انا من اكتب حسين العبره تخنكني ابجرح
ومن أنادي يا حسين جني طير ومنذبح
****&&&&&&&&&&&&&

الوادم بعالم تسولف وانا سالفتي الحسين
وانا نايم احجي بيهه يلا شعور ابجي ابونين
اصحى والكه ادموعي تجري بجفي الطم عل جبين
ومثل نشغة طفل انشغ وادعي ربي يا معين
بكل صباح وكل مساء
ابقى عل حب والوفاء
وماتغيرني السنين حب ابو اليمه ربح
ومن أنادي يا حسين جني طير ومنذبح
○○○○○○○○○○○○○○○○
سولفولي اشكد سوالف عل عشك والعاشكين
عشك عن نزوة عواطف مو عشك وعي ويقين
هذا يا مجنون ليلى واهم وأصبح رهين
مومثل عشك ابو اليمه شافعآ للمذنبين

هل عشك مابيه شقاء الحمد لله بكل دعاء
يشفع النه وفائزين ويبني ألنه اكبر صرح
ومن أنادي يا حسين جني طير ومنذبح
○○○○○○○○○○○○○○
استمع دكات كلبي من الزغر تنبض عشك
وكلبي باصم هو كلبي اشلون عن كلبي افترك
حسين هو سر وجودي ابلا هواه انا اختنك
ومثل حرك اخيامه روحي من اذكرى تحترك

واستمع صرخه ونداء من ضميري للسماء
بروحي وبكلشي أدين وغير دربه ما يصح
ومن أنادي ياحسين جني طير ومنذبح
○○○○○○○○○○○○
ارسم الطف بخيالي ابريشة الحب والوفاء
ونحر عبد الله ارسمه سايله منه الدماء
والجفوف الكلهه خوه اتعنونت رمز الفداء
لوحة الطف الحزينه ملحمة حب وعطاء

ملحمه اتربي النفوس تضحيه وأروع دروس
بيهه ضحى المتقين ويه الظلم ماكو صلح
ومن أنادي يا حسين جني طير ومنذبح
○○○○○○○○○○○○○
ألماله اول ماله تالي هذا معروف المثل
حسين أول شي مؤكد وبيه كلشي اكتمل
هو اجمل وطن عندي مثل أبوه خير العمل
أعلن انا بكل صراحه كلبي غيره ماقبل

عن هواه لا ما أحيد ابحبه اتمنى شهيد
هائم ويه الهائمين بكلب كل حاقد رمح
○○○○○○○○○○○○○
دوم صافي ونيتي بيضه هيجي رباني الامام
ورادني ما خون واحد ورايتي اترفرف سلام
والظلم رايد ارفضه ورفض الذل والظلام
وابد متغرني المناصب الدنيا تاليهه حطام

السلطه والكرسي زوال حسين ماعوفه محال

هو ثالث قبلتين وهو آيات الفتح




الشاعر ♢ هادي الساعدي

خير الاعمال الصلاة على محمد وال محمد 🌺

اللهم صل على محمد وال محمد 🌺

يلحباب.      گمت اتنفس انا ويه الهوى اجروح.  
يلحباب.     بعدكم بس جسد رجعولي الروح. 
       ،،،،،،،،،،،،،،،،،،،،،،،،،،،،

مشيتوا وما ترجعون.   و شيقنعلي العيون
اگلهه  ما   تنامين     تفز وحدهه الجفون

جرحي ماله مقياس   بجى احساس الاحساس
من آثار   الافراگ.      شابت حتى الانفاس
يلحباب گمت اتنفس انا ويه الهوى اجروح
يلحباب.  بعدكم بس جسد رجعولي الروح
،،،،،،،،،،،،،،،،،،،،،،،،،،،،،،،،،،
هايه الدنيا سفره      الكلمن  تبقى ذكره
وذكراكم يطيبن.   عشتوا بروحي حضره
اشما الكم انه اشتاگ.  وتسعر نار الاشواگ
احجي وي صوركم   يبجي عيني الافراگ

يلحباب    گمت اتنفس انا ويه الهوى اجروح
يلحباب.     بعدكم بس جسد رجعولي الروح
         ،،،،،،،،،،،،،،،،،،،،،،،،،،،،،،،،،،،،،
ما غابت شمسكم.   ظل حاظر امسكم
ياهو الگال ميتين   ونبض گلبي اسمكم

