اليوم الزيارة الثالثة و الأخيرة بإذن الله

اللهم كنا معنا ولا تكن علينا ❤️

(أعمل الخير وأرميه البحر)

بوست ما هادف لو عندك حاجه اهم ما تضيع وقتك فيه🌚
عمري كله ما كنت فاهمه معناه!
يعني شنو اعمل حاجه وأمشي عكسها وكأنها
ما حصلت فعلا..
حاجه منافيه وما بتتفهم ، كيف يقدم الإنسان
خدمة او أيا كان وينساها..
إستوعبت مؤخرا إنه لما تقدم معروفا أو
تبذل عطاءًا وتكون منتظر نتيجة العطاء ده
تكون مضاعفة، هنا ح تكون وضعت نفسك في
موضع شك بإنه مافي معنى من العملته ولا
يستحق..
الأهم من إنه يرجع ليك بمقدار مضاعف الرضا
والسرور البيدخل في النفس لما تكون ما راجي
شيء ولا منتظر رد .
في عالم موازي بعيدا عن الكلام العاقل ده،
ح احكي ليكم موقف طريف😅
أمس وأنا سابحة في خيالي ، مع توتر المناقشة
واول ما طلعت وأسمع في الزغاريد والتبريكات
والتهاني ، قاطعني اتصال قربت ازغرد بدال أقول
ألو😂😂😂.
بعد الاستكانه الجميلة دي والأحلام البنفسجية
وزايد أديت نفسي اليوم عطله😴😢
لكن وين مع علوم الزفت😑
في إنسان عاقل واعي ، عقلة في راسه بطلع بعد الساعة ١٢ ضهر تحت شمس السودان الحراقة دي😐
ااااي🙂انا 🙂💔🔥
الموضوع كله بدا وانا بهزر مع ابوي وبحكي ليه بأحلامي وطموحاتي ، وأبوي اخد الموضوع جد
واهو سنة مليار جامعة🙂💔
اصلا كل طمحاتي في الحياة (ايوا طمحات عشان ما عايزه اتعب فيها شديد😂) إنه اعيش مع
ابجيقتي في قرية نائية وما جايبين خبر للعالم ولا
بهمنا زاتو لكن الحظ😔🤓
حدثتني نفسي ما اعمل فيها كده لكن غلطة
الشاطر بألف، ولسه انا بدفع في تمن غلطي😂💔.
رحتو صح😂😂😂.
نرجع البدايه،  صحيت الساعه ٨ ونص وانا اصلا
عامله منبه الساعه ٨😁😹😹عشان اصحى بدري
وكده😹🔥
يوم من بدايته ما ياهو ، مافي بني آدم طبيعي
بعمل منبه الساعة ٨ صباح😹😹
وبعد جرجره وكل شويه أوقف المنبه لقيت الساعة ٨ ونص ح يحصل شنو مثلا🌚
ولا شيء.
بس ح افوت اللاب والموعد مع زميلتي اللي وعدتها اخلي التسويف وأبدا جد في كتابة البحث
وباين قدر شنو جاده لما ضبطت منبه😂
ح نهزر ونضيع وقت كمان؟!
وصلت الجامعة بعد الضهر بعد ما ضيعت وقتي
في انتظار زول طريقنا ما واحد🙂💔
لكن كانت ح تمشي ولابد من وداع قدام الباب 😂
بياخه شديده🌚
اتصلت لصحبتي وطلعت ليها في المكان الوصفته لي وبكل جديه قعدنا نكتب ونعدل ويا عالم شوفو
في اجتهاد زي ده🤩🔥
جو باقي الشلة الكريمة رفقا الأسرّة والغرفة
والطرق ياهو نايمين قايمين مع بعض 😂😂
لكن بيوحشوني جداً وانا مشغوله ومجتهدة😄
قلت لا يضر المرء لو شرب شاي مع رفقاءه عند
خالتو فاطمة ورجع تاني😁🤷‍♀
خليت للبت حاجاتي ومشيت ليهم وشربنا احلى كباية شاي انتهى معاها طعم السعادة لهذه اللحظه🙂.
جات خالتو كبيرة كده شغاله في الطابق الأول
معاها ولدين ساعدوها طلعت السلم.
سلمت على خالتو فاطمة واخدت ليها لفه وجات
لقتنا شربنا الشاي ومستعدين للرحيل.. وهنا كانت
الصدمه....
🌚😃
سألتنا اذا نازلين تحت ، ف ردينا إننا ما نازلين..
بعد دقيقة حسيت بالضعف قدامها وما قدرت ما اساعدها ونا قادره على المساعدة البسيطه دي..
قلت لوفوية يا مكنه ارح نوصلها.. وكالعادة معاي
في كل وكسه😂😂
المره قالت لينا نزلوني الأرضي ومن هناك بمشي براي ، قلنا خير وبركه كلها سلمتين..
لما وصلنا تحت قالت لينا لا لا ما هنا ، وصلوني باب الحرس وبعدها ارجعن يا بناتي، يرجع فينا لوري نحن🙂
وصلنا باب الحرس وكل من لاقانا من المعارف يبتسم لينا ويمشي..
اها يا خالتو نحن كده رسمياً بره الكلية وده الشارع ادلي بدلوك..
قالت لاااا وألف لا واصلا هي ماسكه مسكة من لا يخشى يفوتوه لأنها ضامنه مسكتها كويس😪
واستسلمت رغم الشمس والحيل الميت واصلا
انا شايله لي نص زول في يد 🙂
واليد التانيه وفويه ..
قالت الترحيل واقف جمب الدراسات، وح يفوتها
وما بلقى بنات حلال تاني ..
صراحه كان نفسي اقدم المساعدة لكن كده انا زاتي محتاجه مساعدة 😂.
طبعا الفضول ساقنا ودردشنا مع الخاله ليي هي
لسه بتجي الشغل بعد العمر ده قالت عندها ولدين
شغالين ، طيب مالك يا ماما منشفه نفسك وتاعباها
كده ! ، قالت القعده ما كويسه ليها والحركه تمام معاها 🤷‍♀
اها الإيقاع بطيء وماشين بالسنتمتر والشمس تقول يا ليل..
قالت لازم يتصلو ليها لبتاع الترحيل ، وحافظه الرقم ، طبعا اتخليت ح اتصل لي على زول يقول
لي انتي مالك هسي في النهار الحار ده شابكاني
ترحيل وبتاع😂😂.
لكن سبحان الله ما شاء الله طلعت فعلا حافظه
رقم الترحيل، الصراحه لو كنت في العمر ده اسمي
ما اظن اتذكره😹😹
كائن لئيم شديد😐 وحلف ما ينتظر لو وصلت وصلت لو ما وصلت راحت ليها.. هيي يا ود امي
وجهودنا دي تروح ساي كده شمار في مرقة🙂
شدينا الهمه وقربنا نمشي بحري 😂😂
عندهم كماسره لو ما ماشي يقنعوك تمشي 😂😂
وخالتو كل واحد بترد ليه براه انا لاحقه الترحيل

