آنـــه يمج          شفتج امن العصره طحتي
مو يزينب          ليش جا يافضه صحتــــي
طفله ماتحمل تگولين     اعليه يم زينب تخافين
ــــــــــــــــــ ــــــــــــــــــ ــــــــــــــــــ
يمه عدوان الله من هجمو عليج
وعمت عيني احترگت امن النار اديج
صحت لحسين وحسن واركضنه ليج
بداره راعي الدار بس مايدري بيج
ماسمعتج        بسمي صحتي وجيتج ابجي
گلت يمكن      حيل ماظل بيها تحجي
سكته ظليتي تونين
ــــــــــــــــــ ــــــــــــــــــ ــــــــــــــــــ
بالله ابوي اموصه ماصحتي العلي
مدنك ومثل الجمر دمعه ايهلي
بساعة العصرة يروحي وكل هلي
ليش صحتي الفضه ماصحتي الي
انه بنتج        احن وحده البت عله امها
الناس تسمع   تگول زينب ماهي يمها
ﻻحسن صحتي ولاحسين
ــــــــــــــــــ ــــــــــــــــــ ــــــــــــــــــ
ريت عميه الساعه ذيج وﻻاشوف
ثوب فضه احمر بدمج والجفوف
طفله گلتي وهاي موگدها الظروف
شلون تحجيلي گبل عن الطفوف
والله گدها         الله المفصلي ثوبي
انت رحتي         انه بعدج يبدي نوبي
ام الاحزان اسمي تدرين 
ــــــــــــــــــ ــــــــــــــــــ ــــــــــــــــــ
زهره ويموت العطر يم ريحتج
بيش طالبتج ييمه العصرتج
من قرت قران جا ماشمتج
18 عمرج ورادو موتتج
يالحنينه       مايخيب اليدگ بابج
هاي تالي       حمره من دمج ثيابج
انسي گلتيلي اشتشوفين
ــــــــــــــــــ ــــــــــــــــــ ــــــــــــــــــ
تاكل بگلبي تظل هالحسره دوم
اهم بيها وخاف تكتلني الهموم
اشما اشوف الباب بي منج دموم
يمه اطيح اشمااحاول مااگوم
يروح حيلي      شلون اذكرج من مشيتي
وره الوالي        واعله اخوتي امن انتجيتي
ميته انه وﻻتموتين
ــــــــــــــــــ ــــــــــــــــــ ــــــــــــــــــ
علي محسن الزيادي

