#وتر حساس#
(3)
بقلم : غزل وليد♥

وتبقى الذكريات صور رمادية
نتصفحها كلما زارنا الحنين للغائبين
ذكريات صور بلا... صوت
واشتياق بلا رجعة ...ودموع تائهة وحيدة
نخفي خلفها كلمات حزينة
ثم ماذا ...
غائب ولكنه يقف في منتصف ...كل أشيائي 🖤🖤

أثناء م كنت بكتب في خربشاتي حسيت إنو في زول وراي ـ لما اتلفتة لقيتو كنان ...
لولو : طبعا خوفتني ..
كنان : شايفك قااعدة مستكينة عشان كدة كنت ناوي اخلعك لمن تنطي بس حسيتي بوجودي ههههه ...
لولو : قلبي براهو رهيف أقل حاجة بتخلعني كمان عايز تزيدها علي ...
كنان : اصلا من زمان خوافة بعرفك هههه... اها بتعملي في شنو ..
لولو : امممم كنت بكتب ..
كنان : ممكن تسمعيني شوية ...
لولو : حااضر ...
وبديت اقرا ليهو جزء من الكتابات الحلوة الكنت كاتباها
كنت بلقيها بأسلوب شعري ظريف بخليك تسترخي وانت بتسمع فيهاا ....
كنان : يااااه رهاابة شديدة بالجد مبدعة جدا ـ موهبتك كل يوم ماشة تتطور ي لولو ...
لولو : شكرا من ذوقك ..
كنان : عندي ليك اقتراح رايك شنو تشاركي في المسابقات الشبابية تبع الكتاب والشعراء ـ انا متاكد انك حتبهريهم ...
لولو : لا م للدرجة دي ـ كتاباتي عادية شديد ...
كنان : ابدا يالولو ـ كتاباتك حلوة شديد ـ وحتى طريقة سردك ليها رائعة ـ لولو خليكِ واثقة في روحك واياكِ تستخفي بمهاراتك ومقدراتك...
لولو : بحاول ان شاء الله ...
اثناء م كنا بنحكي كنان تلفونو اتصل ـ اول م شاف اسم المتصل بقى ببتسم ...
كنان : امممم لولو انا عندي اتصال مهم ح ارد عليه ...
لولو : تمام اتفضل...
بعدها نزل من السطوح ـ لما اكون عايزة اكتب وكدة بمشي السطوح عشان بحسو هاادي وبقدر اكتب براحتي ـ طبعا جاني فضول اعرف دة منو الاتصل عليه دة وليه انبسط كدة لما شاف الاسم ..
بعدها قمتة خشيت جوا لقيت رزة بتراجع في دورسها ..
رزة : كنت غاطسة وين ي بت ...
لولو : كنت فوق في السطوح ...
رزة : طبعا م وريتك في شمار كدة حايم تحت تحت ...
لولو : احكي حمستيني في شنو ...
رزة : شكلو رنيم جاها عريس وناوي يتقدم ليها في اليومين الجايات دي..
لولو : ي شيييخة م تقوليها ـ وعرفتي كييف ..
رزة : اششش وطي صوتك ـ قبيل سمعتة ماما وبابا بتكلمو ـ بابا قال لماما انو عمار ود عمو عاصم قال عايز يتزوج رنيم ـ رأيها شنو في الموضوع ـ وماما قالت ليهو انو انو عمار زول كويس ومسؤول وماعندها اي مشكلة ـ دة السمعتو غيتو بس الباقي م قدرتة اسمعو ...
لولو : دة خبرر حلووو ـ اخيييرااا حيكون عندنا عرس في البيت حماس من اسي ...
رزة : اووعك تتكلمي اعملي غمرانة خالص وم تجيبي سيرة لزول الا بعد يكلمونا ...
لولو : اكيد ي بت مستحيل اتكلم ....
......
بعد اسبوع عمي علي كلمنا بموضوع عرسها ل رنيم وانو ود عمها اتقدم ليها وكدة ـ طبعا رنيم تشيل وتتكشم ساي حسيت انو اصلا مربطين من زمان ـ لانو كنت بشوفها بتخلط وكدة بس م كنت عارفة دة منو البتتكلم معاه ... ماما قالت لينا احتمال الجمعة الجاية دي يجو يتقدمو رسمي ومنها يحددو مواعيد العرس طوالي.........
........

روضة : خلود ي بت اليوم اتأخرتي كدة مالك....
خلود: المواصلات ي أمي ـ زحمة شديدة اليوم ..
روضة : عذرك الواحدك دة م عندك غيرو ـ كل م اسالك اتاخرتي وين او ليه تقولي لي المواصلات المواصلات ـ لكن والله ي خلود لو عرفتك عملتي ليك دريبات بكسر رقبتك دي فاهمة...
خلود: دريبات شنو ي امي م مصدقاني يعني ـ انت عارفة موقف مواصلات الجامعة بكون ملان كيف ...
روضة : المهم فتحي عيونك دي كوييس ـ والجامعة دي اعملي حسابك فيها ـ وختي في بالك انو احنا رسلناك عشان تقري وترفعي راسنا ...
خلود : اكيد ي امي عارفة الحاجة دي ...
روضة : طيب اسي قومي اكلي ليك حاجة ...
خلود : م جعانة بس مرهقة عايزة ارتاح شوية ..
خشيت غرفتي وقفلتة الباب علي وبقيت ببكي وبتحسبن على روحي ـ وللان م قادرة اصدق الحصل معاي...
شلتة تلفوني واتصلتة عليهو ...
فريد : الو حبيبي كيفك ..
خلود : م كويسة ي فريد ...
فريد : لييه ـ الحصل بينا كان حلو شديد م انبسطي ?ـ طلعتي فرسة ي بت احييي منك ـ بكرة برضو البيت حيكون فاضي تعاليني ...
خلود : معقول? ? الحصل بينا مفروض اصلا م كان مفروض يحصل ي فريد ـ انا م عارفة كيف قدرتة اعمل كدة (كانت بتتكلم وبتبكي) فريد حتتزوجني متين ....
فريد : اتزوجك? ي بت هوي زواج شنو وكلام فارغ شنو ...
خلود : نعم!!!! مش انت قلتة بتحبني وحتتزوجني?
فريد : ايوة قلت إني بحبك بس م ابدا م قلتة إني حأتزوجك ـ الحب شي والزواج شي تاني ...
خلود : فريد دة كلام شنو ـ انت اكيد بتهظر صح ـ قول انك بتهظر ـ احكي يافريد...
فريد : يازولة هوي ما تمعطيني ـ انا م غصبتك على شي ولا حتى اغتصبتك ـ الحصل بينا كان بالترااضي ـ وحكاية اني اتزوجك دي شيليها من راسك ـ واذا حتتصلي تسمعيني كلام زي دة يفضل م تتصلي لي تاني واضح! (وطق قفل الخط فيها)

راسي عمل ايرور وبقيت م فاهمة اي شي ـ حرفيا لحظتها اتمنيت لو اقتل روحي دي وارتاح ـ بقيت بتخيل موقفي لما اهلي يعرفو بالعملتو ـ انا متاكدة ابوي واخواني حياكلوني حية ـ انا كيف قدرتة اسلم روحي لواحد حقير زيو ـ معقولة انا ضعيفة للدرجة وم قدرتة اتحكم في نفسي ?ـ يارب تساعدني وتغفر لي ـ انا غلطتة غلطة كبيرة بس والله ما كنت ناوية اعمل الشي دة ابدا ـ بس الشيطان كان شاطر في انو ينسيني كل حاجة ويخليني انخدع واجري ورا شهوتي من دون م افكر انا بعمل في شنو... فريد اتخلى عني واقرب صديقة لي اتخلت عني برضو ـ منو الحيساعدني ويقيف معاي ي الله ـ غيرك ما لي وكيل ـ بقيت ببكي الليل كلو وبدعي ربي يغفر لي ويساعدني في مصيبتي دي.....
......