زح كده لاحقه الترحيل..
والترحيل ذو مواصفات معينه احمر بأبيض وفيه
باب واحد🌚
الحمد لله وصلت بسلام ولحقنا ..
لكن فقدنا القدرة على استخدام يد كامله🙂
لما راجعين في كمساري جاي علينا بحري باححري بحررري اول ما وصلنا قال لينا اااا ديل انتو زاتكم😂😂😂😂😂
خلاص أصعب من كده ماف.
الحمد لله ما تبقى من طاقة رجعنا الجامعة واسترخينا شويه.. وأول واحده حكيت ليها الحصل
قعدت تضحك قالت لي يعني ما بتعرفيها ولا شنو😅هي اصلا كل يوم بتصطاد ليها جوز😂😂
لكن والله حلال عليها 😂😂
للأسف من أصبحت ما قادره احرك يدي الشمال
ولا ضهري بسمح لي اتحرك بمرونه قابض فيني
وقايل نفسه سلسلة فقرية لرجل آلي 🙂💔
😂😂😂😂
لكن برضو نهاية الأمر استفدت من الموقف.
وكل ما ازهج من يدي اتذكر إننا ضحكنا واتونسنا واحنا ماشين وأنها كانت شاكره لينا ودي ما حاجة
مستحقة، الحمد لله والشكر له وحده..
الحكمة في شنو انا بإرادتي الكاملة قبلت اساعد
لكن لما لقيت القصة ابعد اتأفأت وسبيت لنفسي
وقلت آخر مره تحصل🙂
اكيد ما ح تكون اخر مره لكن لو كل مره اتأفأت
افضل العدم كما يقال..
احسن الواحد يقدم مساعدة وهو راضي بالجهد
ومتقبله تماما ..
😁😁
اكيد بتكون مرت بيكم حاجه زي دي ..
المهم م عرفت اختصر 😄

