قوم لوط قالوا إنت عمال تقولنا إن ربنا هيبعت علينا عذاب لو مبطلناش إللي بنعمله
هو فين العذاب ده، لو إنت فعلا صادق هاته
"فَمَا كَانَ جَوَابَ قَوْمِهِ إِلَّا أَن قَالُوا ائْتِنَا بِعَذَابِ اللَّهِ إِن كُنتَ مِنَ الصَّادِقِينَ"
فلما وصل لوط للمرحلة المتأخرة خالص دي دعا ربنا إنه ينجّيه وأهله منهم ومن كيدهم،
"قَالَ رَبِّ انصُرْنِي عَلَى الْقَوْمِ الْمُفْسِدِينَ"

فربنا أرسل الملائكة الثلاثة عشان يهلكوا قرية قوم لوط: جبريل وميكائيل وإسرافيل إللي قلنا عليهم المرة إللي فاتت إنهم وهمّ في طريقهم لقرية لوط مروا على إبراهيم يبشروه بهلاك المجرمين دول ويبشروه بإسحاق ويعقوب ذرية له من النبيين.

نرجع بقى لقصة إبراهيم بعد ما ربطنا الأحداث ببعض
الملائكة بعد ما بشرت إبراهيم عليه السلام وزوجته سارة بالبشارتين الرائعتين دول خرجوا من عندهم متجهين لقرية سَدوم استجابةً لدعوة لوط عليه السلام،
كانت الملائكة في صورة بشر كأجمل ما رأت العيون،
ودي كانت طبيعة الملائكة لما يتمثلوا في هيئة بشر بيكونوا في أجمل الصور،
بعكس الشياطين لو تمثلوا في صورة بشر بيكونوا في أقبح الأشكال،
فلما وصلوا عند قرية سدوم شافتهم ابنة لوط عليه السلام وكانت مؤمنة،
فعرفت إن لو قومها المجرمين شافوا الشباب اللي شكهم حلو دول مش هيسيبوهم،
فراحت على طول لأبوها لوط عليه السلام وقالت له إن في شباب من أجمل ما رأت داخلين القرية وإن قومها لو شافوهم هيخطفوهم ويفعلوا معهم الفاحشة
فخرج لوط عليه السلام بسرعة وراح لهم وقال لهم إنتم إيه إللي جابكم القرية دي بس أهل القرية دي أخبث الناس وهيؤذوكم😥
وحاول إنه يبعدهم عن القرية بس هما صمموا إنهم يدخلوا القرية، فمكنش قصاده حل غير إنه ياخدهم عنده في البيت،
كل ده وميعرفش لسه إنهم ملائكة جاية لإيقاع العذاب بالقرية،
👌
القرآن وصف حال سيدنا لوط بدقة:
"سِيْءَ بِهِمْ وَضَاقَ بِهِمْ ذَرْعاً وَقَالَ هَذَا يَوْمٌ عَصِيْبٌ"
ساءه مجيئهم وضاق صدره من خوفه عليهم وقال ده يوم شديد وصعب،
لأنه كان مفكر إن قومه المجرمين هيتغلبوا عليه ويوصلوا لضيوفه الثلاثة ويؤذوهم وربما يؤذوه معاهم،
وفجأة لقى قومه جايين جري ورا بعض وعمالين يخبطوا عالباب بقوة لدرجة إنهم كانوا هيكسروا الباب،
" وَجَاءَهُ قَوْمُهُ يُهْرَعُونَ إِلَيْهِ وَمِن قَبْلُ كَانُوا يَعْمَلُونَ السَّيِّئَاتِ"

إيه ده😳...هم عرفوا منين
كانت زوجة لوط عليه السلام هي إللي قالت لهم،
كانت بتشعل نار برة البيت عشان تعرفهم لما يكون لوط عنده ضيوف رجال، زوجة خاينة للأسف
خانت زوجها في الدين، وخانت زوجها في كشف السر،
ودي تاني زوجة تخون زوجها من الأنبياء، الأُولى كانت زوجة نوح عليه السلام
" ضَرَبَ اللَّهُ مَثَلًا لِلَّذِينَ كَفَرُوا اِمْرَأَةَ نُوحٍ وَامْرَأَةَ لُوطٍ كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ فَخَانَتَاهُمَا "

☆والخيانة هنا مش خيانة عِرض، لأن ربنا حفظ أعراض الأنبياء من ده،
وعلى فكرة صور خيانة الزوجة لزوجها متنوعة،
فالمرأة ممكن تخون زوجها في المشورة، يعني يستشيرها في حاجة وشايفة إنها مش من مصلحتها إنها تقوله الرأي الصح فتقوله الرأي الغلط مع إن رسول الله ﷺ يقول:
"المستشار مُؤتمن"
وممكن تخون زوجها في كشف سره أو إنها تحكي عن حياتها معاه وأسراره،
فالخلاصة إن الخيانة مش بس خيانة في العِرض زي ما الناس فاهمة.

المهم،
قوم لوط قعدوا يخبطوا جامد على الباب، ويطلبوا من لوط إنه يفتح لهم،
لوط عليه السلام فتح لقومه الباب وقعد ينصحهم تااااني بإن إللي بيعملوه ده غلط،
وإداهم الحل البديل إللي يشجعهم بيه على الهجرة من المعصية والحرام إلى الطاعة والحلال ،
وعرض عليهم إنهم يتزوجوا بنات القرية بدل الرجال،
" قَالَ يَا قَوْمِ هَٰؤُلَاءِ بَنَاتِي هُنَّ أَطْهَرُ لَكُمْ"
فقالوا له: انت عارف كويس أوي إحنا عايزين إيه،
واحنا مش عايزين نساء القرية
فحاول لوط عليه السلام إنه يحرك فيهم النخوة وقالهم اتقوا الله وبلاش تفضحوني قصاد ضيوفي ...هو مفيش فيكم واحد عاقل
"فَاتَّقُوا اللَّهَ وَلَا تُخْزُونِ فِي ضَيْفِي أَلَيْسَ مِنكُمْ رَجُلٌ رَّشِيدٌ"
وطبعا لا حياة لمن تنادي😑

