#ليلة_الوادع ١
_ - _ - _

يلا يزينب يختي ودعيني
من يا كتر باچر تشبگيني

بالطف تشوفيني جرح والراس مشيول برمح
يلا يزينب يختي ودعيني
____

اگعدي يختي خل نتوادع بدمعه
باچر عالصدر بس خيل متربعه
خل انسولف شمحلاها هالجمعه
زينب حتى طفلي باچر انودعه

خلينه نحچي يختي خلينه
باچر على الغبره تشوفينه

يصعب يزينب كل شرح والراس مشيول برمح
يلا يزينب يختي ودعيني
____

خليني اسولف يختي و اتسمعين
ماريد بدمعتچ للعدو اتبينين
و هونچ لو ركضتي خايف تعثرين
و عالتل يختي باچر ذبحتي تشوفين

هونچ يخيتي بالدمع هونچ
خايف عالتل تنعمي عيونچ

من الگفه يختي انذبح والراس مشيول برمح
يلا يزينب يختي ودعيني
___

باچر لو ركضتي من الحرگ بالبر
خوفي لا تلمحچ نظرة العسكر
استعدي يختي باچر عينچ التسهر
من تتكفلين ايتام و الخدر

بالچ يزينب بالدرب بالچ
باچر عساكر و أنتي الحالچ

ياذني متنچ منجرح والراس مشيول برمح
يلا يزينب يختي ودعيني
___

احچايه أرد اگلچ يا بعد عمري
لتصدين عينچ من يرض صدري
و لتصيحين بسمي من يحز نحري
و لتمسحين دمي لو يظل يجري

باچر يزينب من تشوفيني
من الخيل يختي ما تعرفيني

والدم على الغبره يسح والراس مشيول برمح
يلا يزينب يختي ودعيني
_

عينچ عالزغار من الحرگ و النوگ
صبريهم يزينب لو دخلتوا السوگ
تلچمني اليتامه و الچدم محروك
يأذي ارقيه خايف يختي من الشوك

لو نظر شامت يجرح ايتامي
و انه اعله رمحي و الوجه دامي

خوفچ إذا طر الصبح والراس مشيول برمح
يلا يزينب يختي ودعيني





حسين الأمين

#ليلة_الوادع ٢
__

احتارت زينب الليله وتگطر بالوداع احساس
مره اتعاين اعله حسين مره اتعاين العباس
_

يا حيره الذي اتمرها مو لحظة اموادع موت
تصد اجبين ابو اليمه و تهل ادموعها ابلا صوت
باچر بالحجر مصيوب و دمه اعله الثياب ايفوت

و ينهد حيله وسط الگوم و تهجم بالرماح الناس
__

صدت عالگمر و تشوف جمال اعيونه و المبسم
وصدى صوت الطفوف ايگول باچر تگطر امن الدم
عين ابسهم عين ادموم يطفن و الصبح أظلم

يروح الچان كافلها الحارس عالخيم نبراس
__

ردت عالحسين و گال صعبه فرگتچ صعبه
و هيه ابلا خبر معلوم شافت منظر ابحربه
شافت سهم المثلث يشلع وصله من گلبه

يطلعه من گفاه حسين وتحيط بحومته الارجاس
____

شافت موقف الكافل من يبقى بلا چفين
من يوگع على الشاطي وسهم مصيوب وسط العين
وسمعت چلمة الخويه و حاير من ركضله حسين

و شافت بين هذا و ذاك طايح و العمد بالراس
_

باست نحر اخوها حسين و المدمع يضوي الليل
وشبگت صدره بالحسرات واتخيلت تسحگه الخيل
تسمع كسرت اضلوعه و تصيح ابچلمة اليا ويل

عگبه توگع اخيمها جسمه بساعة الينداس





حسين الأمين

#ليلة_الوادع ٣
لسان حال الإمام علي السجاد عليه السلام
____

الخيمه رسمتلي صور منيه
اشد من گطع النحر عليه

والدي ايودع عياله كلشي بالدنيا بچاله
____

التمن و صار الدمع كل الحچي
وحده ماتت وحده بيده ترتجي
عمتي زينب سمعته و شبعت بچي
يا عيالي رايح انه و ما اجي

الخيمه صارتله جرح هذا أشد من الذبح
الفرگه صارت تتضح قتيل
شفت دمعات اليتم شبت بروحه الم
بحيله گوه ظل يلم ثچيل

شبگته عمتي و تون سمعها
نشّف ابچفه الجفن دمعها

بخطوه كل دمعي جراله كلشي بالدنيا بچاله
____

ما بقت كل دمعه بينه بخطوته
من ظهر مهره اشاهد طيحته
عمتي من الخيمه تسمع رضته
الله لا ينطي الخيول السحگته

نشّف عيون الدمع استمع كسر الضلع
شفنه راسه منگطع سليب
الخيل تسحگ عالصدر طحنت بعظم الطهر
امن الگفه حزه الشمر تريب

عمتي تركض بالحرب يحيره
من يصدوها الغرب چبيره

منفرش عالغبره حاله كلشي بالدنيا بچاله
__

من وگع شفنه العساكر و الخيول
فوگ صدره تسحگ و ظلت تجول
جتني زينب ناشدت عمه شتكول
فرن اعله الحومه هالموقف يطول

أنظر الحال الحرم اتشگاف و ماكو رحم
السوط و النار ابخيم تطوف
طفل بالحافر عثر طفل متگطع وذر
و ابن مگطوع النحر نشوف

اقسى كل منظر جره عليه
طفله تمشي اميسره وسبيه

جسم أبويه الخيل جاله كلشي بالدنيا بچاله
___

طفله طاحت عالجمر مچويه ادين
ارقيه سلوبها التراچي الظالمين
وحده تصرخ عمتي وحده حسين
بالترب ركضتهن الما أدري وين

