Bugun Samarqand shahrida Inson huquqlari boʻyicha toʻrtinchi forum boshlandi. Unda BMT va uning ixtisoslashgan tuzilmalari, YEXHT, Yevropa Ittifoqi, IHT, SHHT, MDH, Iqtisodiy hamkorlik tashkiloti, Osiyoda hamkorlik va ishonch choralari boʻyicha kengash, Turkiy davlatlar Parlament Assambleyasining yuqori darajali vakillari, 200 nafardan ortiq xalqaro va mahalliy ekspertlar ishtirok etmoqda.

Har ikki yilda bir marta oʻtkazib kelinayotgan va bu gal “Ekologik tahdidlar: oʻzgarayotgan dunyoda inson huquqlarining istiqboli va barqaror yechimlarni izlash” mavzusiga bagʻishlangan ushbu anjuman ishtirokchilariga Prezidentimiz Shavkat Mirziyoyevning murojaatini oʻqib eshittirdim.

Davlatimiz rahbari inson huquqlari sohasidagi eng dolzarb muammolarga bagʻishlangan Samarqand forumlarini oʻtkazish yaxshi anʼana tusini olganini taʼkidladi.

Global iqlim oʻzgarishi oqibatida sayyoramizda yuzaga kelgan keskin ekologik vaziyat Barqaror rivojlanish maqsadlariga erishish yoʻlidagi eng asosiy toʻsiq va tahdidga aylangani, global miqyosda qashshoqlik bilan bogʻliq muammolar koʻpayib borayotgani, insonning sogʻlik, toza suv, oziq-ovqat va uy-joyga boʻlgan huquqlarini taʼminlash xavf ostida qolayotgani qayd etilgan. Iqlim oʻzgarishi oqibatida inson huquqlariga yetkaziladigan zararni keskin kamaytirish uchun jahon mamlakatlari birgalikda samarali choralar koʻrishi kerakligi koʻrsatib oʻtilgan.

Murojaatda iqlim oʻzgarishi muammolari bilan kurashish borasida Oʻzbekistonda amalga oshirilayotgan keng koʻlamli chora-tadbirlar qayd etilib, Birlashgan Millatlar Tashkiloti Bosh Assambleyasining “Markaziy Osiyoda iqlim oʻzgarishining salbiy oqibatlariga qarshi kurashish sharoitida inson huquqlarini himoya qilish toʻgʻrisida”gi rezolyutsiyasini ishlab chiqish va ilgari surish boʻyicha Oʻzbekistonning tashabbusi qoʻllab-quvvatlanishiga ishonch bildirilgan.

🚀 Yanada ko‘proq yangiliklar bilan tanishib boring:


📲 Hoziroq obuna bo'ling va do'stlaringizga ham ulashing.

@hududtv