إلتفت لوط لضيوفه وقال لهم بحسرة وحزن لو أنا عندي القوة الكافية كنتم هتشوفوا إزاي كنت هدافع عنكم...
بس زي مانتم شايفين أنا لوحدي قصاد القرية كلها،
خلال الفترة دي كلها والرزع والهرج والمرج والصراخ والحوارات والشد والجذب ده كله، سبحان الله كان الشباب التلاتة هاديين ومش بيتكلموا
فلما خلاص وصل الموضوع لأقصى درجاته اتكلموا وقالوا:
يا لوط إنا رُسل ربك ماتخفش ماحدش هيقدر يؤذيك ولا يؤذينا

"قَالُوا يَا لُوطُ إِنَّا رُسُلُ رَبِّكَ لَنْ يَصِلُوآ إِلَيْكَ"
وهنا عرف لوط إن دول ملائكة وعرف خلاص إن عذاب الله واقع لا محالة على القوم المجرمين
ودي كانت آخر فرصة لقوم لوط.. فلما حاولوا يتعدوا في بيت لوط على الشباب إللي هما في الأصل ملائكة،
خلاص استحقوا العذاب..
فهنا جبريل عليه السلام قام وضرب على وجوههم بطرف جناحه فأصابهم بالعمى😑
"وَلَقَدْ رَاوَدُوهُ عَنْ ضَيْفِهِ فَطَمَسْنَآ أَعْيُنَهُمْ فَذُوقُوا عَذَابِي وَنُذُرِ"
وقعدوا يتخبطوا في بعض ومش شايفين حاجة ومشيوا،
مش مثلا يتعظوا بالعمى المفاجيء ده ويؤمنوا ويقفوا عند حدهم
لأ ده وهم ماشيين قعدوا يتوعدوا لوط عليه السلام بسبب إللي حصل لهم ده وإنهم مشيوا من عنده من غير ما يحققوا غرضهم الخبيث

الملائكة بقى قالت للوط خد أهلك واطلع برة القرية وابعد ومحدش يبص وراه،
احنا هنهلكهم الصبح..فقال لهم لوط مادام هتهلكوهم خلاص ما تهلكوهم دلوقتي
فقالوا له معادهم الصبح...والصبح قريب👌
"فَأَسْرِ بِأَهْلِكَ بِقِطْعٍ مِّنَ اللَيْلِ وَلاَ يَلْتَفِتْ مِنْكُمْ أَحَدٌ إِلاَّ امْرَأَتَكَ
إِنَّهُ مُصِيْبُها مَآ أَصَابَهُمْ إِنَّ مَوْعِدَهُمُ الصُّبْحُ أَلَيْسَ الصُّبْحُ بِقَرِيْبٍ"
فلما جه وقت الصبح وكان لوط عليه السلام خرج من القرية مع بناته ومحدش من أهل القرية كان آمن به حتى زوجته،
ربنا بعت عليهم حجارة من سجيل ..
سبحان الله كل واحد كان اسمه مكتوب على الحجارة دي تنزل عليه فتقتله
وقام جبريل عليه السلام برفع المدينة بالقرى التابعة ليها لحاااااد السماء الدنيا -حتى يُقال إن أهل السماء الدنيا سمعوا أصوات الحيوانات في القرية، وبعدين راح قالبها وموقعها على الأرض
"فَلَمَّا جَاءَ أَمْرُنَا جَعَلْنَا عَالِيَهَا سَافِلَهَا وَأَمْطَرْنَا عَلَيْهَا حِجَارَةً مِّن سِجِّيلٍ مَّنضُودٍ"
"وَالْمُؤْتَفِكَةَ أَهْوَىٰ*فَغَشَّاهَا مَا غَشَّىٰ"

☆وهنا في نقطة شرعية مهمة👌
وهي إن مَن يعمل عمل قوم لوط حدّه القتل👌
والصحابة اختلفوا في طريقة القتل ...قال البعض يترمى من مكان عالي،
وقال البعض...إن يُسحب عليه جدار يعني يوقعوا عليه جدار ويُقتل...لأن الفعل ده 《إتيان الرجال للرجال كشهوة من دون النساء وإتيان النساء للنساء كشهوة من دون الرجال》
أشد عند الله من الزنا👌
وطبعا ربنا حرم أي حاجة ممكن تؤدي تؤدي وتوصل للمنكر ده فقال رسول الله ﷺ :
"لعن الله المُخَنّث من الرجال والمُتَرجّلات من النساء...أخرجوهم من بيوتكم"

والمخنث من الرجال هو المتشبه بالنساء سواء في اللبس أو طريقة المشي أو حتى في طريقة الكلام...
فاللي الشباب بيعملوه دلوقتي إنهم بيعملوا برامج بيقلدوا فيها البنات ويلبسوا لبس نسائي ويتكلموا بأسلوب النساء ده حرام ،
حتى النساء لا يجوز لها إنها تتشبه بالرجال لا في اللبس ولا الكلام ولا طريقة المشي...
لأن الموضوع ده فيه لعن وهو من كبائر الذنوب، ولما الناس تهاونت فيه انتشر للأسف في بلاد المسلمين الشذوذ إللي هو فعل قوم لوط👌
إحنا شريعتنا مختلفة عن الشرائع إللي فاتت لإن مفيش رسالة تانية أو رسول تاني بعد رسول الله ﷺومافيش إهلاك للأمم بذنوبها مباشرة زي الأمم السابقة،
لأ ،بعد الرسالة المحمدية الإسلامية الخاتمة بقى فيه إمهال للأمم إلى يوم القيامة..
فربنا منع عننا كل حاجة ممكن تؤدي لأخطاء الأمم السابقة، بكل الزواجر والحدود والاحترازات الممكنة واللي بتشدد على أبواب المعاصي والآثام بإحكام،
وإحنا قلنا إن الشيطان نَفَسُه طويل😑
عادي ممكن يزرع البذرة النهاردة ويحصدها بعد 100 سنة،
هو احنا كنا نسمع زمان من تلاتين سنة مثلا إن في مسلمين شاذين والعياذ بالله 😓
لأ...بس بنسمع دلوقتي عن ده بل بنسمع عنه بأعداد كبيرة كمان للأسف،
طب ليه
بسبب التهاون في موضوع التشبه ومقدمات المحرمات وذرائعها👌
فخدوا بالكم..
مش عشانكم انتم بس ...
ده عشان عيالكم كمان وعيالهم في الأجيال القادمة😞