راس مرفوع برمح و راس بالعين الجرح
وانه كل لحظه انذبح عذاب
طفله تركض للنهر طفل بالحومه عثر
وحده تنده يالكمر مصاب

حشمت عمي الكفل يجيها
الثوب بالنار اشتعل عليها

عالنهر موته حلاله كلشي بالدنيا بچاله
__

بهيمه تالي گعدوهن عالتراب
لا خيام و لا حراسه بس حجاب
الزينب السوط اعتنى بكل العذاب
من بعد ما شاهدت اعظم مصاب

نامن بوسط الرماد غربه حراس و بلاد
الهوه صاير بس سواد دخان
وحده تنشد يا حسين عمتي يا عباس وين
تريد اخيتك يالحنين مكان

والله حيره حيرتي بعذابي
ألم زيدت عمتي مصابي

والشمر جهز حباله كلشي بالدنيا بچاله





حسين الأمين

#ليلة_الوحشه ١

السيده زينب تخاطب اخيها الحسين عليهما السلام
بعد إنتهاء معركة الطف
_ - _ - _ - _ - _

ليل وحشه وماكو وجهك
لا عطر منك اجاني لا خيال
ياهو اليه بغربه وحدي
اخلاف عينك چتفوني بالحبال

ضيعت كلشي من گلت أمشي
_

شحلاة ارسوم وجهك چانت اطوف
بدليلي و الحزن عن گلبي مكشوف
هسه اعله الشفايف طبرة اسيوف
اشوفنها و عساها عيوني متشوف

شلون ظلت روح عندي
من شفت دم بوجنتك و التراب
طايحه منك عمامه
خويه اول مره اشوفك لسه شاب

ضيعت كلشي من گلت أمشي
___

چنت وياك چن شجره و غصنها
تفي اعليه و انه بسد حضنها
رحت و بروحتك روحي حزنها
ميته وياك يا خويه لونها

عفيه ظلت مهجه عندي
من گلت راح امشي خويه و الوداع
عگب ما ضيعت صوتك
انشده يا خويه حالي و گلبي ضاع

ضيعت كلشي من گلت أمشي
____

اسهرت ليل الهظم بالدمعه اناطر
يتامه خايفه و ابلايه ناصر
لحظه و لن تمر شفت الحوافر
وذر جسمك يخويه اعليها صاير

هنا ردت خويه المنيه
و لا اشوفن خيل تسحك بالعظام
ما دريت اشلون حالي
نباوع و يجري دمعنه ابلا كلام

ضيعت كلشي من گلت أمشي
____

صدك ليل و بعد ما تگصدلنه
وحيده أبقيت و ابلايه زلمنه
اناطر بلكي اشوفن رف علمنه
اشوفه و لكن الشاله شتمنه

شايل بچفه علمنه
و بالسهام امزگينه و النساء
فرحت العباس اجاها
تالي حارس عالظعينه و الخباء

ضيعت كلشي من گلت أمشي
___

شفت حارس يمرنه بعتمة الليل
يگول انه الحرس من عگب الكفيل
يخويه اهنا طحت و اتهدم الحيل
شبچت ايدي اعله راسي ودمعتي اتسيل

درت وجهي عالشريعه
ها يخو زينب أناشد يالكفيل
وسفه شامت يحرسلنه
و باچر بأمره سبايه عالهزيل

ضيعت كلشي من گلت أمشي
_

درت هالعين و الهزل ورايه
ظعنه امسافر ابلايه نهايه
ركبت اعله الهزيله ابلا حمايه
ينشدوني يزينب ماكو رايه

مودع الله بدربي انه
اي يبو اليمه حبيبي و السلام
مروا اعله القتله بينه
الأكبر و جاسم ملوهم بالسهام

ضيعت كلشي من گلت أمشي
___

مشينه و من وصلنه الديرة الشام
نظرات الغرب ترمينه بسهام
أهلها احجار يرمونه عالايتام
بخرايبهم يخويه اطفالك اتنام

صعبه بت ذاك الغضنفر
تدخل بمجلس دعيه ترد جواب
تالي گعدونه بخرابه
لا ستر بيها الحرمنه ابلايه باب

ضيعت كلشي من گلت أمشي





حسين الأمين

#ليلة_الوحشه ٢
__

علي احضر علي احضر زينب حايره بالبر
ظلمه و محد اوياها و الخيمه جمر تسعر
__

علي زينبكم الدمعه تاخذها و توديها
اليتامه حايره بيهم و لا واحد حضر ليها
گوم الها يحامي الجار و امسحهن بواچيها
وحيده زينبك معقول بالغربه تخليها

علي وينك علي ونيك بنتك شوفها بعينك
غريبه بدمعة ابچاها و الخيمه جمر تسعر
___

بالهيمه و ظلام الليل بنتك يا علي احتارت
چفها امن الجمر محروگ بين النار من طافت
گوم و أطوي هالوديان بيها اجيوشهم دارت
و مذبوحين اخوتها و بلا حارس تره صارت

علي زينب علي زينب خدرها ألحك اتسلب
و بيها تحرس اعداها و الخيمه جمر تسعر
____

تصد ابعينها اخوتها كلها اعله الثره نومه
و تطر الجيش وحدها زينبكم المحشومه
و شافتها تره هالناس من ركضت على الحومه
راحت تنشد اعله حسين و جاب الحافر اهدومه

عالتل يا علي عالتل وگفت ساعة المقتل
شافت ذبح ولياها و الخيمه جمر تسعر
____

اگصد زينب الليله باچر ما اظن تلحگ
و حلّ اگيودها ابچفك خاف النوگ تتسبگ
گبل ما تنسبي الحره و متنها بسوطهم ينطگ
هاگ السيف هاگ إلواك و الحگها يراعي الحگ

