#ليالي_مسلم_بن_عقيل_ع ٢
_ - _ - _

قصر الاماره شاهد الخلودك
ما ينمحي طول الزمن وجودك
____
وفيت عهدك للنبي و امامك
بالحومه شاهد للفخر حسامك
ما دنگت للسيف عالي هامك
هسه اليزورك ينحني امامك

قدمت روحك صادق بوعودك
ما ينمحي طول الزمن وجودك
____

يا مرجع العشاگ و الغياره
فوگ القصر أسست للزياره
واگف تصلي و أسمعت بشاره
باچر يمسلم مو قصر مناره

يامن فديت بدمك العهودك
ما ينمحي طول الزمن وجودك
___

ما ينسي التاريخ يابو طاهر
صولة يمينك بالحرب مفاخر
لهذا الزمن صوتك بقى يجاهر
أول فدائي للسبط و ناصر

باقي ولائك معتلي صمودك
ما ينمحي طول الزمن وجودك
_

أنته الهشام الوصلت رساله
چلمة الحق اتعيش لا محاله
دافعت عن حسين و ابساله
ذكرك خلد طول الزمن دلاله

يوم الحشر بالجنه هم ورودك
ما ينمحي طول الزمن وجودك
___

يالحامي دين الله في ثورتك
اجيال گاعد ترتوي بعبرتك
الكوفه چانت مكه من نظرتك
و أنته محمد وحدك بغربتك

لا ناصر العندك يحامي جودك
ما ينمحي طول الزمن وجودك
__

تربات حيدر بالحرب قتالك
منشطر راسه يرجع الدنالك
تشبه علي يا مسلم بفعالك
مالك مثيل بفكرك و جمالك

محد گدر يعبرهن الحدودك
ما ينمحي طول الزمن وجودك
__

يابو حميده يبقى الك دمعنه
لا ما يمل من الحزن كلبنه
نمشي اعله دربك ما يزل چدمنه
اشفع يمسلم بالقيامه النه

بحسين نقسم اشفع الوفودك
ما ينمحي طول الزمن وجودك





حسين الأمين

#ليالي_مسلم_بن_عقيل_ع ٣
_ - _ - _

مسلم بكوفة علي ظل يعتلي
و سيفه بيمينه
من بده وكت الحرب بث الرعب
من حدها عينه

خلد أعظم ملحمه عمه حيدر علمه
_

من لاح مصباح الفجر والهاشمي جر سيفه
سلطان صار اعله الحرب يگطع الروس بكيفه
يشطر فقط طول وعرض توقعوا علي رد طيفه
خله الرگب يتشامرن بالحومه ماخذ حيفه

خله الدمه بحر النجف هد و هتف
چنه الغضنفر
بجيشهم ما ظل عدد طلبوا مدد
عالكوفه سيطر

گلف يوم الموزمه عمه حيدر علمه
___

شافوا قتاله بالحرب من يرتجز بالعسكر
واحد سأل واحد نشد ميت عدل چا حيدر
قائدهم انطاهم أمر خل يشرد الما يگدر
نازل الموت ابيمنته وهو الملاك المؤمر

ساكت و سيفه خطب گص الرگب
ماكو شفاعه
أبو طاهر چن اسد بيهم رعد
أصل الشجاعه

الشرد من ايده ازلمه عمه حيدر علمه
_

احتار مسلم بالعدد خايف يخلصون الناس
لو خلصوا بسيفه ذبح يزعل عليه العباس
ظل واگف و يبتر زلم خله الجيوش إبلا راس
لو مو وصية بو الفضل ما خله بيهم أنفاس

بس ذكر هذا الأمر من الگمر
گلاله هونك
خلي چم فارس إلي و أنه و علي
گرهن عيونك

خله بيهم مرحمه عمه حيدر علمه
__

مچتوف لكن بالغدر گدروا ترى ايطيحونه
چا سيفه راح الكربله لحسين يحمي اظعونه
من نظروا بسوح الحرب چن حيدر يشوفونه
لو ما غدرهم چا اظن عالنهر هم يلگونه

وگف يمهم و انتفض ليهم رفض
ينطيهم أيده
حسين من جاه الخبر بيه أفتخر
والد حميده

ابتشر وجه بمسلمه عمه حيدر علمه
____

طايح صحيح من القصر بس هسه صار اعلى هواي
واسه الحسين بمقتله عطشان ما شارب ماي
هسه ملائكة العشگ اتزوره و تگله مولاي
من عالقصر زار السبط و اتسمى منها الوفاي

مسلم بطول الدهر باقي گمر
و للعزه هامه
هم سفير القل هوه و هم الدوه
چان بحسامه

مسلم و ما اعظمه عمه حيدر علمه




حسين الأمين

#مسلم_بن_عقيل_ع ٤
___

فوگ القصر من صليت صوت ارتفع بالبشره
يا مسلم " انا اعطيناك " گبه و مناره و حضره
____

چانت صلاتك واجبه لو مستحبه النيه
يا سوره ويه الفاتحه بهاي الصلا مقريه
وشگد چنت ذايب لعد بحسين و بطاريه
وديت من فوگ القصر فرض العشگ برقيه

چم ركعه اسألك محتار ويا آيه چنت التقره
يا مسلم انا اعطيناك گبه و مناره و حضره
____

