الاداء ملا ستار الصالحي

لبیک یاحسین ع
قصيدة للزهراء ع {الليله اول الليله}
كأني بمولاتي زينب جلست تنعئ في دار الزهراء ع عن وحشتها .....

الليله اول الليله
امصبرني عطر الشيله
لو ماتجيني ام الحسن
ياحضن بعد اشكيله ** ياحضن بعد اشكيله
❥❥❥❥ـــــــــــــ❁❁ـــــــــــــ❥❥❥
يا حضن اشكيله بعد لو ماتجيني
من دونها كلش صعب اگضي سنيني
الليله اول الليله بس عميانه عيني
لو طالت الفرگه يموتني ونيني

من دونها راح اتعب اهواي
ردت امي طول العمر وياي

حمل العليه اتشيله ** ياحضن بعد اشكيله
❥❥❥❥ـــــــــــــ❁❁ـــــــــــــ❥❥❥
تالي يمرمرني الوكت واعتاز ليها
بالمكبره نامت العودتني عليها
من هسه مشتاگه احس الزم اديها
ومشتاگه اسمع صوتهه ولذة حجيها

ماخذ الحيل اعليها مبچاي
ردت امي طول العمر وياي

بيديه مامش حيله ** ياحضن بعد اشكيله
❥❥❥❥ـــــــــــــ❁❁ـــــــــــــ❥❥❥
يذبح الليل اخلافهه شيحمله اليه
زغيره بعدني والهظم بين عليه
عافتني مهظومه ومشت ليش الزجيه
ماجتني سكتت دمعتي الضلت جريه

خل تعمه من الدمع عيناي
ردت امي طول العمر وياي

حگهه الدموع اهميله ** ياحضن بعد اشكيله
❥❥❥❥ـــــــــــــ❁❁ـــــــــــــ❥❥❥
الفاگد عوافي يالهوئ يخنگه بالفراگ
وانه گلب عندي حنين هواي يشتاگ
يا يمه كتلها التراب اعليج مالاگ
جمر دليلي والهجر حراگ حراگ

ضليت ادور دونها افياي
ردت امي طول العمر وياي

ظهري منو ايتجيله** يا حضن بعد اشكيله
❥❥❥❥ـــــــــــــ❁❁ـــــــــــــ❥❥❥
#للشاعرة غدير الحساني

الاداء ابو رقيه

وحشة ليل المكبره     فاطمة يمه تــــره
خطوة خطوة بلايا روح
أمشي وارجع ليوره
.........................................
من وحشة ظلام البيت والدخان واحلامه
ألــج أبعث رسالة شوك يمه الليل ما نامه
يا فرحة شهر رمضان ياتسبيحه واصيامه
زينب من دمعها يطيح تكسر خاطر أيتامه
وأعثر بطولي كمت    فــاطمة وينج صحت
خطوة خطوة بلايا روح
أمشي وارجع ليوره
......................................
أكعد كل فجر بسكوت امشي مشية الدمعه
لامن بيها أصبــر الروح لا بيها بعد رجعه
طبع التنولي أمن اتطيح ما تستانس الفزعه
هاي انتي بدفعة الباب صدرج مالزم ضلعه
جرح الي يفارك سماه     عمره مـــــا يلكه دواه
خطوة خطوة بلايا روح
أمشي وارجع ليوره
....................................................
من ايهل فجر ملكاج أقنــــــع روحي موجودة
واركض ركضة المشتاك والكه الباب مسدودة
يا شدة جــــــــرح فركاج يمه بروحي معكودة
حـــــــلال الشدد حيدر دمعته أمجرحه أخدوده
زينب وحيدر سوه     نمشي واندور ضوه
خطوة خطوة بلايا روح
أمشي وارجع ليوره
.............................................
أيد ابأيد من الباب أمشي ويرجع أخيالي
واتخيل هجوم الدار يمه وطبته أكبــالي
اتخيل لهيب النار وصلت طارف أذيالي
اذكر طيحة المحسن وسطرة خدج ابالي
ومن اعياين عالجذع     أستمع كسر الضلع
خطوة خطوة بلايا روح
أمشي وارجع ليوره
.....................................................
أتنطر ضلام الليل والجم طلسم أجروحــه
هلبت والدي امن ايروح اسمع ونته ونوحه
ولـــــو طبعه طبع فقار دمعة عينه مذبوحه
لاجـــن شفته بالتشييع روحه اتشيع ابروحه
ليلة ليلة أنتضر    والدي الكبرج يمر
خطوة خطوة بلايا روح
أمشي وارجع ليوره
.....................................................
خادم خدمة الحسين
الشاعر
محمد الموالي

