#مريوميات ..

اليوم ببدأ من أول موقف ، دا في وجهة نظري مثلا
لما أطلع الشارع الصباح وألقى مواصلات وأكون شربت الشاي( والشمس في خدرها😂) وما عندي لاب وتتلغي المحاضرة الاتأخرت عن زمنها🤓.. في الحاله دي مودي بكون أزبط من زابط 😂، ومهما حصل في نص اليوم ما بأثر على مودي ابداً 😁.

أما لما أكون طالعه متأخر والشمس داقه تمام في جبهتي، وبتنافس النار في حرها وما في مواصلات وتكون الكهرباء قاطعه وملابسي مكرفسه وما شاربه الشاي واللاب مشى من زمنه نص ساعه ،ودا كله بحصل في يوم واحد طبعاً عادي😂😂..
وفي الحاله دي لو كنت موظفه سجل مدني ولا اي موقع حكومي كنت نكدت على الناس المساكين وغلبتهم الحيله( زي ما بيحصل غالباً🌚) 🤭 ، بس ربنا لطيف بعبادة 😂😂..

يوم الليله ده طلع منهم الإتنين، كان يوم ما عارفه اوصفه..!!
واقفين وما في مواصلات ( الحمد لله شربت الشاي ) 😂 والكهرباء كانت شغاله وما عندي لاب وتتلغي المحاضرة الأولى ...
والناس تعاين لينا من الشباك وإحنا واقفين ..
في واحد كده ومعاه صاحبه وقف ، وأعتذر🥺
لما شافنا مترددين وبنتشاور😂 ..
(والله انا لا صايع ولا قليل أدب ، لكن شايفكم واقفين وما في مواصلات ، تعالو اوصلكم في طريقي) ...
سألنا بالطريق والحمد لله إنه سألنا...
انتو بتقروا شنو؟!
وبكل فخر جاوبنا بنقرا علوم ..
حسب كلامه هو درس مختبرات طبيه، ورجع درس طب وحالياً هو مساعد اخصائي ما شاء الله
تبارك الرحمن ..
-كان بتناقش معاي في البيولوجي وكأنه لسه طالب ، حرفياً كده انا ما عرفت اقول ولا كلمه ( اتمنيت لو كنت بقرأ رياض أطفال🙂🙂)، وكان عذري إنه في الجامعه ما بنشتغل عملي بطريقه كويسه ... عذر ي ريت لو سكت عليه🙂.
في ناس أبدعت في ظروف تكاد تكون معدوم
فيها الأمل..
بشكر ربنا وبحمده على أنه خلاه في طريقنا،
وممتنه ليه جداً كونه بكلامه قدر يفتّح عيويناتنا
(عشان في ناس عيونهم صغار🌚 ) على حاجات
كتييره ما مخليين بالنا منها..

بعد ما فكرت في طريقة تفكيري.. وفهمت لأي
درجه انا مسطحه وضايعه ومضيعه وقتي ...
اكتشفت قدر شنو انا بهتم بحاجات كلمة تافهه
قليله في وصفها ، وإني ماشيه بدون اي خطة
توصلني لهدفي ، بقرأ قراية إمتحان دا لو كانت نافعه الإمتحان اصلا ...
بقرا عشان النتيجة وخلاص ، نظرتي محدودة جداً .. ما بتتعدى تحت رجلي للأسف..

-مضيّعه مجهود لو انا وجهتو في المكان الصح
يكون عظيم ..
والسيء في أنك تكون ماشي بدون أي خطة حتى
لو عندك هدف عايز تصل ليه ، بتكون بتلفلف
حوليه وما قادر توصل ليه ، وفي طريقك
بتلاقيك كمية حاجات بتغيّر فيك وتبدأ تجرب حاجات جديده وانت لسه ما وصلت لأول حاجه،
بتكون خصماً على هدفك الحقيقي ...
اي إحنا نمارس حياتنا الطبيعيه بس بطريقه
إحنا متحكمين فيها وقادرين نوجهها، ونوصل
في الأخير، نمارس هواياتنا والحاجات البنحب
نعملها بس في وقت معين مش سايطين جايطين
طول الوقت ..

لما وصلت الجامعه وصلت وانا متغيره وافكاري
متجدده، اي انتي ما فاتك شيء ولا هيفوت طالما انتي منتبهه على طريقك، كنت عارفه بل متأكده تماماً إني ما براي الحسيت كده (معاي
اللخوات برضو) .. و غيرنا في كتير ما عارف
طريقه ولا قادر يحدد هدفه.. كمية هم الحقيقه ..

-الفكره اني صحيت من الغفله الأنا فيها وقدرت
أحسم فوضتي بنهاية اليوم ، وفعلا كان يوم
بشكر ربنا عليه وبحمده ..
وبطريقه غير مباشره بشكر الإنسان الأفادني
بطريقه غريبه ..