#مريوميات

‏"ألحّوا على الله بأن يصلح قلوبكم فصلاح القلب أعظم أسباب صلاح الدنيا وبلوغ الدرجات العلا في الآخرة.
ومن أعظم أسباب صلاح القلب بل ذلك خلاصتها:
الحفاظ على الفرائض بخشوعها، وكثرة تلاوة القرآن بتدبر، وغض البصر عن المحرمات، والحرص على الكسب الحلال

. اللهم أصلح فساد قلوبنا."💛

‏ثم لم يبق على رمضان إلا هدفك المصحوب بعزيمتك !
فاقترب أنت من رمضان ...❣

#رمضان_الخير✨🌙

‏اللهم إني نويت صيام رمضان إيماناً واحتسابا فإن توفيتني قبل قدومه فاكتبني من الصائمين

‏اللهم بلغنا سماع التراويح ودعوات المصلين وختم القرآن، اللهم بلغنا صيامه وقيامه وارزقنا القبول فيه، اللهم بلغنا شهر رمضان ونحن في أحسن حال واجعلنا من عتقائك من النار يا أكرم الأكرمين.

في برڪه ونور لافين حولينا
بنسمع صوتة ونشعر بيهو
بيملا قلوبنا سڪينة
في شوارع روحنا بوصل لبعيد

رمضانا ڪل ايامه عيد
بي نعمه وڪل خيراتة هلا علينا
رمضانا بيشبهنا شديد
رمضان ڪريم 🌙💕
تصوموا وتفطروا علي خير
وينعاد علينا باليمن والبرڪات

الخطة الرمضانية لاقصي إستفادة من شهر رمضان المبارڪ 🌙..

1. حافظ/حافظي على وردك، ختمتك خلال الشهر تڪون واحدة خفيفة لطيفة، وإنت بتقرا لازم تقرأ الآيات بتمعن وتدبر. (عقب ڪل صلاة تقرأ أربع صفحات بتمعن و تتدبر) ❤️😌👌.

2. الذڪر المعروف و الأدعية (سبحان الله - الله أڪبر - أستغفر الله - لا اله إلا الله).

3. تقرأ ڪتب، تسمع بودڪاست أو تسجيلات (حسب رغبتڪ ويا حبذأ لو في سيرة النبي ﷺ أو الصحابة) ❤️.

4. ما تضيع صلاة التراويح في المسجد لأي سبب ڪان .. (تصليها ڪلها و تدعي مع الإمام ❤️)

5. تحافظ على صلاتڪ الفرض في وقتها، أوعك تأخرها (جهزي مصلاڪي و قرائنڪ قبل الأذان بعشر دقائق و أجلسي و إطمئني بالذڪر📿🧕 ) .. إتانى وإنت ماشي للمسجد و تذڪر إنو ڪل خطوة للمسجد محسوبة ليڪ أجر )

6. صلاة السنة قبل الصلوات و عقبها برضو فحاول حافظ عليها 💓.

7. القيام .. القيام .. القيام 🥹❤️ ...
لازم تنظم نومڪ من هسي عشان تصحى قبل الفجر بنص ساعة على الأقل تصلي رڪعتين قيام و تقرأ ما تيسر من القرآن الڪريم❤️

8. إتذڪر الصيام ما لي ربنا سبحانه وتعالي ، الصيام و القيام والطاعات دي عشانڪ إنت/إنتي ؛ فاوعى تتذمر من السخانة، العطش، التعب، الڪهرباء، الشغل أو اي عمل انت بتعمله مهما ڪان بسيط.
خلي نيتڪ حاضرة إنو ربنا سبحانه وتعالي يحسبه ليك أجر 😮‍💨

9. إتذڪر إنڪ ما حتصوم من الأڪل و الشرب لأنو ده ما الغرض الأساسي من الصيام .. حتصوم قلبڪ، بصرڪ، سمعڪ، رجلڪ، يدڪ وڪل جوارحڪ، ڪلها لله في الله ❤️


وڪل عام و جميعڪم بخير وعافية ، مبارك عليك حلول الشهر المبارڪ ✨🎉
ربي يجعلڪم من الفائزين الغانميين من فضلة و إحسانة و المعتوقين من النار يا عزيز يا رحيم يا جبار..