ودي كانت نهاية من انتكست فطرته وكفر بالله، فإن الله يمهل ولكنه لا يهمل سبحانه👌

☆آخر سؤال بقى،
مش احنا قولنا إن كل قوم بيجيلهم نبي أو رسول منهم؟ طيب ماهو لوط مكنش منهم من الأول فطبيعي إنهم ميسمعوش كلام🤔

طيب يا جماعة هو ليه ربنا أصلا بيرسل النبي من نفس قومه؟
مش عشان يكونوا عارفينه وعارفين صدقه وأخلاقه من طول السنين إللي عاشها معاهم؟
طيب لوط عليه السلام لما آمن لإبراهيم وخرجوا كلهم من العراق لأرض الشام كانوا لسه صغيرين في السن،
فلوط عليه السلام لما انتقل لسدوم وعاش فيهم وتزوج منهم كانوا ناس عاديين جدا مكنوش وقعوا في الفاحشة،
فخلال السنين دي كلها بقوا عارفين لوط عليه السلام كويس،

فهنا تحقق الهدف وهو بيان صدق ومكانة لوط عليه السلام،
بعد ما عاش معاهم سنين طويلة جدا،
واحنا قلنا إن إبراهيم عليه السلام كان شيخ كبير في السن،
فتخيلوا السنين إللي عاشها معاهم أد إيه،
فلما بقى وقعوا في الفاحشة بالتدريج زي ما قلنا وكفروا بالله ووقعوا في باقي الموبقات ربنا أرسل لهم لوط إللي بقى واحد منهم وعارفينه خلال السنين دي كلها،
عشان كده ربنا لما اتكلم عن سدوم، قال:《 قوم لوط》 وقال:
《قومه》 فده معناه إنه خلاص بقى واحد منهم وهم نفسهم معترفين بكده ومحدش أنكر على لوط إنه جاي من برة مدينتهم👌

إبراهيم عليه السلام إللي كان في فلسطين ساعتها جاءه أمر تاني من الله عز وجل،
يا ترى إيه الأمر ده وهل سيستجيب إسماعيل عليه السلام ؟

ده إللي هنعرفه الجزء الجاي إن شاء الله😊


#Eman_Shalapy

‏
🌑🌕 أذكار المساء الصحيحة🌕🌑
‏ ࿐༜.. ࿐༜.. ࿐༜


🌕 - *((أمْسَيْنَا وَأَمْسَى الْمُلْكُ للهِ، وَالْحَمْدُ للهِ، وَلاَ إِلَـهَ إِلاَّ اللهُ وَحْدَهُ لاَ شَرِيكَ لَه, لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ، رَبِّ أَسْأَلُكَ خَيرَ مَا فِي هَذِهِ اللَّيلَةِ وَخَيْرَ مَا بَعْدَهَا، وَأَعُوذُ بِكَ مِنْ شَرِّ هَذِهِ اللَّيلَةِ وَشرِّ مَا بَعْدَهَا، رَبِّ أَعُوذُ بِكَ مِنَ الْكَسَلِ وَسُوءِ الْكِبَْرِ، رَبِّ أَعُوذُ بِكَ مِنَ عَذَابٍ فِي النَّارِ وَعَذَابٍ فِي الْقَبْرِ).*

📚(مختصر مسلم: 1894)

🌕 - *((إذا أمسى فليقل: اللَّهُمَّ بِكَ أَمْسَيْنَا وَبِكَ أَصْبَحْنَا، وَبِكَ نَحْيَا وَبِكَ نَمُوتُ، وَإِلَيْكَ الْمَصِيرُ))*

📚(الصحيحة: 262) .

🌕 - *((اللَّهُمَّ أَنْتَ رَبِّي، لاَ إِلَـهَ إِلاَّ أَنْتَ، خَلَقْتَنِي وَأَنَا عَبْدُكَ، وَأَنَا عَلَى عَهْدِكَ وَوَعْدِكَ مَا اسْتَطَعْتُ، أَعُوذُ بِكَ مِنْ شَرِّ مَا صَنَعْتُ, أَبُوءُ لَكَ بِنِعْمَتِكَ عَلَيَّ، وَأَبُوءُ لَكَ بِذَنْبِي، فَاغْفِرْ لِي؛ فَإِنَّهُ لاَ يَغْفِرُ الذُّنُوبَ إلاَّ أَنْتَ)).*

📚(مختصر البخاري: 2420)

🌕 - *((يَا حَيُّ يَا قَيُّومُ بِرَحْمَتِكَ أَسْتَغِيثُ, أَصْلِحْ لِي شَأْنِي كُلَّهُ, وَلاَ تَكِلْنِي إِلَى نَفْسِي طَرْفَةَ عَيْنٍ))*

📚(صحيح الترغيب: 661)

🌕 - *((اللَّهُمّ عَالِمَ الْغَيْبِ وَالشَّهَادَةِ, فَاطِرَ السَّمَوَاتِ وَالأَرْضِ, رَبَّ كُلِّ شَيْءٍ وَمَلِيكَهُ، أشهد أن لا إله إلا أنت, أَعُوذُ بِكَ مِنْ شَرِّ نَفْسِي، وَشَرِّ الشَّيْطَانِ وَشَِرَْكِهِ, وَأَنْ أَقْتَرِفَ عَلَى نَفْسِي سُوءًا أَوْ أَجُرَّهُ إِلَى مُسْلِمٍ)).*

