شگد احبك..
وأنتَ گعبة طين حري
ساوموك ومارضيت
وگلبو الدنيا اعله دينك
هواي احبك ياحبيبي
وأنتَ گمره شما طفح بينه الظلام
وتلمع بوجه الزغار الفاگدينك

لـِ #محمد_لفته_العماري

الدنيا عطشت وانچفيت
واستحت عين المنارة ومازغر گلب النهار

اچفوفك يشربن تعبهن !!
وانت ذاك .. الـ لونه يكبر من يشد حيله السمار

ياجبير . عيونهم ما زغرنك
والشمس (عسّر) ضواها وبس تريد امراد منك

ياعلي وعينك جزتهم طافت بگلب الفقير
وانت حلم الما يلوحك !!
من تبدت هامتك مات الضمير ..

لـِ #كاظم_الركابي

چان عيد
وطاحت المرجوحه بيه
وصارت الونسه بسامير وخشب..

اشگگت
دشداشتي الحلوه الجديده
لملمتها وخفت اگول
وضاع من عيني الدرب

هاي اول بچيه بيه
ومنهه زاعلت اللعب

لـِ #نعمة_مطر