ويلاه يبن الحسن
8 محرم 1443 هـ

طفت شمعة شبابك يبني بالدمعه
وعليك امك يعريس الحرب تنعه
ويلاه يابن الحسن
جم آه يابن الحسن
****************

اوج شمعة زفافك واعجن الحنه
يعريس ورماح الحومه زفنه
انوح اعليك والونه تجر ونه
اشوف بصدرك النبلات متجمعه

****************
يهنيالي والف مبروك ناديتك
ومن دم منحرك يوليدي حنيتك
تشب يبني وازفك بيدي تانيتك
وتاليها المدامع طفن الشمعه
****************

خذت لامة ابوك وناصرت عمك
يجيدوم الحرايب يا فخر امك
شحلات جفوفك محنيهن بدمك
شفت عمك وحيد ورحت اله تسعى

****************
انتهت زفة شبابك يبني بالمصرع
بجفن ماشايفه عريس يتبرگع
انشدك ليش يبني جسمك مگطع
على مصابك شفت عمك حنه ضلعه

****************
يرفعت راسي يالمهيوب يوليدي
صحت لبيك ياعمي الحرب عيدي
ييمه وياس صينيتك ذبل بيدي
رحت واني بدموعي انتظر رجعه

****************
يريت ولا شفت شاب وگرب عرسه
اگول ابني بزفافه وانطفت شمسه
شذكر من جمالك ياگمر شنسه
عفتني بغيبتك يوليدي منفجعه

****************
يسباح الگلب ياسلوة ايامي
تموت بلايه رحمه ولگلب ضامي
شباب ومنذبح جسامي جدامي
يويلي وابني اني بهالمسه مضيعه

****************
جرحك بالقلب ما زال ينزاف
اشما ينشف يرد بالحزن ينزاف
كون الكلة العريس ينزاف
ومثلك موت تربان المنيه
****************
ظامي ودم وريدك صار ورداك
وعلى تراب المنيه الموت ورداك
ذبل وانت بربيع العمر ورداك
وصارت حنتك بدماك هيه

****************
من المثلك حمل غيره وصانه
ولجل عمه رفع سيفه وصانه
الحسن بحسين يوم الطف وصه اله
وحفظها القاسم بدمه الوصية


الشاعر سيد آدم الحسني


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

في أوسع سفينة

في اوسع سفينة .. عشاگ اجينه
والباري يرعانه
يا موج اليصدنه .. والغيرة عدنه
ونشوفك ويانه
احنه بكل فخر يا ناس ‏
نرفع راية العباس
****************
توكلنا على الله من نوينه انشد عزمنه
قسم بالانزع الما يدبر بحربه قسمنه
اخذنه من شيم انصار ابو اليمنه شيمنه
ندافع عن مبدأنه وشرفنه وعن قيمنه
وعلى حب الحسين اتوحدت كلمة زلمنه
رغم انف الزمن ما يوگع وعالي علمنه
والهذا اعتقاده .. صاحب ارادة
تتحقق احلامه
والعاهد اميره .. يعرف مصيره
ما زلت اجدامه
صاح بساحة النوماس ‏
نرفع راية العباس
****************
تره الذله تعب ما بيها موجوده بسهوله
لجن من الرجل تسرق اثر معنى الرجوله
زرعنه وكل زرع من يرتفع فخر الاصوله
طموحك لو تريد الغايتك تضمن وصوله
على حب النبي وآل النبي مجدك تنوله
بعد واسمع كلام الطايع آل الله ورسوله
والخان الامانة .. احذر لسانه
لا يغرك اعلامه
والرايد يذلك .. رايح اگلك
معدوده ايامه
لا شكاً ولا وسواس
نرفع راية العباس
****************
سفيتنه العظيمة الرفعت اشراع السلامة
عليها انكتبت اسماء النجاة اكبر علامة
اذا رايد شفاعة فاطمة بيوم القيامة
بعد عهد النبوة تمسك بحبل الامامة
وحق من سلبوا اثيابه وبعد حرگوا خيامه
نظل نبچي على مصاب الارامل واليتامه
ياهو اللي كفلها .. من بعد اهلها
مسيبه عافوها
مأسواي وضعها .. ويهل دمعها
للكوفه ودوها
تنازع بآخر الانفاس
نرفع راية العباس
****************
يناعي بالله سولف عن مصيبتنه العظيمة
بدايتها المهر من عود بصوت الظليمه
اجه وجايب خبر للعيله عن ابشع جريمة
يگول ابدم جبهته اتخضبت الشيبة الكريمة
يحوم اعلى الخيم خوف ورعب ما خله خيمة
مثل سرب الحمام وچم يتيم وچم يتيمه
وشحال العقيلة .. وهي الكفيلة
وابن امها وصاها
وانحرگت خيمها .. بذبحة زلمها
ولا والي وياها
راح الأسمه رفعة راس
نرفع راية العباس
****************
اذا يسألنه منصف عن مواقفنه الأبية
نگله احنه امتداد لكل رجال الغاضرية
قضيتنه على خط الحسين افضل قضية
طفينه ابدمنه نار الوجرتها الطائفية ‏
بعقيدتنا وتمسكنا بوصايا المرجعية
جمال الحب عراقي تخلد بأنبل هوية
والضحى بحياته.. ضامن نجاته
شاهد يظل دوره ‏
والظل عالشريعة .. چفوفه گطيعه
ما ينطفي نوره ‏
لليوم الگمر نبراس
نرفع راية العباس
****************
توم انولدت ويانه النجابة من انولدنه
مثل موت الذخر لمن نموت احنه ابتعدنه
تعاهدنه نضحي وساعة ما نخلف عهدنه
عقيدة عابس ابحب الحسين احنه اعتقدنه
على اعدانه نصرنه الخالق كتابه وعدنه
يظل سور العقيدة وحارس المذهب حشدنه
وابهمة رجاله .. نخسر محاله ‏
ويه اليلاوينه
ما دام انتصرنه .. لا ما يضرنه
كلمن يعادينه
نبقى نقاوم الارجاس
نرفع راية العباس
****************