كل ساعه انظرالباب.  من ايهب هوى الهاب
وفز فزة مجانين.     ليش الهسه غياب

يلحباب    گمت اتنفس انا ويه الهوى اجروح
يلحباب.     بعدكم بس جسد رجعولي الروح
      ،،،،،،،،،،،،،،،،،،،،،،،،،،،،،،،،،،،،
ماكو منكم أخبار.   لاصاحب  ولاجار
لو جابوا ذكركم.     ابجي مثل الزغار

اجيكم للمگابر.    وتصب دم النواضر    
من ابجي وايس.    ارد مكسور خاطر

يلحباب    گمت اتنفس انا ويه الهوى اجروح
يلحباب.     بعدكم بس جسد رجعولي الروح
،،،،،،،،،،،،،،،،،،،،،،،،،،،،،،،،،
حيلي بقوة الجبال هسه ذرة ارمال
تهزني هبة الريح حزني احتلني وصال

ومو تدرون احبكم. موتي في بٌعدكم
امنيتي يلعزاز. ترجعون واشمكم
يلحباب    گمت اتنفس انا ويه الهوى اجروح
يلحباب.     بعدكم بس جسد رجعولي الروح

الشاعر،، هادي الساعدي

يا عليل الغاضريه شفت لوعات و أذيه
يعين كلبك بالطفوف راس مكطوع وجفوف
ودعت أهلك سويه
**********************
تنزف آهات ومواجع دامي كلبك منجرح
جسم ابوك مكطعينه والجرح فوك الجرح
وكطعوا من جفه خنصر على الغبره منذبح
وانت بعينك تشوف راس مكطوع وجفوف
ودعت اهلك سويه
**********************
الله ايعينك أمامي تنضر أنت ما جره
شفت عبدالله ومصابه انذبح من منحره
ودمه ينزف من وريده اشلون كلبك ياتره
كله احساس وعطوف راس مكطوع وجفوف
ودعت اهلك سويه
*************************
بالعمود البدر صابوا وصابو الجربه أبسهم
اليمنى كطعوهه ويساره طاح شيال العلم
جوده ينزف بالأخوه وتننتظر جيته الحرم
صابته اسهام الحتوف راس مكطوع وجفوف
ودعت اهلك سويه



2

تصرخ اطفال الهواشم ورده ذبلانه غدت
وسكنه تصرخ واين ابونه نارهه لا ما هدت
وحركوا أخيام المخيم ابهاي أميه أتعمدت
ومو ألف جانوا ألوف راس مكطوع وجفوف
ودعت اهلك سويه
***********************
ألهظيمه اتشوف زينب ينظر أعليهه المله
والشمر يحدي ابضعنهه ويمشي وي القافله
هذا موقف حيل مؤلم يا هو غيرك يحمله
أميسر تحوطك صفوف راس مكطوع وجفوف
ودعت اهلك سويه

الشاعر //هادي الساعدي

رقيه اميسره وتصرخ يوالينه
تصيح ابصوت وينك بويه حاجينه
**************************

تصيح بصوت بويه يا ضوه عيوني
من بعدك يتيمه الكل ينادوني
اذتني الليالي وغيرت لوني
بالهم والحزن وألون تعادينه
*********************
أريدك هسه بويه تحظر النه اليوم
وخبرك عل جرى لا ما رعونه الكوم
جفني ما غمض ما شاف لذة النوم
يغمض يوم تحضني وترد لينه
**********************
يا خيمه وتلمنه ابعشك تجمعنه
جحيم الدنيا من غيرك بلا معنه
بيهه ضاع املنه بعدك وضعنه
راحل لو ترد يا بويه نادينه



2
ما ظل صوت عندي بس ألم وآهات
ورده وذبلاهه الحزن بالويلات
على الخدين تنزل نار مو دمعات
تلسع جمرته و بعدك يأذينه
********************
تشب وسط الكلب نيران تجويني
يا سلوة حياتي واغلى من عيني
انادي وين راحل ما تحاجيني
ترد بينه الحياه لمن ترد لينه



الشاعر // هادي الساعدي

☆قصيده إلى الامام الحسن المجتبى ع ☆

سبط النبي واسمه الحسن كله شهامه ومكرمه
سيفه يعادل مية الف معروف وكت الموزمه
~~~~~~~~~~~~
جم معركه البيهه نزل ابصفين وبيوم الجمل
عل ميمنه وعل ميسره يحصد اركاب اهل الجهل
التاريخ عنه ما حجه ولا يذكر الصار وحصل
حامل لواء المرتضى واعدائه تشرد لو حمل

يحمل شجاعة حيدره يرفض الذل والمظلمه
سيفه يعادل مية الف معروف وكت الموزمه
~~~~~~~~~~~~~~
متربي بحضان النبي ومن كل صفاته مقتبس
سبطه وحبيبه المؤتمن نوره يشع مثل الشمس
اتصفحنه زين بسيرته من عدهه ناخذ جم درس
قائد سياسي ومقتدر حير أرباب اهل الرجس

