☆قصيده إلى الامام الحسن المجتبى ع ☆

سبط النبي واسمه الحسن كله شهامه ومكرمه
سيفه يعادل مية الف معروف وكت الموزمه
~~~~~~~~~~~~
جم معركه البيهه نزل ابصفين وبيوم الجمل
عل ميمنه وعل ميسره يحصد اركاب اهل الجهل
التاريخ عنه ما حجه ولا يذكر الصار وحصل
حامل لواء المرتضى واعدائه تشرد لو حمل

يحمل شجاعة حيدره يرفض الذل والمظلمه
سيفه يعادل مية الف معروف وكت الموزمه
~~~~~~~~~~~~~~
متربي بحضان النبي ومن كل صفاته مقتبس
سبطه وحبيبه المؤتمن نوره يشع مثل الشمس
اتصفحنه زين بسيرته من عدهه ناخذ جم درس
قائد سياسي ومقتدر حير أرباب اهل الرجس

ما واجهوه وجه ابوجه سمته جعده الظالمه
سيفه يعادل مية الف معروف وكت الموزمه
~~~~~~~~~~~~~~~
لو نفرض احنه بس فرض شاهد وحاضر كربله
وبسيفه ايصول الحسن ضد الجيوش الجاهله
وياه ابو فاضل سوه يا زلمه هذا اينازله
من خوفه يموت الشمر ويذبح بروحه حرمله

والجيش ألبسبعين الف يرجف يظل ويهزمه
سيفه يعادل مية الف معروف وكت الموزمه
~~~~~~~~~~~~~~~
بوصافه يحتار العقل عالم عظيم المنزله
وارث علوم المصطفى تسهل عليه كل مسأله
من توكع ابشده وخطر أندب أمامك وسئله
لا ما يرد واحد أبد يوكفلك ابكل معضله

هاي الكرامه واضحه وبيه تفتخر ارض وسمه
سيفه يعادل مية الف معروف وكت الموزمه
~~~~~~~~~~~~
قران آيات ودرر منطق الحكمه والعلم
طبعه التسامح والكرم ونبع الموده والحلم
جامع صفاة المرتضى اصل المحبه والسلم
وللدين كل عمره نذر حارب طغاة اهل الظلم

والكل محب خيمه ووطن ابن الرساله وفاطمه
سيفه يعادل مية الف معروف وكت الموزمه

الشاعر. ... هادي الساعدي
2018/10/11

●زينب ع تودع الامام الحسن ع ●


اليوم اودعنك مثل ما ودعة ابوي
اليوم اودعنك وباجر احتاجك يخوي
~~~~~~~~~~~
جبدك المسموم تلفظ وانا بعيني اشوف
وانت كل هذا وتنادي شلون اخوي حسين اعوف
غيرتك تنبض أخوه يمه روحك ظل تطوف .
بيه تدري وبضروفه اشراح يجري بالطفوف

وني وي ونك وباجر احتاجك يخوي
اليوم اودعنك وباجر احتاجك يخوي
○○●○○●○○●○○●○○

البيت أحزان أمي احنن وصرخ وما ظلي صوت
والمواجع بيه رجعت دمعتي تنزل سكوت
من متت صاحت صرختي ريت كبلك انا اموت
ولا اجي ودارك خليه وانت مابيهه وافوت

وارد أشمنك وباجر احتاجك يخوي
اليوم اودعنك وباجر احتاجك يخوي
○○●○○●○○●○○●○○
موتتك بالسم يخويه سمتك جعده ابغدر
اتآمرت وي آل اميه زمره معروفه ابمكر
يم رسول الله وحبيبه شراح تحجي وتعتذر
بالسهام النعش مرمي هايه افعال الكفر.

