هوسات للامير علي ع
.
.
حيدر ابدونك فلا تكمل صلاة ولا يكمل دين دونك حيدره
انته مشيت الزلم مثل السراط لزمتهم حيدر ابأيدك سره
والله ياحيدر علي محتار بيك انته كلي بيك هم طلكت مره
انته راضي بطبرتك راضي تموت و حتى تاخذ فوز دنيه الاخره
ابن ملجم ابد ما يصعب عليك ابجف يمينك جنت تكدر تشطره
وما رديت اعليه الموتك جنت متاني
.
.
ابن ملجم غدر ما كابلك حيدر
حكه بهاي يدري اعليك ما يكدر
لذالك ماكدر وجه بوجه مولاي
موت احمر يعرفك يا اسد خيبر
جي شالن خيبر بجفوفه
.
.
بطبر هامت مطبوره هامتنه
ضلمه اعليك يابو حسين دنيتنه
اخلافك يا علي الانذال حكمتنه
يحلال المشاكل شوف حالتنه
يا حيدر كونك تدرينه
.
علي وكت الفجر ما نسمع اذانه
يمدوخ اليحبه و ذهل عدوانه
تعال وشوف شنهي الصار ويانه
كلها الناس ضلت بيك حيرانه
ما صدك مخلوق بطينه
.
.
حسن صالح العيساوي

نعي عن لسان السيدة زينب على فكد ابوها
.
.


شلون زينب هم بعد ضل بيها لون
حشمت خوانها ودم تجري لعيون
بوجه زينب يا خلك مضلم الكون
الله يساعدج يا زينب ام عون
.
.
شلون زينب من اجه ليها الخبر
تلطم اعله الراس والمدمع حمر
و ضلت امن تكوم بالثوب تعثر
عيونها شافت صدك نجم الضهر
.
.
شلون زينب هسه كلي شلونها
و هيه. تدري رايح يسلبونها
مو دمع من دم تسيل عيونها
وهايه زينب بت علي تدرونها
.
.
شلون حال ام الخدر من اسمعت
فطرت كلب الزجيه من نعت
حشمت لحسين اخوها ودمعت
الما درت بفراك ابوها و حسبت
.
.
اشلون بت حيدر علي تتيتمين
انتي اخت عباس ابو كلب الحنين
بالمصاب وياج سيد المرسلين
زينب تكضي العمر بس بالونين
.
.
علي رايح يداحي الباب لاوين
رحيلك بيه عشره اضلوع لاوين
عزيزك من سمع هل خبر لون
وجهه و بانت الخله و رزيه
.
.
حسن صالح العيساوي

يالماخذ دلالي
ارجعلي يغالي
والذيج الليالي
ياحيدر تعال
...
راحت الزهره وصرتك ثاني زهره
ماأصدك بالحنين اتموته طبره
البشر بالقران يقره وياخذ اجره
وانه بعيونك سوالف حلوه أقره

ياسيد زماني
زينب بويه آني
بعدك يا حناني
ماافرح محال
....
طالع اتصلي المساجد للعباده
غير الايصلي يرد لهله بسعاده
وانته ثاري امهيأ امرك للشهاده
تشبه الطير الامهاجر من بلاده

من كمل سحورك
جهزت كل امورك
وبالجنه فطورك
وي اهل الكمال
....
ياهو الايصدك تضل زينب يتيمه
ويندفن بتراب ابوجفوف الكريمه
تعرف القاتل لجن نفسك عظيمه
ماوشيت بقاتلك كبل الجريمه

وتوصي باسيرك
الكبرته اعله خيرك
شالوك بسريرك
ودفنوك برمال
...
يبوتراب وياتراب اللي يضمك
الناس كلهم ليل وانته الضاوي نجمك
الحزن خانكني بويه وارد اشمك
آنه بنتك اي نعم بس چني امك

أمن اعيونك افهمك
تسكت وآنه اكلمك
وبحظني انومك
يالنومك حلال
....
روحك من اوجاعهه الليله استراحت
وانه مملكتي الجبيره اعليه طاحت
العيداجاني والمكابر بيه صاحت
فرحة العيد اوي ابوج الغالي راحت

شو ماعايدتني
بويه وقبلتني
اسود لبستني
من هل الهلال
....
هوه جرحك هذا بوابة ضياعي
راح اسافر وأخذ اعيونك متاعي
راح اصيرن للذبايح آنه ناعي
من يصير الذبح يوم الطف جماعي