ما واجهوه وجه ابوجه سمته جعده الظالمه
سيفه يعادل مية الف معروف وكت الموزمه
~~~~~~~~~~~~~~~
لو نفرض احنه بس فرض شاهد وحاضر كربله
وبسيفه ايصول الحسن ضد الجيوش الجاهله
وياه ابو فاضل سوه يا زلمه هذا اينازله
من خوفه يموت الشمر ويذبح بروحه حرمله

والجيش ألبسبعين الف يرجف يظل ويهزمه
سيفه يعادل مية الف معروف وكت الموزمه
~~~~~~~~~~~~~~~
بوصافه يحتار العقل عالم عظيم المنزله
وارث علوم المصطفى تسهل عليه كل مسأله
من توكع ابشده وخطر أندب أمامك وسئله
لا ما يرد واحد أبد يوكفلك ابكل معضله

هاي الكرامه واضحه وبيه تفتخر ارض وسمه
سيفه يعادل مية الف معروف وكت الموزمه
~~~~~~~~~~~~
قران آيات ودرر منطق الحكمه والعلم
طبعه التسامح والكرم ونبع الموده والحلم
جامع صفاة المرتضى اصل المحبه والسلم
وللدين كل عمره نذر حارب طغاة اهل الظلم

والكل محب خيمه ووطن ابن الرساله وفاطمه
سيفه يعادل مية الف معروف وكت الموزمه

الشاعر. ... هادي الساعدي
2018/10/11

الى الامام الحسن (ع)

باجر المهدي يبني كبتك

وابد ما تنمنع عنه ازيارتك

*****************
باجر ابن الحسن ياخذ حيفه
وبيده ذو الفقار يلمع سيفه
ويبقه كل الامر هو بكيفه
تظل ترجف منه ناس ألظلمتك
وأبد ما تنمنع عنه ازيارتك

*****************

يبني الكبه ويعلي اصروحك
ياخذ ابثارك يظمد اجروحك
واحنه ندخل مرقدك ونوحك
وبيدنه اترفرف رغمهم رايتك
وابد ؛ما تنمنع عنه ازيارتك

*****************

المناره تنبني وتعلى اكيد
ازورك احبابك ملايين ومزيد
والطغاهو تنتهي بالذل وتبيد
والعفو تطلب الناسة الضدتك
وابد ما تنمنع عنه ازيارتك

***************


اهناك يمك سيدي انقيم العزاء
ويانه تلطم حتى املاك السماء
انصيح يا مسموم وتسيل الدماء
وتجي من كل صوب ناس الحبتك
وابد ما تنمنع عنه ازيارتك

*******************

ايصلي المهدي ابضريحك يا امام
وخلفه انصلي ويطرد كل ظلام
ومن نطوفك يفرش اجناحه الحمام
ويا هلا ومرحبا تنادي شيعتك
وابد ما تنمنع عنه ازيارتك


الشاعر //هادي الساعدي

( قصيده إلى الامام الحسن المجتبى ع )

الف الشكر والحمد وبكل دعاء اجتهد
تقبلني خادم الك
يا سبط طاهه النبي
○○●○○●○○●○○●○○
لجلك اصب الدمع واحترك خيط ابشمع
يا مالك إحساسي
مولانه يل مؤتمن خادم الك يل حسن
انا وهلي وناسي
وانا بخدمتك ملك يابن الصميده علي
وبيهه افتخر عل بشر ولا ما بهم عاذلي
وكلمن يضدك هلك
يا سبط طاهه النبي
○○●○○●○○●○○●○○
يفتخر بيك الكرم خفاق رايه وعلم
معروفه اخبارك
كلبك يدك عاطفه وعل لي يضد عاصفه
ومعروف بتارك
وهذا الدليل الصلح رضخوا الك وقعوا
ونطيت الهم درس مو مثل ما ادعوا

وفايز الدربك سلك
يا سبط طاهه النبي
○○●○○●○○●○○●○○
تبقى انت اغلى محب موجود وسط الكلب
وبحبك اتباهه
من نهجك اتعلمت عل ظلم لا ما نمت
يبن النبي طاهه
نهجك نهج والدك فارس وكلك عزم
بالمعركه لو صلت ترجف تظل الزلم
وبيهم يضيك الفلك
يا سبط طاهه النبي
○○●○○●○○●○○●○○
جعده التي سمتك وتكطعت جبدتك