خلني احضننك وباجر احتاجك يخوي
اليوم اودعنك وباجر احتاجك يخوي
○○●○○●○○●○○●○○
خل نسولف انا وانت سولف وأنا أستمع
ابو فاضل كافل اخته جفه كلي ينكطع
راس اخوي حسين اشوفه عل رمح جن مرتفع
والخيول اترضله صدره ومنكسر بيه جم ضلع

تبجي اشوفنك وباجر احتاجك يخوي
اليوم اودعنك وباجر احتاجك يخوي
○○●○○●○○●○○●○○
هم تجي للطف يخويه بعينك اتشوف الوضع
اتشوف عبدالله ورقيه الونهم تصب الدمع
وغصب لرض الشام امشي بالوعيد وبالقمع
والعليل امجتفينه ولجله ايون الشرع

وخويه أصيحنك باجر احتاجك يخوي
اليوم اودعنك باجر احتاجك يخوي

الشاعر .... هادي الساعدي

♢قصيده للاربعين والمشايه♢

كربلاء كربلاء انت يا رمز الفداء
قد اتينه ثائرين عل خدود لاطمين
كربلاء كربلاء

°°°°°°°°°``°°°°

جئنه نتخطى الصعاب
نتحدى مانهاب
النساء والشباب
تعزي بهذا المصاب
ابن خير المؤمنين
°°°°°°°°°°°°

واضحينه كالشموس
عل منايه احنه ندوس
لاطمين اعله الرؤوس
تتهافت هل النفوس
بالعويل وبل أنين
°°°°°°°°°°°°`

للنجاة وللسفينه
ملايينآ قد اتينه
به نؤمن ونجينه
ولدين الله اهتدينه
يا ملاذ الخائفين
°°°°°°°`°°
العيون باكيات
والقلوب داميات
نبقه نهتف للمماة
حسين سر هاي الحياة
به نؤمن طائعين
°°°°°°°°°°

ننسه طفه لا محال
والنساء والعيال
والخيول والنبال
والسلاسل والحبال
من طغاة معتدين

الشاعر ..هادي الساعدي

《 قصيده للاربعين 》
هاي انصار الحسين
ما تهاب المعتدين
○○○○○○○○○
بكلب مفجوع وجريح
هايه انصارك تصيح
يا سليب ويا ذبيح
جبل شامخ ما نطيح
تشهد بهاي السنين
○○○○○○○
انصار عندك كالاسود
بالنفس والدم تجود
توافي الك كل العهود
اتعاهدك تبقى جنود
على دربك ثائرين
○○○○○○○○

هكذا جاء النداء
قد اتينه كربلاء
نذرف الدمع دماء
الك كل احنه فداء
يا مذل الكافرين
○○○○○○○○○

بربعينك والمصاب
شيب متعنيه وشباب
سيوف واحدهم حراب
ما تخف ولا تهاب
تتحدى الحاقدين
○○○○○○○○
برايةالحب قادمين
عل روؤسي لاطمين
تواسي امير المؤمنين
وفاطمه وجده الأمين
بكل عقيده سائرين



الشاعر //هادي الساعدي

♡ السلام على الإمام الحسن ع ♡
مات الحسن مظلوم ياشيعه صيحوا
عل مجتبى المسموم بالونه نوحو ا
○○○○○○○○○○○○

يو م العزاء اليوم يوم المصيبه
ابن النبي المختار سبطه وحبيبه
كل واحد امواليه ايكثر نحيبه
ويعلن حداد اليوم ياشيعه صيحو

●○○○○○○○○○○○○○

نبعثلك الاشواك وي الهوي الهاب
ونتمنه احنه هناك ونشم التراب
مرقد الك موجود بكلوب الأحباب
.ليش الكبر مهدوم يا شيعه صيحو


○○○○○○○○○○○○○

كلك شجاعه وزود واجهت الأنذال
وكت المواقف زين نعرفهه الرجال
خانوك يا مولاي بحفنة أموال
هذا الأمر معلوم يا شيعه صيحو

○○○○○○○○○○○○○○
الهذا الوكت مظلوم من إتباع اميه
.انشوف الكبر مهدوم ياهل الرزيه
هبو يشيعه اليوم وضحوا القضيه
الظلم لا ميدوم يا شيعه صيحو
○○○○○○○○○○○○○
نبني الكبر مولاي ويه المهدي نبنيه
والظلم كله يزول وظهره يحنيه
والعدل كله يسود بعدله بانيه
هذا الأمر محتوم يا شيعه صيحو