احسين ابصدره حافر
والكافل يسافر
وانه ابلايه ناصر
وبجفوفي الحبال
...
محمد الجماسي
اللهم عجل لوليك الفرج

لقاء مولاي الامير مع الزهراء ع

مشتاگ وجيتچ يالزهره
امتانيتك بعيونچ اقره
نفس اعيوني
اصفـر لـوني
++++++++++
نظرة عينچ وملگاچ منتظرلها صارد اشگد
يالتارك غيابچ ذاك خلّه ابگلبي ماتنسد
لمسي طبرتي بهداي احرورة سمّي خل تبرد
وجروح الگلب بعدين بيهن نحچي ماتنعد

شبعيني اشلونك يالغالي
ما رايح صوتچ من بالي
من طبروني اصفر لوني
++++++++++
احچي عن صفار اللون وتحاشه الحچي القاسي
مو من طبرتي والسيف موتي بجرحي لحساسي
عظيمه اتطيح يم حسين آنه عمامه من راسي
وگعتي الوجهي بالمحراب واسمچ يمشي بانفاسي

واگع واتمنـيتچ يـمـي
چفچ چان اليمسح دمي
ودمع اجفوني اصفر لوني

+++++++++
ليهسه عليچ حسين لابس اسود ابحزنه
للمسجد اجه ومن شاف دمي الشيبتي اتدنه
يمسحها واگله اتهون يومك ماكو اشد منه
گلي اعرف ولكن كون امي اتشوفك اتمنه

اسمچ يالزهره اعله اللسانه
هم مثلي اتغيرت الوانه
من شافوني اصفر لوني

+++++++++
گطعي يم حسن مبچاچ خل سالفتي اكملها
من جابوني وسط الدار وانجمعت علي كلها
كونچ شايفه العباس ليش دموعه يهملها
زينب لو سمعها اتصيح يايمه
ركض الها

امگابلها ويمسح دمعتها
وكل حيله ايون من ونتها
هالخلوني اصفر لوني

+++++++++
عدها ام البنين اهواي من البيني وبينيچ
تشد عصابتي وتنوح وينچ يم حسن وينچ
حيدر جرحه ما يلتام الا اتلزمه چفينچ
اثنين اعيوني معميات كون اولا سطر عينچ

صحتلها ادموعچ ضميها
لو ردت زينب لاگيها
بذيچ اضعوني اصفر لوني

++++++++++
بموادعنه ساعه ازمان طابع صدري من ظمهم
عدهم حچي ما يحچون بس بنظره افهمهم
اقراها ابدمع لعيون اسلملهم عله امهم
كلهم غمضو وياي يوم الغمضت يمهم

مشتاگيلچ حيل احبابچ
اذاهم يالزهره اغيابچ
وهم فگدوني اصفر لوني

ثائر الربيعي

استشهاد الامير ع

مابقت بس كلمه بيه..وداعاً وداعاً
گمت اشم عطر الزچيه..وداعاً وداعاً
من علامات المنيه..وداعاً وداعاً
+++++++++++
منتظرها وهاذي امكم
تغمض اعيوني اجت
فرحت بلحظة لقائي
وشافت حسين وبچت
ومن بدت تحظني زينب
والزچيه مارضت
خافت اتموت اعله راسي
فاطمة بزينب درت

ودّعوني بكلمة وحده..وداعآ وداعا
اوداع الاكبر هسّه بعده..وداعا وداعا
هناكَ بارض الغاظريه..وداعا وداعا
++++++++++++++
انتهت عشرتنه واسمع
مني هذا اخر كلام
يالحسن بوس اليتامه
وعني بلغهم سلام
الماغفت عينه عليهم
باچر ابگبره ينام
خلهم ايزورولي گبري
اشعر براحه وسلام

واليتيم الدمعه يجري..وداعا وداعا
خل يبلل بيها گبري..وداعا وداعا
وابثوابي انطي هديه..وداعا وداعا
+++++++++
راح اموت وهذي اخر
نظره مخلوطه بدمع
بسكته زينب لو بچيتي
خوفي صوتچ ينسمع
من تشدون الضعينه
كثّري امتاعچ شمع
ليلة الوحشه ظلامه
من اجيچ ابيا وضع

