فلما خلاص أوشك على الإنتصار كانت نهاية يوم الجمعة بعد العصر،
فلو غربت الشمس يبقى كده هيدخلوا في ليلة السبت، ويوم السبت ده في شريعة موسى ويوشع عليهما السلام إن بني إسرائيل ممنوع يحاربوا فيه،
فدلوقتي لو انسحب يوشع بجيشه ورجع بسبب يوم السبت ، يبقى الجبابرة هيستعيدوا قوّتهم ويلموا عتادهم ويتعلموا من أخطاؤهم ويتجمعوا من تاني ويهجموا على جيش يوشع ويخلصوا عليهم،
وفي نفس الوقت يوشع عليه السلام مش عايز يعصي أمر ربنا باستمرار القتال لحد ما يتم استرجاع البلد تاني من إيدين الجبارين، مع إنه بيقاتل برده لأمر ربنا👌
فعمل إيه؟
بص للشمس وقال لها :
انتِ مأمورة إنك تغربي زي كل يوم ، وأنا مأمور إني أفتح المدينة ومأمور إني لا أقاتِل يومَ السبت ،
ثم بدأ يدعي ربنا: يارب احبسها وماتخليهاش تغرب لحد ما أكمل المعركة🤲
فربنا استجاب ليوشع وفعلا حبس الشمس وخلاها موجودة لحد ما أنهى يوشع المعركة وانتصر على الجبارين،
فيوشع هو النبي الوحيد إللي حُبست له الشمس كما في حديث رسول الله ﷺ:
"إِنَّ الشَّمْسَ لَمْ تُحْبَسْ لِبَشَرٍ إِلَّا لِيُوشَعَ لَيَالِيَ سَارَ إِلَى بَيْتِ الْمَقْدِسِ"

☆قلتلكم قبل كده إن ربنا بيحكي لنا القصص عشان نعتبر
وناخد الخلاصة ومنقعش في نفس أخطاء الأمم السابقة،
طيب إيه العبرة من قصة يوشع إللي ربنا يريد إننا نتعلمها🤔
حصل مع يوشع عليه السلام إنه تعارضت طاعتين مفروض يؤديهم لله، أمرين من أوامر ربنا...
فكان رد فعله إيه؟
هل ضحى بأمر من أوامر ربنا على حساب التاني وقال أصل انا مضطر؟ وهو فعلا مضطر بالمناسبة🙂
ولّا نفذ الأمرين مع بعض وهو مستعين بالله
استعان بالله ودعا ربنا
انت كمان لما يحصل لك زي يوشع بن نون كده ويتعارض أمرين من أوامر الله...اصدق مع ربنا من قلبك إنك عايز تعمل الأمرين دول وادعي ربنا إنه يعينك ويساعدك على كده وهتشوف العجب والله😊

انتصر يوشع عليه السلام على الجبابرة، وجمعوا الغنائم إللي هي كل حاجة الجيش بيكسبها و يغتنمها من جيش العدو المهزوم بعد انتهاء المعركة، سواء بقى دهب أو فضة أو أغنام أو أسلحة أو خيول..كل حاجة،
وزمان في الشرائع قبل الإسلام الغنائم دي كانت تتجمع وتنزل نار من السماء تاخذها، زي قُربان قابيل وهابيل كده لو تفتكروا
لكن في شريعة الإسلام ربنا أحل الغنائم للمسلمين، يعني تتوزع على المسلمين بتقسيمة معينة بينهم مش موضوعنا النهاردة
فاللي يهمنا إن يوشع جمع الغنائم عشان نار تيجي تاخدها،
فاستنوا النار تنزل كالعادة، منزلتش

فيوشع عليه السلام قال:
في حد منكم غَلّ من الغنائم، يعني أخد من الغنائم دي حاجة لنفسه من غير ما حد يعرف...
فمحدش رد، فقال لهم يوشع عليه السلام:
كل سِبْط يبايعني منه النقيب بتاعه👌
يعني الأسباط إللي هم ذرية أبناء يعقوب عليه السلام ال12
كل سِبط أو قبيلة منهم لها نقيب ينوب عنها، زي قائد المجموعة كده،

