- والله يا البلٌال أنا ما عندي شغلة بيكن وباقي على سكري وعواليقي دي لمن ربنا يهديني واتوب منها لكن روح كدي يمين ما بكتلا وانا عمري دا كلو بوليس ما ببقى بعدما كبرت مجرم وكتٌال وكان لى سكيني البسن فوقا يومي دي والله بسن فوقا زعل منك ساكت لكن كتل ماني كاتلك ولا كاتل غيرك ..
- خلاس خشمك وعندك صم بكم كان داير تعيش وكأني ما جيتك ..
- كأنك ما جيتني ولا شفتك ولا قلت لي ولا قاولتك ..
البلٌال مرق منو لكن ما مطمٌن من ناحيتو وكان قايل لمن يقول ليهو بدٌيك الحواشة على حسب سكرو بعمل أي شي لكن ظنو خاب وفكٌر في النجح لكن تاني قال داك أخير عدمو أحسن حاجة أكتلو براي لكن ما في شي بضمن لي منصور ما ينضم إلا أنتهي منو هو أول ..
اليوم التاني منصور حمد الله لمن عرف التهامي ما قاعد في الحلٌة وخاف من صرٌار عينو يغدر بيهو مرق من الحلة فات وتاني ما جاها راجع ..
________
المهدي جا الحلة ساق أمو وخالتو أم حامد ودٌاهن الخرطوم عشان يشوفن حامد أم حامد قالت ليهو
- إلا ترجع معانا الحلة ..
- إلا كان قنعانة مني ساكت أنا كان رجعت بنسجن ..
وأبى يرجع ..

يتبع ...

*حكاية ريدة*
*الحلقة《18》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
منصور بعدما مرق من الحلة فات الحلة الورٌانية عندو فيها أولاد عم ليهو ما عم لزم لكن عمومة ومي بعيدة وديلك مشايخة ما بتجيبو ليهم إلا مناسبة تجيب الناس ويجيهم ضيف ويفوت منهم ضيف مكجنن عشان مشيختن دي وهو شيطانو كبير ومالكو تب وهسٌي جاهم مجبور ما عندو فجٌة تاني يقبٌل عليها غيرن والغريبة هم بريدوهو وطوٌالي بجوهوا في الحلة الفوق وكلهم عارفنو عولاق وما دايرن لكن بقولوا نسوي الليلت الله واليوم البجوهو فيهو داك بدس العرقي ويصلٌي معاهم مجبور ومرقتو دى خوفة ساكت من البلال أولاد عمو احترموهو وفرحوا بى جيتو ليهم وهو تلاتة يوم ما سكر ولا اتذكٌر الشراب ولمن شاف ريدتن واحترامن ليهو شعر بأنو زول وبقى يصلٌي الأوكات الخمسة حاضر وفي الجامع كمان وفي بيت أعمامو ديل العوجة ما بتجيهو وفكر في حالو الكان عايشو كلو وبكى واستغفر لمن قال بس وفات للضابط في المركز ..
________
التهامي ما خلٌى بلد وبدا يراقب فى المهدي من بعيد لى بعيد لكن المهدي السايب فكر ليهو أسبوع كامل ما قرٌب من حامد كلو كلو لمن التهامي فتر وقنع منو وفات وبعدما لتأكد تب إنو التهامي ساب مراقبتو ليهو فات لى حامد وقال ليهو
- والله التهامي دا إن ما لقاك أنا قايل بموت عديل ياخي أسبوع كامل مراقبني وبتلبٌد لي عشان كدا أبيت أجيك وانا فكرت ليهو بالصدفة والله يوم كتلت ملف وهو مما شافني زاغ سريع وعرفتو دا التهامي الما بغباني قلت ليهو إنعدل ما دام مراقبني وعملت فيها رايح وزوزيت بيهو مزازة لمن فتر من المساسقة الفي الفاضي وخلٌاني براهو والله أمس القريبة دي حنٌني لغاية ما قرٌبت أجيبو ليك هني ..
- أوعك آ المهدي دا الوحيد الما داير ألاقيهو كلو كلو ..
- ياخي أنا أخوك وحرٌم باردة وحارة تلقاني قدٌامك لكن إنت زول رمٌة وكعب وغتيت وداسٌي مني كتير والله ..
- خلٌينا ياخي من الحلٌة والتهامي جوازي وينو؟
- يا زول عشان أكون معاك صريح أنا ما دايرك تمرق من البلد دي والله ..
- والله من أول يوم عرفتك ما داير تطلٌعو لي لكن أنا الغلطان الجيتك ..
- والله أنا ما غلطان ياخي مالك ومال الغربة البلد دي بى خيرا هسٌي قروشك العملتهن في شغل السمك دي شوية؟
- أنا مارقاني جريمة ما كايس شغل ..
- الجريمة والله كان عملتها نقول لكن إنت ما عملتها البمرقك شنو؟
- تاني نقعد نعيد في الكلام؟
- والله مية مرة أعيدو ليك ..
- المرة الفاتت ما حلفت وقلت تاني ماك ساعلني ..
- ياخي ديك حليفة ساي لغو ..
- المهم ياخوي أنا الكان مقعٌدني معاك هنا الجواز وبعد كلامك دا ماني داير منك شي ..
حامد شال القروش العندو كلها أداها المهدي قال ليهو
- دي قروشي خلٌيها معاك واصرف منها على أهلي ما تحوٌجن تب وانا أدٌيت أمي قروش ما شوية أدٌى أبوي وهسٌي موهن دايرين منك شي لكن كلما تمشي الحلٌة تديهم ..
- وصلت تب وانا القروش دي بشغلا كلها وببيع وبشتري بيها عربات والفايدة بيناتنا بالنص ..
- عديلة تب وانا إن بقيت حي واتلاقينا في الدنيا دي ماني محاسبك البلقاهو عندك بشيلو وكان راحن اللروحن يعني إتصرٌف فوقن زي هيلاتك وانا باكر ماش ..
- سمح ماشي على وين؟
- ماشي السما اللحمر ما عندك شغلة بي ..
________
النجح بعد فوتة منصور الحلة مسخت عليهو عشان ما عندو صاحب فيها غيرو وهو الوحيد العادٌيهو زول ولمن عرف إنو مع أولاد عمو في الحلة الورٌانية فات ليهو والقزازة في خرج الحمار قال يشرب ليهو كاسين تلاتة معاهو يظبٌط بيهن راسو ولمن وصلو لقاهو منصور تاني سبحتو ليل نهار في إيدو وبى دقينتو ونضيف وصلٌاي الله هداهو وإن شاء الله يهدي المعولق دا

النجح لمن شاف منصور كدا نطط عيونو زي مخلوع الفرٌة معقول دا منصور العفٌين الكان بسكر لمن يلغلغ ويبقى دلقان سبحان مغيٌر الأحوال والبباري ليهو زول مرمٌد ببقى مرمٌد أكعب منو والبركة في البلٌال الخوٌف منصور وخوفتو دى بقت ليهو بى توبة النجح أخد قعدتو معاهو ومنصور قال ليهو
- ما تسكر تاني وابقى عشرة علي الصلاة وامسك فيها قوي ..
النجح جا راجع وطلٌع القزازة من الخرج ورماها في الدرب ومحتار لمن وصل البيت وكلو كلو ما مصدٌق إنو منصور إتغيٌر كدا ..
________
الضابط من يوم جاهو منصور في المركز وورٌاهو بى كلام البلٌال القالو ليهو كلو وهو خاتٌي البلٌال في راسو ومراقبو زي ضلٌو وبى زول من الحلة لا في البال ولا في الخاطر ..