علي الحگ علي الحگ متن بنتك صبح ازرك
سوط الجيش آذاها و الخيمه جمر تسعر
_

يلي گاصد السلمان و هاي الگاع طاويها
چا بين العده و النار زينبكم تخليها
ما تبعد تراها الطف اگصد يا علي ليها
الهزل للسبي اتحضرت و علوياتك اعليها

چم علويه مختنگه و من النار محترگه
علي يا حامي احماها و الخيمه جمر تسعر
_

من تگصدها يالكرار شاهد كربله بعينك
صفه ظعنك ظعن مسلوب و احترگت صواوينك
و شوف اشچم ابن مذبوح منك الله اليعينك
وميدان اعله صدره الخيل ياحيدر صفه حسينك

لحسينك علي ناظر ابصدره امربع الحافر
اضلوعه الخيل داساها و الخيمه جمر تسعر




حسين الأمين

#ليلة_دفن_الاجساد
_______

من الدفن عمه أرجعت يا ليتني اوياهم متت
ولا عشت كل هذا العذاب
چم غالي وسدته التراب

يا ليتني اوياهم متت
_______

رديتلچ عمه جسد يمشي فقط بجروحه
انه الذي وگت الدفن چم مره طلعت روحه
والدي نايم عالوجه و برگبته المذبوحه
ثالث نهار و بالشمس فوگ الترب مطروحه

منين أبدي يا عمه الشرح كل لحظه يمهم انذبح
شحچيلچ اچبير المصاب
چم غالي وسدته التراب

يا ليتني اوياهم متت
________

امطشرين ابويه عالثره لميته وصله وصله
خنصر يمينه منگطع و بگلبه لسه النبله
نعشه حصيره والدي و ادماه صارت غسله
نزلته بس ابلا رأس و فوگ الصدر عبدالله

يا عمه متگطع وذر عالقبله وسدت النحر
و تغسيله من دم الخضاب
چم غالي وسدته التراب

يا ليتني اوياهم متت
______

يا عمه چم مره متت من شفت حال الأكبر
احزام الظهر فوگ الترب يا عمه شلته اموذر
التشبه محمد صورته بحر الشموس امفطر
لحده حفرته بيمنتي و اتمنه موتي يحضر

ياريت وياا بالگبر اتوسد و أنهي العمر
احزام الظهر يا عمه غاب
چم غالي وسدته التراب

يا ليتني اوياهم متت
_______

أنظر على القاسم صبح يشبه يعمه الشذره
بيض الملابس بالدمه اتحولت تراهي حمره
بالگبر نايم هالولد و أنصار ابويه بكتره
گطعت دليلي امصيبته من شفت گطعة نحره

جسام يا خيط الصبح للعرس لا مو للذبح
واريته بدموم الثياب
چم غالي وسدته التراب

يا ليتني اوياهم متت
_____

صديت صوب المشرعه و ظهري يعمه اتكور
شفت الچفوف اعله الارض يمكن الچ تتعذر
حيرني سهم الصوبه باقي بشلعته اتحير
و راسه يعمه من العمد يم الشريعه امطشر

حيرني عمي بوالفضل شلون ادفنه بعينه النبل
مو شعر راسي رمشي شاب
چم غالي وسدته التراب

يا ليتني اوياهم متت




حسين الأمين

#ليالي_فاجعة_السبي
______

شمر يحدي الضعينه والسباهن
واحد سوطه يضرب والسباهن (اليسبهن )
الأشد مو باليشتّم والسباهن ( السبي هان )

التذبح دخلن بديوان اميه
_______

شفت منظر جرح گلبي و لچمني
أخت عباس تمشي ويه غربه
ناشدت الخلگ چا وين الحسين
گالولي الحوافر فوگ گلبه

واحد گال زينب تمشي للشام
ومن السوط مهشومات العظام
تطيحن عالترب لو عثرت النوگ
وحيده ابين عسكر بين الأيتام

الزينب ما فزع ساقي حرمها ( حرم مكه)
من الماي شامتها حرمها ( منعها )
وحيده اتكفلت تحمي حرمها ( النساء )

يهاشم بتكم اتسمت سبيه
________

مشيت اويه الظعن و اجدامي ميته
لحد ما شوفهن بالكوفه وگفن
بطبول و هلاهل يا هظيمه
و الوادم تناشد وين اهلچن

شماته اتنادست بت حيدر اتفوت
الچان الها اخو يتسمه بالموت
الما لامح گبل كل بشر ظلها
شو فرجه اصبحت ما بين البيوت

الچان الشرف عدها هوه طالب ( يدرس )
غريبه بت علي بن ابي طالب
سليبه ولا اجه من اخو طالب ( يداعي )

و يرد حگ العشيرة الهاشمية
_____

باب الساعه وگفن بيها ساعات
و اعيون البشر صدت على ام عون
وين النذل و الما عنده إحساس
و الما عنده غيره ظل يشمتون

صاحت صوت شيبت منه الانفاس
بت شيخ العرب ما بين الارجاس
تفصگ راح زينب ظلت براح
و صدت عالشريعه اتحاچي عباس

عگب عينك نذل خويه خطاباي (مشه بيه)
و على امتوني سياط الهم خطاباي (خطّه بيه)
مو هذا المهم و اسمع خطاباي ( كلامي )

القصر ايزيد يهدوني سبيه
_______

على الديوان آه اشمكثر الآه
دخلن بالبچي و ايزيد فرحان
بيده الخيزرانه و يضرب الراس
و ربيبات الشرف من دون وليان

بين اهل الطرب آيات قرآن
يسمعوهن حچي ميحمله انسان
واحد صاح زينب وينه الحسين
لعبت على صدره الخيل ميدان