   بسّك بواچي اعله الضّلع وامسح دموعك
    باچر الخيل كربله ؛؛؛؛؛ تسحگ ضلوعك 
    يافاجعه اتذّوب الرّوح   وانته الغريب المذبوح 
                      ***
 يحسين يبني مو وكت طيحـــــتك يا ماي العين
 وانته الغريب بكربلــــــــه يابعــــد أُمّك يحسين
 باب العله صدري طبگ بالعصره كسّر ضلعين
 وبسـماره لمتوني وصل و بگلبي شــبّن نارين
      بس مومثل سهم اليفت چبدك يضامي
      مثلّث و من عنده تگع عالغـبره دامي
 عالتّرب خدّك مطروح   وانته الغريب المذبوح
                       ***  
 باچــر يســــبّاح الگلب بسيوف نحــرك ينگطع
وحيلك يهد سهم العطش وبرمــح راسك ينرفُع       
موباب يُمّــــه التّندفــــع خيل ويه خيل التّجتمع
وصدرك تدوسه بلارحم من عنده مايسلم ضلع
      بيه الحوافــــــر تنغرس و مسلّبينك
      وبسيفه ذبّاحك يگص خنصر يمينك
كل  كتر  منّك مجروح   وانته الغريب المذبوح 
                       ***
ماريدن بعينك تصد واتشّــوف ضلعي المنكسر
ويّاه جنيني اللي وگع مچتول يُمـّــه من العصر
كلّك ترافـــــــه وعالجره يرويحتي زغير العُمر
كل خوفي گلبك ينلّچم لوشـاف خــدّي المنسطر
   فـــــوگه أثر چف السّـــــطر عيني بيمينه
   بكل حيله والعيني طفه شـگد صلفه عينه
 بسياطه لمتوني يلوح   وانته الغريب المذبوح
                      ***  
يبني و وراك بنينوى چــم نايبه و چــم مصاب
چم شمعه يطفيها القدر والموت ياخذ چم شاب
نار التّشاهدها الك يحســــين مو تحــــرگ باب
تحرگ خيام مخـــــــدّره وتتراكض ابّين أجناب
     و ياحُــرّه باچــر تنسلب عندك خبرها
       الماشاهدت ظلها شمس ينشاف أثرها
  وي غُرب للشّام تروح   وانته الغريب المذبوح
                         ***
   وبعد الك بخيام الضّــــمه عبدالله طـــير الجنّه
   تنشف لهاته من العطش يمــــــرد بگلبك ونّه
   يبچي علـــه بچاه المهد غُصنه ذبل شـو چنّه
   اتشّوفه اعله صدرك ينذبح نحره بدماه يتحنّه
       و سهم اليصيبه بمنحره يضك بوريده
       ويگطع گماطــه من الألم ويمدلك ايده
 يشهگ بصوته المبحوح   وانته الغريب المذبوح
                         ***
   وتُبقه انته جثّه بلا دفـــن و من الثّياب مسلّب
   رسومك تغييرها الشّمس وحَر الهجير اليلهب
   بحــــبل اليســــــر متچّتّفه أيتامك الچّف زينب
   تعاينك سابح بالدّمــــه و عليك تبچي و تنحب
       وتمشي السّبايه بهالوضع وبلا محامل
      الصّوب النّهر تربي النّظر ها يابو فاضل
تنده الكافلــــــها بنوح   وانته الغريب المذبوح
                تسحگ ضلوعك  
                       ***  
 
                                 الشّاعر
                          أبو سجّاد الجعفري
                       3 ربيع 1443هـ الثّانيالثّاني

مشتاگ ييمه  ،، ييمه ،،،  ييمه


،،،،،،،،،،،،،،،،،،،،،،،،،،،

حيل مشتاگ واجيت المگبره
يمه گلبي بفرگتچ شيصبره ؟
البيت من دونچ خنگني بمنظره
يمه بعدچ جنه ؟ لو متغيره ؟

ذاگه وجهچ وينه يمه احچيلي
من شفت گبرچ تهدم حيلي

گعدي احاچيچ
رويحتي شبيچ
مخنوگ ييمه ،، ييمه ،،، ييمه
مشتاگ ييمه ،،، ييمه ،،، ييمه


،،،،،،،،،،،،،،،،،،،،،،،،

يمه اخبرچ وحشه صارت دارچ
يم هلا ومية هلا شخبارچ
زحمه كف رجله وگطع خطارچ
رجعي لتقنعيني موت اعذارچ

هلجبتلچ شيلتچ يمه وعباتچ
گومي ردي وياي من فدوه لحياتچ

مو وكت نوم
گلبي مهضوم
شنساچ ييمه ،،، ييمه ،، ييمه
مشتاگ ييمه ،،، ييمه ،، ييمه

،،،،،،،،،،،،،،،،،،،،،

ما وفيت وعايش انه بدونچ
كون ميت واندفن بعيونج
يمه يم كلب الحنين شلونج
عمت عيني شگد هدلت متونج

چنتي متعوبه وعلى چتافچ انام
مو جتف لا والله بيت الله الحرام
واغفى ساعات
بحظنچ ايات
محروم ييمه ،، ييمه ،، ييمه
مشتاك ييمه ،، ييمه ،، ييمه

،،،،،،،،،،،،،،،،،،،،،

يمه شحچيلچ عذابي وحالي
الشافني يگلي انفجعت بغالي ؟
هيچ واضح موتچ بدلالي
مو هدم لا صعبه اجر خيالي