فبدأ الـ١٢ نقيب يبايعوا يوشع بإيدهم واحد واحد، يعني كل واحد بيحط إيده في إيد يوشع كأنه بيسلم عليه،
فا وهو بيبايع نقيب منهم ،إيده لزقت في إيد يوشع!
فقال يوشع : الغلول في السبط ده!
يعني في القبيلة إللي ورا النقيب ده، فبدأ يبايع قبيلة النقيب ده عيلة عيلة لحد ما إيده لزقت في رجلين ثلاثة،
فقال لهم أنتم غللتم من الغنائم، يعني سرقتم من الغنائم،
فجابوا له قطعة كده زي رأس بقرة من الذهب، كانوا فعلا واخدينها ليهم من الغنائم،
فيوشع وضع الغنائم كلها مع بعض، فنزلت النار من السماء أكلت الغنائم،
☆ودي آية مذهلة من ضمن الآيات إللي ليها دلالة واضحة في كل عصر وقعت فيه، وبالأخص أمام بني إسرائيل، على وجود الله ربنا عز وجل واستحقاقه وحده بالعبادة👌

بعد كده ربنا أمر بني إسرائيل إنهم ييجوا يدخلوا المدينة عشان يعيشوا فيها،
لكن قال لهم وانتم داخلين ادخلوا وانتم راكعين خاضعين لله شاكرين على الفتح العظيم ده واستغفروا لذنوبكم وقولوا حِطّة،
يعني يارب حُط عنا خطايانا إللي فاتت من إعراضنا ورفضنا إننا ندخلها قبل كده من أربعين سنة😔
"وَإِذْ قُلْنَا ادْخُلُوا هَٰذِهِ الْقَرْيَةَ فَكُلُوا مِنْهَا حَيْثُ شِئْتُمْ رَغَداً وَادْخُلُوا الْبَابَ سُجَّداً وَقُولُوا حِطَّةٌ نَغْفِرْ لَكُمْ خَطَايَاكُمْ وَسَنَزِيدُ الْمُحْسِنِينَ"
☆بنو إسرائيل عملوا إيه بقى
خالفوا الأمر طبعا كالعادة😑
رغم كوووول الآيات الدالة بوضوح شديد على وجود الله واستحقاقه للطاعة!
دخلوا زاحفين على مقاعدهم( مؤخرتهم) بكل أسف وسوء أدب، وقالوا حَبَّة في شَعرة، أو حِنطة في شَعرة😶
أهه أي استهزاء بأوامر الله وضحك وتريقة وخلاص...متخيلين
يقول النبي ﷺ :
"قيل لبني إسرائيل ادخلوا الباب سُجَّداً وقولوا حِطة، فدخلوا يزحفون على أَسْتَاهِهِمْ، فبدَّلوا وقالوا حبّة في شعرة."

فربنا أرسل عليهم الطاعون والعياذ بالله، قتل منهم ٧٠ ألف بس وهمّ واقفين كده😑

"فَبَدَّلَ الَّذِينَ ظَلَمُوا قَوْلًا غَيْرَ الَّذِي قِيلَ لَهُمْ فَأَنْزَلْنَا عَلَى الَّذِينَ ظَلَمُوا رِجْزًا مِنَ السَّمَاءِ بِمَا كَانُوا يَفْسُقُونَ "
وفي رواية تانية العدد ٢٠ ألف.. المهم إن ربنا عاقبهم على استهزاؤهم ده وتبديلهم لأوامر الله..
"قُلْ أَبِاللَّهِ وَآيَاتِهِ وَرَسُولِهِ كُنْتُمْ تَسْتَهْزِئُونَ"

عاش بقية بني إسرائيل مع يوشع بن نون في بيت المقدس يحكم بينهم بالتوراة لحد ما مات وهو عمره 127 سنة.
هل استمر بنو إسرائيل في بيت المقدس ولا حصلت أحداث تانية؟