يوم الجمعة جو اتقدمو ل رنيم وعملنا خطوبة صغيرة لبسو فيها الدبل وحددو مواعيد العرس حيكون بعد تلاتة شهور ان شاء الله ـ رنيم كانت فرحانة شديد وكلنااا كنا فرحانين ليهاا وفي نفس الوقت حزينين انها حتمش تخلينا ـ بدينا ترتيبات وتجهيزات وجري السوق عشان نقدر ننجز لانو الزمن ضيق ـ الشهر الاول رنيم اشترت شيلتها كلها وحاجات الحبسة ـ لما فضل للعرس شهرين بدت تتحبس نزلت دخان ـ اما انا ورزة شغالين ماسكات سااي وترطيب اخوات العروس وكدة .....
كنان كان شغال في تجهيزات البيت غير الديكور ولون البوماستيك تبع البيت واشترينا شوية اثاثات جديدة ـ البيت بقى حلوو شديد وبدينا نحس بأجواء العرس وكدة .....
الايام عدت سريع وفضل للعرس اسبوع فقط ـ طبعا اخوات ماما كلهم جو وصحبات رنيم كل يوم بجو بساعدونا وكل حاجة كانت ماشة تمام الحمد لله ... انا ورزة قررنا نقص فساتين للعرس اخترنا تشكيلات حلوة شديد من الانستا وديناها لترزي قالو شاطر في قص الفساتين ـ مفروض بكرة نمش نستلمها منو لانو وديناها ليهو قبل اسبوعين عديل عشان عارفين حركات الترازية بتاخرو مرات ـ كنا متحمسين شديد على الفساتين لانو لو ظبطها ليك حتكون دماااار ...
تاني يوم بعد الفطور مشينا الترزي عشان نستلم الفساتين والترزي قال لينا جاهزات ـ اول حاجة ادانا فستان رزة وصراحة كان دماااار وطلع ظااابط شديد وبنفس الشكل تبع الصورة الوريناها ليهو ـ يلا انا بقيت متحمسة اكتر عشان اشوف فستاني بس للاسف اول م شفتو م عجبني خاالص ـ م قدر يظبطو لي وماف اي علاقة بين الصورة الوريتها ليهو والفستان القصاهو لي +طلع ضيق وقصير وحاجة كدة في قمة البشاعة ـ انا من الزعل م عرفتة اقول شنو وطوالي عايزة اطلع ـ عيوني كانو ملانات دموع ـ رزة مسكتني من يدي و شاكلت الترزي قالت ليهو خربتة ليها الفستان واسي خلاص العرس م باقي ليهو شي اتصرف وعدل لينا الفستان دة اسي دة ـ قلتة ليها ماف اي طريقة انو يتعدل لانو حيبوظ اكتر ـ الترزي قعد يجوط فينا بدل م يعتذر ويحاول يصلح لينا الفستان الخربو دة وقال لينا دة نفس الشكل الانتو وصفتوهو لي ـ المهم رزة بقت تتناقش وهو يتناقش وانا خلاص زهجتة ـ قلتة لرزة اديهو قروشو وخلينا نتخارج ـ رزة حالفة م تديهو قروش الفستان الخربو كان شوية ويضربنا ـ اديناهو قروشو وطلعنا سريع ـ رزة كانت الطريق كلو تنبز فيهو ـ اما انا كنت زعلانة وببكي بس ـ لما قربنا نصل البيت قشيت دموعي وحاولتة ابين اني عادية وماف شي ...
لولو : رزة م تكلمي ناس البيت بحكاية الفستان ...
رزة : كيف يعني? انا حاكلم ماما عشان تمش تزفتو ـ خرب الفستان وكمان شال مننا قروشو ود الذين ...
لولو : لالا ي رزة عليك الله م تكلميها ـ انتِ شايفاها الايام دي مضغوطة كيف مع مواضيع العرس وم رايقة
فما عايزة اشغلها بمواضيع جانبية م مهمة ...
رزة : كيف يعني ي لولو ـ طيب حتلبسي شنو للعرس ...
لولو : حاتصرف انا م تشيلي هم ـ موضوع الفستان دة بسيط شديد بتحل ان شاء الله ...
رزة : طيب تمام بس والله لو كنت مكانك م حامشيها للترزي بالبساطة دي ....
...... من جواي كنت حزينة شديد وكل شويتين دموعي بتنزل بس بقشها سريع ـ م بتتخيلو قدر شنو كنت متحمسة للفستان ـ لاني اصلا م قاعدة البس فساتين ومعظم ملابسي طونكات طويلة مع بناطين وتيشيرتات مع اسكريتات وم حصل لبستة فستان خالص عشان كدة المرة دي حبيت البس فستان في العرس ـ انا م بحب الفساتين الجاهزة عشان كدة اخترت اني اقص للعرس ـ واسي م عارفة اعمل شنو ـ والزمن خلاص ضاق حتى لو قلتة اقص واحد تاني مستحيل يجهز في الفترة البسيطة دي واصلا نفسي قفلت من اي شي ....
بالليل لما جاء وقت النوم مشيت السطوح قلتة انوم فيهو عشان تحت البيت ملاان ضيوف و السراير كلها اتملت وازعاج وجوطة ـ شلتة بطانيتي ومشيت فوق ـ السطوح فيهو غرفة صغيرة فيها سريرين ومستودع ـ نفضتها شوية من الغبار شغلتة المروحة ورقدتة عشان انوم بس م جاني نوم رغم اني كنت فترانة شديد ـ فتحتة تلفوني وبقيت بتصفح في الميديا لحدي 1 حتى خلاص حسيت بنعاس شديد ـ قفلتة الشبكة وغمضتة عشان انوم ـ حسيت بكركبة برة وزول بدفر في الباب ـ انا كنت قافلاه من جوة ـ قمتة فتحتة النور وفتحتة الباب لقيتو كنان ...

كنان : لولو بتعملي شنو هنا براك ..
لولو : قلتة انوم هنا علشان تحت الضيوف البايتين كتار
كنان : ايوا ـ انا زاتي جيت انوم هنا كنت فاكر ماف زول عشان الصالون تحت برضو ملان ههههه ...
لولو : م مشكلة انت نوم هنا انا حانزل بحاول اجازفها (وعايزة تطلع )..
كنان : لولو انتِ كويسة ..
لولو : كويسة (عايزة تطلع بس مسكلها من ايدها وقفها)
كنان : لالا انا كدة اتاكدت انك م كويسة ـ احكي ياحبيبة اخوك ـ المضايقك شنو ـ وشك دة باهت وعيونك واقعة ـ الحاصل شنو?
لولو : كنان ماف حاجة بس مرهقة ونعسانة ...
كنان : والله?
لولو : (سكتت ـ دموعها نزلت بس قشتها سريع)
كنان : تعالي اقعدي واحكي لي ( ساقها من ايدها وقعدها في السرير وقعد جمبها) يلا احكي لاخوك ...
لولو : كنان ليه م مصدقني ماف شي ...
كنان : طيب ليه بتبكي!
لولو : (سكتت مسافة حتى حكت ليه) فستاني الحأحضر بيه العرس الترزي بوظو لي كليا واسي م عارفة ح البس شنو ...
كنان : الترزي بالغ شديد ـ بس محلوولة ي قلبي ـ بكرة انا وانتِ نمش السوق نجيب احلى فستان ...
لولو : لا ماف داعي ـ اصلا انا ما زعلانة ـ وحالقى لي حاجة البسها ...
كنان : (ابتسم لانو عارف لولو م بتعترف بسهولة اذا زعلانة من شي ـ وحاليا عاملة فيها الموضوع م فارق معاها بس متاكد من جواها زعلانة شديد ودة السبب المتنشن بيها ) حتكسري كلمتي يعني!
لولو : لا م كدة ي اخوي ـ بس ماف داعي تعذب روحك..
كنان : العذاب وين اسي + تاني م تقولي كدة عشان م ازعل منك تمام ...
لولو : حااضر ـ اي حاجة ولا زعلك (وضحكت) ...
كنان :(ابتسم ) ايوة دي لولو حبيبتي المتعود ع ضحكتها ـ يلا اسي نومي ـ وانا حاشيل السرير التاني ح انوم برة في السطوح الهوا حلوو وبارد ...
لولو : خلاص تمام تصبح ع خيير ..
كنان : وانت من اهلو ي حلوة ...
شال السرير طلعو برة ورقد نام ....
يتبع .....

#وتر حساس#
(4)
بقلم : غزل وليد ♥ .....

تاني يوم كنان ساقني بعربيتو وداني ارقى مكان فيهو فساتين ـ بعد صعوبة حتى لقيت لي فستان حبيتو وعجبني ـ بعدها اخترتة هاي هيلز وطرحة وشنطة واسيسريس طقم الفستان ـ حرفيا كنت مبسوطة شديد وحتى الفستان الاخترتو كان ارهب من التشكيلة الاخترتها قبل كدة عشان يقصوها لي ـ وقبل م نرجع البيت وداني مطعم اكلنا فطاير وشربنا عصير حتى ركبنا عشان نرجع البيت ـ كنان عدل لي مودي كلوو والله ♥ ...
لولو : كنان م عارفة اشكرك كيف ـ بالجد أنا محظوظة شديد إنك انت اخوي ـ ربي يخليك ليا ويبارك في عمرك
كنان : آمييين ي روحي ويخليك لي كمان ـ إنت غالية على قلبي شديد ي أختي ـ مستعد أعمل اي شي في الدنيا عشان تكوني مبسوطة وأشوف ضحكتك الحلوة دي مرسومة على وشك ♥ ....
..........

روضة : ي بت قومي كفاك نوم اليوم م عندك جامعة ولا شنو ...
فتحتة عيوني بخلعة شفتة الساعة لقيتها ماشة على 9 ـ نسيت انو عندي محاضرة الساعة 8ـ يعني خلاص فاتتني اذن ماف داعي استعجل عشان الدكتور صعب وم حيدخلني لو كسرتة راسي ...
روضة : المحاضرة اكيد حتكون فاتتك ...
خلود : لالا م فاتتني محاضرتنا بتبدا 10..
اضطريت اكذب عليها عشان والله م ناقصاني جوطة من الصباح و وجع راس ـ قمتة استحميت ولبستة لي عباية سوداء وطرحة سوداء ومشيت الجامعة محاضرتنا التانية بتبدا الساعة 11 ـ وصلتة الجامعة وراسي ملان هموم ـ حاولتة احكي مع فاتن بس كانت متجاوزاني وحتى انها م عايزة تعاين في وشي ـ عارفة انها زعلانة مني بس اقلاها تقيف معاي لانو الفيني مكفيني وهي اقرب صديقة لي ـ في النهاية حاولتة م اضغط عليها ومن حقها م تسامحني لانها نصحتني كتير ابعد عن فريد بس انا م كنت شغالة بيها وجريت ورا حبي ليهو واتجاوزت كل الضوابط الشرعية عشانو ـ فعليا انا استاهل الحصل معاي لاني وحدة غبية ومتخلفة وم بتفهم ...
خشيت المحاضرة بس لو قلت اني فهمتة حرف واحد منها بكون كضبتة على روحي ـ فجأة حسيت بوحدة بتربت في كتفي وبتقول لي الدكتور بتكلم معاك ـ انا م كنت جايبة خبر وبالي في حتة تانية ـ الدكتور قال لي اطلعي برة وتمي سرحانك ـ عايزة اعتذر منو بس م اشتغل بي وطردني برة المحاضرة ـ شلتة شنطتي وطلعتة دموعي كانت في عيوني وحسيت الدنيا دي ضاقت بي بقيت ماشة وم شايفة شي قدامي لانو الدموع كانت مغطية عيوني كلها ـ فجاة اصطدمتة مع واحد , شنطتي وقعت مني دفاتري وحاجاتي الفي الشنطة كلها وقعت ـ قلتة ليه اسفة وقعدتة في الارض عشان ألم حاجاتي ـ الود الضربني قال لي اسف ي اخت وبقى برفع لي باقي حاجاتي الم كنت شايفاها بسبب الدموع الفي عيوني ـ شلتها منو دخلتها شنطتي ومشيت من دون م اعاين في وشو ـ قعدتة تحت شجرة بعيدة من ضوضاء الناس وكملتة البكاء كلو بعدها قمتة ورجعتة البيت ـ وكدة اليوم باعتبارو راح ساي لا قدرتة احضر المحاضرة الاولى ولا حتى المحاضرة التانية .....
.........