هالوصلتچ بس نفس ما بيه حيل
ابنچ أويم گبرچ يصيح دخيل

بنفس التراب
هالعمر غاب

ما اعيش ييمه ،، ييمه ،، ييمه
مشتاگ ييمه ،، ييمه ،، ييمه

،،،،،،،،،،،،،،،،،،،،،

گمت اشم بترابچ واشگيلچ
   والله حيره بيا دمع أبچيلچ
محد يحس بيه يمه دخيلچ
كلمن بروحه التهى وشحچيلچ

هسه لو مرني المرض واذاني
محد يباريني وابقى متاني

لحظنچ اشتاگ
موت الفراگ

دمعات ييمه ،، ييمه ،، ييمه
مشتاگ ييمه ،، ييمه ،، يمه


،،،،،،،،،،،،،،،،،،،،،،،،،

ردت انام بگبرچ ومنعوني
وانه اصيحن يمهه بس خلوني
الدنيه بعدچ مگبره يعيوني
دفنوني يم بخت السلف دفنوني

محتاج اردن للزغر بس ليله
وارتاح باحضانج واشم الشيله


بس ردت صوت
ما رضى الموت

هيهات ييمه ،،، ييمه ،، ييمه
مشتاگ ييمه ،،، ييمه ،، ييمه

كلمات الخادم  /  رعد الفريجي

✍رعد الفريجي

العايشه بروحك بعدها // ليش دوم امغطيه خدها
مرت عليهه ايام // تشبع بجي يله تنام
============================
اشايفه اعيونك دخيلك _ بكل زوايه البيت دمعك
الباب من يندك اشوفك _ تخلي ايدك فوك ظلعك
انته صح كدامي ساكت _ بس تون اهواي اسمعك
اطلع اشتم هوه شويه _ يم كبرهه واحجي وضعك

الحل الافضل ادري شتحس // عالزجيه نسوي مجلس
وعالزهره احجيلي شظام // تشبع بجي يله تنام
============================
خرزه خرزه ودمعه دمعه _ فاطمه تسبح بسمهه
ادري تستاحش تفكدك _ لخاطري روح ابقه يمهه
بهدمك وغطي كبرهه _ وانسه كلشي وهوه شمهه
بردت الدنيه يحيدر _ والكسر خافن لجمهه

البرد يلجم طبعه سكته// يصل كسرهه وهيه ميته
ترفه وعمرهه اجم عام // تشبع بجي يله تنام
============================
الشيب كثران ابلحيتك _ شويه من همك انطيني
وانته غير حته اسمي _ اولدك اهنا ابطن عيني
سولفتلي كلشي زينب _ وزيدت لهفت حنيني
علي ابشرك شفت فاطم _ بطيف كل مره تجيني

تكلي عوضيهم حناني// يم البنين ابمكاني
شرفت عيني الاحلام // تشبع بجي يله تنام
============================
علي عندي طلب عندك _ الباب هذا لو تغيره
جاي اشوفن تفز بالليل _ زينب وتخنكهه عبره
تكله ياباب اشعلامك _هيج ظلع امي تكسره
وبعبايت امهه زينب _ تكول جن فاطمه الزهره

سبب حزنك باب بيتك // والتعب تارس مشيتك
زينب صدك ما تنلام // تشبع بجي يله تنام
============================
يابعد كلبي بصراحه _ امنيتي ازورن بس كبرهه
بكل صلا ادعي يحيدر _ نعلت الله اعله العصرهه
امنيتي ترجع عدله هسه _ وانطي من عمري لعمرهه
يهنيال اللحد والله _ كاعد ايشم ابعطرهه

ابدال مي الورد دمعي// ارد اكلهه كومي رجعي
وتراب اخلي اعله الهام // تشبع بجي يله تنام
============================
الدنيه بعيونك احسهه _ يبو اعيوني موش حلوه
العايشه اباله الزجيه _ ذكرياته كلها تسوه
والمغسل روحه بيده _ يسيطر اعله ادموعه كوه
الفاركت خلان تذبل _ لجن كلها منك اشوه

الدفن روحه انه اعرفه // دوم بيده تلكه رجفه
والفركه بيهه أحكام // تشبع بجي يله تنام
============================
تمت_ علاء الزيدي

✍علاء الزيدي

لحن وصوت، الدكتور الناصري الاسدي.

