لطميه للزهراء عليها السلام رجاليه وتقرء بعده أطوار


أمي خلوها أمي خلوها
خل تضل وياي أمي خلوها
لاتشيلوها لاتشيلوها
للكبر فاطم لاتشيلوها


أمي خلوهه عليهه متعلمه
ولاتخليني أزغيره منهظمه
أومنهه ماشبعيت أوصرت متيتمه
ومن البجي عيوني صارت أمورمه
عليه حاجوها عليه حاجوها
خل ترد أمي عليه حاجوها


خل ترد ليه أمبدله أوصافي
أوبالدرب أركض أوأبجي أوحافي
وأصيح يايمه أويبسن أشفافي
أوجفني أعله الفركه أبد ماغافي
علة العصروها علة العصروها
ماتنام العين عله العصروها


ماتنا العين أوتبجي أهوايه
عله أمي بكلبي نار جوايه
ماجرت لأحد مصيبتي هايه
أوحكي لو ونيت أمي وفايه
الكوم ذلوها الكوم ذلوها
من بعد طه الكوم ذلوها


الكوم ذلوهه أوضلت أتنادي
تعال ليه بساع يالنبي الهادي
الكوم عصروني أوهدموا أفادي
أوهسه من ماتت شالهه الحادي
أشتطلبوها أشتطلبوها
يالعده أمي أشتطلبوها


بعد ماترجع ليه الأميمه
شالهه حيدر أورايح الهيمه
وانه ضل كلبي أبذله أوضيمه
معلمه عليهه هيه الي خيمه
هسه دفنوها هسه دفنوها
للكبر راحت هسه دفنوها


آه على أمي الكضت مضلومه
أمكسره الضلعين أومشت مالومه
شالهه بالليل علي الجيدومه
والكبر أخفاه على العده أوكومه
منه منعوها منه منعوها
همه حقهه أخذوا أومنه منعوها



*تمت*
*بقلم✍ الشاعره المله جنان الحسناوي*
*القصيده بديوان مجالس الزهراء صدر حديث*
*مشكول الذمه كلمن يغير أويتلاعب بالقصيده*


https://www.tg-me.com/dchhtg

نواعي للزهراء عليها السلام


هاي الوالده الماكوا مثلهه
يوميه أحبج أنه أكلهه
أمل الدنيه كلهه أوماأملهه


أمي هيه أواني بتهه
روحي ترد ليه لو شفتهه
عافتني هيه أوماعفتهه


أبشوفتج يمه ماتهنيت
ياشمعت حياتي أوشمعه البيت
سوه وياج موتتنه تمنيت


كعدت أبدارج أوبس اجر ونه
وبشوفتج كلبي ماتهنه
شلتي بعيد أه يم المحنه


الدربج ييمه عيوني تربي
رد الوالده ليه يربي
وأرم انه ومهظوم كلبي


كلبي عله أمي حيل حزنان
وأم الحسن نامت أبتربان
وعليهه مستعجل الدفان


غدار الزمان أوياخذ الزين
أخذ أم المحنه أم حسن وحسين
الحلوه أرسومهه نامت عله الطين


وسفه ام حسن بالمكبره أنتام
أوعافت بزرهه أزغار وأيتام
مره عشرتي صارت والأيام


أذكر أمي وأجر حسره
ياوسفه نامت عله الغبره
وأرباهه ذاك من أذكره


بعد الهظم والنوح شيفيد
أوحمل ضعنهه أورايح أبعيد
والذاك وجهه الغاليه أريد


*تمت*
*بقلم✍ الشاعره المله جنان الحسناوي*
*القصيده بديوان مجالس الزهراء صدر حديث*
*مشكول الذمه كلمن يغير أويتلاعب بالقصيده*


https://www.tg-me.com/dchhtg

بسم الله الرحمن الرحيم
اللهم صلي على محمد وال محمد
تم بعون اللة تعالى اصدار ديوان مجالس الزهراء عليها السلام الجزء الاول والذي يختص بمصيبة
سيدة نساء العالمين فاطمه الزهراء عليها السلام
يتضمن من قصائد ثقيلة وخفيفة ومربعات وحماسي وموشح وفزاعيات ولطميات بكل الاطوار والاوزان ونعي واحاديث وهوسات وختاميات ورجالي وايضا نسائي ثقيل وعدت اطوار اخر نسأل اللة القبول واسالكم الدعاء
خادمة العترة الطاهرة الشاعرة الملة
جنان الحسناوي صاحبة ديوان زينب والمصائب