الشاعر سيد سعيد الصافي الرميثي


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

آنه حميده

أنه حميده من الزغر
دون البنات أمشي بكسر
بدمعي نمت .. بس أحلمت
واحد شمرني من القصر
****************
من المدينه لكربله ‏
بظعن الحسين مدللـه ‏
بس روحي مامرتاحه ‏
مشغول بالي
ترف عيني كل نگلت جدم
ما انام أخاف من الحلم ‏
گلبي أنگطع سباحه ‏
رايحله غالي
لاچمني ابوي المارجع
لو غمضت هم خفت اگع
وگعت گلب بصياحه ‏
من قصر عالي
وظليت وعيوني ترف
بس بلا ابوي ابلا عرف
ياهو اله .. يگله هلا
بس لا وگع بيد الغدر
واحد شمرني من القصر
****************
بغيابه يوجعني الگلب
وي الابو شمحله الدرب
اتمنه أعرف أخباره
مشتاگه لايده
ياهو يتلگاني منو
بس انه ماعندي ابو
وحسين صاح أنصاره ‏
گودوا حميده
من أنشال كل ساع بحضن
حسيته أبويه المندفن
احساسي وصل لدياره
وانه بعيده
لحضانه يوميه أحن
المغرب المغرب أون
گلبي نجوه .. خنگة الهوه
شما روحي تلزم بالصبر
واحد شمرني من القصر
****************
حسين رايدني ابتسم
مايدري خانگني الحلم
جرت حبل بأنفاسي ‏
مايدري بيه
من خوفي خلصت الدرب
تعبانه من ركض الكلب
ياذيني حتى أحساسي
من فرك اديه
بحضن الحسين وئيست
وعرفت روحي اتيتمت
من گام يمسح راسي ‏
بجلمة خطيه
بجف الابو يحله اللعب
بلكي الحلم يطلع جذب
لو غمضت .. يارب گلت
مسلم على عيوني يمر
واحد شمرني من القصر
****************
لمن وصلن لكربله
كل خيمه لمت عائله
بس انه حرت بروحي
ماعندي خيمه
بخيمة حسين گعدت
‏ ماگدر ابجي اتقيدت
وبالگوه انوم اجروحي
مثل اليتيمه
أبجي صرت مثل الشمع
بحجابي ضميت الدمع
بس گام يطلع نوحي ‏
بكثر الهظيمه
التمو عليه مثل الحجي
يسكتوني بس زاد البجي
من ودعج .. وشيوجعج
سالوني ماعندي عذر
واحد شمرني من القصر
****************
مرسال بيد حسين أجه
مدري شقره وصاح وبجه
گعدوا حميده گبالي
من جيته ضمني
گلبي لجمني بشوفته
من شفته يمسح دمعته
حسيته فاگد غالي ‏
و براسي حبني
يگلي مسلم عالوعد
بس گال ينبتي بعد
البگه براس العالي ‏
بدمعه شبگني
ساعتها من كف الحجي
عبد الله فز من البجي
من شوغتي .. يا خيبتي
ثاريه طايح وأنتظر ‏
واحد شمرني من القصر
****************
الطيف ماعبرها الي
خلاني أصيحن ياعلي
كل ما اغمض اجفوني
‏ ينشاف بيه
اذكر شبگته وريحته
واگضيها شم بغترته
وعمتي تشم بمتوني
وتعطف عليه
من عگب أيده لنومتي
اوساده صارت دمعتي
باللطم حمره عيوني ‏
وتاذيني اديه
‏ ياهو اليطيب أجروحي
بكل ذكره تطلع روحي ‏
وي الابو .. كلشي حلو
طاح وطحت چني بگبر
واحد شمرني من القصر


الشاعر حسام الحمزاوي


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

ليله الحسن بالطيف إجاني
اقره ابكتاب الطف لگاني

گلي افتح آخر صفحة واقراها
عن الأسيرة والجره وياها

__________________

گمت اقره وعيون الحسن تدمع
انفاسه تصعد للسمه وترجع
والحسره من گلبه ابتدت تطلع
گلت المصيبة اشلون من يسمع
اخته الگبل بچفوفه تتگبع
بسياط مو بدموع تتودع

خاف اسكت ويزعل عليه
خاف اقره واخبار السبيه

ينكسر گلبه من سباياها
عن الأسيرة والجره وياها
__________________

من يامصيبه ابديلك احزانك
من گطعوا ابـعباس ذرعانك
لو ابدي من ترويع نسوانك
من عـطشـو عـالماي رضعانك
لو من مناحر روس خوانك
لو من شمرهم ذبح قرآنك

گلي ابتديلي ابليله وحشه
واشلون زينب مشت ممشه

وشلون هيچ الزمن خلاها
عن الأسيرة والجره وياها
__________________

زينب وحيده ابليل وحشتها
وابغير روس اعله الثره اخوتها
واختنگت ابدخان خيمتها
وچفوف إديها النار حرگتها
واطفال تبچي اتريد عمتها
ماصارت ودارت مصيبتها

يالحسن شأقره عن يا مصيبه
عن زينب الظلت غريبه

مسبية لأرض الشام ممشاها
عن الأسيرة والجره وياها
__________________

بس گتله زينب صاح يازينب
گام الأسمها ورد گعد ينحب
خاف أحچي كل الحچي وتتعذب
تچويك نار اخيامها التلهب
إختك المنها الناس تتهيب
تنضرب گامت سيدي وتنسب

من جان اخوها الگمر عدها
لو حچت من يگدر ايردها

شحچي وشأگلك عن رزاياها
عن الأسيرة والجره وياها
__________________

گتله الكتاب ايگول يالتقره
ماكو فرق زينب امن الزهره
رغم الذبح والموت بالعتره
رفعت الدين وعظمت قدره
لامن حجاب الطاح عالغبره
لاجيب شگـت بت علي الحره

خافت على النسوه ابسبيهن
شدت عبايتها ابعبيهن

مـاخـالفـن كلهن وصاياها
عن الأسيرة والجره وياها
__________________


مايحكم المجنون بالعاقل
گالتله يبن زياد يا قـاتل
حكمك وحكم العينك زائل
لاتظن تحچي وياي ياجاهل
لو هسه يمي حاضر الكافل
چا خله راسك للأرض نازل

گالتله لو حاضر كفيلي
لا انته وجيوشك تجيلي

لا ماتذل فد يوم حاشاها
عن الأسيرة والجره وياها
__________________


كثرة المشاهد والأهم واخطر
ردة يـزيد الشانـئ الأبتـر
من ضرب سوطه كعبة المنحر
شاطت غضب عالصار بت حيدر
صوت الأمين امن العرش كبر
سوف نجازي لبـوة الكوثر

لا مانزل يمهم دمعها
لا ريحهم طفت شمعها

ظلت عظيمة ابكل سجايها
عن الأسيرة والجره وياها
__________________

فزيت لـن دمعي علـى خدي
ضيف الحسن چان ابحلم عندي
وانطيت وعدي لـو اظل وحدي
للموت هذا للحسن عهدي
خادم الزينب بت علـي وجنـدي
حتى ظهور القائم المهدي

وإعرفت حلمي عن معاني
راد الحسن هذا التفاني

إخته الأبد مايوم ينساها
عن الأسيرة والجره وياها
__________________


كلمات الشاعر ناظم الحاشي


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

زينب وجت الشمعه
يم گبر الحسن تنعه
ویلاه ویلاه
لمن تذرف الدمعه
صوت بکربلا تسمعه
ویلاه ویلاه
*******************
للبقیع اتعنت الحره الوفیه
راحت بثوب السبي لبن الرچیه
وجت الشمعه وتون ونه شجیه
وین زوارك يخويه بهالمسية
يمك ماشفت موكب
خويه ولادمع يسچب
ویلاه ویلاه
گبرك يختلف وضعه
صوت بكربلا تسمعه
ویلاه ویلاه
*******************
مارحت يم كربلا گبرك گصدته
انه ادري بالاخو يتنطراخته
تيهت لكن دمع امك تبعته
لاتگلي شلون دمه امك عرفته
دمه المنذبح ابنه
لازم ينجرح جفنه
ويلاه ويلاه
يحمل جمة الصفعه
صوت بكربلا تسمعه
ویلاه ویلاه
*******************
اني جيت الگبرك بروحي الکئیبه
یاغریب الدار اجت یمك غريبة
گبرك المهدوم ضاعفلي المصيبة
ماشفت موكب لطم يمك عجيبة
خويه شيعتك تحضر
صاحت عند ابوالاكبر
ويلاه ويلاه
رادت نعشك ترفعه
صوت بكربلا تسمعه
ویلاه ویلاه
*******************
سامح اختك لو مدامعها قليله
تدري بيها بالبواچي موبخيله
دمعي من فراگ خوتك شح مسيله
والبقه منه خلص يم العليله
ورموش الجفن طاحت
نبضات الگلب صاحت
ویلاه ویلاه
اسمع ونة البضعة
صوت بكربلا تسمعه
ویلاه ویلاه
*******************
من شفت دم چبدتك چبدي فطرته
بس مصاب الطف يخويه ماحسبته
شفت خوك حسين من گطعو رگبته
اخرانفاسه ولفظ اسمك سمعته
طبع الينسفك دمه
لازم يذكرابن امه
ويلاه ويلاه
عاري ومحديشيعه
صوت بكربلا تسمعه
ویلاه ویلاه
*******************
الله لايرحم جميع الناصبيه
گبرك تساوه يخي ويه الوطية
منين اجيبلك مواكب حيدرية
والبقيع يصيرمثل الغاضرية
صارالجعفري يحلم
يمك ينصب المأتم
ويلاه ويلاه
ظلت بالگلب صدعه
صوت بكربلا تسمعه
ویلاه ویلاه
*******************
راح اردللشام والعله شدیده
ظلت ارقیه یبومحمدوحیده
ننتظرمهدینا والطلعه اکیده
ادري ماتصفه ابدالا عله ايده
يمته رايته ترفرف
يوصل یمك ويهتف
ويلاه ويلاه
حانت ساعت الطلعة
صوت بكربلا تسمعه
ویلاه ویلاه