ده إللي هنعرفه الجزء الجاي إن شاء الله😊

#Eman_Shalapy

اللهم ارزقنا صدق التوكل عليك

↩️ادركوا_اللحظة_الفارقة ↪️

🎤مثل الحي والميت🕋

🤍العشرمن دي الحجة 🤍

🎙️د.حازم شومان👆🏼👆🏼👆🏼

الفرق بين الأيام المعلومات والأيام المعدودات: 🗓 أيام عشر ذي الحجة هي الأيام المعلومات ﴿ويذكروا اسم الله في أيام معلومات﴾ #سورة_الحج (28). 🗓 وأيام التشريق هي الأيام المعدودات ﴿واذكروا الله في أيام معدودات﴾ #سورة_البقرة (203).

رسالة لكل أب وأم ملابس.. الرياضة اللي بنتك بتمارسها.. محتاجة من حضرتك وقفة وتفكير..
هل ملابس الجمباز والفتنس أو السباحة مناسب تظهر به البنت قدام الجمهور حتى لو لسه طفلة؟
بدلة الكاراتيه وفستان الباليه والملابس الرياضية عموماً متنفعش خالص لبنت حضرتك حتى لو لابسه حجاب.. مينفعش الكابتن يشوفها بيها حتى لو مش هيلمسها
نقطة تانية هو مين اللي بيدربها؟
الكابتن راجل ولا امرأة؟
مينفعش بأي حال بنتك تتدرب مع مدرب راجل ويقف يعلمها الحركات وازاي تفرد ظرها ويلمسها ويمسكها وأي رياضة هتحتاج كده..
ومش بتكلم عن الموضوع من ناحية التحرش بقى والكلام ده مع انه موجود.. لكن بتكلم عموماً انه مينفعش أي تلامس يحصل حتى لو تمرين وحتى لو ضرب وبوكس..
بنتك بتحب اللعبة ومتمسكه بيها اتكلم معها وعرفها الحدود دي.. ممكن تتدرب مع كابتن بنت ومفيش حاجة اسمها تطلع بطولة بملابس ضيقة وقصيرة..
وفهمها إن جسمها وحيائها أهم وأغلى من مليون ميدالية ذهبية وبرونزية..

#رسائل_تربوية

(لنختم القرآن سماعا)

الورد ( ١١٩ )

(الربع الثالث & الحزب الثلاثون)