عرس اختي رنيم كان في قمة الرهابة والنظام ـ المعازيم كانو كتار شديد لانو م خلينا زول م عزمناه ـ اهل بابا واهل ماما واصحابهم كلهم ـ اصحاب كنان واصحاب ايان كلهم جو ـ صحبات رنيم وصحباتي وصحبات رزة ـ الوحيد الكنا فاقدنو جدا في العرس هو سلطان لو كان موجود كانت فرحتنا اكتملت ـ هو كان شغال امتحانات القبل القاينل عشان كدة م قدر يجي...
الناس كلها كانو قاشرين ومتشيكين ـ البنات سماحتهم تلخم عدييل كدة م شاء الله ـ والشباب اي واحد أحلى التاني بس أحلاهم اخوي كنان طبعا 🙈♥...
* كنان شاب طويل ـ قمحي اللون ـ عيونو واسعة وكحيلة لدرجة اي زول بشوفهم بفتكر انو عامل كحل ـ شعرو كثيف وناعم مغطي ليه وشو لحدي حواجبو م شاء الله ـ بحلق سكسوكة ـ ملامحو هادية ومريحة شديد ـ عندو ابتسامة جميلة خاصة لما يبتسم وتظهر وجناتوـ بإختصار كنان شاب في قمة الجمال والكاريزما عشان كدة كل الجكس الناعم مكسر فيه وجاري وراه.. **
رجعنا البيت حوالي 1صباحا ـ العرس في صالة ـ جرتقو العرسان و ودعناهم حتى رجعنا البيت ....
انا من الفتر نمتة في العربية م قدرتة امسك النومة لحدي م اصل البيت ـ لما وصلنا البيت ماما صحتني قالت لي يلا قومي خشي وصلنا ـ طبعا كنت ماشة زي السكرانة مسافة اصل غرفتي لو م رزة كانت مثبتاني كنت وقعتة والله هههههه ....
بعد تلاتة يوم البيت فضى والضيوف سافرو ـ كانت أحلى ايام والله ـ بس فقدنا رنيم وجوطتها وحركاتها ..
أيان قال لينا أها العرس الجاي حيكون عرس ميين ـ رزة : عرس كنااان ...
أيان : اها ي الاخو خليك مستعد الدور الجاي علييك (وغمز ليهو)...
كنان : ههههههه حكاية العرس دي مش لسة شوية...
سعاد : م لسة ي ولدي بعد كدة مفروض تفكر في العرس عمرك خلاص خاشي ع التلاتين ـ والحمد لله وضعك المادي كويس ـ ولو عايز عروس نفتشها ليك..

كنان : كدي روقو ي جماعة متين رنيم عرست عشان تفكرو تعرسو لي كمان هههههه ـ م تخافو ان شاء الله بعرس وقريب ان شاء الله بس انتو م تضغطو علي ـ كل حاجة بالروقة بتبقى حلوة ....
ايان : سمح منتظرنك ههههه ـ طبعا ي امي إياد ود عمو علاء امس وصل السودان احمد اخوهو قبيل كلمني ..
سعاد : عليك الله حمد الله على سلامتو بكرة ان شاء الله نمش ليهم ...
كنان : غريب قبل اسبوع كنت بتراسل معاه بس م جاب لي سيرة انو راجع السودان ...
رزة : احتمال عاملها ليك مفاجأة ههههه...
......
بعد المغرب كنت خاتة تلفوني في الهول يشحن وانا كنت في المطبخ بغسل في عدة الغداء ـ كنان جاني داخل وماسك تلفوني في يدو ...
كنان : تلفونك دة من قبيل برن ي لولو هاك ردي ...
لولو : المتصل رقم غريب م مسجل صح ?..
كنان : ايوة ...
لولو : والله ي كنان فترتة عديل من المكالمات المجهولة دي بعد عرس رنيم بقت بتجيني مكالمات من ارقام غريبة وناس م بعرفهم ...
كنان : وليه م كلمتيني ...
لولو : قاعدة أحظرهم بس برضو لسة بتجيني مكالمات ...
كنان : برضو م حل ـ ممكن تحظريه وبتصل ليك من رقم تاني ...
لولو : الغريب انو رقمي م قاعدة اديه لزول غريب ـ كلهم صحباتي ـ بس ايام المناسبة بتذكر في كم واحد من اولاد اهلكم لما يلقوني ماسكة تلفوني بشيلوهو مني بكتبو ارقامهم بمسكلو بيها في تلفوناتهم وبرجعو لي التلفون نظام نتواصل وكدة ...
كنان : وانتِ كيف تسمحي ليهم يعملو كدة اصلا (قالها لي بتعصيب وزعل لمن خفتة)
لولو : لالا أأصلا بكون قاعدة عادي الواحد بجي بسلم علي وبقول لي انا ود اهلك وكدة وبعدها بسالني من رقمي وقبل م ارد عليه بشيل مني التلفون بسجل رقمو بمسكل لي وبرجع لي التلفون ...
كنان : وأنت ساكتة كالعادة صح !ـ المفروض اي واحد يعمل حركة زي دي معاك تشاكليه وتوقفيه عند حدو لا اولاد اهل لا غيرهم ـ مسكنتك دي حتغطس حجرك والله ...
لولو : (بقيت ساكتة بس وبسمع في كلامو)
كنان : ومفروض برضو تجي تكلميني وتقولي لي يا كنان في مضايقات بتجيني من ارقام غريبة م تسكتي ـ لولو أنا م عارف لمتين حتظلي مسكينة كدة وم بتعرفي تتصرفي في مواقف زي دي ـ خوفك وسكاتك المستمر حيعملو ليك مشاكل انتِ في غنى عنها ـ المفروض تحاولي تتغيري لانك مقبلة على حياة جامعية ــ والحياة دي بتتطلب انك تكوني زولة قوية ـ شجاعة وتاخدي حقك بالقوة ـ انا خايف عليك شديد والله لاني عارف انك بريئة شديد والدنيا دي م فاهمة فيها حاجة ـ العالم برة ملان شر وناس خبيثة وريني حتقدري تواجهيهم كيف ـ ردي علي وما تسكتي ... والاولاد ديل أولاد لاتقولي لي أولاد أهل لا غيرهم ..
لولو : (ومازالت ساكتة وعينها في الأرض ودموعها عايز تنزل بس ماسكاهم بالعافية) ...
كنان : لولو بتكلم معاك ردي علي وارفعي راسك دة عايني لي هنا ....
لولو : اقول شنو يا كنان كلامك كلو صاح وعارفة اني ضعيفة م بعرف اتصرف (كانت بتتكلم بصوت باكي)
كنان : لولو لا إله إلا الله ...
لولو: محمد رسول الله ...
كنان : أسي المبكيك شنو ـ كلامي زعلك يعني ـ بس دي حقيقة كان شئتي إم أبيتي ـ وبعدين أنا اخوك الكبير ومن واجبي أوعيك وأفهمك وانصحك ـ والله ي لولو أنا لو م بخاف عليك م بقول ليك كدة ـ فما عايزك تزعلي مني تمام ...
لولو : كنان إنت عمرك م زعلتي والله ـ كل كلمة بتقولها عارفاها لمصلحتي ـ ودموعي دي اصلا بتنزل من دون سبب ...
كنان : لا م بتنزل من دون سبب ـ بتنزل لأنك زولة رقيقة شديد وحساسة ونقية من جوة ـ وعايز أقول ليك طالما أنا لسة حي في الدنيا وبتنفس مستحيل أخلي شي يأذيك أو يقرب منك بإذن الله تعالى (وحضنها عليهو)
لولو : في وجودك انا دايما متطمنة ي اخوي ♥
كنان: ي عمري انتِ♥ طيب أسي طلعي الشريحة اديني ليها وبكرة ان شاء الله حأجيب ليك واحدة تانية تمام ...
لولو : طيب تمام (طلعتها وأدتها ليهو)....
.........

ألو حبيبي كيفك ....
تمام الحمد لله إنتِ كيف ...
كويسة بس مشتاقة ليك ...
بجدد ـ ع فكرة انا مشتاق ليك أكتر منك...
إمممم وليه م بتتصل علي ...
والله ي روحي إنتِ عارفة ظروفي الأيام الفاتت وقدر شنو كنت ملخوم ومشغول أعفي لي ....
ولا يهمك عاذراااك ...
رايِك شنو بكرة نتلاقى ...
حلو اصلا اشتقتة لشوفتَك ...
اها يلا احكي لي تفاصيل الايام الفاتت ـ اتمنيت لو أكون معاك في الأيام المضت...
..... بقى بحكي ليها وبتونس معاها لحدي م لقو الزمن اتأخر بعدها قفلو ونامو....
.....
يتبع ...