الشاعر سيدعبدالخالق المحنه


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

قصيدة: على هالدنيه منو قادر

استشهاد ام البنين
على هالدنيا .. منو گادر
منو ضامنها .. شنو باجر
ما تنفع الأحلام
لو جفت الأقلام
منو كادر
*****
منو الضامن هوّه الله وباجر يشمه
منو الگادر يأخر عمره ويقدمه
اخدموني تر آنه استاهل الخدمة
اجازيهن عليه الدمعة واللطمة
تره اليعرف الواحد ما قبل قسمه
يسمني الوفيه الصافيه النعمه
شكو بالدنيه .. الي خادم
على آخرته .. يجي سالم
ما تنذل الخدام
لو جفت الأقلام
منو كادر
*****
تره ابن آدم رواية الدنيا مسرحها
واليكابر حفظها وگدر يشرحها
الف مره تجرحه المره يجرحها
ابد ما سامح حتى اليسماحها
يدگ باب السمه الرايد يصالحها
منو يگول اليغمض عينه يفتحها
والرد نادم .. ولا خايب
على باب الله .. يجي تايب
والرحمة والإكرام
لو جفت الأقلام
منو كادر
*****
الى ما لا نهاية الدنيه خلصانه
شما يمشي العمر تتكاثر احزانه
الشجر لو طال عمره يذبلن اغصانه
هنياله اليجازي الشينه بأحسانه
يهل ما تندل الله هوايه بيبانه
يمن ما تدري بيه أم البنين آنه
آنه مثل ابني .. أبو فاضل
من تجي شده .. أنا كافل
والشاهد الأيام
لو جفت الأقلام
منو كادر
*****

على الدنيا اعتماده إلما دره بروحه
إذا ضحكتله باجر تضحك أبنوحه
على الله اليعتمد ما تصعب اجروحه
يحلها وما تضل احموله مطروحه
طبع دنيه وتروح وترد مرجوحه
بس بيبان ربك تبقى مفتوحه
على باب الله .. شكو ساعي
كلبي ونبضه .. إله داعي
مرتاحة عينه تنام
لوجفت الاقلام
منو كادر
*****

العرف قدري وبجالي دمعه لو وحده
أجيه وامسح بديه ادموعه لبخذه
وانه افتحله الدرب لو دنيته انسدة
إليّ اليقره الحمد من يوكع إبشده
بدعاء أم البنين الغايب إترده
واخلي همومه ماي ابصحره يتبده
منو باجيلي .. ومنو لاطم
أنه واسطته .. لدى فاطم
يلكه الفرج كدام
لو جفت الأقلام
منو كادر
*****
انا اولادي اربعتهم منبع الخوه
واحدهم نهر وكت العطش يسوه
ناديت الحسين بساعة النخوه
مو ابني اليجي وما راح الك فدوه
عليت بزودهم ما عاينت جوه
راسي اويه الشمس والغيمة الي صهوه
وانا كل عمري .. صفه ضامي
على ابن گلبي .. المشه دامي
هاي آنه بنت احزام
لو جفت الأقلام
منو كادر
*****
عمت عيني على ابني ودمعي هليته
النايم على الرمله وما مغطيته
اليسوه الدنيا كلها اربعة انطيته
اعز منهم عليّه بروحي ربيته
گالولي السهم موش الهوه بريته
والما يسوه شعره لازم لحيته
هلا بالضامي .. البقه عالي
رخص العالم .. وهو غالي
والثّبت الإسلام
لو جفت الأقلام
منو كادر

الشاعر احمد الذهبي


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

روحي ياشمس الظهيره

روحي يا شمس الظهيرة
بلغي اشيوخ العشيرة
بالنجف و الغاضرية
عدهم اجنازة اسيرة
***
يا شمس روحي و اندبي
استأذني حامي دخيله
للبقيع و صيحي حيهم
يهل السيوف الثجيله
و الحسن روحي المضيفه
حشميه و هلهلي له
خل يطلبوا ابثار ابنهم
صاحب السجدة الطويلة
صيحي يا جعفر يباقر
يا علي يا بو المفاخر
ردنه فزعه هاشميه
عدهم اجنازة اسيرة
***
ردي يم الشيخ الأول
حيدره و اخذيله دمعه
و السجن نعتبره خيبر
يقلع الباب و يطلعه
و الحظر ذا النون اريده
يحظر الموسه و يشيعه
من يجي و بيده فقاره
مو نعش يرفعله قلعه
صيحي يا قالع يكاسر
يا علي للشده حاضر
و اللي يحمون الحميه
عدهم اجنازة اسيرة
***
روحي للطف يا شمسنه
و هوسي يم باب المخيم
ها يالاكبر ها يجاسم
يا سيوف التطرد الهم
يهل السيوف العطاشه
الرايح ابدم يرجع ابدم
عالجسر مطروح ابنكم
يا ليوث الليل الاظلم
يا عقيل وطالب الكم
عالجسر ننظر فعلكم
خل يجون الطالبيه
عدهم اجنازة اسيرة
***
يا شمس و اعله الشريعه
صيحي يسيوف الكرامة
وين ابو فاضل و اخوته
و الحرب عيد النشامه
خل يفرع كافل اخته
خل يروح ابلا عمامه
دمعة الكاظم عزيزة
او ينتظر فزعة عمامه
حشمي و زيدي الهلال
يا بو فاضل يا بو فاضل
و الغيارة الحيدرية
عدهم اجنازة اسيرة
***
يا شمس عالتل وقوفج
وگفة الحرة اريده
صيحي يحسين انويلنه
هوّه ينهض مو بعيده
خل يلم اجروحه كلها
و يفزغ ابراية عضيدة
عالنعش دارت سلاسل
خل يروح يحلها بيده
لا يروح ابتسع اصابع
موسى ما عايز مواجع
حيهم اولاد الزجية
عدهم اجنازة اسيرة
***
يا شمس للشام اگصدي
للغربية الفاطمية
هالمصيبة اتريد زينب
خل تجي هيّه و رقية
هالنعش رايد نواعي
و النعي بطور السبية
و السلاسل جن حوافر
للخيول الاعوجية
يتلقون ابهل المصيبة
و الغريب اويه الغريبة
وسفة اسياد البرية
عدهم اجنازة اسيرة
***
يا شمس ويه المؤذن
صيحي ها يالجعفريه
صيحي وين اهل المواقف
و الغيارة الرافضيه
من يرفعون البيارغ
زفة عدهم مو منيه
الما أخذ بالطف فرصته
هذا طف الكاظمية
هاذي فرصتكم يشيعه
و الجسر مثل الشريعة
و النعم بالمهدوية
عدهم اجنازة اسيرة
***
الشاعر السيد عبد الخالق المحنه


