*حكاية ريدة*
*الحلقة《11》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
الأيام مرٌت سريعة خلاس وبعد كتلة الطاهر ود الفقاد ومرقة التاية من الحبس بى شهرين في واحد من الحلٌة الورٌانية بقولولو جابر ود البلة بينو وبين خير السيد سرارة مي بعيدة بلحيل لكنها سرارة ساكت أها جابر دا جا اتقدٌم للتاية والتاية أبتو وخير السيد أبوها زعل منها ونضم معاها لمن فتر وإيدو وصٌلا ليها وهي قالت لو كتلوها مي دايراهو
ولمن حاج خير السيد غلب فوقا حيلة قال ليها
- الله يكفينا شرٌك يا الشوم أصلا من يوم ولدوك أنا عارفك شوم ولاكي زي البنٌوت ..
مرتو قالت ليهو
- دا كلام شنو يا راجل؟
- البت دي شوم ويوما الإتولدت فيهو ماتت حبوبتي الحرم ووقعت صاقعة في الحلٌة الورٌانية واليوم داك كان معاي شيخ الهوين قعد يتعوذ ساي وسبحتو من إيدو ما فكٌاها ولمن ولدوها وصرخت مما سمع صرخيها قام فات وقدر ما حبستو أبى يقنٌب ولمن كبرت شوية وديتا ليهو يعزم ليها قال لي
- البت دي أول ما تكبر عرٌس ليها طوٌالي والبجيك كلو ما تاباهو ولمن جا ود الفقاد خطبا أنا حمدٌت الله وعقدٌت ليهو طوٌالي مع إنهم جونا لى قولة خير وخطوبة ساي وانا حلفت وقلت عقد بس عشان أتكافى الشر والشر وقع دحين يا تاخدي ود البلة دا يا ياني الضابحك شخ؟
التاية قعدت تبكي والحصل دا كلو ما عندها ذنب فوقو وقالت لأبوها
- خلاس موافقة ..
يللا المشكلة مي هنا المشكلة كلام حاج خير السيد فوق التاية بتٌو الحلٌة كلها سمعت بيهو والمرقو منو وكيف مافي زول عارف وزي ما بقولوا الحيطة ليها أضان والكلام إنطلق في الخشوم زي النار في القصب حدٌاث يحدٌث حدٌاث لمن ورتابو اتٌطاير ووصل الحلٌة الورٌانية لى عند جابر ود البلة وأهلو وقفوا ألف أحمر والعجب أمو قالت ليهو
- لو أخدتها ماني عافية ليك عديل .. طوٌالي خلٌاها وخير السيد لمن جاهم لقى أهلو خطبوا ليهو واحدة قريبتو
________
منصور البوليس بعدما استلم الحواشة هيلت الفقاد بقى شايف روحو أغنى زول وعايش بالكضب ساي علي جاه حاج الفقاد وحواشتو وراكب حمار الطاهر ويومي بمشيبو الحواشة يعاين فوقا ساكت ويجي راجع وإيدو ما دخٌلا فوقا ويشيل ويتدين من الناس مافي دكان ما فتحلو فوقو دفتر جرورة حتى السكر بجيبو بيها والبسألو كلو بقول ليهو بعد الدرت ولمن يجي الدرت بفعل وبفعل وبسوٌي وبسوٌي والناس كلهم وكت الكديب نجٌضوا حشٌتن علٌا هو دنقير ساكت ما دنقر في الحواشة وحاج الفقاد ما جايب خبر لمن يوم جوهو البلٌال صرٌار عينو واللمين وقالوا ليهو
- السنة دي واقع البور ولا كيف؟
- كيفن الكلام دا؟
ورٌوهو بى سواة منصور لا حشٌاها ولا حرتا ولا نضٌف والفقاد نوى يقلع منو الحواشة البلٌال قال ليهو
- الزول دا خازوق وعفين ساكت بلدات بت المنا دمٌرا دمار أقلعا منو وانا واللمين أخوي دا برانا بزرعا ..
منصور جا إتعذٌر وبكى لحاج الفقاد وقال ليهو
- أديني آخر فرصة ..
بعد تعب وتحانيس حتٌين رضى ليهو وخلٌاها ليهو ومن اليوم داك منصور مسك مشهادو لكن لسه في عواليقو وسكرو ..
________
حامد كان أخدلو فترة قصيرة في كوستي وفيها صاحب ليهو واحد ضكيران إسمو خلف الله من جهة الديوم كدي شغٌال صياد سمك وحوٌاتي نجيض خلاس واشتغل معاهو لمن أشترولن مركب شالوها وفاتوبا علي بحر أبيض وقنٌب هناك قبلو لا لاقى زول بعرفو ولا فكٌر يرجع وإسمو زاتو غيٌرو سمٌى روحو الطيب ..
________
كتلة الطاهر وشردة حامد تمت ليها حول والحلٌة ما فوقا أي جديد يذكر والبوليس كاس لى حامد ما خلٌالو فجٌة وفي الآخر بقت القضية معلٌقة ساكت والضابط قدر ما كاس ولاس وساك ولاك وحقق مع جميع الناس كلو كلو ما لقى ليهو طرف خيط يتهم بيهو زول غير ود الحليو الطفش ..

________
يوم كدا حامد بعدما نزلوا من البحر خلف الله صاحبو سألو من أهلو حامد قال ليهو
- مالك داير تقلٌب علي المواجع وتفتح لي باب إنا قافلو وقاصد قفلتو وما بدورو ينفتح ..
قدر ما خلف الله حاول فوقو ما أخد منو لا باطن ولا ظاهر بس خلف الله عرف إسم حلٌتو بعدما ورٌاهو ليهو حامد براهو وخلف الله خاوى حامد وداير يعرٌس ليهو أختو بس ما عارف ليهو أصل ولا فصل ولا حصل حامد جاب ليهو سيرة أهلو ولمن ورٌاهو إسم الحلة اللى هو منها ما ورٌاهو ليهو قاصد مرقت منو ذلة لسان ساي أها دا قال علٌا يمشي يصل حلتن ويعرف قصٌتو شنو ومالو ما بدور أهلو ..
________
التهامي شاكٌي في المهدي ود بت الكاشف إنو عارف درب حامد طوٌالي بسألو منو وداك بنكر وبحلف ..
________
حامد عندو شنيطة صغيرونة كدا أها يوم خلف الله خلٌاهو لمن نزل البحر وما نزل معاهو اليوم داك دخل فتٌشا ما لقالو شيتن كدا يفيدو ويدلٌو علي أهلو لكن لقى فيها كم صورة من صور حامد شال واحدة منهن ..

يتبع ...