اخبرچ ماكو واحد ظل عالحسين (ايفيي)
عاري و عالترايب ظل عالحسين ( بقه )
كثر السحگ طحنت ضلع الحسين

يزينب خيلنه البالغاضريه
________

بخرابه و سوگ تالي بت علي اتفوت
يا وسفه و لا حامي يجيها
و رقيه اتنام لاكن نومة الموت
بعد ما فسّر الصخره بچيها

نشدت بالبواچي والدي وين
ما يدري ابّناته بالدواوين
لن الطشت جاها اتشوفه بس راس
بشبگة موت شبگت راس الحسين

الگوم الضربوا ارقيه بلا دين (ماعندهم دين)
سبوها ابلا رحم طفله بلا دين ( بلدين )
اجاها احسين لاكنه بلا دين (ماعنده چفوف)

شلون اتشبگه محتاره رقيه





حسين الأمين

#ليالي_فاجعة_السبي ٢
_______

بعد عز ماضيها حرمله يسبيها
الچانت اميره امدلله مگيوده تالي بسلسله
__

ستر الله و خدر حيدر تنسبي و ابلا ولي
و السبي للعرب فشله و عار ابد ما ينجلي
يطلبون ابثار بتهم و الصوارم تعتلي
وسفه ما واحد فزعها بسوگ طبت بت علي

ابلا كفيل و رايه تفوت نص اولايه
دم المدامع سايله مگيوده تالي بسلسله
_______

ادموعها بكل خطوه كوثر و الدمع احمر يصب
الچان ابو فاضل حرسها يشتموها و تنضرب
السوط ما توجع ضربته مثل چلمات الغرب
هاي اخوها ابرمح راسه و جسمه باقي اعله الترب

السبي جارحها و الحچي ذابحها
من بيت أشرف عايله مگيوده تالي بسلسله
_______

كربله اخذت گلبها و السبي ماخذ عمر
طاح يم الشاطي ظلها و صار يحديها الشمر
التحلف الكوفه ابخدرها و بالعفاف و بالستر
طلعت بثوب الاميره و دخلت بگيد اليسر

الدنيه دارت بيها من بعد واليها
المهيوبه اجتي الكربله مگيوده تالي بسلسله
______

درب وحشه تمشي زينب و الجرح يتبع جرح
ابدمعة ايتام و ثكاله حايره ابليل و صبح
اتشوف منظر للسبايه هوايه أشد من الذبح
ارقيه لو ضربوا متنها تركض الصوب الرمح

هظمه كل ايامها احتارت ابأيتامها
نسوان هاشم بالفله مگيوده تالي بسلسله
_________

تالي ما تالي بخرابه بنت باء البسمله
بعد عين الگمر حارس صار ليها حرمله
لا سگف لا باب بيها فرجه أشرف عايله
أحجار و اسياط اضربوها بعد محنة كربله

حيره والله حيره دخلت اشچم ديره
اميسرها گدام المله مگيوده تالي بسلسله





حسين الأمين

#ليالي_فاجعة_السبي ٣ (( شور ))
__

ضعن علويه سليب ضعن علويه غريب
___

سارح بحزني و وصلته و نحره يگطر بالدمه
و انظره بس نور يضوي من الرمح حد السمه

شفت عالم سبايا و راس منحور
شفت دمعة يتيمه تشبه الحور
شفت زينب هلال بوسط عاشور

عجيبه غريبه
بت العرش بيد اجنبي
معقوله زينب تنسبي
تحدي الزلم خدر النبي عجيبه

ضعن علويه سليب ضعن علويه غريب
_ _

اتقربت يم الهزيلة و النفس بيه انچوه
التفت عباس راسه دخن و سد الهوه

ارجعت بس روح بيه ماكو انفاس
متت من شفت حمره عيون عباس
ياهو الباوعلهن يخزره الراس

نظرته دمعته
خايف عله اخته من النظر
ميت ولكن هم حظر
شفت الجرح شفت النحر نظرته

ضعن علويه سليب ضعن علويه غريب
__

خطوه دمعه خطوه عثره دخل للكوفه الظعن
بين شمات و هلاهل هالفواطم ينسبن

اسمعت حچي الشماته اليذبح الروح
هاي اخت الصريع الراسه مذبوح
هاي الچان ظلها امحجب ايلوح

سبيه رزيه
المهيوبه بالكوفه قبل
مچتوفه دخلوها بحبل
بذيالها امچلب طفل سبيه

ضعن علويه سليب ضعن علويه غريب
___

"أم حسبت" تتلوا دخلت تقره ويه راس الذبيح
مره وگفت بين عسكر أسست رايه و ضريح

تغر حيدر اليحجي و سكتت الگوم
ما چنها السبيه التنزف ادموم
خلّت حيره بيهم تبقه لليوم

من ابوها من اخوها
بعزتها فشلت هالعرب
بوجودها محد خطب
و الراس يشرح بالسبب من ابوها

ضعن علويه سليب ضعن علويه غريب
___

بعد هالرحله الطويله بالخرابه المستقر
طفله تنشد ها يعمه حسين ابويه ما حظر

غفت و الدمعه عالخد تنشد حسين
تالي الطشت جاها بصوت الونين
حظنت راس أبوها بشبگة البين

يتيمه هظيمه
فوگ النحر ضاع النفس
ماتت رقيه اعله الرأس
ذبلانه من حر الشمس يتيمه

ضعن علويه سليب ضعن علويه غريب





حسين الأمين

#العلويه_شريفة_بنت_الحسن_ع
_

دعائي يا شريفه ام الكرم
دعائي انحسب من الخدم
__

اقسم عليچ بعلتچ و الحسره
خليني اخدم والدچ و العتره
بهاي الليالي المؤلمات العشره
كون بدمعتي و لطمتي و الطبره

