صباح الخير ♥️🌱
اليوم بلشت يومي برياضة المشي السريع حتى أحافظ على صحتي ولياقتي 🪄😌

الحقيقة: ما لقيت مواصلات فاضطريت أمشي للشغل بس بحاول أنظر للحياة بإيجابية مشان ما أنجلط 😂

طيب ولو كان التعلق غير آمن شو بصير؟ 
حسب الحالة ورح يكون عنا:
لو كانت صفة التنظيم هي الناقصة بكون عنا (تعلق قلق)، لأنه الطفل فهم الأمان بحتاج لبحث كثير ويمكن يتوفر ويمكن لا.

لو كانت صفة الكفاءة يلي ناقصة بكون عنا (تعلق غير منظم)، الطفل بعرف في حدا مهتم فيه وبحبه بس هالشخص لا يُعتمد عليه وبحتاج يلبي احتياجاته بنفسه

ولو غابت الصفتين بكون عنا (التعلق المتجنب) لأنه الطفل قرر يصير مستقل وشكّل مشاعر مستقلة بترفض دخول حدا لحياته.

ومعلومة صغيرة: أهم مظهر للتعبير عن الحب والاهتمام وإثبات المشاعر للطفل هي التلامس الجسدي.
#فائدة_من_كتاب 🌱📚

بكرة المسا رح ينزل موضوع بجنن وأني شخصياً بنظّم حياتي عليه خاصة بس أحس حالي ملخبطة وضايعة 🪄🎈

فرجوني تفاعلكم وقلوبكم كالعادة ♥️♥️

لو الدكتور بقبل أكتب بحثي عن شي بخص علم النفس رح أكون أسعد إنسانة بكرة
اقترحت عليه ٣ عناوين يارب يعجبه واحد منهن♥️🥹

مو من المواضيع يلي اخترتها بس قريب بما فيه الكفاية 🪄💛✨☀️

#سؤال_من_البوت
وصلوني هالسؤالين عالبوت، وبسببهن فكرت بكتابة البوست التالي ♥️

مرحبا آية كيفك..
آية انا بنت حياتا خربانة.. خسرت حالي وخسرت رفقاتي..
منين بدي أبدأ؟..
كيف ممكن اصلح؟
خايفة.. وضايعة
بتمنى تساعديني


حكيلنا كيف نعرف نقاط قوتنا وضعفنا
ونخرج من منطقة الراحة
وآخر شي كيف نعرف هدفنا هلق اله علاقة بتخصص الجامغة

موضوعنا لليوم هو عجلة الحياة
بعتبر عجلة الحياة أكثر شي مُنظِم للأهداف والمهام ومفيدة للتخطيط🎯

أقل شي بتكون مُقسمة لـ ٨ أقسام ومن خلال أسئلة معينة بنقيس نسبة كل قسم وهل بنحتاج للتطوير فيه ولا لا؟
شو أكثر مجال مقصرين فيه؟
على شو لازم ركز؟ ومن وين بدي بلش؟
والأسئلة بتختلف من شخص لآخر بس رح نحكي بشكل عام.

وبتتألف العجلة من:
الجانب الديني
الجانب الصحي
الجانب المهني
الجانب الشخصي/الثقافي
الجانب المالي
الجانب الترفيهي
الجانب العائلي
الجانب الاجتماعي

وبس نجاوب على الأسئلة بنعطي ٢ لكل إجابة نعم
١ لكل إجابة أحياناً
٠ لكل إجابة لا

يلا نبلش بالأسئلة أول شي عنا
الجانب الديني:
١ هل بصلي الصلاة على وقتها
٢ حافظة قرآن أو بدأت بالحفظ
٣ هل عندي ورد يومي من القرآن
٤ ملتزمة بالأذكار الصباح/المساء/النوم ...
٥ بتثقف دينياً وبقرأ كتب دينية، وبسمع محاضرات
٦- بصوم تطوع
٧- بقدم مساعدة للناس لوجه الله بدون انتظار مقابل منهم
٨- بتصدق دايماً
٩- عندي وقت خاص وسري مع رب العالمين (قيام ليل)
١٠- بعيدة عن النميمة والغيبة

الجانب العائلي:
١- عندي أهمية بمعنى ووجود الأسرة
٢- علاقتي مع الأسرة غالب عليها الحب والمودة والثقة
٣- أقوى علاقات الصداقة بحياتي من داخل أسرتي
٤- محافظة على بر الوالدين
٥- عندي اهتمام بمجال العلاقات
٦- طريقة تواصلنا داخل الأسرة جيدة
٧- بقوم بدوري الصحيح داخل عائلتي
٨- عملت كورسات وورشات بتخص الأسرة والعلاقات
٩- علاقاتنا داخل الأسرة بغلب عليها الاحترام
١٠- في عنا حوار بين الأفراد وخاصة وقت الخلافات

الجانب المهني:
١- بحب مجال شغلي ومهنتي
٢- بطور نفسي بالمجال من خلال التعلم الذاتي
٣- مكان العمل مريح وإيجابي
٤- بعمل كورسات بتخص مجال عملي باستمرار
٥- أقرأ وأتثقف بآخر التطورات في مجالي
٦- بشوف نفسي مهمة داخل فريق العمل
٧- علاقتي جيدة مع زملاء العمل والمدير
٨- مشاكلي الشخصية لا تؤثر على عملي
٩- عندي طموح حتى أشتغل عمل خاص في المستقبل
١٠- عم أتطور داخل مكان عملي (ترقيات)