يتبع ...

*حكاية ريدة*
*الحلقة《19》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
حامد داير يطش تاني وقدر ما المهدي حنٌسو عشان يورٌيهو داير يمشي وين أبى يكلٌمو وحلف ما يورٌيهو والمهدي قال ليهو
- علي كيفك أعمل الفي راسك بس أبوك زعلان منك ومني أنا برضو لأنى ما ورٌيتو إنك معاي وأمك زاتا لمن جبتها ما وريتا إلا في الدرب ولمن قربنا نصلك هني وانا قلت ليهو جاني وفات تاني وما عارفو فات وين ..
حامد سكت ساي ولمن المهدي فات منو قعد يبكي وخاصة لمن إتذكٌر ملامضٌتو مع أبوهو ديك يوم قال ليهو أمرق من بيتي وديك أول مرة يرفع صوتو عليهو ويسمٌعو كلام زى دا حامد زول كويس لكن عطالو الزمانك وعدم شغلو مع أبوهو في الزراعة خلٌى ناس الحلٌة يكجٌنوهو وهو الخلٌاهم يسمٌوهو الخملة بس هو ما خملة ..
________
حاج الصديق الكان جا للبوليس في حلٌة ناس خلف الله اليوم داك لمن سمع بأنو حامد مجرم وكاتل ليهو زول بقى يبكي وقال ليهم
- إن شاء الله كلو كلو ما تلقوهو لأنو ود حلال وعقرب ما بكتلا والبعرفو أنا عنو خلف الله صاحبو ما عارفو ..
خلف الله كلام حاج الصديق دا وصلو وفات ليهو يوم سعلو قال ليهو
- شنو العارفو عن حامد صاحبي وانا ما عارفو؟
- الطيب أو حامد زي ما قالوا الزول دا بجيني في البيت وبشرب معاي شاي المغرب ويوم في مره كبيرة في حلٌتنا دي ما تسعلني من إسما جاتني وكانت محتاجة ليها لقروش وما لقتن عندي وانا اعتذرت ليها وحامد كان قاعد وسمع كلامنا كلو ومع مرقتا مرق وراها وبعد مسافة جاني راجع أدٌاني قروش كتيرة وقال لي ودٌيها ليها ومن اليوم داك بقى طوٌالي يجيب لي قروش وقال لي إنت بتعرف ناس الحلٌة المحتاجين والعدمانين قسٌما بيناتن صاحبك آ خلف الله في حلتنا دي كان شايل بيوت وما في زول عارف الكلام دا بعد الله غيري زول زي دا معقول يكون مجرم؟
خلف الله أول مرة يسمع الكلام دا وبكٌاهو شديد وقال لحاج الصديق
- أنا من بكره نازل البحر أشوف شغلي والمركب هيلتي دي حامد عندو فيها نص إشتريناها شراكة وبمرق ليهو حقو وبودٌيهو لى أهلو وبسوٌي الليلتو معاك والقروش الكان بجيبا ليك أنا برضو بجيبا ليك من نصيبي ونصيبو وانت قسٌما بى معرفتك والله يا حاج الصديق أنا يا دوب عرفت إنو الله فتحا علينا بى سبب سواتو دي وكنا قدر ما نجر شبكتنا نجرٌها مليانة سمك والتجار كان السوق ملان سمك يجونا جارين ويخطفوهو مننا خطف وبالسعر البنقولو نحن حامد ما بتعوٌض والله آ حاج ..
________
اللمين والبلٌال جايين المغيرب من الحواشة اللمين قال للبلٌال
- والله يا البلٌال أخوي كان شفت النجح ولا تقول ياهو النجح العولاق والتليفة داك بقى زول وتاب من السكر وبقى ملازم الجامع وبمشى ليهو أول زول ..
- الزول دا ما براهو ..
- ما براهو كيف؟
- صدٌقني والله ما براهو غايتو علٌا لمٌ فوقو الشيخ ود الهوين عزم ليهو وادٌاهو بخرات طيٌرن ليهو جنو إنت في دا ولا في منصور البوليس؟
- وين ختر الخازوق دا؟
- ماك عارفو يعني ساب حلٌتنا وفات علي أولاد أهلو في الحلة الورا؟
- ماني عارفو والله إلا هسٌي منك فات بتين؟
- عييك ليهو أكتر من شهر وانت قاعد وين آ السايب؟
- يعنى ساب الحلة عديل؟
- سابا وساب العرقي وقالوا بقى شيخ زي أولاد أهلو ..
- والله أحسن ليهو كان كدي هو الخلٌى النجح يتوب ..
- منصور ساب الحلٌة خايف مني أكتلو لأني قبلما يسيبا مشيت ليهو في بيتو ..
البلٌال حكى للمين كلامو مع منصور
واللمين قال ليهو
- ماك شديد والله داير تكتل التهامي؟
- زي ما حامد كتل صاحبي أنا بكتل صاحبو وكاتلو ما عشان كتلة حامد للطاهر براها كاتلو عشان قلٌة أدبو السوٌاها معاك ونكتلوا أنا وانت بس هو بس اللجي الحلٌة ..

- والله علٌا تكتلو براك لكن أنا ما بكتلو معاك ولا بكضٌب عليك ..
- بتكتلو والله وإن كتٌرت كلامك والله تمشي تكتلو براك وانا ولا معاك ..
- وكان ما كتلتو؟
- بتكتلو والله ولا علي كيفك ..
- دا كلام شنو دا آ صرٌار عينو؟
- خلٌيهو بس هو يجي الحلٌة وبتشوف أنا بخلٌيك تكتلو كيف ..
________
التهامي بعدما قنع من المهدي واتأكد تب إنو ما عارف حاجة عن حامد ما رجع الحلة طوٌالي مشى تاني لى خلف الله في حلٌتو قنٌب معاهو كم يوم وجا راجع الحلٌة وطوٌالى فات على بيت ناس حامد وحاج الحليو بردلب رماها ليهو وقال ليهو
- صاحبك رسٌل لينا قروش كتيرة وجا المهدي ساق ليهو أمو ولاقتو ..
حاج الحليو علي نياتو وعارف صحبة التهامي وحامد وعارف التهامي شقيان وجاري عشان يلقى حامد لدرجة إنو همٌل حواشتو فقال يطمٌنو بأنو حامد كويس وشغٌال ولأنو عارف التهامي داير لى حامد الخير ..
التهامي مرق من بيت الحليو وطوٌالي فات للضهبان العندو البكسي في بيتو قال ليهو
- جيتك لى مشوار دايرك تودٌيني الخرطوم قوماكا هسٌى دي ..
البلٌال شاف التهامي في الحلٌة ومشى للمين قال ليهو
- إستعد الليلة زولنا في الحلة ..