لطمية رجالية ثگيلة للزهراء عليها السلام


بعدني ازغيرة ليش اتيتميني
اوعدمن يالحبيبة تخليني

مااحمل انة افراك
ليج ابساع يشتاك
وين الكاج اريدن تدليني
اوعدمن يالحبيبة تخليني


بعدني ازغيرة مااحمل الفرگة
اوصعبة يم حسن تكتل الفرگة
وبدارچ بعد من اطب شلگة
صارت دنيتي ماتسوة خنگة
من رحتي من ادية
ماضل حيل بية
ردي ادخيلج واذكريني
اوعدمن يالحبيبة تخليني


يوم الرحتي ضل الكلب مكسور
اوما مرتاحة احسن جمر ويفور
واون من الدليل الصار مفطور
شفت اخلافج الهضم والجور
كافي بسج اغياب
بيه صار الصواب
وعليج امعلمة وانتي تدريني
اوعدمن يالحبيبة تخليني


انة امعلمة مافارگيتچ
ويحبيبة ييمة اليوم اريدچ
انه ابعازتج تقبل حميتچ
الدارج اجيت اومالگيتچ
الفركة حيل تكتل
وانة شلون احمل
يمة على الگبر من يدليني
اوعدمن يالحبيبة تخليني


يدليني على گبرچ رايدة احد
واعتب اوياچ ودموعي على الخد
واكلچ شوفي حالي اللي تمرد
من شخصچ عني غاب اوبعد مارد
الگلبي يمة مالوم
فارك ذيچ الرسوم
مايصبر بعد ياماي عيني
اوعدمن يالحبيبةتخليني


صبري ضاع يم ارسوم حلوه
واخلافج الزمن باليني بلوه
هضمني عليج اوبية اسوه
خلة الگلب بفراگج تجوه
ماريدن العشره
وبصدريالعبره
ليش اوياچ ماجيتي خذتيني
اوعدمن يالحبيبةتخليني


بعد يالغالية چاوين الاگيچ
ردت من التعب يايمة اوافيچ
والجنة اشمهة جوه رجليچ
هاي امنيتي انة اگعد وحاچيچ
ونسولف سوية
من اتعودين لية
اونحط حسين مابينچ اوبيني
اوعدمن يالحبيبة تخليني


تمت
بقلم الشاعرة الملةجنان الحسناوي هذه اللطمية من ديوان مجالس الزهراءعليها السلام والذي صدر في المكاتب واللة ولي التوفيق انشاءالله
لايجوز شرعا حذف اوتغير الكلمات اوينسبها https://www.tg-me.com/dchhtg

فزاعيه للزهراء عليها السلام


شالت أم حسن بالليل
أوتتباجه يتاماهه


من شالت الوجعانه
بقيت الليل سهرانه
أوروحي أعله أمي خلصانه
وغريبه أخلاف عيناهه


غريبه أوعيني أمورمه
عله أم أضلوع متهشمه
أصيح أتعاي يايمه
ومستعجله أبممشاهه


مستعجله أبنوم الكاع
راحت الحنينه أبساع
أوغفت عيونهه الوساع
وريت أنه الوياهه


ريت أنه النمت بكبور
أوضلت أم ضلع مكسور
أترد البيتهه المعمور
الولدهه الرايد أرباهه


بس حيف الدهر خوان
خذاهه أمي البلا بيبان
كبر أظلم أوبيه تربان
وعافت ذيج مبناهه


مبناهه بقه خالي
بعد ماترد للتالي
أمي الجانت أكبالي
شلون أنام وأنساهه


أمي راحت أشعدهه
للتربان وحدهه
أونام اعله الثره خدهه
الماأكدر بلياهه


*تمت*
*بقلم شاعره آهل البيت المله جنان الحسناوي الفزاعيه بديوان مجالس الزهراء الجزء الأول مشكول الذمه كلمن يغير اويتلاعب بالقصيده والاسم*

https://www.tg-me.com/dchhtg

لطميه حماسيه للزهراء عليها السلام


يمه زهراء يمه زهراء
يمه زهراء يمه زهراء


يمه ماريد الحيات أبدونج
أوفدوه أروحن يم حسن لعيونج
ردي ليه أوخل أشوف أشلونج
أرد أداويهن وأشد أمتونج
يمه زهراء يمه زهراء يمه زهراء