و ڪل عام و جميعڪم و الامة الإسلامية بخير 💙💙💙


#غيث_السيد
#رمضان_مبارڪ 🌙

الحمد لله الذي بلغنا رمضان ونحن في أتم صحة وأفضل حالاً ، مبارك عليكم الشهر الكريم 💜

اللهم بلطيف صنعك في التسخير وخفي لطفك في التيسير الطف بي ويسّر لي أمر الزواج وتمّمه بخير ولطف، واصرف عني السوء والشر إنك على كل شيء قدير.

أريد أن أعرف كيف أصبر وأرضى أمام كل شعور بالعجز على ما اردته ولم استطع تحقيقه، اريد ان تعلمني يا رب كيف استأنف السير مهما بلغ حجم الألم ،اريد ان يكون لي جهة واحدة آمنة احتمي بها ، لا اريد ان تتركني الحياة او ان تصبح جميلة تماما، لأنني اعرف جيدا انها ستحول بيني وبين معظم ما احب ، لكن على الأقل ليكن بها شيئا جميلا اتحمل لأجله كل الخسائر، ان اظل ممتلىء بالأسباب، وألّا تفقد الأشياء معانيها بعيني ، اريد ان اعلم كيف لا أسأم البحث عن طرق جديدة كلما اغلقت الحياة طريقا بوجهي، وأن أبقى ممتلئا بالأمل واليقين بك لأواصل العيش حينما يضطرني كل شيء آخر للعكس.

نصيحه..
ي جماعه راجعوا الصينيه قبل تطلعوا .. حسي أنا طالع ونسيت العصيده شلت الصحن فاضي🙂💔

أول يوم نسيت كبايتن ومعلقتين
تاني يوم جبت كباية ماحقتنا 😂
اليوم الثالث نسيت البلح 🥲💔

راجعو الصينية قبل تطلعوا

اولمبياد جمهورية الكلاكلة
#أفتح_يا سمسم

قبل كم سنه..
يحليلنا كبرنا وبقينا نقول قبل ما تعرف كم..
زمان لما يقعد واحد من الكبار يحكي لي
ويبدأ يقول لي زمان قبل كم سنة..
عقلي بيعمل تأهب وأقل شيء برجع معاه عشره سنه لي ورا..
المسكين بكون فاكرني معاه في نفس التوقيت.
اها مر الزمن وبقينا من الكبار إياهم..
مخير الله..

وقتها كنت ممتحنة الشهادة وقاعده في بيت عمي.
بحكم المدرسة جمبهم كويسه ..
وبتهم معاي في نفس السنة..نشجع بعض وما إلى ذلك..
اها كان أقسى خريف واقسى صيف في نفس
الوقت سبحان الله ..
ولا ده عشان دولة الكلاكلة الشقيقة..ومناخها مختلف ما عارفه..!
عندهم تلاجة عجيبة غريبة..
تقريبا كانت سبب سخطي الوحيد في الدنيا الفانيه دي.. حليل أيام زمان😔.
بجي من المدرسة في شمس ترمي الطير من السماء.. لساني لاصق في حلقي من العطش..
وغالبا حافظة الموية في الوقت داك يا اما شفطوها شفع الابتدائي قبل نجي نحنا..
او مويتها ما بتتناسب مع درجة حرارتي المحتاجة
جبل جليدي يسيح فيها.. كمان بعد الشمس دي
لازم نديها صدمة بموية باااردة توقف الدم في العروق .. زاتو الواحد يموت ويرتاح من التلاجه الفقر دي..
دي كانت قمة مأساتي😂💔.