گالولي لمّن كبّرت رسمت دمعتك كلمه
يا سر اجاك امن السمه و ليش بدعائك هظمه
يا عدتي في كربتي و لحسين تذكر اسمه
چنك شفتها كربله شاهدت بيها اللچمه

ليش بصلاتك مخنوگ و تچذب بقيت الحسره
يا مسلم انا اعطيناك گبه و مناره و حضره
_

يا واحد و عسكر چنت لو سيف بچفوفك مال
ماخذها ترباية علي افعال مو بس اقوال
يا قائد بظهرك مره تنعد بمية رجال
طوعه رساله للشرف بالكوفه صنعت اجيال


أخ و ثقه عد حسين قدرك تبين كبره
يا مسلم انا اعطيناك گبه و مناره و حضره
__

يا آصف و دزّك نبي مو عرش لا شايل دين
جايب رساله ابلا ظرف مكتوبه چانت بالعين
بلقيس وكتك ضايعه بدرب الذهب من اسنين
باعت مواثيق الشرف و اتعاهدت ضد حسين

يا درّه ما بين احجار تركت الناس الفطره
يا مسلم انا اعطيناك گبه و مناره و حضره
_

تشبه محمد غربتك و الكوفه تشبه مكه
غربيل صوتك للبشر و محد حچالك حرگه
عالكوفه غابش چن نده الوادم حجر مو ورگه
متريد چلمات الهوه حبت العيشه بخنگه

الي گضه عمره بليل يكره طواري الگمره
يا مسلم انا اعطيناك گبه و مناره و حضره
___

شفتك طحت من القصر بس ما اظن شاهدتك
ادري اليگع ميرد يگف بس انته واگف شفتك
و شفتك ذبيح امن النحر و بحبال جروا جثتك
شو هسه اشوفنك عدل ذاك القصر بي گبتك

مخطوط بجناح الماي لحسين مهد ثوره
يا مسلم انا اعطيناك گبه و مناره و حضره





حسين الأمين

#اصحاب_الحسين_ع ١ ( لحن سدوا الماي الماي )
____

بدربك شمحله الموت يا ابو اليمه
يبن طه المصطفى هالمناحر هاتفه
لآخر انفاس الصوت يا ابو اليمه
_

باچر انطب للحرب .. والنداء ايصيح .. فدوتك دمنه
مو على اصدور الكتب .. يعتلي التصريح .. من مناحرنه
لجل سادات العرب .. هالرگاب اطيح .. نفدي منحرنه

عالوعد نفدي الروح تبقى هالكلمه
الفاطمه انطينه العهد اشما وكف ضدنه عدد
على الموت احنه انفوت يا ابو اليمه
____

گام ابن ظاهر هتف .. هالحرب يحسين .. للنصر معبر
اليخذلك ماله شرف .. ولا يعرف الدين .. وما تبع حيدر
و شيبي من الدم عرف .. ينخضب هالحين .. وجسمي يتوذر

البيدك ايغمض العين ما بعد يعمه
وانه قررت النصر و افدي للدين العمر
الجسمي چفك تابوت يا ابو اليمه
_

رتلت اسمك سور .. جوهر القران .. يا سبط طه
آيه شفتك للبشر .. للانس والجان .. لغز معناها
بالعلم سيفي انتصر .. واتضح تبيان .. فاز مسعاها

آنه برير اليوم أنصر العصمه
و أشهد حسين الولي من ظهر حيدر علي
آيه من اللاهوت يا ابو اليمه
___

لون مو مره انچتل .. واحترگ بالنار .. لو ألف مره
انذبح وارجع عدل .. لاتظن احتار .. ومنك اتبره
حاشه عن دربك أزل .. وغيرك انه اختار .. تشهد الزهره

عاشگك إبن القين أكثر امن أمه
و آنه يحسين الأسد وارتجز يوم الشدد
بسيفي اهدم الطاغوت يا ابو اليمه
__

كسر بچفوفه الغمد .. وانتفض زعلان .. بالغضب عابس
ناده إني مستعد .. يابني عدنان .. والحرب واهس
درعي ماريده بعد .. سيفي يكفي الآن .. شگ الملابس

مجنون ابحب احسين شعظم هالنعمه
يا علي صاح ونزل وسيفه بالنار اشتعل
عابس اشگد مبخوت يا ابو اليمه





حسين الأمين

#اصحاب_الحسين_ع ٢
___

يبقى النداء حسيني
____

الموت لجلك لو ألف مو مره
ما بينه واحد يبخل ابدم نحره
بعنه اهلنه خاطر انموت اوياك
يشهد علينه المرتضى و الزهره

فضل لو تقبلنه انموت لجلك احنه
عالوفه علمنه الكرار

يبقى النداء حسيني
____

قبل الرگب لا ما تطيح الرايه
وولاد حيدر للحرب شرايه
شمحلاها لينه من تخلد عنوان
يصبح اسمنه للحشر وفايه

جون و النصراني ابرير و الهمداني
للنزال انتاني نفدي أرواح

يبقى النداء حسيني
_

ما بينه واحد تنتخيه يتعذر
و اعله الشجاعه علمانه حيدر
و اليوگع ابحربه نشيعه بهوسات
و العنده حظ بالمعركه يتوذر