يتبع ...

*حكاية ريدة*
*الحلقة《20》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
الضابط يوم منصور جا وكلمو بى نيٌة البلال الناوي عليها وبالكلام القالو ليهو كلو قال لمنصور
- عملت العليك تب وما قصٌرت وكويس إنك جيت ورٌيتني لأنو البلٌال دا أنا ما ردٌتو كلو كلو ومن خلقتو وصرصير عيونو حسٌيت إنو ما فيهو خير لكن ما في دليل كدا أقدر أدينو بيهو حتى كلامك دا لو أنا جبتو وواجهتك بيهو إحتمال كبير ينكرو دا لو ما ضرٌاك بعدما تفوتوا مني ..
اليوم داك كان بعدما التهامي إتعهد إنو ما يصل اللمين وبعد جيٌة حاج الفقاد وحاج الحليو الضابط إستدعى اللمين أب تفٌة وقال ليهو
- البلٌال صاحبك قال ناوي يكتل التهامي عارف الكلام دا ولا ما عارفو؟
اللمين ما كان عارف وما عرف إلا من الضابط قال ليهو
- ما عارف والله إلا هسْي من كلامك لي دا ..
- جميل خلاص أنا داير منك خدمة ..
- طوٌالي والله وأمرك مقضي تب ..
- تراقب لي صاحبك دا زي ضلٌو والكلام دا لى صالحو هو عشان ما يرتكب ليهو جريمة يضيٌع بيها دنياهو وآخرتو ..
اللمين وافق وبقى طوٌالي يكلم الضابط أول بأول ..
________
مرقة منصور من الحلة خلٌت البلٌال نهائي ما يتوقع إنو منصور ممكن يكون كلٌم الضابط ومستحيل يتوقع يجي يوم واللمين يراقبو لأنو أكتر زول صاحبو وديمة مع بعض مما قاموا وبقول ليهو أي شي بدون خوف ..
________
الضهبان لمن جاهو التهامي لى مشوار الخرطوم إعتذر وقال ليهو
- علٌا بكره لأنو العربية فيها مشكلة ولازم أصلٌحا ..
التهامي فات بيتن وقال
"إمكن لى خير وإمكن ربنا منجٌينا من شي في الدرب"
نوى ينوم بدري ويقوم فجر ويفوت لى حامد ..
________
البلٌال جا للمين في بيتو قال ليهو
- أرح معاي لى حاج الفقاد ناخد لينا معاهو قعدة ونجي عشان نمرق بعدينك نمشي علي البهيمة داك نكتلو ..
- البلٌال عليك الله أعفيني من الكتل دا ..
- أعفيك كيف إنت مخٌك دا كابس ولا شنو حرٌم مافي زول يضبحو غيرك ..
- والله لو قلت ليك بمشي معاك أكون كضٌبت عليك وانت زاتك ما بخلٌيك تمش عليهو ..
- اللمين إنت ماك داير تعرٌس التاية؟
- التاية دربا قسى علي من يوم سبقني عليها الطاهر وحتى بعدما الطاهر مات واتقدمت ليها واهلا رضوا كنت عارف بتحصل حاجة تخلٌي العرس دا ما يتم وانا قنعت منها بعدين أبوها قال إنو شيخ العزيز قال ليهو البت دي فقر وشوم وانا هدا طرفي منها ..
- أبوها دا زول خرفان ساكت أرح نضبح التهامي المعولق دا وليك علي أعرٌسا ليك أنا دا ..
- البت شربتلها سم ودارت الموت عشان مي دايراني ..
- والله ما تفوت معاي ونكتلو سوا كان أكتلك زيٌو ..
- تكتلني أنا آ البلال؟
- والله أكتلك والجاري عليك ما يلحقك ..
- في زول بكتل أخوهو؟
- آأي في أنا القدٌامك دا وعشان ما تقول كلامي دا تهديد مني ليك ساي النورٌيك الماك عارفو ..
- تورٌيني شنو؟
- الطاهر ود الفقاد أنا الكتلتو وعلي الطلاق إن ما كتلت معاي التهامي ياني الكاتلك الليلة دي وقبٌالو كمان وانا تب الليلة ماني مفارقك إلا تمش معاي ..
اللمين دا من الصدمة لمن كرعيهو ما شالنٌو إتفرجخ تب في الواطه وختٌ إيديهو فى راسو وقال ليهو
- كتلتو كيفن آ السايب؟
- المهم كتلتو ما مهم كيفن وعلي الطلاق ما تقوم تمش معاي نكتل التهامي كان سكٌيني دي الليلة تاكلك
- بمش معاك والشكوى لي الله لكن يمين الله إيدي ما بمدٌها عليهو ..
- بس إنت أرح معاي أنا براي بنتهي منو ..
- سمح هسٌي إنت ورٌيتني كتلت الطاهر لشنو؟
- ورٌيتك عشان تعرف إني عادي ممكن أكتلك كان داير ..
- طيب لو أنا مشيت بلٌغت فيك؟
- أمش بلٌغ ساي الحاميك منو ودليلك شنو؟