كلنا بنقدر بس محتاجين اللحظه اليقين ، الصدفه
التصحينا من غفلتنا واهمالنا الما متعمد لأنه ما في
زول بهمل أهدافه بقصد الإهمال، بتلهيه اكيد حاجات تانيه من دون ما يحس، ويبدأ يتوه ويغير وجهته...

العظيم (العظمه لله جميعاً) إنه تقدر تنتشل نفسك
وتبدأ تبني لنفسك من جديد لأنه طالما انت حي
ما فات الأوان، لا عمر لا مكان بحدد فوات الأوان
والظروف إحنا بنصنعها وبنصنع عكسها...

#مريم_محمد

للأسف كتبتها مرتين، أول مره كانت بطريقه واضحه .. بس إتمسحت 🙂..
وقررت اكتبها تاني مع اني نسيت اغلبها 💔

في أمسّ الحوجه لعونك ي الله رتب فكري ، جدد شغفي زدني علما وتنويرا💙

عارف لما تكون بتدي الناس طاقة إيجابية وتشجعهم وتدعمهم وانت نفسك محتاج تمشي العنايه المركزة.

صباح الخير ♥️
مهما حصل وبغض النظر عن أي حاجه تانيه ، ما تستهونوا بنفسكم وبقدراتكم على إنجاز أي شيء ..
ما تستصعبوا الأمور، ما تستسلموا من اول مره ، حاولوا تاني وتالت ورابع وألف أكيد في طريقة بس لسه ما اكتشفتوها ولو ما كثرت التجارب اكيد ما حتوصلوا للطريقة الصح ..
عافروا واصمدوا وما تقولوا ما بنقدر ..

ممتنه لكل حد حاول يجبر بخاطري ولو بحرف ولو بإيمائة ، شكراً جدا لكل حد ظن فيني خير.. 💙

ماذا يعزّي القلبَ غير يقيننا إن الإله بنا احنُّ وارحمُ ❤️

أبو بكر الصديق رضي الله عنه يستأذن النبي صلى الله عليه وسلم في الهجرة.
فيقول له:(لا تعجل لعل الله يجعل لك صاحباً). فلما أذن الله عز وجل لنبيه بالهجرة قدم على أبي بكر يخبره بالأمر .
فقال له أبو بكر: "الصحبة يا رسول الله".
فقال له: (الصحبة).
تقول السيدة عائشة: "فوالله ما شعرت قط قبل ذلك اليوم أن أحداً يبكي من الفرح حتى رأيت أبا بكر يبكي يومئذ" ♥️

لم أكن حيّاً تماما ، ولكني ميتاً بوجه ما ..
أستيقظ صباحاً فاقداً الشغف ، الطموح ، بلا
وجهه محددة أتخبط تارة وتارةً أعي ما التالي..
بلا هدف واضح، أعيش من أجل العيش فقط..
لا شيء يحرك فضولي لمعرفة ما ورا أفقي
المحدود ، ولا تُغري أيامي سوى الوحده ..
يعزيني حزني على كل إبتسامة أصبحت باهته
لا مبالية ، أُستبدلت كآبةً وبؤساً ..
كيف لي أن أنتمي للسعادة إن كان الحزن من
يأويني كلما عصفت بي الحياة يتلقفني بأيدي
من حرير ، لا يهرب كما الجبان مثل سعادتي ..
يبقى يتأمل حالي يطبق على قلبي خوفاً من
خذلان سعادة زائفة ..
ها هو في كل مره يآزرني بلا كلل منه لا يتذمر
كلما رحلت عنه بحجة سخيفة في نظرة ،
يتوارى عني آملا بلقاء غير ببعيد
لأصطدم بخيبة أخرى ..
حين عودتي أجده مرحباً فاتحا ذراعاه يطبطب
على قلبي ويذكرني أن ها أنا من أجلك، دوماً
حاضراً ..
لا يمنُّ على بحفاوته وكرمه معي ..
أحبك أيها الحزن🖤

في بعض الكلمات السودانيه بليغه جدا ع فكرة اللغه السودانية دي رهيبه....مثلاً عندكم كلمة شافع في اللغه العامية بقولو شفع وكده بس هنا فعلا شافع لانو بشفع لاهلو يوم القيامة ودا كلمة فصيحه
اما في السعوديه بقولو للطفل بذر من البذور اللهو الثمار او الجني فهنا كلمة شافع ابلغ وازبط من كلمة بذر 😂♥️