الشاعر .. هادي الساعدي
2014/11/30

قصائد الاربعين
انا اجيتك يا حسين ادخيلك
نار كلبي مو دمع ابجيلك
~~~~~~~~~
انا اجيتك والضمير وياي اجه
وصل كبلي الحظرتك ناح وبجه
بقى صامت منذهل لا ماحجه
شاف أطفال و ونسه تبجيلك
~~~~~~~~~~~
انا اجيتك ودري روحي كبلي اجت
طير فوك الحضره طافت رفرفت
حظنته الشباج كبتك قبلت
تنادي يا ابو اليمه وتنعيلك
~~~~~~~~~~~~
انا اجيت وياي اجت الامي
رافع الرايات الك وعلامي
ناذر سنيني وجميع أيامي
وناذر انا كل سنه امشيلك
~~~~~~~~~~~
انا اجيتك والعيون اتصب دمه
وعلى صدري حيل جفي لاطمه
وافتخر شيعي اظل وخادمه
وكلشي ابهل الدنيا انا اهديلك
~~~~~~~~~~~~
انا شمعه واحترك كلي دمع
والحزن يتجدد بروحي نبع
الطم اعللراس محني الضلع
وروحي كبل الناس انا افديلك
~~~~~~~~~~~~
انت الي عنوان تبقى ومعتقد
دوه حبك عسل احلى من الشهد
ابقى أحبك ما اعوفك للأبد
ومثل دم نحرك دمى ابجيلك


الشاعر .... هادي الساعدي

قصيده للأربعين
بايعينه حسين واحنه بالمهد
شيعته وللموت مانخلف وعد
•••••••••○○○○○○○○•

بايعينه حسين مو عن عاطفه
شي وجدنه أهدافه كلهه هادفه
وطاغي وملعون كلمن خالفه .
ومن نصيح حسين نحجي بمعتقد
○○○○○○○○○○○○○
عل المنايه انفوت منخاف الطغاه
علمانه حسين معنى العز حياه
ولا نخلي اجفوفنه بجف الجناه
تشهد الأيام والحاظر شهد
○○○○○○○○○○○○
اتجندينه ابحبه الآخر نفس
شاهد التاريخ حاظر والامس
بزود من نحجيهه مو خفيه وهمس.
حسين وسط كلوبنه عاش وخلد
○○○○○○○○○○○
على دربه نمشي لو دربه جمر
انرخص الأرواح ونرخص العمر
لا بد ايفهمون إتباع الشمر
جنه درب حسين ما عفناه ابد
○○○○○○○○○○
شيب وي الشاب يمشي و الطفل
بربعين حسين نمشي وما نمل
يشهد التاريخ النه والفعل
يا شفيع انصيح النه ويا سند


الشاعر .... هادي الساعدي

الى الامام الحسن (ع)

باجر المهدي يبني كبتك

وابد ما تنمنع عنه ازيارتك

*****************
باجر ابن الحسن ياخذ حيفه
وبيده ذو الفقار يلمع سيفه
ويبقه كل الامر هو بكيفه
تظل ترجف منه ناس ألظلمتك
وأبد ما تنمنع عنه ازيارتك

*****************

يبني الكبه ويعلي اصروحك
ياخذ ابثارك يظمد اجروحك
واحنه ندخل مرقدك ونوحك
وبيدنه اترفرف رغمهم رايتك
وابد ؛ما تنمنع عنه ازيارتك

*****************

المناره تنبني وتعلى اكيد
ازورك احبابك ملايين ومزيد
والطغاهو تنتهي بالذل وتبيد
والعفو تطلب الناسة الضدتك
وابد ما تنمنع عنه ازيارتك

