قصيدة السيده الزهراء عليها السلام

اقره الحمد عالكوثر...يم القبر ياحيدر

ودع الزجيه.....بهاي المسيه
يم القبر ياحيدر  أقرأ الحمد عالكوثر
...............................
أقرأ الحمد يم فاطمه ياسيد الكون
قران يقرأ  الهه علي ويهل العيون
بعد الزچيه ماترد يمك يميمون
بالقبر موبس فاطمه گلبك المدفون

جتهه المنيه.... ابهاي المسيه
يم القبر ياحيدر.. أقرأ الحمد عالكوثر
...............................
وصتك اتريدك تجي يمها يكرار
وتريد تسمع كلمتك ياحامي الجار
تشتاگ الك يابالحسين بضعة المختار
تستاحش اخلافك بعد من تمشي لدار

حدر الوطيه....... ابهاي المسيه
يم القبر ياحيدر... أقرأ الحمد عالكوثر
................................
شيحمله فرگاها الك ياداحي الباب
وغير الزچيه بالخلك ماعندي احباب
تدري بگلبه المنكسر لي هسه ماطاب
شبعت اذيه ام الحسن من جور الاصحاب
شفت الزريه....... ابهاي المسيه

يم القبر ياحيدر.... أقرأ الحمد عالكوثر
.................................
اتحير علي بين الزچيه وبين الاطفال
يم القبر يوصل يولي ودمعه همال
لم الحسن لمن مشت مابين اهلال
بلكي ترد اعله الولد وتباري العيال

شحت عليه... ابهاي المسيه

يم القبر ياحيدر..... أقرأ الحمد عالكوثر
٠٠٠٠٠٠٠٠٠٠٠٠٠٠٠٠٠٠٠٠٠٠٠
شيرجع ايامي الگضن وي ام الحسين
عافتني وحدي ابحيرتي وبس تدمع العين
يافاطمه اني علي چاما تردين
بعدچ اخلص هالعمر وبلوعه وونين

زينب خطيه..... ابهاي المسيه
يم القبر ياحيدر... أقرأ الحمد عالكوثر
..............................
الشاعرة ام ابراهيم الحلفي

‎بهيده لا تلچم علي سـطرت إذاني
‎وافرش بگبري كساء اسمه اليماني
‎ضلوعي حيل مكسرات
‎حته أعيش الذكريات
‎ـــــــــــــــــــــــــــــــــــ
‎يا علي شچم مقتل بهذا الكســاء
‎من تفرشه وياي اعيشن چم عزاء
‎لحد قيام السـاعة اريد اشبع بكاء
‎نحچي من مـوتت ابــوي لكربلاء

‎يا علي بهذا الكسـاء جـروحي تضـمد
‎البي عطر . طه . شفه لبضــعة محمد
‎ريحته اتردلي الحياة 
‎حته أعيش الذكريات
‎ـــــــــــــــــــــــــــــــــــ
‎هالكساء بگبــري اشــبگنه وأنــــوح
‎انجرح مرتين وبعد له اتلث جــروح
‎الضايگ انفـاس الرسول بروحه روح
‎الچان ينزل بي وحي چن عمره نوح

‎غايتي من تــدفن بگبــري كسائي
‎تختلــط ريحة محمــد وي دمائي
‎بگبري نقره التعـزيات
‎حته أعيش الذكريات
‎ـــــــــــــــــــــــــــــــــــ
‎خل نسولف عن جـرح ثاني جـديد
‎أرد أخبره المحسن ابني اول شهيد
‎عالجـروح الباقيـــات أســـمع اريد
‎من الخلافات الثــلاثة لحد يـــزيد

‎منه ارد اسمع شنو يصير بغــيابي
‎آنه حدي وياه لَمَن حرگولي بابي
‎خمسه چنه وياه نبات
‎حته أعيش الذكريات
‎ـــــــــــــــــــــــــــــــــــ
‎جاي أشوفن بي جرح كلش قريب
‎حيل احبه بي شفت شيبت حبيب
‎بگبري يحچيلي اعله شيبك ياخضيب
‎أنه وياه ننصـب عزه ونشــبع نحيب

‎خل يسولفــلي عليك شيــجري بعــدي
‎صح متت بس دمعي ما مات اعله خدي
‎عايش اعله النايبــات
‎حته أعيش الذكريات
‎ـــــــــــــــــــــــــــــــــــ
‎خل يســولفلي الكســا عن وردتين
‎يامه قبلــهن رســـول الله الأمــين
‎شراح يحصل يا علي بولدي الثنين
‎عالحسن خنسولف وذبح الحسين