#وتر حساس#
(5)
بقلم : غزل وليد♥
.....
تاني يوم ماما قالت لينا بعدين حنمش كلنا بيت عمي علاء عشان نسلم عليهم ونحمدل لولدو السلامة ونتغدى معاهم ـ يعني حنعمل غداء ونشيلو معانا ـ بعد م فطرنا بدينا نطبخ في الغداء, طبخنا كذا صنف ـ انا ورزة ساعدنا ماما ـ بعد م خلصنا ماما قالت مفروض نعمل بسبوسة برضو عشان يشربو بيها الشاي بعدين ـ قلتة ليها خلاص تمام انتِ ارتاحي بعد كدة وانا حأعملها
عملتها وزقيتها بالشيريا ورشيت فيها جوز هند ومكسرات ـ بصراحة طلعت رهييبة ...
رزة : لولو اها حتلبسي شنو ـ اسي انا م عارفة البس ياتو لبسة ...
لولو : انا حالبس تيشيرتي الزيتي مع اسكيرتي الفنايلي الاسود ومعاه اسبورت اسود وطرحتي الفيها ورود بالزيتي ...
رزة : حلو ـ طيب تعالي ساعديني في اختيار اللبسة الحألبسها ...
رزة طلعت ملابس دولابها كلو وبقت بتعزل ـ في النهاية اختارت قميص اوف وايت مع بنطلون بني واسبورت اوف وايت ...
بدينا نجهز بدري شوية عشان م نتأخر ـ بعد م لبستة حسيت الاسكيرت شوية ضيق بس م اشتغلتة بالموضوع قلتة ماف زول حينتبه واصلا م ظاهر انو ضيق ـ سرحتة شعري وحدة وطلعتة شعرتين بالجمبة شكل خصلات وكدة ههههه ـ ولبستة سلسلي حق الفضة البحبو ومعاهو خاتمو واسوارتو ـ كانت هدية عيد ميلادي الفات جابها لي كنان ـ عملتة قلوس شفاف وخلاص ـ طبعا م بعمل ميك اب ولا حصل مرة عملتة ميك اب ...
رزة : احاا شنو الشيااكة دي طالعة مززة ..
لولو : احم احم من يومي مزة 😌
رزة : هييي راسك م يكبر شينة دي ...
لولو : هههههههه مزة غصبااا عنك ـ وانتِ برضو طالعة عسسل ..
رزة : عارفة 😌😌😌
لولو : عولاق 😹😹😹😹
ايان جاء دقا ليك الباب وقال لينا اذا جهزتو اطلعو سريع ابوي وكنان منتظرننا في العربية برا ..
رزة : يعني كنان رجع من الشغل? ...
أيان : أيوة رجع اليوم رجع بدري شوية عشان ماشي معانا ....
طلعنا مشينا بيت عمو علاءـ لقيناهم عامرين ومعاهم شوية ضيوف ـ سلمنا عليهم وضيفونا ـ ناس عمو علاء ومرتو ظريفين ولطيفين عشان كدة بحبهم ـ بناتو صحباتي خاصة لمار دي فردتي ـ عمرها قريب لعمري بس هي اكبر مني بسنة تقريبا بتدرس هندسة طبية ودي بتو الكبيرة ـ عندها اخواتها اتنين اصغر منها ـ واحدة قدر رزة اسمها ليلى والتانية بتقرا سادس ودي اخر العنقود اسمها لين زي اسمي ـ اما اخوانها الكبار اتنين ـ اكبرهم أحمد ودة متزوج وعايش معاهم في نفس البيت ـ بعديه إياد ودة تقريبا دفعة كنان بتذكر زمان كانو اصحاب شديد ـ بس إياد إغترب ليهو سنين طولتة م شفتو ـ تقريبا اخر مرة شفتو عمري كان 10 سنة ....
لمار : وينك ي عفنة مختفية وطولتي م جيتينا ...
لولو : والله كل يوم بقول جاياكم اسألي رزة بس بتحصل حاجة بتخليني أأجل الجية ...
لمار : ي شيخة صدقتك ...
لولو : والله جد ـ وبعدين مشتاقين وكدة ـ وحمد الله على سلامة أخوك إياد ...
لمار : الشوق بحر والله ـ الله يسلمك ي رب ـ للان م مصدقة اني شفتو بعد السنين دي كلها
لولو : الحمد لله انو وصلكم بالسلامة
لمار: اي والله الحمد لله ... أها نزلتي جامعة.?
رزة : لسة والله م نزلونا لكن قبل اسبوع نزل بيان وحننزل بعد شهر إن شاء الله ...
لمار : حلووو ـ اها مستعدة للجامعة. ...
لولو : والله لسة م جهزتة اي شي ـ ومتوترة من اسي ...
لمار : م تخافي ي بت ـ المرحلة الجامعية حلوة شديد والله ـ اهم حاجة تكوني مفتحة وتفهمي الناس دي كوييس ...
المهم بقينا نتونس ونحكي ـ كانت بتحكي لي مغامراتها وقصصها مع الجامعة والله ضحكتني ضحك ـ اثناء ونستنا جاء شاب طوييل ـ معضل وعندو لحية كثيفة نوعا ما, داخل وقال السلام عليكم ـ أول م شاف كنان سلم عليهو بشووق وحفاوة ...
كنان : اوووو ايااادنا والله مشتاقيين ي دفعة والف حمد الله على السلامة ...
اياد: اخوي وفرردتي الشووق بحرر والله شنو بقيت وجيه وسمح كدة ...
كنان : هههههههه لسة مستهبل زي م كنت ـ (كنان بقى بضربو في عضلاتو) شنو العضلات والحركات دي ـ وبقيت تربى دقن كمان هههههههه نيو استايل ولا شنو ههههههه ....
إياد : هههههههههه تعرصتك دي اصلو ماناوي تخليها مش ...
كنان : وشنو الخساسة دي ليه م كلمتني انك جاي ـ سمعتة بخبر رجعتك من أيان اخوي ...
إياد : والله ياكنان اخوي كنت عاملها ليك مفاجأة بس أحمد اخوي الفولة م بتتبل في لسانو طوالي كلم ايان وايان كلمك هههههه ....
كنان : خيير يازول المهم انك وصلتة بخير وعافية ...
.... بعد م سلم على كنان حتى عرفتة إنو دة إياد ـ سبحان الله إتغير شديد وخالص م عرفتو ...
بعدها سلم على بابا وماما وأيان ورزة وسلم علي ..
إياد : الف مبروك لرنيم اتمنيت احضر العرس والله بس ربنا م كتب ...

علي : الله يبارك فيك ي ولدي والعقبى عندك ي رب ..
إياد : آمين ـ م شاء الله البنيات كبرو ـ بتذكر خليتهم صغاار ...
سعاد : اتذكرتهم يعني ...
إياد : معقولة ي خالتي أكيد اتذكرتهم ـ دي رزة ودي لولو صح (أشر عليهم ب إيدو) ..
سعاد : ههههه ااي ياهم ...
إياد : رزة كانت صغيرة عمرها كان 8سنة تقريبا اما لين(لولو) عمرها 10سنوات ...
كنان : م شاء الله ذاكرتك طلعت قوية ـ فعلا دي كانت اعمارهم لما انت سافرت ..
إياد : اخباركم شنو ي بنوت ..
رزة ولولو : تمام الحمد لله ...
عائشة (زوجة علاء): يلا ي جماعة قومو اتفضلو على الغداء جاهز وبعدها كملو الونسة عشان م بتخلص ههههه
علاء : اي والله م بتخلص اتفضلو ي علي وكنان وايان نحنا نمش الصالون ...
قعدنا اتغدينا وشربنا الشاي وانبسطنا جدا والله ـ رجعنا البيت مع صلاة العشاء .... بعد م وصلنا قبل م إخش غرفتي كنان ناداني بالجمبة...
كنان : الاسكيرت دة ضيق وقصير تاني م تطلعي بيهو برة البيت...
لولو : يعني ظاهر إنو ضيق !
كنان : ايوة واضح ضيق ومفصل ليك جسمك عشان كدة تاني م تلبسبه, اديهو لرزة وبجيب ليك واحد تاني بدلو..
لولو : طيب تمام (وعايزة امشي)
كنان : والشعرة القدام دي مالك م لامها مع باقي اخواتها
لولو : امممم التسريحة نظامها كدة ...
كنان : كانت حتكون أحلى لو لميتيها مع اخواتها ـ يلا تصبحي على خير ي حلوة ...
لولو : وإنت من أهل الخير ....
كنان : لولو لحظة (طلع الجزلان من جيبو وطلع منها الشريحة)هاك دي شريحة جديدة ـ منشط ليك فيها باقة انترنت شهر جاهزة ...
لولو : بجدددد ـ شكراااا أخُتَّك وين أنا (من الحماس والفرحة حضنتو وعايزة تبوسو في خدو بس مع اللبشة والفرحة البوسة جات قريب من شفايفو ـ لولو إتوترت بس كنان اتجاوز الموضوع وعمل فيها م انتبه)
كنان : حاولي م تدي رقمك لاي زول الا الناس البتعرفيهم وبتثقي فيهم تمام ...
لولو : حاضر يلا تصبح ع خير ...
كنان : وانت من أهلو ...
كنت مبسوووطة بالشريحة الجديدة وكمان منشطة ي سلااام ح استمتع بالتنشيط دة هههههه ـ بس قلتة ح ادخل الشريحة بكرة لانو اسي فتراانة ونعسانة م عايزة انشغل بالتلفون ـ دخلتة استحميت وصليت صلاة العشاء ورقدتة عشان أنوم ...
زرة : هيي ي بت مالك نايمة بدري كدة ...
لولو : فتراانة ونعسانة ي رزة ...
رزة : خلينا نتونس شوية يخخ ـ هييي م شفتي إياد بقى مزز كيف أحيااا انا من سماحتو ـ احيييي من طولو وعضلاتو ولحيتو ـ بشبه لي ممثل كدة م قادرة اتذكر اسموو ....
لولو : سجمي ي يمة بت ال15سنة بقت بتكرش ـ شافعة قليصة ...
رزة : شافعة براك يختي ـ أقول ليك حاجة نومي ي عوقة ...
لولو : ههههه مام ـ لكن فعلا اتغير ـ بتذكر زمان كنت بكرهو لانو بحب يخوفني بالكدايس عشان عارفني بكره القطط وبخاف منها ....
رزة : ولأسي بتخافي منها هههههه ...
لولو : بتذكر مرة وقعتة بسببو لمن اسناني دفقت دم وكنان دقاهو دق العيش إلا ماما جات حجزتهم ...
رزة : مع إني كنت صغيرة بس مستحيل انسى اليوم دة ـ لما رمى فيك الكديسة وانتِ من الخلعة بقيتي بتكوركي وجارية ـ ورررب جيتي واقعة في العتبة حقت الباب ....
لولو : وقتها أنا كرهتو شدييد وللان زعلانة من حركتو دي ومستحيل أنساها ليهو ....
رزة : ي بت الحاجة دي عدت ليها سنيين هههههه ....
لولو : عاارفة بس برضو للان بشمو الكريه ...
رزة : معقولة بعد سماحتو دي لسة بتشميهو ...
لولو : اننننننن سمحة أنا يلا انخمدي نومي وخليني أنوم ...
رزة : تنوم فيك حيطة ـ نومي إنتِ ـ أنا م نعسانة ...
لولو : عوقة يلا تصبحي ع خير ...
رزة : وإنتِ من أهلو ....
........