🌹دعاء لقضاء ألحوائج🌹

🤲اِلـهي كَيْفَ اَدْعُوكَ واَنَا اَنَا وَكَيْفَ اَقْطَعُ رَجائي مِنْكَ واَنْتَ اَنْتَ، اِلـهي اِذا لَمْ اَسْاَلْكَ فَتُعْطيني فَمَنْ ذَا الَّذي اَسْأَلُهُ فَيُعْطيني، اِلـهي اِذا لَمْ اَدْعُوكَ فَتَسْتَجيبَ لي فَمَنْ ذَا الَّذي اَدْعُوهُ فَيَسْتَجيبَ لي، اِلـهي اِذا لَمْ اَتَضرَّعْ اِلَيْكَ فَتَرْحَمْني فَمَنْ ذَا الَّذي اَتَضرَّعُ اِلَيْهِ فَيَرْحَمُني،

اِلـهي فَكَما فَلَقْتَ الْبَحْرَ لِمُوسى عليه السلام وَنَجَّيْتَهُ اَسْاَلُكَ اَنْ تُصَلِّيَ عَلى مُحَمَّد وَآلِهِ واَنْ تُنَجِّيَني مِمّا اَنَا فيهِ وَتُفَرِّجَ عَنّي فَرَجاً عاجِلاً غَيْرَ آجِل بِفَضْلِكَ وَرَحْمَتِكَ يا ارحم الراحمين

حيدر ـــــ اتصيح العقيله ام الخدر
حيدر ـــــ منك اريد آنه العذر
حيدر ـــــ مكدر ازورك للكبر
ــــــــــــــــــــــــ
صوت من الشام بي نغمة مناحه ـــ والمدامع ــــ جنها تحجي
انه زينب ياعلي ودلالي ذايب ـــــ والمواجع ـــــ جنها تحجي
بويه ادري بهل وكت راسك تتطبر ـــــ والجوامع ــــ جنها تحجي
بويه ـــــ اعذرني من كبري صحت
بويه ـــــ اتذكر بيوم الطحت
بويه ـــــ وي الصلاه وكت الفجر ـــــ حيدر
ــــــــــــــــــ
انه ادري الحسن من كبره اعتنالك ـــــ بويه حيدر ـــــ دمعه يجري
وادري بحسين اعتنه الكبرك يزورك ـــــ دامي منحر ـــــ دمعه يجري
بويه وانه ارجو العذر جي ما اجيتك ـــــ تدري مكدر ـــــ دمعي يجري
تدري ـــــ يصعب عليه اتعنلك
تدري ـــــ من الشام مكدر اوصلك
تدري ـــــ يصعب علي هذا الامر ـــــ حيدر
ـــــــــــــــــــ
من البقيع اتعنت الزهره الزجيه ـــــ بضلع دامي ـــــ بهل مصيبه
ومن اجت وياهه ابو الزهره محمد ـــــ دمعه هامي ـــــ بهل مصيبه
وانه وي الريح الك يا بويه ابعث ـــــ كل سلامي ـــــ بهل مصيبه
شوكي ـــــ الريح ينقل كـــــل الم
شوكي ـــــ بخد الشمس بويه انرسم
شوكي ـــــ تدري احر من الجمر ـــــ حيدر
ــــــــــــــــــــ
بويه تعرف ليش ما اكدر اجيلك ـــــ وابجي يمك ـــــ عل رزيه
حاوطت كبري الاعادي وانه ادري ـــــ عليه همك ـــــ عل الرزيه
الليله اتمنه اعتني الكبرك وزورك ـــــ بهمي اكلمك ـــــ عل رزيه
بكبري ـــــ اعليك اونن ياعلي
بكبري ـــــ يل غيرك ابدا ما الي
بكبري ـــــ كمت اجرع بكاس الصبر ـــــ حيدر
ــــــــــــــــــــــــ
أي وحك متني التلوه من الاعادي ـــــ كلي حيره ـــــ شلون اجيلك
للسناسل لسه آثار بجفوفي ـــــ جن اسيره ـــــ شلون اجيلك
مصيبتي ومصيبتك يا ضي عيوني ـــــ شكد جبيره ـــــ شلون اجيلك
فدوه ـــــ اعذرني يا حامي الحمه
فدوه ـــــ بجاه الزجيه فاطمه
فدوه ـــــ لتخلي كلبي ينكسر ـــــ حيدر
ـــــــــــــــــــــ
الشاعر محمد حسن ضيغم
الحان میعود النصاري