‎خل يسولف عالحسن ابني الأحـبه
‎ابني شمســوي بطشت چبده يذبه
‎شگد تألـــم بالمــمات
‎حته أعيش الذكريات
‎ـــــــــــــــــــــــــــــــــــ
‎من نســولف عالذبـح ما نستراح
‎وبالگبر لحسـين شغلتـــنه النياح
‎وللقيامه انضل عليه ننزف جراح
‎النايم بصفه الوحي يصير برماح

‎الچانت بهذا الكسا تغطيه الزهــره
‎النايم بصفه المَلَك ينداس صـدره
‎ضلوعه مثلي مهشمات
‎حته أعيش الذكريات
‎ـــــــــــــــــــــــــــــــــــ


‎مهدي التقي

‎الناشر الحاج فلاح حسن

( غربة علي )

يالحبـيـبه .. شهـل مصيبه
حيل ماعندي لفرگـتچ يام حسن
بـهـل منـيـه .. يمـوت بـيـه
كـلشي يالچنـتي الي بيت ووطن
وحشه عگبچ كل مكان ..  راح وياچ الامان
چنتي الي بيت ووطن
…………………………

فاطمه ظهري نكسر .. وجرح البگـلبي كبر
وشيب ارموشي القـهر .. من رحلـتي
هسه صارت دنيتي ..  صعبه وحشة غربتي
وعله خدي دمعـتي .. من رحلتي

اگـعد ابـيـتـچ واعـيش ابذكرياتي
وياچ چانت حلـوه يالزهره حياتي
وهسه ليل انهار ادعي الله بمماتي .. من رحلتي

الدنيه  غربـه  .. وحـيل صعبه
واني من دونـچ عشت انزف جرح
الليل يمـشي .. وانـه رمـشي
ماغـمـض ومـسـاهر لـحـد الصـبح

بالقهر يمشي الزمان .. راح وياچ الامان
چنتي الي بيت ووطن
…………………………

بيوم غسلت الضلع .. وگـلبي لسه منشلع
سكـته اجري بالدمع .. ياهـضيمه
بساع شمسچ غربت .. والجروح اتكـاثرت
الدنيه بعيوني نطفت .. ياهـضيمه

الناس بعدچ يالحبيبه استوحدوني
وصه بيه المصطفى بس ما رعوني
من المـدينـه لـو بـديـهـم يطـردوني .. ياهضيمه

خاصمـوني .. وقاطعـوني
ونكـرو ملـوحـة خبـزنـه بالعجل
عشت وحدي .. ويـه ولـدي
وبابي محد دگـه يالزهره وسأل
لا فلان  ولا فلان .. راح وياچ الامان
چنتي الي بيت ووطن
…………………………

الناس من بعدج جفو .. وعني بالدنيه التهو
وفضلي يالزهره نسو .. ياعجيبه
بسوگ صرت اني من امُر .. بهضم احسن وانكسر
حچي عليه ينشمر .. ياعجيبه

اسـمـع احـچـايـات تـوجـع يالزچـيه
شلون شفت الزهره ترفس عالوطيه
وما گـلـبت الدنيه يا حامي الحـمـيه  .. ياعجيبه

وامشي سكـته .. ودمعي اكـته
لكن المـهـضوم شيفـيده الدمع
الموت راحـه .. للـجـراحـه
تـنـزف وونـاتـه فشـله تنـسـمع
ونـتي تطلع بالأذان .. راح وياچ الامان
چنتي الي بيت ووطن
…………………………
ونظرت الشامت رمح .. تفزز بگـلبي الجرح
تخلي اثر ماينمسح .. من الشماته
خلـو بكـل درب الي .. شامت يصيح علي
شلون فاطم تنولي .. من الشماته

وين ماروح الگـه يالزهره اذيه
وزعـوها بكـل درب الزمره اليه
الگـه واحد قاتل من الثلث ميه .. من الشماته