***************


اهناك يمك سيدي انقيم العزاء
ويانه تلطم حتى املاك السماء
انصيح يا مسموم وتسيل الدماء
وتجي من كل صوب ناس الحبتك
وابد ما تنمنع عنه ازيارتك

*******************

ايصلي المهدي ابضريحك يا امام
وخلفه انصلي ويطرد كل ظلام
ومن نطوفك يفرش اجناحه الحمام
ويا هلا ومرحبا تنادي شيعتك
وابد ما تنمنع عنه ازيارتك


الشاعر //هادي الساعدي

موقصة عواطف نعشك احنه حسين
ولا عدنه قرابه ولا ابن عمنه
ولا منصب انطانه ولاوزاره انطه
حتى ادكول نطمع بيهه واعدنه
ولا أموال وزع لا نطانه بيوت
ولا ودى جماعه حتى تقنعنه
ضماير بايعت لحسين حد الموت
والشخص الحسين بعين ما شفته
شفناهه المبادئ بالمعالي تلوح
وشفنه التضحيات انشوده تتغنه
هادي الساعدي

لو ضريحك بالعراق نفترض هذا فرض
يبو القاسم جان هسه نفرش ورود الارض
***************
جان سوينه المناره تلامس خيوط الشمس
وكبتك تصبح مدينه ينشرح بيهه النفس
نجتمع بالحب سويه نحجي بشفاف الهمس
كلنه نصبح أيد وحده وننطي للعالم درس
واحنه خدامك يطاهه نفرش ورود الارض
****************
جان خلينه اليزورك ملك واحنه بخدمته
هو بس بأيده يأشر يمه يلكه حاجته
لو طلب شيريد يطلب أله نحقق طلبته
كل محب بأسمك ينادي وترضى عنه غايته
أنت يا أجمل هديه نفرش ورود الارض

******************
نخلي العالم يشوف ذولي اتياع الرسول
بس محبه وبس موده والكرم منهم تنول
اهل افكار وعقيده ونيره كل العقول
كلهه من عدنه اتعلم المناهج والحلول
بنهجك اتمسكنه احنه نفرش ورود الارض
******************
جان خلينه المواكب عل الارض مد البصر
والعزاء يصبح موحد لو يظل طول الدهر
و الفضائيات تنقل سجلوا هذا الخبر
شوفوا اتباع الرساله تابعين اشرف بشر
منبع الحب والوفاء نفرش ورود الارض
*****************
نزور ابو اليمه ونزورك ولعلي نرجع نزور .
والضريح يصير معلم والفلك حوله يدور
ولبو صالح ننطي كلمه ندخل بكلبه السرور
عهد ننطي احنه جنده نطلب يعجل الظهور
احنه طلاب الحقيقه نفرش ورود الارض


خادم اهل البيت
هادي الساعدي

نزل وحي الرساله قرأ وملاك
وعلى اسمك تصلي بشر وملاك
يبو القاسم فداك أولاد وملاك
وفداك الروح يا سيد البريه
هادي الساعدي

أفراح ولادة الرسول محمد ص

بدرك هل علينه محمد يا نبينه
بيك احنه اهتدينه محمد يا نبينه

○○○○○○○○○○

نورك نور الكون محمد يا نبينه
ضي الكل العيون محمد يا نبينه
العالم بينه يدرون محمد يا نبينه
نحبك حد الجنون محمد يا نبينه
يا سلوة حجينه محمد يا نبينه
○○○○○○○○○
نضحي الروح لجلك محمد يا نبينه
وحق السبط نجلك محمد يا نبينه
بدونك احنه نهلك محمد يا نبينه
نطيعك انت واهلك محمد يا نبينه
الوصيتك طبقينه محمد يا نبينه
○○○○○○○○○○
اشحلاة اسمك يطاهه محمد يا نبينه
بيك احنه انتباهه محمد يا نبينه
شمس الله وسناهه محمد يا نبينه
وللأمه حماهه محمد يا نبينه
وبدينك نجينه محمد يا نبينه