*حكاية ريدة*
*الحلقة《12》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
خلف الله فكٌر إلا يصل أهل حامد ويعرف قصتو شنو قال لأختو الداير يعرٌسا ليهو
- الطيب دا زول طيبان خلاس زي إسمو ومسكين الغنماية تاكل عشاهو وباين عليهو ود ناس وراجل كلس وخدوم وغير كدا أخو أخوان لكن قفلتو لى باب أهلو دي وقنعتو منهن حتى طريان ساي ما داير يطراهن قطع شك مي ساي ومن يومي السعلتو منهن وقال لي ما تقلٌب علي المواجع أنا بفكٌر في أهلو عشان كدي أنا مارق أعتر على أهلو ديل واعرف قصتو شنو إمكن أغيب لي كم يوم بقول ليهو عندي غرض كدي في الخرطوم ضروري ماشي ليهو وكان إتأخرت وشفق وسألك مني قولي ليهو أي كضبة ما تخلٌيهو يشك في إني مرقت في قفاهو عشان أعرف أهلو وقصٌتو ..
- كان داير كلامي خلٌيهو لمن يورٌيك براهو عشان ما يزعل من مشيتك دي وتبقى ليكم بفراق ..
- النصيحة عشان ما أكضٌب عليك ساي أنا الطيب دا ناوي أناسبو كان إنتي موافقة وما كنت داير أقوللك ولا أقولٌو علٌا بعدما أعرف أصلو وفصلو وهو لحدي يوم الليلة ما فوقو كلمة لكن باقي لي زي الداسٌيلو سر مني وانا ضروري أعرفو ..
- سر شنو؟
- الزول دا علٌا كان متدٌسي من شيتن وراهو ولا عامل ليهو عملة خلٌتو يشرد ويجينا هنا لأنو ما بدور ليهو زول يعرف عن ماضيهو أي شي ولا بدور زول يعرفو قاعد معانا هنا ..
- الخلٌاك تقول كدي شنو؟
- فراسة مني ساكت لأنو يوم لاقيتو وعرفتو في كوستي كان كاشٌي من الناس وحمد الله بى حلتنا الغايسة دي لمن قعد فيها والليلة ليهو أكتر من حول ما مرق منها شبر بس ساساقو البحر والبيت والبيت والبحر حتى الدويم القريبة دي أبى يفوت ليها معاي وزول زي دا لازم وراهو سر وانا لازم أعرفو الدٌايرو منك كان سعلك مني قولي ليهو أي كضبة ولا أقول ليك قولي عندو عملية فات يعملا وما داير زول من الحلة يبراهو ولا داير يتلتل زول ..
- تبرا يا يابا من العملية أها كان قال لي عملية شنو؟
- قولي ليهو بواسير ..
خلف شال صورة حامد دسٌاها في جزلانو ونزل علي البحر لقاهو في نصٌو داير الشبكة تب ناغم ليهو
- عووك هوي يا الطيب أمرق جاي دايرك أنا ..
حامد ما اشتغل بيهو رمى الشبكة هو والجماعة المعاهو فيهم واحد قال ليهو
- أبو خليف بناغم ليك ..
- سامعو وشايفو اللصبر لمن نمرق كلنا ..
خلف لمن شافو أبى يجي فات البيت وجاهم بعدما جرٌوا شبكتن تب ولمٌوا السمك ومرقوا ليهو ساق حامد قال ليهو
- أنا باكر كان الله حيانا شايل الخرطوم ..
- شن عندك فوقا؟
- عندي غرض صغير كدي ماشيلو وكنت دايرك تمش معاي ..
- أمش براك أنا ما ماشي معاك وغير كدا إنت عارف لازم واحد فينا يقنٌب هنا البحر ما بنفات لينا اللتنين
- أنا زاتي قلت كدا خلاس أنا بمش وامكن أغيب لي هناك يومين تلاتة وبشتري لي شبكة جديدة ..
- شبكتنا دي جديدة
- جديدة لكن بجيبا للزمن ساي عشان كان درنا نغيٌر دي ما نمش ليها تاني وما دام أنا أصلا ماشي أحسن أجيبا
حامد إتذكر المهدي ود خالتو بت ود الكاشف وفكٌر يكتبلو جواب ويوصٌف لى خلف الله فجٌتو لكن تاني غيٌر رايو لأنو ما داير خلف الله يعرف أهلو ..
اليوم التاني خلف الله لبس جلابيتو حقت العيد الفات وشنق طاقيتو وقال لى حامد
- ودٌعتك الله آ الطيب أخوي وماك داير وصية علي العقب والبيوت وابقى عشرة ..
وصل الخرطوم وبدا يسعل في السواقين والكماسرة عن حلة الشيخ الهوين لمن لقالو واحد بعرفا قال ليهو - هن حلٌتين صغار وميهن بعيدات من بعض حلة ورٌانية وحلٌة فوقانية .. ووصٌف ليهو العربات البوصٌلنو تب خلف الله مرق عليهن طوٌالي ركب ووصل هناك العصير ونزل في طرف الحلة الفوقانية ما عارف يقبٌل وين وأول زول لاقاهو النجح المعولق وكان شايل ليهو قزازة عرقي ماشي بيها علي منصور البوليس وخلف الله وقٌفو وقال ليهو

