#ليلة_القاسم_بن_الحسن_ع ٥
_ - _ - _

اشعلوله الشموع الليله حنته
يزفه حسين و تهلهله عمته

گمر يعمي النواظر يضوّي الحومه باچر
___

أنه امه إلي چنت منتظره عرسه
ازفنه حلم و أنتظر شمسه
عمامة والده بعرسه البسه
و اشوفن كل بنينه و يعلى حسه
حلم چان اعله بالي و صار هسه
استحاله من بعد ما انطه نفسه

اروحن بالحلم لارض المدينه
اهني المجتبى و ادري يجينه

الحسن ندريه حاضر يضوّي الحومه باچر
_____

قبل ليموت وصه الوالد اعليه
گال القاسم بعرسه احنيه
اجي لارض الطفوف بدمه الاگيه
احظننه و اشربنه و اداويه
افاخر بيه دوم و راسي اعليه
و يجي وياي جده و يفتخر بيه

يگله شلون طعم الموت يبني
يجاوب انچتل أخره يلني

لذيذ و طعمه ساحر يضوّي الحومه باچر
__

اجه مغتاض يمي و لبس درعه
حرت ما بين ازفه لو أودعه
يحارب من نزل صوته نسمعه
آنه إبن الحسن وراث البضعه
يناظر عمه حربه و ذرف دمعه
يگول بهل الحرب تطفالي شمعه

سمع أدركني صرخاته يعمي
احتار احسين أشوفه بدربه معمي

ركضله بدمعه حاير يضوّي الحومه باچر
___

طبع ماخذ من ادلال المضايف
يفورن من دخل للحومه واگف
كلمن شافه چن الحسن شايف
يرد لصحابه يتراكض و خايف
يشبه جده حيدر بالسوالف
و يشبهه القاسم بوگت الگلايف

بگطع شسع النعل ذل العساكر
سبع تالاف فارس باقي حاير

نزل شدها يكابر يضوّي الحومه باچر
_____

جاسم بالحرب بيّن عناده
ما يقتل شرط بس إلا قاده
خلاهم چثث كلمن تماده
نص الجيش بيمينه اباده
رجع يوم الجمل بالحومه عاده
مثل ضربات أبوه بسيفه اجاده

وصل للمشرعه و خيم عليهم
ظنوه الگمر لبسوا عبيهم

مثل عمه يفاخر يضوّي الحومه باچر




كلمات / حسين الأمين

#ليلة_علي_الاكبر_ع (( 3دگات ))
___

حان الوداع ابين ليلى اويه الاكبر
الشبگه و الدمعات بالخيمه تحضر
____

تگله يضي عيناي من تمشي عني
بعدك اعيش اشلون وانته اتركتني
يبني لون اتروح موتك ذبحني

ريت أنتظر هالموت و امره تأخر
____

ما عندي بس الله و انته يغالي
كبّرتك بحسبات ذيچ الليالي
يا يمه حگ ارباي تالي صفالي

ما مش ابن بعدك لحظه تنطّر
___

هاي المنيه شلون خلتلي هظمه
والله يالاكبر صار كل عمري لچمه
بعدك يروحي اتموت چلمة ييمه

شلون احتمل فرگاك بيش انتّصبر
____

لا يا حلاة الروح بعدك تراني
للگبر من اتروح موتك خذاني
يا ريته هذا الموت يلفيني اني

و تسلم يگلبي الروح منك يقسور
____

هذا ابوك حسين حاله انظره
شگد يكبر ابلياك يا يمه عمره
من هسه يمه اعليك يجذب الحسره

ما يحتمل لو شاف جسمك امعفر
___

كل ام ييمه اتشوف هيبتها تزداد
لمن شباب اتصير خلفتها تنراد
بس انته عندي موش عشره من الاولاد

ما ودعك للسيف يا يمه مگدر
___

عون الابن يالحيد من تكبر امه
مو للحرب ينراد تاليها جسمه
الشيب الكبر مريود حاسبته زلمه

وانه وحيده ابقيت بعدك تصور
____

ذاخرتك الميعاد موتي و منيتي
بيدك اطب لحداي يبني وصيتي
تاليها دمك سال و انهدم بيتي

بيه العمه و لا شوف تعبي اموذر




كلمات / حسين الأمين

#ليلة_علي_الاكبر_ع ٢
_

راجع و الونين منه يعتلي
بچفوفه الحسين رد شايل علي

شنو حاله بعد روحه اشتفيده
شنو حاله اليشيل اوليده بيده
____

بلوعاته بدمعاته و عثرات اجدامه
صوت ابنه أتعنه يم باب اخيامه
ضيع دربه راح وگلبه يركض گدامه
ابعينه اموذرينه ايشاهد احلامه

يا روحي و ضناي يا تعب العمر
نايم يا هواي وانه احتضر

على اوليده يون ونه شديده
شنو حاله اليشيل اوليده بيده
_

گاعد يمه يمسح دمه راسه باحضانه
كلماته اهاته تشرح احزانه
حاچيني ضي عيني احسينك انه
ما يتبدل ياموت اقبل روحي بمچانه

اتمدد عالتراب وي ابنه سوه
والفگد الشباب كل حيله هوه

ثگل جدمه ثگل دمه بوريده
شنو حاله اليشيل اوليده بيده
__

من شاله بيا حاله دمعه ايسيله
ما يگدر يتعثر ضايع حيله
بخيمتها بدعوتها تتنطر ليله
فخرها اكبرها و تگعد تشكيله