و اليضحي ابنفسه انزفه چنه بعرسه
عالوعد ما تنسه هالسبعين

يبقى النداء حسيني
___

يابو علي غير المنيه السهله
اطلب و تامر غيرها ما تعله
انهد جبال ابأمر منك يحسين
شنهي الأرواح و حتى لجلك تغله

الكون عد يمناكم لو صحت حياكم
ارواحنه تفداكم يهل البيت

يبقى النداء حسيني
___

بلدم نخط تاريخ بيه انفاخر
انأسس مدارس للشجاعه باچر
نكتب عباره بالنحر من انطيح
من متنه ناده حسين إلا من ناصر

للشعاير دمنه ينحفظ منهجنه
للحشر موقفنه ايظل ينعاد

يبقى النداء حسيني





حسين الأمين

#اصحاب_الحسين_ع ٣ (( شوط كربلائي ))
__

توسطهم (حبيب) و صاح فدوه للسبط دمنه
من حسين لجل حسين بدايتنه و نهايتنه
___

بعدكم عالعهد لو لا يالانصار حاچوني
تفدون الرگاب اليوم الخاطر قرة عيوني
آنه لو طحت مچتول بالهوسات شيعوني

راسي أول القربان
اضحي عن ابن عدنان
هاي اوصيتي يالشجعان

ماريد الدموع اطيح بچتلي كون اتهنه
_

سيفك يا (برير) اليوم خلي ايرتل اياته
يامن بالحرب مشهود ويه الحيد صولاته
زلزل كربله بالخوف انته الوحده ضرباته

تربايت علي الكرار
سيفك بالحرب بتار
خلي بكربله تذكار

من بيدك تهز السيف مثل سوره ترتلنه
___

(يبن القين) اريدك كون تثكل بالحرب قاده
وانته يشهد الميدان عندك هالحرب عاده
مو بس النفس هاليوم كلشي فدوه للساده

و كلامك هاذه بي عبره
لو چتلوني الف مره
ما اترك بني الزهره

وحگ المصطفى الخاتم حسيني ما اتركنه
__

(عابس) سجل التاريخ صولاتك تظل عنوان
من تنزع درع حربك و من اتشگگ القمصان
تبقى بالعشگ ايه تترتل مده الازمان

تأسس مدرسة عشاگ
و كل الخدم ما تنساك
اهجم و الوعد تاناك

على حر من جمر تانيك جبرائيل بالجنه
____

يا (جون) الحرب فرصه استغلها ويه ابن فاطم
وانته يا (شبيب) اتنول بذبحتك تنحسب غانم
(انس) وي (مسلم) و(عمار) منكم لا يرد سالم

(نعيم) بذبحتك فاخر
واريدك مثله يا (عامر)
(وهب) من ترتجز شاعر

يا (مسعود) كل الجيش وي (الازدي) اذبحنه




كلمات / حسين الأمين

* بين الاقواس أسماء اصحاب الحسين سلام الله عليهم

#اصحاب_الحسين_ع ٤ ( گعده )
____

استنگي الصاحب اليسوه مثل اصحاب الحسين
ايبيض الوجه بالنخوه مثل اصحاب الحسين

لا تكرف كرف صحبان اخذ الثگل بالميزان
مثل اصحاب الحسين
_

اختبر لمن تصاحب هاي ناس الدنيه قله
وزن و شوف الخفيف وموقفه لتظن يثگله
و عوف كلمن ماله كلمه اعليك باچر هذا علّه

اتخيير النفسك ربع
اويه الريح ابد ما تندفع
صد كربله و شوف الوضع بذبحه واحدهم تسلّه

شوف انصار ابو اليمه ركز بالنظر زين
گطعوا رگب للكلمه ركز بالنظر زين

الميثاق ابدمه ينصان اخذ الثگل بالميزان
مثل اصحاب الحسين
__

بالنفاهه لا تعدهم ربعك الما مختبرهم
اشما تعد ميفيد عدك بضيجك ايبين عددهم
الشجره من يعله ثمرها العرف و الغربه تضلهم

تعرفهم ابوكت التعب
النار متغيير ذهب
عاين حبيب و صد وهب للصحبه ما بخلوا نحرهم

ضحوا لجل هالصحبه لجل العتره و الدين
واحدهم نطه گلبه لجل العتره و الدين

شاهد عنهم الميدان اخذ الثگل بالميزان
مثل اصحاب الحسين
_

ميّز ابين الثنيين و كثّر الربعك تجارب
اكو صاحب وكت عدنه و اكو طول الوكت صاحب
حتى تعرف بالشدايد باچر ابياهو تحارب

هاك الحقيقه الواضحه
صاحب الگوم الناجحه
اترك اصحاب المصلحه الترتدي زي الثعالب

اكو الما ينفع ابكلمه ابد ميكحل العين
هظيمه ينحسب زلمه ابد ميكحل العين

لا تختار ياهو الچان اخذ الثگل بالميزان
مثل اصحاب الحسين
___

اقره تاريخ الطفوف و صولة انصار الامامه
ليلة العاشر دعاهم و صرح حسين بكلامه
انتوا في حلٍ اتخذوا جمل هالليل بظلامه