- أنا عابر سبيل وجاي كايس لي شغل لو خابرلك زول عندو حوٌاشة أشتغل معاهو ..
- وصلت تب وجيت في وكتك .. ساقو لى منصور البوليس قال ليهو
- لقيت ليك زول بنفعك ..
منصور مو زول زراعة ولا زول شغل وكسلان خلاس بشتن حواشة حاج الفقاد ساكت والنجح أخير منصور واللتنين شبهينا واتلاقينا ما فالحين علٌا في جغٌيم العرقي والترقٌد ومنصور لمن شاف خلف الله لقاهو قوي وظاهر عليهو نجيض وزول شغل من وشٌو وفرح ليهو تب لكن ما ظهرا ليهو وصرصر لى خلف الله وشٌو وقعد يساعل فوقو ما خلٌى شي التقول تحقيق في الآخر قال ليهو
- خلتس بشغٌلك معاي بس نحن تيربنا وزرعنا وبعد الدرت ما بقصٌر معاك لكن ماني محدد ليك شي ..
- أنا رضيان ..
وطبعا هو داير ليهو كم يوم يعرف فيهن أهل الطيب أو حامد ويفوت لكن دايرلو حجة يقنٌب بيها الكم يوم ديل أخد ليلتو ديك وقام فجر توٌر منصور وقال ليهو
- قوم أرح علي مشهادنا ..
منصور القومة تب غالباهو صحى وعيونو حمر قال لخلف الله
- إنت منو؟
بعد مسافة حتٌين ركٌز واتذكٌر إنو داير يشغٌلو معاهو حدر ليهو وقعد يتأمر سيد ولقالو عب وصٌف ليهو الحواشة وقال ليهو
- مش بى كرعيك ساكت وانا بجي لاحقك بعدين ورٌراهو يعمل شنو
خلف عرف الزول دا معولق لكن ما في عوجة يصبر الكم يوم ديل
المهم وصل الحواشة وشاف بشتنتا واتأكد تب إنو وقع ليهو في زول رمٌة ساكت بدا يتعرٌف علي جيرانو لمن قابل البلٌال صرٌار عينو وداك محروق شديد من منصور وورٌى خلف الله إنو الحواشة دي مي هيلتو هيلت عمو ومنصور دا حدٌو الموسم دا بس في الحواشة دي وهو صابر عليهو وساكت إحتراما لى كلمة عمو حاج الفقاد لكن تاني شوقو ليها بس ما ورٌى خلف الله القصة والمشكلة بقت كيف يسعل عن حامد إشتغل تلاتة يوم نضٌف فيهن الحواشة نضافة جد وعرف منصور والنجح اللتنين موهن نافعين وكان طوٌالي بتونس مع البلٌال بس ما سعلو وقرر يسعل النجح لأنو طرورة ساكت والزي دا أي شي في الحلة دي بكون عارفو وبى تفاصيلو إتحين الفرصة لمن إنفرد بيهو براهو ومرق صورة حامد من جزلانو وقال للنجح
- أمس وانا جاي من الحواشة وجمب الشديرات القريبة من الترعة لقيت لي صورة واقعة الظاهر حقٌت واحد من حلٌتكم دي ..
- كدي أشوفا ..
أداها ليهو والنجح نطط عيونو وقال ليهو
- دي لقيتا وين؟
- ما ورٌيتك هسٌي قلت ليك جمب شديرات الترعة؟
- دا حامد ود الحليو الكتل الطاهر ود الفقاد وشرد ..
خلف الله نطط عيونو ..

يتبع ...

*حكاية ريدة*
*الحلقة《13》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
خلف الله حاول ما يركٌز مع النجح كتير ولا يسألو من القصة دنقر رويسو ودخل الأوضة القاعد فوقا والنجح شال الصورة وجرى بيها لى منصور البوليس قال ليهو
- عاين دا ..
منصور شاف الصورة وانخلع وقال ليهو
- جبتها من وين دي آ السائب؟
- أداني ليها أبو خليف زولك دا قال لقاها واقعة جمب الترعة ..
منصور الفار لعب في عبٌو وبحكم إنو كان بوليس وخلف الله شغٌال عندو طوٌالي ناغم ليهو وداك جاهو وعامل فوقا ما مهتم شديد
- الصورة دي لقيتا وين؟
- زي ما قال ليك النجح لقيتا واقعة جمب الترعة ..
- عارف دا منو وعمل شنو؟
- شن خبٌرني ليهو؟
- أنا بسألك تسألني؟
- ها زول ها أنا بعرفو من وين؟
- خلاس خلٌيك في شغلتك ما تدخٌل نفسك في مشكلة ساي ..
اليوم التاني النجح كلم البلٌال قال ليهو
- الجنا الشغٌال مع منصور دا لقى ليهو صورة حقت حامد ود الحليو واقعة جمب الشديرات القريبة من الترعة ..
- والصورة عندو هسٌي؟
- شالا منو منصور وقال ليهو ما تتحشٌر في شيتن ما بخصٌك ..
البلٌال مشى لمنصور قال ليهو
- داير صورة ود الحليو اللقاها خلف الله ..
أبى يديهو ليها واللتنين مكجٌنين بعض وما بترايدوا واتشاكلو واتعامتوا فوقا شكلة وعوٌة ليها ضل جابت الفي الفريق داك ولمٌت فوقن الناس وحجزوهم بعد تعب والموضوع كبر ووصل للضابط جابن اللتنين وشال الصورة من منصور ونادى خلف الله زاتو وزنقو زنقة حارة وسألو
- جبت الصورة دى من وين؟
- لقيتا واقعة ..
- الصورة دي ما كانت واقعة جمب الترعة لأنها شبه جديدة والشمش ما شافتا أحسن تقول جبتها من وين؟
خلف بدا يبلع في ريقو وماسك في لقيتا واقعة الضابط جدع ليهو الصورة وقال ليهو
- عاين فيها كويس دا شكل صورة جاتا شمس؟
- إمكن وقعتلها من زول في نفس اليوم الأنا لقيتا فوقو ..
- الكلام دا ما مقنع واحد من اتنين يا إنت عارف الزول دا كويس وعارف الفجٌة المتدٌسي فيها وجاي تشمشم يا إنت الداسٌيهو وما عارف حاجة وجاي الحلة تعرف ماضيهو واهلو لكن غير اللتنين ديل تاني ما في شي وعشان ما تضيٌع زمنك وزمني ورٌيني الزول دا وين والجابك هنا شنو؟
- جيت مترزٌق الله وانا الزول دا لا عارفو ولا عارف فجٌتو ولا عارف حكايتو شنو ..
- حكايتو باختصار كدا الزول دا كتل ليهو زول وشرد ولو انت عارف عنو حاجة قولا أحسن ليك ..
الضابط جاب حاج الحليو قدٌام خلف الله أدٌاهو الصورة وقال ليهو
- صورة ولدك دى شفتها قبل كدا؟
- ما شفتها ودا القميص الكان لابسو يوم شرد ..
- الزول دا بتعرفو؟
- ولا حصل شفتو ..
- كان كدي الزول دا بعرف فجٌة ولدك واحتمال يكون داسٌيهو ..
إتلفت علي خلف الله قال ليهو
- شكلك ود ناس وطيبان وخلقتك وجلابتك وشكلك دا ما شكل زول عدمان ومفلٌس وجاى كايس شغل فضٌي جيوبك هنا ..
خلف الله فضٌاهن والضابط لقى جزلانو ملان قروش لى عينو قال ليهو
- لو ما ورٌيتنا حامد وين والجابك الحلة دي شنو ياني الحابسك ..
________
حامد من أول يوم عرف شنطتو دي في زول هبشا عشان عندو مشط بسرٌح بيهو وطوٌالي بختٌو في جيبا جمب الصور لقاهو مجدوع جمبها فتح الظرف الفيهو صورو عدٌاهن لقاهن ناقصات واحدة وعرف إنو خلف الله فات على أهلو ..
________
البلٌال جا لحاج الفقاد بعدما اتشاكل مع منصور وقال ليهو
- الزول دا تاني كان ختٌ كراعو في الحواشة بقطعا ليهو والحواشة التعب فيها الطاهر أخوي ما تخلي التوزة دل يبهدلا وكان ما شلتها منو ياني الكاتلو ..
اللمين أب تفة واقف في صف البلٌال صرٌار عينو وقال لحاج الفقاد
- أرح شوفا بى عينك الزول دا بشتنا كيف؟
حاج الفقاد مشى معاهم وحالة الحواشة تب ما عجبتو وخاف من صرٌار عينو يتكاتل تاني مع منصور قال لمنصور