ردي يمه أوعمري الج أفديته
وكله الج يالغاليه رخصيته
ريت أشوفن طولج أوشخصيته
حلم يتحقق ييمه ريته
يمه زهراء يمه زهراء يمه زهراء


بيج أفكر يمه أبد لامانمت
هم ترد الغاليه عليه كلت
يم حسن وينج يالحبيبه صحت
تعاي ليه أهواي أنه أتعذبت
يمه زهراء يمه زهراء يمه زهراء


تعاي ليه أهواي مشتاكه الج
الذيج شمات الصدر أولمتج
أشحلات العصر يمي كعدتج
أوهسه كلبي ذاب منهه فركتج
يمه زهراء يمه زهراء يمه زهراء


تعاي يمه أوخل أشد بيدي الضلع
ومن على خدج أشوف أنه الدمع
بعد ماينحمل كلبي أنفجع
وأنمرد ويه سباحه وأنشلع
يمه زهراء يمه زهراء يمه زهراء


أنمرد كلبي أوزاد أصوابه
حكه فارك أعز كل أحبابه
أبلحد أمي نايمه وأترابه
آه ياذاك الضلع ومصابه
يمه زهراء يمه زهراء يمه زهراء


*تمت*
*بقلم✍الشاعره المله جنان الحسناوي*
*مشكول الذمه كلمن يغير أويتلاعب بالقصيده والأسم*

https://www.tg-me.com/dchhtg

فزاعيه للزهراء عليها السلام(( يالجناز تانيني ))


لاتمشي بيها أم الحسن
يالجناز تانيني


تانيني أريد أرباهه
خليني أعيش أوياهه
أنذل عكب عيناهه
ولاتمشي وأتخليني


لاتمشي بيهه أبهيمه
تدري الحنينه خيمه
وأزول همي أوضيمه
أو من كلبي تسمعه أونيني


أونيني صار أهوايه
أو نار الكلب جوايه
للبيت المن جايه
وبس تهل دمعه عيني


عليهه ذاب أفادي
ريض صحت يالحادي
لاتمشي صوب الوادي
وأرجوك بس حاجيني


حاجيني كلبي ظامي
بدل ويه أمي أيامي
رجفت عليهه أعظامي
وأكلهه بس سمعيني


اكلهه ياأم الوفه
كلبي أنجرح ماله شفه
خلافج على الدنيه العفه
ومصيبتج تعميني


تعميني هاي الفاجعه
وانتي عليه كاطعه
بالمكبره أوماراجعه
وردي أوياج وأخذيني


*تمت*
*بقلم✍الشاعره المله جنان الحسناوي*
*الفزاعيه بديوان مجالس الزهراء الجزء الأول*
*مشكول الذمه كلمن يغير أويتلاعب بالقصيده والأسم*

https://www.tg-me.com/dchhtg

مربوعه للزهراء عليها السلام(( ضلوا يتاماهه ))


الليله أبلايه أم ضلوا يتاماهه
وخذتهه فاطمه الزهره مناياهه


الليله أبلايه أم أولادهه الزهره
أمهم سافرت للضلمه والحفره
حسين أوحسن لوسألوا الحره
يزينب وينهه أمنه النكعد أوياهه


يزينب وينهه أمنه ماتحاجينه
لدكولين راحت ماتجي لينه
أشلون أبهظم أتروح أوتخلينه
تدري بينه مانكدر الفركاهه


تدري بينه مانتحمل الفركه
أشلون أتروح أودلالنه أتحركه
صبح ضلمه النزل أخلافهه أشنلكه
لتصدك يزينب يوم ننساهه


لتصدك يزينب ننسه عشرتهه
أوذيج أيامنه الشفنه أبطيبتهه
أبد ماصايره عد أحد محنتهه
ونعيش شلون هسه أحنه بلياهه


نعيش أشلون وأحنه أيتام عافتنه
اوكلب العدوا أتكسره هاي ونتنه
بعد المن النشكي ألم وجعتنه
وعلينه والدتنه خيمه ردناهه


ردناهه ترد وأبيتهه تكعد
أوين أوليدي وأبنيتي تنشد
هاي الوالده أم حجايت التسعد
وأم طول الحلوا وسفه فكدناهه