و الصوت من عدهم صدر
وياك حد گطع النحر
لو بالحرب نصبح وذر ما نتركك للقيامه

هاك و شوف هالنخبه يحصل منهم امنين
لحسين اتبعوا دربه يحصل منهم امنين

رفعه و منزله و ايمان اخذ الثگل بالميزان
مثل اصحاب الحسين
____

( بيت المصيبه )
حيدريه حسينيه رسموا بدمهم قضيه
يا حسين انعاهد امك ما نعوفك للمنيه
كون هم نصرخ مثلهم نبقى شيعه رافضيه

انوالي اليحب آل النبي
و ما نتبع كل ناصبي
بس حيدره النه ولي

للدين ما نبخل دمانه لو بالانصار اقتدينه




حسين الأمين

#ليلة_اباالفضل_العباس_ع ١
_

عباس صار الليل اتنطر جيتك
عباس شفت الموت و ما شاهدتك
عباس ما تفزع معقوله الاختك
___

هاي أول تالي يا خويه احشمك
راح اعتب و العتب ادري يلچمك
أخذ عيني لو جمد بالعين سهمك
شوف حالي بغيبتك لو ما اهمك

عباس زينب انساها المهيوبه
عباس كلسا بمتوني مضروبه
عباس تاركني يالما تاركتك
___

آنه اجيتك تاركه عزي و دلالي
انسه زينب من متت ماتت يغالي
تالي ما تالي الشمر يوگف اگبالي
ايگلي هاي الليله آنه اعليچ والي

عباس راح اتعنالك بالهيمه
عباس زينب متروكه ابلا خيمه
عباس ليش ابهالموقف ضيعتك
____

تگدر اتعاين إلي لو طافيه العين
ارد اخبرك حايره من ابتدي امنين
امن الصرب من الشتم من نحر الحسين
لو من ركضت اعله الجمر بين الصواوين

عباس كل لحظه من دونك مقتل
عباس جيتك بيه اتراب امن التل
عباس ماتت روحي من ودعتك
_

تقبل اگبال الزلم يصبح منامي
تقبل اسكينه يضربوها أمامي
احچاية الشمات من عدهن سهامي
هاي اخوها المنذبح عالغبره ضامي

عباس بكل خطوه اتعنالك ميته
عباس نحر حسين اگبالي شفته
عباس ياما صاحك ياما صحتك
___

راجعه ابهيمه اتركت نسوان ثكله
خايفه ايطر الفجر و انشاف فشله
انته غالي لچن خويه خدري اغله
تالي باچر خدري يركب على الهزله

عباس درب الشام شگد بي حيره
عباس واليحدي بظعني ابلا غيره
عباس فارگتك بس ما فارگتك





حسين الأمين

‏يُسمّىٰ ‎عيد الغدير بعيد الله الأكبر لأنّ الأعياد الأخرىٰ لا قيمة لها دون هذا العيد، وأنّ قيمتها الحقيقيّة تظهر في ظلّ الولاية فقط، التي هي بمثابة العمود الفقريّ لجسم الإسلام، امتدادًا للنبوّة فحُـب الأمـيـر عَـلـي{ع} مُـخـتـلـف فَـهَـوَ
الأب الـحَـنـون
الـسَـنَـد الـثـابَـت
الـسـور الـعـالـي
الـحَـصَـن الـحَـصـيـن
"الـذي مَـن دخَـلـهُ كـانَ آمَـنَـاً"
رَضَـيـت بَـكَ يـا مَـولاي
أمـامَـاً هـاديَـاً وَ وَلـيَـاً مُـرشَـدَاً
لا أبـتَـغـي عَـنـكَ بَـدَلاً
وَ لا أتَـخَـذ مَـن دونَـك وَلـيَـاً

﴿الْيَوْمَ أَكْمَلْتُ لَكُمْ دِينَكُمْ﴾
فـ بالأميرِ كَمال دِين مُحَمدٍ ..
إن غاب عَنه كان دِينُك ناقِصا
#عيد_الله_الاكبر
#عيد_ابناء_الحلال

#ليلة_العباس_ع ٢ ( ٣ دگات )
___

صوت الگمر لحسين لمن اجاله
ايگوم اعله وجهه ايطيح بالحومه حاله
____

اباب الخيم و احتار ما شافه ضيه
يا خويه ناده حسين مترد عليه
أدركني لن الصوت من صوب اخيه

ناسيها روحه حسين لمن مشاله
___

تيّه طريقه حسين صوب الشريعه
جيش الگمر محسوب لـ بن الوديعه
يمشي و نظر عباس چفه گطيعه

وشل عليه العين گد ما بچاله
___

خطوه يطيح حسين خطوه يناظر
ظهري انكسر عباس بالحومه حاير
يبچي و ضحك شمات من العساكر

صاحوا سهل چتلاك بعد الكفاله
____

شاف الگمر مطروح مصيوبه عينه
يا ويلي بالعامود طبروا جبينه
امخضب ابفيض ادماه ماكو يمينه

موته اوي اخوه حسين يامه هناله
___

بحضنه يحط الراس و يحب جبهته
و من الدمه عباس مبلوله شفته
اتهد جبال اصخور مو صخره ونته