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

طريق الكاظمية


يظَل حُبّه قضيّه .. طريق الكاظميّه
*
تعنّينه ابْمواكبنه الحُسينيّه
رِثائك ينقره ابْنبره عراقيّه
عله اِرْسوم المواكب تِلگه حِنّيّه
وَلكن بالكلايف كلها ثوريّه
يثورتنه الأبيّه .. طريق الكاظميّه
*
نِنْصبها المواكِب خدمه للزّوّار
خطّار اليجينه واحنه هَمْ خطّار
عندك سيّدي يا نفحة المُختار
خدّام اونظل عالخدمه ليل انهار
خدامتنه هويّه .. طريق الكاظميّه
*
يبِن جعفر رفعنه بِسْمك الرَّايه
مثِل يوم اربعين احسين مَشَّايه
نتخطّه المسافه اوگبرك الغايه
منطينك احچايه اونبقه وفّايه
مسار الجعفريّه .. طريق الكاظميّه
*
نِظَل من رِجَب لآخر للزِّياره انعِد
ابْيوم الخامس اوعشرين ممشه انرِد
على جِسْر الرِّصافه كل سنه الموعد
إلك دين ابْدمانه سيّدي نگصد
ذِمَمْنه اتظَل وفيّه .. طريق الكاظميّه
*
إلك "هذا الغريب امنين" مِن نقره
صُفت "هذا العزيز" ابْأوّل النَّظره
چن الكون مِحبس وانته بي شذره
إلك نشتاگ واحنه ابداخل الحضره
يعشْگ الرَّافضيّه .. طريق الكاظميّه
*
رسالتنه اونِريد العدو يسمعنه
بعد لا سطوة اِلإرهاب تمنعنه
وَلا ظالم بعَد يگدر يرجّعنه
الأسد بغداد بينه الغيره تدفعنه
فلا خفنه المنيّه .. طريق الكاظميّه
*
برْض الكاظميّه امحزّمين احزام
اشْحلاة الخدمه بس چن تركض الأيّام
من تگضي الزِّياره اشْحالة الخدّام
چن ما زايرينك نظل نحسب عام
اويظَل ايْتاني جيّه .. ..طريق الكاظميّه


زين العابدين المرياني


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

صَلّو على موسى
كِل زوّاره مَحروسه
قيد السِجِن بيده
يعني الكَعبه مَحبوسَه
مُجرِمها قاضيها .. شاهِد تِضَل بيها
يارَجَب...يارَجَب
******
صَلّو لِمَن صَلّى إبطامورَة سِجِن ظالِم
صَلّه العَرِش لَجله كِلمَن صَلّه عالكاظِم
من تحظر المجلس وإتشارِك عَزه القائِم
چَن عالجِسِر حاظِر إبشيل إجنازِته إمساهِم
ياموسى إبِنْ جَعفَر گِلّه إقبَلْني إلك خادِم
لَتصَدِّگ إيرِدّك بَس حَلفه إبظِلع فاطِم

ياصاحِب الحاجَه .. أطلُب حاجِتَك مِنّه
مِن تِدخِل الگُبته .. چَنّك داخِل الجَنّه
والشِدّه يگضيها .. شاهِد تِضَل بيها
يارَجَب...يارَجَب
******
سجنه اوسجِن يوسِف بس چان الفَرِق شاسِع
يوسف طلع حاكِم إوموسى إعله الگبر طالِع
للرب رَغِم سجنه قائِم ساجِد إوخاشِع
موبس عِبَد رَبّه بَل سَوّه السجِن جامِع
ندري الحقد كِلَّه ضِد السيد السابع
گَلهُم علي الأول من گالو علي الرابع

ياساجِن الكعبه .. إنظُر كعبَةْ الناظِر
صارت رغم أنفَك .. چَنها إزيارَة العاشِر
من ربها يدعيها .. شاهِد تِضَل بيها
يارَجَب...يارجب
******
يازاير الكاظم لو تدري إشعُظُم قَدرَك
من توصل إتزوره إوتلگه المهدي ينتظرَك
تِتمنّه تِتمَنّه تبقه إبابه كِل عمرك
مِن ريحَة الجَنّه ريحَةْ مَرقَده إتعَطرَك
وَي دَمْعِتَك تِنزِل كِل إذنوب إل إبظَهرَك
يعني إبرِضه رَبّك دَمعَة عينك إتبَشرَك

نِعمه إوعلى النِعمه .. واجِب رَبَّك إتشِكره
لَمّن جعَل گلبك .. عاشِگ موسى عالفِطره
والدمعه تبچيها .. شاهِد تِضَل بيها
يارَجَب...يارجب
******
قِصَّة قَتِل موسى لازِم بيها مَنْجامِل
وإبكِل زَمَن واجِب نِحچي القِصّه بالكامِل
نخفي القَتِل إلمَن مادام القَتِل حاصِل
وِلّي سِكَت شارَك وإبَيعَة علي ناكِل
راشِد شنو راشِد هذا الحاكِم الجاهِل
سِم السِجِن يشهَد ضِد المُجرِم القاتِل

ماتنخِفي أفعاله .. هارون الفَلا راشِد
قاتِل بِلا رحمه .. عدنه الحاظِر الشاهِد
دَم موسى يحچيها .. شاهِد تِضَل بيها
يارجب...يارجب
******
تِشكي الظُلُم للرب جِثّه إمن الشمِس والحَر
جِثّه إو دَليل السِم غَيّر كِل شِكِلها أصفَر
ضَلّت ثلاثَه إبْلا تَشييع إو أهَل تِحظَر
قِصّةْ ذبيح الطَف قِصَّة موسى إبِنْ جَعفَر
نَفسه الفعِل نَفسه بَس إبْلا گَطِع مَنحَر
إحسين إبرمِح راسه والكاظم سَجين إنْجَر

قِصَّةْ قَتِل موسى .. لوتنظر على القُصَّه
حصّةْ غَدُر تِلگه .. الهارون الشِمِر حُصّه
طف ثاني يمحيها .. شاهِد تِضَل بيها
يارَجَب...يارجب
******
فوگ الجِسِر باقي ليش إبلا غِطه جِسمه
هذا الذي تِحلِف كِل شيعَة علي بِسمه
ليش البَعَض خايف مايكتِب شِعِر قَلمه
مو زحمه من ربَّه بَس امن البَشر زَحمه !
وَحده بِلا ناعي إومَحّد يطلب إبدَمّه
ماچَن بَني هاشِم كِلهم من ولِد عَمَّه