- جيب حمار الطاهر دا وتاني الحواشة دي ما تمش عليها ما دايرين لينا مشاكل وحقٌك محفوظ والجنٌوي ديل بمسكوها وبجيهوها والبطلع منها بعد الدرت كلو عودك فوقو النص ..
منصور رجٌع الحمار وسكت وحالف ما يفوٌتا لصرار عينو مشى لة خالتو بت المنا في شان البلدات قالت ليهو
- عشم الكلب في موية الإبريق وطيلة ما أنا حية كان قعدت بور ما بديك ليها تاني ..
________
الحلٌة كلها سمعت بالزول اللقى صورة حامد ود الحليو والتهامي لمن عرف مشالو في المركز عشان يقابلو والضابط ما سمح ليهو وسجن خلف الله وكل يوم بحقٌق معاهو وخلف الله ماسك في كلامو اللولاني وأصلو أبى يغيٌرو لمن تم أسبوع والضابط لمن غلب فيهو حيلة قال ليهو
- آنت من وين وكان غشيتني ما بمرقك من السجن وبتهمك بتضليل العدالة ..
خلف الله ما قدر يكضٌب ورٌاهو بلدو الجا منو والضابط حرٌك ليهو قوة من أربعة عساكر لحلٌة ناس خلف الله أداهم صورتو وقال ليهم وقال ليهم
- أمشوا فتٌشوا حامد هناك وكلبشوهو وجيبوهو كان لميتو فوقو ولو ما لقيتوهو أسألوا منو ناس الحلٌة ..
القوة اتحركت وخلف الله ندم علي جيتو دي ..

يتبع ...

*حكاية ريدة*
*الحلقة《14》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
حامد هبشة خلف الله لى شنطتو وشيلتو صورتو زعٌلتو بلحيل وقال "الخوة لمن تجيب ليها تجسس وتصنٌت وظنون يبقى أخير عدما" قرر يبعد نفسو وجا اليوم داك راجع بدري من البحر سأل أخت خلف الله - أخوك فات وين ؟
- فات الخرطوم عشان يعمل عملية ..
- أخوك فات يكوس وراي ويعرف أهلي وخلف دا من يومي العرفتو ما شفتو شكالو من مرض يحتاجلو عملية ..
- ما وراٌني شي غير القلتو ليك .
- أخوك فات حلتنا وانا متأكد لأني لقيتو هبش شنطتي وشال صورتي وعرفتو فايت حلتنا وانا ماشي ولمن يجي قولي ليهو حامد قال ليك كتٌر خيرك ..-' حامد منو؟
- أنا ما إسمي الطيب إسمي حامد ولمن يجي أخوكي بلٌغيهو ما يكوس لي والبينى وبينو انتهت ..
طبق شنطتو ومرق فات واخت خلف الله قالت
"دي الأنا خايفة منها وقلتها لأخوي" قدر ما اترجتو وحاولت تمنعو ما قدرت قالت ليهو
- خلف أخوي محرٌسك البيت واهلو بتدور تفوت قبٌال ما هو يجي؟
- إنتوا وسط أهلكم وناسكم عوجة ساكت ما بتجيكم وخلف الله كان شغٌال في كوستي زمن ومخلٌيكم براكم يعني الجدٌ شنو هسٌى؟
مرق فات وسبحان الله قبٌال ما يتم ليهو ساعتين من مرقتو جا البوليس كابس دخلوا الحلة سألوا أول زول لاقاهم وورٌوهو صورة حامد وقالوا ليهو
- بتعرف الزول دا؟
عاين للصورة وما عاين فوقا كتير قال ليهم
- بعرفو بالحيل دا الطيب الحوٌاتي صاحب خلف الله وهسٌي بتلقوهو في البحر ..
طوٌالي فاتوا البحر سألوا من الطيب الحوٌاتي قالوا ليهم
- مرق الليلة بدري فات البيت وهديك مركبو فوق القيفة ووصفولم بيت خلف الله ..
مشوا دقٌوا الباب جات أختو قالوا ليها - دايرين الطيب ..
- الطيب فزٌ وفات ..
ما صدٌقوها دخلوا فتٌشوا البيت وجمعوا ناس الفريق قالوا ليهم
- الزول دا مجرم خطير كاتل ليهو زول وهارب والعارف فجٌتو يورٌينا ..
الناس ما صدٌقوا إنو الطيب يطلع مجرم وكاتل كمان قعد معاهم سنة ما شافوا منو شي ولا سمعوا منو ولا عنو شي عيشتو كلها كانت في البحر والبيت بجيهو زول نوم بس وكل الناس بريدوهو حتى خلف الله صاحبو والما بفارقو ويومي معاهو قال ليهم إنو حامد دا عمل في الحلة دي حاجات ما في زول بعملا ..
جا عمك كبير بقولولو حاج الصديق للبوليس قال ليهم
- لو مجرمكم الخطير الكايسين ليهو ياهو زاتو الطيب الكان معانا هنا دا إن شاء الله كلو كلو ما تلقوهو الزول دا ما بكتل عقرب خلٌيهو بني آدم الطيب دا بعرفا أنا بس وحتى خلف الله الشغٌال والساكن معاهو ما بعرفو حاج الصديق إنفتح فيهم لمن بكى وقال ليهم
- الطيب العرفناهو دا ود حلال وابدا ما مجرم ..
ناس البوليس فتٌشوا الحلة جت تلاتة يوم ما لقوهو وفي الآخر قعدوا منهم إتنين ورجعوا اتنين ..
________
خلف الله لمن البوليس فات حلٌتن وعرف إنو حامد مقبوض مقبوض وبقى أمام الأمر الواقع قال للضابط
- أنا فعلا بعرف حامد وبعرفو بلحيل وما داسٌيهو ولا عارف ماضيهو وجيتي هنا دي هو زاتو ما عارفا ولا حصل جاب سيرة أهلو قدٌامي ..
- لو هو ما عارف جيتك دي ولا ورٌاك أهلو إنت عرفتو من الحلة دي كيف؟
- وكيلي ووكيلك الله وماك طالبني حليفة هو ما عارف جيتي ولو عرف بزعل مني وانا إسم الحلة دي عرفتو منو بالصدفة ساي ذكرو فد مرة قدٌامي وما كان منتبه لى كلامو ولما انتبه غيٌر الموضوع كلو كلو ..
- طيب الجابك شنو وجبت صورتو من وين؟
- ما بكضٌب عليك حامد زول ضكران وانا داير أدٌيهو أختي لكن قلت أعتر على أهلو في الأول وان بقى في مشكلة بينو وبينن أحاول أحلها ودا الموضوع كلو بس أنا ما فكٌرت صاح لمن طلٌعت الصورة وقلت لقيتا واقعة ما كنت قايل في زول بفكر ليها وبعرفا جديدة ولو ما جبت معاي صورتو دي ما بقدر أسعل زول عنو بالوصف ساكت لأنو عندنا مسمٌي روحو الطيب وانا الصورة دى شلتها من شنطتو وهو ما عارفني شلتها ..

