ኤጂታ ነገሪ ይባላል፡፡አስታወሳችሁት!
ትዝ ይላችሁ እንደሁ በኛ ዘመን ትምህርት በራዲዮ የሚባል ነገር ነበር፡፡እንግሊዝኛ፣ሳይንስ፣አማርኛን የመሰሉ ትምህርቶች ከመደበኛው አስተማሪ በተጨመረ ከኢትዮጵያ የትምህርት መገናኛዎች ኤጀንሲ -Ethiopian Educational media Agency የሚተላላፍ የራዲዮ ፕሮግራም ነበራቸው፡፡
መምህሮቻችን ራዲዮ ተሸክመው ክፍሎቻችን ድረስ በመምጣት የሚተላለፈውን ትምህርት ያስደምጡን ነበር፡፡ከአፍ የማይጠፉ ውብ መዝሙሮችን አብሮ መዘመር፣ደግ ድምጽ ያላቸው የራዲዮ መምህራን ጥያቄን ተሸቀዳድሞ መመለስ ፣ትምህርታዊ ጭውውቶችን አፍ ከፍቶ ማዳመጥ-ግብሮቻችን ትዝታዎቻችን ነበሩ-ግሩም ጊዜ አሳልፈናል፡፡
ከአብዛኞቹ የራዲዮ ፕሮግራሞች መጀመሪያ እና ማብቂያ ላይ የፕሮግራሙ አዘጋጆች ስም ይነገር ነበር፡፡እጄታ ነገሪ በተደጋጋሚ እሰማው የነበረ ስም ነው፡፡
The Ethiopian Educational Media agency presents
English for grade 4,
Lesson 10- Showing direction
Produced by: Ejeta Negeri
እጄታ ነገሪ በልጅነቴ የሰመኃቸውን አብዛኞቹን ውብ የራዲዮ ትምህርቶች በበላይነት ሲቆጣጠር የነበረ ባለሙያ ነው፡፡አድጌ ሁሉ ስለ ልጅነት የትምህርት ዘመኔ ሳስብ እኒያ ጣፋጭ የራዲዮ ጊዜያት ይታሰቡኛል አብሮ ደግሞ የእጄታ ስም፡፡እኔ ብቻ ሳይሆን በርካታ የዘመን ተጋሪ ኢትዮጵያዊያን ይሄ ስም የሚተወሳቸው ይመስለኛል፡፡
እጄታ ያኔ ፕሮግራሞቹን ማቀናበሩ እንጂ በስንቶቻችን ጭንቅላት ውስጥ ለውጥ እና አይረሴ ትዝታ እንደተወ አያውቅ ይሆናል፡፡እኛ ግን አደግን-የትናንት ጨቅሎች በሀገሪቱ በመላ እንደ በዓል ፈንድሻ ተበተንን-እሱእኒያን ፕሮግራሞች ስለመስራቱ እረስቶ ይሆናል፡፡እኛ ግን ውለታውን አንረሳም፡፡

እናም ይሄን ሰው በመልክ ለማወቅ ወስኜ በኢንተርኔት ላይ አሰስኩት፡፡አገኘሁት፡፡እጄታ ዛሬ በትምህርት ሚኒስትር ውስጥ እንደሚሰራ ከማህደሩ አየሁ፡፡የፌስቡክ ወዳጆቹ ሁለት ፍሬ ሰዎች ብቻ ናቸው፡፡የእውኑ አለም ወዳጆቹ እና አመስጋኞቹ ግን ብዙ ሺዎች ነን፡፡

ለምናውቅህ ግን ለማታውቀን እጄታ ነገሪ ስለ አበርክቶትህ እናመሰግናለን ፡፡ራዲዮ በተሰኘው አስማት ስላዳረስከን ብርሃን እናመሰግናለን፡፡ልጅነታችንን ቀለማም ብላቴናነታችን እጹብ ስላደረከው እናመሰግናለን፡፡

©ሀብታሙ ስዩም