فكدناهه أوبعد ماترجع الهالدار
وأخلتنه يتامه والكلب محتار
أولاكالت بعدهم ويلادي أزغار
وأزغيرونه زينب زايد أبجاهه


*تمت*
*بقلم✍الشاعره المله جنان الحسناوي*
*مشكول الذمه كلمن يغير أويتلاعب بالقصيده والأسم*

https://www.tg-me.com/dchhtg

نبارك للامة الاسلامية جميعا وخصوصا صاحب العصر والزمان ارواحنة لتراب اقدامة الفدى ومراجعنة العضام بمناسبة ولادة فخر النساء زينب الحوراء عليها السلام نبارك لكم هذه المناسبة الميمونة وايضا لعامنا الجديد نسال اللة ان يمن على شعبنا بالامن والايمان والفرج لصاحب الزمان عجل اللة فرجة والحمدلله رب العالمين اقل خدمة الإمام الحسين عليه السلام جنان الحسناوي

هوسات للزهراء عليها السّلام


نامت على الثره الحلوه معانيها
حنينه أمي وأخافن أنه أعليها
أتراب الكبر الحبيبه يأذيها
هيه غصب فاركتنه أدريها
(( صوب دلالي فركاها ))
(( من يوم الحادي شالاها ))


نون أبدارهه وذكرنه لمتنه
وياها سوه جنه عزيزتنه
جانت لامتنه أو هيه خيمتنه
وسفه أستعجلت عنه أحبيبتنه
(( هطهات أمي ترد أعلينه ))
(( وأيتام أزغار أتخلينه ))


بعد الدار شلنه وأمنه ماهيه
مثل الشجره هيه أوخيمه أوفيه
بعد ماظن ترد أو لا الها جيه
أو لاتسأل على خواني ولابيه
(( ماترجع وترد أويانه ))
(( حرمتهه الدنيه الخوانه ))


ظلمه دارهه أوليهه بعد مانمشي
أنه بنيتهه عليهه ماطبك رمشي
أريد أشوفنهه أوماردت كلشي
من شالوهه ريت أوياهه نحمل نعشي
(( وتوسد ويالمهظلومه ))
(( ورتاح أوياهه بهالنومه ))


*تمت*
*بقلم✍المله جنان الحسناوي*
*الهوسات متوفره في ديوان مجالس الزهراء عليها السلام الجزء الأول*
*مشكول الذمه كلمن يغير أويتلاعب*

https://www.tg-me.com/dchhtg

( اَللَّهُمَّ أَفْضَتِ إِلَيْكَ اَلْقُلُوبُ وَ مُدَّتِ اَلْأَعْنَاقُ وَ شَخَصَتِ اَلْأَبْصَارُ وَ نُقِلَتِ اَلْأَقْدَامُ وَ أُنْضِيَتِ اَلْأَبْدَانُ اَللَّهُمَّ قَدْ صَرَّحَ مَكْنُونُ اَلشَّنَآنِ وَ جَاشَتْ مَرَاجِلُ اَلْأَضْغَانِ اَللَّهُمَّ إِنَّا نَشْكُو إِلَيْكَ غَيْبَةَ نَبِيِّنَا وَ كَثْرَةَ عَدُوِّنَا وَ تَشَتُّتَ أَهْوَائِنَا رَبَّنَا اِفْتَحْ بَيْنَنا وَ بَيْنَ قَوْمِنا بِالْحَقِّ وَ أَنْتَ خَيْرُ اَلْفاتِحِينَ)

لطمية ثگيلة للاحباب علئ طور ياشمس كليلهم اهواي مشتاكيلهم


لحبابنة اشتاكينة................ اولبيوتهم طبينة
همة ماهمة اويانة.......... اوزات عليهم ابجانة
لحبابنة اشتاكينة

لحبابنة اشتاكينة واللة اوردنة ليهم
نگعد اوياهم اونطمن عليهم
اوردنة انسولف اونسمع من حجيهم
بالكي ردة من الگبر اصير بيهم
اريدهم يم بابنة........ ايجون لينة احبابنة.
اغيابهم واللة عمانة.... اوزات عليهم ابجانة