ياشيعه ياشيعه .. مِنعو شيعِتَه إتشَيعه
يَم الجِسِر گالوا .. مَحّد يوصل إيرُفعه
وَحزانَه يحييها .. شاهِد تِضَل بيها
يارَجَب...يارَجب
******
كِل شيعي بِوداعه إبعينه الدمعه مكسوره
واليفگِد الوالِد ضَلّت داره مهجوره
الغابو گَبُل عَنّه لا مو عَنّه معذوره
إولا تِنحِسِب شيعه هَسّه الماتِجي إتزوره
لَتْصَدِّگ إمرايه تِحفُظ للبشر صوره
بس صاحب الدمعه تُبقه إبخدّه مَحفوره

مايحفظ الصوره .. ماي المَدمع الساجِم
بس تنحُفُظ دمعه .. ترسم صورة الكاظِم
موجوده تِلگيها .. شاهِد تِضَل بيها
يارَجَب...يارَجَب
******
راهِب بَني هاشِم كاس السِم جِرَع كاسَه
مات إوعله الكعبه مادارَو أَبَد راسه
لوما مَخافَتهُم ضِدهُم تنگلُب ناسَه
صَدِّگ تَره أعدائه تِهدِم گبره بالفاسه
چَم حاقِد إبحاقِد تِلگه السِندي بِحساسه
من يرجع الكاظِم يرجع يگطَع أنفاسه

هذا الحقِد هذا .. ضِد الكاظِم إوضدنه
ماينتهي لَمّن .. يشهُر سيفه قائِمنه
هُوّه اليصَفّيها .. شاهِد تِضَل بيها
يارَجَب...يارَجَب


الشاعر ناظم الحاشي


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

شهادة أمير المؤمنين ع

لــلإسـم الإعـظـم ظـهـرت عـلامـه  
بـيـن الـنـبـوه و بـيـن الإمـامـه
سـرك يـحـامـي الـجـار 
مـن أعـظـم الأسـرار
*
تـعـالـه الـبـاري سبحانه ابقدرته و كون الذره 
جعل كل ذره بالعالم تدور وتسبح بأمره
اخـلـقك ربنه جعل ذاتك محيط العالم القدره
خلق للإسم الإعظم سر يحيدر و اجعلك سره
رب الــعــوالــم آمــر عــبــاده 
بـسـمـك تـردد ثـالـث شـهـاده
يـا مـن وجـودك صـار
مـن أعـظـم الأسـرار
*
حـديث المطصفه الهادي يوضح للبشر مضمون
يحيدر ما سوه الباري و رسوله السرك يعرفون
و بـس إنـته و رسول الله عرفتوا سر إله الكون
و إنته و ربك و لا غير بسر المصطفه تدرون
و احـنـه الـقـدرنـه نـوفـي الـحـقـيـقـه
و الـبـاقـي كـلـمـن ابطريقه
هـذا الـحـديـث الـدار 
مـن أعـظـم الأسـرار
*
يـحـيدر ما عله اليجهل عتب لو ما عرف قدرك
مثل ما قلنه بس ربك و رسوله العرف سرك
مـعـاجـز قـدرة الـخـالق يمن كنز العلم صدرك
إمام و شيعتك إحنه تبعنه نهيك و أمرك
شــرف وجــودك رب الــبــريـه
رسـمـت خـلـودك إيـده الـخـفـيـه
هـالـحـكـمـه لـلـجـبـار
مـن أعـظـم الأسـرار
*
الإمـم صـارت رمـوز إلـها و كل أمه برمز تفخر
و إنته بمملكة مجدك إلك جف المجد أشر
الـخـلايق كلها شهدت و حته الخصم يا حيدر
عجز ما يقدر يساوي شسع من خادمك قنبر
فـضـلـك ايـحـدد مـعـنـه الـدرايـه
إنـتـه الـبـدايـه و إنـتـه الـنـهايه
مـجـدك يـبـو الأطـهـار
مـن أعـظـم الأسـرار
*
أجـل و أطـهر أعز و أشرف معاني واهبك ربك
العلم منك أخذ علمه جعل دربه بأثر دربك
الشجاعه منك اكتسبت الشجاعه بسلمك و حربك
الصبر منك أخذ صبره تعلم من صبر قلبك
نار الحبايب جاعلها بيدك
و عليها تدفع زمـرة عـبيدك
هـالـقـدره والإيـثـار
مـن أعـظـم الأسـرار
*
عـلـي بـهالدنيه ما مثلك رفع لهل العلم معلم 
علي و باسمك تدور أفلاك إسم الخالق الأعظم
عـلـي و رب الـعرش بيدك مفاتيح الحشر سلم
ابيمينك جنة الباري ابيسارك تسعر اجهنم
مـا غـيـرك إنـتـه الـصـديـق الأكـبـر 
الـفـاروق الأعـظم شخصك يا حيدر
سـر جـنـتـك و الـنـار
مـن أعـظـم الأسـرار
*
إذا عـدنـه أمـل واحـد أمـلـنـه بيك يا الأنزع
بيوم الما تفيد أموال بيوم الما ولد ينفع
يـبـو الـسبطين ما غيرك دخيره للمحب يشفع
خسر كلمن نكر حبك مهما يسجد و يركع
شـخـص الـيـجـعـل بـيـك إلـتـزامـه
تـشـفـع إنـتـه بـيـوم الـقيامه
هـالـرحـمـه يـا كـرار
مـن أعـظـم الأسـرار

الشاعر جابر الكاظمي

https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

العليلة تنوح


العليلة تنوح على المذبوح
بقلب مجروح تحاجي الليل
***
مثل ما أنزل الباري كتابه و بلَّغ المرسل
نِزَل آية بعد آية و كِمَل هالمصحف المُنزل
اجت عيلة رسول الله نفس هالحالة تتمثل
المحامل وصلت لطيبة و نزل محمل بعد محمل
العلية تحوم بفزع و هموم
تِقَع و تقول عَلَي يا ويل تحاجي الليل
***
العليلة تلقَّت العيلة تصد من واحد لواحد
تدوِّر وين أبوها حسين حَرَم و أيتام شتشاهد
عقب ما أيِّسَت رجعت مثل ما يرجع الفاقد
تِحِن حَن الهِجِن و تصيح آه يا فرقة الوالد
بفكر محتار اجت للدار
بدمع مدرار يباري السيل تحاجي الليل
***
جفنها عاشق العبرة قلبها يوالف همومه
بعد يا دار تحويها جمعها الليل بنجومه
على كل نجمة تِصِد لوعة و معالم نوح مرسومة
تقله شظل بعد يا ليل أبوية و منه محرومة
مهجتي تلوب مثل أيوب
عِماني هبوب غبار الويل تحاجي الليل
***
الك يا ليل بعيوني علامة موَسِّمة بجمري
لَعِد بوابة الوحشة تلاقن صبرك و صبري
بعد يا ليل و شعندك تضيف لمحنتي و قهري
يتلامع بدرك و آنة صريع بكربلاء بدري
انذبح عطشان بلا أكفان
الكفن تربان عجاج الخيل تحاجي الليل
***
بعد يا ليل ما عندي مهجة التقدر تلومك
صريعة بكربلاء نجومي و أنت ساطعة نجومك
يا موجة من بحر همي تغرِّق قلعة همومك
يا ليلي و يمتة عن وجهي تزيح مكابر همومك
حنانك مات يا أبو النجمات
و على العبرات أخذني الميل تحاجي الليل
***
الشاعرجابر الكاظمي