- دليلي كلامك لي دا ..
- كلامي دا الشاهد عليهو منو هسٌي أنا لو مشيت بلٌغت فيك وقلت إنت الكتلت الطاهر وما عندي عليك دليل بضدقوني؟
- بحلف ..
- أنا زاتي بحلف ..
________
حامد بعدما مرق من الخرطوم فات لخلف الله صاحبو لأنو لمن أمو جاتو في الخرطوم ورٌتو بيهو وقالت ليهو
- صاحبك خلف الله قعد معانا كم يوم والله ود حلال وضكران علٌا جيتو الحلٌة من غير ما يورٌيك تاعباهو وقال أصلو ما بسامح نفسو علي غلطتو دي إنت ما تزعل منو عليك الله أمش ليهو راضيهو ..
سمع كلام أمو وفات ولمن خلف الله شافو قرٌب يجن من الفرحة حضنو وبكى والعجب حاج الصديق داك التقول قابل نبي الله الخدر قعد يعرض وما فاضل ليهو علٌا يزغرد وحتى هو بكى وناس الحلٌة كلهم إنكسروا فوقو وحامد شعر بأنو زول ليهو قيمة ودموع الفرحة الشافا في العيون أدٌتو إحساس عمرو ما حسٌ بيهو وشاف الناس ديل بقوا ليهو أكتر من أهلو وكلهم يقالدوا فوقو والناس ديل كلهم عرفوا من البوليس لمن جا كايسلو عندهم إنو مجرم وكاتل ليهو زول لكن كلهم ما صدٌقوا ولا فيهم زول نفر منو ولا فيهم زول ذكر ليهو الكتلة والكلام الإتقال فوقو ولأنو عاش مع الناس ديل بأخلاقو وطيبتو وسماحة طبعو عشان كدا كلهم رادوهو والزول كان فات أي فجٌة في العالم هو البفرض علي الناس إحترامو وهو البفرض عليهم نفسو بأخلاقو وأفعالو وبخلٌيهم غصبا عنهم يريدوهو والريدة ما بين راجل ومره وبس ولا بين بت وولد بس ولا بين أم وجناها وبس ..
الشي الما كان متوقعو حامد ولا عمل ليهو أي حساب إنو بعد أكتر من شهر ونص لسه كان في الحلة في بوليس راجيهو وأفراد البوليس الكان جوهو أربعة فاتوا منهم إتنين واللتنين التانين قعدوا ليهم أسبوع واحد بس وفاتوا والضابط بدٌلن بى إتنين تانين دخلوا الحلٌة كحواتة شغٌالين في البحر وهم بوليس وراجين جيٌة حامد
وتم القبض علي حامد ..

يتبع ...

*حكاية ريدة*
*الحلقة《21》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
بعدما البوليس قبض على حامد طوٌالي اتحركوا بيهو ووصلوا المركز المغيرب والضابط كان لسه قاعد قال ليهم
- ودٌوهو السجن ..
ولا كلمة ما قالا ليهو لمن حامد زاتو استغرب في ضابط تاني قال ليهو
- دا مش الزول الإنت ماسك قضيتو حقت الضبح وكايس ليهو أكتر من سنة؟
- ياهو زاتو ..
- طيب مالك ما حقٌقت معاهو ولا سألتو ولا نضمت معاهو؟
- حا يمشى وين يعني وهسٌي أنا زاتي ما فاضي ليهو ..
- لكن من خلقتو ساي الزول دا ما شكلو شكل مجرم ..
- هو المجرم عندو شكل محدٌد ما ياما مروا علينا مجرمين أشكال والوان ..
- صاح بس الزول لمن يكون كاتل ويهرب وينقبض بتشوفو زي الما نصيح غايتو ما عارف كيف لكن الزول دا ما أظنو كاتل ..
- كلو بنعرف بعدما نحقٌق معاهو بس أنا ما داير ناس الحلة يعرفوا إننا قبضناهو ..
________
خلف الله وحاج الصديق أجٌروا ليهم عربية وجوا بيها ورا حامد وناوين ينزٌلوا ليهو أكبر محامي دخلوا للضابط ورٌوهو بالمحامي قال ليهم
- أرجعوا حلٌتكم وأوعوا تمشوا الحلٌة الورٌانية لأني ما داير زول يعرفنا إننا مسكنا حامد والمحامي ملحوق ..
خلف الله في الأول كان ناوي يمشي بيت ناس حامد يقعد فوقو كم يوم لكن بعد كلام الضابط ليهو رجع الحلٌة طوالي هو وحاج الصديق وفي نفس العربية الجابتن ..
________
الليل دخل تب والوكت داك الدنيا عقاب شهر والفجٌة ضلٌمة لا قمرة ولا الحلة الورٌانية فيها كهرباء والناس كلهم متكاملين البيوت والجو سمح الهمبريب يهبهب في الملايات وشجر النيم يتراقص والبهايم في الزرايب والغنيمات إنصقعن في جرٌتن والجداد متعنقل فوق الرواكيب والحيط وريحة لمبات الجاز تلخم والحلٌة صنت وسكتت تم وزول ساكت بتحاوم بره بيتو مافي رادي حاج بانقا سيد الدكان الكان بلعلع يوماتي وبى طول حسٌو عشان أضانو تقيلة الليلة قفلو ومافي علٌا صوت كلاب ينبحن مرة مرة ولا صرخي شافع يتباكى جمب أمو وبرضو مرة مرة
سكوت وسكون رهيب تقول الحلة دي زي الراجية وخايفة وموعودة ليها بى شيتن يخلٌيها كلها تجوط والبلٌال حارس اللمين أب تفة شبر ما فاتو ومستني بس متين الليل دا يتناصص عشان يسوقو ويقوم علي الفي راسو
اللمين قال للبلٌال
- الحلٌة دي مالا صنت كدا؟
- أحسن زاتو والناس بكونوا ناموا ..
- ينوموا من هسٌي؟
- إنت آ عولاق ماك عارف الدرت دخل وقطع العيش بدور البدار؟
- ونحن ما عندنا عيش بدورلو قطع؟
- نحن عندنا قطع راس وضبح شخ ..
________
التهامي بعدما اتعشى مرق عنقريبو ورقد نام وهو زعلان من المهدي ود بت الكاشف لمن داير يطرشق وحلف بى جملة الإيمان إلا ما يلاقيهو أصلو ما يخلٌيهو عشان كضبو عليهو وحليفتو الفي الفاضي ..
الليل إتناصص واللمين كان بتشهٌق ساي قدٌام التهامي وقدر ما فكٌر ليهو في عذر كدا يقولو ليهو عشان يتملٌص منو البلٌال ما ادٌاهو طريقة و اللمين عمل فوقا نايم وبقى يشخر ليهو شخيرات خشم ساكت ما هن هيلات زولا نايم والبلٌال يعاين ليهو ويتكشٌم ولمن ضمن الحلٌة چت هجست والخلايق في النوم إندفست أدٌاهو لكيدات بى عكيكز في إيدو وقال ليهو
- قوم آ معولق قوم تقوم بى كفنك وتسابق الدفنك ..
- أرح لكن إن بقيت ملزم تب وكاتلنو كاتلنو الندٌيك الراي السمح ما نمشيلوا شاقٌين الحلة راسنا عديل ونختٌر كدي علي الميجر ونجيهو من تال الحواشات عشان إن جابو عبدالحليم القصٌاص ما يجيب الناس علينا جاي
- إنت من زمن عبدالحليم قصٌاص الدروب يا حليلو بقى بشوف كشح ..
- بشوف كشح شنو والله درب النملة يقصٌو أسعلني منو أنا الجبتو يقص درب الزول الكتل الطاهر ..