ذبلت و الدموع عالخد چن نهر
بالفرگه تلوع و نار اتشب قهر

شيحاچي امه الابنها من تريده
شنو حاله اليشيل اوليده بيده
__

ارسومه مالومه رد يجري الدمعه
كل عيده اوليده مذبوح ايرجعه
صوب امه يا هظمه بيا ونه اتودعه
آ يبني ذوبني فگدك يا شمعه

يا تعب الحياة يا لب الگلب
ازغير اعله الممات مو مالت ترب

تسولفله و حچي الدمعه تعيده
شنو حاله اليشيل اوليده بيده
___

مو خيمه بالهيمه ظل عايش عمره
يم ليله يبچيله مخنوگ العبره
بحظانه الريحانه وبعيونه اينظره
ابلا حيله يشكيله اهاته و قهره

يا عمر اليفيد بعدك يالظنه
كترك كون اريد كبرك احظنه

بعد وجهك حزن عمري اريده
شنو حاله اليشيل اوليده بيده




حسين الأمين

#ليلة_علي_الاكبر_ع ٣ ( بداية مجلس )
___

رحيلك فجعني عماني و كسرني
___

يا وجه طه النبي يا لون حيدر
يا ذخر لحسين يا شريانه الابهر
يا گمر يا ورد يا دره يجوهر
العدها مثلك والده من حگها تفخر
يا كياني و عزتي يا گلبي و أكثر
انهدم حيلي ابمشيتك يبني الاكبر

وجودك عمادي بخطوتك تهدني
_

تحد سيفك وانه احد للنوح عيني
تلبس ابدرعك وانه ألبس ونيني
من اجيت و قبلتني من جبيني
عرف گلبي بروحتك لا ما تجيني
بخيمتي بعدك لچن ذابل حنيني
من رحت مو ماي اطش بعدك سنيني

سكونك وقارك جمالك أخذني
___

بخطوة اجدامك من الخيمه منيتي
يا هواي ابلا هواك اتموت ريتي
يلي وجهك أحلى من كلشي بدنيتي
بروحتك شطين ترستها بچيتي
لمن ودعتك عليه طاح بيتي
أنغمى اعليه و بدت ساعة رزيتي

وداعك دهاني يمن ما تركني
___

بحربك انه منغمي اعليه نصيبي
و گلبي يدعي ربي رجعلي غريبي
لني افزن من منامي و بنحيبي
الگه راسي بوسط حظنك يا حبيبي
دمعك الفززني يا روحي و قريبي
شوفتك مثل الشمس ماگلها غيبي

ضحكتك يغالي تهودلي وني
___

يمه من فزيت شفتك فرحتني
مو بحظنك لازم انته وسط حظني
احظنت راسك و المواجع فارگتني
گتلك بصوت المدامع من ولني
تدري يوليدي بوداعك افجعتني
علي يبني امروتك لا لا تهدني

اخذها سنيني إذا تمشي عني
____

لحظه لان صوت الابو فطر دليله
يا علي جدك طلب منك تجيله
أنظر احسين اعله ابنه انهدم حيله
استعدي للنواعي گلي ليله
ابنچ ابسوح الحرب دمه يسيله
بعد طوله ونتچ تصبح طويله

كلامه سطرني و أخذ گلبي مني
_

شويه لن رديت مشيول الخيامك
اچفوف ابيك شالتك مطبوره هامك
اموذريك شلون لموهن عظامك
يا علي أعوامي انتهت ويه اعوامك
هسه صاير عالترب بالطف منامك
يا علي مو للذبح للشم أيامك

ييمه بمشيتك المصايب ولني





حسين الأمين

#ليلة_علي_الاكبر_ع 4
__

الحرب عيد يهالحيد هيبتك نوماسي
بالطفوف والسيوف يمه ارفع راسي
___

يالاكبر علي اليوم بحربك عيد الاعلوم
من حامي الحميه
بسيفك يدخل انذار جيش بفنك احتار
بأرض الغاضريه
تعبي حكه مريود بالطف وفي العهود
و اختمها الوصيه

فده الروح والجروح رايتك احساسي
بالطفوف والسيوف يمه ارفع راسي
__

يبني فتشة العين ماكو غير الحسين
بعيونك اشوفه
كرر جدك الحيد عنده الحومه جن عيد
يفنيها بجفوفه
وانته هاشمي الصيت وبالكلفه تنخيت
يالترهب طيوفه

يكرون يفرون لا تهم ينفاسي
بالطفوف والسيوف يمه ارفع راسي
__

يمه رايده انخاك راسه جيبه وياك
لو طب ابن غانم
يلي اتعادل اثنين مو جيش تكفي جيشين
وهم ترجعلي سالم
وفي طلبتي هاي منك ما ردت ماي
يعكال الهواشم

طلب هاي يوفاي بالحرب عباسي
بالطفوف والسيوف يمه ارفع راسي
_

يل بالكلفة طلاب ما مثلك رحم جاب
يا سبع الحرايب
تشبه للنبي أوصاف ماخذ من علي أعراف
من يلفي الطلايب
كلمن شاهدك كال حيدر لو علي صال
حيرت الكتايب