االاداء ملا ستار الصالحي

كلام السيده زينب بعد رحيل أمها الزهراء :


يا يمـه بيتي ابلا ضوه
مكسـوره گـابلت الهوه
شـيردها گعـدتنه سوه .. يمه
معقوله اعيشن بالجرح
ويصبح اخـلافج صبح
يـزهره يذبـحـني ذبـح .. يمه

حيره .. هاي الديره
عفتي دارچ يالـزجـيه وغـربيتي
غـربه .. ضيم وغربه
روحي خذتيها وعلي لمن مشيتي

ويلي اعلضيمي اشلون بلوه
يا يمه صـرنه انــگــوم گــوه
طش الشـمل يا يمه الـتراب
راحـت ليـالي الكـلهه حـلـوه

======ـ

مـدفونه وابعينچ دمـع
گالــولي مكسـورة ضلع
ؤن الـگـلـب ما يـنسـمع .. يمه
هاي انه زينب والوكت
شيبني وبسرعه اذبلت
مو انـتي انه الي متت .. يمه

وينچ .. راحت عينچ
وحته تابوت الحزن يبچي عليه
حالي .. امدوهن حالي
يمه ويـاچ اندفـن لـو صح بأديه

كلما وصلت الـبـاب اخافن
ما حن ييمه اعليچ ما حن
مطبوگ يمه اعليچ ياحيف
وامتوني يمه ابؤني طاحن

======ـ

ضليت احـوم ابـمنـزلي
يملي الـدمع عيني ملّي
كل ساعه يشبگني علي .. يمه
ذابحـني مسمار الحـزن
وكلـمــا اشـــوفــنه اؤن
واذّكـــر احچــايــة وآن .. يمه

بلوه .. طحنه ابلوه
وهذا حيدر مختنگ من البواچي
گوه .. ايسولف گوه
امنالهجر وامنالبعُد وامن المحاچي

الچـــان التـهـابه الــدنيه كلهه
تالـيــته مـن دم عـيـنه هـلـهه 
خَربّ مَشيته افراگ الاحباب
اول طــلابــه ومـــا يــحــلـهه

======ـ

مشتاگه الچ يمه الگلب
وقـرانچ ادمـوعه تصب
وهـايه سبحتچ والترب .. يمه
مابي مـحـنـه ولا هـلــه
هــذا الــوكت ينكط بلّه
بــاجــر ورايــه كـربــلـه .. يمه

وسفه .. واكبر وسفه
ابلا دلال اشلون يم حسين ضعني
غيره .. مامش غيره
يمي وادم تضحك وينسمع ؤني

يا يمـه ويــاي انه اريــدچ
يزهـره اضيع ابـلايه ايدچ
انه الاميره العـدهه خـوان
لو انضـرب شنهـو اليهيدچ

=======ـ

- خيري الصفراني ✍️

نعي
الزهراء توصي الامام علي روحهم فداهم  وهي في قبرها


زينب فــــزت امــن النوم يا حيدر دروحلهه
مُره الفرگه يـــــا كرار زينب صعبــه تحملهه
يتيمه و تكسر الخـاطر و هضم البين كاتلهه
صبرهه يبن عـــــمــــــــي و لتخافيــن كللهه
ضلعي بلاجبر بس كون تجبر كسر خاطرهه

              *--------------------*-------------------*

مرعوبه بظلام البيت اسرع يـــا علي ليهه
متعلمه بحناني اتنام تتسله مـْـن احاجيهه
سكتهه يحامي الجار مـــــا احمل بواجيهه
اريد بغيبتي الحــــــــــــره بعيونك تخليهه
مــــــاريد الحزن بالبيت والمدمع يمر بيهه

           *----------------------*--------------------*

امانه اعليك يابو حسين لاتتركهه بمصابي
وامسح دمعة الخدين وهون لوعة اغيابي
وبهيده تسد الباب خــــــافن تذكر اصوابي
يذكّرهه ظلام الليل وتنظر خــالي محرابي
هذا آخر كلامي ويــاك بزينب اخر اجوابي

        *------------------------*---------------------*

✍ بقلم خادم الحسين ع
   الشاعر رعد الجريخي

#اللهم_عجل_لوليك_الفرج

أداء جواد الحسناوي

رافضي .. رافضي .. رافضي لحد العظم



رافضي و اتفاخر انه ابــــــــرافـضـيـتــي
كربلائيه حُــــــســـيـــنيـــه هــــــــــويتي
ما ابايع كل شمر جوهر قـضـيـــتي
و بس علي الـكرار أميري لحد منيتي

بس علي ..... بس علي ..... بس علي ابنهجه التزم
رافضي ..... رافـضي ..... رافضي لحد الـــعظم