من المؤسف إنو في بعض المرات ابوك يفشل في إستدراك خوفك عليه و إنك بتهتم جداً لامره...
يفشل في إنة يفهم التغيرات الحاصلة في شخصيتك بسببه و ما يحس بمقدار معاناتك لما يحكي لك عن الألم الجسدي المتعايش معاها سنين و يصف لك مقدار الألم الهو فاضل مستحملة وضاغط نفسة بشدة عشان يعيش حياتة بصورة طبيعية و يقدر يوفر لك و لاخواتك الرزق الحلال .
يستحقر كلامك لما تطلب منو يستعجل للعلاج عشان يتفادي الإنتكاسات المستقبلية.
_
كفاية إني مدرك لتقدمه في العمر و إنو اللحظة المفجعة آتية لا محال، لكني بصبر نفسي بوجوده و إني اتونس معاها يومي..
ذكره للتفاصيل دي بزيد خوفي و قلقلي من إقتراب ذلك الوقت و إنو أيامة قد تكون معدودة...

أيوة هو بحكي لي بطيب خاطر و عفوية لكنه ما حاسي بمقدار ألمي وضعفي وشفقتي لحالة...
والله مهما كبرت و كبرت ح أفضل خايف من ذلك اليوم و إني افقدو فية.

أنا متمسكه بحزني على فراقه وبعده عننا، لأنو دي الحاجه الحتخليني متذكراه على طول وما بمشي من بالي ، ولا بنسى ملامحه ..
ممكن أفضل حزينه عليه عمري كله ..
ويوم ما أفرح بجد حيكون إحساسي كأنه
موجود حولي وكأنه شايف فرحي..
انا لسه ما قادرة اعترف بيني وبين نفسي
إنه خلاص مشي وما حيرجع..
لما أتكلم عنه أو يسألوني عنه وأضطر احكي
كأنه حاجه أنتهت وبقت ماضي ، قلبي
بيوجعني جداً ، بحس بالدنيا أضيق ما تكون..
بحب أشوف الناس اللي ليهم علاقه قريبه معاه
بقيت أحب حاجات عمري ما أتخيلت اني اميل
ليها ، لكن عشانه حبيتها ..
بقرأ في كتابه"موطأ بن مالك" كنت بشوفه
بين ايديه ولا بالغلط ما فكرت أقرب وأسأله
عنه أو هو ليي كل ما يخلصه بيرجع يقراه..
اللهم أرحمه ، اللهم ان كان محسناً فزده وتجاوز
اللهم عن خطاياه ي أرحم الراحمين💙

Cont. 🔽
الجزء الثاني..
بدون إسم 💔..

ما اوصيك علي اخواتك ، وما تقعد لوقت متأخر برة البيت وتخلي اخواتك براهن ، و أنا عارفاك ما حتقرا لكن حاول يا ولدى الله يرضي عليك . أنا لما كنت في عمركم ما حُظيت بالإهتمام و التعليم لأنو والديَّ كأنوا اميين.
إجتهدت بنفسي وفي الإجازات بلقط القطن مع البنات ☁️ و ببيعة عشان أدفع الرسوم الدراسية.
مجتهدة معاكم يا أولادي و أبداً ماعايزاكم تعانوا و تشقوا زي ، أنت خاصة ولدي الوحيد و ما مجتهد ذي أخوانك ما تكسر ظهري عليك الله بالنتيجة الله يرضي عليك أقرا ..

"حااااضر إطمئني إن شاء الله حأعمل كل شيء قلتي بالنقطة و الشولة😂 ، بس كمان ما تتاخري علينا و أرجعي بدري حاشتاق لك😢😢".
"المناسبة تخلص و اليوم الثاني طوالي حأرجع بإذن الله ، يلا ودعدتكم الله 👋🏽 وماتنسي خلي بالك من نفسك و اخواتك".
_
وصية آخري من أمي قبل تسافر ربنا يديها الصحة والعافية ، أمي حنينة جداً و بتخاف علينا أكتر من نفسها لو طالعة الجيران بتوصيني وتلقائيا حفظت نصائحها❤️❤️.
والله لو في كل مرة وهي طالعة بتقرا لي صفحة من مقرراتي الدراسية كنت جيت أول الدفعة 🥲💔.
الظهر إتصلت اطمئن عليها لكن تلفونها مغلق قلت إحتمال الشبكة📶.
حاولت رقم السواق برضو مافي رد ، حاولت عشرات المرات وأنا خلاص قلقت 😓.
مشيت لبيت جدو لأنو بعرف السواق وإثنين من الرجال السافرو بالعربية. لكن للاسف لقيتهم برضو جايطين وتلفوناتهم ما بتخش وكل شوية بقترحوا يضربوا لزول و النافع الله ، فضلنا بالحالة دي للعصر وأنا خلاص إتوترت و قلقت شديد و الأكل غلبني ، والأفكار المخيفة بدت تخطر في بالي ( ياربي حصل ليهم شنو؟ ، اللستك بنشر ؟ ، العربية قطعت جاز و مالقوا وصلة ؟ أو ياربي حصل ليهم حادث 😭😭؟)

"اللهم كضب الشينة"
"اضربوا لناس المرور "
"المستشفيات الفي شارعهم"
الناس بقت تهضرب و خلاص أنا فقدت الصبر ..