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

تم نشر قصائد للامام الجواد عليه السلام
https://www.tg-me.com/aabas78

عُمْرَك صبي عِلْمَك نبي
مُحمَّد الجواد
▪️▪️▪️▪️▪️
مرّ الخليفه وانذهل لحظتها هربوا چم صبي
بس انته چنت ابهيأتك وگفةْ وصي اوهيبةْ نبي
يسمع فَصاحةْ كِلْمتك خلّت افكاره تنسبي
هاي الرّزانه اليا نسب جاوبته آنه الطَّالبي
والطّاغيه والحاشيه
مستغربه المُراد
▪️▪️▪️▪️▪️
حگهم لوَن يبن الرضا كل شخص بيهم ينذهِل
بالأعلميّه الكامله بس بالعمُر عمرك طفِل
تتبيّن اكثر معجزه بالصعبه كلما تنسأل
ضم راسه ابن أكثم لمَن شافاك ميزان العدل
حچيك ذَهَب دربك وِجَب
بوّابة العِباد
▪️▪️▪️▪️▪️
قاضي القُضاة اومجلسه ظل من كلامك مرتبِك
قرآن ناطق عالأرض بيك البلاغه والسَّبِك
مذلول دنّگ من سأل كلمن ابْعلميتك يشِك
واصبح مثِل خادم إلك حتّه الملِك ما چن ملِك
مِن هيبتك والنصرتك
ربّ العرش أراد
▪️▪️▪️▪️▪️
ينعقِد چم مجلس إلك چان ابْمواضِع تختلِف
جفّت جميع الأسئله بس انته عِلْمك ما يجِف
عجزوا اوگالوا ننسحِب عَدّ المسائل صار الف
بيك العلم والمعرفه أصبح عدوّك يعترف
أهل الفِتَن طوْل الزَّمَن
صاروا مثِل رماد
▪️▪️▪️▪️▪️
خَطَّتْ بني العبّاس الك عِدّةْ سياسات اوظلُم
زرعوا عُيون ابْكل درُب بس ما غفيت اعله الهظُم
شافوا حربهم خاسره كلما يعدُّونك خصُم
گاعد ابْخُوص اونزَّلِت تَحْت القدَم كرسي الحكُم
والضدِّتك من رِفْعتك
ظلَّت بِلا رشاد
▪️▪️▪️▪️▪️
چان الخليفه ابْكل وكِت رايد يوگعك بالحِيَل
قلّت الحيله اوما گدر صبرك وَلا أي لحظه قَلْ
حتّه امْن اجاك الهاشمي گال اغتيالك مُحْتَمَل
تدري ابْنوايا امّ الفضِل بس انته مؤمن بالأجل
گلبك لِهَج موتك فرج
مِن دِنْيَةْ السّواد
▪️▪️▪️▪️▪️
بائَتْ خُطَطْهم بالفَشَل ظَنّوا ابْقتلك تنحسِم
كل عقله فِكْرَك ينتهي تبّت إدين المُعتصِم
قتلك كرامه اوللأبَد صورة خلودك تنرسِم
يبن الرّضا اوعَبْر الزَّمَن تَضْحيتك اتْخضِّر زلِم
وابحضرتك كل شيعتك
هالليله بالحِداد
▪️▪️▪️▪️▪️

الشاعر زين العابدين المرياني


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

لاتظن غايب مهدينا ماغاب
عايش وموجود مابين الاحباب


لا تظن غايب مهدينا ما غاب
*******
١_عايش بنار انتظارك ينتظر ويانه
عجل اللّٰهم عجل بالأمر مولانه
انت آمرنا يمهدي عالعهد تلقانه
مانهاب الموت احنا ولابسين أكفانه
وين مهدينا و يصفي الحساب
لا تظن غايب مهدينا ما غاب
*******
٢_احنا ما أيسنا مرة ولانشك بوجوده
ننتظر سيفه يشهره هاي كلها جنوده
راية العباس ظلت عالنهر موجودة
وين مهدينا تنادي خل يوفي وعوده
رايتك تسأل و اتريد الجواب
لا تظن غايب مهدينا ما غاب
*******
٣_احنا نعرف اليضدنا و نفتكر تفكيره
كان يتصور الشيعة تخاف من تفجيره
غيره ماعنده ليضدنا واحنا اهل الغيرة
احنا صحنا عالمشانق بس علي ولا غيره
لا سماح اليوم للحرقوا الباب
لا تظن غايب مهدينا ما غاب
*******
٤_لا فتى الا علينا و خل يموت الحاقد
غصباً على اعداه يبقى المنتصر والقائد
والله يالمهدي صبرنا وساعد يشد ساعد
ينادي حيّ على الجهاد وصوت جيشك واحد
والضلع لليوم يالمهدي ما طاب
لا تظن غايب مهدينا ما غاب
*******
٥_ احنا يتحلل دمانا بيا ذنب حاچينا
هذا ذنب الشيعة صاحوا بس علي والينا
الصبر مل منا تدري واحنا ما ملينا
كل جرح بينا ينادي وين يا مهدينا
ياما نادينا بدموع العتاب
لاتظن غايب مهدينا ما غاب
*******
٦_نبقى وي ليل انتظارك بس نعد نجومه
و احنه يا يوم ليمر نقول باجر يومه
احنه عالحق ماسكتنا تعيش بينا همومه
نومة المجروح ونة لا تصدق نومه
لا تلومونا للونة اسباب
لا تظن غايب مهدينا ماغاب

*******
الشاعر عبد الخالق المحنة


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

تم نشر قصائد الى مسلم ع 👇👇

https://www.tg-me.com/aabas78

تم نشر قصائد لى مسلم ع نسائية👇👇

https://www.tg-me.com/joinchat-AAAAAELdvGssZMurwfLsJA

كل شي راح...لحظة غيابك
و استراح...قلبي بعذابك
حتى لو...ترجع لي ثاني
راح اقول...طيفك اجاني
*
أيست ترجع يا غالي حتى لو قالوا رجع
نظرتك نظرة نهاية ووجهك بصدري انطبع
يُمه من غابت شمسنه بالافق نحرك طلع
انت لو باقي اعله مهرك ليش انا قلبي وقع
يمة خاف...عالغبرة واقع
يمة خاف...ظامي و تنازع
و اليموت...مو انت اني
راح اقول...طيفك اجاني
*
من درت ظهرك عرفتك للمصايب مستعد
اني ام و قلبي يعلم باليرد و الما يرد
بس قلت عباس عنده و ابني عسكر مو فرد
يعني كل شر ما يصيبك و القمر عنده زند
خوفي لا...ذبحوا عضيدك
خوفي لا...قطعوا وريدك
لا تموت...موت الخذاني
راح اقول...طيفك اجاني
*
من أطب دارك كاني انظر رماد الخيم
و الصده يرعبني و اسمع ركضة و سياط و ألم
مرتين جفوفي توقع لو جبت طاري العلم
يبني شو قلبي لجمني يمكن بقلبك سهم
بالتراب...تسعة أصابع
بالتراب...خنصرها ضايع
صرت اشوف...و اني بمكاني
راح اقول...طيفك اجاني
*
اكتبت مرة بطريقك ابني رد من السفر
و الهوه هب و قلبها و لنها مكتوبه نحر
و اكتبت كلمة كفالة و انقرت جف و نهر
و اكتبت زينب أميرة و اشعر بوجهي انسطر
قلبي حاس...زينب سبية
قلبي حاس...رحت من ايديه
يللي ما...ردك حناني
راح اقول...طيفك اجاني
*
لو صدق ترجع لي يبني حته أفرح و أبتسم
لا تظن افرح بخوتك هو بس انت المهم
ما ترد يحسين أعرفك لا حقيقة و لا حلم
يولدي و هواية صعبة يصفه بيت بلا زلم
ها يموت...شو ما تجيني
ها يموت...راحوا بنيني
ابني وين...يلهج لساني
راح اقول...طيفك اجاني
*
اعرفت ميت يا يُمة و نزلت ايدي من الدعه
و المهم راضي عليَّ و راضي عن الاربعة
والله من گالولي ظهرك منحني عالمشرعة
انحنى ظهري و لهسه امشي و اني راكعة
اشباقي بيك...من الحوافر
اشباقي بيك...مو انت صاير
ليش اعيش...مدري شجاني
راح اقول...طيفك اجاني
*
آني ما مكسور صدري لكن أشعر بالكسر
جن عشر خيالة تسحك صدري كل يوم الظهر
و اعرفت هاي النهاية و ملتقانه بالقبر
و الشمر گالولي بالطف يعني زينب باليسر
يا حسين...فدوة لترابك
يا حسين...سلبوا ثيابك
ما اقول...بُعدك عماني
راح اقول...طيفك اجاني
****
مقبره سويت إلكم حته گلبي يحترگ
أربع اقبور البنيني و آني شمعه و أعتلگ
منفرد قبرك بنيته يالقلت ما نفترگ
و أنطي ظهري الأربعتهم انت قبرك ينشبگ
بالدموع...قبرك أغرگه
بالدموع...أوقع و أشبگه
ما كو ماي...بعدك رواني
راح اقول...طيفك اجاني


