رسالة مسلم ع للإمام الحسين عليه السلام
......
متروسه وادمنه ﭼذب ارجع يبن عمي
دمك حلال بكربله من يستحل دمي
والراسلوك هواي يحرمونك من الماي
ارجع يبن عمي
..........................................................
ماكو عقيده ومعتقد ناس التدور ارباح
والدز إلك باقة ورد يستقبلك بسلاح
ماتت ضمايرهم شفت ما ينفع الاصلاح

كل الرسايل ﭼذب والكاتبك غادر
واليعمي عينه الفلس ما ينصِرك باﭼر

وحدك تظل بكربله ....... ماكو اليسمعونك
اشكد وقِعّو بالدم تره ........ همه اليعطشونك
دربك طويل وجاي يحرمونك من الماي
ارجع يبن عمي
..................................................................................
من الآخر ابديها الك ارجع يخويه حسين
اهل المصالح باعتك لاذمة عدها ودين
عشرين الف ﭼانو گبل ومايبقه بس سبعين

نفس المواقف تمر والصوره گدامي
كلما يمرني العطش اتذَكَرّك ضامي

ماي النهر اول عدو ............ من ينگلب ضدك
وتتفطر اشفافك ضمه .......... لمن تظل وحدك
من ذبحوا لسقاي يحرمونك من الماي
ارجع يبن عمي
...............................................................................
مو مره رايح تنذبح مو مره حرگ اخيام
بين الرسايل تنـﭼتل من تكتب الاقلام
والـﭼـانت اتكلك نعم صارت نعم للشام

خابط ضمير البشر ماكو بعد صافي
وافينه حد الذبح بس وينه اليوافي

لمن تجي تشوف العجب ......... وحدك يخلونك
حته الثياب بكربله ......... باﭼر يسلبونك
بهاي الرسايل هاي يحرمونك من الماي
ارجع يبن عمي
........................................................................
ماكو امان ابهل ارض ارجع يبعد الروح
اطبول الحرب اسمع تدگ وباب الغدر مفتوح
لتخلي زينب تنسبي وبالطف عليك اتنوح

كلها تشوف الذبح ﭼـا وينه اليعاهد
راسك صبح جائزه من واحد الواحد

ايبيعونك بارخص ثمن ....... وكلمن شهر سيفه
لا عُربي لا شيمة بدو ........ ذاكه الذبح ضيفه
هذا التسمعه شواي يحرمونك من الماي
ارجع يبن عمي
.....................................................................
عافوني وحدي بغربتي والديره كلها اجناب
محد يدليني الدرب ومسدده الابواب
ماتت ضماير ما حيت ماتسوه حته اعتاب

شوك انمله مو ورد طشو عله گـاعك
ما اعتب اعله العدو اعتب عله الباعك
مسدوده بيبان الوفه ........ وعالفتنه مجموعه

وين الرجال اتبخرت ......... واللي بقت طوعه
عيش وتشوف اهواي يحرمونك من الماي
ارجع يبن عمي
.....................................................

نسالكم الدعاء

#علي صادق المجراوي

الاداء ملا عدي الربيعي

وي ام البنين امصفي نياتي ... اقره الفاتحه وتگضيها حاجاتي
......................................................................
تگض يها الحوائج للدخل عدها
هاي ام الكرم كل طلبه متردها
خصوصا لو انه بعباس اناشدها
ويمها اطيح وكت الشده دمعاتي
...........................................................................
دمعاتي اهلها وانتخي بيها
يالمضيعه الولد هالشده حليها
تگضيها الحوائج هيه تگضيها
هاي ام البنين الحره مولاتي
............................................................................
يمولاتي تضيج واهلي عافوني
ولا واحد من اصحابي اليواسوني
ضاگت من صدگ هالدنيه بعيوني
المرض والضيم والشده حالاتي
..............................................................................
حالاتي افضها بيوم القرايه
وابيعن ماي وجهي وانتي شرايه
احلفچ بالچفوف وطيحت الرايه
علي دنياي ليش امكثره صفناتي
...................................................................................
يصفنت ضيج شده اترادف بشده
وعلي هذا الزمن يوميه يتعده
ادگ بابچ يحره ولايذ بسده
وافض خلگي امن اسولفلچ معاناتي
....................................................................................
افض خلگي امن اسولف بيه ما بيه
ويمن تحله السوالف ويه بدويه
انه اتيقن واگول الشده مگضيه
والچ هميت وكت الضيج خطواتي
........................................................................................