بالعلوم والدموم يالقتالك قاسي
بالطفوف والسيوف يمه ارفع راسي
___

عفيه يبني وفيت بحربك هاذي كفيت
ورافع ليه هامه
منك يرجف الجيش شارد يعني اليعيش
صولاتك قيامه
يقره الزلزله السيف يكطع بالركب كيف
تربايت عمامه

والحسين يگر عين فدوتك كل ناسي
بالطفوف والسيوف يمه ارفع راسي





كلمات / حسين الأمين

#ليلة_علي_الاكبر_ع ٥
_ - _ - _

من طلع لابس لامته تشبه محمد هيبته
و ليله بدمعها نادته رايح وين
___

يا علي گلبي انمرد ظلمه ليلي ابلا ولد
وحيده و بغربة بلد هاذه حالي

دون عينك ماكو نجمه اتلالي
بعد وجهك يا گمر يحلالي

روح لكن انطرك ترجعلي مو دم منحرك
يبني المنيتي اذخرك رايح وين
____

مودع الله من تروح افديك كون من الجروح
بعدك و لا تبقالي روح يا هواها

يل بالترافه ما يشبهك ثاني
بعد طولك هالعيون اتعاني

هدي بخطاك اتوسلك أشبع نظر و اتأملك
بتعبي ييمه أسألك رايح وين
____

يالمشيتك چنها ماي بعدك الدمعه ضواي
بخطوتك يخلص هواي تگرب منيتي

بروحتك كون الله ياخذ روحي
لو مشيت شلون يبرد نوحي

اليمه بعد ما تلفظ بچفاك ما يبقى النبض
اثگيله مشيتك عالارض رايح وين
_

فدوه اروحلك علي يا دنيتي و روحي و هلي
لتخلي نوحي يعتلي ابرحيلك

خوفي من الموت ياخذ گلبي
للترب يصبح رباي و تعبي

يا تعب كل العمر يا بسمة اشفاف الزغر
للمنيه انته الذخر رايح وين
____

يا ضوه عيون الفجر من صعدت اعله المهر
خذت وياك العمر يا حلاته

بعدك شلون انهض بكل حيلي
كون بفراگك اموت ادعيلي

من تمشي لعيوني تصد چنك تگولن ما ترد
يالمبتعد مات الورد رايح وين





كلمات / حسين الأمين

#عبدالله_الرضيع_ع ١
___

هوه مو هوه كل خطوه انظر للرمح
منخطف لونه وعيونه مو مالت ذبح
___

كلما التفت صوب الرمح يلجمني جرح
نبلة منحره
عبدلله تره نحره ترف مو مالت نزف
ست اشهر تره

شكد حاولت اصد عنه
بس مشتاكه اشبكنه
هلبت لو نزل مره ردت من ابني شبكه
من رمحه نزف دمه
و المتبدي شيلمه
بوجهي يبتسم و انه انهظم بكليبي حركه

يافرح روحي وجروحي ياوجه الصبح
يا تعب حظني كل ظني مو مالت ذبح
______

برمحه ما ثبت نحره يكع ومن دمعي نكع
كل الدرب اليسر
من كثر الجرح وجهه دمه وشفته من الضمه
صارت تنفطر

راسه ما ثبت خطوه
كلسا عالارض يهوه
راسه ازغير وخشن الرمح كدما يلجمه
شدوه بحبل راسه
و بنحره الرمح جاسه
واصل حد لهاته و النزف ما خله دمه

اسمع اهاته شهكاته ما يكفي الشرح
ميت وشفته يا ونته مو مالت ذبح
_____

حظني يالولد فارغ صفه وجفنك من غفه
عيشني السهر
انظر وجنتك كلها دمه وعالخد لاطمه
يولدي بقهر

ما تنزل يبعد أمك
خلي لهفتي اتضمك
ما فاركته حظني من اديه الايد الحسين
هسه برمحك انظرلك
ماكو چف اليحملك
نايم عالرمح يلي جنت مهدك رمش عين

ما برد صدري يا عمري بعدك يتضح
يخلص ابنوحي يا روحي مو مالت ذبح
____

امشي والدمع مني رسم لوعات السهم
ذابح ركبتك
من خالي رجع چف والدك عني بعّدك
انطاك العمتك

ساكت رجعك يبني
اميه شربك ظني
ماكو امناشغك ثاري السهم كاطع لهاتك
عالهزل وانه اتصور
تلجم كطعة المنحر
كون انه المتت يبني كبل ساعة مماتك

وانه عالهزل اتخيل نحرك ينجرح
ريته ذابحني موش ابني مو مالت ذبح
___

بعدك ماكو ظل عن الشمس ولا تهوه النفس
وانته منجتل
ست أشهر كضه منك عمر وانه بالقدر
عندك ارتحل

يا عيشه بعد تحله
و رايح مني عبدالله
ماتت كل دللول المهد بعدك يغالي
ادعي كون اجي يمك
يلي ما سلم جسمك
رضوا بالرمح وانه الذبح بعدك هنالي