📚(صحيح الكلم: 21)

🌕 - *((اللَّهُمَّ إِنِّي أَسْأَلُكَ الْعَافِيَةَ فِي الدُّنْيَا وَالآخِرَةِ, اللَّهُمَّ إِنِّي أَسْأَلُكَ الْعَفْوَ وَالْعَافِيَةَ فِي دِينِي, وَدُنْيَايَ, وَأَهْلِي, وَمَالِي, اللَّهُمَّ اسْتُرْ عَوْرَاتِي وَآمِن رَّوْعَاتِي, اللَّهُمَّ احْفَظْنِي مِنْ بَيْنِ يَدَيَّ, وَمِن ْ خَلْفِي, وَعَنْ يَمِينِي, وَعَنْ شِمَالِي, وَمِنْ فَوْقِي، وَأَعُوذُ بِعَظَمَتِكَ أَنْ أُغْتَالَ مِنْ تَحْتِي)).*

📚(صحيح الكلم: 23),
(صحيح ابن ماجه: 3135)


🌕 *أمسينا على فطرة الاسلام وعلى كلمة الاخلاص وعلى دين نبينا محمد صلى الله عليه وسلم وعلى ملة ابينا ابراهيم حنيفا مسلما وما كان من المشركين*


🌕 - *((أَعُوذُ بِكَلِمَاتِ اللهِ التَّامَّاتِ مِنْ شَرِّ مَا خَلَقَ)).*
ثلاث مرات

📚(مختصر مسلم: 1453),(صحيح الترمذي: 3604/م

🌕- *((سُبْحَانَ اللهِ وبحمده عَدَدَ خَلْقِهِ, وَرِضَا نَفْسِهِ, وَزِنَةَ عَرْشِهِ, وَمِدَادَ كَلِمَاتِهِ))*

ثلاث مرات
📚(الصحيحة: 2156)

🌕 - *((بِسْمِ اللهِ الَّذِي لاَ يَضُرُّ مَعَ اسْمِهِ شَيْءٌ؛ فِي الأَرْضِ وَلاَ فِي السَّمَاءِ وَهُوَ السَّمِيعُ الْعَلِيمُ)).*
ثلاث مرات

📚(صحيح الترمذي: 3388)


🌕 - *((سُبْحَانَ اللهِ وَبِحَمْدِهِ)).*
مائة مرة

📚(مختصر مسلم: 1903)
,(صحيح أبي داود: 5091)

🌕 *(لاَ إِلَـهَ إِلاَّ اَللهُ وَحْدَهُ لاَ شَرِيكَ لَهُ, لَهُ الْمُلْكُ, وَلَهُ الْحَمْدُ, وَهُوَ عَلَى كُلِّ شَيْءٍ قَدِيرٌ).*
مائة مرة

📚(صحيح الترغيب: 658)

🌕 - (قُلْ : *" قُلْ هُوَ اللَّهُ أَحَدُ والمعوذتين* حين تصبح وحين تمسى ثَلاَثَ مَرَّاتٍ ، تَكْفِيكَ مِنْ كُلِّ شَيْءٍ)

📚(صحيح الترمذي ).
(وأبو داود )رقم/5082

#أذكار_المساء

*لؤلؤه _أم قنبلة*

تعالوا ننتقل لنقطة مهمة جدا 🌹

متى تطلبين من ابنتك ارتداء الحجاب؟

عودوا بناتكم على الحجاب ‏بناتكم الصغيرات أمانة بين أيديكم
اغرسوا حب الستر فيهم وكونوا قدوة ليهم

فالبذرة إن سُقيت أثمرت

‏للأسف بنشوف أمهات بتمنع بناتها من الحجاب بحجة إنهم صغيرين

بنشوف بنات صغيرات لبسهم شبه عاري 😔
ببقى ماشية غيرانة عليهم
وأهاليهم سايبينهم شبه عرايا بحجة إنهم لسه صغيرين

مش بقولك لبسيهم حجاب وهما لسه أطفال لكن ميبقاش مكشوف
ربي فيهم الحياء من صغرهم
علميهم إن جسدهم غالي
حافظي عليهم من ذئاب البشر
وما أكثر قصص الاغتصاب لأطفال صغيرة بنسمعها

وبمجرد البلوغ اصبحت مثلها مثلك تماما
مفيش حاجة اسمها صغيرة
علميها إن الحجاب سترة من صغرها

افكار رائعة ومتميزة تساعدنا في زرع القيم دي في بناتنا❤️

💥البدأ في الصغر 
عوديها من صغرها على الحجاب

💥اظهار الاعجاب بالحجاب وإزاي شكل البنات أحلى بالحجاب وبيخلي وشهم منور

💥عرفيها بانه فريضة عليها فهي بتلبس الحجاب لأنه أمر الله
وعلميها أن الحجاب تكريم للمرآة بستر بدنها وطهارة لها .

💥النموذج والقدوة  
اعرضوا عليها نماذج من النساء المحجبات الناجحات و لنا في زوجات الرسول أفضل المثل و في عصرنا الحديث ابحثوا عن النساء الناجحات المحجبات.

💥 عقد المقارنات بين النماذج المحجبة من النساء الصالحات و الاخرى من السافرات و بخاصة النماذج الساقطة .

💥شراء ملابس جديدة تناسب المحجبات وتنال إعجابها .

💥تأكدي من اقتناع البنت بالحجاب والرد على جميع الشبهات اللي في بالها حول حكم الحجاب.

💥إقامة إحتفال عائلى عند إرتداء ابنتك الحجاب .

💥التشجيع بالثناء بالألفاظ وأيضا التشجيع بالهدايا وإعلام البنت بأن المكافأة الحقيقية هى الجنة .