نزفت دموع الكون
واكبر جريمه جنت . ووياهم اتآمرت
معروف اليغدرون
القرآن لجلك نزف وكل حرف ينزف جرح
أحكام آلرساله تون عادل وكلبك سمح
وام الصبر تنظرك
يا سبط طاهه النبي
○○●○○●○○●○○●○○
بعضايه كلشي يون وكل لحظه كلبي يحن
ومشتاكه الك روحي
اتمنى يمك اجي ولطم واشبع بجي
وما بطلت نوحي
واشتم هواك بقرب واتنفسك كل وكت
وعلن امام الملئ ابحبك اجن وهمت
يل ما ترد زائرك
يا سبط طاهه النبي

الشاعر .... هادي الساعدي

اللهم صل على محمد وال محمد

في زمن يمطر مئاسي.  
والفرح ماجانه ناسي
بس دمع حزن وانين. 
ابطبعه ليش الزمن قاسي
منهو يسئل عن وضعنه 
كلهه تركض عل كراسي
        ٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
          في زمن ذبحوا فرحنه 
          وعل وجن يسبح دمعنه
         نحجي ومحد سمعنه
           ابموتنه تعقد اماسي
          
   ٪٪٪٪٪٪٪٪٪٪٪٪٪٪٪٪٪٪٪٪٪٪
في وطنه انعيش غربه 
موغريبه ولاهي عجبه
مثلي دمك هم تصبه
و تبجي لجلك هاي ناسي
      ٪٪٪٪٪٪٪٪٪٪٪٪٪٪٪٪٪٪٪٪
      ليش دمنه الكل تريقه
      اسئلك وين الحقيقه
      ذبلوا وردي ابرحيقه
      ياوطن خنگوا انفاسي
     ٪٪٪٪٪٪٪٪٪٪٪٪٪٪٪٪٪٪٪
في زمن شد الايادي
وجوره وظلم الاعادي
الموت يفتر في بلادي
وحطم الرقم القياسي
          ٪٪٪٪٪٪٪٪٪٪٪٪٪٪٪
وين اهلي وين اخوتي
بس صدى ايرد اعله صوتي
انت جنتي وانت موتي
يا وطن تبقى اعله راسي
      ٪٪٪٪٪٪٪٪٪٪٪٪٪٪٪
ظلمه من دونك نهاري
ما اعوفك وانت داري
موقفي هذا وقراري
عايش ابدمي ونفاسي
    ٪٪٪٪٪٪٪٪٪٪٪٪٪٪٪٪٪
يكفي هذا الصار بينه
اتامروا كلهم علينه
خلوا اطواق ابأدينه
والسبب هذا احتراسي
      ٪٪٪٪٪٪٪٪٪٪٪٪
ندعي من رب العباد
يرحم ابهذا البلاد
مانزع ثوب السواد
ثوب ملبوس واساسي.


الشاعر هادي الساعدي
      

اللهم صل على محمد وال محمد

اشلون حال الحسن هاي الليله
حسين يمه ينادي ونهد حيله
اويلاه يا فاطمه


○○○○○○○○○○○○○○

المدامع نزلت ابشوك وحجن اويلاه يا فاطمه
كل عيون العالم بحركه بجن اويلاه يا فاطمه
اجمل سنين الحياه هسه انتهن اويلاه يافاطمه
نزفت اجروح الأمام المؤتمن اويلاه يافاطمه
انتي روحه ودنيته وكل حياته وسلوته

عل الوجن دمع المحنه يسيله
حسين يمه ينادي ونهد حيله
○○○○○○○○○○
الدنيا حزنت وعلنت حالة حداد اويلاه يافاطمه
وبدلت ثوب الفرح لبست سواد اويلاه يافاطمه
اي وحق طاهه النبي ورب العباد اويلاه يافاطمه
ونت وناحت اهل سبع الشداد اويلاه يافاطمه
وناح كل هذا الوجود والحزن عم ويسود
تواسي طاهه المصطفى وتبجيله
حسين يمه ينادي ونهد حيله
○○○○○○○○○

اسيا ومريم وهاجر والنساء اويلاه يا فاطمه
مآتم ايقيمن وضجن بالبكاء اويلاه يافاطمه
والمدامع سالن اعلل خد دماء اويلاه يافاطمه
واسن بهل اليوم سيد الأنبياء اويلاه يافاطمه

الكوثر ابعز الشباب ماتت ابلوعه وعذاب
واليضدهه خاسر ويا ويله
حسين يمه ينادي ونهد حيله

○○○○○○○○○○○
يا الم متحمله زينب يا ألم ا ويلاه يا فاطمه
اروي ياتاريخ دون ياقلم اويلاه يا فاطمه