بعد لحظات جاء واحد من الرجال ساق جدي طرف الناس و إتكلم معاها مدة و فجأة سمعت صوت الجوطه عِلى جريت علي جدي سمعت الناس بتردد:
"لا حوله ولا قوه إلا بالله".
"إنا لله وإنا إلية راجعون".

و جدي منهار و تعابير وشو مابتتفسر أبداً و أول مرة في حياتي أشوفو ببكي.
أنا بقيت ما مستوعب في شنو و خلاص الدنيا ظلمت في وشي اساساً قلبي كان مقبوض من الصباح وحاسي بإحساس ما مفهوم ..
_
" العربية حصل ليها حادث و حالياً كلهم في المستشفي "
من سمعت الجملة دي حسيت بنفسي إتشليت و الدم إتجمد في عروقي ( يالله 😭😭😭 تكون بخير ) .
_
التلفونات دورت عشان يعرفوا التفاصيل الحادث وين و حصل كيف وياريت لو ما إتصلوا و ياريتني ما عرفت 😭😭😭😭😭😭💔💔.
بديت أسأل عشان أعرف في شنو شفت واحد من أولاد أهلي سألتو وما داير يرد علي .. جوني جدي و عمي بقوا حاضنني وببكوا و حكوا لي تفاصيل الحادث ..

سواق المدير التنفيذي وهو مسافر صادف الحادث وعرف العربية و الناس وصفت ليهو المستشفي عشان يحدد هوياتهم.

" اثناء ما العربية عايزة تتخطي بص جوز اللساتك الخلفيات إنفجرو و العربية فقدت توازن و البص كان قريب شديد وماقدر يتخطاها فدخل في العربية ونزل بيها من الظلط😣😳 ، العربية إتقلبت 7 مرات مع الشارع 😖"

و أمي و أمي أمي حية مش 😭😭😭😭؟
" الدوام لله يا بني دا قدر الله😔 "

جدوو أمي حصل ليها شنو أمي حصل ليها شنو 😭😢؟
" السواق الوحيد العايش و إتكشحت فيهو موية اللديتر (موية المكنة السخنة) و جاتو حروق من كل الدرجات ومابتكلم ، أمك كانت جهه الباب ولما العربية إتقلبت جزء منها طلع بالقزاز المكسور و العربيه طلعت فيها و ... 💔"

كلام جدي بقي ذي الحلم بالنسبه لي وما قدرت استوعبوا ساقوني ومشيت البيت...
في البيت بكيت مع اخواتي بحرقة و الجيران وناس كتيره وانا لسه ماقادر أستوعب .
أول زول جاء علي حبوبتي حضتني وبقت تبكي أول مره اشوفها حزينه كدا دا كلو وانا لسه مامصدق.
_
( معقوله ياحبيبتي ياصديقة عمري أنا تاني ما حأشوفك يالله ياربي أنا عمري ما إفترقت عنها ليه ما أخدتني معاها😭😭 )

#حبيبة_ الروح ♥️
ماليني حنانك من تبيت ..
يا الديمة حنينة يا البيكي بقينا ..
يا يمة دوام نوارة البيت 💐 ..
حنانك كون فيهو نعيش أيام و سنين ..
يا أمي تفيضي حنان و حنين ..


موقف لايحسد عليهو أحد و إحساس مافي أي كلام بقدر يوصلو ليكم..

#يومياتي..
#أصعب_شعور_وأقسي_اللحظات..

قال رسول الله صلى الله عليه وسلم:
(إن أفضل أيامكم يوم الجمعة فأكثروا عليّ من الصلاة فيه فإن صلاتكم معروضة علي )
رواه أبو داؤود وصححه الألباني.

يا سيد الكونين يا علم الهدى
هذا المتيم فيِ حماك نزيل

هذا النبي الهاشمي محمد
هذا لكل العالمين رسول

صلى عليك الله يا علم الهدى
ما لاح بدر في السماء دليل🧡🌼

م ترجع تقراء كلام كتبتو من قلبك لشخص بتحبو عشان ح تخجل من طفولة مشاعرك🤭♥️

ان التأخيرات في حياتنا هي لحكمة لا يعلمها إلا الله وحده ف سلم امرك لله وثق به ولا تيأس 💗

بتاع العدة في بحري 😂.

- خلاص شيليهم بي 200..
- 1900 كويس معاك ؟
- طيب أسمع كلامك يا اختنا ..

لما ماردت عليهو وماحصلا قاليها " بحسرة و تعجب والله إنت مشاية مشي 😂😂😂".