( الهجوم على دار الوحي )
=============

أبويه ما درى على حالي شجرى
ضلوعي تكسرت مثل القوارير

جريمه تدبرت مثلها ماجرت
ولا حتى نذكرت في الأساطير
---------

هجم بالدار لارحمه إجتَّه ولاكو رهبه

مثل أبْرَهَه بجيوشه هجم يهدِم الكعبه

عصرني وكسّر ضلوعي وعلَيّ ما لان قلبه

لطمني وسقَّط جنيني ولبو ابراهيم سبَّه

دخل وابلا إذن لطمني اعلى الوجِن
يبويه انرِكْزت بصدري المسامير

على العتبه طِحت على فضه صِحِت
ضلوعي تكسرت مثل القوارير
-----------

أبويه ما ندفن بعده على نعشه بلچفان

هجم داري مثل نمرود راسه بألِف شيطان

برجوله رفس للباب واشعل بيه نيران

رِدِت أمنعه لـٰكنّه عصرني ورا الحيطان

من حَسْ بي الدّعي كَسَّر أضلعي
دمّي من الصدر مثل النوافير

على ثيابي يكِت على فضه صحت
ضلوعي تكسرت مثل القوارير
------------

أبويه بعده بچفانه بقبره ما اندفن

العِجِلْ والسّامري هجموا على بيتي بظغن

كسر ضلعي وسقط حملي ولطمني اعلى الوجن

سل سوطه وظل يجلد ويضرب للمتن

دخل عِنْوَه النَّزِل العلي قاده بحبل
هارونك بليَّا اعمامه يسير

وراه آنا اطلعت على فضه صحت
ضلوعي تكسرت مثل القوارير
--------------

بويه العهد والميثاق نقضت أمَّتك

بعدك مااسكِنِت للحود هضموا بضعتك

هتكوا ياأبو ابراهيم بعدك حرمتك

ليتك يارسول الله تعاين لبنتك

قلبها منصدع ومكسورة ضلع
تصرخ بالفزع مالاقت امجير

أولادي تروّعت على فضه صحت
ضلوعي تكسرت مثل القوارير
-------------

يبويه لو شِفِت حيدر ملبّب يسحبوه

حاسر حافي الأقدام هارونك خذوه

من خلفه مع الأولاد خوفي يذبحوه

مكسورة ضلع أصرخ إبن عمّي اتركوه

سمعني ولَيَّه رد يلوّع للجسد
بسوطه وبعد كافي هالتفاسير

هضيمه شقد شِفِت على فضه صحت
ضلوعي تكسرت مثل القوارير
--------------

يبويه من شفِت حيدر يسحبونه بحبل

طلعت إيدي على ضلوعي وأزحف عالرمل

خلّوا عن إبن عمّي يظالم بالعجل

لو اكشف بالدّعآ راسي إلى الله وابتهِل

وأشكو له الشجون ولن تُستمهلون
عليكم تنزل الوان المقادير

على العصره اصبِرِت على فضه صحت
ضلوعي تكسرت مثل القوارير

==============
✍🏻لخادمة أهل البيت
أم جمال خواهر

جريمة الهجوم على دار الزهراء عليها السلام وحرق بابها
وكسر ظلعها واسقاط جنينها

يومين مو اكثر مضن وتحزّمو اهل الفتن
دفعو علية الباب ضلعي وجنيني انصاب
ياوالدي. ياوالدي
..............

توّك غبت/ بگبرك نمت/ يومين مو اكثر غبت عن داري
ابچي واون/ لوجهك احن/اخضر ترابك من مسيل اعباري
ضدي وضد علي جتمعو بويه اصحابك وهجمو
ابابك شعــلو النيــــران. ولا من حرمتك خجلو

ناديت يصحاب النبي. وصّاكم الهادي بعلي
تسمعوني يالاصحاب. ضلعي وجنيني انصاب
ياوالدي. ياوالدي
..............

يهل الفتن/ ام الحسن/بضعة مُحمّد كلكم تعرفوني
وين الوفه/ للمصطفه/وصّاكم تواسوني مو تاذوني
"وإن" يافاطمـــه يگلّي هضمني بكلمته الثاني
شعل بيده الحطب بويه اللعيـن بنـاره اذّاني

هجمو علينه امّتك يابويه ظلمو عترتك
يالمندفن بتراب. ضلعي وجنيني انصاب
ياوالدي. ياوالدي
..............

