت گمر ذل النهر
أم البنين




حسين الأمين

#مسلم_بن_عقيل_ع ١
___

الكوفة خيبر .. وبعزمي عسكر .. حيدري
بهاي الحرايب .. اقلع كتايب .. حيدري

ما اقلع البيبان جيش اقلع بكوفان
حيدري
_____

آنه ابن الكسر خشم العرب عزه
عقيل بخزرتي و بسطرتي الحمزه
عمي البيده خيبر بابها امركزه
العجز جف اربعين انسان عن هزه

بفعالي جعفر .. وايماني حيدر .. انتسب
اصل المكارم .. الهاي الهواشم .. انتسب

من منهل الايمان جيش اقلع بكوفان
حيدري
_______

كتاب حسين بيدي و من علي عزمي
و هالمرسال يحجي و ينطق باسمي
أخ گال و ثقه عني ابن عمي
مني و اني منه و دمه من دمي

صاحب وثيقه .. نور وحقيقه .. للبشر
من الامامه .. احمل كلامه .. للبشر

بي واضح التبيان جيش اقلع بكوفان
حيدري
_____

دخلت و صارت الكوفه تحت امري
و يوم البيعه كلها مالت لكتري
وسف تالي المكيده انحاكت بظهري
بالمال اشتروا هالدنيا و بغدري

محد بقالي .. بالغربه تالي .. انغدر
شمس الامانه .. بجف الخيانه .. انغدر

ناس أعبدت شيطان جيش اقلع بكوفان
حيدري
________

آنه بدار طوعه و كشفوا اخباري
و التمو عليه و حاطوا اكتاري
عدت خيبر و انه حيدر علي بناري
مثل الباب قلع هالجيش بتاري

وحدي اقاتل .. ولمن انازل .. جن علي
خيبر عدتها .. جيوش اقلعتها .. جن علي

تربايت الشجعان جيش اقلع بكوفان
حيدري
________

صلت صولت علي و محد سلم بيها
و عزرائيل حيرته بطواريها
يميني من علي ياهو اليلاويها
وجم تله برگاب الجيش بانيها

سيفي يدمدم .. وبالحومه يهدم .. ذوالفقار
تذبح خزرتي .. وتشبه ضربتي .. ذوالفقار

وبعمي عالي الشان جيش اقلع بكوفان
حيدري
___

احارب و الگبر عمي تصد عيني
و احس عفيه يكلي بضربت يميني
و تصد مره بدمع لحسين يجويني
و اگله الكوفه غدرت ارجع حسيني

بعيوني اناضر .. بوحدي حاير .. يا حسين
الكوفه اذاهه .. خانت تراهه .. يا حسين

غدرت عهدها الجان جيش اقلع بكوفان
حيدري





حسين الأمين