رايح امن الركضه حيلچ..وداعا وداعا
الملتقه بليلتها اجيلج..وداعا وداعا
احرس بذيج المسيه..وداعاً وداعاً
++++++++++++++
والله لمتكم عزيــزه
كون مو گعدت وداع
عيونكم واضح نظرها
كلها توحيلي بضياع
حسين تجرحني دموعك
ردها قدر المستطاع
ابجيها لو ناح الفقير
او لو يتيم ابيته جاع

وعالنهر ابچي دموعك..وداعا وداعا
لو وگع گل الضلوعك..وداعا وداعا
ومن تناديلك رقيه ..وداعا وداعا
+++++++++++++
وانت ياعباس اريدك
وانتي يازينب تعاي
مو قضية اخ واخيته
يابوفاضل ذمه هاي
ساكن ابروحي خدرها
لايمسّه احد وراي
كون اريد اتگصها ايدك
من تشيل ابچفها ماي

لحره لاتغفل ذكرها..وداعا ودعا
لو طحت صيح الخدرها..وداعا وداعا
اوعدني حط ايدك بديه..وداعا وداعا
+++++++++++++++
ثائر الربيعي

خطاب السيدة زينب لامير المؤمنين (عليه السلام )عند لحظات استشهاده  (وزن عگيلي )

ارحم گلبي ودمعة عيني 
يابويه ادخيلك حاچيني
ارحم گلبي ودمعة عيني
★★★★★
يم وجهك هلن دمعاتي وي ناري ونارك چوّني
زادن لچماتك يلغالي   ناديتك كونك تسمعني
ناوي الفرگه تعذب روحي علفرگه اتريد اتعودني
جرح الزهره بعده اگبالي بويه دخيلك   لاتجرحني

لاتجرحني    بويه ادخيلك   
من بعد امي  چنت اشكيلك
وتزيل همومي من احچيلك
ياجنه ابنار مخليني    
يابويه ادخيلك حاچيني
★★★★★
تدري بكسر ضلوع الزهره  ساعه المرت اصعب ساعه
بفراگك رايد تفجعني  يانور الموسهل اوداعه
ايمرد گلبي تدري غيابك  وللهم روحي برهن الطاعه
لاتفجع زينب يلغالي  يابوالغيره الحلوه اطباعه

من محنة روحي المهمومه
وجروح گليبي الملچومه
الدنيا الصارت مثل الحومه
من بلوة البلوة اتوديني       
يابويه ادخيلك حاچيني
★★★★★
مفجوع العالم بغيابك  وافلاك الكون المفتره
بگد العالم روحك بويه  شوالم راسك وي الطبره       
يلگبل الدنيا ومابيها  والله فراگك نار وحسره
بنيران الروح  بلاشوفك  ما احمل نار المتوجره

مكسورة خاطر متكدره 
رايد ترحل بعد الزهره
بويه بعينك اخر نظره   
بيانار اتريد اطفيني    
يابويه ادخيلك حاچيني
★★★★★
بجالك ماهميت بدنيا  ولاكثرة همي واحزاني
ريحة جدي وامي الزهره  ياراحة گلبي اوجداني
ينعاك الدين واركانه   فراگك هدم بويه اركاني
شلون الموت ايمر بدربك  وتروح بدربه وتنساني

يافرحة گلبي المطويه
بعدك يلكلك حنيه
هاي الدنيا   اسوت بيه
تفرح من يوم اتبچيني   
يابويه ادخيلك حاچيني
★★★★★
علدار ايتامك ملتمه  لاتكسرها گلوب احبابك
كلها اظن مارايح عنهم  ساجد وتصلي بمحرابك
ماظنوا موت اليدنالك  يبعد  مايوصل يم بابك
يلي مناطر هاي الساعه  تفوز بيوم اتشوف اصوابك

شظمت هاي الدنيا بدربي
بعد احبابي وسلوة  كلبي
اسويت بهلدنيا شذنبي
باچر يابلوه اتراويني.
يابويه ادخيلك حاچيني

الشاعر حسن لعيبي الحريشاوي

قصيدة ( گعده ) لاستشهاد أمير
المؤمنين علي عليه السلام

علهام صارت طبرتك ياروح الاسلام
اليوم ياحامي الحميه
ساعة افراگ ومنيه
علهام صارت طبرتك ياروح الإسلام
★★★★★
منظر الدنيا تغير وليلها خيم ظلامه
وخسرت أحبابك وجودك المن توجه الملامه
طبرتك للفوز خطوه. الهادي گال أكبر علامه
گال النبي من جبهتك
الدم يخضب لحيتك
والفوز آخر رحلتك. جنه محسومه وكرامه