*بعد م رجعتة من الجامعة خشيت غرفتي وقفلتها علي ـ الحمد لله أمي كانت ماف عشان م تنتبه لعيوني الوارمة من الدموع ـ خشيت استحميت صليت الضهر وبقيت بستغفر كتيير ـ ندمانة كل الندم على الخطيئة العملتها ـ شوية كدة تلفوني رن والمتصل كان فريد ـ اول م شفتة إسمو بقيت برجف عديل وبقيت مترددة م بين أرد وم أرد ـ بس قويت قلبي ورديت عليهو....
خلود : أ أ ألو ...
فريد : حبيبي كيفك ...
خلود : إنت بتستهبل صح! مش قلتة إنك م عايز تتكلم معاي تاني ليه متصل علي ...
فريد : عشان اشتقتة ليك ـ خلود عليك الله تعاليني محتاج ليك ...
خلود : إنت أكيد واحد مجنون وتافه وحقير ...
فريد : هيييي اياااك تتلفظي ـ إنتِ منو أصلا عشان تنبزيني ـ أحمدي ربك إنو واحد زيي شافك ونام معاك ـ الحصل بينا الف بت بتتمى إنو أعملو معاها
ولو شايفة روحك إنك حلوة في مية بت أحلى منك ...
خلود : فريد بس عايزاك تجاوبني على سؤال واحد ـ إنت ليه كذبت علي وقلتة إنك بتحبني وبتتمنى تقضي باقي عمرك معاي ـ ليه كنت بتقول لي إنك م شايف بت غيري وأنا الانثى الوحيدة في حياتك ـ ليه كنت معيشني في أحلام وأوهام ـ ليه خليتني أثق فيك لدرجة إني أسلمك نفسي وانسى قيمي ومبادئي ـ رد على أسإلتي دي أرجووك ـ بلييز يا فريد ـ أنا حبيتك من كل قلبي بس إنت خذلتني ولعبت علي ...

فريد : ع فكرة أنا غلطان إني إتصلتة عليك (وطق قفل الخط) ...
رجعتة أبكي من جديد وكلي حسرة ندم ـ فجأة سمعتة اخوي بناديني ـ قشيت دموعي وخشيت الحمام غسلتة وشي ومشيت عليهو ...
[ ] أنا بت وحيدة وسط خمسة اولاد ـ تلاتة اكبر مني واتنين اصغر مني ـ اخواني صعبين صعبين جداااا ـ وبخاف منهم موووت والله العظيم ـ انا عمري 21سنة بدرس تربية لغة عربية ـ كنت انسانة طموحة جدا وبحب دراستي ومجتهدة لحدي ما الإسمو فريد دة خشى حياتي وغيرها لي كليا ـ فريد بكون ولد جيرانا في بيتنا القديم قبل م نرحل في بيتنا الجديد ـ بيتنا الأول كان اجار والتاني كان دة ملكنا ـ اتعرفتة عليهو وبقينا بنحب بعض وكان واعدني بالزواج ـ حبي ليهو كان شريف بس هو عينو كانت في جسمي وكل مرة بقول لي إنت زي مرتي وماف داعي تمنعيني اقرب منك بس انا كنت برفض رفضا باتا ـ مرات بزعل مني بس بحاول اراضيه وبنرجع لبعض ـ بعد م رحلنا حسيت تعاملو بدا يتغير معاي وم مهتم بي زي زمان ـ واجهتو وقلتة ليهو انت بقيت م بتحبني وأهملتني شديد ـ المهم عاتبتو كتير ـ اعتذر مني وراضاني .... يوم اتصل علي وقال لي إنو حاليا قاعد براهو في شقتو وعايزني اجيهو نتونس وكدة ـ أنا رفضتة بس دردحني لحدي م قبلتة امش ليهو وقلتة ليهو حنتونس فقط وم حنعمل اي شي ـ هو وعدني وقال لي حاضر م حيصل اي شي ـ حبي ليهو كان عاميني ـ المهم مشيت ليهو ـ لقيتو قاعد لوحدو. ومولع الشيشة حقتو بشرب فيها ـ شكلو كان مخيف صراحة وعيونو محمرة ـ بديت اخاف وحاولتة اتخارج سريع بس هو م اداني فرصة بقى بتونس معاي عادي لحدي م حسيت بشوية اتطمئنان واندمجتة معاه في الونسة ـ شوية شوية بقى بقرب مني وأنا بزحف منو لحدي م لصق فيني ـ عايزة اقوم ثبتي ومن دون سابق انذار باسني ـ للاسف انا ضعفتة واندحت معاهو لحدي م حصل الحصل للاسف ... كنت فاكرة انو بعد الحصل بينا حيفكر يصلح الغلط العملناه ويتزوجني بس خاب ظني ـ فريد دة اول حب في حياتي بس كسرني وكسر قلبي بأبشع صورة 💔💔💔💔 بس دي نهاية أي وحدة بتسلم روحها لواحد من دون م يكون بينهم لي رابط شرعي ـ ومية مرة استاهل الحصل فيني وحاليا ندمانة وسافة التراب حيث لاينفع الندم بعد الان💔💔💔💔💔......
......
يتبع .....

#وتر حساس#
(6)
بقلم : غزل وليد♥
......

سلاما.. على من تهواه روحي بلا سبب
وكأن الله قد وهبني حبه بالفطرة
وسلاما.... علي من أغتال قلبي
واستعمره واخترق نبضي
واستوطنه ليسكن فيه دون لقاء
وسلاما علي من يسري هواه
في عروقي كالدم فيهبني حياة
كـنـت ومازلت وستبقى من أروع
الأشياء التي أدخلها القدر الى عالمي♥♥♥
...... بعد م خلصتة قفلتة دفتري وبقيت حاضناه علي وسرحانة ـ بفكر مستقبلي الجاي إن شاء الله حيكون كيف ـ حياتي العاطفية حتكون كيف ـ هل حأتزوج الانسان البحبو! هل حيجي يوم وأكتب قصة حبي معاه في دفتري دة وأقول أخيرا إنتصر الحب? ...
اثناء سرحاني حسيت بيد زول في كتفي إتلفتة لقيتو كنان ..
كنان : الحلو سرحان ويين ...
لولو : امممم ولا مكان ...
كنان : أها أتحفيني جاي ع بالي أسمع شي من كتاباتك
وياريت آخر حاجة كتبتيها تسمعيني ليها...
لولو : آخر حاجة كتبتها م حلوة بس حأسمعك واحدة غيرها متأكدة حتعجبك ( م كنت بحب اقرا ليهو كتاباتي الفيها طابع رومانسي وكدة لأنو كنت بخجل) ..
قريت ليهو نصين وختمتها ب النص دة :
تأتي لحظات الذكريات والحنين فجأة دون سابق إنذار....
فيسبح الإنسان في مواقف الطفولة ورأسه ينظر للأعلى بابتسامة صادقة وعيناه تغرغران بدمعٍ خفيف...
وكأنه يستمتع بمشاهدة فيلم قصير .
إن تلك الذكريات العابرة ماهي إلا جزء من الماضي الذي لا يمكن أن يعود يوماً...
ذكريات مع أشخاص قد يكون فرّقهم الموت أو فرقتهم الدنيا بأسبابها وظروفها الصعبة .
دائماً تكون أجمل الذكريات هي ذكريات الطفولة .
. التي كانت تجمع بين سخرية الحياة من عقولنا الصغيرة وبين أحلامنا العريضة.
دائماً تعود بك الى حيث البراءة .
والى حيث الجمال في صفاءِ نفوس الأطفال وأكبر همومهم البسيطة...
.....
كنان : واااو رهااابة ـ كاتبتنا العبقرية ...
لولو : شكرا ( بعد م قريت اخر نص كنت حاسة بنوع من الحزن ـ ملامح وشي كانت بتبين إني اتأثرت بالنص القريتو)
كنان : إنتِ كويسة ...
لولو : اممم كويسة ..
كنان: بس ملامح وشك م بتقول كدة ...
لولو : كنان ...
كنان : عيونو ...
لولو : (جرت نفس وسكتت)
كنان : احكي سامعك أنا ...
لولو : إنت بتتذكر ماما الله يرحمها?
كنان : بتذكرها طبعا ـ صح كنت صغير بس بتذكر خالتو نور الله يرحمها لما اتوفت عمري كان 12سنة تقريبا ـ كانت زولة طيبة شديد وبتحبني جدا ـ هي وأمي كانو صحبات شديد وبتجينا على طول في البيت ـ ولما قربت ولادتك جات قعدت معانا امي نفستها بيك ـ بتذكر اليوم الاتولدتي فيهو كنا مبسوطين وطايرين من الفرح ـ كنتِ حلوة شديد وصغييرة وع طول كنتِ بتضحكي ـ كنت مصر إني أرفعك بس أمي كانت مانعاني وبتقول لي حترميها ـ مرة زعلت وقلتة ليه ع طول برفضو لي ارفعك ـ خالتو نور لما شافتني زعلان نادتني وقعدتني جمبها وختتك في ايديا ـ كنت فرحان شديد وكنت بحاول اضحّك فيك واعمل ليك حركات عشان تضحكي هههههه ـ ياااه كانت أيام ـ بس للاسف دايما الزول الطيب بقولو م بعيش كتير ـ بعد ولادتك بفترة بسيطة امك تعبت وربنا شال امانتو ـ ربنا يرحمها ان شاء الله ويسكنها فسيح جناته ...
لولو : اميين ي رب (دموعي نزلت وبقيت خاتة ايديا في وشي) ...
كنان : لولو لالا ارجوكِ م تبكي ـ لو عارف انو كلامي حيبكيك م كنت اتكلمت (زح ليها ايديها من وشها ـ قش ليها دموعها ب أصابعو ـ خدودها وانفها بقو محمرات )
لولو : كنان عايزة اشوف ماما ولو مرة واحدة ـ يعني ماعندكم ليها صورة او اي شي اقدر اشوفها ...
كنان : للاسف يالولو ماف ليها صورة .. انا عارف انك اشتقتي ليها ونفسك نشوفيها حاسي بيك أنا والله ـ طيب تعالي اوصفها ليك ـ أمك كانت بتشبهك شديد يعني انتِ نسخة منها ـ نفس العيون والانف والشفايف والشعر ـ بس هي لون شعرها كان اشقر شوية وانت شعرك اسود ـ انتِ بيضاء وهي كانت قمحية بس دة كل الفرق ـ لولو حبيبتي أنا ماعايزك تفكري كتير في الماضي وتحزني ـ امك اتذكريها بالدعاء ـ إنتِ محظوظة لانو عندك أمهات اتنين بحبوك ـ واحدة اتوفت ربنا يرحمها ـ والتانية بتحبك اكتر من روحها ـ وكلنا بنحبك ♥ ...
لولو : (جرت نفس) فعلا أنا محظوظة شديد إنو إنتو أهلي وعائلتي ـ م حصل ولا مرة حسستوني إني م بتكم أو غريبة عنكم ...
كنان : لولو أنا صراحة بتضايق لما تقولي كدة ـ إنت بتنا وقطعة مننا♥
(كنان خت ليها راسها في كتفو وبقى بمشي إيدو في شعرها ـ لين كانت سرحانة لحدي م نامت في كتفو ...)
كنان : لولو ..لولو (ناداها مرتين بس م سمع رد ـ لما عاين ليها في وشها لقاها نامت ـ بقى مركز في براءة وشها وسماحتها) سبحان الخلقك ف أبدع ـ آنتِ أحلى بت شافتها عيني ي لولو والشخص الإنتِ حتكوني من نصيبو حيكون اكتر انسان محظوظ بيك ِـ بس لحدي م يجي الوقت الحأسلمك فيهو بيدي لشريك حياتك مستحيل اسمح لأي بني ادم يأذيك او يزعلك طالما أنا حي بإذن الله .....