عَـايِـشْ حَـرَامْ تَحْتِ السِّمَه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ
وَيَّـاهَـا اِخِذْنِيْ يَاگبُرْ ؛ ظَلْ بيتِيْ خَالِيْ
مِنْ رَاحَتِ الزَّهْرَه اِنْطُفَتْ أحْلَه اللَّيَالِيْ
آنَـه عَلِيْ البِالحومَه مَـا وَاحِـدْ دِنَـالِيْ
دَارِ الزَّمَنْ بِيَّه اِوْ صِرِتْ أدْفِـنْ غَـوَالِيْ

فَـگـدِ الحَبِيبْ مَـا أعْظَمَه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ
يَاويلِيْ تَابُوتِ اُمْ حَسَنْ شِمْسَوِّيْ بِيَّه
اِبْـليل اَظْلَمْ اَدْفِنْهَا اِوْ أرِدْ صَعْبَه عَلَيَّه
بِـالـگُـوَّه أحْفُرْ بِالگبُرْ وَ اَفْـرُكْ بِـدَيَّـه
مَـا أدْرِيْ گبْرِيْ هَـذَا لـوْ گبْرِ الزِّچِيَّه

هَاي الـحَـيَـاةْ اِشْگدْ مُؤلِمَه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ
بِـعْيُونِيْ دَرْبِ المَگبَرَه يِـرْسِـمْ مِنِيتِيْ
چَمْ خُطْوَه لَاكِنْ بَيَّنِ الشّيبِ اِبْلِحِيتِيْ
مِنْ رَاحَت اُم بيتِيْ اِوْ بَعَدْ مَا لَمْنِيْ بيتِيْ
أمْشِيْ اِوْ دَمِعْ عينِيْ حَجَرْ عَثْرَه اِبْمَشِيتِيْ

حِـزْنِـيْ الچِبِيرْ مَـا أكْـتِـمَـه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ
يَـاريتَه گلْبِيْ اِمْـنِ القَهَرْ يِحْضُنْ مَمَاتَه
مَا أبْچِيْ خَايفْ تِفْرَحِ اِبْدَمْعِيْ الشِّمَاتَه
اليِدْفِنْ زَهِـرْتَـه مَـا يِظَلْ مَعْنَى الحَيَاتَه
وَجْــهِ الحَبِيبَه اِيْـرَاوِدَه اِبْـأرْبَـعْ جِهَاتَه

عُگبِ الحَنَانْ عِشْتِ اِبْظِمَه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ
جَاوبْنِيْ يَـتْرَابِ الگبُرْ وِ اِشْـرَحْ وَضِعْهَا
طَابِ الضِّلِعْ لوْ بَعْدَه مَا طَايبْ ضِلِعْهَا
وِالسَّطْرَه يِنْزِفْ دَمْهَا كِلْ مَا صَبْ دَمِعْهَا
وَ اَدْرِيْ العَبِدْ فـوگِ الوَجِه بِيدَه صُفَعْهَا