اليسمونه صحابي اشكد ظلم اويلاه يا فاطمه
ابدار فاطم شعل نيران وهجم اويلاه يا فاطمه

وسقط محسنهه الجنين ابيا وضع ام الحسين
اتنادي بويه المصطفى وتشكيله
حسين يمه ينادي ونهد حيله
○○○○○○○○○○○○○○○○

اوف من غدر الوكت وأهل الزمان اويلاه يا فاطمه
انصاف ما عدهم ولا عدهم آمان اويلاه يا فاطمه
خله صوت النذل يعلا والجبان اويلاه يا فاطمه
وكسر ضلع ام ابيها ام الحنان اويلاه يا فاطمه
هذا فعل المجرمين والطغاه والكافرين
مثل فعلة ابرهه وي فيله
حسين يمه ينادي ونهد حيله

الشاعر .. هادي الساعدي

لا تجامل احجيهه وعلنهه بصراحه
لا تجامل من كسر ضلع الوديعه
لا تجامل لا تجامل
*******؟***************


ليش تخفيهه الحقيقه يا موالي كافي سكته
يروي التاريخ النه عن صخابي وعن فعلته
كوم ورفعهه الظلامه البعض كاتلني صمته
من غصب حق الوديعه كشف عن غدره وجرأته
لا تجاهل ابد حقج ما نبيعه
لا تجامل من كسر ضلع الوديعه
لاتجامل لا تجامل
*******************

جم سنه والشيعه تصرخ والدمع ويانه لاطم
بكل سنه ذكرى وفاتج انقيمهه وننصب مئاتم
للغصب ة حقج نفضحه نكولهه ونعلنهه ظالم
شاعر ومله يردد يا لثاراتج يفاطم
لا تساهل هل الأمر للكل نذيعه
لا تجامل من كسر ضلع الوديعه
لا تجامل لا تجامل

***********************

عل حرامي الشمس تطلع لا تظن ما ينكشف
اشما يزور بالوثائق امبين وهم ينعرف
الما مشى بقوال طه وعن مساره منحرف
هذا منحسبه صحابي واله ما نذكر حرف
لا تنازل ولأمركم بس نطيعه
لا تجامل من كسر ضلع الوديعه
لا تجامل لا تجامل

*****************
بت محمد وبخصاله تشبهه في كل صفاته
ليلهه تخلصه عباده مثل ابيهه في صلاته
أم ابيها وصفاهه طه أعلن في حياته
ما رعوهه الكوم بعده استعجلو لحظة وفاته
لا تجادل حرفوا بعده الشريعه
لا تجامل من كسر ضلع الوديعه
لا تجامل لا تجامل

*****************

الما درى بهذا نعذره انكله هسه احنه نخبرك
راجع التاريخ واقرا وببدك انت قرر امرك
كلشي باجر ما ينفعك والمحمد شنهو عذرك
من يسئلك عل وديعه ليش ضدهه آفنيت عمرك
ها يعاذل ابيا سبب وبيا ذريعه
لا تجامل من كسر ضلع الوديعه
لا تجامل لا تجامل

الشاعر // هادي الساعدي

ولادة الإمام الباقر ع
باقر علم طاهه. بيه احنه انتباهه
امامي محمد الباقر
*************

ملائكة الله فرحانه.
تصلي اعله النبي اويانه
الموالي ينسه احزانه
يردد بأجمل الحانه
امامي محمد الباقر
*************
من زهده احنه نتعلم
وبأقواله احنه نتكلم
الحجي الشمات مانهتم
عطر امحبته نشتم
امامي محمد الباقر
*******
مثل جده النبي الهادي
هواي وديني وزادي
وحتى الجبل والوادي
تردد بأسمه وتنادي
امامي محمد الباقر
********
الحمد لله انا احبنه
إذا واحد سئل عنه.
هو النور. والجنه
خادم عنده اتمنه
امامي محمد الباقر
********
تعال اقرا هه للسيره
أعدائه ضلت ابحيره
ابحقدهه ماتت وغيره
علمه صعب تفسيره
أمامي محمد الباقر

الشاعر،،، هادي الساعدي

،،،،، قصيده أفراح الي الإمام علي ع ،،،،،