- كدي هسٌي أحكي لي بالتفصيل الممل من يوم اتلاقيتو لحدي ما جيتنا هنا ..
- أنا بحكي ليك بس يا ريت تنادي أبوهو عشان يسمع قصتي معاهو وعلي القسم لاني زايد فوقا حرف ولا ببقٌص منها كلمة ولا بكضٌب عليكم ..
________
التهامي فات لحاج الحليو لمن عرف إنو لاقى الزول الجا بالصورة والعارف فجٌة حامد وحاج الحليو ما ادٌاهو كلاما كدي فيهو فايدة والتهامي بقى يومي يجي مركز الشرطة يشمشم ويساعل وهمٌو كلو يعرف حامد وين
________
أفراد البوليس الإتنين رجعوا فاضين من حلٌة ناس خلف ودخلوا علي الضابط وورٌوهو كل الحصل معاهم وإنو حامد طفش تاني والضابط إتأكد فعلا إنو خلف الله صادق وما عارف أي حاجة عن حامد طلٌعوا من السجن وخلف فات بيت حاج الحليو ولاقاهو التهامي وبقى ليهو في رقبتو وما خلٌى سؤال في الدنيا ما سألو ليهو وخلف الله قعد يومين مع حاج الحليو في بيتو وقبلما يرجع أهلو قال لحاج الحليو
- ولدك ضكر وود حلال وما بكتل ..
بس المحيٌر خلف الله وحاج الحليو شردة حامد دي لازم وراها سبب فيا فعلا كتل الطاهر يا شارد من شي تاني ..
________
منصور كل يوم يسكر لط ويجيب المبرد ويسن السكين ويحلف ما برتاح إلا يبعج بيها البلٌال صرٌار عينو والنجح العوقة فات كلم البلٌال اللمين أب تفة جا لحاج الفقاد هو ومعاهو البلٌال وقال ليهو
- الدنيا قضت غرضا والبقى بقى وانا داير أعرٌس التاية زوجة المرحوم الطاهر ..
- علي العديلة ..
فاتوا التلاتة لحاج خير السيد خطبوها ليهو وحاج خير السيد قال ليهم
- أنا موافق علٌا عندي شرط واحد نعقد هسٌي والتاية تفوت معاهو الليلة لا زيطة لا زنبليطة ..
- خلاس أدٌونى أسبوع أدبٌر فيهو حالي وبيتي والجمعة الجايه نجي ناس عقد واسوقا معاي ..
________
التهامي فات مع خلف الله الحجل بالرجل وما خلٌالو بلدا كدي جهة الدويم إلا وسأل فوقو عن حامد ونهائي ما عتر فوقو ..
________
التاية قالت ما دايره اللمين كان بقى آخر راجل ما بترضى بيهو وكان تقعد بلا عرس لمن تموت وابوها حاج خير السيد يومي يغدٌيها بى دقٌة ويعشٌيها بى دقٌة ..
________
حامد جا الخرطوم للمهدي قال ليهو
- أنا ماشي ليبيا بالبر ساي ودي صوري شوف لي زول يطلٌع لي جواز ..
المهدي قعٌدوا مع أصحاب ليهو شغٌالين معاهو في الدلالة وما داير سفرو شال الصور وقال يماطلو لمن يشوف حتٌة غير ليبيا ..
________
الأسبوع تمٌ واللمين جهٌز حالو وبقى زول عرس تب وبكره على حسب الموعد العقد ومنصور البوليس شرب لمن وقف لمبة ومرق بالليل شايل سكينو واترتح يمين وشمال وجا للنجح صحٌاهو من النوم وقال ليهو
- قوم أرح معاي أنا ماشي أضبح البلٌال ..

يتبع ...