ولائي من دمه نحره انختم
دعائي انحسب من الخدم
__

يالعلتچ چانت رزيه و كلفه
صرتي الطبيبه بدون أي مستشفه
مدينه ادينه و الدعاء الوصفه
و اليدعي بسمچ لا يظن ما يشفه

شفائي ردت من ام الشيم
دعائي انحسب من الخدم
____

التصعد ابأسمچ ترد مگضيه
و يم بابچ اتعنينه يالعلويه
هواي الحوائج بس عليچ شويه
و البابچ امفرعه اجتي النيه

رجائي بالذي شال العلم
دعائي انحسب من الخدم
___

بجاه السبيه امحلفچ المهظومه
وامشي أبو اليمه الذبيح و يومه
خايب ميرجع إلي جاب اهمومه
اگضيها إله يل بالكرم معلومه

ندائي الكرم يمچ مو وهم
دعائي انحسب من الخدم
_

بحر المصايب عاليه امواجه
و الكم إله الكون منطي تاجه
چم گلب حاير ينتظر افراجه
هواي الحوائج و أنتي باب الحاجه

دوائي اعليچ ما يصعب ألم
دعائي انحسب من الخدم
__

آخر دعاء انريده منچ خاتم
الناعي و الرادود ويه اللاطم
للمهدي صاحب الزمان القائم
ايعجل ظهوره و انتصاره الدائم

بكائي مو دمع بعيوني دم
دعائي انحسب من الخدم





حسين الأمين

#ليالي_فاجعة_السبي ٤
_ - _ - _ - _ - _

دم المتن ينزف وعالنوگ ظل طايح
و راس برمح يهتف. وينك يبو صالح

رافجن چتالهن ما دريت بحالهن
__

شلون ابتدي يا سيدي
بسوط السبي بدمعة يتيمه
ايتامه تون سوط المتن
چتّفوهن و الحرگ ما خله خيمه

بالبوادي اطفال تركض عالجمر
و جيش ينظر على الحرمه من تمر
النظره تذبح اشد من درب اليسر

بين الزلم تركض وخيامكم تلهب
وايتيم مترضرض وينادي يا زينب

شماتكم تنعالهن ما دريت بحالهن
____

بدرب السبي لون العبي
احمر غده و الناگه حمره
طيحة مره كلفه تره
يابو صالح عالوجه آثار سطره

و شاهد الحافر عليه صاير دمه
أثر سحگ حسين ضلعه امهشمه
والگطع راسه سبه بت فاطمه

طيحة مره صعبه و الحافر اليگتل
زينبكم بغربه ما واحد اليكفل

بس روس عد وليانهن ما دريت بحالهن
_______

بخوف و حذر يالمنتظر
بالمسير شلون لو حرمه تطيح
بين الغرب دمهن يصب
و راس جدك يمهن برمحه ذبيح

شلون يهدالك گلب يبن الحسن
و الفواطم سلبوهن و انسبن
و البلا غيره صفه يحدي الضعن

يحدي الشمر بيهن يا دم تصب عينك
محد يواسيهن چا الله اليعينك

ما حظر كفالهن ما دريت بحالهن
_____

شحالك صرت من اسمعت
يمشن و يتلفتن صوب النهر
بحسرة ألم شافن سهم
و الچفوف امگطعه وكسرة ظهر

ها يمهدي حگها عينك تجري دم
عين عباس انعمت من السهم
و راسه يم الشاطي ينزف و انهشم

عمتك على الهزل من شافت المنظر
و اليا جرح تحمل اموذرينه و امطبر

غير الدموع اشمالهن ما دريت بحالهن
__

بعيد الدرب كلهم غرب
التموا يمهدي و سلبوهن
عندك علم بين الزلم
بالمجالس يبن هاشم دخلوهن

ادري تذبح و أعتذر راعي الأمر
طبة الديوان تهظم باليسر
زينب ابلايه ولي تدخل قصر

اگبال الزلم وكفن عماتك اتشاهد
و دموعهن يجرن و لا هاشمي گاعد

شكد هظم راوالهن ما دريت بحالهن





حسين الأمين

#ليالي_فاجعة_السبي ٥
_

موقف سبي هاظمنه يا عباس
من العشاير جتنه يا عباس

ردوا النسوه امن السبي و ظلن ربيبات النبي
____

الكوفه من فتنه هاجت الفتنه
كل عشيره شبحت اعلينه النظر
للقصر راحوا للحرب فاتوا
صوب ابن ازياد علنوا هالامر

عار اعله العرب من تسبي مره
عشايرهم اجت سيوف امشاهره

خاف الحرب و الفتنه ابن ازياد
طلعوا النسه من عدنه ابن ازياد

نفذوه حالاً مطلبي و ظلن ربيبات النبي
____

بالخبر دخلوا و النسه طلعوا
امن الخرابه بسرعه طلعن للاهل
خويه يا هظمه دورت زلمه
من بني هاشم اجه لينه عدل

نظرت اعله الحرم يدورن بالزلم
يشوفن يندعن يرفلهن علم

يا خويه ميّت مره تذبحني
من سكنه اسمع حسره تذبحني

ما فزع لينه طالبي و ظلن ربيبات النبي
____

كل عشايرهن صوت حارسهن
يا فلانيه أخرجي سبيج گضه
التفت حيره نشفت الغيره
صاح يبقن بس بنات المرتضى

بقينه باليسر فقط نسوة علي
باسياط و حجر يخويه ننولي

بيت الشرف چنه احنه بالكوفه
تالي الخوارج صرنه بالكوفه

ومن الدمه حمره العبي و ظلن ربيبات النبي
____

للاهل طلعن واخواتك الظلن
بين خولي و حرمله و سوط الشمر
وينه حامينه صاحت اسكينه
وكفت اباب الخرابه تنتظر