عجبتني هذه العبارات 😊

لابد أن نفتخر بكل فتاة حافظت على حجابها رغم الفتن حولها ❤️

عجيب أمرهـا .. هذه الفتاة !!!...

شمس تتوهج و حر يلفح و عرق يتصبب و عنـاء ...

و مع ذلك كله ترتدي حجابها كما أمرها الله...

و تغطي رجليها بالجوارب ...

و يديـــها بالقفازين ...

و جهها بالنقـــــاب ...

ألا تشعر بـالحر الشديــــــــــــــد و الضيق مثلنـــــــــــــا ... !!!؟

بلى إنها تشعر بما نشعر به ...

و لكنها تدرك ... أن هذا الحر و إن كـان شديداً فحرارة جهنم أشد منه .

.. ( قل نـار جهنم أشد حراً لو كانوا يفقهون )

وأختم كلامي بهذه القصة الحقيقية:

ركب رجل قطار أسوان
وكان في العقد السادس من العمر ويرتدي الملابس الريفية.
ثم جاء شاب وزوجته وكان يبدو عليهم أنهما حديثو الزواج وجلسوا بالكرسيين المواجهين له وللأسف كانت الزوجة ترتدي بنطلون برمودة قصير وبلوزة بحمالات تكشف عن ذراعيها وصدرها.
ثم فوجئ الزوج بالرجل الريفي الكبير في السن والذي تبدو عليه علامات الوقار والاحترام يرتكز بكوع ذراعه على فخذه واضعا ذقنه على قبضة يده في مواجهة الزوجة التي تجلس بالكرسي المواجه له ونظرة عينه مثبته نحوها تكاد تخترقها لقرب المسافه.
وبصوره مفاجـئة تضايقت الزوجه وثار غضب زوجها وقال للرجل احترم نفسك أنت راجل كبير عيب اللي بتعمله ده وياريت تقعد عدل وتزيح وجهك عن زوجتي
فما كان من الرجل الريفي إﻻ أن قال للزوج الغاضب أنا مش هقولك احترم نفسك إنت وعيب عليك تخلي مراتك تلبس بالشكل ده إنت حر يا رب تخليها تمشي بدون ملابس ما دمت أنت قابل لكن هقولك أنت ملبسها كده عشان نشوفها ونتفرج عليها آدينا بنتفرج عليها زعلان ليه بقى
بص يابني اللي مكشوف من جسم مرآتك من حقنا كلنا نشوفه ، واللي مستور من حقك أنت لوحدك تشوفه
وإن كنت زعلان إني مقرب رأسي شويه أعمل إيه نظري ضعيف وكنت عايز أشوف كويس
وهنا لم ينطق الزوج وألجمت كلمات الرجل فمه واحمر وجه زوجته
خاصة بعدما تعالت أصوات الركاب اعجابا بالدرس الذي أعطاه الرجل الريفي للزوج الشاب
ولم يملك الزوج إلا أن يقوم من مكانه ويأخذ زوجته ويغادرا عربة القطار..

وفي الختام ❤️
سعدت بكم وارجوا ان ينال الموضوع قبولكم❤
نلتقى في الجنة باذن الله على سرر متقابلين

ووقتها هتكونوا أجمل من الحور العين

🌴قال رسول الله صلى الله عليه وسلم : ( لو أن امرأة من نساء أهل الجنة اطلعت إلى الأرض لأضاءت ما بينهما , ولملأت ما بينهما ريحا , ولنصيفها على رأسها خير من الدنيا وما فيها ) 

تخيلي... المنديل الذي تضعه على رأسها خير من جمال الدنيا وما فيها من متاع وروعة وطبيعة خلابة وقصور شاهقة وغير ذلك من أنواع النعيم .

وتخيلي... إنك هتكوني أحلى من الجمال ده!

🌹فحال المؤمنة في الجنة أفضل من حال الحور العين وأعلى درجة وأكثر جمالا

👈لأنها بتدخلها جزاء على العمل الصالح وكرامة من الله لها لدينها وصلاحها ، أما الحور فهي من نعيم الجنة، خلقت في الجنة من أجل غيرها وجعلت جزاء للمؤمن على العمل الصالح

وشتان بين من دخلت الجنة جزاء على عملها الصالح ، وبين من خلقت ليُجَازَى بها صاحب العمل الصالح ، فالأولى ملكة سيدة آمرة ،

والثانية على عظم قدرها وجمالها لكن أكيد دون الملكة وهي مأمورة من سيدها المؤمن الذي خلقها الله تعالى جزاء له .

سبحانك اللهم وبحمدك أشهد أن لا إله إلا أنت أستغفرك وأتوب إليك

#لؤلؤه _أم قنبلة
# هبه حلمي 💞

كلما مَرّ من عُمُرك عام، تحتفلُ أنك تقتربُ من مَصرَعِك؟!

- ش. أبو إسحاق الحويني.

صباح الحامدين 🤍🤍

(لنختم القرآن سماعا)

الورد ( ١٠٠ )

(الربع الرابع & الحزب الخامس العشرين)

#القارئ: عبدالرحمن الشحات
#ليدبروا على التليجرام
#صباحكم_قرآنٌ_يُتلى

#قصص_الأنبياء
#الحلقة_السادسة_عشرة
#قصة_إبراهيم(٦)
#قصة_الكعبة_على_مر_الزمن

بعد ما جاءت البشرى لإبراهيم عليه السلام بولادة ابنه إسحاق، عدت فترة من الزمن وبعدين ربنا أمر إبراهيم عليه السلام بأمر جديد،
ذهب إبراهيم عليه السلام عشان يزور إسماعيل عليه السلام فلما راح له مكة لقاه كان قاعد عند شجرة في محيط البيت الحرام، وكان قاعد بيبري نَبْل...
عارفينه🤔
زي خشبة كده عمال بيبريها بسكين زي ما بنبري القلم الرصاص كده.
فلما شافه إسماعيل عليه السلام قام له..
وإنتم عارفين لما الأب ولاّ الإبن بيشوفوا بعض بعد زمن! وخصوصا لو كانت علاقتهم زي علاقة إبراهيم وإسماعيل عليهما السلام