انهظم بيها امن احجيها مي عنك يشح
هظمة الهظمه يايمه مو مالت ذبح





كلمات / حسين الأمين

#عبدالله_الرضيع_ع ٢
_ - _ - _

ماتت دلول المهد والجفن غافي
ما اكعدك ياعلي نوم العوافي

وليدي نايم عالرمح يضوي لو غاب الصبح
___

جنت انتظر طول العمر
منتظرة اشوف سنينك
آ يالولد هذا المهد
فارغ يظل چا وينك

ماعندي غيرك ياضوه عمري وتعب سنيني
يافتشة عيوني علي تتركني من تجيني

چنت منتظره الولد يوگفلي خيمه
ماچنت اظنك ياعلي تمر بيه غيمه

كون لا طاب الجرح يضوي لو غاب الصبح
__

بطول المسير انه احير
ست اشهر يگتلونك
بعدك رضيع اترف صريع
بالترب طايح لونك

شفت الكبر من انحفر وگطعوا نحر ضنايه
فوك الرمح راسه غفه مو طفل جنه ايه

بهيده مشيكم لا يفز من هذا نومه
الله لا ينطي الشمس غيرت رسومه

ريت وياك انذبح يضوي لو غاب الصبح
___

عمرك شمع عمري دمع
و النبله چانت فرگه
ما جنت اظن يبرد حظن
و اشتاگ يمه الملگه

چفي يهزن بالمهد و اتذكرك يغالي
بنومي و گعدتي يالولد ما ترحل اعله بالي

يالعمرك بعمر الشمع لا تمشي عني
ذاخرتك لشيب الگبر موتك فجعني

ما يلچمك يبني الشرح يضوي لو غاب الصبح
____

چبير الجرح خشن الرمح
يلچمني من ايجرحك
شدوا حبل بجرح النبل
خافن تكع من رمحك

نبتوا راسك بالرمح وانه انظر شبديه
شفتك تون من الألم وانه انغمى عليه

چنت تبجي بالحظن وانده يغالي
هسه تبچي عالرمح والحظن خالي

يا وكت گلبك يشح يضوي لو غاب الصبح
___

كلبي انمرد سمعت الولد
تجري دمعته بكيفه
بحالي شجره من منحره
ما ينكطع نزيفه

للراس واصل هالرمح وانه بدمع اناظر
من شفت عبدلله بچه بكلبي ترض حوافر

ذابلات من العطش ذيچ المعاني
عبدالله ما تگعد بعد موتك سباني

موتي بعدك يتضح يضوي لو غاب الصبح





كلمات / حسين الأمين

#عبدالله_الرضيع_ع ٣
___

السهم عبدالله شلون احتمل بله
من عمره اكبر بهواي كون الله لا ينطي الماي
____

ما سمعته و لا حچه كلمه بعد
ردت يمه أسمعها بشفاف الولد
لسه عطره ما شبع منه المهد

مو للمعارك هالولد چان أمنياتي
كون الله لا ينطي العطش ذبّل حياتي
يا زينب ابداله ردت صاير مماتي

فرفح عليه حظني ابلحظة الودعني
بحسابي مو ميت جاي كون الله لا ينطي الماي
___

الورد منه أخذ شكله و العطر
الليل منه أخذ نسمات الفجر
بروحة ابني بعد ما يسوه العمر

الأم اذا تفگد ابن تفگد عمرها
اشحال اذا شافت سهم ذابح ذخرها
عبدالله للدنيه انخلق نسمة عطرها

من فارگه گلبي ضايع صفه دربي
يوليدي يا لب احشاي كون الله لا ينطي الماي
__

ما فطمته ليش مفطوم ابسهم
اگماطه ابيض رد إليه كله دم
من نظرته منذبح بس ابتسم

حاولت ياما اشبگه لكن منعني
السهم ذابح رگبته ريته ذبحني
دللول الولد ساكت ليش يبني

نايم گلت بعده رديته و بمهده
نايم گلت ضي عيناي كون الله لا ينطي الماي
__

شلته بيدي و النحر منه انگطع
صحته يمه و چنت اظنه ما سمع
الموت يبني ليش بشهورك طمع

فرگتك عبدالله صدگ صارت نصيبي
و چلمة ييمه ابلا دفو بعدك حبيبي
يوليدي من كثر العطش ما درّ حليبي

يا ريحة ايامي يا عمري و احلامي
يا روحي يا كل رجواي كون الله لا ينطي الماي
___

برد حظني و الدمع خدي چوه
يبني بعدك عايشه و ميته سوه
اشهور عمرك چانت الجرحي دوه

هسه جرحك بالگلب ما تطفى آهه
و امك تره ابلايه دفن ماتت تراهه
شلها بعمرها الوالده التفگد رباهه

شيسوه العمر بعدك لمن فرغ مهدك
يالچنت كلشي ابدنياي كون الله لا ينطي الماي




حسين الأمين

#ليلة_الوادع ١
_ - _ - _

يلا يزينب يختي ودعيني
من يا كتر باچر تشبگيني

بالطف تشوفيني جرح والراس مشيول برمح
يلا يزينب يختي ودعيني
____

اگعدي يختي خل نتوادع بدمعه
باچر عالصدر بس خيل متربعه
خل انسولف شمحلاها هالجمعه
زينب حتى طفلي باچر انودعه

خلينه نحچي يختي خلينه
باچر على الغبره تشوفينه

يصعب يزينب كل شرح والراس مشيول برمح
يلا يزينب يختي ودعيني
____

خليني اسولف يختي و اتسمعين
ماريد بدمعتچ للعدو اتبينين
و هونچ لو ركضتي خايف تعثرين
و عالتل يختي باچر ذبحتي تشوفين