من اشوفه .. گوه اعوفه
الـدفـع باب وضلـع منـچ كـسر
عيني اسدها .. وايدي اردها
عن الچف الظالم العينـچ سطر
المُر اجرعه بهل أوان .. راح وياچ الامان
چنتي الي بيت ووطن
…………………………
وارجع البيت الحزن .. وابچي لمصابچ وون
وانـتـظر ليلي يـجـن .. يالزچيه
سكـته اجيلـچ للگـبر .. وحزني يمـچ ينفـجر
واشكي الچ ضيم العمر .. يالزچيه

غـير گـبرچ راحـه ماضل يالحبـيـبه
اعتنيلچ واشكي هم روحي الغريبه
انـكـسر ظـهـري بفرگـتـچ بالمصيـبه .. يالزچيه

چنتي سلوه .. وعشره حلوه
ومن اصد ابوجـهـچ الهـم ينجلي
وهسه غربه .. وروحي غربه
بـلايـه فاطم عايش بغـربـه علي
بلا سكينه ولا حنان .. راح وياچ الامان
چنتي الي بيت ووطن

الشاعر عقيل الحسناوي..

آنـــه يمج          شفتج امن العصره طحتي
مو يزينب          ليش جا يافضه صحتــــي
طفله ماتحمل تگولين     اعليه يم زينب تخافين
ــــــــــــــــــ ــــــــــــــــــ ــــــــــــــــــ
يمه عدوان الله من هجمو عليج
وعمت عيني احترگت امن النار اديج
صحت لحسين وحسن واركضنه ليج
بداره راعي الدار بس مايدري بيج
ماسمعتج        بسمي صحتي وجيتج ابجي
گلت يمكن      حيل ماظل بيها تحجي
سكته ظليتي تونين
ــــــــــــــــــ ــــــــــــــــــ ــــــــــــــــــ
بالله ابوي اموصه ماصحتي العلي
مدنك ومثل الجمر دمعه ايهلي
بساعة العصرة يروحي وكل هلي
ليش صحتي الفضه ماصحتي الي
انه بنتج        احن وحده البت عله امها
الناس تسمع   تگول زينب ماهي يمها
ﻻحسن صحتي ولاحسين
ــــــــــــــــــ ــــــــــــــــــ ــــــــــــــــــ
ريت عميه الساعه ذيج وﻻاشوف
ثوب فضه احمر بدمج والجفوف
طفله گلتي وهاي موگدها الظروف
شلون تحجيلي گبل عن الطفوف
والله گدها         الله المفصلي ثوبي
انت رحتي         انه بعدج يبدي نوبي
ام الاحزان اسمي تدرين 
ــــــــــــــــــ ــــــــــــــــــ ــــــــــــــــــ
زهره ويموت العطر يم ريحتج
بيش طالبتج ييمه العصرتج
من قرت قران جا ماشمتج
18 عمرج ورادو موتتج
يالحنينه       مايخيب اليدگ بابج
هاي تالي       حمره من دمج ثيابج
انسي گلتيلي اشتشوفين
ــــــــــــــــــ ــــــــــــــــــ ــــــــــــــــــ
تاكل بگلبي تظل هالحسره دوم
اهم بيها وخاف تكتلني الهموم
اشما اشوف الباب بي منج دموم
يمه اطيح اشمااحاول مااگوم
يروح حيلي      شلون اذكرج من مشيتي
وره الوالي        واعله اخوتي امن انتجيتي
ميته انه وﻻتموتين
ــــــــــــــــــ ــــــــــــــــــ ــــــــــــــــــ
علي محسن الزيادي