احنة مانكدر علئ الغيبة اوسفرهم.
ابليلة الجمعة المشوا يبدي ذكرهم.
لون يتبدل عمرنة اويا عمرهم.
ننطي احنة اعمارنة اوننزل گبرهم.
احبابنة لا ماترد اوجوهم سكنت لحد.
الوكت بالحسرة خلانة... اوزات عليهم ابجانة

افراكهم اكبر جرح ضل يدي بينة
همة ناموا بالگبر اوماجوا علينة
عنة راحو واحنة نبجي او مانسينة
گضت عشرتنة ابعجل وتفارگينة
همة ناموا بالثرة... واحنة مدمعنة جرة
كل واحد المنهم نسانة.... اوزات عليهم ابجانة

احبابنة ناموا علئ تراب الذواري
واحنة عليهم دمعنة صبح جاري
ايذوب كل واحد اذا جابولة طاري
علئ عزاز الگلب شالوا من جواري
شايلين احبابنة. او مااجوا لعتابنة
الزمن طشرنة شجانة. اوزادت عليهم ابجانة


الزمن طشرنة اوبعد شيريد منة
راحو احباب الگلب اوتفارگنة
عليهم ضلينة بالحسرة والونة
الشمل راح اوبعد شيردة النة
راحوا اللة اوياهم. بعد مانلگاهم
اخلافهم صرنة حزانة. اوزادت عليهم ابجانة


بقلم الشاعرة جنان الحسناوي صاحبة ديوان زينب والمصائب والفاجعة الحسينية مشكولة الذمة كلمن ياخذا كلماتي وينسبها لةبالعباس وامير المؤمنين عليهم السلام

https://www.tg-me.com/dchhtg

مربوعه للزهراء عليها السلام


بعدني الوالده ماشابعه منهه
مشتاكه عليهه وأرد أشوفنهه


مشتاكه عليهه أم كعدت الحلوه
وأخذاهه الدهر مني الوالده كوه
أوخله أخلافهه الكلب يتجوه
أوماأكدر عليهه أمي أحبنهه


آه أعله الحنينه المادرت بيه
وكلشي ماردت بس ترجع أعليه
أطب الدارهه وأذكرهه يوميه
أويشتاك الكلب الها وأريدنهه


وأخلاف الحنينه ماأطب للدور
ضلمه أوموحشه أوبعد ماظل نور
شيصبر الكلب على أم ضلع مكسور
وغفت أعيونهه أمي وأنكطع ونهه


غفت أعيونهه أووسدوا خدهه
أوحيدر خفاه الكبر ماعدهه
وأيكول النبي وصاني والدهه
وعن أعيونهه العدوان أبعدنهه


آه يانارهه أمي أشيطفيهه
شالت للكبر أوين الأكيهه
بعد شيجيبهه الحلوه معانيهه
وحجايتهه الزينه ماأسمعنهه


راحت بعد شيرد التشكيني
طول الليل أبجي أوماغفت عيني
أحن الهه وأصيحن لاتخليني
وبعد دارج تراني ماأطبنهه


ماطبن الدارج بعد يالسلوه
وفراكج كتلني أوبالكلب جوه
أنهدم حيلي وأجرن بالجدم كوه
أوشلي بالديار الشايله عنهه


بقلم الشاعره جنان الحسناوي صاحبه ديوان زينب والمصائب والفاجعه الحسينيه مشكولة الذمة كلمن ياخذا كلماتي وينسبها لةبالعباس وامير المؤمنين عليهم السلام

https://www.tg-me.com/dchhtg

فزاعيه للزهراء عليها السلام
على طور آه واويلاه ماتت فاطمه


آه وأويـــــلاه عـــــصروا فـــــاطمه
آه وأويـــــلاه عـــــصروا فـــــاطمه

=======÷÷÷=======

مـــاتت الـــزهره أوحـــزينه اللــــــــــيله
أو زيــنب أعلــه أمــهه الــدمع أســـــيله
أدكـــــلهه ردي الـــغيبه خاف أطــــويله
بــــعد مـــنهوا أخــلافج أنـــه أشـــكيله
صـــــعب يمـــه أهـــــواي هاي الشـــيله
وحـــــيل روحي أعليـــــج يمه أمهدمـه
آه وأويـــــلاه عـــــصروا فـــــاطمه