نسالكم الدعاء
الخادم
علي صادق المجراوي

للعليله ع على لحن كلما تمر نسمة صيف الحاج باسم الكربلائي
كلما هوه يحرك الباب .. أركض وأعوف العتاب ..
يخفك يظل دلالي ..
كل أمنياتي أوهام .. لا يقظه لا بالأحلام ..
يرجع ابوي الغالي ..
..........................................
عندي أمل يرجع ألي .. ويّاه أخوتي وكل هلي ..
هذا أبوي المانساني ..
أفرش بدربه من يرد .. أعيون وكلب كبل الورد ..
ومن الهلا يعجز لساني ..
لو يهب عطره وي الهوه .. يوصل خبر من نينوه ..
يذبح يظل ميل الثواني ..
يدري الرجعته أرتجي .. لمّن يدك بابي ويجي ..
تتحقق وياه الأماني ..
يرجع ابوي أتمناه .. ويجيب الأكبر وياه ..
وبجفه أبوس الوالي ..
لا الأكبر و لاجسام  .. لا يقظه لا بالأحلام ..
يرجع ابوي الغالي ..
........................................
بين المرض بين القهر .. فاركني مو يوم وشهر ..
مرت ليالي شكد طويله ..
وكت الغروب شكد أحن .. حيل أطحن بروحي طحن .. لاكن فلا بيدي وسيله ..
فراك الأبو كلش صعب .. ينرادله مية كلب ..
والميه ياعالم قليله ..
بس شوفته هيه الدوه .. من وجهه يتلاله الضوه ..
كلوله مشتاكه العليله ..
علخدودي دمعاتي تفور .. والكلب صاير تنّور ..
بس الحزن يبرالي ..
جور الزمن مدري شضام .. لا يقظه لا بالأحلام ..
يرجع أبوي الغالي ..
...........................................
أتمنه وي شمس الصبح .. ترجع يبو كلب السمح ..
والدمعه بعيوني شكبرها  ..
تدري عليله وأنتظر .. ساعه الصبح ساعه العصر ..
والروح ذابت من صبرها ..
تعرف أبنيتك فاطمه .. تتحمل آهات وضمه ..
بس فركتك تكسر ظهرها ..
يابويه أناطر كل وكت .. غيمه الدمع عالخد يكت ..
نار البعد يجوي جمرها ..
يابويه سهرانه الليل .. فراكك تره يهد الحيل ..
وغايب كمرنه العالي ..
للصبح جفني مانام .. لا يقظه لا بالأحلام ..
يرجع أبوي الغالي ..
..................................
مشبوحه عيني أعله الدرب .. وبكلبي نيران وتشب
بويه الكلب شيطفي ناره ..
بس ردتك بطيفي تمر .. يالشوفتك تسوه العمر ..
والعمر من دونك خساره ..
عندي المرض مو مشكله .. وياك أخذني الكربله ..
نار الكلب يلهب شراره ..
ارد أشبع بحضنك دفو .. كلش عزيزه أعله الأبو ..
أدري البنيه بكل مراره ..
يابويه وكت الغروب .. يوميه دلالي يذوب ..
حال اليتيمه حالي ..
جرحك أبد ما يلتام .. لا يقظه لا بالأحلام ..
يرجع أبوي الغالي ..
......................................
صدره الحنين شكد ترف .. مو للحوافر والخسف ..
مشتاكه ياعالم أشبكه ..
يالتدري بيه أترف غصن .. والنوم مامر عالجفن ..
يوميه أذبل وركه وركه ..
أكعد وأحن مثل الطفل.. بنفس المكان البيه قبل ..
نكعد ولا عالبال فركه ..
أحسب بيا ساعه ترد .. مو بالدقايق كمت أعد ..
أحسب يبويه شهكه شهكه ..
ارجعلي يابويه اليوم ..  ماشافت أعيوني النوم ..
خالي مكانك خالي ..
لوحتى اروحن للشام .. لا يقظه لا بالأحلام ..
يرجع ابوي الغالي ..
................................
نشفت عيوني من الدمع  .. ما ينوصف هذا الوضع
آهات وفراك ومآسي ..
الشمس مونفس الشمس .. ضمت ضواهه من أمس
هيجي الوكت وياي قاسي ..
ناس انه اشوفن بالسمه .. ولون أحمر بلون الدمه ..
وناس الشفتهم همه ناسي ..
سولفلي يالغالي شحصل .. مرسال منكم ماوصل ..
ظليت ادك بويه على راسي ..
يابويه ما أظن تعود .. لا أنت لا راعي الجود
ضاعت بعد آمالي ..
ظليت أشم حرك أخيام .. لا يقظه لا بالأحلام ..
يرجع أبوي الغالي ..
.......................................
حيدر مطر العبادي