منهم لذت/ابابي وخفت/بويه ودفع بابي وعصرني الثاني
ضلعي انكسر/ابني انعصر/محسن وگع من عصرته وبچّاني
صحت يابويه صابوني وسطرني الظالم بچفّه
طحت عالگاع مهضومه شتمني الطاغي وتشفّه

لا انت لا يمي علي. يابويه چا منهو الي
مايدري داحي الباب. ضلعي وجنيني انصاب
ياوالدي. ياوالدي
..............

لمن سمع/حيدر فزع/ذل اللعين وداس راسه برجله
فارس مضر/لجلك صبَر/لوما الوصيّة الملتزمها يقتله
علي لوما وصيتك چان فناهم كلهم بحيفه
يدرون بوصيتك هاي. هيه الچتّفت سيفه

يابويه چتفو بالحبل صابر لأمرك ممتثل
يالتعرف الاسباب ضلعي وجنيني انصاب
ياوالدي. ياوالدي
..............

اخذو علي/راح الولي/رادوه يبايع للخليفه الظالم
آنه اطلعت/بويه وصحت/ردِولي حيدر ابن عمي سالم
صحت لوما ترجعونه عليكم ادعي للباري
خافو من غضب ربي ورجع حيدر علي لداري

رديت مكسور الضلع. ولمحسن يصب الدمع
گلبي اليحبك ذاب. ضلعي وجنيني انصاب
ياوالدي. ياوالدي

سيد زيد الفحام
__________________________

الاداء سيد حمادي الحسيني

كسرو ضلعي صبرت
حرقو بيتي صبرت
بان بعيني احمرار
غصبو حقي صبرت
..........…........
كلشي صار البيه سهله ولله سلمت الأمر
سهله طاح المحسن ابني منجتل من العصر
اتحملت رجعو عليه وسوو الماينذكر
بس علي مجتوف اشوفه هنانه ماينفع صبر

ردت ادعي وحيدر حاجاني
باساني بكصتي ورداني
من شاف عيوني ودمعاتي
ظل يبجي اكبالي وبجاني

كسرا قلبي علي
يبكي قهرا علي
ينظر وضعي حزين
ماذا يفعل علي
.....................

ابجي مو قصة مريضه ولا وجع ضلعي السبب
صرت دمعه بعين حيدر من عمت عيني انكب
جنت واهس كل ضحكته يشوفني يروح التعب
هسه بس يصد عليه يكعد اكبالي ونحب

خلص عمره مكابل عيني
ويكلي فراكج ياذيني
هسه شما نشده يحاجيني
وضعج يالزهره يبجيني

يبكي حزنا يقول
من لي انسآ يقول
بيتي قبرآ يصير
بعدي يحكي يقول
...........….
شما تصد عيني اعله ولدي يلجم ضلوعي الهوه
كسر كلبي حسين اجاني يكلي خل نكعد سوه
فكي عينج يمه ليه أن شاء الله نحصل دوه
يمه من كعدة حنانج ما شبع كلبي وروه

يحب رجليني ويكسر خاطر
فكدج يشبه يوم العاشر
راح ابقه الوحدي بلا ناصر
جن صدري اعليه دايس حافر

اقرح جفني ... حسين
زيد كربي ... حسين
يبكي حزنا يقول
صرت يتيمآ ... حسين
................

ليش كبري بلايه حضره ولالي كبه ولا ضريح
كل محرم امشي وانعه الكربله اوكف واطيح
احسد حسين اعله ربعه والمواكب من تصيح
يا لثارات العقيله ويا لثارات الذبيح

يطلع كبري بگبه ورايه
وتتعنه اعليه المشايه
ملايه تحشم ملايه
بصحن الزهره نسوي قرايه

قبري يظهر ... قريب
ولدي يثأر .... قريب
سوف يقوم العزاء
داخل صحني .... قريب
................
#الخادم #موسى #البطلي