*حكاية ريدة*
*الحلقة《15》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
من يوم حاج الفقاد قلع حواشتو من منصور ودي المرة العشرين منصور يجي يتوٌر النجح من النوم ويقول ليهو أرح معاي نضبح البلٌال والنجح يقوم يجيب القزازة ويشيل ويكب ليهو وداك يشيل ويجغم لمن يبقى دلقان ويورجغ ويلغلغ لمن ينوم في فجٌتو والصباح يقول للنجح أنا الجابني هني شنو آ عولاق النجح عارف منصور طيرة ساي وهو زاتو طيرة ساي ومنصور إشتغل في البوليس زمن طويل مفروض يتغيٌر ويطلع علي الاقل زول عندو شخصية وهيبة ومكانة لكن طلع توزة ساي وديمة سكران والنجح زول عوقة ساكت وعايش بس وما في زول عادٌيهو زول يتحاوم في الحلة زي العنز الهاملة السيدا طالقا وما شغٌال بيها والصغار والكبار برسٌلوا فوقو واصلو ما بمسك سر وأي شي في الحلٌة عارفو وأي خبر بنشرو وهو النشر كلام خير السيد فوق التاية بتٌو يوم قال التاية شوم ..
________
خلف الله ما ندمان علي شي إلا على مشبتو حلٌة ناس حامد من غير ما يورٌيهو وفوتة حامد رغم إنها فرقت عليهو ووجعتو لأنها بسبب غلطتو لكن في نفس الوكت فرٌحتو لأنو البوليس ما قبضو بقى يكوس لى حامد ما خلٌالو فجٌة حتى كوستي محل إتلاقوا فات ليها والتهامي برضو كاس لى حامد لمن فتر ولا أثر ولا خبر ورجع الحلٌة وعقد اللمين أب تفة علي التاية بت خير السيد ما فاضل ليهو غير فد يوم ولمن سمعبو ولا كضٌب طوٌالي فات للمين في بيتو وقال ليهو
- أبعد من التاية ..
- داير تحاكي صاحبك آ عولاق أها لو ما بعدت منها نعلٌك بتضبحني زي ما حامد ضبح الطاهر؟
- أنا جيتك وورٌيتك دحين أخير ليك تبعد والله ..
- أبعد كيفن آ السايب وانا باكر عقدي عليها وبعدين تعال هني إنت الحشرك في الموضوع دا شنو؟
- ما عارف بس للمرة التالتة بقول ليك أبعد من التاية وانا فايت ولو راجل وقلبك محدٌثك أمشي أعقد عليها وشوف أنا بسوٌي ليك شنو؟
- دار تعمل شنو يعني أها يمين بكره أعقد عليها واعفصك فوق راسك ولو إنت راجل وود رجال تعال أمنعنى عشان أورٌيك العمرك لا سمعت بيهو ولا شفتو ..
التهامي فات منو مشى لحاج خير السيد في بيتو وقال ليهو
- داير أنضم مع التاية ..
- خير في شنو يا ولدي؟
- أنا جيتك عديل وقلت ليك داير أنضم مع التاية ناغم ليها تجي كلامي الداير اقولو ليها هى مو ليك ..
- دايرا في شنو؟
- ناديها وبقولوا ليها قدٌامك ..
حاج خير السيد ناغم ليها جات ووشٌها مورٌم من البكا والدق وابوها محدٌر ليها ومنفوخ التهامي قال ليها
- راضية باللمين المعولق دا ياخدك؟
أبوها طوٌالي نطٌ وقال ليهو
- التهامي الكلام دا ما بخصٌك أمشي يا بت بهناك أنا قايلك داير تقول كدي ما كان ناديتا ليك ..
التاية ما ردت عليهو وجرت جوه وهى تبكى والتهاني من بكاها عرفا مي دايره اب تفة وعرف إنو أبوها جابرا وداير يعرسا ليهو بالغصب قال ليهو
- يمين تتم العقد يا حاج إلا أولع نار في الحلٌة دي تحرق اللخضر واليابس
- إنت قايل روحك منو وتبقى لينا شنو عشان تتحشٌر كدا التاية بتٌي وانا حر أعرٌسا للدايرو غايتو يا شباب الزمن دا عينكم قوية وما عندكم أدب
- شوف يا حاج أنا التاية لا بتبقى لي ولا أنا ببقى ليها بس مافي زول بعرٌسا غير حامد ود الحليو ولو أكتل الحلٌة دي كلها ..
- معناتا إنت وود الحليو الكتلتو الطاهر ود الفقاد ..
التهامي فات والنجح وكالة الأنباء كان بتصنٌت وطلق الكلام في الحلٌة ووصل للمين واللمين فات المركز إشتكى التهامي والضابط جاب التهامي وسألو والتهامي أصلو ما نكر تهديدو الضابط قال ليهو
- الكلام دا بدينك يا التهامي وحاليا إنت غير التهديد متهم بقتل الطاهر ..
- أنا ما كتلت الطاهر لكن لو سجنتني مية سنة ومرقت لقيت المعولق دا عرٌس التاية بكتلو ..

- إذن أنا مضٌطر أسجنك وكمان أوجه ليك تهمة كتلة الطاهر ..
- حباب السجن بس زي ما قلت ليك الزول دا لو داير ليهو موتة وضبحة اللعرٌس التاية وقسما بالله كاتلو كاتلو
اللمين كان قاعد وسمع الكلام وبقى يبلع في ريقو ..
________
التاية لما كتر فوقا الكلام ودق ابوها ليها اليومي شربت ليها صبغة وقالت دايره تموت عشان ترتاح جروا بيها للدكتور ولحقوها وابوها لمن شافا عملت كدا بقى يبكي وندم علي دقٌو ليها ..
________
المهدي جا الحلة وعرف الأحداث دي كلها ومشى كلم بيها حامد ود الحليو وورٌاهو إنو التهامي حاليا في السجن ومتهم بي كتلة الطاهر ود الفقاد وقال ليهو
- أنا شايف بعد دا أحسن ترجع الحلٌة ساكت والبحصل يحصل ..
- دا المفروض أنا أسوٌيهو أها اللمين عقد علي التاية ولا ما عقد؟
- ما عقد يعقد كيف ياخ وهي شاربة ليها صبغة وقرٌبت تموت أنا سمعت بأنو أجٌلوهو وفي ناس قالوا أبوها يبكي ساي وقال ما بغصبا تاني علي زول ما دايراهو أها بترجع الحلٌة؟
- برجع لكن ما هسٌى لمن أشوف التهامي الببقى عليهو شنو ..
- ياخي التهامي دا كرٌهني عديل كل مرة ناطٌي لي يسعلني منك حامد ياخ أنا عندي إحساس إنك ما كتلت الطاهر؟
- الكتلو منو لو ما أنا الكتلتو؟
- والله إنت ما كتلتو ..
- بتحلف ساي وبتغالطني في روحي؟
- والله ما كتلتو أسمع حليفتي دي والله لو كتلتو نوم ما تنوم إنت قايل كتل الروح دا ساهل والله تجن عديل وانا والله ما وقفت معاك علٌا لأني متأكد إنك ما كتلتو بس ما درت ليك البهدلة والجرجرة في السجن وقلت تبعد لمن الكاتل ينقبض ..
- يا زول كتلتو وهسٌي دي لو اللمين عقد ولا خطب التاية برضو بمشي أكتلو ..

يتبع ...