- جبتو إنت يقص؟
- آأي جبتو أنا وانتو الزمن داك تبكوا كلكم ما جايبين خبر بس درب الزول الكتلو مو دربك آ التهامي ولمن قصٌاهو دخل بينا جوٌه بيت الحليو والكتل الطاهر حامد مو إنت يا البلٌال وانا بحلف إنت ما كتلتو ومافي زول كتلو غير حامد ود الحليو واسمعا مني أنا مصيرو ينقبض والأيام بتوريك كلامي دا صاح ولا لا ..
- مافي زول كتل الطاهر غيري أنا وهسٌي الكلام دا سيبو ما وكتو أرح نريٌح الخازوق دا من الدنيا دي ونسلٌم روحو لباريها خلاس كفاهو عاش كتير وعيشتو عدٌاها كلها زراعة وقنع من الزراعة وعدٌاها كواسة فوق درب ود الحليو وانا مافي شيتن موجعني ومخلٌيني داير أكتلو علٌا كواستو لى ود الحليو دي ..
- قوم أرح والله أدخلك بيتو بى درب يحيٌر الما بتحيٌر والتهامي دا مانع ومتل الدحش نغمتو فرد غمتة ونركبو تبعٌج بالسكٌكن وفرفير ما نخلٌيهو يفرفر لامن يموت لأنو لو ما عملنا كدي إن قام علينا اللتنين أنا وانت بضايرنا وبشهٌينا العافية ..
- لا لا لومك علي كان فرفر لأني ناوي أغمتو بالمخدة واركٌب سكيني دي فى حلقو واطبٌو من إيديهو الإتنين وانت عليك بى كرعيهو ما تخلٌيهو يرافس وسكينك بشيلا أنا معاي وبعدما أركٌب سكيني دي في رقبتو
ما بمرقا وبطعنو بى سكينك في نص قلبو ..
- يعني أنا ما أطعنو؟
- إنت بس عليك تطب لي الكرعين هيلاتو والباقي خلٌيهو علي تب ..

يتبع ...

*حكاية ريدة*
*الحلقة《22》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
لسه البلال واللمين قاعدين في البيت ما مرقوا واللمين بطنو طامٌة وما داير يمشي البلال قال ليهو
- ما ورٌيتك آ اللمين ..
- تورٌيني شنو تاني آ البلال إنت الورٌيتني ليهو الليلة دا شوية؟
- وريتك شنو أنا هسٌي آ العشاء اب لبن؟
- ياخي مصاقرني من الشمش دي حيٌة وواقف لي في نفسي كاتمو لى وبقيت لي زي اليوم الكتل البقرة الحمرا حقت حبوبتي السرورة ودايرني أمرق معاك انصاص الليالي نسوٌيلنا مصيبة تضيٌعنا دنيا وآخرة وبرضو تقول لي ما ورٌيتك داير تورٌيني شنو أكتر من كدي؟
- خلاس آ شيخ الهويٌن والله البسمعك يقول فالقاك الصلاة وبتخاف الله ومن التبروقة ما قاعد تقوم ..
- والله انا شيخ الهويٌن زاتو ما ساعل فوقو لا هو لا غيرو ..
- لا خلاس والله إنت الله كلو كلو ما بتخاف منو آ اللمين ..
- مالي ما بخاف الله شايف علي شنو أنا الما بخاف الله ولا إنت الداير تكتل ليك زول؟
- ماني أول زول يسوٌي كدي خلٌيهو الموضوع دا هسٌي ما وكتو كدى قوماكا أرح ننتهي من التهامي الكلب دا والنضمي ملحوق وما تقول الزول دا أنا ناوي أكتلو ساي ..
- أها سببك عليهو شنو كان عشان كلامو لي في عرسي للتاية بت خير السيد الكلام دا ما بخصٌك وما قالو ليك إنت ..
- أنا ما داير أكتلو فوق دي ..
- سمح ورٌيني سبب كدي يخلٌيك تكتلو؟
- شاكٌي فوقو إنو عرفني أنا الكتلت الطاهر ..
- شاكٌي فوقو وعرفك كيف؟
- لاقاني قبٌال فترة جمب دكان بانقا حدر لي حدرة حارة وقال لي أصبر آ البلٌال جاييك يوم بس خلٌيني ألقى حامد وانا قلت ليهو حبابو اليوم دا وهو حامد بعد كتلتو للطاهر تاني بظهر قال لي بظهر والله وحامد ما كتل الطاهر وانا عارف الكتلو منو وقبٌال ما يكمٌل كلامو معاي فات مني
- أها دليلو شنو وانت الطاهر كتلتو كيف؟
- ما عارف ليهو دليل وانا الطاهر لمن كتلتو اليوم داك جيت لقيتو راقد في الديوان وحلفت عليهو علٌا يمشي يتعشٌى معاي في بيتي وفعلا مشى معاي وكان دايرني أناديك إنت برضو لكن أنا قلت ليهو اللمين مافي أها بعد العشا سقيتو سم واتونست معاهو لمن السم دا مشى فوق جسمو وبطنو قبضتو مسك فوقا بى إيديهو اللتنين وبدا يتمرصع ويتمردغ ومتألم لمن عرق وجفٌ وحيلو مات وجسمو بقى بارد بس التلجة ودٌيتو الديوان رقٌدتو في عنقريبو وقال لي بطني مولٌعة نار وحيلي مهدود تب وداير أكورك وماني قادر وخايف أكورك أصحٌي ناس ابوي أنا قلت ليهو عضٌي المخدة بس وعوجة ما بتجيك ولمن شلتها وقربتها من خشمو عشان يعضٌيها غمتو بيها غمتة حارة واتكومت ليهو فوق صدرو وهو يرفس لمن نفسو انكتم ومات وانا طوٌالي حار حار طلعت سكيني وضبحتو عشان ما في زول يعرف إنو مات بالسم والخنقة ..
اللمين يسمع في البلال ومنطٌط عيونو ولا كلمة ما قالا لمن البلٌال قال ليهو
- قوم أرح الليل قرٌب يكمل وواطتنا دي بتصبح كان بارينا النضمي ..
اللمين مرق معاهو وما ياهو من الكلام السمعو وساكت ساي وكرعيهو ما شايلاتنو وبعد مسافة حتين بدأ يلملم في روحو ويتماسك وقال للبلٌال
- الني للنار آ صرار عينو أرح عليهو والكع خلٌينا ننتهي منو بسراع وفي اللول نمرق بره الحلة ونجيها داخلين من تال الترعة ..
- ما بنصل لي عند الميجر؟
- لا لا الميجر بعيد علٌا نشد ليهو الحمير وكان شدٌيناهن إمكن زول يفكر لينا ويشوفنا أحسن نمرق نتدٌبى ساكت لامن نصل الترعة القريبة دي ونجي بهناك منها بى طرف الحلة ونختر كدي علي زريبة ناس حيص بيص ..
- إنت الدرب عليك والكتل خلٌيهو علي ..
- الدرب والكتل اللتنين علي أنا والله الليلة أكتلو كتلة الجاري عليهو ما يلحقو لمن إنت زاتك تحتار ..
- مالك بقيت نشيط كدي علي كتلتو وقبيل مزرقن وتهدٌي فيني؟