هونچ يخيتي بالدمع هونچ
خايف عالتل تنعمي عيونچ

من الگفه يختي انذبح والراس مشيول برمح
يلا يزينب يختي ودعيني
___

باچر لو ركضتي من الحرگ بالبر
خوفي لا تلمحچ نظرة العسكر
استعدي يختي باچر عينچ التسهر
من تتكفلين ايتام و الخدر

بالچ يزينب بالدرب بالچ
باچر عساكر و أنتي الحالچ

ياذني متنچ منجرح والراس مشيول برمح
يلا يزينب يختي ودعيني
___

احچايه أرد اگلچ يا بعد عمري
لتصدين عينچ من يرض صدري
و لتصيحين بسمي من يحز نحري
و لتمسحين دمي لو يظل يجري

باچر يزينب من تشوفيني
من الخيل يختي ما تعرفيني

والدم على الغبره يسح والراس مشيول برمح
يلا يزينب يختي ودعيني
_____

عينچ عالزغار من الحرگ و النوگ
صبريهم يزينب لو دخلتوا السوگ
تلچمني اليتامه و الچدم محروك
يأذي ارقيه خايف يختي من الشوك

لو نظر شامت يجرح ايتامي
و انه اعله رمحي و الوجه دامي

خوفچ إذا طر الصبح والراس مشيول برمح
يلا يزينب يختي ودعيني





كلمات / حسين الأمين

#ليلة_الوادع ٢
لسان حال الإمام السجاد عليه السلام
____

الخيمه رسمتلي صور منيه
اشد من گطع النحر عليه

والدي ايودع عياله كلشي بالدنيا بچاله
____

التمن و صار الدمع كل الحچي
وحده ماتت وحده بيده ترتجي
عمتي زينب سمعته و شبعت بچي
يا عيالي رايح انه و ما اجي

الخيمه صارتله جرح هذا أشد من الذبح
الفرگه صارت تتضح قتيل
شفت دمعات اليتم شبت بروحه الم
بحيله گوه ظل يلم ثچيل

شبگته عمتي و تون سمعها
نشّف ابچفه الجفن دمعها

بخطوه كل دمعي جراله كلشي بالدنيا بچاله
____

ما بقت كل دمعه بينه بخطوته
من ظهر مهره اشاهد طيحته
عمتي من الخيمه تسمع رضته
الله لا ينطي الخيول السحگته

نشّف عيون الدمع استمع كسر الضلع
شفنه راسه منگطع سليب
الخيل تسحگ عالصدر طحنت بعظم الطهر
امن الگفه حزه الشمر تريب

عمتي تركض بالحرب يحيره
من يصدوها الغرب چبيره

منفرش عالغبره حاله كلشي بالدنيا بچاله
__

من وگع شفنه العساكر و الخيول
فوگ صدره تسحگ و ظلت تجول
جتني زينب ناشدت عمه شتكول
فرن اعله الحومه هالموقف يطول

أنظر الحال الحرم اتشگاف و ماكو رحم
السوط و النار ابخيم تطوف
طفل بالحافر عثر طفل متگطع وذر
و ابن مگطوع النحر نشوف

اقسى كل منظر جره عليه
طفله تمشي اميسره وسبيه

جسم أبويه الخيل جاله كلشي بالدنيا بچاله
___

طفله طاحت عالجمر مچويه ادين
ارقيه سلوبها التراچي الظالمين
وحده تصرخ عمتي وحده حسين
بالترب ركضتهن الما أدري وين

راس مرفوع برمح و راس بالعين الجرح
وانه كل لحظه انذبح عذاب
طفله تركض للنهر طفل بالحومه عثر
وحده تنده يالكمر مصاب

حشمت عمي الكفل يجيها
الثوب بالنار اشتعل عليها

عالنهر موته حلاله كلشي بالدنيا بچاله
__

بهيمه تالي گعدوهن عالتراب
لا خيام و لا حراسه بس حجاب
الزينب السوط اعتنى بكل العذاب
من بعد ما شاهدت اعظم مصاب

نامن بوسط الرماد غربه حراس و بلاد
الهوه صاير بس سواد دخان
وحده تنشد يا حسين عمتي يا عباس وين
تريد اخيتك يالحنين مكان

والله حيره حيرتي بعذابي
ألم زيدت عمتي مصابي

والشمر جهز حباله كلشي بالدنيا بچاله





كلمات / حسين الأمين

#ليلة_الوادع ٣
______

احتارت زينب الليله وتگطر بالوداع احساس
مره اتعاين اعله حسين مره اتعاين العباس
_

يا حيره الذي اتمرها مو لحظة اموادع موت
تصد اجبين ابو اليمه و تهل ادموعها ابلا صوت
باچر بالحجر مصيوب و دمه اعله الثياب ايفوت

و ينهد حيله وسط الگوم و تهجم بالرماح الناس
__

صدت عالگمر و تشوف جمال اعيونه و المبسم
وصدى صوت الطفوف ايگول باچر تگطر امن الدم
عين ابسهم عين ادموم يطفن و الصبح أظلم