=======÷÷÷=======

يـــمه الـــــبيتج بــــعد أشـــــلون أطب
صـــار يحـــــبيبه على عــــيوني صعب
أظـــــلم أخـــــلافج أويـــــرهب الكلب
مـــــن أصـــــدن ليـــه الــــمدمع يصب
عـــــيوني تتـــربه تـــجيهه أعله الدرب
ويـــوم رحـــــتي وأنـــه أبــــد مانايمه
آه وأويـــــلاه عـــــصروا فـــــاطمه

=======÷÷÷=======

أشـــــلون أطـــبن بـــعد أنـــي لبــيتج
وأنتـــــي خيـــمه أعليـــه أمخــــليتج
حـــــبيبه يـــــمه هـــــسه أحـــتازيتج
هــواي مهـــــضومه أنـــه أونـــــاديتج
أجـــــيتي لو مـــــره ييمـــــه ريــــتج
أوبيـــــدي أشــد أمـــــتونج المهـشمه
آه وأويـــــلاه عـــــصروا فـــــاطمه

=======÷÷÷=======

الله لايـــــنطي العـــــده الهـــــظموهه
أشـــــسوت أمــي أوهـــيج مارحموهه
أبـــــلاذنـــــب الـــــزاجيه ضـــــلموهه
مــــنهه أشـــــبع شـــوف مـاخـــــلوهه
الـــــباب والحـــايط أثــر عـــــصروهه
وعيــــنهه ســـــطروهه أوضلت وارمه
آه وأويـــــلاه عـــــصروا فـــــاطمه

=======÷÷÷=======

بقلم الشاعره جنان الحسناوي صاحبه ديوان زينب والمصائب والفاجعه الحسينيه مشكولة الذمة كلمن ياخذا كلماتي وينسبها لةبالعباس وامير المؤمنين عليهم السلام

https://www.tg-me.com/dchhtg

لطميه لعلي الأكبر عليه السلام
على طور يمه لحظه اوداع أو سفر



يبني..............عدمن اتخليني
يبني..............افراكك أياذيني
يبني..............أنطفه ناظر عيني
يبني..............يبني


يبني لاتمشي أو تخليني ذليله
وفراكك أياذي الكلب أومالي حيله
والحمل لو رحت منهوا اللي يشيله
أبقه حيرانه اوحدي أو شسويله
أتروح..............وأبقه أني بس نفس
أتروح..............وأكلبي لغيابك يبس
أتروح..............وأكعد أهنا بالشمس
يبني..............يبني


بالشمس أكعد وأهيمن بالبراري
اوماتنام عيوني لاليلي أو نهاري
أوخلهه تجويني الشمس ويزيد ناري
اوجمر أسير الدمع البخدي جاري
اخلافك..............بعد مااسكن خيم
اخلافك..............يبقه كلبي بالألم
اخلافك..............حيلي من هسه أنهدم
يبني..............يبني


بس أريدن كلمه أكلك وانته تسمع
هم بعد ليه يالأكبر يمه ترجع
واذا ماترجع تره كلبي يتكطع
اكثر أو اكثر بعد أو يجري المدمع
اطلبك..............بالربه اوذاك السهر
اطلبك..............اوتعب كل العمر
اطلبك..............ياللي رتك للكبر
يبني..............يبني


يبني رتك للكبر وأشوف حالي
وأنه من بعدك أضل أبلايه والي
أوبيتي ماينطب بعد مظلم أوخالي
اني أريد ارباي من اول أوتالي
هسه..............كوم وفي أويايه
هسه..............أجيت لك عنايه
هسه..............سمعني يبني احجايه
يبني..............يبني


اشحاله يبني اللي يروح منه أوليده
يبقه مالوم الكلب وبخده ايده
بعد شيصبره على افراكه أو يهيده
اوفكد عافيته اويا ابنه أو راح عيده
يبقه..............بعد شله بالعمر
يبقه..............مهظوم ماعنده صبر
يبقه..............يكسر الخاطر كسر
يبني..............يبني

________________________ه

*تمت*
*بقلم✍شاعره آهل البيت عليهم السلام*
*المله جنان الحسناوي*
*القصيده من ديوان زينب والمصائب الجزء الثالث*
*سيصدر قريبا انشاء الله*
*مشكول الذمه كلمن يغير اويتلاعب بالقصيده*

https://www.tg-me.com/dchhtg

كلمات ✍جنان الحسناوي

كلمات ✍جنان الحسناوي