- أنا ما عندي صاحب في الحلٌة دي غيرك إنت والطاهر والطاهر فات يا حليلو وما فاضل لي علٌا إنت والشي البفوٌتك مني لازماً يفوت قبٌالك ..
مرقوا العوٌلق ديل يتدٌبوا ويتلفتوا لمن وصلوا الترعة والحلٌة جت نايمة وزول ساكت جاب خبرن ولا شافن مافي ..
________
منصور البوليس اليوم داك وبعد صلاة العشا هفٌت ليهو يجي الحلٌة الفوقانية وفعلا جا قعد مع النجح ودي مي أول مرة يجيهو وحكمة الله اللتنين بقوا ناس كويسين ولمتن وسهرتن الكانت عرقيها مدوٌر بقت قال الله وقال الرسول وكلما يتذكروا الترمٌد والضياع والرمتلة وعدم المسعولية الكانوا فوقا يقعدوا بستغفروا ودرب الله ما في زيٌو والزول مهما اتملا ذنوب ما يطيٌنا زيادة ويتابع إبليس ويقول الله ما بغفر لي لأنو باب التوبة ما انقفل ولا بنقفل واحتمال الذنوب كلها تنقلب حسنات برحمة الله ..
الجاب منصور الحلٌة الفوقانية المرة دي ما زيارة النجح والونسة معاهو منصور سمع بالتهامي جا الحلٌة وخابر نية صرٌار عينو وخافو يكتل التهامي وجا بدور يمنعو بأي طريقة ولمن كلٌم النجح قال ليهو
- زماني الفات كلو راخي أضاني أتصنٌت وانقل في الكلام وافتن بين الناس وكلما تقع شكلة ولا مصيبة بفرح هسٌي خلٌي الموضوع دا علي تب بورٌيك شى عمرك ما سمعت بيهو ولا شفتو ..
النجح خلٌى منصور في البيت وجا يتلبٌد براحة قعد يتصنٌت على العواليق ديلك سمع كلام البلٌال واللمين أب تفة كلو وقبٌال ما يمرقوا إنزغم وفات لى منصور قال ليهو الكلام هيلن چت ومنصور قال ليهو
- المفروض نحن نقوم في ليلنا دا ونمش نكلٌم الضابط لكن لمن نصلو بنجي نلقاهم كتلو التهامي وما في علٌا حل واحد بس أنا وانت نتقسم واحد فينا يمشي للضابط بى بكسي الضهبان والتاني يحرس التهامي ..
- خلاس أنا بحرس التهامي ..
- لا لا إنت الناس ديل ما بتقدر عليهم خلٌيهم علي إنت أمش صحٌي الضهبان وفوتوا للضابط وانا بمشي للتهامي راسي عديل أصحٌيهو واستنٌاهم معاهو ..
النجح فات صحٌى الضهبان وركب معاهو وفاتوا والبلٌال واللمين شافوا العربية مرقت من الحلة البلٌال قال
- الضهبان دا مالو كاتح كدي وماشي وين آ اللمين؟
- بكون في زول جاتو قبضة ومودٌيهو الإسبتالية ..
- ونحن نرجع ولا كيف؟
- البرجٌعنا شنو نحن مالنا ومالو مافي زول أصلا فاكر لينا ..
- أنا باقي لي أحسن نرجع ونخلٌي التهامي لى مرة تانية ..
- إنت آ صرٌار عينو بتستهبل من الصباح أحنٌس فوقك ما نكتلو وهسٌي لمن مرقنالو بتدورنا نرجع؟
- خايف زول يشوفنا ..
- كان سمعت كلامي ومشيت وراي الحبٌة ما بتجينا إنت كتلت الطاهر براك بغلبك العفٌين دا وانا معاك ..
- علا بس.......
- هوي آ البلال لا تعلعل لي ولا تبسبس لي أرح ساكت والرهيفة التنقد إن شاء كلو كلو ما تتلتق أنا الليلة كان ما شمٌيت ريحة الدم ما برتاح ..
- والله يا اب تفة لقيتك كعب وصعب
- وكت الجد بس كان ختٌيت لي شيتن في راسي علٌا أتمٌو ..
منصور ما داير يدق باب ناس التهامي ويصحٌي الناس تلٌب بالحيطة براحة زي الكديس والتهامي نومو خفيف صحى في الضلٌمة ديك وما فارز قايلو حرامي جاي يسرق عندو عكاز سمح تحت لحافو مد إيدو براحة ومسكو تب ومنصور جا عليهو يتدٌبى ولمن بقى قريب التهامي نفض الملاية الكان متغطيبا وسحب العكاز داير يلفخو بيهو منصور عرفو بلفخو طوٌالى رفع إيديهو وقال ليهو
- أنا منصور آ زول أقيف ..
التهامي إتناول البطارية وضوٌاها ليهو في وشٌو
- منصور الجابك شنو يا زول؟
حكى ليهو الكلام كلو من طق طق
للسلام عليكم التهامي قال ليهو
- هم وين هسٌي المطاليق ديل؟
- ختروا كدي علي الترعة وقالوا بجوا بى عند زريبة ناس حيص بيص ..
- أنا ماشي عليهم والله الليلة اللتنين سكٌيني دي كان تاكلن ..
- آنت آ زول عوير أنا ما جيتك لي دي أنا رسٌلت النجح فات بى بكسي الضهبان يبلٌغ البوليس خلٌينا نقبضن متلبٌسين وانا وانت نتلبٌد ونخت في عنقريبك دا مخدات ولمن يخشوا هنا نقوم عليهم ..
- ولا بنتظر دقيقة ..
- لا تنتظر والله أسمع كلامي دا أنا عمري دا كلو شغٌال بوليس وكلامي دا مافي أحسن منو ..
بعد تعب شديد ونضمي كتير منصور قدر يقنع التهامي جابوا المخدات ختٌوهن في العنقريب وغطوهن بالملاية وبقٌوهن زي الفيهو زول نايم وقعدوا جوٌه الديوان منتظرين ..
________
النجح وصل المركز وما لقى الضابط الماسك قضية الطاهر والضابط الكان مناوب كلٌف دورية تمشي معاهم ..

يتبع ...