الزهراء في استقبال شهر الاحزان


هل شهر عاشور الله ايعينيها
فاطمة نشرت قميص احسينها
__
الزهرة من مجلس لمجلس رايحة
وين ما تسمع اصريخ ونايحة
تطب علعباس تقرة الفاتحة
وتلطم اوية اهل اللطم بيدينها
فاطمة نشرت قميص احسينها
هل شهر عاشور الله ايعينها
____
كاعده اباب المجالس كاعدة
هيجي من تفكد ابنها الوالدة
ايعينها الله اشكثر بلطف فاكدة 
والدمع ناصبلة خيمة بعينها
فاطمة نشرت قميص احسينها
هل شهر عاشور الله ايعينها
____
اوليدها واتحبة غير اوليدها
حگها من اتدك وجهة بأيدها
الدنيا عكب احسين لا مترديها
اتريد تبجي وما تبطل اونينها
فاطمة نشرت قميص احسينها
هل شهر عاشور الله ايعينها
____
اگبالة من ركضو اخيته اشلونة
بردنة ضل يمسح ادموع اعيونة
شوفو اثر دمعاتة حد امتونة
ابهلقميص اجروح ما ناسينها
فاطمة نشرت قميص احسينها
هل شهر عاشور الله ايعينها
____
تگضي كل الليل بس تفتر ترة
وين ما مجلس الزهرة حاضرة
تبجي علعطشان واتدك هلمرة
اعلى المتون الجانت امهشمينها
فاطمة نشرت قميص احسينها
هل شهر عاشور الله ايعينها
___
اتكول كون اعلية ينسد الهوى
اشلون اعيشن وابني لسة مرتوى
على الصاير صدرة وي ظهرة سوة
كون تطلع روحي وي اسنينها
فاطمه نشرت قميص احسينها
هل شهر عاشور الله ايعينها
_
تبجي علعطشان دمعتها دمة
وتبقة من مجلس لمجلس هايمة
هاكثر تعبانة امك فاطمة
وبعد لطمتهن الك خدينها
فاطمة نشرت قميص احسينها
هل شهر عاشور الله ايعينها