يروح الچان كافلها الحارس عالخيم نبراس
__

ردت عالحسين و گال صعبه فرگتچ صعبه
و هيه ابلا خبر معلوم شافت منظر ابحربه
شافت سهم المثلث يشلع وصله من گلبه

يطلعه من گفاه حسين وتحيط بحومته الارجاس
____

شافت موقف الكافل من يبقى بلا چفين
من يوگع على الشاطي وسهم مصيوب وسط العين
وسمعت چلمة الخويه و حاير من ركضله حسين

و شافت بين هذا و ذاك طايح و العمد بالراس
_

باست نحر اخوها حسين و المدمع يضوي الليل
وشبگت صدره بالحسرات واتخيلت تسحگه الخيل
تسمع كسرت اضلوعه و تصيح ابچلمة اليا ويل

عگبه توگع اخيمها جسمه بساعة الينداس





حسين الأمين

#ليلة_الوحشه 1
_ - _ - _ - _ - _

وازينباه وازينباه
____

موادعك چن حل موعده حان وبعد حان السبي
يا خويه ذكره بهامتي شديته بالدم معصبي
راح أمشي ولرايه ستر صعبه اليناظرني اجنبي
مو وحّدي يابو الفضل وياي اهل بيت النبي
___

اوحيده بقيت بلا اهل ياخويه كل جسمي ارتعد
شامت يسولف مقتلك واحد على جسمك صعد
ليل و ندورلنه ستر و برايتك تدري الضمد
هذا الأشد يابو الفضل حارسنه چتالك بعد
_____

ألتفت يمنه و ميسره ماكو عرف كلهم غرب
اتوجهت صوب المشرعه والدمع عالشيله يصب
ناديتك الحگ يا كمر نايم و مرتاح الگلب
خيتك وحيده بلا حرس ما تنهض اعليها صعب
_____

من كل كتر هجموا يخي ما ظل بعد النه مفر
بالهيمه اطفالي أصبحت وانته صفيت بلا أثر
حرگوها بالنار الخيم كلها اركضت صوب النهر
نيران و اسياط و حبل الحگ علينه ياكمر
__

صفگات اديهم چن رمح يطعن يخويه ارويحتي
ضحكتهم اتحز منحري ينزل دمه وي دمعتي
من الألم من الهظم شيّبت تراهي حسرتي
من گطعوا الراس اعرفت اويه الغربه تبدي رحلتي
___

نايمه اعله ارماد الخيم حالتي تكسر خاطرك
ما تنظر الحالي صدگ ثاري الدماء بناظرك
ما تنهض الخيتك ترد اعيون الزلم تتجاسرك
حافيه أمشي عالجمر بآهاتي خويه استنصرك





كلمات / حسين الأمين

#ليلة_الوحشه ٢

السيده زينب تخاطب اخيها الحسين عليهما السلام
بعد إنتهاء معركة الطف
_ - _ - _ - _ - _

ليل وحشه وماكو وجهك
لا عطر منك اجاني لا خيال
ياهو اليه بغربه وحدي
اخلاف عينك چتفوني بالحبال

ضيعت كلشي من گلت أمشي
_____

شحلاة ارسوم وجهك چانت اطوف
بدليلي و الحزن عن گلبي مكشوف
هسه اعله الشفايف طبرة اسيوف
اشوفنها و عساها عيوني متشوف

شلون ظلت روح عندي
من شفت دم بوجنتك و التراب
طايحه منك عمامه
خويه اول مره اشوفك لسه شاب

ضيعت كلشي من گلت أمشي
___

چنت وياك چن شجره و غصنها
تفي اعليه و انه بسد حضنها
رحت و بروحتك خيم حزنها
ميته وياك يا خويه لونها

عفيه ظلت مهجه عندي
من گلت راح امشي خويه و الوداع
عگب ما ضيعت صوتك
انشده يا خويه حالي و گلبي ضاع

ضيعت كلشي من گلت أمشي
____

اسهرت ليل الهظم بالدمعه اناطر
يتامه خايفه و ابلايه ناصر
لحظه و لن تمر شفت الحوافر
وذر جسمك يخويه اعليها صاير

هنا ردت خويه المنيه
و لا اشوفن خيل تسحك بالعظام
ما دريت اشلون حالي
نباوع و يجري دمعنه ابلا كلام

ضيعت كلشي من گلت أمشي
____

صدك ليل و بعد ما تگصدلنه
وحيده أبقيت و ابلايه زلمنه
اناطر بلكي اشوفن رف علمنه
اشوفه و لكن الشاله شتمنه

شايل بچفه علمنه
و بالسهام امزگينه و النساء
فرحت العباس اجاها
تالي حارس عالظعينه و الخباء

ضيعت كلشي من گلت أمشي
___

شفت حارس يمرنه بعتمة الليل
يگول انه الحرس من عگب الكفيل
يخويه اهنا طحت و اتهدم الحيل
شبچت أيدي اعله راسي ودمعتي اتسيل

درت وجهي عالشريعه
ها يخو زينب أناشد يالگمر
وسفه شامت يحرسلنه
و لازم بأيده علمنه وبفخر

ضيعت كلشي من گلت أمشي
_____

درت هالعين و الهزل ورايه
ظعنه مسافر ابلايه نهايه
ركبت اعله الهزيله ابلا حمايه
ينشدوني يزينب ماكو رايه