*حكاية ريدة*
*الحلقة《23》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏
الصبح قرٌب يأذن لا البلٌال ظهر ولا اللمين أب تفة ومنصور والتهامي لابدين جوٌه أوضة الديوان وقانصين ليهم ومستننهم بس متين يجوهم
- إنت آ منصور ناسك ديل إتأخروا؟
- إتأخروا والله لكن أحسن زاتو والله لا جابن ..
- مالك خايف ولا شنو؟
- ما حكاية خايف بس عدم مجيهن مو خير؟
- خير لكن هم شر وحباب الشر تب ..
- عشان كدا قلت ليك عدم مجيهن خير وانت في ديل ولا في النجح الفات المركز يبلٌغ ولسه ما ظهر المفروض يكون جا راجع من قبيل ..
- أنا ما بستناهم أكتر من كدا مارق أفتٌش عليهم أدٌونا السهر وانا باكر مارق في الخرطوم ..
- ما تستعجل ودي أصلا الكايسنلها هم إنهم يلمٌوا فيك بره بيتكن ..
- والله اللتنين ما ساعل فيهم ..
- خابرك ماك ساعل فيهم ولاك خايف منهم لكن نحن دايرين ليهم القبضة هنا وفي نص البيت خلٌينا نكمٌل الخططنا ليهو دا الله يرضى عليك
والله أنا سمعت كلامك وماني مقتنعبو ومتل العوٌلق ديل مفروض أمرق ليهم قبيل واركبن لفخي بى عكازي دا لمن الله يغفر ليهم ..
- ها زول ها متل ديل ولا توسٌخ فيهم إيدك ..
________
النجح والبوليس دخلوا الحلة بالجهة العلي الحلٌة الورٌانية عشان ما يجوا بى عند الترعة وديلك يشوفوهن دسٌوا عربية الشرطة جوٌه حوش الضهبان ولبدوا بعيد يراقبوا في بيت التهامي والنجح جا براحة يتلبٌد وعرف إنهم لسه ما جوا ولبد مع البوليس ..

البلٌال واللمين وصلوا الترعة والبلٌال قعد في الواطه واتفرجخ تب فوق مركوبو وقال للمين
- أقعد ياخ خلٌينا ننجم شوية ونتفاكر
- نتفاكر في شنو ياخ قوم أرح نقرض العولاق دا وننتهي منو قبٌال الواطه دي تصبح ..
- تصبح وين آ زول لسة بدري يا دوب الساعة واحدة ..
- والله هسٌى دي تصبح ونمرق ساي ويبقى علينا سهر ووجع عوينات في الفاضي ..
- والله إنت حيٌرتني يا اللمين بى تلهٌفك ونشاطك علي الكتل كدا ذكرتني حبوبتي اللقية بت هبهانة الله يرحما ويغفر ليها ..
- دي مالا كمان وذكٌرتك ليها بشنو؟
- بى شفقتك دي زمان الله يرحما كانت قاعدة تحجٌينا وقالت لي حجوة لى يوم الليلة ما نسيتا قالت لى في واحد عريبي كدي كتل ود عمو بى سبب طين هيل ود عمو ومافي زول شافو والزول دا من يومو الكتل تاني ما ضاق عافية لأنو كاتل الروح ببقى زي المجنون ونوم ما بنوم وكان نام ليلو كلو تلقاهو يتخازز ويصحى مخلوع ..
- هسٌي يعني إنت دايرنا نخلٌي التهامي ونرجع ولا معناتو شنو كلامك دا الكلام دا أنا من صغير عارفو وقايلو صاح لكن طلع كضب ساي وانا من يوم كتلت الطاهر عايش عادي واضحك لآخر سن ولقيت إنو حبوباتنا ديل حجاهن تربية ساى وبدخٌلن الكلام للشفٌع بى طريقة سمحة في راسن عشان ما يكتلوا زول ولا يستهونوا الكتل وكمان قالت كاتل الروح ما بروح وبعدما شم ريحة الدم تاني ما بقيف الله يرحما كلاما طلع كلو كضب واسعل مجرٌب ..
- تعال هنا إنت شنو شابكني كل مرة كتلت الطاهر كتلت الطاهر إنت قايل كضبك دا بمش فيني؟
- يعني أنا كضٌاب؟
- والله كضابا كضب لا كتلتو ولاك عارف الكتلو زاتو منو ..
- أها الكتلو منو؟
- كتلو حامد ود الحليو ..
- النصيحة أنا ما كتلتو لكن عارف الكتلو منو ..
- أها منو؟
- خلٌيهو هسٌي لكن بورٌيك ليهو والله أنا كنت قايل كضبتي القبيل دى مشت فيك عاين لعمي الفقاد دا وطيبتو واتذكر الطاهر وضحكو معانا وونستو وطيبتو ورجالتو عليك الله زولا بنكتل ولو أنا فعلا كتلتو بجي بيتن تاني واملى عيني في عمي الفقاد ياخي عمي دا من يوم إنكتل الطاهر صحتو ماشٌه نازلة وواجعو بلحيل علٌا كاتم الوجع في حشاهو ساكت وانا لمن أعاين ليهو بنشقٌ بكا

- والله الطاهر فقد أبكي آ اللمين والله أنا يومي ببكي عليهو يا حليلو ياخ ..
اللمين بكى وبقى يتنهٌف وراسو ما قادر يرفعو والبلٌال بقى يفتٌش فى الطريقة البسكٌتو بيها ولمن شافو ماشي زايد قال ليهو
- كتلت الطاهر لشنو آ اللمين أخوي؟
والكلمة دي ما قالا ساي عشان يغيٌر بيها الموضوع ويمرق بيها اللمين من البسوٌي فوقو دا فكرة وجاتو صدفة رماها ليهو يا صدقت وجابت يا كضبت وخابت واللمين بعدما أخد بكيتو قال للبلٌال
- كتلتو عشان بريد التاية والله جد أنا بريد التاية دي ريدة قيس لي ليلى ما رادا ليها ..
- إنت جادٌي؟
- والله صاح وكلام حبوبتك بت هبهانة يمين كلو حاصل لي ومن يومي الكتلتو أنا ما ضقت عافية ولا عيوني ديل ضاقن طعم النوم وكل يوم بحلم بالطاهر يجيني بى ضحكتو ديك ويقول لي اللمين أخوي قوم وانا أقوم بس المجنون ..
- دا كلام شنو آ اللمين؟
- والله جد ويوم الطاهر قال داير التاية أنا اليوم داك ماسك لي مويه في الحواشة وجيت لقيت الناس بباركوا ليهو ولمن عرفتو عقد عليها والله الدنيا دي ضلٌمت في وشٌي ..
- نحن مشينا ناس خطوبة ساكت لكن أبوها قال عقد طوٌالى والطاهر أبى يورٌيك بالقصد قال لي نعملا ليهو مفاجأة ..
- أنا لمن حامد ود الحليو جا الديوان وقال كلامو داك حمدت الله والشيطان قال لي دي فرصتك أكتلو والمتهم في كتلتو بكون حامد والحلٌة كلها بتشهد عليهو ..
- أنا والله كضبك دا ما بمشي فيني يعني داير تتسدٌى مش كدا؟
- يا زول يمين بالله أنا الكتلتو واليوم داك بعدما مشينا منو أنا وانت أنا تانى جيتو راجع لقيتو داير ينوم ضحك وقال لي كويس الجيت راجع أنا ما جاني نوم وانا قلت ليهو أنا حالف أخنقك لمن تزبٌد عشان زعلان منك لأنك ما ورٌيتني إنك داير التاية عشان أنا عرفت آخر زول وهو ضحك وقال لي أخنق ساكت وفشش فوقي زعلك كلو وانا كنت شايل لى حبل معاي خنقتو بيهو لمن مات وضبحتو بالسكين بعدما مات ..
- لا حول ولا قوة إلا بالله والله آخر زول اتوقعو يعمل كدا إنت ..
- والما عارفو إنت التاية من يوم ما شربت الصبغة وقالت مي دايراني أنا حلفت أكتلا ومشيت بيتن زي الوكت دا أكتر من عشرة مرات عشان أضبحا ما لقيت فيها طريقة وحالف يمين كاتلا كاتلا ..
- والله فعلا كلام حبوبتي صاح البشم ريحة الدم ويكتل تاني ما بقيف وببقى ليهو الكتل عادي ..
- ببقى عادي لأنو آخرتو ضاعت وعارف مصيرو بقى جهنم عشان كدا ممكن يكتل تاني وتالت ورابع ..
- باب التوبة فاتح ..
- فاتح للما كتٌلو زول خلاس نرجع آ اللمين وباكر من الصباح نمشي المركز تسلٌم نفسك ونمشي قبلو لى عمنا الفقاد نعفيهو منك وهو لا بدور منك دية ولا بطالب بى دم واستغفر ربك وامسك درب الله صاح إحتمال يرضى عنك ويسامحك ..
- الله ما بسامحني وانا ما بسلٌم نفسي ولازم أكتل التاية ..
- تاني كتل ما قلت ليك توب واستغفر؟
- في إتنين لازم يموتوا ..
- التاية ومنو؟
- التاية وانت يا البلٌال ..
- وانا مالي معاك؟
- إنت عرفت سرٌي والسر دا علٌا يموت الزول العارفو ..
وطوٌالى طعن البلال ..