ياخ بجي داخله بهبش باب التلاجة ألقاها كابسه.
كابسه شنو ما تعرف..
بس فيها حاجه في الباب اللي هي بتمنع تقريبا تبادل الحراره مع الخارج مدري إسمها شنو دي..
اللي هي مطاطية كده على طول الباب وفوق الباب و تحته، عرفتوها؟!
بس يلا دي في تلاجتنا كانت لو فتحتها تاني تستنى دقيقتين تقريبا حتى ترجع تفتح تاني.
وسبحان الله من بين الكم نفر العايشين معاها معاكساني انا بس جنس عكاس تقول موصيه
علي😒.
اهبشها ألقاها قافلة اقول خلاص اغير ملابسي واجي ألقاها فتحت وبالمرة اشرب لي موية برواق احس بيها في دماغي..
اجي ألقى بثواني قدامي زول فتح وقفل !
طيب ادونا معاكم فرصه ..
نشرب بس😔 ..

وبس بحسها بتدعي تقول ان شاء تمشي عشان
تروح عليها تاني..
اقعد احرسها الكم دقيقة عشان حضرتها تفتح ..!
تلاجات غريبة..
علمتني ضيق الأخلاق وعدم الصبر زاتو ..
كنت لو سألوني أمنيتك شنو بقول ليهم التلاجة تموت وبقولها بيقين عجيب خلاص😂..
لحد مافي يوم صبري نفد، عشرمية مره ألقى في زول فتحها قدامي 😂😂، اولمبياد هي يا جماعة نتسابق معاكم ولا شنو..
قمت مسكت العازل حق الباب واكتشفت بالصدفه انه بسرب هوا لما تجره تسمعه عديل تسسسسس😂🔥... قلت بس ياهو ده الحل وحسيت بالانتصار على التلاجة العامله فيها ذكية..
وبقى الكل مستخدم التقنية دي..
لكن مع الوقت حسيت بالخيبه ، لأنو مجهود بدني وذهني عالي حتى تفتح..
ووقت بعادل الزمن اللي لو قعدت مهذب ورايق تفتح فيه وانت موفر طاقتك لشيء اهم😂😂😂💔..
خيبه كبيره شديد 😔
لكن برضو اخدت فيها براءة اختراع في وقتها😂
واتعاملت فيها مع ازمتي الاذلية، ليوم الليلة كل ما امشي بيت عمي بحدر ليها اول شيء واقول ليها موتي ها انتي لسه عايشة😂😂😂.
وتبارك الله لسه شباب تقول استخدام ابدي غايتو بعد العملنا فيها مفروض تكون جلست زمان..

اها في وجهة نظري ، نفس باب التلاجه دي ياها مواقف حياتنا..

مرات تعصلج معاك وانت مستعجل تلقى مخرج وعطشان داير تبل ريقك .. لكن خلاص قفلت..
تجيبها يمين شمال ، شمال يمين.. وبرضو ياهو الحال ما راضية..
والخلل فينا نحنا البنفتش دايما لمخرج مستعجل
مطابق لهوانا وخيالاتنا وما عايزين ندي فرصه
للمنافذ التانية ونمشي امورنا بس ياهو راسنا كابس مع الباب القفل وقفل معاه تفكيرنا..
نيأس ونستاء عشان ما لقينا مويه باااااارده في حين انه في مويه بارده وتنفع تبل ريقنا وتروي عطشتنا..
ياهو تمشي مننا شمال نلحقها ، بدل نشوف اليمين فيهو شنو..

غايتو فلسفتي في الحياة غريبة😂😂 انا زاتي بحاول افهم العبرة وين لكن ياها ممشيه حالي وأموري سالكه ، وكل زول عندو نظره في الحياة وطريقة تعامله مع العوائق والمشاكل مختلفه عن غيرو ..

اسأل الله لي ولكم السكينة والهدوء ويجنبكم سوء باب التلاجه😂😂

#مريوميات

و الحمدلله الـ #مريوميات رجعت بحبة تنمر، عادي يعني هي أمس كانت منفسنه وقالت تنفس عن غضبها في ناس الكلاكلة 😂😂❤️
والله ناس الكيكي ديل ما خليتو ليهم جنبه يرقدو عليها 😂💔

و آخر الزمن تشبهي حالنا بي تلاجة مخستكة و لستكها ضارب 🥲

وتظن من فرط لطفه بك ، أنك عبده الوحيد🖤🦋

‏" والنساء لهُن أجر الصيام ، وأجر العمل في المنزل ، وأجر إفطار الصائمين ، فالبيوت قائمة على صبر النساء وعَطائهن " 💛