يربان السفينه.        بعد طاهه نبينه
يبو اتراب.   ييو اتراب  حيدر يا علينه
     ،،،،،،،،،،،،،،،،،،،. ،،،،،،،،،،.
تظل دوم  يمحبوب  ساكن في گلبنه
هويناك  عشگناك.   يابلسم جرحنه
يغارون. يشكلون.  شي دربك سكنه
يضنون يوهمون. نعوفك يا ولينه
يبو اتراب يبو اتراب حيدر يا علينه
       ،،،،،،،،،،،،،،،،،،،،،،،،،،،،،،،
بالاحساس. والانفاس.  كل لحظه نشمك
عرفناك.   وجدناك.    وسط الروح رسمك
نور العين. يبو حسين. نبض الگلب اسمك
يصنديد.   يقديس.   بيك احنه اقتدينه
يبو اتراب يبو اتراب حيدر يا علينه
     ،،،،،،،،،،،،،،،،،،،،،،،،،،،،،،،،،،
الهوى الهاب   والاحباب  البلابل والحمامات
تناديك.    تحاجيك.    يبو الحب والكرامات
قناديل    مراسيل      كلهه اترتل ايات
يمولاي    يرجواي.      غيرك ما هوينه
يبو اتراب يبو اتراب حيدر يا علينه
       ،،،،،،،،،،،،،،،،،،،،،،،،،،،،،،،،،،،،
الجرح طاب. العدوخاب  كل ضنه وگعنه
صفعناه.     صرخ اه.     من شاف ارتفعنه
مثل ويل  انصفع حيل   شي حبك جمعنه
ومشيناه.    وتبعناه.   نهجك بيه مشينه
يبو اتراب يبو اتراب حيدر يا علينه
      ،،،،،،،،،،،،،،،،،،،،،،،،،،،،،،،،،،،
المحب صاح   بالافراح  وعمت هل السعاده
حمدناه.   وشكرناه.    الباري بهل الولاده
هويناه.      وتبعناه.     حب حيدر عباده
الإحسان   والإيمان    نورك طل علينه
يبو اتراب يبو اتراب حيدر يا علينه

الشاعر الحسيني،، هادي الساعدي

أفراح الإمام علي عليه السلام،،،
ياولي المسلمين     ياعلي يا علي
يا أمير المؤمنين.  ياعلي يا علي
     ،،،،،،،،،،،،،،،،،،،،،،،،،،،،،
بيك منصوصه الولايه.  . يا علي يا علي
الباري نزل بيك   ايه.  .  يا علي يا علي
وتنذكر في جم روايه.    يا علي يا علي
انت قائد عل الرايه.        يا علي يا علي
وانت الحبل المتين.      يا علي يا علي
   ،،،،،،،،،،،،،،،،،،،،،،،،،،،،،،،،
ياحبيب الله ونبيه.     يا علي يا علي
للبشر   أجمل هديه.     يا علي يا علي
منبع الحب والحميه     يا علي يا علي
انت سر  الجاذبيه.       يا علي يا علي
وانت ثاني القبلتين.  يا علي يا علي
،،،،،،،،،،،،،،،،،.،،،،،،،،،،،،
احتارت الدنيا ابخصالك   يا علي يا علي
ماكو مثلك  وجمالك.      يا علي يا علي
الجنه ندخل من خلالك.  يا علي يا علي
كل محب روحه هدالك.    يا علي يا علي
يا اخو طاهه الأمين.        يا علي يا علي
  ،،،،،،،،،،،،،،،،،،،،،،،،،،
الدنيا لو ينطوهه النه.    يا علي يا علي
مانبدلك صحنه كلنه.      يا علي يا علي
يكفي حبك هو جنه.       يا علي يا علي
وانت غايتنه واملنه.       يا علي يا علي
عل  ولايه   ثابتين.       يا علي يا علي

  ،،،،،،،،،،،،،،،،،،،،،،،،،
انت روح  الروح   بينه.     يا علي يا علي
اشما وصفنه اشماحجينه   يا علي يا علي
انت رحمة  الله  لينه.        يا علي يا علي
بيك وبطاهه اهتدينه.      يا علي يا علي
وعل يضدك ثائرين.        يا علي يا علي

الشاعر،،،، هادي الساعدي