*حكاية ريدة*
*الحلقة《16》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
كلام حامد للمهدي ما أقنعو والمهدي مقتنع تماما إنو حامد ما بعملا لأنو ود خالتو وبعرفو كويس وكلامو في خشمو ساكت لكن الكتل الطاهر منو دا المحيٌرو وعلى حسب شغلو في الخرطوم وبعادو من الحلة والناس ما قادر يتهم زول ..
________
التهامي كلو كلو ما فتر من الكواسة علي حامد صاحبو بعدما رجع من حلة ناس خلف الله وما جابتو إلا زراعتو والحواشة والدرت قرٌب وما بقدر يهملا ساكت وبعد عيشا لبٌن ما بدٌيها الطير أها عندو واحد قريبا ليهو كان دايرو يمسكا ويقول ليهو أنا مارق أكوس صاحبي والحواشة أمانة في ذمٌتك أبقى عليها عشرة لكن لمن سمع بى نضم اللمين فوق التاية وموافقة أبوها عليهو قعد وقال القالو وانسجن بى سبب قولو ..
________
حاج الفقاد ساق حاج الحليو وفاتوا المركز وقال للضابط
- جيناك في شان التهامي دايرنك تمرقو من السجن والتهامي دا نحن عارفنو بلحيل مما قام زول محترم ومالي مركزو والحلٌة كلها بتريدو وما حصل في زول سمع فوقو شيتن كعب وما الزول البكتل ..
- أنا الشغلة حقتي دى خلٌتني أعرف الزول المجرم من الما مجرم ومن نظرتي ليهو ساي عرفتو ما مجرم لكن تهديدو وحليفتو للمين غلط وعشان ما تقع جريمة تانية أنا حبستو وما بقدر أقول للمين خلٌي التاية دي حاجة ما بنتدخل فيها لكن بنقدر نمنع الجريمة قبل ما تقع بى حبس المهدٌد إذا اشتكاهو الزول القام بى تهديدو وانا ممكن أفكٌو في حالة واحدة إنو يتعهد ما يقرٌب من اللمين لكن التهامي مصر وما داير يتعهد وانا ما بقدر أفكٌو منعا للجريمة ..
- خلاس ناديهو لينا نتكلم معاهو بنقنعو نحن ..
اجابوهو والإتنين بدوا يحنٌسوا فوقو وما خلٌو ليهو شي في الآخر قال ليهم - إنتوا الإتنين الله يعلم ويشهد أبواتي وشدة ما بريدكم وبحترمكم والله لو طلبتوا رقبتي دي أختها قدٌامكن وانا التعهد بكتبو لكن اللمين علي القسم ما ياخد التاية وكتل ما بكتلو لكن مافي زول بعرٌسا غير حامد ..
________
خلف الله لسة بكوس وكلو يوم يتحسٌر علي جيتو حلٌة ناس حامد قال لأختو
- أنا مستحيل أسامح روحي علي الغلطة دي والزول كان معانا هنا أحسن زول لا شفنا منو ولا رأينا غير الطيبة وحامد الغنماية بتاكل عشاهو يقولوا كتل؟
- كاتل الروح ما بروح ومصيرو ينقبض إن بقى هو ولا غيرو ..
- والله قبل كنت داير أعرٌسك ليهو لكن الزول دا رايدلو بنيتا في الحلة حقتن غايتو قسمة لكنو زول ضكران بلحيل وانا لازم ألقاهو والخوٌة البيني وبينو ما بخلٌيها تنقطع ..
________
التهامي وقٌع علي التعهد ومرق وما قرٌب من اللمين بعدما عرف بى شراب التاية للصبغة فات لحاج خير السيد إتحمدل ليهو السلامة وقال ليهو
- البت دي ما تغصبا علي زول ما دايراهو ولا رايداهو والعرس يا حاج بالقوة وكسر رقبة ساكت مو صاح وزي ما إنت داير ليها السترة دور ليها السعادة ..
حاج خير السيد كلام شيخ الهوٌين فوق التاية أصلو ما رماهو في قفاهو وكتلة الطاهر بى سببا أكدتو ليهو وعوٌة التهامي وكلامو المتل كلام حامد للطاهر قبٌال ما ينكتل تم ليهو الناقصة واحتار في البسوٌيهو وكلما يشوف ليهو مره في الحلٌة ولا عروس أخدوها بدون مشاكل يقرٌب يحسد أبوها ويتحسٌر علي حالو ..
________
المهدي جا لحامد تاني قال ليهو
- سألتك بالله العزيز وحكيم كان إنت الكتلت الطاهر تورٌيني كلتو كيف؟
- ضبحتو شخ ..
- ياخ أنا حلٌفتك ..
- وانا ورٌيتك وقلت ليك ضبحتو شخ
- كيفن لكن؟
- تلٌبت بالحيطة وضبحتو شخ ..
- ياخ إنت ما بتعز الله؟
- المهدي مالك دايرني ألحٌقك ليهو ياخي عندك موضوع غير دا ولا ما عندك لا أقول ليك أنا زاتي فايت عشان ما كل مرة تجيني وتتبلٌه علي كدا ..

- فايت ماشي وين؟
- مارق في سقط لقط ماشي السما اللحمر ..
- ما بتفوت والله ..
- والله أفوت فوتة أنا كان ما خلف الله جا الحلة كان بتلقوني؟
- أعقل آ زول خلاس تاني أنا ماني ساعلك تب بس ما تفوت ولا فوت الحلٌة وكان كتلتو أخد جزاك وكان ما كتلتو الحق ببين ..
- أنا الحلة ماني ماشي وعملت لي شنو في موضوع الجواز؟
- بستلمو بعد كم يوم وبجيبو ليك ..
- دي المرة الكم تقول لي كدا؟
- ما مني ياخ الزول قال في الأسبوع دا بجيبو لي ..
- نشوف والكم يوم ديل بعدٌن ومتغطي الأيام عريان آ المهدي ..
- خابر خابر بس التأخير ما مني أنا ياخ قلت ليك ..
اللمين ساب التاية وبعد شرابا للصبغة قنع منها تب والبلٌال صرٌار عينو قال للمين
- والله يا اب تفة بقينا ملطشة ساي بى درب التاية بت خير السيد وانا كلام التهامي ليك دا حرٌم ما بعديهو ليهو ..
- داير تعمل ليهو شنو يعني ورٌيني آ المسخوت ..
- ما بورٌيك لكن بتشوف البسويهو فوقو ..
- يا زول ما دايرين لينا مشاكل وانا خاف خليت التاية عشان كلامو أبدا والله ما خليتا علٌا لى شرابا للصبغة ..
________
النجح يتحاوم في الحلة زي عنز السوق ويتخفٌس من بيت لى بيت راخي أضانو ديمة العفٌين ومنصور في عولاقو يا سكران ومتٌندل نايم يا قاعد يسن في السكين ويجغم في سكرو وكان قابل صرٌار عينو في الضلمة بحدر ليهو ..

التهامي تاني فات لخلف الله وقبٌال يفوتلو مشى للمهدي قال ليهو
- ما سمعت خبر عن حامد ولا جاك ؟
المهدي نكر حطب وقال ليهو ولا بالكضب
أم حامد من يوم ما جاهم خلف الله ودمعتا ما جفٌت وكل مرة تقول لحاج الحليو
- أمرق كوسو إمكن تلقاهو وامكن طاشٌي وما بدور يجي عشان طردتك ليهو ..
- كايسلو التهامي صاحبو ويتحاوم في قفاهو بكراع كلب ولو في زول بلقاهو وبجيبو ياهو هو ..

يتبع ...