چفك يحماي الحمه. . هدم الاصنام
صعبه مرت هلمسيه
ساعة افراگ ومنيه
علهام صارت طبرتك ياروح. الإسلام
★★★★★
سيرتك رغماً عليهم. فخر ياحامي الحميه
گالوا الرابع ونسبوا للاعادي الأفضلية
فضلوه بيش وعليمن اشقدم الهاي الرعية
وبالحرب انته الزلزله
وعندك علم كل مسئلة
وبسمك حديث المنزله. وفضلك رب البريه

وي الدهر اسمك جره ابشريان الايام
أجن ليك شلون جيه
ساعة افراگ ومنيه
علهام صارت طبرتك ياروح الإسلام
★★★★★
صواب زينب لوتنظره صوابها يشبه اصوابك
صفت بغيابك عليله. شلون تتحمل غيابك
عافك الموت وگصدها. اتمنته من وصل بابك
ايساعدها الله ام الحزن
ياساعه مرت. ماتون
وبهذا ماچانت تظن. ابطيحتك تفجع أحبابك

من ياجرح تغفه وتهيد الليل وتنام
درت من بعد الزچيه
ساعة افراگ ومنيه
علهام صارت طبرتك ياروح الإسلام
★★★★★
لاحت ارماح الموادع. لفت صوب المحب خطره
شچت اكلوب ومحاجر والحسن جمرته ابصدره
يودع المختار چنه. حسين. ويودع الزهره
تزيد المواجع فرگتك
وچانت ضواهم شوفتك
علدين صعبه طبرتك. المامثلها أبد طبره

عام الفجيعة والحزن ياشر الأعوام
ويوم وصيت بوصية
ساعة افراگ ومنيه
علهام صارت طبرتك ياروح الإسلام
★★★★★
بفگدك العروة الوثقى. انفل يبو الحمله ركنها
وگفت الدنيا حزينه. چن وگف بيها زمنها
اختلت الگاع باهلها. وزلزل الدنيا حزنها
هام القيم كلها انشطر
براسه علي يوم انطبر
ماكمل ايام الشهر كل عين من غمض جفنها

وشلون ياخير على هاي الناس مادام
تعوفها دارك خليه
ساعة افراگ ومنيه
علهام صارت طبرتك ياروح الإسلام

الشاعر حسن لعيبي الحريشاوي

يا مگبرتنه   يلبيچ  اهلنه  الونه  بهداي
خليني يمهم بارد لحدهم والحچي هواي    
يا مگبرتنه

،،،،،،،،،،،،،،،،،،،،،،،،،،،،،،،،،،،،

ونيت     واليوم   بسنه
علراحو     وظليت  أنه
يا  مگبره وظهري انحنه بدرب المگابر

ماي الورد ما حاجه أله
بگليبي  ضيمچ   كربله
و الدمعه دوم  امسبله  وبعيوني عاشر

أشتعل واطفه وما  يگعدون
يعزاز  گلبي  وياكم    شلون
لا عدل   انه  ولانه   مدفون
خلوني  يمكم   ما تسمعون ؟

يهل الشهامه ،، دنيت ندامه  وچني خطار
علفارگوني ،، لا ما خذوني وعايش بنار
يا مگبرتنه

،،،،،،،،،،،،،،،،،،،،،،،،،،،،،،،،،،،،،،،


تعبان   يمهم   راحتي
والله   تخنگ   دنيتي
ياهو اليشيل اجنازتي وياخذني ليهم

عگب  اليترسون  النظر
لحظه التمر حسرة دهر
شو   چني ليل  بلا گمر  چا وين اجيهم

دفان  هاك    عيوني    دفان
خليني   يمهم  وين ما  چان
ميتين   لكن    كلهم   احنان
مامش   دفو   بالدنيا  بردان

مشتاگ اچيهم ،، واغفه اعله ديهم گلبي تعبان
ذوله الأودهم ،، الميت بعدهم عمري خلصان
يا مگبرتنه