حَـمْـرَه العُيُونْ تِنْزِفْ دِمَـه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ
چَانَتْ أمَانَه فَاطِمَه اِوْ رِجْعَتْ لَـبُوهَا
إرضُوهَا گالِ اِوْ بَعْدَه رَاحَوا رَضْرِضوهَا
مَدْرِيْ شِجَاهَا الوَادِمِ اِوْ مَـا قَـدِّروهَا
مَا بين بَابِ اِوْ حَايطِ الزَّهْرَه اِعْصِروهَا

قِتْلَتْهَا لـيـشْ چَـفْ ظَالِمَه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ
گِـدَّامِيْ زيْـنَـبْ لـوْ بِچَتْ يِچْوينِي اَلَمْهَا
چَنْ طيرَه مَذْبُوحَه بُقَتْ مِنْ رَاحَت اُمْهَا
وَ آنَه اَدْرِيْ مُوْ هَالفَاجِعَه اِوْ يِخْلَصْ هَضُمْهَا
بَـاچِـرْ عَليهَا اِبْـكَـرْبَـلَـه اِيْطِيحَنْ خِيَمْهَا

بَـعْـدِ الـحُسَينْ مَاكُوْ حِـمَـه
اِوْ تَحْتِ التُّرَابْ ضَيْ فَاطِمَه
ــــــــــــــــــــــــــــــــــــــــــــــــــــــــــــــــــ


١ / ١ / ٢٠٢٢ السبت
كرَّار حيدر الخفاجي



▪️

يبن امي حسين
،،،،،،،،،،،،،،،،،،،،،،،،،،
شارده  من الخيل اجيتــك خايفه وماعندي راي
خويه عوف الماي فدوه حسين مامحتازه ماي
اشوه اذا بس زلمه واحد كلها شو تركض وراي
زين ماطاحـــــــت عباتي وضلت مچلبه بگفاي
اخ مو من خوف اصيحن اخ من گــــد الفشل
حسين گوم حسين فدوه وسوي للنسوان حل
فوگ ماحرگــــو خيمنــه وفوگ ماطاح الستر
لتمو يعيرون بينــــــــــــــه بلا حياء ولاخجل
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
خويه لاقصدي ارد الچمك خويه لااعتب عليك
العازه يمك جايبتني حسيــــن ماودلي اجيـــك
بيك حيل تگوم ليه حچيلي اذا ضل حيل بيك
ادري غيرك مايحلها وهــــل سبب جاباني ليك
گوم خل يرتاح بالي عود اذا ضـــــل عدي بال
حمل هـذا وطاح فوگي والحمل يبن امي مال
لاتموت عليك خدري وخدري غالي عليك حيل
چنت يمنه مدللات ومــــــن رحت راح الدلال
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
من الركض فحطانه اجيتك ردت يمك استراح
خل اجر نفسي واسولف بس شسولف كلشي راح
طاح من گالولي اخيچ خويه احسن گلبي طاح
صيحت محد سمعني وصوتي راح من الصياح
الموت مالايــــــــگ عليك الموت موش ولامك
اخيامك المحترگه هاي وگـــــوم طفي خيامك
لاتضيــــج خلگ زينب زينـــب تعيبانـــــه حيل
من الصبــح ممرود گلبي حسين مــــو جدامك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
والله دنيا وخلت اختــك تدخل السوگ العبيــد
مچتفـه چتافين زينـــــب بالحبال وبالحديـــــد
والضعن مابي نشامــــــه والدرب كلش بعيــــــد
شلون مدري شلون تكضي حسين باچر وي يزيد
جيب اليخلصنـــه خويـه وجيـــــب اليلم البنات
تايهات وماكو واحــــــــد ينشــــد اعله التايهات
ياهو اليصدگني خويـــــــه لوگلت راح الحسين
وياهو اليصدگني خويــــــه لوگــلت عباس مات
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي

شارده من الخيل اجيتك

كلمات الشاعر / مصطفى الصالحي

بصوت. مسلم المطيري