كلما التفت رقيه اتنادي إلي
عمي ما يجي و اگلها اتحملي

شوف الهظم و اللوعه بين الناس
چم طفل تجري ادموعه بين الناس

انغر علينه يا أبي و ظلن ربيبات النبي
_

تالي طلعونه لشام يسرونه
بس حرمكم بالسبي خويه سرن
خوله من طاحت من الظعن ماتت
الشام آه الشام من فات الظعن

تتشفه النسه اجني بالدرب
واحنه ابلا أهل و بديرة غرب

بحجارهم لاگونه أهل الشام
و ذاك الحچي سمعونه أهل الشام

سب الصميده الناصبي و ظلن ربيبات النبي




حسين الأمين

#زين_العابدين_ع
_ - _ - _ - _ - _

يا سيد الساجدين تشبه ولي المؤمنين
بالحبل مچتوف ادين يا علي تشبه علي


امگيديها ايدك بالحبل والجامعه اتحز نحرك
متوارد اويه المرتضى هم الوصيه اتأسرك

شعنده وياكم يمولاي الحبل
انته مچتوف و علي گيدوا قبل
والله صعبه يا علي و ما تنحمل
اگبال عينك يضرب الحره النذل

هد اليسر كل حيلك والحرمه من تشكيلك
وراس برمح يوميلك يا علي تشبه علي
_

جدك قبل هم منچتف والزهره چانت تُعصر
حالك مشابه للوصي اميسريها زينب بالبر

على الناگه و المتن منها جريح
طفل ضايع طفل يا عمه يصيح
و انته تنظر راس الحسين الذبيح
و الحرم گدامك اتگوم و تطيح

طفله تناشد بالناس ماشفتوا عمنه العباس
و گدامك ايلوح الراس يا علي تشبه علي


الباب حرگوها گبل يمك خيم مشتعله
ابيت الوصي اتنزل وحي والخيمه چانت قبله

الباب و الخيمه صفن نفس الأمر
الباب عالزهره احترگ و ام الخدر
الخيمه شبّت و الاطفال بكل كتر
ظلوا ابين الحوافر و الجمر

باب فاطم وجت و خيمه هم احترگت
نارين عمتك شهدت يا علي تشبه علي


الله يعينك بالسبي ويه الفواطم وحدك
بالكوفه و الشام شكثر بيهن تفطر چبدك

شگد محن شفت و هظم لآل النبي
حجة الله اعله الأرض يمشي سبي
بحرم هاشم يا وسف يحدي اجنبي
ما فزع واحد عليهن طالبي

يا عروة المتقين تسمع انين الحسين
يا سيد الساجدين يا علي تشبه علي
__

من اوصلت يم القصر بالخارجي ينادونك
وراس الحسين بنص طشت وتنظر عليه عيونك

اگبال عينك ينضرب راس الحسين
شفته زرگه من كثر ضرب اللعين
الله اليعينك يزين العابدين
بالطشت راس الابو اتشاهده العين

ثگل الجرح ما يهيد بالشفّه يضرب يزيد
حال الوصي هم تعيد يا علي تشبه علي




حسين الأمين

#السيده_رقيه_ع
______

انتظرتك عالدرب مفروشه روح
دمعي عالوجنه ينوح
اطيب بالملگه الجروح

انتظرتك بويه ذابحني الهجر
و الگلب صاير جمر
يمته لبنيتك تمر انتظرتك
______

ساهرت اوي الجروح امصلايه افرشت روح
الجيتك بالخرابه
شلون اغفه بلياك وانه امچاني يمناك
و بصدرك يبابه

من رحت حسيت بعدك كلشي رايح
بويه چفك چان بين اچفوفي لايح
هسه لبنيتك حبلهم چفها جارح
و المتن من السياط اتحسه طايح

بعد چفك ليش يضربني النذل
و اركب النوگ الهزل
چفي صاير للحبل

بعد چفك ضعت ما بين المحن
غربه تحدي بالظعن
غيّر الحال الزمن انتظرتك
_____

نمت و نومتي هاي بلكت بالحلم جاي
و تصبر ونيني
نمت بهاي الظنون من سديت الچفون
شفتك معتنيني

حلمي چانت شوفتك ما رايده النوم
بويه وجهك لن اشوفه اگبالي مرسوم
سالم امن الذبح ما مسلوبه الهدوم
الحظنك اركاض اركضت طيحت الهموم

من فرحتي بعد ماحس بالجدم
طحت چن طيحة نجم
على حظنك بي اشم

من فرحتي انموت گتلك بس سوه
شفتك و ردلي الهوه
كلشي احس بيه روه انتظرتك
_______

يرقيه امشي وياي بحظنك و استمع هاي
انتظرچ رقيه
ضاع احسابي يا حيف نسيتك معتني بطيف
و حزني رد عليه

ضيّعت وجهك تراني بفتحت العين
دورت كل الخرابه والدي وين
عمتي گالت ما اجه و كل النساوين
و آنه أگلها چان يمي والدي حسين

دوريتك ودمعت عيوني تصب
فرفح اعليك الگلب
بالخرايب عالترب

دوريتك و اسمع اصوات النسه
يا رقيه اليائسه
ما اجه هذا المسه انتظرتك
______

ما صدگت الانگال و ضليت اعله هالحال
والجيتك اتاني
المبچاي اعتله صوت لن الحارس ايفوت
شايل طشت اجاني

اگبالي حطه و شفت عمتي تبچي وياي
ناشدت ماريد اكل يا عمه لا ماي
اتحيرت و اكشفت عن الغطه بيمناي
لن اشوفن بويه راسك معتني جاي