يتبع ...

*حكاية ريدة*
*الحلقة《24》والأخيرة*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏
الطعنة جات للبلٌال في بطنو وصرخ واللمين بقى بس التور الهايج وشٌو زاتو اتغيٌر مخلوع ومنطٌط عيونو زي الزول الشاف ليهو جان ولا شاف ليهو شيتن ما معروف شنو بقى ما نصيح تب وما ياهو اللمين بس الكويس فد طعنة ما تنٌاها البلٌال قال ليهو
- كتلتني آ اللمين أخوي ويتٌمت أولادي منعول أبو الريدة البتخلٌي الزول يكتل خيٌاتو ..
واللمين منبهط ومدحٌش غالبو البسوٌيهو البلٌال قال ليهو
- ودٌيني البيت آ اللمين النموت وسط أهلي واولادي ما تخلٌيني في الخلا دا والبقى بقى أحسن نركزلو ..
اللمين سلٌ السكين من بطن البلٌال والدم يبقبق وجرى علي جهة الميجر والبلٌال يسيٌلو
- ما تفوتني كدا في الخلا دا أنا أخوك آ اللمين ..
وداك ولا قال ليهو بتقول في شنو جرى جري شين والبلٌال فات علي الحلٌة وهو يكورك
- يابو مروووٌة ..
بى طول حسٌو لامن وصل زريبة ناس حيص بيص ومع صنٌة الحلٌة ناس الفريق كلهم سمعوهو وصوتو وصل لى عند التهامي ومنصور مرقوا جارين ومنصور يقول
- يمين لو ما خايف الكضب دا صوت البلٌال صرٌار عينو ..
البلٌال الفيهو كملت تب وراسو داش والكلاب مسيٌراتنو سيرة قعد في طرف الزريبة وجسمو برد تلجة وكرعيهو ما شايلاتنو بقى يتشهد ويقول
- اللمين كتلني لا إله إلا الله اللمين كتلني آ ناس ..
أفراد البوليس الكانوا لابدين ومعاهم النجح وصلوهو قبٌال منصور والتهامي خمٌوهو وجلابيتو حمرا والضهبان جاب البكسي وجروا بيهو على الحكيم ..
البوليس مشى علي الترعة ومعاهم النجح ومنصور والتهامي ركبوا مع الضهبان وركب معاهم واحد من البوليس والبلٌال ما سكت من تشهٌدو وكتلني اللمين والتهامي كان سادٌي فجة الطعنة عشان ما ينزف كتير وقال للبلٌال
- ما تنضم آ البلال أخوي عوجة ما بتجيك هسٌي دي بنصل الحكيم وبنسعفك ..
- أعفى لي آ التهامي أخوي كنا مارقين نكتلك وهسٌي إنت جاري بي تسعفني ..
- عافي ليك آ بو الرجال بس ما تنضم قرٌبنا نصل الحكيم ..
- دي ما ظنيتني مارق منها أبقى عشرة على الجنٌوي كان أنا متٌ وعمي الفقاد ما تفوتو أبقى ليهو زي ولدو الطاهر ..
- قلت ليك قرٌبنا نصل ما تنضم النضمي بتعبك ساي ..
________
اللمين جرى شاقٌي الحواشات وديل في قفاهو يكوسولو وما لمٌوا فوقو نهائي والدنيا ضلام ..
________
البلٌال وصٌلوهو الأسبتالية مع مرقان الروح وأسعفك أسعفك لحقوهو بعدما تعب بس يومو ما تم والتهامي ومنصور يشيلوا ويدعوا في الله يلطف علي البلٌال وما يموت وبعد مسافة مرقوهو من العملية ورقٌدوهو في العنبر وادٌوهو حقنة نوٌمتو وبعدا بقى شديد ولضيض ..
________
اللمين فتر من الجري لقالو أبعشرين في الحواشات إنقشط فوقو وديلك تلاتة عساكر والنجح الرابع كل واحد مشى يكوس علي اتجاه وواحد فيهم لمٌ فوقو مافي ..
________
ناس الحلٌة كلهم في ليلن داك عرفو الخبر والحلٌة كلها مرقت وفيهم الجرى يكوس اللمين مع البوليس والباقين مشوا علي بيت البلٌال مستنين جيٌة بكسي الضهبان يا بى جنازتو يا بى خبرا يفرح ..
________
الشمش طلعت واللمين إنقبض والبوليس لفخوهو ودقٌوهو لمن الله غفر ليهو ورفعوهو في عربيتن وودٌوهو المركز ملكبش ووشٌو مورٌم ..
________
البلٌال فتٌح وقال
- داير التهامي بس ..
لمن جاهو بقى يبكي تاني وقال ليهو - علٌا تعفى لي أنا أمس الشيطان لعب بي وسقت معاي اللمين بالرجالة وغصبا عنو عشان نجيك في البيت ونكتلك ولمن جا وكت الجد والوكت المفروض نجيك فيهو الله هداني بقيت أكسٌل في اللمين عشان نرجع ونضمنا كتير لمن اللمين إعترف لي بى كتلتو للطاهر وطعنٌي عشان مافي زول يعرف وناوي يكتل التاية بت خير السيد اللمين بقى ما ياهو اللمين البعرفو داك ..