علي العبادي

الله خلاني .... خادمك آني
عمري كله بخدمتك عمري كله
.........................................................
بلا طعم دنياي بس حلاها رسمك
يا هواي بخدمتك خليني اشمك
خادم ازغيرون سجلني اويه دمك
مو بشر انه احس لوما اخدمك
بخدمة الضامي ................ اگضي ايامي
عمري كله بخدمتك عمري كله
.........................................................
انه منطي اعهود للزهره الزجيه
امن المهد وياك لايام المنيه
ما اعوفك سيدي وانته ادره بيه
وما امل بخدمتك صبح ومسيه
بس لبو اليمه ............. محله هالخدمه
عمري كله بخدمتك عمري كله
.........................................................
راحت الدارين دنياي اويه ديني
بالخدامه حصلت علمي ويقيني
ابقه خادم ليك والمنبر عريني
وانه حب حسين مختوم بجبيني
اسمي بس كلمه ............... خادم اتسمه
عمري كله بخدمتك عمري كله
.........................................................
من الزغر لليوم وياك بدمعتي
ظلمه احس دنياي والمجلس شمعتي
ما اريدن مال لو جاه الحسرتي
بالذهب مولاي ما بيعن خدمتي
عني من تسأل ................ حبك الاول
عمري كله بخدمتك عمري كله
.........................................................



اشما اخدمك سيدي اشعر قليله
وانته خيرك فارش اعليه شليله
يا عشگ شفته ولا ارضه ابديله
حققتلي امال چانت مستحيله
بخدمة احسيني .................. يكتمل ديني
عمري كله بخدمتك عمري كله
.........................................................
هم شفت واحد يحب صوت النياحه
وانه احب النوح واشعر هوه راحه
واليلوم ايلوم مفتوحه المساحه
انته شاغل دنيتي احچي الصراحه
منبرك جنه ................... ما ابدلنه
عمري كله بخدمتك عمري كله
.........................................................
الخادم
علي صادق المجراوي

(يبن أخوي الهيبه)
...............
يبـن اخـوي الهيبــه ـــــ جيـب سيفــك جيبـــه
وأنـا ويـاك يلأكبـر أنـا ويـاك
.........................
جيب سيفك يبن أخوي وكوم شد أحزامك
وأنا عمـك كمـر هاشــم راح أطـب كدامك
يللــه يلأكبــر يهيبــه ابســـاع هـم أجدامك
جـرد اعله الكــوم يبنــي ياعلــي صمصامك
هـذا سيفـك يومـه ـــــــ خل نطـوق الحومـه
وأنا وياك يلاكبر أنا وياك
..........................
أنا أدري بزود عزمك من تطب تكظيها
أنتـه تربات الفحــول المنعـرف ماضيها
خـاف تشتــد أنـا حاضر عمـك أمتانيها
الحومـه والبيهــا يلأكبر ألا اعصف بيها
من أجــرد سيفــي ـــــ بيهـم أخـذ حيـفـي
أنا وياك يلأكبر أنا وياك
............................
روح لازم ظهـرك أنـا لاتهـم طـب ليـهم
من اليسار أدخل يعمي وليه أرجـع بيهم
وأنا عمك راح افوت من اليمين أعليهم
أشحدهم ايكربـون منــك واللـه ماخليهم
واللـه لفني اصفوفها ـــــ يمي خلها وعوفها
أنا وياك يلأكبر أنا وياك
.............................
أهلك أحنه وبيـك نعـرف يبني ومعلمينك
بطل وتحـل الشدايـــد ياعلـــي أمدربينـك
دمــك ودمي يلأكبــر فـدوه لجـل حسينـك
للشدايــد تـدري بهلـك ياعلــي امخليـنـك
ندري بيــك اكفايـه ــــــ كوم شيــل الرايــه
وأنا وياك يلأكبر أنا وياك
............................





بسمـك وبسمـي يلأكبر خـل ندون أكتابها
كربله وهاي البطوله عمي أحنه أصحابها
مثل حيــدر يـوم خيبـر خلنــه نقلــع بابها
ونهـزم أجيـوش ونـذل بمعركتنـه أربابها
أنـا وأنتـه أزلامها ــــــ وألنـه ينزل هامهـا
أنا وياك يلأكبر أنا وياك
....................................
خادم أهل البيت(ع)
الشاعر: حيدر كامل العبودي

الشاعر حيدر كامل العبودي

اداء الرادود ستار الصالحي

الشاعر حيدر كامل العبودي


بصوت حسين عدنان الكوبعي