   بسّك بواچي اعله الضّلع وامسح دموعك
    باچر الخيل كربله ؛؛؛؛؛ تسحگ ضلوعك 
    يافاجعه اتذّوب الرّوح   وانته الغريب المذبوح 
                      ***
 يحسين يبني مو وكت طيحـــــتك يا ماي العين
 وانته الغريب بكربلــــــــه يابعــــد أُمّك يحسين
 باب العله صدري طبگ بالعصره كسّر ضلعين
 وبسـماره لمتوني وصل و بگلبي شــبّن نارين
      بس مومثل سهم اليفت چبدك يضامي
      مثلّث و من عنده تگع عالغـبره دامي
 عالتّرب خدّك مطروح   وانته الغريب المذبوح
                       ***  
 باچــر يســــبّاح الگلب بسيوف نحــرك ينگطع
وحيلك يهد سهم العطش وبرمــح راسك ينرفُع       
موباب يُمّــــه التّندفــــع خيل ويه خيل التّجتمع
وصدرك تدوسه بلارحم من عنده مايسلم ضلع
      بيه الحوافــــــر تنغرس و مسلّبينك
      وبسيفه ذبّاحك يگص خنصر يمينك
كل  كتر  منّك مجروح   وانته الغريب المذبوح 
                       ***
ماريدن بعينك تصد واتشّــوف ضلعي المنكسر
ويّاه جنيني اللي وگع مچتول يُمـّــه من العصر
كلّك ترافـــــــه وعالجره يرويحتي زغير العُمر
كل خوفي گلبك ينلّچم لوشـاف خــدّي المنسطر
   فـــــوگه أثر چف السّـــــطر عيني بيمينه
   بكل حيله والعيني طفه شـگد صلفه عينه
 بسياطه لمتوني يلوح   وانته الغريب المذبوح
                      ***  
يبني و وراك بنينوى چــم نايبه و چــم مصاب
چم شمعه يطفيها القدر والموت ياخذ چم شاب
نار التّشاهدها الك يحســــين مو تحــــرگ باب
تحرگ خيام مخـــــــدّره وتتراكض ابّين أجناب
     و ياحُــرّه باچــر تنسلب عندك خبرها
       الماشاهدت ظلها شمس ينشاف أثرها
  وي غُرب للشّام تروح   وانته الغريب المذبوح
                         ***
   وبعد الك بخيام الضّــــمه عبدالله طـــير الجنّه
   تنشف لهاته من العطش يمــــــرد بگلبك ونّه
   يبچي علـــه بچاه المهد غُصنه ذبل شـو چنّه
   اتشّوفه اعله صدرك ينذبح نحره بدماه يتحنّه
       و سهم اليصيبه بمنحره يضك بوريده
       ويگطع گماطــه من الألم ويمدلك ايده
 يشهگ بصوته المبحوح   وانته الغريب المذبوح
                         ***
   وتُبقه انته جثّه بلا دفـــن و من الثّياب مسلّب
   رسومك تغييرها الشّمس وحَر الهجير اليلهب
   بحــــبل اليســــــر متچّتّفه أيتامك الچّف زينب
   تعاينك سابح بالدّمــــه و عليك تبچي و تنحب
       وتمشي السّبايه بهالوضع وبلا محامل
      الصّوب النّهر تربي النّظر ها يابو فاضل
تنده الكافلــــــها بنوح   وانته الغريب المذبوح
                تسحگ ضلوعك  
                       ***  
 
                                 الشّاعر
                          أبو سجّاد الجعفري
                       3 ربيع 1443هـ الثّانيالثّاني

مشتاگ ييمه  ،، ييمه ،،،  ييمه


،،،،،،،،،،،،،،،،،،،،،،،،،،،

حيل مشتاگ واجيت المگبره
يمه گلبي بفرگتچ شيصبره ؟
البيت من دونچ خنگني بمنظره
يمه بعدچ جنه ؟ لو متغيره ؟

ذاگه وجهچ وينه يمه احچيلي
من شفت گبرچ تهدم حيلي

گعدي احاچيچ
رويحتي شبيچ
مخنوگ ييمه ،، ييمه ،،، ييمه
مشتاگ ييمه ،،، ييمه ،،، ييمه


،،،،،،،،،،،،،،،،،،،،،،،،

يمه اخبرچ وحشه صارت دارچ
يم هلا ومية هلا شخبارچ
زحمه كف رجله وگطع خطارچ
رجعي لتقنعيني موت اعذارچ

هلجبتلچ شيلتچ يمه وعباتچ
گومي ردي وياي من فدوه لحياتچ

مو وكت نوم
گلبي مهضوم
شنساچ ييمه ،،، ييمه ،، ييمه
مشتاگ ييمه ،،، ييمه ،، ييمه

،،،،،،،،،،،،،،،،،،،،،

ما وفيت وعايش انه بدونچ
كون ميت واندفن بعيونج
يمه يم كلب الحنين شلونج
عمت عيني شگد هدلت متونج

چنتي متعوبه وعلى چتافچ انام
مو جتف لا والله بيت الله الحرام
واغفى ساعات
بحظنچ ايات
محروم ييمه ،، ييمه ،، ييمه
مشتاك ييمه ،، ييمه ،، ييمه

،،،،،،،،،،،،،،،،،،،،،

يمه شحچيلچ عذابي وحالي
الشافني يگلي انفجعت بغالي ؟
هيچ واضح موتچ بدلالي
مو هدم لا صعبه اجر خيالي