الشاعر عبد الخالق المحنه

https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

:
🏴لطمية كومن بنات النبي🏴

گومن بنات النبي خيطن خيمچن عبي 
هاي الزلم ما تضل باچر وراچن سبي
'''''''''''''''''''''''''''''''''''''
يالله استعدن لباچر هالليلة كلش گصيرة
باچر زلمنه تسافر كلمن يروح المصيره
انسن دلال الهواشم انسن صفات الأميرة
كل وحده تلزم طفلها لوذن اسيره ابأسيره
و بسرعة كون المشي احنه نسه و نختشي
لا يبقى عدچن أمل باچر وراچن سبي
''''''"""""""""""""""""

من هسه خلي نفكر لمن تصير المسية
ليلى تحامي رقية و آني عليه البقيه
من الشمر يعتنيني لا لا تطيحن عليه
خلني وحدي لسياطه لمن يگطع اديه
باچر سياط الهظم خل تنزل اعله العظم
خلّي ابشر الكفل باچر وراچن سبي
"""""""""""""""""""""""
ما ظل وكت يالحراير باچر تسافر زلمنه
باچر غطانه سحابه. ناتج مداخن خيمنه
صيرن درع يا خواتي و آني اشيلن علمنه
احنه ثكلى و أرامل بالغربه من يحترمنه
نصبغ وجهنه بدمه. حتى العدو انوهمه
كلشي صفه محتمل باچر وراچن سبي
"""""''''""""""""'''""''''"'''
لا لا تلفظن أسامي ----- خاف العدو يكتشفنه
يبقى يسب بالغوالي ---- يعرفها نقطة ضعفنه
كل غالي باچر نتركه --- ماكو أهم من شرفنه
و اللي يطمئنه باچر ------كلش قريبه نجفنه
باچر حرب تستمر بين الخدر و الشمر
واقع صبح مو مثل باچر وراچن سبي
''''"""""""""""""""
شوفن وجوه الغوالي ساعة و حفظن علايم
يختلف باچر شكلهم لمن تطيح العمايم
جثه تطيح إعلى جثه تلتم جسوم الهواشم
رمله يليلى تحيرن منهو علي و منهو جاسم
كل الجثث تنسحگ تتگطع و تفترگ
انسن عتاب الأهل باچر وراچن سبي
""""""''''''''''''''''''''""""
مهد الطفل خل نبعده شوفوله خيمه بعيده
رمله بعد لا تهلهل شمع العرس ما نريده
لمن تشوفن كفيلي لحد تباوع لإيده
و ابن أمي باچر نشوفه سيف اليمزگ وريده
خل ننظر لرگبته وكت الظهر ذبحته
ودعنه بس بالعجل باچر وراچن سبي
'''''''''''''''''''''''''''
من هسه صيرن سبايه و آنه الحرس و الكفيله
اتعلم اعلى الحراسه ما ظل وكت هيه ليله
ما نشتكي من ألمنه من يسمع و نشتكيله
أدري علينه صعوبه قصه سفرنه طويله
باچر زند ينبتر باچر ظهر ينكسر
ع الشاطي يوگع جبل باجر وراجن سبي
""""""""""'''''""""'''
لو وحده باچر ولوها لازم تخف إبمشيها
خلها تنادي يزينب اعليه تأشر بديها
حتى ايعرفني و يجيني بلكت بعد ما يجيها
اختك يراعي الكفاله كلها تدور عليها
يا ويلي وكت الظهر يرجعلي خالي المهر
أعرف آخويه انچتل باچر وراچن سبي
"""""""''''"""""""''''
بنات النبي
للشاعر : السيد ✍عبدالخالق المحنه