○○○○○○○○○○○
بالمولد فرحنه محمد يا نبينه
وبالحب انجمعنه محمد يا نبينه
غردنه وصدحنه محمد يا نبينه
وبحبك نجحنه محمد يا نبينه
وبدربك مشينه محمد يا نبينه
○○○○○○○○○○○
حمدنه الله وشكرناه محمد يا نبينه
وصلينه ودعيناه محمد يا نبينه
شرعك طبقيناه محمد يا نبينه
امرك ما نسيناه محمد يا نبينه
غيرك ما هويته محمد يا نبينه


الشاعر ... هادي الساعدي

جرح السنين ام الحسين
مرقدج وين روحي أقدم لليدليني
•••••••••••○•••••••••••
مثل طير بكل وكت انا انذبح
كبرج المخفي يظل أكبر جرح
كبتج لازم تكون اجمل صرح
وبضريحج ندعي كل ظهر وصبح
كل محب فاز ام الاعزاز
مرقدج وين روحي اقدم لليدليني
••••••••••••••••••
كل موالي يحزن ادري وكل محب
مرقدج مخفي عليه اشكد صعب
شوك والام وحزن عينه تصب
وعل يضدج مثلي يعلنهه حرب
كل محب صاح رغم الجراح
ومرقدج وين روحي اقدم لليدليني
•••••••••••••••••••
قسم بحسين ودمائه ومصرعه
ابنج المذبوح بأعظم فاجعه
ونحر عبدالله الرضيع ومدمعه
اي وحق أم البنين الاربعه
انتي الانفاس وتصرخ الناس
مرفدج وين روحي اقدم لليدليني
••••••••••••••••••
اشكد شبه ما بينج وبين الإمام
نفس كسرة ضلعج امنهل الظلام
نفس حرك الدار حركوهه الخيام
ما يحبون البشر يبقه ابسلام
والكلب هام كل سنه وعام
مرقدج وين روحي اقدم لليدليني
••••••••••••••••••
ابو صالح فدوه أظهر يا ضوه
ضاكت الدنيا الوسيعه والهوه
وطيب اجروح التحبك يا دوه
ومرقد امك فاطمه نبنيه سوه
وطيب الجروح ذابت الروح
مرقدج وين روحي اقدم لليدليني


الشاعر. ..... هادي الساعدي

لا تونين يزينب لا تونين بعد كدامج ونين لا تونين
يمه اخبرج عل طفوف اميسره بأقسى الظروف
لا تونين لا تونين
*************
اليفارك امه صعبه وتغلي نيران الوداع
والدمع شلال ينزل يحس روحه في ضياع .
آه يا بنتي الحنينه عندي وياج اجتماع
راح اكلفج في مهمه وتصغي زينب الاستماع

انا عد عيناج يمه وخبريني بالمهمه
يا شمس روحي وحياتي
يا فرحتي وذكرياتي
قري العين قري العين
○○○○○○○○○○○○○○○○○○
يمه هذا جرحي هين امغيمه الدنيا جروح
حصتج منهه جبيره يا عطر جوري ويفوح

ينذبح بيهه الرضيع وهو عطشان وينوح
تنذبح يعني البراءه والترافه والوضوح

انتي اعيونج تشاهد وعل حقائق انتي شاهد
ودوني كل المظالم
ينفضح كلمن يخاصم
هل ميامين

○○○○○○○○○○○○○
مثل ما حركولي داري اتحظري الحرك الخيام
مثل ما ذبحوا جنيني أطفال تفطمهه السهام
اعيونج اشوف العجائب وتنحرم لذة المنام
ليلة العاشر محرم اقري عل دنيا السلام

وكملي يايمه المسيره رغم الأوضاع الخطيرة
ورفرفي ابراية مجدنه
وفضحي كلمن يضدنه
ونصري الدين ونصري الدين

○○○○○○○○○○○○○
ضلعي المكسور هذا يواسي كسر اضلوع اخوج
ومثل ما ظلموني اخبرج هم يظلمونه الابوج
سيده انتي واميره رغم أنف الحاربوج
بصبرج اتلوذ الشدايد وينفضح كل السبوج