الاداء سيد عدنان الموسوي

ابوذيه

زماني يهدم     أحلامي      ونبني
على المحسن ذهيله أصرخ  ونبني
طفل مايحمل اللوعه 
أظنهم كسرو ضلوعه    
          يون وروحه  مفجوعه
  دفنته بالكبر وسمع ونبني
بكل  ونه  ضلع  يكسر  إليه..
                                   **
بليلي ألزم  مهد   محسن    ولولي
الصحابه  من   رحل  طه     ولولي
أنه الزهره نسطر  خدي       ولولي
          الله وهوه ياخذ ثاري إليه.
                     ؛؛:؛:؛:؛
باب     الدار  من   دمي      حنيته
وأنه ضهري بفكد محسن      حنيته
دليلي تحركه كل     ليله      حنيته
        يحن وتصور المحسن    بديه
                  ؛:؛:؛:؛:؛
الدهر    شيد  حزن   بيه     ويبني
وعصرة  موت  عصروني     ويبني
يملك   الموت  إخذ روحي    ويبني
      أريدن  بالكبر   يغفه على إديه
                 ؛:؛:؛:؛:؛
فاطم    ياعلي    طرحت      حملها
ومنو  الغيرك يبو الغيره      حملها
مصايبها   إذا       كلبك      حملها
      شتكل للهادي عن ضلع الزجيه
                ؛:؛:؛:؛؛:؛
الدهر   إم   الحسن   عني  بعدها
وعساني  ماعشت   عمري  بعدها
الثواني  الموتي بحسبها    بعدها
علي أني  وضهري محني على الزجيه
                ؛:؛:؛:؛:؛:؛
عيون     الزهره   من طاحت ترابك
وكلبها     ياعلي      منهم    ترابك
تفر  الكوم   لو تسمع         ترابك
     يعرفونك  علي حامي   الحميه
                ؛:؛:؛:؛:؛:؛
يدنيه     لمي   أحقادج     وضهري
بعد  طه   نكسر ضلعي     وضهري
علي صار الصبح أضلم       وضهري
أسود    والسمه ضلمت      عليه
                 ؛:؛:؛:؛:؛:؛

--
ابوذيات بقلم  الشاعر نسيم الحميداوي🖋

زماني يهدم     أحلامي      ونبني
على المحسن ذهيله أصرخ  ونبني
طفل مايحمل اللوعه 
أظنهم كسرو ضلوعه    
          يون وروحه  مفجوعه
  دفنته بالكبر وسمع ونبني
بكل  ونه  ضلع  يكسر  إليه..
                                   **
بليلي ألزم  مهد   محسن    ولولي
الصحابه  من   رحل  طه     ولولي
أنه الزهره نسطر  خدي       ولولي
          الله وهوه ياخذ ثاري إليه.
                    

الهجوم على دار مولاتنا الزهراء (صلوات الله عليها)

مولاتي الزهراء بفراق ولدها المحسن 💔..



العمره يوم اينام بحضان امنياتة
الا ابني اول اصياره مماتة

امنيتي؟ چانت اسمع يناديني يُمة
راحت امنيتي وتبدت كل حياتة

ولو مره بحضني أكعد حتى اگولن
هذا ابني المحسن وشوفو شحلاتة


مات مات...صاير دمِة نيشانة
مات مات...وانه صرت حيرانة
مات مات...وذبلن بعد قمصانة


اه اه يبني ها يبني...

1____

ردت لحضه يفك عيونه حتى انضرة
مو يموت وروحته تزيدلي كسرة

والله حيره اگبالي اشوفن لون دمة
يبني اگعد فرگتك بضلوعي جمرة

ضلعي يلچمني ورحيلك هم لچمني
يوم واحد ما كمل لوليدي عمرة


راح راح...وحتى الهوه ماشمة
راح راح...ما لحگت اشتمة
راح راح...راح وبقت بس لچمة


اه اه يبني ها يبني...

2____

بابي محروگه وجمر صارت عتبتي
وضلعي مكسوره بحقدهم يامحنتي

بين حايط صار طولي ماكو رحمه
وطگن اضلوعي وطحت انه وعبرتي

وخدي مسطوره حسافه شلون بيه
لو علي يشاهدني شيهود حسرتي


اه اه ....باب الجذع اذاني
اه اه ....صواب الضلع چواني
اه اه ....موصه علي وما جاني


اه اه يبني ها يبني....

3___

الضلعة مكسور (الهوه) تاذيهـ شمتة
وانه ضلعي ما تصح واجبر كسرتة

جرح ضلعي وجرح محسن ما يطيبن
توه صاير والدمه رافگ مهجتة

يبني مكتوبه علينه يصير هيچي
انه ضلعي؟؟وانته يبني تموت سكته


صار صار ...جرحك جرح يلچمني
صار صار...هوه الذي يموتني
صار صار...بريتي الهوه يخنگني


اه اه يبني ها يبني...

4___

يمه اگعد بلكي يبني يطيب ضلعي
وانتة تكبر؟ وانسه جرحي وانسه وضعي

لچن كلشي اتبدة هسه انفاسي گوه
انة (نسمه) والجرح ماهوه طبعي

شلون بية والضلع لچماتة تكتل
يعني اموتن والهوه يطفيلي شمعي


ريت ريت...انتة عشت يايمه
ريت ريت...وانه احتمل كل لچمه
ريت ريت...طولك يرد واشتمه

اه اه يبني ها يبني...

5____

خادم الزهراء ص

✍️محسن الباوي.

الاداء محسن الباوي