ينظر وجه عباس و الدمعه ساله
____

يمسح وجه عباس بالهظمه بيده
لحضات اخيره شلون ودع عضيده
عمره بعد عباس هم ما يريده

بيا نايبه و لچمات رد العياله
_

احتار ابوداعه اوياه بله شيگله
اوداعك يراعي الزود محد يحمله
اشلون ارجع ابلياك لتگلي سهله

يم الگمر مرتين موته حلاله
___

رد للخيم محتار روحه ثچيله
منترس شعره شيب رد للعقيله
ناده يزينب راح خدرچ كفيله

من هسه هذا الجيش جهز حباله




حسين الأمين

#العباس_بن_علي_ع ٣
_

طبها تربات الصميده طبها تربات الصميده
_

أخذ من حسين أمره بالبدايه
و صاح عزرائيل كله أدخل ورايه

حضورها - فتحوها - علكوها - سعرها / جهنم
نازلهم - حومتهم - من دمهم - باعثهم / جهنم

نازل وهايه نشيده طبها تربات الصميده
____

سرفن ارداناته من طبها الحرايب
هو تربايت علي بن أبي طالب

ترباته - صولاته - ضرباته - خزراته / من الحيد
حيدرهم - عاده الهم - صوره الهم - رجفتهم / من الحيد

خلص الجيش اعله ايده طبها تربات الصميده
____

مثل سعفه اكباله تتراجف عساكر
الحومه خلاها اعله ايده بس مناحر

عاهدها - رايدها - واعدها - من شدها / مهرته
الكافل - عالباطل - من نازل - جن راجل / مهرته

الحرايب هاذي عيده طبها تربات الصميده

__

وصل للشط و الجبد من عنده يلهب
الماي ذبه و الوفه منه تعجب

من شاله - بهالحاله - جن جاله - بعياله / عطاشه فادينه - بسنينه - ايودينه - لحسينه / عطاشه

والكلام شكد نعيده طبها تربات الصميده
___

ضامي رد و النهر مشيول اعله ظهره
ابثكله صدر الكاع كل خطوه يكسره

من حيدر - هالقسور - والعسكر - يتعذر / دخيله جن كلبه - هالجربه - وبدربه - من حربه / دخيله

الجربه اغله من وريده طبها تربات الصميده
____

والله لو ما بالغدر محد دناله
جان باد الجيش بس موته حلاله

سجلها - خلدها - بأكملها - بأجملها / خلوده
مريوده - من زوده - وزنوده - بعهوده / خلوده

حقق بحربه اليريده طبها تربات الصميده





حسين الأمين

#العباس_بن_علي_ع ٤
___

عباس طاحت خيمتي عباس حانت كسرتي
عباس وحدي بغربتي عباس سهلت وگعتي

____

خطوه تمشي يگرب اعليه الأجل
گلبي يا عباس وياك ارتحل
بس مشيت الراس بالشيب اشتعل
الفرگتك حتى العرش دمعه همل

عباس بعدك موتتي عباس شلي بدنيتي
عباس جيشي و عزتي عباس سهلت وگعتي
___

انظر بعينك ملامح للسفر
يمي بعدك بس أحس ظهري انكسر
افراگك أصعب خويه من كطع النحر
ما يريد الماي البكتره نهر

عباس روح ارويحتي عباس ذخري و عدتي
عباس نفسي و ريّتي عباس سهلت وگعتي
_

خويه يا عباس لو ناوي تروح
والله ما تبقالي من فركاك روح
هواي جرحك يختلف عن الجروح
دوهنتني و كلشي بيه ظل ينوح

عباس ساعة بلوتي عباس سيف بيمنتي
عباس اخوي و هيبتي عباس سهلت وگعتي
____

جانوا ايكولون نحرك ينكطع
حيف اكلهم ليه ابو فاضل درع
هسه من اموادعك ما ظل دمع
بهيده اموت بمشيتك مثل الشمع

عباس حيره بصرختي عباس شاهد طيحتي
عباس بيدك رايتي عباس سهلت وگعتي
_

روح بس لا تنسه زينب تنتظر
واكفه اتعاين عليك امن الخدر
كلشي كول ولا تكول ارجو العذر
لو طحت أم عون يحنيها الكسر

عباس زينب محنتي عباس راعي عيلتي
عباس وينك چلمتي عباس سهلت وگعتي
___

صوت اجاني للخيم منك إلي
و اركضتلك يا بعد روحي و هلي
شفتك ابلا عين يا ريحة علي
ابلا جفوف و بس ونينك يعتلي

عباس هاذي عازتي عباس صعبه احچايتي
عباس بيمن نخوتي عباس سهلت وگعتي





حسين الأمين

#العباس_بن_علي_ع ٥ ( ميمر )
___

عبست وجوه العسكر ... و عباس جاهم يضحك
__

فات الگمر و الموت خزرة عينه
لاگاهم بزلزال سيف ايمينه
حتى الهوه البطف تره مضيعينه

سد الهوه صاروا جسر ... و الگمر بيهم يسحگ
___

عاليها للحومه انگلب سافلها
لمن دخل سوح الحرب كافلها
كل گطره برگاب الزلم وشلها

اطلابه و دخلها العباس ... ياهو اعله راسه يلحگ
____

صارت الشرده من الگمر يشروها
لافته يم المشرعه خلوها
ادخيلك يسبع الگنطره خطوها

هاگ النهر و اخذ الماي ... نرجوا فقط بس صفحك
__

من والده ماخذ شجاعه و غيره
الطف اظن چانت قيامه ازغيره
لو ما أمر ربنه و حسن تدبيره