#القارئ: حازم سيف
#ليدبروا على التليجرام
#صباحكم_قرآنٌ_يُتلى

#قصص_الأنبياء
#الحلقة_السادسة_والثلاثون
#حزقيل_إلياس_اليسع

وقفنا المرة إللي فاتت عند موت يوشع عليه السلام، بعد ما عاش في بيت المقدس فترة من الزمن مع بني إسرائيل يحكم فيهم بالتوراة،
بنو إسرائيل من كثرة فسادهم وعصيانهم لله، كان ربنا بيبعث فيهم الأنبياء ..واحد ورا الثاني ورا الثالث؛ عشان يستقيموا على الدين وميبعدوش عنه،
فبعد موت يوشع عليه السلام، انتقلت النبوة لنبي من بني إسرائيل اسمه《كَالِب بن يُوفَنا》...احنا منعرفش عنه حاجة تقريبا، لكن كباقي الأنبياء استمر يحكم في بني إسرائيل بحكم الله وشريعته لحد ما مات،
وجه بعده نبي تاني اسمه حِزقِيل بن بُوذَى --ويقال إنها بُوذِي-- وبرده معندناش عنه أخبار كثيرة،
لكنه كان نبي من أنبياء بني إسرائيل ، نعرف عنه قصة واحدة فقط، هي في قوله تعالى:
"أَلَمْ تَرَ إِلَى الَّذِينَ خَرَجُوا مِن دِيَارِهِمْ وَهُمْ أُلُوفٌ حَذَرَ الْمَوْتِ فَقَالَ لَهُمُ اللَّهُ مُوتُوا ثُمَّ أَحْيَاهُمْ "
إللي هي قصتنا النهاردة..
بعد يوشع عليه السلام انقسمت النبوة والملك، يعني قبل كده كان النبي هو الملك أو الحاكم إللي بيحكم بني إسرائيل،
لكن بعد موت يوشع عليه السلام بقى في مَلِك أو حاكم يحكم بني إسرائيل، وفيه نبي تأتيه النبوة والرسالة والشريعة من ربنا،
فكان فيه ملك معين من حُكام بني إسرائيل، أمرهم إنهم يقاتلوا عدو ليهم، منعرفش مين هو العدو ده
لكن بني إسرائيل خافوا من القتال والموت بما إنهم طول عمرهم أحرص الناس على حياة،
فاتحججوا و قالوا للحاكم بتاعهم إن القرية إللي انت عايز تودينا ليها دي فيها طاعون فمش هندخلها
فربنا أنزل عليهم الطاعون في مكانهم ، فبدأوا يهربوا من قريتهم عشان ميموتوش،
فالحاكم دعا ربنا إنه يُوريهم آية إنهم مهما هربوا فمحدش فيهم هيقدر يهرب من الموت لو كان خلاص جاء أجله،
فربنا استجاب لطلب الحاكم وقال لبني إسرائيل موتوا.. فماتوا قبل آجالهم النهائية المكتوبة..
يعني لو مثلا كان المفروض إنهم يموتوا وهمّ عندهم ١٠٠ سنة، ربنا أماتهم بدري وهمّ عندهم ٦٠، يعني لسه فاضل لهم ٤٠ سنة، وبقول ده كمثال لتقريب المعنى
فقعدوا ميتين بالمنظر ده 8 أيام، لحد ما بطونهم اتنفخت، وريحتهم بدأت تطلع...
فحاول باقي القرية إنهم يدفنوهم معرفوش لإنهم كانوا بالآلاف..! فسابوهم..
فمرّ عليهم نبي الله حِزقِيل فتعجب من منظرهم، فربنا قال له : أُرِيك آية؟
قال حزقيل: نعم، فأحياهم ربنا كلهم من تاني، ورجعوا لقومهم وعاشوا معاهم لحد ما استكملوا آجالهم المكتوبة.

☆طبعا القصة دي من كلام المفسرين، لأن القرآن والسنة متعرضوش للتفصيل ده،
واحنا عارفين إن القرآن مش كتاب تاريخ عشان يحكي لنا القصة بالتفصيل، لكن ربنا بيقول لنا القصة من الزاوية إللي فيها العبرة المُستفادة منها👌
والرسالة أو العبرة إللي ربنا بيعلمهالنا من القصة دي هي إننا نتوكل عليه عز وجل، ومنحاولش نهرب من مُسببات الموت بترك الأمور الواجبة إللي ربنا أمرنا بيها وإللي ممكن لو عملناها نتعرض للموت،

يعني همّ عصوا أمر ربنا بالجهاد عشان خايفين من الموت
والهلاك إللي هو أصلا بيد الله،
ونسيوا إن لو ربنا شاء هياخد أرواحهم حالا حتى لو كانوا بس قاعدين على سرايرهم بدون أي قتال أو مرض أو سبب ظاهر للموت،
فربنا بيعلمنا بقصتهم إن محدش يملك لك ضر ولا نفع إلا إذا ربنا أَذن👌
لكن مش معنى كده إن الإنسان لا يحتاط ويقوم رايح يرمي نفسه في المهالك
لأ طبعا.. ناخد بالأسباب إللي ندفع بيها سبب الهلاك أو الموت عشان ربنا أمرنا بده لإن حفظ النفس من الضرورات الشرعية.