..... فجأة جاتني صحية لما فتحتة عيوني لقيت روحي راقدة في كتف كنان وهو كان نايم ـ لا حولااا معقولة من قبيل نايمة في كتفو وهو م صحاني ...
لولو : كنان كنان (بتصحي فيهو بصوت واطي)
كنان : ااممم(كان بين مغمض ومفتح)..
لولو : لي م صحيتني ـ ايدك حتكون خدرت ـ يلا قوم امش غرفتك عشان تنوم ....
كنان : طيب ـ انت زاتك امشي نومي وم تفكري كتير زي م اتفقنا تمام ...
لولو : حااضر ـ تصبح ع الف خيير (باستو في خدو ومشت الغرفة لقت رزة نايمة ـ طفت النور ونامت)...
......
الو ي قلب كيفك ..
انا كويسة انت كيفك وليه م بترد ع مكاماتي ...
والله شالتني نومة والتلفون كان جوة الغرفة ...
كنت نايم برة ولا شنو ..
أيوة ...
طيب لو نعسان نحكي بكرة ...
لالا خلينا نحكي شوية ...
حبيبي الاسبوع الجاي احتمال نسافر لناس جدي نقعد معاهم فترة كدا ونرجع ان شاء الله ...
وانا حتخليني مع منو ...
ههههههه م حأتأخر عشان ـ عارفني م بقدر ع بعادك ...
طيب خليكِ عارفة إنو بعد ترجعي من سفرتك ح أجي بيتكم أتقدم ليكِ ...
بتهظرررر ـ انت جااي عليك الله ...
ايوة جادي والله ـ اصلا بعد كدة ماف حاجة تخليني اتأخر ـ اموري كلها ظبطت الحمد لله ...
بحبككك متهلفة لليوم الحنكون فيه سواا ...
وانا كمان ....
حنعمل خطوبة صح...
وليه نخطب خلينا نعرس مرة واحدة ونتلم في بيت وااحد ـ ولا رأيك شنوو ...
أكيد م عندي رأي بعد رأيك حبيبي ...
بحبك كناني♥
بحبك سمري ♥
يلا أنا أخليك تنوم باين عليك نعسان من صوتك ...
طيب حبيبي تصبحي على خير ♥
وإنتِ من أهلي ♥....
*كنان مرتبط سبرايز صح 🙂*
.........
لولو : طبعا ي رزة عندي كترة ملابس وسخانة ـ بس كسلانة اغسلهم ...
رزة : قومي ساي غسليهم ـ تريزا لسة عيانة قالت م حتقدر تجي الا الاسبوع الجاي ...
لولو : تعالي سااعديني انا م اختككك ...
رزة : بررري هو انا حقاتي مردومات م عايزة اغسلهم اجي اغسل معاك حقاتك ...
لولو : بلييييز ...
رزة : برري والله ولا بجاملك اسي انا فترانة وعندي قراية قدرة كدة اغسل بيها م عندي ....
لولو : حقاارة ...
اضطريت اغسلهم براي ـ طلعتة الغسالة برة في الحوش وبديت اغسل ـ الحمد لله الجو كان بارد ومغيم والدنيا كانت عصرية ـ بقيت بدندن وبغسل ـ والمسافة البتكون ملابسي بتتغسل في الغسالة بشيل تلفوني بصور الزهور والسحب الصغيرة المتوزعة في السماء هههه بعد م اللفة حقت الغسالة تتم بختو وببدا بمصر الملابس وبديهم ضربة واحدة الطشت حتى بنضفهم .... اثناء م كنت شغالة سمعت زول بدق في الباب ـ افتكرتها واحدة من بنات جيرانا وقلتة ماف داعي البس توب ـ مشيت فتحتة الباب اتفاجأ ب إياد ود عمي علاء ومعاهو سنان ود اخوه الصغير ـ طبعت منظري كان بيييش لابسة بجامة تلات اربع ـ وشعري كان مفكوك وحفيانة والحالة زبالة صراحة ـ بقيت واقفة زي الصنم بعاين ليهم وبعاينو لي..
إياد : السلام عليكم ورحمة الله ..
لولو : وعليكم السلام والرحمة ـ اتفضلو اتفضلو ...
جريت خشيت جوة لبستة توبي وكلمتة ماما في ضيف برة ـ كنت خجلانة من منظري القابلتهم بيه وحلفتة م اطلع بقيت قاعدة جوة ومنتظراهم يمشو ... بعد مسافة رزة قالت لي ماما بتناديني في المطبخ ـ وطبعا عشان امش المطبخ لازم أمر بصالة الضيوف ـ اضطريت امش اسلم زي الناس عشان قبيل مع الخلعة م قدرتة اسلم عليهو كويس ....
لولو: السلام عليكم إياد كيفك ..
اياد : بخير الحمد لله إنت ِ كيفك ...
لولو: الحمد لله تمام ـ وانت ي حلووو كيفك (رفعتو فوق وبقيت بلاعب فيهو) ...
إياد : اخبارك شنو ...
لولو : والله الحمد لله كلو تمام ـ كيف ناس البيت .. ...
إياد: كلهم بخير بسلمو عليكم ..
ماما جات خاشة وشايلة العصير ـ ختيت سنان تحت ومشيت المطبخ خليت ماما ورزة بتونسو مع إياد ...
الغداء كان جاهز بس زدتة عليه سلطة جزر وسلقتة بيض بالجمبة ـ وقلتة اعمل كيك ....
أيان : ي مزززة كيفك ...
لولو : بسم الله خلعتني ...
أيان : إنت والخلُع التقول اخوان ههههه ـ طبعا جاي جعاان مصاريني عايزة تتقطع من الجوع كدي كبي لي حاجة اتصبر بيها مسافة ترصو الغداء ...
لولو : هههه كويس ..
أيان : إياد جاء متين ?...
لولو : ليهو نص ساعة كدة تقريبا ...
أيان : ايوااا ـ لولو اختي العسل امممم عايزك في خدمة صغيييرة كدة ...
لولو : اتفضل طبعا ...
أيان : يلا خليه سر بيناتنا تمام ...
لولو : حااضر ..
أيان : عايزك تمثلي ..
لولو : امثل? كيف يعني!
أيان: طيب الموضوع كالاتي الاسبوع الجاي عاملين لمة شبابية وكدة ـ والمفروض أي واحد يجي مع زولتو ـ سواء كانت خطيبتو او زوجتو او حبيبتو تمام ـ وانا طبعا عبد الله الضعيف م عندي لاخطيبة لازوجة ـ والايام دي متشاكل مع حبيبتي ـ حاولتة اراضيها بس عاملة فيها رافعة قزاز ـ كلمتها باللمة دي وبرضوو رفضت ـ ف رايك شنو تمشي معاي ع اساس انك حبيبتي وكدة وعشان اثبت ليها إنو في الحالتين حامشي اذا معاها او بدونها ....