وتنحني روس ألأراذل وتخرس أصوات العواذل

مرتفع راسج رغمهم ما يرعبج كل ظلمهم
ما تلينين ما تلينين

○○○○○○○○○○○○○○
كلشي يذبل في غيابج اتموت حتى الامنيات
انتي روح الروح اليه وحق رب الذاريات
لحظه وحده ما اشوفج هايه مو من الحياة
خلني اشبع شوف منج بالعيون الباكيات

زينب انا يمه بنتج لا تعوفيني اعله بختج
سفرتي بعدج طويله
احزاني وهمومي ثجيله
وقاسي البين وقاسي البين
○○○○○○○○○○○○○


ادري مو هينه انتفارك وجرح الموادع جبير
وينشلع كلبي ييمه من أفكر باليصير
شدي عزمج يلحبيبه والامر جدآ خطير
من أجل حفظ الرساله تواجهين أصعب مصير
في محرم يوم عاشر نار وخيول وعساكر
ينذبح اهلج وخوتج وادري بيهه يعني موتج
بعد الحسين بعد الحسين

الشاعر ... هادي الساعدي

اشلون حال الحسن هاي الليله
حسين يمه ينادي ونهد حيله
اويلاه يا فاطمه


○○○○○○○○○○○○○○

المدامع نزلت ابشوك وحجن اويلاه يا فاطمه
كل عيون العالم بحركه بجن اويلاه يا فاطمه
اجمل سنين الحياه هسه انتهن اويلاه يافاطمه
نزفت اجروح الأمام المؤتمن اويلاه يافاطمه
انتي روحه ودنيته وكل حياته وسلوته

عل الوجن دمع المحنه يسيله
حسين يمه ينادي ونهد حيله
○○○○○○○○○○
الدنيا حزنت وعلنت حالة حداد اويلاه يافاطمه
وبدلت ثوب الفرح لبست سواد اويلاه يافاطمه
اي وحق طاهه النبي ورب العباد اويلاه يافاطمه
ونت وناحت اهل سبع الشداد اويلاه يافاطمه
وناح كل هذا الوجود والحزن عم ويسود
تواسي طاهه المصطفى وتبجيله
حسين يمه ينادي ونهد حيله
○○○○○○○○○

اسيا ومريم وهاجر والنساء اويلاه يا فاطمه
مآتم ايقيمن وضجن بالبكاء اويلاه يافاطمه
والمدامع سالن اعلل خد دماء اويلاه يافاطمه
واسن بهل اليوم سيد الأنبياء اويلاه يافاطمه

الكوثر ابعز الشباب ماتت ابلوعه وعذاب
واليضدهه خاسر ويا ويله
حسين يمه ينادي ونهد حيله

○○○○○○○○○○○
يا الم متحمله زينب يا ألم ا ويلاه يا فاطمه
اروي ياتاريخ دون ياقلم اويلاه يا فاطمه
اليسمونه صحابي اشكد ظلم اويلاه يا فاطمه
ابدار فاطم شعل نيران وهجم اويلاه يا فاطمه

وسقط محسنهه الجنين ابيا وضع ام الحسين
اتنادي بويه المصطفى وتشكيله
حسين يمه ينادي ونهد حيله
○○○○○○○○○○○○○○○○

اوف من غدر الوكت وأهل الزمان اويلاه يا فاطمه
انصاف ما عدهم ولا عدهم آمان اويلاه يا فاطمه
خله صوت النذل يعلا والجبان اويلاه يا فاطمه
وكسر ضلع ام ابيها ام الحنان اويلاه يا فاطمه
هذا فعل المجرمين والطغاه والكافرين
مثل فعلة ابرهه وي فيله
حسين يمه ينادي ونهد حيله

الشاعر .. هادي الساعدي

اشتضن البعض للزهره نصفهه
صحابه وغدرت بطاهه نصفهه
البتول الطاهره فاطم نصفهه
سيده اعلل نسه تبقى الزجيه
هادي الساعدي