مودع الله بدربي انه
اي يبو اليمه حبيبي و السلام
مروا اعله القتله بينه
الأكبر و جاسم ملوهم بالسهام

ضيعت كلشي من گلت أمشي
___

مشينه و من وصلنه الديرة الشام
نظرات الغرب ترمينه بسهام
أهلها احجار يرمونه عالايتام
بخرايبهم يخويه اطفالك اتنام

صعبه بت ذاك الغضنفر
تدخل بمجلس دعيه ترد جواب
تالي گعدونه بخرابه
لا ستر بيها الحرمنه ابلايه باب

ضيعت كلشي من گلت أمشي




كلمات / حسين الأمين

#ليلة_دفن_الاجساد
___

من الدفن عمه أرجعت يا ليتني اوياهم متت
ولا عشت كل هذا العذاب
چم اخو وسدته التراب

يا ليتني اوياهم متت
___

رديتلچ عمه جسد يمشي فقط بجروحه
انه الذي وگت الدفن چم مره طلعت روحه
والدي نايم عالوجه و برگبته المذبوحه
ثالث نهار و بالشمس فوگ الترب مطروحه

منين أبدي ياعمه الشرح كل لحظه يمهم انذبح
شحچيلچ اچبير المصاب
چم اخو وسدته التراب

يا ليتني اوياهم متت
___

امطشرين ابويه عالثره لميته وصله وصله
خنصر يمينه منگطع و بگلبه لسه النبله
نعشه حصيره والدي و الدمه صارت غسله
نزلته بس ابلا رأس و فوگ الصدر عبدالله

يا عمه متگطع وذر عالقبله وسدت النحر
و تغسيله من دم الخضاب
چم اخو وسدته التراب

يا ليتني اوياهم متت
___

يا عمه چم مره متت من شفت حال الأكبر
احزام الظهر فوگ الترب يا عمه شلته اموذر
التشبه محمد خلقته بحر الشموس امفطر
لحده حفرته بيمنتي و اتمنه موتي يحضر

ياريت وياا بالگبر اتوسد و أنهي العمر
احزام الظهر يا عمه غاب
چم اخو وسدته التراب

يا ليتني اوياهم متت
_____

أنظر على القاسم صبح يشبه يعمه الشذره
بيض الملابس بالدمه اتحولت تراهي حمره
بالگبر نايم هالولد و أنصار ابويه بكتره
گطعت دليلي امصيبته من شفت گطعة نحره

جسام يا خيط الصبح للعرس لا مو للذبح
واريته بدموم الثياب
چم اخو وسدته التراب

يا ليتني اوياهم متت
__

صديت صوب المشرعه و ظهري يعمه اتكور
شفت الچفوف اعله الارض يمكن الچ تتعذر
حيرني سهم الصوبه باقي بشلعته اتحير
و راسه يعمه من العمد يم الشريعه امطشر

حيرني عمي بوالفضل شلون ادفنه بعينه النبل
مو شعر راسي رمشي شاب
چم اخو وسدته التراب

يا ليتني اوياهم متت





كلمات / حسين الأمين

#ايام_السبي
_____

يهل زينب سبي زينب ما كضه
فايت اشجم سوك خدر المرتضى

ديره لديره طايفه بديوان اميه واكفه
_

ها يهل الوجوه السمر الماعبدت اوثان
من صلب قتال العرب قالع البيبان
بت سيد الكوم انولت ما عدها وليان
ما ينشحذ سيف الغضب من كوم عدنان

ما يجي هاشمها وي فارس مضر
ويرد علوياته من ضيم السفر

بين الكصصهم ناشفه بديوان اميه واكفه
______

درب اليسر لا ما كضه ومشدوهة البال
من السوط طبعات المتن دزيت مرسال
بين الدواوين اوكفت وبلايه رجال
دارت الدنيا وبت علي اتحشملها خيال

شبحت اعيون الزلم من العجب
شلون اخت عباس وبمجلس طرب

الناس بخدرها حالفه بديوان اميه واكفه
______

يا طارش ادز للأهل وبغربة ابلاد
و حسين جسمه منسحك وراسه اعله مياد
يشتمها خولي و حرمله بت خير العباد
ما يفزعلكم هاشمي الهذا الظعن عاد

الدار عبد المطلب ساقي الحرم
اكصد و حشم سبوا الكم حرم

بتكم وحيده و خايفه بديوان اميه واكفه
____

يا آل هاشم منذبح من عدكم ازلام
و فرجه النساوين اصبحت بالكوفه والشام
ليش البيارغ نازله يا فخر الاسلام
بالحجر زينب تنضرب ولوعوها الايتام

بكثر ما منهم عدد حيدر قتل
عادلوه ابمتن زينب و انعدل

بكثر الدمع دم نازفه بديوان اميه واكفه
____

كل العشاير للنسه فزعت تردهن
و ظلن ربيبات الشرف محد كصدهن
وسط الخرابه و الشمس حركت وجهن
جم وحده ماتت بالسبي كدما هظمهن

تلوعن بالسوط و احجار و رمح
وناس تشمر ماي حار من السطح

مو هاي كل السالفه بديوان اميه واكفه





كلمات / حسين الأمين

#ايام_السبي
__

موقف سبي هاظمنه يا عباس
من العشاير جتنه يا عباس

ردوا النسوه امن السبي و ظلن ربيبات النبي
__

الكوفه من فتنه هاجت الفتنه
كل عشيره شبحت اعلينه النظر
للقصر راحوا للحرب فاتوا
صوب ابن ازياد علنوا هالامر