لولو : اممممم الموضوع محتاج تفكير ـ وبعدين انت حاول معاها واكيد م حترفض ...
أيان : لولو انتِ بس ردي علي حتمشي معاي ولا لا?
لولو : ماعندي مشكلة ـ اصلا زهجتة من قعدة البيت منها اطلع اشم هوا وكدة ...
أيان: ظاابط معناها اتفقنا ...
لولو : ههههه اتفقنا ...
اثناء م كنا بنحكي ماما جات خاشة وقالت لينا بتوشوشو في شنو ـ قلتة ليها لا ماف حاجة بس أيان قال جعان شديد وعايز حاجة يتصبر بيها مسافة ارص الغداء ـ قالت لي ايوا ـ يلا نادي رزة تساعدك عشان ترصوهوه إياد مستعجل عايز يمشي الا حلفتو حتى قِبل يقعد يتغدى ـ قلتة ليها خلاص تمام خمسة دقايق وبكون جاهز ـ بعدها طلعت ...
أيان : لولو البينا دة سر م تكلمي ولا زول من ناس البيت ـ اسي لو عرفو حيقعدو يتعاورو لي ويشغلوها لي ..
لولو : هههههه سرك في بير م تخاف ...بس اذا شافونا طالعين سوا وسألونا ماشين وين حتقول ليهم شنو ...
أيان : انا حاتصرف م تشيلي هم ...
لولو : تمام ...
بعدها رزة جات ساعدتني وبدينا نرص الغداء في الصفرة الفي صالة الضيوف ـ في الاثناء دي بابا وكنان رجعو من الشغل ـ بابا جاب معاهو فواكه غسلتها وقطعتها ختيتها مع الغداء ـ شلتة سنان قعدتو جمبي وبقيت بأكل فيهو عشان م يوسخ ملابسو ـ سنان عمرو اربعة سنة ونص ـ هو كان متكيف وعاجبو شعري 😹😹😹😹مع كل لقمة بطلع خصلة خصلتين من شعري ويلعب بيها مع اني كنت لابسة طرحة 😹😹😹...
إياد : سنان حبيبي اقعد ساي خلي لين تقدر تتغدا ...
سنان : عمو تعال شوف شعرها حلو كيف وطوييل كمان..
كلهم قعدو يضحكو خجلني الولد ـ عدلتة طرحتي زي الناس...
رزة : سنان شكلو كرّش عليك ...(لولو حمرت ليها وابتسمت)...
المهم بقينا نتونس لحدي م خلصنا اكل ـ بعدها رفعتة العدة الاتغدينا فيها وديتها المطبخ ـ سنان كان ماشي وجاي معاي ـ يشيل ويونس فيني يحليلو هههههه...
لما كنا بنشرب في الشاي جاء قعد في حضني ...
إياد : سنان الليلة باعني وصاحب لين ...
كنان : ااي شاايفو من قبيل داخل وطالع معاها هههههه..
سعاد : شكلو لولو عجبتوو ...سنان ي حلو حتقعد معانا الليلة مش ...
سنان : اي بقعد معاكم ...
إياد : ياااشيخ قدر كلامك انت ولا بتهظر هههههه....
رزة : خلوهو يقعد معانا اليوم بكرة بنرجعو ليكم ...
إياد : اذا هو جابي يقعد انا م عندي مانع هههههه...
فعلا لما إياد قام عشان يمشي وعايز يسوقو الود بكى وحلف انو م عايز يمشي ـ عايز يقعد معانا...
لولو : إياد خليهو يقعد واذا بكى حنرجعو ..
كنان : اي خليه يقعد اصلا واضح حيتفق هو ولولو هههه
إياد : طيب تمام .. لين سجلي رقمي عندك عشان لو سنان عذبك أو جاط اتصلي علي ...
ملاني رقمو وقال لي امسكل ليه ـ مسكلتة ليه سجل رقمي وبعدها طلع مشى ....
.......
يتبع ...توقعاتكم للجااي♥

#وتر حساس #
(7)
بقلم: غزل وليد♥
.......
سنان كان مبسوط شديد بالقعدة معانا ـ كنت خايفاهو يبكي ويقول عايز يرجع بيتهم بس خالص م بكى ـ بالعكس كان بقول لي عايز يقعد معانا وم عايز يرجع بيتهم تاني 😂♥ طبعا شعري زعمطو لي زعميط السواد 🤣🤣🤣 شغال فيني تساريح ساي ولما ارفض ليهو بعمل فيها زعل عشان كدة خليتو على راحتو اصلا قنعتة من شعري ههههههه ـ لحدي الساعة 9 سنان صاحي وم عايز ينوم بقيت بحنس فيهو حنيس عشان ينوم ـ يخوانا أول مرة اقتنع انو الأمومة دي صعبة كدة ـ حالتو الود م صغير شديد ـ بعد صعوبة حتى نومتو ورقدتو معاي في السرير ...
الساعة 10 ونص تقريبا إياد إتصل علي وقال لي أها الاوضاع ماشة كيف ان شاء الله الود م بكى وقال عايز أمو...
قلتة ليهو لالا والله مبسووط واسي نام ...
إياد : م شااء الله سنان شكلو إرتاح ليك ...
لولو : سنان لطيف وظريف شديد م شاء الله ...
إياد : ابدا والله مشاااغب ومطلع زيتنا في البيت بجوطتو وكواريكو ـ لما قلتة لامو اني خليت ولدها معاكم قالت لي شوية وبجيبوهو راجع ـ م كانت متوقعة حيقدر يبيت معاكم ههههههه ...
لولو : انت جاادي ..
إياد : ااي والله ...
الونسة جرت شوية ـ حكى لي عنو وعن الغربة .... سألني سؤال م كنت متوقعة يكون متذكرو ..
إياد : عايز أسألك لسة بتخافي من الكدايس زي زماان 🤣🤣🤣🤣...(وضحك)
لولو : لسسة والله بخاف منهم وبكرهم عمى ...
إياد : متذكرة لما رميت فيك الكديسة وقمتي جارية لمن وقعتي في عتبة الباب وانجرحتي وكنان ضربني 🤣🤣🤣
لولو : اكييد متذكرة لحدي م أموت مستحيل انسى الحركة العملتها فيني والله لحظتها كرهتك كره م بتتخيلوو...
إياد : إنتِ جااادة 😂 م تقولي لي للان لسة بتكرهيني..
لولو : ااي لسة زعلانة منك ع فكرة وشاماك بسبب حركتك ديك ـ كنت حأروح فيها ع فكرة من الخوف ...
إياد : اصلوو م بصدق 😂 بس كنان كفى و وفى ضربني ضرب الابل 🤣🤣🤣
لولو : تستاهل أكتر من كدة والله ...
إيادي : ياستي أنا بعتذر جدا والله ـ وقتها كنت مراهق متهور وبحب أعمل مقالب في الناس ـ أعفي لي يااخ..
لولو : ابيييت انا للان مغيوظة منك ...
إياد : حرام عليك والله طيب أعمل شنو عشان تسامحيني 😂(كان بضحك لمن قرب يتشرق)
لولو : أسي بتضحك ليه😒..
إياد : اسف اسف ( بقى كاتم الضحكة) ..
لولو : اسفك غير مقبول ..
إياد : بالجد ي لين أنا بتعتذر منك من الاعماق ـ والحصل كان في الماضي وابدا ما كان قصدي بيهو شنو ـ بس مقلب جاء ع بالي وحبيت اعملو فيك (المرة دي كان جادي في كلامو )
لولو : امممم ولا يهمك ـ اعتبرني سامحتك ـ وزي م قلت الحصل مضى وانتهى ...
إياد : صافية لبن?
لولو : هههههه ايوة ...
إياد : الونسة جرت من دون م احس ـ اسف ساهرتة بيك والله ...
لولو : لالا عادي ماف مشكلة اصلا ي داب دي مواعيد نومي ...
إياد : طيب تصبحي ع خير ي قمر ..
لولو : قمر ولا نجمة ...
إياد : هههههه ظريفة ...
لولو : عارفة روحي ظريفة يلا باي ...
إياد : باي 🤣
..... بعد م قفلتة من إياد ـ مشيت المطبخ اكل لي حاجة حتى انوم لاني كنت جعانة ـ لما مشيت المطبخ لقيت كنان قاعد بعمل في قهوة وبتكلم في التلفون ـ ومن طريقة كلامو شكلو البتكلم معاها بت 🙂 أول م شافني قال ليها شوية وبرجع ليكِ وقفل مكالمتو ـ م عارفة ليه لحظتها حسيت إني زعلت ـ واصلا البخليني ازعل شنو! اكيد دي حتكون حبيبتو ومن حقو يحب انا مالي! الكلام دة كنت بقولو لروحي من جوة ... فتحتة التلاجة طلعتة باقي سلطة الجزر وشلتة عيشة وقعدتة اكل ...
كنان : ماف اتفضل ..
لولو : اتفضل ...
كنان : بعد م فضلتة روحي براي ههههه ..
لولو : (ابتسمت وسكتت) ..
كنان : اعمل ليك معاي قهوة ...
لولو : لالا ـ لو شربتها حتساهر بي ...
كنان : سنان نام صح ...
لولو : اي نام من قبيل بس بعد تعب ...
كنان : هههههه ـ شعرك مالو منكش كدة طبعا دة حيكون سنان عمل فيك كدة ...
لولو : اي والله لمن جاني صدااع 😹 (فكت شعرها ورجعت لفتو كعكة واحدة)...
اثناء م كنا بنحكي جاتو رسالة في الواتساب فتحها ـ كانت فويس ريكورد ونسى يلبس السماعة ـ فاكر إنو لابسها ـ فتح الريكورد بالغلط والصوت كان صوت بت رقيق وكلو دلع كانت بتقول ليهو حبيبي وينك ـ كنان اتخلع وقفل الريكورد طوالي ـ انا عملتة رايحة ومواصلة في أكلي ...
كنان : طيب ي لولو تصبحي ع خير (ومشى غرفتو)...
والله يجماعة أنا حسيت بحرقان عديييل كدة ـ والاكل أبي لي ـ وكلمة حبيبي وينك دي بقت لي زي الصدى في أضاني ـ يعني كنان مرتبط وبحب! معناها المرة الفاتت لما قال حيتزوج قريب كان جادي! ـ طيب أنا مالي? وليه متحسسة! الموضوع عادي واصلا كدة كدة مصيرو يتزوج ..كنت بحاول اشغل روحي بالكلام دة