چا خلصوا بسيف الحيد ... ورد منتصر جيش الحگ
_

حملة علي يوم الحرب صولاته
جيش العدو بس نستمع صرخاته
مدري شكثرها الماتت بنظراته

أية علي وسيف حسين... بالشده يصعب مدحك
_

دمهم وصل من سيفه حد الكوفه
جيش و صفه چالسبحه بين اچفوفه
مات و بعدهم منه ظلت خوفه

ميت و همه يهابوك ... يرجفون و انته برمحك





حسين الأمين

#القاسم_بن_الحسن_ع ١
__

حنتك و الشموع بالدم و الدموع

صار العرس بحر الشمس والزفه صارت مأتم
__

فرحانه بثياب العرس يا مهجتي و عاطفتي
گتلك زفافك بالحرب گتلي الحرب سالفتي
أمنية عمرچ گرّبت اشمحلاها بالطف حنتي
اهنانه إني اتيقنت وحضرت دمعي و ونتي

هاجرت الافراح و حضرت الانياح

اتحولت دمع مو بالشمع والزفه صارت مأتم
____

مو گلبي بغيابك رجف من مشيتك كلشي اهتز
ابلياك عمري چن حرف بقلم المصايب ينچز
بعدك هواي ابلا طعم يالچنت بيك اتعكز
لو بيدي ابدل موتتك اعليك العمر ما ينعز

ضيعت الاحلام و رافگت الآلام

يا غربتي يا محنتي والزفه صارت مأتم
___

ما عاينتلك بالحرب غطّه الدمع كل شوفي
اسمع احروفك ترتجز و تصعد دعاء احروفي
لن صوتك ادركني يعم اهنانه متت من خوفي
شايلك عمك من رجع و مددك بين اچفوفي

يا ترف الاحساس ما عندك انفاس

ضاع الصبر مات العمر والزفه صارت مأتم
___

زفتك يجاسم بالدمع و الحنّه صارت دمك
طبع النده ليش ابعجل سافرت يا بعد امك
مو للحرب مثل الورد يوليدي كون انشمك
ياريت يمك موتتي مو دمعي اهلن يمك

يا فتشة العين ضيعت السنين

بعدك تهت مثلك متت والزفه صارت مأتم
_

جاسم يتربات الگلب يا روحي يا كل تعبي
يالچنت لعيوني نظر تيهت بعدك دربي
يا وسط ريتي انته النفس يا نبض دگة گلبي
افراگك ابد ما حسبت و كربله غيرت حسبي

نايم عالتراب يا كل الاحباب

ردتك ذخر مو للگبر والزفه صارت مأتم





حسين الأمين

#القاسم_بن_الحسن_ع ٢
___

ضحيته دمك وفديته عمك
باقي شمعه الكل محب هذا شبابك
_

كاتب وجودك من دم خلودك
يا باذل الروح بالغاضريه
عمك نظرته وحده بغربته
ناديته لبيك يبن الزجيه
بعمر النده اتروح ما تبخل الروح
ابزهرة شبابك اتلاگي المنيه

نسمع هتافك ساعة زفافك
حنّتك صارت يجاسم من خضابك
___

خليته بيدك سيفك نشيدك
بالطف عله و بان رفعة مقامك
عد الهواشم الحومه يجاسم
هاي الحرب عيد عدهم عمامك
وانته ابن الاحيود وبالكلفه صايود
لمّن ترهّيت فرفح حسامك

من والدك كون ماخذ هالعيون
من جمالك ترهب و شدة حسابك
___

منك اخذنه هذا درسنه
نفدي المناحر لجل العقيده
لجل الامامه انضحي السلامه
كل شيعي مفروض هذا نشيده
الهاي الشعاير ننطي المناحر
نهجك بالگلوب ينخط قصيده

ثابت ولائك و بكربلائك
نور ساطع باقي النه ايشع ترابك
____

كل شيعي لازم مثلك يقاوم
ومثل التزامك ايخط التزامه
ويغضها عينه لابد يقينه
ايفكر شلون يرضي أمامه
ما عنده غايه غير الهدايه
يحفظ صلاته و يحفظ صيامه

ايخط ابدمائه موقف ولائه
ايسجل ابماي الذهب لازم خطابك
__

راسم شبابك قمة صوابك
بهاي المبادئ سجلته نصرك
بقلة سنينك و حنة يمينك
كل هاي الازمان ما تمحي ذكرك
صوت الضماير من المنابر
يهتف الك دوم ما ينسى امرك

موقف صمودك رمز الخلودك
يسجد التاريخ لو مر اعله بابك




حسين الأمين

#القاسم_بن_الحسن_ع ٣
_

يجسام طفوا شمعتك
يجسام ذبلت وردتك
___

ييمه جانت امنيتي اشاهد عرسك وافرح
و تزهر يمه عافيتي رغم بيه الزمن يجرح
لن الطف هجم بيتي و خذاك الساحة المذبح