رافضي و كل دگه بالـــــــــــــدلال إليه
اتنادي اه يالــــــــوعة الزهره الــزچيه
چم مصــــيبه و چم ألم شافتها هيه
من ظلم حزب الــــسقيفه الـــناصبيه

والــظلع ..... والظـلع ..... والـــــــــظلع أول جرم
رافضي ..... رافضي ..... رافضي لحد الــــعظم



بت نبي الرحمة وعليها الباري صله
علعرش يكفيها اسمها اصبح مـحله
ام ابوها و هلــــشرف محد وصلّـــه
و بــــــــــاچر العاداها للـــباري اشيـگله

بالحشر ..... بالحشر ..... بالــــــحشر طه الخصم
رافضي ..... رافضي ..... رافضي لحد الــــعظم







گلبي بس للـــعتره يتبــــاهه ابــوداده
يوالي الــــيواليهم وللــعاده عــاده
ربهم اختصـــــــاهم ابـــتاج الـسياده
وحبهم اعله المولد الطاهر شهاده

عن علي ..... عن علي ..... گلبي ابد مــا ينفطم
رافضي ..... رافضي ..... رافضي لحد العظم





يا الهي اتوسلك بــــــــالزهره وامــها
اتسجل اسمي ام الــحسن خـادم خدمها
حته اواسي الـــحرِّگو بالــطف خيمها
زينب وفدوه انه اروحن بس لســـمها

يحوي سر ..... يحوي سر ..... يحوي سر هذا الأسم
رافـــضي ..... رافــــضي ..... رافضي لـــحد العظم



يلـــــــــزچيه وحبنه الچ خلانه نلــــتم
نجري لمصابچ دمعنه ونحيي مـــــأتم
يلـــــــــمصابچ شابه الـــــعاشر مـحرم
نار و ظلوع وطفل يــــا فـــاطمه ودم

مســـتمر ..... مستمــر ..... مستمر هذا الـــظلم
رافضي ..... رافضي ..... رافضي لحد العظم


سيد علي عبدالزهره الناجي

بصوت. مسلم المطيري

رافضي. رافضي. رافضي الحد العظم


كلمات الشاعر السيد
علي عبدالزهره الناجي

يا زهراء

شلون راح تنام زينب هالمسه
وعنها راحت امها سيدة النسه
،،،،،،
راحت امها وسافرت درب البعيد
البيت موحش وانهدم ركنه السديد
وتسمع باطرافه ون الما يهيد
الوجه شاحب والشفايف يابسه
،،،،،،،
من وصل للبيت ابوها من الدفن
تلكته ودموعها تصب  عالوجن
شلون اعيش وخيم عليها الحزن
تكله امي الهوى الجنت اتنفسه
،،،،،
الهوى امي وبلياها  اختنك
وبأسمها الكلب نبضاته تدك
ريت اموت شلون عنها افترك
بقيت وحدي والفلك دار وقسه
،،،،،،
جني بالحره تحاجي الطاهره
روحي لفراگچ ييمه موجره
بغربه جني وليلي صرت مساهره
وب اراضي الحزن جن دهري رسه
    

،،،،،،
يمه انتي العالمه لهاي الاحوال
عشتي مرتين الالم شفت الاهوال
لجن ما جتفوا محمد بالحبال
ولا خديجه البابها الجبت ارفسه

،،،،،،،،،،،
الباب دفعوها وشفت شنهو الجره
صحتي فضه اه ضلعي كسره
وصحت يمه ونار قلبي مسعره
شلون دار الوحي الباطل دنسه
........
حايره وظلت تدك بالراح راح
التفكد امها عليها ما يطلع صباح
وعله ونها كل ملك بالكون ناح  
الدهر، سهمه اعله زينب   قوسه
،،،،،،،،،
كل طفل يحتاج حضن امه الحنين
منه ياخذ قوته يلاوي السنين
والجره والصار  عله  ام الحسين
ورثته الحره وكلبها يوجسه
،،،    

لو نطالع هالزمن وشما حصل
نشوف زينب هالعزيزة بلا اهل
من بعد طف كربله ضاع الامل
وبصبرها الخدر ظلت  تحرسه
، ،   
زادت اعله امها العقيلة بالمحن
عكب أهلها شكثر اذاها الزمن
وشافت احسين واله الذاري  الجفن

وصدره يا ويلي الحوافر تهرسه
،،،،،،،،،

والاشد من تنسبي لدار اللعين
وتدخل لمجلسه ومجتوفه الليدين
بالعصا تشوفه يطك راس الحسين
اويشتم ب امها وابوها بغطرسه
،،
علي احسان هيچل الكربلائي

▪︎▪︎▪︎