الامام العسكري عليه السلام




المنتظر هليله يفگد والده
عمره خمس اسنين الله ايساعده
ولمن ايواري الحبيب
يذكر الجسم السليب
واحسينا



المنتظر هليله بدموعه الجريه
ايغسل ابوه العسكري وينعه الرزيه
لاكن ايدير النظر  للغاضريه
علـ تغسّل من دماه بسيوف  اميه

من زغر دمعاته حمره ابن الحسن
علـ بقه اعله الغبره لا غُسل وكفن
اشما يصد موقف عصيب
يذكر الجسم السليب
واحسينا


من بعد غسله بده ايفصل بلـ اكفان
ويشهگ بـأنفاسه علـ تكفينه تربان
حگه جده اتسلب وعافوه عريان
گبل ابو اليمه منو المذبوح عطشان

گطعو الخنصر وحزو رگبته
سلبو الخاتم وسف واعمامته
حگ ابو صالح يشيب
يذكر الجسم السليب
واحسينا



ايصلي علـ معصوم لا شك حُجه معصوم
وعلـ حسن صلّه الامام المهدي معلوم
وي كل تكبيره حسره ولوعه وهموم
وفكره بالطف سارح ودلاله ملچوم

امن المهر چن ينظر اعله احسينه طاح
وصلّت اعليه البواتر والرماح
يَمّه چن واگف قريب
يذكر الجسم السليب
واحسينا




بلـ لحد لمن كشف وجهه تألم
ابّاله اجت شيبه ابتراب انترست ودم
اتذكر الخيل وصدر جده التهشم
وسهم المثلث الچان امنگع ابـ سَم

ابأيده ابو صالح دفن وجه الصبح
وباله بلــ  الف وتسعميت  جرح
جرحه نازف ما يطيب
يذكر الجسم السليب
واحسينا



ابعينه صد صوب الحرم عاين بچيهن
وخنگته العبره اعله عماته وسبيهن
علهزل يمشن والحبال ابأديهن
وبعد ابو فاضل شمر لن يحدي بيهن

اثنين منهن گلب ابو صالح يون
طاري المتون و يَــــــترتچت الأذن
مضطر ويدعي المجيب
يذكر الجسم السليب
واحسينا


سيد علي عبدالزهره الناجي

بصوت. مسلم المطيري

قصيده اهوازيه.

مـــاتظهر يبو صــــــالح مل اكـرابه فقارك
وياليث الوغى المهيوب گوم اوأطلب بثارك
الثار الثار يالمهدي الثار الثار يالمهدي

تعبت شيعتك مولاي وهجرك طول اعليها
وبعدك نايبات البين تاخذهه وترد بيها
الليله شيعتك ياحيد حزنــــــانه اعله واليها
وفگد العسكري نشاب صوب مهجت انصارك
الثار الثار يالمهدي الثار الثار يالمهدي


من نذكر هدم كبته يروح البال للزهره
ونفس الهجموا اعله الدار. همه الهدمو گبره
وندري بيك هم محتار مثل حيرت علي ابأمره
لكن انت الك انصار متحزمه اويه بتارك
الثار الثار يالمهدي الثار الثار يالمهدي


هينه مصيبة المسموم ويه المنگطع نحره
الك جد انذبح عطشان وركت خيلهم صدره
ملت رگبته من السيف ومل من الرفس ظهره
وصار اسنين يابو اسنين يتنطرعلى اخبارك
الثار الثار يالمهدي الثار الثار يالمهدي

گوم واسرج الميمون ورفع بيرغك عالي
وخل نطبگ عليها الكون الهدت گبل وتالي
غالي اعلينه دم احسين وانته والله اعز غالي
بس أشر نجيك زحوف والا نهوس ابدارك
الثار الثار يالمهدي الثار الثار يالمهدي


نشد لك بيرق العباس وبالعادوك مانرحم
وهاي الگاع سبع اطباق منهم تنصبغ بالدم
نخيتك سيدي مولاي هد بينه يالمشيم
وخل نشعل عليهم نار واصلي العايل بنارك
الثار الثار يالمهدي الثار الثار يالمهدي

ها يالمهدي المشيم افزع يابطل عدنان
وخل انخورس اهل الجور والصاحو عله النسوان
نطلب ثار للمسلوب وثــــار الذبحت الرضعان
اوثار الگطعوله اجفوف اوضل عينه اعله بتارك
الثار الثار يالمهدي الثار الثار يالمهدي

خادم الزهراء ع ابو احمد الطائي

ميمر كربلائي ( نزلة )


للعسكري دموع العين دم وجمر همّاله
................................................................