يجسام جان اعله بالي
يجسام عرسك يغالي
_

اجيت الكربله و دهري علن حربه و بده شره
يمن يفداك كل عمري يريت ايبدله الامره
يفتشة كلبي ما يدري حبك بالنفس يسره

يجسام أعلنها حربه
يجسام چتلك يطلبه
___

يريت الموت ياخذني ويترك يالضنه اسنينك
بمشيتك يبني تذبحني كبل لا كطعة اوتينك
يبني ميته من وني وخوفي من اصد عينك

يجسام كون المنيه
يجسام تلفي اليه
__

وارث من ابوك النور و بوجهك يشع ضيه
و من كثر الجمال الحور تغازل بيك يوميه
شلون أنظر الك منحور و تصيرن جثه مرميه

يجسام لا تفجع أمك
يجسام يذبحني دمك
___

يبني عازتك چانت بيدك أدخل بلحدي
فرگتك يمه ما هانت بعدك بالدهر وحدي
روحي الفگدك احتارت و جمره شبّت بچبدي

يجسام حضرته نعشي
يجسام من گلت أمشي





حسين الأمين

#القاسم_بن_الحسن_ع ٤
_ - _ - _

رمله تعاين عالولد يا فتشة العين
صارت ييمه زفتك بين الصواوين
___

آ يالولد...تارسني حب _ نبض الگلب...بسمك لهجته
لعمرك ردت...زفة عرس _ يل بالنفس...تضوي شمعته

يالنورك ايضاهي الگمر يا ايه بس ابلا سور
تربات گلبي و السهر يا ذخر السنين

صارت ييمه زفتك بين الصواوين
____

وي كل صبح .. چنت انتظر _ كل العمر .. انظر شبابك
ماچنت اظن..يفرغ حظن _ تصبح حزن..بالطف عذابك

كل تعبي يصبح عالترب نايم ينبضات الگلب
منين و اجتني هالحرب يا جاسم منين

صارت ييمه زفتك بين الصواوين
____

أول حلم .. طولك اصد _ مثل الورد .. انفاسك تفوح
تعب الصبى .. نور الحسن _ هذا الزمن .. رايدها الجروح

تاليها بالدم حنتك و عمك دموعه بزفتك
مو بالهلاهل عمتك بحسرات الونين

صارت ييمه زفتك بين الصواوين
_

حنه وعرس...چانن حلم _ صارن سهم...صوبلي گلبي
لون البياض..احمر صفى _ بچفك غفى..وعيوني تربي

يوليدي نايم من وگت دونك ألف عام اكبرت
روحي و ضنايه قدمت وسط الميادين

صار ييمه زفتك بين الصواوين
_

اترف ولد .. گدما ترف _ صوت النزف .. يذبحني سمعه
يالمنچتل .. حظني فرغ _ چفني نشغ .. ما باقي دمعه

يالغافي بحظان الرمح أنشاف بغيابك جرح
جاسم ينسمات الصبح مگطوع الوتين

صارت ييمه زفتك بين الصواوين
____

ميت وصد .. بلكت ترد _ كثر النشد .. يا ييمه اريدك
يمك متت .. گلبي عرج _ ماتت مهج .. ابحزة وريدك

كل جسمي عگبك يرتعش والترب صارتلك نعش
تفداك رمله من العطش و اسوالف البين

صارت ييمه زفتك بين الصواوين
____

رمله غدت .. مثل الشمع _ ذابت دمع .. لمن عفتها
بلايه احد .. راح الضنه _ ضاع الهنه .. الفرگه عشتها

بعدك مثل خيمه احترگ يالعاهدت ما نفترگ
گلبي بعد ما ظن يدگ فارگله غالين

صارت ييمه زفتك بين الصواوين





حسين الأمين

#القاسم_بن_الحسن_ع ٥
_ - _ - _

اشعلوله الشموع الليله حنته
يزفه حسين و تهلهله عمته

گمر يعمي النواظر يضوّي الحومه باچر
___

أنه امه إلي چنت منتظره عرسه
ازفنه حلم و أنتظر شمسه
عمامة والده بعرسه البسه
و اشوفن كل بنينه و يعلى حسه
حلم چان اعله بالي و صار هسه
استحاله من بعد ما انطه نفسه

اروحن بالحلم لارض المدينه
اهني المجتبى و ادري يجينه

الحسن ندريه حاضر يضوّي الحومه باچر
_

قبل ليموت وصه الوالد اعليه
گال القاسم بعرسه احنيه
اجي لارض الطفوف بدمه الاگيه
احظننه و اشربنه و اداويه
افاخر بيه دوم و راسي اعليه
و يجي وياي جده و يفتخر بيه

يگله شلون طعم الموت يبني
يجاوب انچتل أخره يلني

لذيذ و طعمه ساحر يضوّي الحومه باچر
__

اجه مغتاض يمي و لبس درعه
حرت ما بين ازفه لو أودعه
يحارب من نزل صوته نسمعه
آنه إبن الحسن وراث البضعه
يناظر عمه حربه و ذرف دمعه
يگول بهل الحرب تطفالي شمعه