بعد موت حِزقيل عليه السلام، انتشر الفساد وانحرف الناس عن أوامر ربنا ، لدرجة إنهم عبدوا الأصنام😶
فربنا أرسل لهم نبي تاني اسمه إِلياس بن ياسين، من نسل هارون عليه السلام،
"وَإِنَّ إِلْيَاسَ لَمِنَ الْمُرْسَلِينَ.."
ويُعرف في كتب الإسرائيلين باسم إيلِيا...لكن عندنا في القرآن إلياس،
وكان الأنبياء في بني إسرائيل من بعد موسى عليه السلام بيجددوا إحياء شريعة موسى ويذَكّروا بيها الناس،
فربنا أرسل النبي إلياس كرسول لبني إسرائيل إللي كانوا بيعبدوا صنم اسمه بَعْل،
"أَتَدْعُونَ بَعْلًا وَتَذَرُونَ أَحْسَنَ الْخَالِقِينَ"
فبدأ يدعوهم لعبادة الله الخالق الرازق...
"اللَّهَ رَبَّكُمْ وَرَبَّ آبَائِكُمُ الْأَوَّلِينَ" ،
ونصحهم وذكَّرهم بقصص السابقين إللي ربنا أهلكهم، ولكنهم مستجابوش له 😑
فربنا توعَّدهم بعذاب يوم القيامة زي ما قال في الآية: "فَكَذَّبُوهُ فَإِنَّهُمْ لَمُحْضَرُون".
ووعد الناس إللي اتبعوا إلياس عليه السلام بالثواب يوم القيامة،
ومدح عز وجل إلياس عليه السلام وإنه لم يُقَصِّر في دعوته👌
والعبرة في قصة إلياس هي إنه عليه السلام دعا قومه بكل الأساليب،
بالترغيب والترهيب وبالحسنى زيه زي باقي الأنبياء السابقين، يعني ما قصرش في دعوته،

برغم كل إللي عمله قومه كذبوه،
طيب بقى هل لما كذبوه ربنا أهلكهم؟
لأ لم يهلكهم ولكن توعدهم بعذاب الآخرة...

فمش لازم تشوف هلاك الظالم بعينك..ممكن انت تموت وهو لسه عايش عادي جدا ،زي ما أبو جهل قتل سمية وزوجها ياسر ، همّ ماتوا واستمر أبو جهل عايش بعدهم،
وربنا قال لرسول الله ﷺ في القرآن:
"فَإِمَّا نُرِيَنَّكَ بَعْضَ الَّذِي نَعِدُهُمْ أَوْ نَتَوَفَّيَنَّكَ فَإِلَيْنَا يُرْجَعُونَ"
وقال:
"وَإِمَّا نُرِيَنَّكَ بَعْضَ الَّذِي نَعِدُهُمْ أَوْ نَتَوَفَّيَنَّكَ فَإِلَيْنَا مَرْجِعُهُمْ ثُمَّ اللَّهُ شَهِيدٌ عَلَى مَا يَفْعَلُونَ"
فربنا بيأكد علينا في القرآن العبرة دي أكتر من مرة، عشان نتعلم إن احنا دورنا فقط هو التبليغ،
أما عاقبة الناس فأمرهم بإيد ربنا وحده، يعذبهم في الدنيا بعصيانهم،
أو يأجل عقابهم للآخرة، أو يتوب عليهم قبل الممات ويقبلهم مع الطائعين، ده مش مفروض يأثر فيك أو يلهيك عن مهمتك، فإنما علينا البلاغ وعلى ربنا الحساب👌


♡كمان فايده
إننا نوصل دين ربنا...سواء الناس استجابت ولّا لأ،
احنا مش مطلوب مننا إننا نُكره الناس ونغصبهم ..
وربنا قال لرسول الله ﷺ نفسه:
"وَمَا جَعَلْنَاكَ عَلَيْهِمْ حَفِيظًا ۖ وَمَا أَنتَ عَلَيْهِم بِوَكِيلٍ"
وقال له في آية تانية إنه يقول ده للناس بوضوح كمان:
"قُلْ يَا أَيُّهَا النَّاسُ قَدْ جَاءَكُمُ الْحَقُّ مِن رَّبِّكُمْ ۖ
فَمَنِ اهْتَدَىٰ فَإِنَّمَا يَهْتَدِي لِنَفْسِهِ ۖ وَمَن ضَلَّ فَإِنَّمَا يَضِلُّ عَلَيْهَا ۖ وَمَا أَنَا عَلَيْكُم بِوَكِيلٍ "