من نظرتك انعمه مني النظر
ليش صاير بس نحر
بوجهك آثار الحجر

من نظرتك شيبك امخضب دمه
اشفافك المتخذمه
و مهجتي متألمه انتظرتك
_______

ها يا راس الحسين چا جسمك بقه وين
احچيلي اشجرالك
سكتت شفّتك ليش و گلبي اتصبّره بيش
مذبوح اعله حالك

السوط ويه السبي وي دخان الانفاس
كلهن يهونن لون ما جاي بس راس
اطيب چوياتي و تظل چويات الاحساس
وين اغفه و صدرك اعله ترب ينداس

شلون اشبگك بيك شمسويه السيوف
ريت مو واقع طيوف
و انته جاي ابلا چفوف

شلون اشبگك حايره و حيرتي هاي
وين اشمّك يا هواي
گلي يبنيتي تعاي انتظرتك




حسين الأمين

#السيده_رقيه_ع ٢
_____

راسك اجاني بطشت بويه
تحضني بيدك ردت بويه

بس نحرك جسمك وين لا حظنك لا چفين
____

ردتك تعتني و اغفه وسط حضنك
مثل ما بالحلم شفتك اشوفنك
ردتك تمسح براسي و احبنك
شو بس راس اجيت ابلايه چف منك

يا بويه حاولت أشم نحرك
لكن وصل منجسم نحرك

نحرك صاير نصيين لا حضنك لا چفين
___

منين اشتمك و مذبوح من نحرك
وين اغفه و مكان ابنيتك صدرك
اظن عطشان يابس شاهدت ثغرك
كون الموت ياخذ عمري وي عمرك

غير يبويه الهجر حالي
بيدي الحبل باليسر حالي

هجرك راواني البين لا حضنك لا چفين
____

بدروبي فقط اسمك بقه اويايه
ما متعوده افارگ وجهك اهوايه
بس عنك سؤالي امن ادخل اولايه
و يتيمه انتي يگولولي ابهالحچايه

تتلفت ابكل درب عيني
عنك تنناشد غرب عيني

و أدور بالصوبين لا حضنك لا چفين
__

عن حالك اناشد و اترك احوالي
ليش الدم ترس وجهك يدلالي
عينك ما تصدلي أول و تالي
ما مشتاگلي معقوله يالغالي

شگد مشتاگه الك بنتك
مذبوحه من فرگتك بنتك

مشبوحه اعليك العين لا حضنك لا چفين
_

موش بحظنك انه و انته بحظاني
دمع عيني اتركه و اترك احزاني
مشتاگتلك آني يا بعد آني
من الفرگه بنتك چانت اتعاني

بعيوني يحچي الدمع كلمه
منك اريد استمع كلمه

يا بنتي آنه حسين لا حضنك لا چفين




حسين الأمين

#زيارة_الاربعين
__

لحن باسم الكربلائي قصيدة طفو الگمره
_ - _ - _ - _ - _

گبرك ... نحتمي بسوره _ ياهو اليزوره
ينوح المصابك
جرحك ... يسري وي دمنه _ وي مدامعنه
نطيح اعله بابك

ما مشينه اعله الجمر گاصدينك نعتذر
____

يا حسين انته الطبيب الكثرن اجروحه
زايرك من يعتنيلك تطمئن روحه
اربعينك على العالم خيّم ابنوحه
و گبرك الكل البشر بيبانه مفتوحه

قدرك ... ما يلوحه انسان _ ضامي بس سلطان
ملكت الضماير
سرك ... معجزت الهام _ شما گضت اعوام
تزيد الشعاير

يا عظيم و مقتدر گاصدينك نعتذر
____

نعتنيلك كل سنه نمشي اعله لهفتنه
خاطر انفرح دليلك لو تشاهدنه
ندري بيك انته العبادة الواجبه النه
و لهذا انگول لجلك الله خالقنه

نمشي ... لشوفت عيونك _ انخلي مضمونك
عقيدة گلبنه
كلشي ... قدمت قربان _ اهلك و صحبان
ضحايه لجلنه

صعبه نوفيلك عشر گاصدينك نعتذر
____

يالمشت اختك اسيره بثورتك هايه
لون طول العمر نمشي دون الكفايه
لكن انواسي العقيله بهاي الحچايه
واجباً مو مستحباً نرفع الرايه

نگصد ... انواسي العتره _ زينب و اسره
علي و الزچيه
نگعد ... يم ابو فاضل _ انگله يا كافل
اخيتك سبيه

جايه ليك من اليسر گاصدينك نعتذر
____

كل مشينه ما يوافي لوعه من گلبك
اچبير جرحك و الطريق ازغيّر ابدربك
انته صح ضامي و لكن نرتوي بعذبك
احنه ما عدنه وسيلة فقط بس حبك

الزاير ... بالعمر مره _ تعتني الگبره
بيوم القيامة
الحاير ... لو وصل منكر _ بصايتك تحضر
تحيط الخدامه

انته راعي هالامر گاصدينك نعتذر
_______

بدربك انشاهد معاجز و العقل مبهم
طه يمشي الحد ضريحك قبّله و سلم
واگف و ناصبله موكب حيدر امحزم
فاطمه اتوزع بديها و الحسن يخدم

بيهم ... من يمر زاير _ الحسن حاضر
يرحب مضيفه
ليهم ... اليعتني طالب _ ما يرد خايب
علي حامي ضيفه

يوگف ابيوم الحشر گاصدينك نعتذر




حسين الأمين

#صاحب_الأمر_ع
__

خلصت مواعيد السفر يالمنحجب مالك خبر
وين أنته چا وين منتظرك سنين
يابو صالح
_

خلصت مواعيد السفر ما بقت بس چم جمعه
يالواعدتني برجعتك خلصت أيامي دمعه

ضليت اون مثل الفگد كل اهله
بسامره يوميه انتظر و السهله
غيبتك تركت بالگلب جم عله
يم بابكم ليليه عيني اموشله