بس م قدرتة ـ م قدرتة عديل كدة ـ رجعتة غرفتي قريت اذكار النوم وعصرتة روحي حتى نمتة ...
تاني يوم بعد الفطور قلتة لماما إني حأرجع سنان بيتهم عشان أكيد أمو حتكون بالها مشغول عليه ـ قالت لي خلاص تمام, وحتمشي براك يعني عشان رزة في المدرسة ـ قلتة ليها اي حامش براي م تخافي علي بتك بقت كبيرة ـ قالت لي خلاص تمام ي بتي انتبهي على روحك ـ قلتة ليها حااضر ي ماما ...
سقتو ل سنان وديتو بيتهم ـ طبعا كلهم كانو مستغربين كيف سنان قدر يقعد معانا عادي من دون م يبكي ويقول انو راجع بيتهم ـ قعدتة معاهم شوية وبعدها إستأذنتة عشان ارجع البيت ـ إياد أصر يرجعني البيت رغم رفضي...
شال مفاتيح العربية من ابوه وركبنا ...
لولو : إياد والله م كان في داعي تعذب روحك اصلا المسافة قريبة كلها مواصلات وحدة بس وبصل ..
إياد : ماف أي عذاب والله وطالما في عربية ليه اخليك تمشي بمواصلات ...
لولو : طيب شكرا...
إياد : ماف بينا شكر ـ اها م حكيتي لي عنك وصلتي وين في المرحلة التعليمة ...
لولو : خشيت الجامعة شالوني تخدير ـ في الايام الجاية حننزل ان شاء الله ...
إياد : ي زوولة م شاء الله ـ متين خشيتي الجامعة سبحان الله السنين دي جارية سريع ...
لولو : فعلا والله ...
إياد : ملامحك زي م هي م اتغيرت شديد ـ بس احلويتي اكتر ♥...
لولو : (خجلت) من ذوقك ...
إياد : بتحبي تسمعي أي نوع من الاغاني ـ سوداني ـ عربي ولا غربي?
لولو : بصراحة م بسمع شي معين ـ بس الاغنية البتعجبني بسمعها ايا كان نوعها ...
إياد : حلوو ...
بعدها شغل خليجي لحسين الجسمي ـ وانا بمووت في اغانيه ـ بقيت بدندن براحة وبغني معاه ...
إياد : باين انك بتحبي اغانيه ...
لولو : شااااديد صراحة دة فناني المفضل ـ بحس اغانيه رقيقة وحلوة...
إياد : زيك كدة ♥...
لولو : (ابتسمت وخجلت لمن خدودها بقت وردية)...
إياد : معقولة دة كلو خجل ـ بس ع فكرة ابتسماتك حلوة شديد وانتِ خجلانة ...
لولو : إياد كفاية صراحة م بتحمل الكلام الحلو هههههه...
إياد: ههههههه طالما إنتِ حلوة معناها لازم تتحملي وتسمعي الكلام الحلو ....
اثناء م كنا بنحكي كنان اتصل علي ـ حمدتة ربي الف مرة انو جاتني مكالمة عشان اياد كلامو كلو بخجلني يخ
لولو : اهلين كنان كيفك ..
كنان : تمام الحمد لله ـ انت كيف وسنان لسة رايق ولا بكى ...
لولو : سنان رايق والله ـ واصلا رجعتو بيتهم ...
كنان : مشيتي مع منو?
لولو : براي ـ عشان رزة شغالة مدرسة...
كنان : ليه مشيتي براك كان تنتظريني لحدي م ارجع نمش سوا ...
لولو : مامشكلة اصلا المسافة م بعيدة واسي راجعة البيت ـ إياد وصلني بالعربية ...
كنان : يعني اسي كنان معاك ...
لولو : ايوة ...
كنان : تمام سلمي عليهو ..
لولو : طيب ـ مع السلامة ....(وقفلتة الخط)
كنان بسلم عليك ...
إياد : الله يسلمو ـ في الشغل هو صح ...
لولو : اي في الشغل ...
بعد م صلتة ـ شكرتو ل إياد وقلتة ليهو يخش يسلم على ناس البيت ـ قال لي مرة تانيةان شاء الله ـ بعد يومين تلاتة حيجي يطل علينا ـ قلتة ليهو تمام ـ عايزة افك حزام الامان عشان انزل بس علق وابى يفتح معاي ـ إياد قرب مني عشان يساعدني ويفك لي الحزام ـ كان قريب مني شديد لدرجة ريحة عطرو كانت قوية جدا وحسيتها جوة أنفي لمن دمعت ـ وبعد م خلاص فك لي الحزام حصل بينا eye contact ودي كانت أول مرة راجل غريب يقرب مني بالطريقة دي وعيونا تكون في عيون بعض ـ اول مرة انتبه إنو عيونو عسلية وجميلة ـ حتى حواجبو مرتبة وعريضة كأنو شايلاها تبارك الله ـ ـ انا طوالي كسرتة عيني وكنت مرتبكة جدا ـ نزلتة سريع ـ قلتة ليه شكرا وخشيت البيت ومن دون م اقبل ورا اعاين ليهو ...
........
* عند خلود *
عملتة منبه في تلفوني عشان اقدر اصحى بدري وم تفوتني المحاضرة زي المرة الفاتت ـ صحيت الساعة 5 صليت الصبح وقريت قران شوية ـ طلعتة شيتاتي وبديت اقرا مسافة زمن المحاضرة يقرب ـ بس للاسف تلات ارباع قرايتي فاتت سرحان م كنت قادرة اركز خالص زي الناس ـ زمن المحاضرة لما قربت استحميت ولبستة سريع ومشيت ع الجامعة ـ لما وصلتة عشان ادخل لقيت بطاقتي الجامعية ماف ـ وطبعا الدخول عندنا بالبطاقة ـ فتشتة شنطتي كلها بس م لقيتها ـ الغريب م قاعدة اطلع بطاقتي من شنطتي نهائي ـ قلتة معناها نسيتها في البيت ـ كلمتة الراجل البشوف البطاقات وقلتة ليهو بطاقتي نسيتها في البيت ـ قال لي دي اخر مرة المرة الجاية ماف دخول من دون بطاقة ـ قلتة ليهو تمام ـ مشيت القاعة وحضرتة المحاضرة ـ المرة دي حاولتة اني اركز وم اسرح عشان م انطرد زي المرة الفاتت ـ بعد المحاضرة خلصت مشيت النشاط طلعتة شيت المحاضرة ورجعتة القاعة قعدتة في اخر بينش وبقيت بحاول اراجع اخر محاضرة ـ وأنا مركزة في الشيت جاء واحد سلم علي وقال لي خلود مصطفى صح! استغربتة وبقيت بتساءل دة منو وعرف اسمي من وين ..

ـ قلتة ليهو ايوة دي انا ـ مد لي بطاقتي حقت الجامعة وقال لي دي بطاقتك صح ـ قلتة ليهو اي صح ياها بطاقتي ـ لقيتها وين ! قال لي الخميس لما اتطاقشنا بالغلط وحاجاتك الفي شنطتك وقعت بعد م رفعتيهم نسيتي بطاقتك م شلتيها ـ وسبحان الله في نفس اليوم جيت راجع في نفس الحتة الرميتي فيها حاجاتك دي وشفتة بطاقتك بالصدفة رفعتها فتشتة عليك وجيت قاعتكم بس لقيتك ماف ـ وياهو الجمعة والسبت كانت عطلة عشان كدة ي داب جبتها ليك اليوم
خلود: شكرا والله م قصرت ...
ولو العفو .... عرفتة انك بتدرسي اداب لغة عربية من بطاقة الجامعة ...
خلود : ايوا ...
انا مازن بدرس اداب لغة فرنسية خريج السنة دي ان شاء الله ...
خلود : م شااء الله ربنا يوفقك ..
مازن : امين جمعا ي رب ...
الولد كان بحاول يفتح معاي مواضيع ويتونس معاي ـ بس انا م عندي نفس ل الورجغات دي ومن جوة قلبي كنت بقول اللايوق دة مالو م عايز يتخارج يخخ ـ والحمد لله هو حس اني م مرحبة بوجودو جمبي ـ قال لي بعتذر اذا ضايقتك وقام مشى ....
........

إياد بقى متواصل معاي واتساب يومي برسل لي وبوريني تفاصيل يومو ـ مرات بتصل علي مكالمة بنحكي شوية وكدة ـ رزة بقت مشغلاها لي ـ لما تلقاني بحكي معاها مكالمة بتجي تقعد جمبي وبتشيل سماعة وحدة بتسمع بيها الا اطردها حتى تقوم ههههه ـ مع انو ونستنا عادية جدا بس انا م بعرف احكي مكالمة قدام زول .....
اليوم الصباح أيان قال لي بكرة ان شاء الله حتكون اللمة وحتكون مع العصريات خليك جاهزة ـ قلتة ليهو تمام بس انت حتتصرف وحتقول لناس البيت حنمش وين لاني م بعرف اكذب ـ قال لي ياااي ي ملاك وعمل معاها حركة مضحكة, والله ضحكني ضحك...
يوم الطلعة زااتها لحسن حظنا رزة كانت شغالة معسكر في المدرسة عشان امتحاناتهم قربت ـ كنان اليوم دة اتاخر في الشغل ـ ايان كلم ماما إنو عايز يختار هدايا لاصحابو وعايزني امشي معاهو عشان اساعدو في الاختيار وكدة ـ وعلى كدة طلعنا مشينا ع اللمة ـ كانت حلوة صراحة ـ انا كنت بكشف بس لحدي ما بقو يعملو مسابقات وكدة حتى لقيت روحي بشارك معاهم ـ قريب للعشاء حتى اللمة خلصت ــ كنت خايفة من ناس البيت اذا سألونا ليه اتأخرتو وكدة ـ أيان لما شافني خايفة قال لي إنت مالك خوافة كدة حنقول ليهم اتاخرنا عشان م لقينا مواصلات ـ فتحتة تلفوني عشان اشوف الساعة عاملة كم لقيت كذا اتصال من كنان ـ طبعا الفيني كملت...
لولو : ألحقني ي أيان لقيت 5مكالمات فائتة من كنان ..
أيان : خليك ريلاكس ي زولة ـ ارجعي ليهو وقولي انو اتاخرنا في المواصلات واسي ماشين ع البيت ... الحمد لله قافل تلفوني عشان عارفو حيتصل لي برضو ...
لولو : والله انت فايق ورايق وقلبك ميت ...
بلعتة ريقي واتصلتة على كنان ـ الجرس م تم ثانيتين رد علي وكان هايج ...
كنان : ليين إنتو ويين ومالك م بتردي على تلفونك..
.....كان معصب شديد باين من صوتو ـ وبعد م ناداني ب إسمي لين إتأكدتة إنو زعلان شديد....
لولو : م م م سمعتة تلفوني والله ـ احنا اسي ف ف في الطريق ر راجعين البيت .... (طق قفل الخط)
لولو : كنان معصب شديد ـ الله يستر بس ...
أيان : الموضوع ايزي يخخ ـ وبعدين احنا م شفع عشان يقعدو يستجوبونا + انتِ معاي م براك عشان م يقعدو يخافو ويعملو دراما...
لما نزلنا من المواصلات قبل م نصل البيت أيان خش بوتيك خم ليه كم عطر كدة وشوية حاجات عشان نثبت ليهم انو مشيتا نشتري هدايا وم نرجع ايدينا فاضية....
يتبع.....