تجري المدامع والحزن فك بابه
للعسكري ونحيي عزاء امصابه
نار الحزن وسط الگلب لهّابه

ونواسي بيهه المحجوب وجده الرسول وآله
................................................................

هالليله سامره حزينه وتنحب
حيث المصاب بكل أرضهه اتوجّب
بعيونهه الصبّت دمع تترقب

يوم الظهور وياريت يخلص زمن ترحاله
................................................................

بهاي المصيبه الكل سنه تتجدد
نقسم على الغائب الحجة الأوحد
يظهر وخل نار المناطر تبرد

كل خادم بروحه أشواگ عاقد يظل آماله
................................................................

ما أنصفت دنيا العجائب بالآل
والمعتمد بالسم گطعهه الآمال
بالعسكري لمن غدر بالله اشگال ؟

عاده النبي والأطياب وبسقر يخلد حاله
................................................................

والعتره لو سم لو ذبح وسفه وحيف
ثارات وتناطر يرجعهه السيف
يظهر المهدي بواقع ومو بالطيف

ياخذهه كل الثارات ورب العرش يبراله
................................................................

نرفع چفوف الدعوه للباري اليوم
يا ربنا عجّل للغريب المعصوم
وبجاه أبوه النقي الميت مسموم

بهاي الشهاده وننخاك بالعسكري وبجاله
................................................................

من تبتدي الطلعه البهيه ونلگاه
قائمنا ونشد الحزم كلنا إوياه
يرفع شعاره لا اله الا الله

گاع وسمه بذاك اليوم تستعد لآستقباله
................................................................

خادم الإمام الحسين عليه السلام
عمار هليل الواسطي
١٤٤٦ /٢٠٢٤

#أبوذيات

لمولاي الإمام العسكري (عليه السلام)

عيوني اعليك يالمـهدي ترابات
وحزن عاشور بضلوعي ترابات
من طف كــــربله عندي ترابات
خلهـــــن بالگـــبر يوليدي اليه

بس دم يجري بعيوني مظلما
وسهم فگـــدك ابدلّالي مظلما
يبويه اليوم ســـــامرّه مظلما
وعجيبه بالثره اتغـيب الثريه

سيدي ياصاحب الزمان فداك روحي

وسيعه جروحك ومايوم لمّن
واسنينك مـــــرار وضيم لمّن
بقيت اوحيد يالموعـــود لمّن
ادفنت والدك بحجــور المنيه

✍ فراس المحمداوي

#اللهم_عجل_لوليك_الفرج

اليوم بيت العسكري بياحاله
والامام المهدي غاب اهلاله
...
چان بيت العسكري يشع بالضوه
صار خنگه وماكو بي نسمة هوه
اليوم خل نشبع بچي ونلطم سوه
اقرايه تشفي الگلب خنقراله
...
عائلة هالبيت أشرف عائله
گظت لو سم لو ضحايه امچتله
اليوم ياعُظم المصيبه النازله
بياجنايه المعتمد يغتاله
...
سَمه من واحد ربيع الثامنه
بهالسبعتيام كَون الله إنحنه
كل سنه انسوي مجالس كل سنه
والأرض سامره نتعناله
...
حگهه لو سر مَن رأى الليله تضج
والشوارع بالبشر كلهه تعج
للجبال الشامخه الصيحه ترج
ريّض ابهالنعش ياشياله
...
لا تروح وتأخذ اعزيز الگلب
اتيتم المهدي اذا طال الدرب
هاي أول دمعه من عينه تصب
خمسه عمري والحزن يبراله
...
ازغيّر ابعمره وچبير أهل الأرض
وعالجنازه كبّر وقام الفرض
كل علوم اجداده حافظهن حفظ
المهدي ربك بالحقيقه اوحاله
...
ونرجس أم المهدي من راح الامام
ماتت ابداخل طوامير الضلام
عگب ال البيت عالدنيه سلام
واليحبهم ياالف هنياله
.......
اللهم عجل لوليك الفرج
محمد الجماسي

#نعي

بچه المهدي وصرخ ياوالدي تروح
اوتعوف ابنك يتيم وگلبه مجروح
عله فراگك  يبويه  شاغت  الروح
ومن   بعدك   لظل   بحزن   وبْهَم

عليك    اليوم    سامره    حزينه
ولجلك  كل  موالي  تسيل عينه
وعليك   من  القهر   زايد   ونينه
وعرش  الله  عله  مصابك  تولم

تفارگني  وانه   بالغربه   وحدي
واهلي  بعاد   لا   خوان   عندي
وين  اليوصل   الطيبه   ويودي
خبر  كتلك  لهاشم  كون  تعلم

اللهم_عجل_لوليك_الفرج