يوميه يم باب انتظر فات الأوان اعله العمر
لا يعتني البين منتظرك سنين
يابو صالح
____

يالتارس بروحي عشگ ارحم بهجرك حالي
ما نايم الليل برغد امساهر بگلبي و بالي

عايش لچن گضيت عمري بغربه
الفاگد حبيبه شلون يصبر گلبه
گاعد و اناجيك بدعاء الندبه
اين الذي في روحي ساكن حبه

في مكه ام وادي طوى ام طوس ام في نينوى
نشد المجانين منتظرك سنين
يابو صالح
____

مو هوه لكن مستقر بيه و صرت أنفاسي
مالكني و انته ابلا أهل يا اعز من كل ناسي

لو يمر يوم و انسى ذكرك لحظه
كون المنيه اتعجل بهل النبضه
ماريد غيرك و اليحب ما يرضه
لو خيل عشره اعله الصدر و اترضه

عايش الك طول الزمن يا اترف واجمل وطن
يا مهجة الدين منتظرك سنين
يابو صالح
___

طال الهجر بيه و تره افراگك جرح ما ينراف
يالعايش ابروحي هوه أتنفسه و ما ينشاف

لجلك مضن كل السنين برجوه
گلبي عِشگ غيرك ابد ما يهوه
لو يضمه بس منك يرد يترّوه
لوما يحبك گلبي گلي اشيسوه

بديني يم بابك نده حادي العمر بيه حده
ما عندي عمرين منتظرك سنين
يابو صالح
____

شمقدم انه الحضرتك خاطر أكلك عجل
ما عندي بس حبي الصدگ يا أشرف و أجمل خل

بلكت يكفي هالفعل للغايه
ادريبه ذنبي امعذباك هوايه
اعدل طريقي امروتك مولايه
عطشان جيتك و ارتوي بحچايه

بس رايد احچايه هلا و شكبره هذا التقبله
ابعسكر الدين منتظرك سنين
يابو صالح



حسين الأمين

#اهل_المجالس
_

يالناشدت عني و تريد اخباري
ايدليك بيه دمع عيني الجاري

يالتيهت عنواني بكل تعزيه تلگاني
___

يالتبحث عن العنوان اسمع مني هالكلمه
تلگاني بظلام الليل تضوي دمعتي النجمه
لا تسألني وين اتعيش بيتي مجلس و خدمه
صحباني الدمع و الآه و اللجمات و اللطمه

اويايه دمعتي تنتقل بالعزيات
امسافر على اجناح الجرح و الحسرات

شوف الدمع حلاني بكل تعزيه تلگاني
__

ليليله اعله باب الشوگ كاتب مستهل و انعه
مجلس ناصب ابگلبي كل لحظه يون ضلعه
ياما حارگ ابروحي بس ما أشبه الشمعه
ما اطفه اويه هب الريح لا اذبل من الدمعه

لو چنت منغث السبب مو بيه
كل يوم افك ريگي الصبح لطميه

بحسين افك الساني بكل تعزيه تلگاني
_

ميهمني تذم عذال بكفاي الحچي متروس
مهو البيده گمر ضاوي شلون ايبدله ابفانوس
خليني اعله باب حسين الداخل مجلسه محروس
ترى الشجره التحب حسين فشله اتخاف من الفوس

خليني يمه و بالمجالس شادود
لطام صاير شاعر و هم رادود

امگدي اعله بابه اني بكل تعزيه تلگاني
__

لتحاول تغير أفكار ما تگدر عليه ابهاي
ترى ظهري اسنده عباس من طاح اعله شاطي الماي
كل يوم الحرب تنعاد و يرجع منتصر مولاي
كافي بسك اتعادي حسين امسيطر اعله الراي

شگد حاربوني قبلك و روح أسأل
كلمن على المجلس تگرب ينذل

من هيبته انطاني بكل تعزيه تلگاني
____

عن هاي القضيه أبعد منك ما ردت مأجور
تدريني من ادگ صدري حيدر يعتني مطبور
قبل لا يبتدي المجلس توصل مرأة من النور
بآخر زاويه تگعد تبچي و ابضلع مكسور

يوصلني فارس بس بلايه چفين
من گتله ياهو گلي شادود حسين

الطم بلا ذرعاني بكل تعزيه تلگاني
__

كلما انحني ابابه يرد يرفع إلي الهامه
كلش زايده اعليه لو يحسبني خدامه
شمقدمله حتى اقنع ريت احترگ بخيامه
لو كون اكسر بصدري فدوه الكسرت اعظامه

اشما دمعي يجري و باللطم متوزر
لا ما اوافي شوغه من الخنصر

لمصيبته أحزاني بكل تعزيه تلگاني





حسين الأمين

لــمّـا أرادَ اللهُ خـلـقَ أحـمـدِ
أوحَـى إلـى الـصـلاةِ أن تجسدِ
والـكـونُ والـحـيـاةُ قبل المولِدِ
ومـا وجـودهـا بـــلا مُحمدِ
واللهُ لـولا أحـمـدُ لـم يُـعـبـدِ
والـعـقـلُ لـولا أحـمدٌ لم يسجُدِ
بــــهِ الإلــهُ مــعـبـود قبل الوجود موجود



‏أغرق الدُّنيا عُلومًا .. وبِها الجهلُ هلك
عِلمَ فيزياءٍ وكيمياءٍ وطبٍ وفلك
وَاسألوا كُلَّ عليمٍ .. قُل لنا مَن عَلَّمَك؟
سيُجيب العدلُ منهم "جَعفَرٌ" مِن دون شَك.


١* الشيخ عبد الكريم الزرع
٢* الشاعر لؤي حبيب الهلال