عار اعله العرب من تسبي مره
عشايرهم اجت سيوف امشاهره

خاف الحرب و الفتنه ابن ازياد
طلعوا النسه من عدنه ابن ازياد

نفذوه حالاً مطلبي و ظلن ربيبات النبي
____

بالخبر دخلوا و النسه طلعوا
امن الخرابه بسرعه طلعن للاهل
خويه يا هظمه دورت زلمه
من بني هاشم اجه لينه عدل

نظرت اعله الحرم يدورن بالزلم
يشوفن يندعن يرفلهن علم

يا خويه ميّت مره تذبحني
من سكنه اسمع حسره تذبحني

ما فزع لينه طالبي و ظلن ربيبات النبي
_

كل عشايرهن صوت حارسهن
يا فلانيه أخرجي سبيج گضه
التفت حيره نشفت الغيره
صاح يبقن بس بنات المرتضى

بقينه باليسر فقط نسوة علي
بسياط و حجر يخويه ننولي

بيت الشرف چنه احنه بالكوفه
تالي الخوارج صرنه بالكوفه

من الدمه حمره العبي و ظلن ربيبات النبي
__

للاهل طلعن واخواتك الظلن
بين خولي و حرمله و سوط الشمر
وينه حامينه صاحت اسكينه
وكفت اباب الخرابه تنتظر

كلما التفت رقيه اتنادي إلي
عمي ما يجي و اگلها اتحملي

شوف الهظم و اللوعه بين الناس
چم طفل تجري ادموعه بين الناس

انغر علينه يا أبي و ظلن ربيبات النبي
__

تالي طلعونه لشام يسرونه
بس حرمكم بالسبي خويه سرن
خوله من طاحت من الظعن ماتت
الشام آه الشام من فات الظعن

تتشفه النسه اجني بالدرب
واحنه ابلا أهل و بديرة غرب

بحجارهم لاگونه أهل الشام
و ذاك الحچي سمعونه أهل الشام

سب الصميده الناصبي و ظلن ربيبات النبي




كلمات / حسين الأمين

#ايام_السبي
______

شمر يحدي الضعينه والسباهن
واحد سوطه يضرب والسباهن
الأشد مو باليشتّم والسباهن
التذبح دخلن بديوان اميه
____

شفت منظر جرح كلبي ولجمني
أخت عباس تمشي ويه غربه
ناشدت الخلك جا وين الحسين
كالولي الحوافر فوك كلبه

واحد كال زينب تمشي للشام
ومن السوط مهشومات العظام
تطيحن عالترب لو عثرت النوك
وحيده ابين عسكر بين الأيتام

الزينب ما فزع ساقي حرمها
من الماي شامتها حرمها
وحيده اتكفلت تحمي حرمها
يهاشم بتكم اتسمت سبيه
_

مشيت اويه الظعن و اجدامي ميته
لحد ما شوفهن بالكوفه وگفن
بطبول و هلاهل يا هظيمه
و الوادم تناشد وين اهلچن

شماته اتنادست بت حيدر اتفوت
الچان الها اخو يتسمه بالموت
الما لامح گبل كل بشر ظلها
شو فرجه اصبحت ما بين البيوت

الچان الشرف عدها هو طالب
غريبه بت علي بن ابي طالب
وحدها ولا اجه من اخو طالب
يرد حگ العشيرة الهاشمية
___

باب الساعه وگفن بيها ساعات
و اعيون البشر صدت على ام عون
وين النذل و الما عنده إحساس
و الما بيه غيره ظل يشمتون

صاحت صوت شيبت منه الانفاس
بت شيخ العرب ما بين الارجاس
تفصگ راح زينب ظلت براح
و صدت عالشريعه اتحاچي عباس

عگب عينك نذل خويه خطاباي
و على امتوني سياط الهم خطاباي
مو هذا المهم و اسمع خطاباي
القصر ايزيد يهدوني سبيه
_____

على الديوان آه اشمكثر الآه
دخلن بالبچي و ايزيد فرحان
بيده الخيزرانه و يضرب الراس
و ربيبات الشرف من دون وليان

بين اهل الطرب ايات قرآن
يسمعوهن حچي ميحمله انسان
واحد صاح زينب وينه الحسين
لعبت على صدره الخيل ميدان

اخبرچ ماكو واحد ظل عالحسين
عاري عالترايب ظل عالحسين
كثر السحگ طحنت ظلع الحسين
يزينب خيلنه البالغاضريه
___

بخرابه و سوگ تالي بت علي اتفوت
يا وسفه و لا حامي يجيها
و رقيه اتنام لاكن نومة الموت
بعد ما فسّر الصخره بچيها

نشدت بالبواچي والدي وين
ما يدري ابناته بالدواوين
لن الطشت جاها اتشوفه بس راس
بشبگة موت شبگت راس الحسين

الگوم الضربوا ارقيه بلا دين
سبوها ابلا رحم طفله بلا دين
اجاها احسين لاكنه بلا دين
شلون اتشبگه محتاره رقيه





كلمات / حسين الأمين