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIB

(دنيه ما بيها بس هم وغدر)
لعام 1434 هـ

دنيـه ما بـيها بس هـم غـدر دنـيه

ومنـيـن اجيـبــلـها الصبر دنـيه

راوتـــني نجمـــات الظــــهر دنـيه

****

لـيلـة وداعـك ثـوانـي بـسرعـة مـرت

جـانـت أسرع من دمـعـتي

لـحظـة فـراكَـك مـسـافـة بـلا نـهـايـة

هـواي أطـول مـن دمـعـتـي

والـعـمر بـالـفـركَـة يـطـول يـمـته يـخلـص

حـتـه أخـلـص من غـربـتـي

دهـري راونـي أنـواع الألـم دهـري

كـل لـحظة يـرمـيـني بسـهـم دهـري

واعـرف نـهـايـة هـالـعـمر دنـيـه

*

يـبنـي كـل الـراح يـرجـع تـدري يوسف

رد قمـيصه للبشـارة

وآنـه كلـكـم ضـيعـتكـم مـرة وحــدة

مـا اجـيتـوا يـالغَــيارة

يـبنـي ويـن الــكَه قميـصـك حـــته اشمـه

بلـكـي كَــلبـي تطفـه نـاره

وينـك يتــارك بكَـلبـي رمح وينـك

لـو انسـه يسـئلنـي الجــرح وينـك

خلتنـي للـمـوت انتـظر دنـيه

**

تـدري أول كلمة اكَلـك من اشوفـك

يـا حبـيبي أحلـى كلـمة

تـدري آخـر حـلـم عـمري المـا تحقـق

ويـنه نـحرك اردَ اشـمه

تـدري اجمـل كلـمة عـندي شـنهـي يبـنـي

من صحتـلـي ها يــيـمـه

يـمـه معـقولة ما تـرجـع بـعد يـمه

يـمـه أم البـنيـن بـلا وِلـد يـمه

ذابـحنـي يـا سيـف الهـجر دنـيه

*

يشـهد الله مـا نسيـتك لحظـة وَحـدة

وانته دومـك اعلـه بالـي

من كثـر مـا بـسمـك الـهج صـرت اشـكـن

وانـته يـمـي مـو خـيالـي

أنجـوي بنـارك ونـادي اكَـرب اكَـرب

يالـعفتـنـي هـذا حـالـي

يـبـنـي أطّـشر اجـروح وصـحـت يـبـنـي

أبـجـي وعـلـى وجـهي طحـت يـبـنـي

بـعـدك ولا واحــد يـمـر دنـيه

***

تـاكـل بـروحـي الليـالـي واشتكـيلـك

يـمـه ارجـع ويـنـك انـتـه

وارسـم اهـمـوم بـطـريـقك مـرة اكـتب

بـس تعـالـوا مـره يـمتـه

يـا لـطريـقك بــيـه يشـعر مـن أسـئلـه

مـا يـجـاوب يـبجـي سـكـته

أرجـع يـا لمـاخـذ ويـاك الشـمس أرجـع

يـا بـاجـر وحـلـم الأمـس أرجـع

مـجـبورة أقـبل أي عـذر دنـيه

***

آنـه أدري مـا تـردلـي بـس احـاول

مـا اصـدك فـاركَـتـنـي

تـالـي بـن حـذلـم اجـانـي وكَـتلـه جـاوب

أبـنـي ويـنـه عـذبـتـنـي

ضـل يعـددلـي إبـنـينـي وفـكـري يـَمـك

انـتـه وحـدك حـيـرتـنـي

نـوحـي أبـنج صـريـع بـكـربـلـة نـوحـي

مـسـبـيـة كـل الـعـايـلـة نـوحـي

والـشـدة زيـنـب بالـيـسـر دنـيـه

****

أنـتظـر زيـنـب تـعاود وأمـشي لـيـهـا

لازم اسـئل عـن اخـوهـا

عـن كَـمر هـاشـم سـؤالـي والـكـفلـهـا

يـبـقى سـاكـت من سبـوهـا

أبـنـي بـس غـيـرة وحـمـية وشـيصـبره

يـمـه زيـنـب سلـبوهـا

أخـتك كَـتلك أمـانـة بـركَبتـك أخـتك

كَـلـبـي يـكَلـي عـذرتـك أخـتك

عـد زيـنـب عـتاب شـكـثـر دنـيـه


الشاعر عبد الخالق المحنه


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

يسكت العالم بأسره و نستمع صوت الحسين
سلام الله على صوتك حبيي يا حسين

آنا أنظر على أصحابي من هووا مثل النجوم , سلام الله على أصحابك حبيبي يا حسين
روحي شبه الطير فرت بمصرع الأكبر تحوم , سلام الله على الأكبر حبيبي يا حسين
و الـ ذبح جاسم ذبحني و انذبح حلم الشباب , سلام الله على القاسم حبيبي يا حسين
من عطش قلبي أشاهد النهر يجري تراب , سلام الله على قلبك حبيبي يا حسين
ع النهر طاحن عيوني يم أبو الغيرة انحنيت , سلام الله على عيونك حبيبي يا حسين

ها يـَ كافل خدر زينب تترك حسين و مشيت , سلام الله على الكافل حبيبي يا حسين
شقد صعب توديع زينب أسرع و تركض وراي , سلام الله على زينب حبيبي يا حسين
و الطفل مد ايده يشرب يعتقد دم نحره ماي , سلام الله على طفلَك حبيبي يا حسين
ما أريد أشبك رقية أدري تشبكني و تموت , سلام الله على رقية حبيبي يا حسين
ها يـَ سكنة يطول ونّج ونة الخدّر سكوت , سلام الله على سكنة حبيبي يا حسين

دمعة الأطفال كلمة كلمة وحدة لا تروح , سلام الله على أطفالك حبيبي يا حسين
و العليل بعينه نظره نظرة أكبر من جروح , سلام الله على عليلك حبيبي يا حسين
صابني سهم المثلث و الجبد نصين صار , سلام الله على جبدك حبيبي يا حسين
من خرز ظهري سحبته و انطفى بعيني النهار , سلام الله على ظهرك حبيبي يا حسين
من طحت من المطهّرعيني ظلّت ع الخيام , سلام الله على خيامك حبيبي يا حسين

و المهر يحمل جراحي يحمل لزينب سلام , سلام الله على جراحك حبيبي يا حسين
الشمر لمّن رفسني التوى جسمي النحيل , سلام الله على جسمك حبيبي يا حسين
و اثنعش طبرة طبرني و ظلت دماي تسيل , سلام الله على دمّك حبيبي يا حسين
من تربع فوق صدري صحت يا عباس وين , سلام الله على صدرك حبيبي يا حسين
و اسمع الزهرا تنادي وا حسيناه وا حسين , سلام الله على الزهرا حبيبي يا حسين

ظل يحز نحري اعلى كيفه يقهر بزينب يريد , سلام الله على نحرك يا حسين
من نهض و الراس بيده صاحت الحق يـَ العضيد , سلام الله على راسك حبيبي يا حسين
ع الأرض جسمي توزع صار ملعب للخيول , سلام الله على أوصالك حبيبي يا حسين
و انقطع من جفي خنصر ظلت تدوره البتول , سلام على الخنصر حبيبي يا حسين
نادوا يا شيعة سلاما و اذكروا الشيب الخضيب و الشفاه الذابلات و نوحوا عَ الجسم السليب


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw

بس خدمتك رفعة راس
محرم 1444


بس خِدمِتَك رفعة راس والباقي ذلّه بذلّه
***
يا رحمة الله ومحلى هاي الرحمـه
يحســيــن يالخدمتـــك أكبــر نعمه
أدعي الله لا يحرمني من هالخدمه
بيهه الفخر والتاريخ والمجد بيهه اتجلّه
***
نعم المجد والفخر يابو الأحرار
لولاك لا ديــــن استقام ولا صار
يالعبّـــــدت بالـــدم طريق الثوار
وكلمن يخدمك بإخلاص درب الظفر يندلّه
***
مو بس شهر عاشور يبن النورين
كلما يمر إسمك يهــــل دمع العين
مثلك فلا موجــود مولاي حسين
خصمك يدفنه التاريخ ومرقدك يعله ويعله
***
بس خدمتك يبن الولي رفــعة راس
وخدمة الساقي أعني أخوك العباس
يتفاخر الخـــادم ملك بـــيــن الناس
والخدمه متحدهه احدود واجب الصام وصلّه
***
كلش قليل إنـچــان أبچـيـهـه ادموع
وأنعى بحسـرتي النحر منك مگطوع
ماشي اعله دربك وكت چان الممنوع
منذور عمري ويا ريت بهذا النذر تقبلّه
***
والما فهم خلي ينظــر اعله الأجيال
چم سنه وبعده العهد باقي وما زال
يبن الزچيـــه اعليـــك عاقدهه آمال
تقبلني خادم يا ريت عني فلا تتخلّه
***
مجلس عزاءك يبقه يحيي امصابك
وكل الخدم يحسيــــن ذوله أحبابك
أدعي الله أن يحشرني ويّا أصحابك
والنعم منهم خدموك والفخر حصلوه كلّه


الشاعر عمار هليل الواسطي


https://www.tg-me.com/joinchat-AAAAAFR1edBva4n0mGWz0Q
قصائد باسم الكربلائي اشترك بالقناة👆👆

كروب قصائد والحان منبريه اشترك👇👇
https://www.tg-me.com/joinchat-AAAAAD7f0FNmkN2JjlNIBw