*حكاية ريدة*
*الحلقة《17》*
*مجاهد يوسف*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​
التهامي مشى لى خلف الله عشان يمرق ويكوس معاهو لى حامد قال ليهو
- أنا الزول دا والله لو ما لقيتو ما برتاح ولازم تساعدني في الموضوع دا يابو خليف ..
- علي القسم وماك طالبني حليفة أنا جيت أمس دي من كوستي ومن يوم جيت من حلٌتكم ما قعدت في البيت وما خلٌيت فجٌة ممكن ألقاهو فيها إلا مشيتلا مشيت البحر وحلٌال البحر چت البعيدة والقريبة طول وعرض واسعل الحوٌاتة كان ماك مصدٌقني كلهم كانوا بكوسوا معاي وهديك مركبي أمش شوفا مقاديفا ناشفات ومن يومو الفات من حبلا ما حلٌيتا ..
- أها والراي؟
- الراي تاني نمرق نكوس والطيب ما أخوك ولا صاحبك براك قصدي حامد وهنا إسمو الطيب ..
- المشكلة نكوس ليهو وين إنت بتقول ما خلٌيت فجٌة وانا لي أكتر من سنة بكوس ..
- كدي النسعلك تاني يا التهامي من حامد دا وانت بتعرفو أكتر مني الزول دا أنا بحلف عديل ما كتل بس شارد من شنو؟
- أنا زاتي متأكد إنو ما كتل ..
- طيب الكتل الطاهر منو؟
- الله بس العالم وحامد ما كتلو لكن شردتو رمت التهمة فوقو وانا شاكٌي في المهدي ود خالتو ..
- شاكي إنو الكتل؟
- لا لا المهدي ما زول كتل أنا شاكٌي فى إنو عارف فجٌة حامد ..
- طيب أرح ليهو ..
- ياخي دا زي ود المويه ما بتمسك واكضب منو مافي وعادي يحلف ليك لمن يخلٌيك تصدٌق الما بتصدٌق زاتو لكن أنا شكٌي واحساسي كلو كلو ما بقع واطه وهسٌي جاتني فكرة إني أمش أراقبو ..
- بمش أراقبو معاك ..
- لا لا إنت خلٌيك في شغلتك شوف مشهادك وسمكك وبحرك وانا كان لقيتو بجي بورٌيك ولا رسٌلت ليك زول ..
________
البلال صرار عينو لمن جن الليل مرق يتلبٌد وفات لمنصور البوليس في بيتو لقاهو يشرب ويسن في سكينو ومن كترة السن بقت زي الموس كان ركٌت فوقا ضبٌانة ساكت بتقطعا النص منصور حمٌر فوقو وقال ليهو
- شن جابك آ عولاق؟
- جيت مغرود فيك ..
- غرضك ما مقضي تب وامرق من بيتي قبٌال أقوم عليك أبعجك ..
- تبعج ليك زول في نص بيتك؟
- إنت تستاهل يبعجوك لو جوٌه جامع ..
- ليه سوٌيتلك شنو أنا؟
- سوٌيت لي شنو شيلة حاج الفقاد للحواشة والحمار مني بى سببك آ كلب شدة مي موجعاني لمن هدا أنا قاعد أسن في السكين دي يومي ليك
- الحواشة والحمار اللتنين برجعن ليك وسكينك البتسن فوقا دي حوبتا جات ..
- كيف؟
- دايرك تكتل بيها التهامي وعليك أمان الله الحواشة تنكتب بى إسمك عديل ..
- التهامي أكتلو في شان شنو؟
- في شان تنكتب الحواشة بى إسمك
- وكان البوليس قبضني؟
- ما بقبضك ..
- يا زول هوي أبعد مني أنا ما بكتلو
- التهامي مكتول مكتول وانت عرفت بى كتلتو قبٌال ما تقع دحين يا تكتلو يا إنت بتنكتل قدٌامو ..
- البكتلني منو؟
- بكتلك أنا دا عشان ما تشهد ضدي
- هوي يا صرٌار عينو أبعد مني أنا لا بكتل ولا داير الحواشة ولا بشهد ضدك أختاني كدي ..
- بتكتلو بى سكينك دي وانا داير كتلتو دي إنتقاما للطاهر لأنو هو الكتلو ..
- التهامي كتل الطاهر؟
مافي زول كتلو غيرو ..
- خلاس نبلٌغ البوليس أحسن مما نكتلو ..
- البوليس كان نافع كان قبض حامد ومن يوم الليلة دي حقٌنا بناخدو بضراعنا ونحن بدل نتخاصم في كلام فاضي أخير نبقى يد واحدة وننضٌف الحلٌة دي من متل العوٌلق ديل كتلة الطاهر وضبحتو في نص بيتو حارة بلحيل وكان سكتنا عليها مانا رجال والكلام القالو حامد للطاهر في شان التاية جا التهامي قالو للمين واللمين كان ما خاف وساب التاية كان ضبحو زي الطاهر ونحن نقعد نعاين لأولاد الفريق داك يتحكٌموا فينا كدا لمتين ما فضٌلوا إلا يلبسونا الطِرح زي العوين الطاهر عقد قالولو تطلٌق ولمن ما طلٌق ضبحوهو واللمين جا يخطب قالولو أبعد من التاية وخاف وخلٌاها البسكٌتنا شنو نحن؟

- والله يا البلٌال أنا ما عندي شغلة بيكن وباقي على سكري وعواليقي دي لمن ربنا يهديني واتوب منها لكن روح كدي يمين ما بكتلا وانا عمري دا كلو بوليس ما ببقى بعدما كبرت مجرم وكتٌال وكان لى سكيني البسن فوقا يومي دي والله بسن فوقا زعل منك ساكت لكن كتل ماني كاتلك ولا كاتل غيرك ..
- خلاس خشمك وعندك صم بكم كان داير تعيش وكأني ما جيتك ..
- كأنك ما جيتني ولا شفتك ولا قلت لي ولا قاولتك ..
البلٌال مرق منو لكن ما مطمٌن من ناحيتو وكان قايل لمن يقول ليهو بدٌيك الحواشة على حسب سكرو بعمل أي شي لكن ظنو خاب وفكٌر في النجح لكن تاني قال داك أخير عدمو أحسن حاجة أكتلو براي لكن ما في شي بضمن لي منصور ما ينضم إلا أنتهي منو هو أول ..
اليوم التاني منصور حمد الله لمن عرف التهامي ما قاعد في الحلٌة وخاف من صرٌار عينو يغدر بيهو مرق من الحلة فات وتاني ما جاها راجع ..
________
المهدي جا الحلة ساق أمو وخالتو أم حامد ودٌاهن الخرطوم عشان يشوفن حامد أم حامد قالت ليهو
- إلا ترجع معانا الحلة ..
- إلا كان قنعانة مني ساكت أنا كان رجعت بنسجن ..
وأبى يرجع ..

يتبع ...