بعد ما سلموا على بعض، إبراهيم عليه السلام قال لإسماعيل إن ربنا أمره بأمر معين، فإسماعيل عليه السلام قال له: طبعا نفذ إللي ربنا يؤمرك بيه يا أبي،
يعني كأنه بيقول له لو في ذبح تاني أنا معنديش مانع خالص عليه السلام

فإبراهيم عليه السلام قاله طيب هتساعدني؟
قاله طبعا أساعدك💪🏻
فقاله ربنا أمرني إني أبني في المكان ده بيت 👈 وشاور على منطقة مرتفعة عن الأرض مغطياها الرمال،
وكان ربنا هو إللي عرف إبراهيم المكان إللي هيبني فيه بالضبط، يُقال عن طريق ريح ربنا أرسلها فكنست المكان المقصود من الرمل ،ويُقال عن طريق سحابة وقفت في مكان البيت وظللت مساحة معينة كانت هي دي المساحة بتاعة الكعبة،
"وَإِذْ ((بَوَّأْنَا)) لِإِبْرَاهِيمَ ((مَكَانَ)) الْبَيْتِ أَنْ لَا تُشْرِكْ بِي شَيْئًا وَطَهِّرْ بَيْتِيَ لِلطَّائِفِينَ وَالْقَائِمِينَ وَالرُّكَّعِ السُّجُودِ"
وفوق الكعبة بالظبط البيت المعمور، وهو كعبة أهل السماء وموجود في السماء السابعة ، يدخله كل يوم سبعون ألف ملك يطوفون حوله لا يرجعون للطواف مرة تانية إلى يوم القيامة👌
بدأ إبراهيم عليه السلام يبني البيت،
فكان إسماعيل عليه السلام يأتي بالحجارة وإبراهيم عليه السلام هو إللي يبني،
فقال إبراهيم عليه السلام لإسماعيل هات لي حجر أحطه في زاوية بحيث يكون علامة للناس يبدأوا من عنده الطواف،
فجاء إليه جبريل عليه السلام بالحجر الأسود، وهو حجر من الجنة، وكان أول ما نزل الأرض..
و كان أشد بياضا من الثلج، ثم سوّدته خطايا بني آدم

☆يعني سودته خطايا بني آدم وطاعات الموحدين لم تبيضه؟
أيوة، لأن العادة إن الأسود هو إللي بيصبغ الأبيض وليس العكس، ولإن الذنوب عددها كبير جدا للأسف أكبر بكتير من الطاعات،
"وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ" "ويعرفون نعمة الله ثم ينكرونها وأكثرهم الكافرون"
"ولكن أكثرهم للحق كارهون"
"وأكثرهم فاسقون"👌
وكمان فيه عبرة ...يعني الخطايا أثرت في الحجر الجامد الصلب فما بالنا بتأثير الذنوب في القلوب😞

استمر بناء الكعبة لحد ما ارتفع البنيان وبعدين إسماعيل جاب حجر عشان يقف عليه إبراهيم عليه السلام عشان يكمل البناء،
وهم بيبنوا كانوا بيدعوا ربنا بالقبول :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ "
☆وده يعلمنا إننا لما نعمل أي طاعة لله ندعي ربنا وإحنا بنعملها إنه يتقبلها مننا

وكانت الكعبة هي أول بيت لله في الأرض وبعد بنائها بأربعين سنة تم بناء المسجد الأقصى على يد يعقوب عليه السلام،
"إِنَّ أَوَّلَ بَيْتٍ وُضِعَ لِلنَّاسِ لَلَّذِي بِبَكَّةَ مُبَارَكًا وَهُدًى لِلْعَالَمِينَ "

في خلاف بين العلماء على مين إللي بنى البيت الحرام 🤔
في علماء قالوا إنهم الملائكة ...
وفي فريق قال إن إللي بناها إبراهيم وإسماعيل ومعاهم أدلتهم،
وفريق ثالث قال لأ ...ده القواعد -الأساس يعني- بتاع البيت الحرام موجود من أيام آدم عليه السلام، وإبراهيم وإسماعيل حفروا لحد ما وصلوا للقواعد وبنوا عليها وبردو معاهم أدلتهم،
أنا شخصيا مقتنعة بالرأي التالت الأخير ده، لإن إبراهيم عليه السلام قال:
"رَّبَّنَا إِنِّي أَسْكَنتُ مِن ذُرِّيَّتِي بِوَادٍ غَيْرِ ذِي زَرْعٍ عِندَ بَيْتِكَ الْمُحَرَّمِ"
والبيت مكنش لسه اتبنى🤷‍♂️
وكمان ربنا قال :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ"
يعني القواعد كانت موجودة من الأول وإبراهيم وإسماعيل عليهما السلام كملوا البناء عليها،

¤في هنا سؤال منطقي

...مش الإسلام جه لهدم عبادة الأصنام إللي هي من الأحجار،
طيب ماحنا لما بنسجد بيكون اتجاهنا لحجر أهه 😐
الأصل إننا بنطيع أمر ربنا...يعني احنا بنتجه في الصلاة للقبلة ناحية الكعبة إللي هي مصنوعة من حجر لأن ربنا هو إللي أمرنا بكده مش عشان ذات الكعبة، بدليل إننا لو ربنا أمرنا نتجه لمكان تاني كنا هنسمع ونطيع،

فالعبرة باتباع أوامر ربنا مش في ذات الكعبة، يعني بنعبد ربنا مش الكعبة،
فاحنا لما بنصلي بيكون اتجاه قلوبنا لله واتجاه أجسادنا للقبلة دإللي ربنا وجهنا ليها إللي هي الكعبة👌
"إِنِّي وَجَّهْتُ وَجْهِيَ لِلَّذِي فَطَرَ السَّمَاوَاتِ وَالْأَرْضَ حَنِيفًا"