الجانب الاجتماعي:
١- عندي عمل تطوعي أو خيري للمجتمع
٢- عندي علاقة جيدة مع الأصدقاء
٣- عندي علاقة جيدة مع الجيران
٤- عندي زيارات اجتماعية منتظمة وصلة رحم دائماً
٥- عندي قدرة على تكوين علاقات بسهولة
٦- بعرف أختار الأشخاص المقربين مني
٧- بعرف أرفض وأقول لا
٨- بحترم خصوصيات الآخرين وما بتدخل بشغلات ما بتخصني
٩- بحترم حدودي وحدود الغير
١٠- عندي عدم اندفاع بالعلاقات وبتعامل بعقلانية مع الناس

الجانب الشخصي/الثقافي:
١- بقرأ بمجالات متنوعة ومختلفة
٢- عندي مهارة المناقشة وآداب الحوار
٣- عندي القدرة على التعامل مع جميع أنواع الناس بطريقة مرنة ومناسبة
٤- عندي ثقة بنفسي وبعرف قدراتي
٥- عندي نظرة إيجابية وأمل تجاه الحياة
٦- عندي قدرة على حل المشاكل
٧- بعرف أرفض الإهانة والتجاوزات
٨- عندي علاقات ناجحة بمختلف أنواعها
٩- مهارة الحديث والكلام
١٠- بحترم الآخرين وبفرض احترامي على الجميع

الجانب الصحي:
١- بمارس الرياضة يومياً
٢- عندي ثقافة صحية ومعرفة بآخر الأبحاث الطبية
٣- بعرف كيف بقسم حاجتي للأكل من فيتامينات وبروتينات وكالسيوم ...الخ
٤- نومي منتظم ولساعات كافية
٥- بقلل زيوت وسكريات ومشروبات غازية
٦- بشرب مي بشكل كافي
٧- بهتم بنظافتي الشخصية
٨- عندي يومياً حصة من الفواكة والخضار بغذائي
٩- بمارس المشي السريع
١٠- لا أدخن ولا أجالس مدخنين

الجانب المالي:
١- أسعى لتوفير أكثر من مصدر دخل واحد
٢- عندي مبلغ طوارئ (احتياطي)
٣- عندي عادة الإدخار الشهري
٤- دخلي اليوم أفضل من قبل سنة
٥- عندي ثقافة مالية
٦- أعرف وأسجل جميع مصاريفي
٧- عندي وعي في عمليات الشراء
٨- عندي هدف مالي كبير وأخطط له
٩- أبحث بطرق الاستثمار وبحاول أتعلمها
١٠- ما عندي ديون

الجانب الترفيهي:
١- عندي وقت خاص لنفسي فقط
٢- عندي هواية أهتم بها وأمارسها دوماً
٣- أجرب أشياء جديدة وغريبة
٤- أستغل أوقات فراغي بأشياء مفيدة
٥- أحب أن أستمتع بوقتي
٦- ألعب ألعاب جماعية وأحب المشاركة بالتسلية
٧- أرى أن وقت الفراغ ضروري ومهم
٨- أمارس أنشطة ترويح عن النفس
٩- أشارك وقت فراغي مع أشخاص أحبهم
١٠- أخطط لوقت فراغي وماذا سأفعل به

بعدها بنحسب النتيجة لكل جانب
لو كانت النتيجة ١٠ وأقل فالجانب ضعيف وبتحتاجي تطوريه وتشتغلي عليه بشكل مكثف

لو كانت من ١١-١٥ فالجانب نص ع نص وبحتاج شوية شغل

لو أكثر من ١٦ معناها ماشية صح بهالجانب ✨💕

حرفياً أول مرة بياخذ مني كتابة موضوع للقناة كل هالوقت (ساعتين) بين بحث وكتابة وتدقيق
بس كثير كنت حابة تعرفوا عن عجلة الحياة وتتعلموها قد مو ظريفة ومفيدة 🧚‍♀
لو شفتوا الموضوع مفيد شاركوه لرفقاتكم ولقنواتكم وتفاعلوا عالبوستات بقلوبكم الجميلة ♥️

الكلمات القاسية تهيّج نفس مناطق الدماغ التي تتهيج عند الإحساس بالألم الجسدي.

من علامات التعافي من الماضي إني قادرة أحكي عنه بثقة و قبول حتى لو تأثرت 🦋✨

صباح الرسائل اللطيفة ♥️🪄🎈

لما تبلش تلتزم دينياً وتتعلم الدين من القرآن والسنة النبوية والأحاديث الصحيحة، وتقرأ الكتب الدينية وتسمع لعلماء الدين الحقيقين يلي بتنبهر من مدى علمهم العميق، وتترك كلشي عرفته من المجتمع والعادات والأهل والكلام التقليدي عن الدين يلي بنعرفه إما بشكل ناقص ومأخوذ منه جزء محدد أو مشروح بشكل غلط!
رح تنصدم قديش في شغلات جميلة بديننا وكمية العدل والرحمة يلي فيه ورح تسأل حالك ليش ما حدا حكالنا هالأشياء من قبل؟
ليش ما كنت بعرف حقوقي وواجباتي بهالطريقة؟
ليش ما حدا فسر وشرح الدين بهالطريقة المنطقية القريبة من القلب والروح؟