،،،،،،،،،،،،،،،،،،،،،،،،،،،،،،،،،،،،

ميتين  واشتمكم  هوى
الله   من    نلتم   سوى
بگبوركم وانتم دوه وراحه وسعاده

تحت التراب اهل الهلا
چنهم أمان    البسمله
شنهي الرمل الكم حله وصاير وساده


خليت   گلبي  ابسد  الگبور
ما راد   يرجع   ليه   معذور
وياي عايش   عيشة   طيور
محروگ عشها وظلت  اتدور

يحلم يجيكم ،، ميت عليكم وانتم اموات
شنهي المجنه ،، ونه اعله ونه وتجري دمعات
يا مگبرتنه

،،،،،،،،،،،،،،،،،،،،،،،،،،،،،،،،،

غطيني  يتراب   الگبر
مليت   مو مال  انتظر
من مده ما مرني العطر عطر المحنه

وجهي انترس كلمة مشو
اليسألني  اجاوب   غربو
يمهم بچيت وما حچو   أهل  المجنه

گلتلهم      العدلين     مو     ناس
مليت    أدور     طيبه  واحساس
الظلن     وراكم    دمعه  وانفاس
وشيب ابتدى من ضلوعي للراس

ميت صدگنه ،، طول شرحنه وماكو مضمون
مامش وصيه ،، أبچن عليه هلاه يلعيون
يا مگبرتنه

،،،،،،،،،،،،،،،،،،،،،،،،،،،،،،،،،،،،،،

الله  يا  گاع    الغري
احباب ما ظلو   ألي
مولاي يمك يا علي وبحماك الاعزاز

صارو  سوه بگاع النجف
اهل  المواقف   والشرف
كل يوم  دلالي انخطف سموني جناز

دافن    اهل   بالگاع     واحباب
تركوني   وسفه   وحظنو  تراب
أيس   يگلبي      بدگة      الباب
الظلو غرب  بس وادم     أجناب 

لا ما أتاني ،، خاين زماني وماله صاحب
چانولي ديره ،، اهل وعشيره وهم حبايب
يا مگبرتنه


كلمات الخادم
رعد الفريجي

ابوذيات لشهادة الامام علي ع

خيمة انت على عيالك ضربها
وهامك يا علي الظالم ضربها
يجرحك تدري بزينب ضربها
ضربها الشمر يا حيدر سبيه
...........
يحامي الدخل عنده دخيل وجار
الزمان شلـون هامك طبر وجار
وكَلب زينب عليك اشتعـل وجار
حسن وحسين يا حامي الحمية
........
عليك الروح دهري مرضاها
الضلوع كبال عيني مرضاها
تضن زينب سبوها مرضاها
الشمر بالكوة مشاها سبيه
........
ألمنيه شلون حيـدر من وفتك
منو ألفـتت مهجـتك من وفتك
حسن وحسين زينب من وفتك
يبـويه تصيح كـوم الحك عليه
........
ألهامك يا علي الظالم منلها
اليتامه من بعـد جفك منلها
وزينب تـدري أتمنت منلها
تموت وياك حيدر هالمسيه
..........
صبح اظلم صبحها من صلاها
صلاة الفجر حيـدر من صلاها
بسيف يفـور هامه من صلاها
نزف دم الـعرش فوك ألوطيه
..........
القطام النار ما يطفه سعرها
ابن ملجم مهـر يدفع سعرها
جهنم من طبر هامك سعرها
ولي دمك صبح رب ألبريه
...........
الغيـوم شعجب ما برجن ورمضان
رمض حته العطش بيهن ورمضان
الهظم عـاشور صومهن ورمضان
العليلة فـاطـمة وسكـنه ورقـية
.......
علي ينزف جرح جرحك وبينه
طبرتـك ميت إلـف طبرة وبينه
يتـامه احنه أبفـكـد أمنه وبينه
زينب والحسن وحسين أخيه
.......
البشر إلايمان ألها واليماني
انه بعصاة مـوسى واليماني
انه الموعود اظهر واليماني
وانه المهدي يضل الثار بيه
........
يا سبع الأرض كلها وحدها
تعده الظالم حدودك وحدها
زينب يا علي ضلت وحدها
عليها سياط تتهافت سويه
...........
شجم آه الفكد حيدر وحسراه
وأحس اتيتمت بعده وحسراه
عليه راسي اطبرنه وحسراه
ومثل جرحه اريدن كون بيه
..........
جرحك يا علي شكبره بهاماك
وهمك عاليتامه يضل بهاماك
على زينب تشير انته بهامك
يعباس الخدر عندك وصيه
.........
الشاعر
اياد الفرح التميمي