ولما كان عمر بن الخطاب رضي الله عنه بيطوف بالكعبة ويقبّل الحجر الأسود كان يقول:
والله إني لأعلم أنك حجر لا تضر ولا تنفع، ولولا إني رأيت رسول الله صلى الله عليه وسلم يقبِّلك ما قبّلتُك،
فإحنا بنعمل كده لأننا مأمورين👌

وفي نقطة كمان مهمة...في ناس بتبقى نفسها تروح تعمل عمرة مثلا وتقول عشان أتوب وأقرب من ربنا وكده وحزينة إنها مرحتش،
ويكون ربنا بحكمته وعلمه للغيب مانعهم رحمة بيهم لأن ممكن مثلا ذهابهم هناك يوقعهم في مخالفات توجب عليهم غضب ربنا وسخطه أو تكون مخالفة للأوْلى،
زي السفر بدون محرم لو هي امرأة مثلا...أو محرمها مش راضي لسبب أو لآخر فتعمل مشكلة عشان تروح....أو يحمل نفسه بالديون من الناس عشان يروح..
طيب ماهو ربنا إللي عند الكعبة هو ربنا إللي بتصليله الخمس صلوات ومعاكِ بعلمه وسمعه وبصره
إللي عايز يتوب ويقرب من ربنا يعمل كده في أي وقت،
فهل احنا بنبقى عايزين نروح لله فعلا ولا عشان نفسنا؟
لو لله يبقى هنطيع ربنا كما يريد مش على مزاجنا،
أيوة المكان له قدسيته وله روحانياته لكن ربنا مقلناش أبدا إني عشان أروح يبقى أعمل مخالفات وإلا فأنا كده بتعب نفسي في السكة الغلط وأنا مش واخدة بالي👌

بعد ما تم بناء الكعبة ربنا أمر إبراهيم عليه السلام إنه يؤذن في الناس بالحج...
ويُروَى إن جبريل هو إللي علم إبراهيم عليه السلام صفة الحج إللي احنا عارفينها.
فإبراهيم عليه السلام اتعجب وسأل:
يارب طب هو أنا صوتي هيوصل للناس كلها إزاي😳
فربنا قال له عليك الأذان وعلينا البلاغ،

وفعلا أذّن إبراهيم عليه السلام بالحج فوصل صوته لكل أرجاء الأرض ووصل صوته لما في الأرحام وما في الأصلاب،
وكل إنسان هيحج البيت إلى يوم القيامة بقدرة الله عز وجل فسبحان الله العظيم القدير

وبعد زمن إبراهيم عليه السلام ،
كانت الكعبة بتتعرض للسيول فيقع منها جزء أو يأثر فيها عوامل الجو فكان إللي بيصحلوا فيها وواخدين بالهم منها ،قبيلتين اسمهم جُرهم والعماليق
اتعرضت الكعبة لأكتر من محاولة للهدم، وكان أول واحد حاول يهدمها رجل اسمه "تُبَّع أسعد" ملك اليمن.. وكان مشرك لكنه آمن بالله و اتبع اليهودية ،
وكان في قبيلة عايزة تنتقم منه فأغرته يهدم البيت الحرام عشان ياخد منه الكنوز المدفونة فيه، فكان معاه اتنين من علماء اليهود فسألهم.. فقالوا له:
ربنا هيهلكك لو قربت منه ،
إحنا منعرفش بيت لله على الأرض إلا البيت ده، فإنت تطوف 👌حواليه وتعظمه وبس.. إياك تمسه بسوء
فقال لهم وانتم ليه ماتعملوش كده وتطوفوا حواليه انتوا كمان حواليه
قالوا نفسنا نعمل،لكن أهل البيت ده ملوه بالأصنام وده شرك واحنا علماء مينفعش نطوف والأصنام موجودة😤.

وفعلا عمل بكلامهم وعظم الكعبة وانصرف عن فكرة هدمها.. وكان هو أول واحد كسى الكعبة🕋.

وبعدها بسنين اتعرضت الكعبة لمحاولة هدم تانية وكانت على يد أبرهة الحبشي وكان جايب معاه فيل عشان يهدم الكعبة زي ما كلنا عارفين في القصة بتاعة الفيل وهدم الكعبة،
وإن الفيل رفض يتحرك وربنا أرسل عليهم طيرا أبابيل -يعني طيور جماعات جماعات- فقذفتهم بحجارة من سجيل -يعني طين متحجر وصلب جدا-،
فبقت الحجارة من دول تصيب المجرم منهم يقوم يتحول لعصف مأكول -يعني شبه ورق النبات اللي عضعضت الدواب منه حتت وسابته والعياذ بالله-
وكانت الحادثة دي قبل مولد رسول الله الله صلى الله عليه وسلم بخمسين يوم على أرجح الأقوال 👌

☆يعني كفار قريش إللي حاربوا رسول الله صلى الله عليه وسلم بعدين ولم يؤمنوا برسالته كانوا شافوا المعجزة الإلهية دي قصاد عينهم عين اليقين.. ولكنها لا تعمى الأبصار ولكن تعمى القلوب التي في الصدور😓

بعد الحادثة دي بكم سنة اتعرضت الكعبة لسيل شديد خربها ،وبقت محتاجة إعمار وترميم
فقال أهل مكة: إحنا محتاجين نرمم الكعبة ومحتاجبن فلوس للأمر ده،
فقالوا نصلحها بالمال الحلال ، يعني ماندخلش فيها مال ربا، وماندخلش فيها مهر بغاء ،يعني فلوس من ارتكاب الفواحش،
☆يعني كانوا عارفين يفرقوا أهو بين الحلال الطيب والخبيث المحرم😶

فجمعوا الفلوس الحلال لقوها قليلة...ودي طبعا كانت مشكلة،
وواجهتم مشكلة تانية هل يهدموا الكعبة ولا يسيبوها لكن يرمموها؟،
فالوليد بن المغيرة قال نهدمها ونبنيها تاني ...
لو بيت واحد فينا جراله حاجة هيهدمه ويبنيه تاني... فما بالكم ببيت الله!