هالوصلتچ بس نفس ما بيه حيل
ابنچ أويم گبرچ يصيح دخيل

بنفس التراب
هالعمر غاب

ما اعيش ييمه ،، ييمه ،، ييمه
مشتاگ ييمه ،، ييمه ،، ييمه

،،،،،،،،،،،،،،،،،،،،،

گمت اشم بترابچ واشگيلچ
   والله حيره بيا دمع أبچيلچ
محد يحس بيه يمه دخيلچ
كلمن بروحه التهى وشحچيلچ

هسه لو مرني المرض واذاني
محد يباريني وابقى متاني

لحظنچ اشتاگ
موت الفراگ

دمعات ييمه ،، ييمه ،، ييمه
مشتاگ ييمه ،، ييمه ،، يمه


،،،،،،،،،،،،،،،،،،،،،،،،،

ردت انام بگبرچ ومنعوني
وانه اصيحن يمهه بس خلوني
الدنيه بعدچ مگبره يعيوني
دفنوني يم بخت السلف دفنوني

محتاج اردن للزغر بس ليله
وارتاح باحضانج واشم الشيله


بس ردت صوت
ما رضى الموت

هيهات ييمه ،،، ييمه ،، ييمه
مشتاگ ييمه ،،، ييمه ،، ييمه

كلمات الخادم  /  رعد الفريجي

✍رعد الفريجي

العايشه بروحك بعدها // ليش دوم امغطيه خدها
مرت عليهه ايام // تشبع بجي يله تنام
============================
اشايفه اعيونك دخيلك _ بكل زوايه البيت دمعك
الباب من يندك اشوفك _ تخلي ايدك فوك ظلعك
انته صح كدامي ساكت _ بس تون اهواي اسمعك
اطلع اشتم هوه شويه _ يم كبرهه واحجي وضعك

الحل الافضل ادري شتحس // عالزجيه نسوي مجلس
وعالزهره احجيلي شظام // تشبع بجي يله تنام
============================
خرزه خرزه ودمعه دمعه _ فاطمه تسبح بسمهه
ادري تستاحش تفكدك _ لخاطري روح ابقه يمهه
بهدمك وغطي كبرهه _ وانسه كلشي وهوه شمهه
بردت الدنيه يحيدر _ والكسر خافن لجمهه

البرد يلجم طبعه سكته// يصل كسرهه وهيه ميته
ترفه وعمرهه اجم عام // تشبع بجي يله تنام
============================
الشيب كثران ابلحيتك _ شويه من همك انطيني
وانته غير حته اسمي _ اولدك اهنا ابطن عيني
سولفتلي كلشي زينب _ وزيدت لهفت حنيني
علي ابشرك شفت فاطم _ بطيف كل مره تجيني

تكلي عوضيهم حناني// يم البنين ابمكاني
شرفت عيني الاحلام // تشبع بجي يله تنام
============================
علي عندي طلب عندك _ الباب هذا لو تغيره
جاي اشوفن تفز بالليل _ زينب وتخنكهه عبره
تكله ياباب اشعلامك _هيج ظلع امي تكسره
وبعبايت امهه زينب _ تكول جن فاطمه الزهره

سبب حزنك باب بيتك // والتعب تارس مشيتك
زينب صدك ما تنلام // تشبع بجي يله تنام
============================
يابعد كلبي بصراحه _ امنيتي ازورن بس كبرهه
بكل صلا ادعي يحيدر _ نعلت الله اعله العصرهه
امنيتي ترجع عدله هسه _ وانطي من عمري لعمرهه
يهنيال اللحد والله _ كاعد ايشم ابعطرهه

ابدال مي الورد دمعي// ارد اكلهه كومي رجعي
وتراب اخلي اعله الهام // تشبع بجي يله تنام
============================
الدنيه بعيونك احسهه _ يبو اعيوني موش حلوه
العايشه اباله الزجيه _ ذكرياته كلها تسوه
والمغسل روحه بيده _ يسيطر اعله ادموعه كوه
الفاركت خلان تذبل _ لجن كلها منك اشوه

الدفن روحه انه اعرفه // دوم بيده تلكه رجفه
والفركه بيهه أحكام // تشبع بجي يله تنام
============================
تمت_ علاء الزيدي

✍علاء الزيدي