بعد موت إلياس عليه السلام تولى النبوة ابن عمه 《اليسع》، وكان إلياس عليه السلام بيربيه عشان يتحمل أعباء النبوة من بعده.
فسار اليسع على نفس منهج إلياس عليه السلام ، وكان بيدعو بني إسرائيل لعبادة الله والتمسك بشريعته سبحانه،
ظل فيهم مدة زمنية الله أعلم بيها ، لحد ما مات عليه السلام، مفيش عنه أخبار مُفَصّلة زي باقي الأنبياء..
لكن بنو إسرائيل كَثُر فيهم الفساد والفجور والظلم، لدرجة إنهم بقوا يقتلوا الأنبياء😬
وكان عندهم تابوت، صندوق يعني، فيه آثار من أغراض موسى عليه السلام،
زي بعض ملابسه مثلا، وكانت العصا كمان موجودة في الصندوق ده، و بعض ألواح التوراة،
فربنا سلط الجبابرة على بني إسرائيل وأخرجوهم من القدس وسرقوا التابوت، ورجعوا مشردين تااااني في الأرض😶
هل سيظل بنو إسرائيل مشردين؟
ولا هيحاولوا يرجعوا لبيت المقدس مرة تانية؟

ده إللي هنعرفه الجزء الجاي إن شاء الله😊


#Eman_Shalapy

#نصائح_مطبخية_لازم_كل_بنت_تعرفها
#نصائح_مطبخية ‌👩‍🍳⁩✨

🥛🥛
الجبنه القريش
اضربيها فى الخلاط مع شويه لبن وملعقتين زيت هتبقى احلى جبنه كريمى👍 وكمان لو لبن خالي الدسم هتبقي لايت
ريحان
🍜🍜- رشة ريحان علي صلصة المكرونة بتدى ريحة حلوة وطعم مميز .
🍖لحمة
🍖🍖- تشوح اللحم في الزبد وحبهان وورق لورا قبل السلق نديها صدمة عشان يبقى لونها بنى وجميل وطعمها تحفه .
صلصه
🍜🍜 - لصلصة المكرونة اضربي مع الطماطم توم وفلفل حامي . .
فراخ
🍗- الكيس الحراري جميل فى تسوية الفراخ والبط . .
ارز
🍚🍚- الأرز والمحاشي اكشفي الغطا بعد ما يستوي عشان يبقى مفلفل ميعجنش .
بفتيك
- وأنتِ بتحمرى البفتيك حطي ملعقة زبدة مع الزيت هيبقي حلو اوى وزي المطاعم

مواعين
❤- شوية خل فى مياه غسيل المواعين بتفرق كتير بتمنع التصاق الصابون بالاطباق وبتنضف وتطهر وتلمع المواعين
مطبخيه
❤- لو عندك كاتيل استانلس اغلي فيه مياه وخل ولو متوفر ملح ليمون.. وبعدين اغلي مياه فقط حينضف ويبقي بيلمع
مطبخ
❌- اللحمه بيتحطلها ملح عادي فى بداية التسوية لان غير كده مبتكونش الطعم احلي حاجة
مكرونه
❌- مانحطش زيت واحنا بنسلق المكرونة هنستخدمها فى بشاميل أو وايت صوص عشان بيزحلق الكريمة من على المكرونة 👌
مهم
❤- البصل الأبيض للطبخ والأحمر للسلطات والساندوتشات

❤- نضيف على عصير الليمون في الخلاط ربع كوبايه لبن بيبقي تحفه

❤- الطماطم بعد ما تتعمل بالخلاط بتتصفي من القشر والتفل بتبقي مختلفة تمامااااا .. كمان مريحة للقولون

🥘