سبحان الله العظيم!
تخيلوا إن الوليد ده هو صاحب القصة المشهورة في تكذيبه لرسول الله ﷺ والقصة موجودة في سورة المدثر إللي ربنا قال عنه فقُتل كيف قدر؟!

شوفتم كان حريص جدا ازاي قبل بعثة النبي ﷺ على الكعبة بيت الله ويعلم يقينًا إن الله هو رب العالمين ومعبودهم الحق جميعا.. لكنه العمى والعناد والكفر 😑
هم كلهم كانوا مؤمنين بوجود ربنا على فكرة ، بس كانوا مؤمنين بتوحيد الربوبية فقط.. إللي هو إن ربنا هو خالق السماوات والأرض والكون و و....و....
لكن مكنوش مؤمنين بتوحيد الألوهية إللي هو إن ربنا الخالق ده هو الله ، الوحيد المستحق للعبادة وإن الحكم له فقط 👌

المهم لما قال نهدمها ونبنيها من الأول أهل مكة خافوا لأنهم شافوا إللي حصل لجيش أبرهة لما حاول يهدمها
فقالوا للوليد بن المغيرة إنت صاحب الفكرة ابدأ ونشوف لو جرالك حاجة هنرممها بس... لكن لو محصلش حاجة هنكمل معاك
وفعلا بدأ الوليد يهدم في الكعبة وهو بيقول يارب احنا بنهدمها عشان نبنيها تاني بس، وتمت الفكرة بنجاح وبدأوا يبنوها،
وهما بيبنوها الفلوس قصّرت معاهم فبدل ما يعملوها ليها بابين باب للدخول وباب للخروج عملوا لها باب واحد،
وسابوا جزء منها مش مبني ومش مكتمل مع بقية بناء الكعبة نتيجة لتعجبز الفلوس معاهم طبعا بسبب قلة المال الحلال زي ما قلنا،
بس حطوا عند الجزء الغير مكتمل ده علامة عشان الناس تطوف من خارجها فتبقى لفة الطواف حوالين الكعبة كاملة مش ناقصة، فمحدش يلف في الجزء اللي مش مكتمل البناء يعني ويبقى طوافه ناقص..
العلامة دي هي حِجر إسماعيل الحتة إللي عند الكعبة إللي عاملة زي القوس دي🕋 )
فالمفروض إن الجزء ده كان يدخل في الكعبة لكن عشان الفلوس ما كفتش فسابوها على كده،
وباب الكعبة كان واصل للأرض قبل كده،
لكن هما رفعوه عن الأرض وهما بيبنوها من تاني عشان يدخلوا الكعبة الناس إللي هم عايزينهم بس😑

وبعد فتح مكة رسول الله صلى الله عليه وسلم قال لعائشة رضي الله عنها لولا إن أهل مكة لسه مسلمين جديد وممكن يتخضوا ويحصل قلق كنت هدمت الكعبة وبنيتها على قواعد إبراهيم ، يعني زي ما إبراهيم عليه السلام بناها، بناء مكتمل الجدران والعمارة،

عدت سنين واعتدى أهل الشام على الحرم وحرقوا الكعبة.
فعبد الله بن الزبير رضي الله عنه -وكان خليفة ساعتها- استشار الناس واستخار ثلاثة أيام إنه يهدم الكعبة ويبنيها زي ما كان رسول الله ﷺ عايز،
وفعلا هدمها وبناها على قواعد إبراهيم..

بعد ما تولى عبد الملك بن مروان رضي الله عنه الخلافة وشاف الكعبة متغيرة ومكنش يعرف الحديث بتاع رسول الله ﷺ أمر الحجاج بن يوسف الثقفي إنه يهدمها ويرجعها زي ما كانت،
وبعد ماهدمها وبناها تاني واحد من الصحابة قال لعبد الملك بن مروان الحديث بتاع رسول الله ﷺ فقال عبد الملك ياريتنا كنا سيبناها زي ماهي..
لكنه مع ذلك ما رجعهاش تاني زي ما كانت في عهد الزبير..

في زمن المهدي بن المنصور استشار ابن المنصور الإمام مالك ابن أنس إنه يهدم الكعبة ويعيد بنائها مرة تانية زي ماكان بناها عبد الله بن الزبير فقال الإمام مالك :أخاف إن الخلفاء ياخدوها لعبة 😑
كل شوية حد ييجي يهد عمارة الكعبة اللي قبل منه ويختلف الناس لفريقين واحد ياخد برأي ابن الزبير والتاني ياخد برأي بن مروان وكل واحد يهدم ويبني!
فاقتنع ابن المنصور بكلام الإمام مالك وفضلت الكعبة زي ماهي إلى يومنا هذا..

من الأحداث إللي مرت على الكعبة هي هجوم القرامطة على الكعبة وقتلهم للحجيج وسرقتهم للحجر الأسود .
وفضل عندهم ٢٢ سنة ،لحد ما المسلمين استعادوه بعد كده.

وبأمر الله هتفضل الكعبة موجوة لحد آخر الزمان بعد موت عيسى عليه السلام لحد ما ييجي واحد من الحبشة يُقال له "ذو السويقتين" ويهدمها حجر حجر في زمن لا يقال في الأرض كلمة ((الله)) زمن شرور وفساد عظيم.. نسأل الله ألا نكون فيه،
وبعدين تقوم الساعة بعدها بفترة قليلة على شرار الخلق ونسأل الله تعالي ألا نكون معهم😞


دي كانت أهم الأحداث إللي مرت على الكعبة المشرفة،حاولت اختصر فيها على قد ما قدرت🤍


وإن شاء الله الجزء الجاي نكمل قصة سيدنا إبراهيم 🌹


#Eman_Shalapy

فما ظنكم برب العالمين؟