سمع أدركني صرخاته يعمي
احتار احسين أشوفه بدربه معمي

ركضله بدمعه حاير يضوّي الحومه باچر
___

طبع ماخذ من ادلال المضايف
يفورن من دخل للحومه واگف
كلمن شافه چن الحسن شايف
يرد لصحابه يتراكض و خايف
يشبه جده حيدر بالسوالف
و يشبها القاسم بوگت الگلايف

بگطع شسع النعل ذل العساكر
سبع تالاف فارس باقي حاير

نزل شدها يكابر يضوّي الحومه باچر
_

جاسم بالحرب بيّن عناده
ما يقتل شرط بس إلا قاده
خلاهم چثث كلمن تماده
نص الجيش بيمينه اباده
رجع يوم الجمل بالحومه عاده
مثل ضربات أبوه بسيفه اجاده

وصل للمشرعه و خيم عليهم
ظنوه الگمر لبسوا عبيهم

مثل عمه يفاخر يضوّي الحومه باچر




حسين الأمين

#ليلة_علي_الاكبر_ع ١ ( بداية مجلس )
______

رحيلك فجعني عماني و كسرني
___

يا وجه طه النبي يا لون حيدر
يا ذخر لحسين يا شريانه الابهر
يا كياني و عزتي يا گلبي و أكثر
انهدم حيلي ابمشيتك يبني الاكبر

وجودك عمادي بخطوتك تهدني
رحليك فجعني عماني و كسرني
____

تحد سيفك وانه احد للنوح عيني
تلبس ابدرعك وانه ألبس ونيني
بخيمتي بعدك لچن ذابل حنيني
من رحت مو ماي اطش بعدك سنيني

سكونك وقارك جمالك أخذني
رحيلك فجعني عماني و كسرني
______

بخطوة اجدامك من الخيمه منيتي
يا هواي ابلا هواك اتموت ريتي
لمن ودعتك عليه طاح بيتي
أنغمى اعليه و بدت ساعة رزيتي

وداعك دهاني يمن ما تركني
رحيلك فجعني عماني و كسرني
___

بحربك انه منغمي اعليه نصيبي
و گلبي يدعي ربي رجعلي غريبي
لنّي افزن من منامي و بنحيبي
الگه راسي بوسط حظنك يا حبيبي

ضحكتك يغالي تهودلي وني
رحيلك فجعني عماني و كسرني
_____

يمه من فزيت شفتك فرحتني
مو بحظنك انته لازم وسط حظني
احظنت راسك و المواجع فارگتني
علي يبني امروتك لا لا تهدني

اخذها سنيني إذا تمشي عني
رحيلك فجعني عماني و كسرني
____

لحظه لان صوت الابو فطر دليله
يا علي جدك طلب منك تجيله
أنظر احسين اعله ابنه انهدم حيله
استعدي للنواعي گلي ليله

كلامه سطرني و أخذ گلبي مني
رحيلك فجعني عماني و كسرني
____

شويه لن رديت مشيول الخيامك
اچفوف ابيك شالتك مطبوره هامك
اموذريك شلون لموهن عظامك
يا علي مو للذبح للشم أيامك

ييمه بمشيتك المصايب ولني
رحليك فجعني عماني و كسرني





حسين الأمين

#علي_الاكبر_ع ٢
____

علي هونك ييمه لا گلبي تلچمه
نحرك خل اشمه و اشبع شوف منك

ابمشيتك للمنيه خل وجهك عليه
و اشبع شوف منك
__

من تمشي اعله كيفك يبني و بهونك
انظر طولك و اشبع من عيونك
كل لون الجمال انصاغ من لونك
وحدك نازل و ماكو اليشبهونك

چنت وحدك يغالي تضويلي الليالي
ابمشيتك شوف حالي ومتظل روح بعدك

و بدموعي الجريه خل وجهك عليه
و اشبع شوف منك
___

يالوجهك بدر و بليلنه ايلالي
بعد موتك فقط بس موتي يحلالي
حسرات و مدامع تصبح احوالي
يالتباريني بعدك نوحي يبرالي

الريتي انته انفاس بروحي عايش احساس
خوفي اسيوف هالناس لتذبحك حبيبي

اجروحك كون بيه خل وجهك عليه
____

يبني يا ذخر شيبي و تعب عمري
گاع الطف رادت ينكسر ظهري
المنيه اتحزمتلك و انهدم صبري
بعد عيناك ادفن ضحكتي بگبري

من أتنام يبني يروح النوم عني
و ارافگ يمه وني و افارگها حياتي

و اشوغ بكل مسيه خل وجهك عليه
____

گلب الأم على اوحيّدها شيصبره
إذا حست جرح هاللحظه ينتظره
و بعد ساعه تنظرك عيني عالغبره
و يجيبك والدك وذره بكتر وذره

مو بس جرح مجروح اشوفك يمه مذبوح
و بيه ما تظل روح روحي اوياك ترحل

و ادگ راسي بديه خل وجهك عليه
___

ساعه و لن رجعت امن الحرب و الحال
السيوف اموذراتك حتى ما تنشال
الطمت وجهي و صحت يا روحي و الدلال
ليش ارسومك امخضبيها دم و ارمال

شفتك و انعمه الشوف شعملت بيك السيوف
اجتني امنين الطفوف و ضيعتني يالاكبر

اخذت كلشي ليه خل وجهك عليه
و اشبع شوف منك




حسين الأمين