(بسم الله الرحمن الرحيم)

((وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَىٰ أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ ))

حملة جمع تبرعات لمن يرغب في تقديم المساعدة للأيتام والفقراء لشراء ملابس العيد لمن لا يستطيع الشراء   ..تبرع واكسب اجر فرحة يتيم     ولمن لا يرغب الشراء فعليكم بل فطره يرحمكم الله فان من هناك لا يملك قوت يومه

((ماي وجهي))

علماً القصيدة مشترك مع
الشاعر محمد الأبراهيمي



ينشف ماي وجهي الباب أذا دگه
واتختل بــروحي والخجل خنگه
الّـ من بابه طردني بالبخت حگه

مستـاهدلي واحــد دوم مـــايطرد
ملك وأعله اليخدمه يفـگد وينشد
وأذا مــازوره هوه يزورني ويگـصد

على عيــــوني أزوره
وأشم عطره وبخوره
حبيبي وعالي سـوره .. حبيبي

حنــين وبــــي محمد
الخامــس اسمه ينعد
سترني بثـوبي الاسود .. حبيبي

نــــاموس الموده   روحي اهناك عنده
خيره وياي جازي   ابـــــو الاكـــبر أوده

ابو الاكبر حبيبي ...
      """""""""""""""""""""""""""""""""""''''''''''

حبيبي مايخلي الروح محتاره
احس يشبگني لو مريتله زياره
بس بكتاره ألوذ وتشهد أكتاره

بگد ماگالو اهـــــلاً زايــد يگــــلي
يضيفني ويحـبني وزاد قــــدملي
اگبالي أگبالي هيچ يجيب ويخلي

يامسعد حــياتي
بحبه وذكـــرياتي
بصومي وبصلاتي .. حبيبي

بسهــري بنوم ليلي
وبحــلامي يجـيلي
صديجي وياخليلي .. حبيبي

اسمه الصار تچوه    مامش غيره هوه
گوه بنص العيـون   حبيب وحـبه گوه

ابو الاكبر حبيبي ...
               """""""""""""""""""""""""""""""""""''''''''''

يمن ما اريد احسَـن غـيرك يحبنـي
عيونـك ويلي بيـه بنضـره تلچمنــي
اموت وابقه اصيح الخـيمه تحرگني

ياهو المـثلك اليســــــمعني وحجيله
وحـس گلبـي طفـل عينـك تناغيـلـه
سودني العشگ بجروحي أنه اشكيله

بس انته الله شاهد
ما احب غير  واحد 
واظل بهـــاي اعاند .. حبيبي

يمن جرحك جـذبني
وملك روحي وسلبني
احـــــبك يــــالتحبني .. حبيبي

مدارينـي برحمتـك   من اول ما عرفتك
شيــــجازي حنانك   مـا عوفـن دمعتـك

ابو الاكبر حبيبي ...

"""""""""""""""""""""""""""""""""""''''''''''

العجب عطشان ماي وانته راويني
وشنـي انا وتـذب هدمـك تغطينـي
وعيالك بالســـــبي وعينك تباريني

شفتك صوره مره وحركت احساسي
ماوافيك لــــو انطـي الـــك راســــي
وبسمك روحي تشهگ اخـر انـفاسـي

يا واهـس واحبه
يالحاويني رغـبه
الينطبني واندبه .. حبيبي

يا سر المحاجــر
المذوبها عاشـــر
يالتوگفلي باچــر .. حبيبي

بحبك عايش صباي    دعيلي ابقه وفاي
وياك بكلشي للموت   باليرضـيك مولاي



عبد زينب
محمد الابراهيمي

عبد اهل البيت
منتظر المنصوري

‏مقطع صوتي من الشاعرمنتظر المنصوري

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

https://www.tg-me.com/+PZwpTt2HLXcvUQZh

------------------------------------------------------

بسم الله الرحمن الرحيم
ثبت بالرؤية الشرعية أن غداً الاربعاء هو يوم عيد الفطر السعيد الأول من شهر شوال المكرم عام ١٤٤٥هـ في العراق وعموم هذه المنطقة .
نسأل الله تعالى أن يتقبل من الجميع صيامهم وقيامهم ويعيد عليهم هذه المناسبة السعيدة بالخير والبركات.
مكتب السيد السيستاني - النجف الأشرف